တၢ်မၤလိ ၁၃
ယဟိဝၤယွၤ ကဒီသဒၢနၤဒ်လဲၣ်
“ကစၢ်န့ၣ်အကလုၢ်တီ ဒီးအကဒုးဆူၣ်ထီၣ်သု ဒီးကဒီသဒၢသုလၢ မုၣ်ကီၤလံၢ် အစုပူၤလီၤ.”—၂ သ့းစၤလနံ ၃:၃.
တၢ်သးဝံၣ် ၁၂၄ တီထီဘိ
တၢ်မၤလိအံၤ အတၢ်တိာ်ပာ်a
၁. ဘၣ်မနုၤအဃိ ယ့ၣ်ၡူးတဲဘၣ် ယဟိဝၤယွၤလၢ ကဒီသဒၢအပျဲၢ်အဘီၣ်တဖၣ်လဲၣ်.
တချုးဖဲယ့ၣ်ၡူး သံဒံးဘၣ်အနၤန့ၣ် အဝဲဆိကမိၣ်ထီၣ်ဝဲ ဘၣ်ဃးဒီး တၢ်မၤကွၢ်လၢ အပျဲၢ်အဘီၣ်တဖၣ် ကလဲၤခီဖျိဘၣ်ဝဲလီၤ. ယ့ၣ်ၡူးအဲၣ်အပျဲၢ်အဘီၣ်တဖၣ်အဃိ အတဲအပၢ်လၢ “မ့ၢ်လၢမုၣ်ကီၤလံၢ် အဃိ အံးက့ၤကွၢ်က့ၤ အဝဲသ့ၣ်တက့ၢ်.” (ယိၤဟၣ် ၁၇:၁၄, ၁၅) ယ့ၣ်ၡူးသ့ၣ်ညါဝဲလၢ ဖဲအဝဲဂဲၤဆၢထၢၣ်သမူထီၣ်က့ၤ ဒီးက့ၤထီၣ်ဆူမူခိၣ်ဝံၤအလီၢ်ခံ မုၣ်ကီၤလံၢ် ကဂုာ်ကျဲးစၢးထီဒါ ကယဲၢ်ပှၤတဂၤလၢ်လၢ်လၢအမၤ ယဟိဝၤယွၤအတၢ်မၤန့ၣ်လီၤ. အဃိ ယဟိဝၤယွၤ အခ့အပှၤတဖၣ် ကလိၣ်ဘၣ်ဝဲတၢ်ဒီသဒၢလီၤ.
၂. ယဟိဝၤယွၤ ကစံးဆၢပတၢ်ထုကဖၣ်န့ၣ် ပသ့ၣ်ညါဘၣ်ဒ်လဲၣ်.
၂ ယဟိဝၤယွၤစံးဆၢ ယ့ၣ်ၡူးအတၢ်ထုကဖၣ် မ့ၢ်လၢအအဲၣ်အဖိခွါအဃိလီၤ. ပမ့ၢ်ဂုာ်ကျဲးစၢးအဂ့ၤကတၢၢ်ဒ်သိး ပကမၤသးခု ယဟိဝၤယွၤအသးန့ၣ် အဝဲကအဲၣ်ပှၤ ဒီးကစံးဆၢပတၢ်ထုကဖၣ် ဒီးကဒီသဒၢပှၤစ့ၢ်ကီးလီၤ. ဒ်ဟံၣ်ခိၣ်လၢအပှဲၤဒီး တၢ်အဲၣ်တၢ်ကွံာ်တဂၤအသိး ယဟိဝၤယွၤစ့ၢ်ကီး ကဆဲးကဟုကယာ် အဖိအလံၤတဖၣ်လီၤ. အဝဲမ့ၢ်တမၤဝဲဒ်န့ၣ်ဘၣ်န့ၣ် အမံၤလၤသၣ်ကပီၤ ဒီးအမံၤဂ့ၤသၣ်ဂ့ၤ ကဟးဂီၤဝဲလီၤ.
၃. မုၢ်မဆါတနံၤအံၤ ဘၣ်မနုၤအဃိ ပလိၣ်ဘၣ် ယဟိဝၤယွၤအတၢ်ဒီသဒၢလဲၣ်.
၃ ပလိၣ်ဘၣ်ယဟိဝၤယွၤ အတၢ်ဒီသဒၢအါန့ၢ်ဒံး လၢအပူၤကွံာ်လီၤ. မုၣ်ကီၤလံၢ် ဘၣ်တၢ်ဟီထီၣ်ကွံာ်အီၤလၢ မူခိၣ်အဃိ “အသးဒိၣ်ထီၣ်တၢ်ဒိၣ်မး” လီၤ. (လီၣ်ဖျါ ၁၂:၁၂) မုၣ်ကီၤလံၢ်မၤဝဲ ဒ်သိးပှၤလၢအမၤအၢမၤနးပှၤတဖၣ် ဆိကမိၣ်ဝဲလၢ အဝဲသ့ၣ် “မၤတၢ်မၤ စီဆှံတခါလၢ ကစၢ်ယွၤအဂီၢ်လီၤ.” (ယိၤဟၣ် ၁၆:၂) ပှၤလၢအတဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် ကမၤအၢမၤနးပှၤ ခီဖျိလၢ ပတအိၣ်မူ ဒ်အဝဲသ့ၣ်အသိးဘၣ်အဃိလီၤ. ဒ်လဲၣ်ဂ့ၤဒ်လဲၣ်ဂ့ၤ တဘၣ်ပျံၤတၢ်နီတမံၤတဂ့ၤ. ဘၣ်မနုၤအဃိလဲၣ်. ကစၢ်ယွၤအကလုၢ်ကထါတဲဝဲလၢ “ကစၢ်န့ၣ် အကလုၢ်တီ ဒီးအကဒုးဆူၣ်ထီၣ်သု ဒီးကဒီသဒၢသုလၢ မုၣ်ကီၤလံၢ် အစုပူၤလီၤ.” (၂ သ့းစၤလနံ ၃:၃) ယဟိဝၤယွၤ ကဒီသဒၢပှၤဒ်လဲၣ်. ပကတဲသကိး တၢ်ဂ့ၢ်ခံမံၤလၢ ယဟိဝၤယွၤဟ့ၣ်လီၤပှၤလီၤ.
ယဟိဝၤယွၤ ကတဲာ်ကတီၤန့ၢ်ပှၤ တၢ်ဖိတၢ်လံၤခဲလၢာ် လၢတၢ်ဒုးအဂီၢ်
၄. ဒ် အ့းဖ့းစူး ၆:၁၃-၁၇ ပာ်ဖျါထီၣ်ဝဲအသိး ယဟိဝၤယွၤဟ့ၣ်လီၤပှၤ တၢ်ဒီသဒၢမနုၤလဲၣ်.
၄ ယဟိဝၤယွၤ ကတဲာ်ကတီၤန့ၢ်ပှၤ တၢ်ဖိတၢ်လံၤခဲလၢာ် လၢတၢ်ဒုးအဂီၢ် ဒ်သိးကဒီသဒၢပှၤလၢ မုၣ်ကီၤလံၢ် အတၢ်ထီဒုၣ်ထီဒါတဖၣ်လီၤ. (ဖး အ့းဖ့းစူး ၆:၁၃-၁၇ တက့ၢ်.) တၢ်ဖိတၢ်လံၤခဲလၢာ်လၢ အဟဲလၢကစၢ်ယွၤအအိၣ်န့ၣ် ကဲဘျုးကဲဖှိၣ်လၢ ပဂီၢ်သပှၢ်တၢၢ်လီၤ. ဒ်သိးတၢ်ဖိတၢ်လံၤတဖၣ်အံၤ ကဒီသဒၢပှၤအဂီၢ် ပကဘၣ်သူအီၤကိးခါဒဲး ဒီးပတဘၣ်ပာ်တ့ၢ်အီၤနီတခါဘၣ်. တၢ်ဖိတၢ်လံၤတခါစုာ်စုာ်အံၤ အဲၣ်ဒိးဒိလီၤဝဲမနုၤလဲၣ်. ခဲအံၤပကကွၢ်သကိးလီၤ.
၅. တၢ်မ့ၢ်တၢ်တီ အယီၢ်တကိးန့ၣ် မ့ၢ်မနုၤလဲၣ် ဒီးဘၣ်မနုၤအဃိ ပကဘၣ်စၢဃာ်အီၤလဲၣ်.
၅ တၢ်မ့ၢ်တၢ်တီ အယီၢ်တကိးန့ၣ် အဲၣ်ဒိးဒိလီၤဝဲ တၢ်မ့ၢ်တၢ်တီလၢ ကစၢ်ယွၤအကလုၢ်ကထါ လံာ်စီဆှံအပူၤလီၤ. ဘၣ်မနုၤအဃိ ပကဘၣ်စၢဃာ် ယီၢ်တကိးလဲၣ်. မ့ၢ်လၢ မုၣ်ကီၤလံၢ်န့ၣ် မ့ၢ်ဝဲ “တၢ်လံၣ်တၢ်လီအပၢ်” အဃိလီၤ. (ယိၤဟၣ် ၈:၄၄) မုၣ်ကီၤလံၢ် အလံၣ်န့ၢ်လီန့ၢ်တၢ် အိၣ်အနံၣ်လၢ အကထိတဖၣ်လံ ဒီးအဝဲ “ဆှၢကမၣ် ဟီၣ်ခိၣ်ခဲလၢာ်” လီၤ. (လီၣ်ဖျါ ၁၂:၉) ဘၣ်ဆၣ် တၢ်မ့ၢ်တၢ်တီလၢ လံာ်စီဆှံပူၤန့ၣ် ကဒီသဒၢပှၤလၢ မုၣ်ကီၤလံၢ် အတၢ်လံၣ်တၢ်လီတဖၣ်လီၤ. ပစၢဃာ် တၢ်မ့ၢ်တၢ်တီအယီၢ်တကိး လၢအမ့ၢ်တၢ်နာ်ကသ့လၢကျဲဒ်လဲၣ်. ပစၢဃာ်တၢ်မ့ၢ်တၢ်တီ အယီၢ်တကိး ခီဖျိပမၤလိ တၢ်မ့ၢ်တၢ်တီဘၣ်ဃးဒီး ယဟိဝၤယွၤအဂ့ၢ် ဒီးပဘူၣ်ထီၣ်ဘါထီၣ်အီၤ “ဒ်သးစီဆှံ အတၢ်ဟံးစုနဲၣ်ကျဲအသိး ဒီးလၢ တၢ်မ့ၢ်တၢ်တီ” အဃိ ပမၤတၢ်တီတီလိၤလိၤခဲလၢာ်လီၤ.—ယိၤဟၣ် ၄:၂၄; အ့းဖ့းစူး ၄:၂၅; ဧ့ၤဘြံၤ ၁၃:၁၈.
ယီၢ်တကိး မ့ၢ်ဝဲ တၢ်မ့ၢ်တၢ်တီတဖၣ် လၢလံာ်စီဆှံအပူၤ
၆. တၢ်တီတၢ်လိၤ အသဃိးန့ၣ် မ့ၢ်မနုၤလဲၣ် ဒီးဘၣ်မနုၤအဃိ ပဘၣ်သိးထီၣ်အီၤလဲၣ်.
၆ တၢ်တီတၢ်လိၤ အသဃိးန့ၣ် အဲၣ်ဒိးဒိလီၤဝဲ ယဟိဝၤယွၤ အတၢ်သိၣ်တၢ်သီလၢ အတီအလိၤတဖၣ်လီၤ. ဘၣ်မနုၤအဃိ ပကဘၣ်သိးထီၣ် တၢ်တီတၢ်လိၤ အသဃိးလဲၣ်. ဒ်သဃိးဒီသဒၢဝဲ ပှၤသုးဖိတဂၤအသးအသိး ယဟိဝၤယွၤ အတၢ်သိၣ်တၢ်သီလၢ အတီအလိၤန့ၣ် ကဒီသဒၢပသး ဒ်သိးဟီၣ်ခိၣ်လၢအအၢအသီတဘ့ၣ်အံၤ သုတလုၢ်ဘၢပှၤတဂ့ၤအဂီၢ်လီၤ. (ကတိၤဒိ ၄:၂၃) ယဟိဝၤယွၤ အဲၣ်ဒိးဝဲလၢ ပကအဲၣ်အီၤ ဒီးမၤအတၢ်မၤလၢ ပသးဒီဖျၢၣ်ညါလီၤ. (မးသဲ ၂၂:၃၆, ၃၇) အဃိ ဒ်သိး ပသုတမၤယဟိဝၤယွၤ အတၢ်မၤလၢ ပသးဒီဖျၢၣ်လၢၤတဂ့ၤအဂီၢ် မုၣ်ကီၤလံၢ် ဂုာ်ကျဲးစၢးဝဲလၢ ပကအဲၣ်တၢ်အိၣ်လၢဟီၣ်ခိၣ်ချၢဒီး ပကအဲၣ်တၢ်လၢ ယဟိဝၤယွၤသးဟ့ဝဲတဖၣ်လီၤ. (ယၤကိာ် ၄:၄; ၁ ယိၤဟၣ် ၂:၁၅, ၁၆) ပမ့ၢ်တမၤထွဲ မုၣ်ကီၤလံၢ်အတၢ်လီတၢ်ဝ့ၤတဖၣ်အံၤဘၣ်န့ၣ် အဝဲကဂုာ်ကျဲးစၢး မၤအၢမၤနးပှၤ ဒ်သိးပကမၤတၢ်လၢ အတဘၣ်ယဟိဝၤယွၤအသးတဖၣ်လီၤ.
သဃိး မ့ၢ်ဝဲ ယဟိဝၤယွၤ အတၢ်တီတၢ်လိၤ
၇. ပကသိးထီၣ် တၢ်တီတၢ်လိၤ အသဃိးလၢကျဲဒ်လဲၣ်.
၇ ပသိးထီၣ်တၢ်တီတၢ်လိၤ အသဃိးသ့ခီဖျိ ပဒိကနၣ် ယဟိဝၤယွၤ အကလုၢ် ဒီးအိၣ်မူမၤထွဲ ယဟိဝၤယွၤ အတၢ်သိၣ်တၢ်သီ လၢအတီအလိၤတဖၣ်လီၤ. (စံးထီၣ်ပတြၢၤ ၉၇:၁၀) ပှၤတနီၤနီၤ ကထံၣ်ဝဲလၢ ယဟိဝၤယွၤ အတၢ်သိၣ်တၢ်သီန့ၣ် ဃံးတလၢ လၢအဝဲသ့ၣ်အဂီၢ်လီၤ. ဘၣ်ဆၣ် ပမ့ၢ်တအိၣ်မူမၤထွဲ လံာ်စီဆှံအတၢ်ဟံးစုနဲၣ်ကျဲလၢ ပတၢ်အိၣ်မူအပူၤဘၣ်န့ၣ် ပကလီၤဂာ်ဒ် ပှၤသုးဖိလၢ အဃဲၣ်လီၤကွံာ်အသဃိး ဖဲတၢ်ဒုးအဆၢကတီၢ် ခီဖျိ အဆိကမိၣ်ဝဲလၢ သဃိးအံၤအဃၢတလၢ လၢအဂီၢ်လီၤ. ပမ့ၢ်မၤဒ်န့ၣ်န့ၣ် ပတမ့ၢ်ပှၤလၢအကူၣ်တၢ်သ့ဘၣ်. ဘၣ်ဆၣ် ပမ့ၢ်အဲၣ်ယဟိဝၤယွၤန့ၣ် ပကထံၣ်လၢ အတၢ်မၤလိာ်တဖၣ်န့ၣ် “တကဲထီၣ်တၢ်ဝံဃၢ” လၢပဂီၢ်ဘၣ်. လၢတၢ်န့ၣ်အလီၢ် အကဲထီၣ်တၢ်ဒီသဒၢ လၢပသးသမူအဂီၢ်လီၤ.—၁ ယိၤဟၣ် ၅:၃.
၈. ပဒိးထီၣ်ခီၣ်ဖံးလၢ ပကအိၣ်ကတဲာ်ကတီၤ ပာ်စၢၤပသးလၢ တၢ်စံၣ်တဲၤတဲလီၤ တၢ်သးခုကစီၣ်အဂီၢ်န့ၣ် အခီပညီဒ်လဲၣ်.
၈ စီၤပီလူး ဟ့ၣ်ဂံၢ်ဟ့ၣ်ဘါပှၤလၢ ပကဒိးထီၣ်ခီၣ်ဖံးဒ်သိး ပကကတဲာ်ကတီၤ ပာ်စၢၤပသးထီဘိလၢ ပကစံၣ်တဲၤတဲလီၤတၢ်သးခုကစီၣ် ဘၣ်ဃးဒီး တၢ်ဃူတၢ်ဖိးလီၤ. စီၤပီလူး အဲၣ်ဒိးတဲဝဲလၢ ထီဘိန့ၣ် ပကအိၣ်ကတဲာ်ကတီၤ ပာ်စၢၤပသးလၢ ပကစံၣ်တဲၤတဲလီၤ ဘီမုၢ်တၢ်သးခုကစီၣ်အဂီၢ်လီၤ. ဖဲပတဲပၠးပှၤဂၤ ဘၣ်ဃးဒီး လံာ်စီဆှံတၢ်ကစီၣ်အခါ ပတၢ်နာ်ဟဲဆူၣ်ထီၣ်လီၤ. ဖဲပထံၣ်ဘၣ် ယဟိဝၤယွၤ အခ့အပှၤလၢဟီၣ်ခိၣ်ဒီဘ့ၣ် သူဝဲအတၢ်ခွဲးတၢ်ယာ်လၢ ကစံၣ်တဲၤတဲလီၤတၢ် တပူၤလၢ်လၢ်အခါ ပဒိးန့ၢ်ဘၣ် တၢ်ဂံၢ်တၢ်ဘါဒိၣ်မးလီၤ. အဒိ, အဝဲသ့ၣ်စံၣ်တဲၤတဲလီၤတၢ် လၢတၢ်မၤလီၢ်, လၢကၠိ ဒီးလၢတၢ်ဖံးတၢ်မၤအဟီၣ်ကဝီၤတဖၣ်လီၤ. ဒီးတနီၤနီၤ အဝဲသ့ၣ်လဲၤစံၣ်တဲၤတဲလီၤတၢ် လၢတဟံၣ်ဘၣ်တဟံၣ်, လၢတၢ်ဆါတၢ်ပှ့ၤအလီၢ် ဒီးအဂၤတနီၤ ဖဲအဝဲသ့ၣ် လဲၤဟးအိၣ်သကိးအဘူးအတံၢ်လၢ တမ့ၢ်ယဟိဝၤပှၤအုၣ်အသးဘၣ်အခါ အဝဲသ့ၣ်တဲပၠးဝဲတၢ်သးခုကစီၣ်လီၤ. တကးဒံးဘၣ် အဝဲသ့ၣ်တဲသကိးတၢ်ဒီး ပှၤလၢအဝဲသ့ၣ်သ့ၣ်ညါဝဲ စ့ၢ်ကီးလီၤ. ပမ့ၢ်ပျံၤတၢ်ဒီး စံၣ်တဲၤတဲလီၤတၢ် မ့ၢ်တဘူၣ်ဘၣ်န့ၣ် ပကလီၤဂာ်ဒ်သိးဒီး ပှၤသုးဖိတဂၤ လၢဘ့ၣ်လီၤကွံာ်အခီၣ်ဖံးလၢ တၢ်ဒုးပျီအပူၤ ဒီးအခီၣ် ကဘၣ်ဒိဘၣ်ထံးဝဲ ညီဒိၣ်မးလီၤ. ဒီးလၢခံ ဖဲပှၤဟဲဒုးအီၤအခါ အဝဲဒီသဒၢလီၤအသး တသ့လၢၤဘၣ်. ဒီးမၤထွဲဝဲအသုးခိၣ် အတၢ်ကလုၢ်စ့ၢ်ကီး တန့ၢ်လၢၤဘၣ်.
ခီၣ်ဖံး မ့ၢ်ဝဲ အိၣ်ကတဲာ်ကတီၤ ပာ်စၢၤသးလၢ ကစံၣ်တဲၤ တဲလီၤတၢ်သးခုကစီၣ်
၉. ဘၣ်မနုၤအဃိ ပကဘၣ်စိာ်ဃာ် တၢ်နာ်အကတီၤဖးဒိၣ်တဘ့ၣ်လဲၣ်.
၉ တၢ်နာ်ကတီၤဖးဒိၣ်တဘ့ၣ်န့ၣ် ဒိလီၤဝဲလၢ ပတၢ်နာ်ယဟိဝၤယွၤလီၤ. ပနာ်လၢ ယဟိဝၤယွၤ ကမၤလၢပှဲၤထီၣ် အတၢ်အၢၣ်လီၤအီလီၤခဲလၢာ်လီၤ. တၢ်နာ်အံၤ မၤစၢၤပှၤလၢက “မၤလီၤပံာ် မုၣ်ကီၤလံၢ်အပျၢ်မ့ၣ်အူခဲလၢာ်” လီၤ. ဘၣ်မနုၤအဃိ ပကဘၣ်စိာ်ဃာ် ကတီၤဖးဒိၣ်တဘ့ၣ်အံၤလဲၣ်. ကတီၤဖးဒိၣ်အံၤ ကဒီသဒၢပှၤလၢ ပှၤလၢအစူးကွံာ်ညိကွံာ်တၢ်နာ်တဖၣ် အတၢ်သိၣ်တၢ်သီ ဒ်သိးအလံၣ်န့ၢ်လီန့ၢ်ပှၤ သုတန့ၢ်တဂ့ၤအဂီၢ်လီၤ. ဒီးဖဲပှၤတဲအၢတဲသီပှၤ ဒီးတဲဆါပှၤ ဘၣ်ဃးဒီး ပတၢ်စူၢ်တၢ်နာ်အခါ ပသးသုတလီၤစၢ်တဂ့ၤအဂီၢ်လီၤ. ပတၢ်နာ်မ့ၢ်တအိၣ်ဘၣ်န့ၣ် ဖဲပှၤမ့ၢ်ဆီၣ်သနံးပှၤလၢ ပသုတမၤထွဲ ယဟိဝၤယွၤအတၢ်သိၣ်တၢ်သီတဂ့ၤအခါ ပတြီဆၢကွံာ်အီၤတန့ၢ်ဘၣ်. ဘၣ်ဆၣ် လၢကၠိမ့ၢ်ဂ့ၤ, လၢတၢ်မၤလီၢ်မ့ၢ်ဂ့ၤ ပမ့ၢ်ဂ့ၢ်လိာ်ကွံာ်တၢ်လၢ ယဟိဝၤယွၤသးဟ့ဝဲန့ၣ် မ့ၢ်ဒၣ်ပတၢ်နာ်ဒီသဒၢပှၤလီၤ. (၁ ပ့းတရူး ၃:၁၅) ဖဲပဂ့ၢ်လိာ်ကွံာ်တၢ်မၤလၢ အကဟ့ၣ်ပှၤစ့အါအါ ဘၣ်ဆၣ်အကမၤဘၣ်ဒိ ပတၢ်ဘူၣ်ထီၣ်ဘါထီၣ် ယဟိဝၤယွၤအခါန့ၣ် မ့ၢ်ဒၣ် ပစိာ်ဃာ် တၢ်နာ်အကတီၤလီၤ. (ဧ့ၤဘြံၤ ၁၃:၅, ၆) ပမ့ၢ်ထံၣ်ဘၣ်ဒီး တၢ်ထီဒုၣ်ထီဒါ သနာ်က့ ပမ့ၢ်ဆဲးမၤ ယဟိဝၤယွၤအတၢ်မၤန့ၣ် ပတၢ်နာ်ကဒီသဒၢပှၤလီၤ.—၁ သ့းစၤလနံ ၂:၂.
ကတီၤ မ့ၢ်ဝဲ တၢ်နာ်ယဟိဝၤယွၤ ဒီးအတၢ်အၢၣ်လီၤ အီလီၤတဖၣ်
၁၀. တၢ်အုၣ်က့ၤခီၣ်က့ၤ အခိၣ်ဖျီၣ်ထးန့ၣ် မ့ၢ်မနုၤလဲၣ် ဒီးဘၣ်မနုၤအဃိ ပကဘၣ်ဖျီၣ်ထီၣ်အီၤလဲၣ်.
၁၀ တၢ်အုၣ်က့ၤခီၣ်က့ၤ အခိၣ်ဖျီၣ်ထးန့ၣ် မ့ၢ်ဝဲတၢ်မုၢ်လၢ်လၢ ယဟိဝၤယွၤ ဟ့ၣ်ပှၤလီၤ. တၢ်မုၢ်လၢ်အံၤမ့ၢ်ဝဲ ခိၣ်ဖးလၢ ပှၤလၢအမၤယဟိဝၤယွၤအတၢ်မၤ ဒီးအဝဲသ့ၣ်မ့ၢ်သံဒၣ်လဲာ် ယဟိဝၤယွၤ ကမၤသမူထီၣ်က့ၤအဝဲသ့ၣ်လီၤ. (၁ သ့းစၤလနံ ၅:၈; ၁ တံၤမသ့း ၄:၁၀; တံတူး ၁:၁, ၂) ဒ်ခိၣ်ဖျီၣ်ထး ဒီသဒၢဝဲ ပှၤသုးဖိတဂၤအခိၣ်အသိး ပတၢ်မုၢ်လၢ် အတၢ်အုၣ်က့ၤခီၣ်က့ၤန့ၣ် ဒီသဒၢဝဲ ပတၢ်ဆိကမိၣ်လီၤ. ကဒီသဒၢဝဲလၢကျဲဒ်လဲၣ်. တၢ်မုၢ်လၢ်အံၤ ကမၤစၢၤပှၤဒ်သိး ပကသးစၢၢ်ဆၢ ယဟိဝၤယွၤ အတၢ်အၢၣ်လီၤအီလီၤတဖၣ် ဒီးကမၤစၢၤပှၤလၢ ပလဲၤခီဖျိ တၢ်ကီတၢ်ခဲတဖၣ်ကန့ၢ်အဂီၢ်လီၤ. ပကဖျီၣ်ထီၣ် ခိၣ်ဖျီၣ်ထးအံၤ လၢကျဲဒ်လဲၣ်. ပဖျီၣ်ထီၣ်အီၤ ခီဖျိပကဆိကမိၣ်တၢ်လၢ အလီၤပလိာ်ဒီး ကစၢ်ယွၤအတၢ်ဆိကမိၣ်တဖၣ်လီၤ. အဒိ, ပတသးစၢၢ်ဆၢလၢ ပကထူးထီၣ်တီၤထီၣ်အဂီၢ်ဘၣ်. လၢတၢ်န့ၣ်အလီၢ် ပကသးစၢၢ်ဆၢ တၢ်မုၢ်လၢ်လၢ ကစၢ်ယွၤဟ့ၣ်လီၤပှၤလီၤ.—စံးထီၣ်ပတြၢၤ ၂၆:၂; ၁၀၄:၃၄; ၁ တံၤမသ့း ၆:၁၇.
ခိၣ်ဖျီၣ်ထး မ့ၢ်ဝဲ တၢ်မုၢ်လၢ်ဘၣ်ဃးဒီး တၢ်မူအထူအယိာ်
၁၁. သးစီဆှံအနးန့ၣ် မ့ၢ်မနုၤလဲၣ်. ဒီးဘၣ်မနုၤအဃိ ပကဘၣ်သူအီၤလဲၣ်.
၁၁ သးစီဆှံအနးန့ၣ် မ့ၢ်ဝဲကစၢ်ယွၤအကလုၢ်ကထါလံာ်စီဆှံလီၤ. သးစီဆှံအနးအံၤ အိၣ်ဒီးအစိအကမီၤ လၢကကျီကွံာ် တၢ်လံၣ်တၢ်လီ ဒီးကမၤထူၣ်ဖျဲးထီၣ်ပှၤလၢ တၢ်သိၣ်တၢ်သီအကမၣ် ဒီးလုၢ်လၢ်လၢအတဂ့ၤဘၣ်တဖၣ်လီၤ. (၂ ကရံၣ်သူး ၁၀:၄, ၅; ၂ တံၤမသ့း ၃:၁၆, ၁၇; ဧ့ၤဘြံၤ ၄:၁၂) ပမၤလိဘၣ်လၢ ပကဘၣ်ဟံးထီၣ် သးစီဆှံအနး ခီဖျိပကဘၣ်မၤ နီၢ်ကစၢ်တၢ်မၤလိလံာ်စီဆှံ ဒီးတူၢ်လိာ်တၢ်သိၣ်လိလၢ အဟဲလၢ ကစၢ်ယွၤအတၢ်ကရၢကရိန့ၣ်လီၤ. (၂ တံၤမသ့း ၂:၁၅) တကးဒံးဘၣ် တၢ်ဖိတၢ်လံၤခဲလၢာ်လၢ အဟဲလၢကစၢ်ယွၤအအိၣ်လၢ တၢ်ဒုးအဂီၢ်န့ၣ် အိၣ်ဒီးအစိကမီၤဖးဒိၣ်လံ သနာ်က့ ယဟိဝၤယွၤ ဟ့ၣ်ဒံးပှၤတၢ်ဒီသဒၢ လၢအဂၤတခါဒံးလီၤ. ဒီးအဝဲန့ၣ် ကမ့ၢ်တၢ်မနုၤလဲၣ်.
နး မ့ၢ်ဝဲ ကစၢ်ယွၤ အကလုၢ်ကထါ လံာ်စီဆှံ
ပတဘၣ်ဒုးတၢ် ထဲတဂၤဧိၤဘၣ်
၁၂. ပလိၣ်ဘၣ်ဒံး တၢ်မနုၤလဲၣ် ဒီးဘၣ်မနုၤအဃိလဲၣ်.
၁၂ ပှၤသုးဖိလၢအအိၣ်ဒီး တၢ်လဲၤခီဖျိတဂၤန့ၣ် သ့ၣ်ညါဝဲလၢ ကမၤနၢၤဝဲ အဒုၣ်အဒါလၢအနီၣ်ဂံၢ်အါ ထဲလၢအနီၢ်ကစၢ်န့ၣ် တန့ၢ်ဘၣ်. အဝဲလိၣ်ဘၣ် သုးဖိလၢအဂၤတဖၣ် အတၢ်မၤစၢၤလီၤ. ဒ်န့ၣ်အသိး ပကဒုးနၢၤမုၣ်ကီၤလံၢ် ဒီးပှၤလၢအပိာ် မုၣ်ကီၤလံၢ်အခံတဖၣ် ကန့ၢ်အဂီၢ် ပမၤထဲတဂၤဧိၤတန့ၢ်ဘၣ်. ပလိၣ်ဘၣ်ပဒီပုၢ်ဝဲၢ်မုၣ်ခွါတဖၣ် အတၢ်မၤစၢၤလီၤ. အဃိ ယဟိဝၤယွၤဟ့ၣ်လီၤပှၤ “ဒီပုၢ်ဝဲၢ်တဖၣ်ခဲလၢာ်” လၢကမၤစၢၤပှၤလီၤ.—၁ ပ့းတရူး ၂:၁၇.
၁၃. ဒ် ဧ့ၤဘြံၤ ၁၀:၂၄, ၂၅ ပာ်ဖျါထီၣ်ဝဲအသိး ပမ့ၢ်လဲၤထီၣ်တၢ်အိၣ်ဖှိၣ်န့ၣ် ပကဒိးန့ၢ်ဘၣ် အဘျုးဒ်လဲၣ်.
၁၃ ကျဲတဘိလၢ ပဒိးန့ၢ်ဘၣ် ပဒီပုၢ်ဝဲၢ်မုၣ်ခွါတဖၣ်အတၢ်မၤစၢၤန့ၣ် ခီဖျိပထီၣ်တၢ်အိၣ်ဖှိၣ်ရိဖှိၣ်လီၤ. (ဖး ဧ့ၤဘြံၤ ၁၀:၂၄, ၂၅ တက့ၢ်.) ပဝဲခဲလၢာ်န့ၣ် တဘျီတခီၣ် ပသးလီၤစၢ်သ့ဝဲလီၤ. ဖဲန့ၣ်အခါ ပမ့ၢ်လဲၤထီၣ်တၢ်အိၣ်ဖှိၣ်န့ၣ် ပကဒိးန့ၢ်ဘၣ်တၢ်ဂံၢ်တၢ်ဘါလီၤ. ခီဖျိ ပဒီပုၢ်ဝဲၢ်မုၣ်ခွါတဖၣ်စံးဆၢတၢ် လၢတၢ်အိၣ်ဖှိၣ်အပူၤအဃိ ပဒိးန့ၢ်ဘၣ်တၢ်ဂံၢ်တၢ်ဘါလီၤ. တၢ်စံၣ်တဲၤတဲလီၤတၢ်လၢ အဒိးသန့ၤထီၣ်အသးလၢ လံာ်စီဆှံ ဒီးတၢ်အဒိအတဲာ်တဖၣ်န့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကဆဲးမၤ ယဟိဝၤယွၤအတၢ်မၤလီၤ. ပတဲသကိးတၢ်ဒီးပှၤဂၤ ဖဲတၢ်အိၣ်ဖှိၣ်တချုးထီၣ် ဒီးတၢ်အိၣ်ဖှိၣ်ဝံၤအလီၢ်ခံန့ၣ် ပဂံၢ်ပဘါဟဲဆူၣ်ထီၣ်ဝဲလီၤ. (၁ သ့းစၤလနံ ၅:၁၄) တကးဒံးဘၣ် ခီဖျိလၢပထီၣ်တၢ်အိၣ်ဖှိၣ်ရိဖှိၣ်အဃိ ပအိၣ်ဒီးတၢ်သူၣ်ခုသးခုဒီး ပမၤစၢၤဘၣ်လိာ်သး တဂၤဒီးတဂၤလီၤ. (မၤတၢ် ၂၀:၃၅; ရိမ့ၤ ၁:၁၁, ၁၂) ပတၢ်အိၣ်ဖှိၣ်ရိဖှိၣ်န့ၣ် မၤစၢၤပှၤလၢ ကျဲလၢအဂၤအိၣ်ဒံးဝဲလီၤ. ပတၢ်အိၣ်ဖှိၣ်ရိဖှိၣ်န့ၣ် မၤစၢၤပှၤဒ်သိး ပကအိၣ်ဒီးတၢ်သ့တၢ်ဘၣ် လၢပကတဲတၢ် ဒီးသိၣ်လိပှၤဂၤ လံာ်စီဆှံလၢ တၢ်စံၣ်တဲၤတဲလီၤတၢ်မၤအပူၤလီၤ. အဒိ, ပမၤလိဘၣ်လၢ ပကဘၣ်သူလံာ်လဲၢ်လၢ အအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤဒ်လဲၣ်န့ၣ်လီၤ. အဃိ ကတဲာ်ကတီၤပာ်စၢၤ တၢ်ဂ့ၢ်ဂ့ၤဂ့ၤလၢ တၢ်အိၣ်ဖှိၣ်ရိဖှိၣ်အဂီၢ် ဒီးဖဲနထီၣ်တၢ်အိၣ်ဖှိၣ်အခါ ဒိကနၣ်တၢ် လီၤတံၢ်လီၤဆဲးတက့ၢ်. ဖဲတၢ်အိၣ်ဖှိၣ်ဝံၤအလီၢ်ခံ မၤထွဲတၢ်လၢ နမၤလိဘၣ်တဖၣ်န့ၣ်တက့ၢ်. နမ့ၢ်မၤတၢ်သ့ၣ်တဖၣ်အံၤန့ၣ် နကကဲထီၣ် “ယ့ၣ်ၡူးခရံာ်အသုးဖိလၢ အဂ့ၤတဂၤ” လီၤ.—၂ တံၤမသ့း ၂:၃.
၁၄. မတဂၤအိၣ်လၢ ပအိၣ်တခီလၢ ကမၤစၢၤပှၤအဂီၢ်လဲၣ်.
၁၄ မူခိၣ်ကလူးလၢ အကကွဲၢ်တဖၣ် အိၣ်လၢပအိၣ်တခီ လၢကဆီၣ်ထွဲမၤစၢၤပှၤလီၤ. ဆိကမိၣ်ကွၢ် မူခိၣ်ကလူးထဲတဂၤဧိၤ မၤတၢ်သ့ထဲလဲၣ်န့ၣ်တက့ၢ်. (ယၡါယၤ ၃၇:၃၆) ခဲအံၤပကဆိကမိၣ်ကွၢ် ကစၢ်ယွၤအမူခိၣ်ကလူး သုးမုၢ်သံၣ်ဘိဒီတဖုန့ၣ် မၤတၢ်ကကဲထီၣ်လိၣ်ထီၣ်ထဲလဲၣ်. ပှၤဟီၣ်ခိၣ်ဖိမ့ၢ်ဂ့ၤ, တၢ်ဝံတၢ်နါမ့ၢ်ဂ့ၤ လၢအကဒုးနၢၤဝဲ ယဟိဝၤယွၤ အသုးမုၢ်တဖၣ်န့ၣ် တအိၣ်နီတဂၤဘၣ်. ယဟိဝၤယွၤ အိၣ်ဒီးအစိကမီၤ အဒိၣ်ကတၢၢ်လီၤ. အဃိ ယဟိဝၤယွၤမ့ၢ်အိၣ်လၢ ပအိၣ်တခီန့ၣ် ပှၤလၢအထီဒါပှၤတဖၣ် မ့ၢ်အိၣ်အါထဲလဲၣ်ဂ့ၤထဲၣ်လဲၣ်ဂ့ၤ ပကမၤနၢၤ အဝဲသ့ၣ်ထီဘိလီၤ. (စံၣ်ညီၣ်ကွီၢ် ၆:၁၆) တၢ်ကတိၤအံၤ ပနာ်န့ၢ်အီၤ သ့သပှၢ်ကတၢၢ်လီၤ. ဖဲပတံၤသကိးလၢကၠိ, လၢတၢ်မၤလီၢ် ဒီးပဘူးပတံၢ်လၢအတမ့ၢ် ယဟိဝၤပှၤအုၣ်အသးတဖၣ် မ့ၢ်တဲဒီးမၤတၢ်လၢ ကမၤလီၤစၢ်ပသးအခါ ပကဘၣ်နီၣ်ဘၣ်က့ၤ တၢ်ဂ့ၢ်အံၤလီၤ. သ့ၣ်နီၣ်ထီၣ်လၢ ပတဘၣ်ဒုးတၢ် ထဲတဂၤဧိၤဘၣ်. ပကဘၣ်မၤထွဲယဟိဝၤယွၤ အတၢ်ဟံးစုနဲၣ်ကျဲလီၤ.
ယဟိဝၤယွၤ ကဆဲးဒီသဒၢပှၤ
၁၅. ဒ် ယၡါယၤ ၅၄:၁၅, ၁၇ ပာ်ဖျါထီၣ်ဝဲအသိး ဘၣ်မနုၤအဃိ ယဟိဝၤယွၤ အပှၤဂီၢ်မုၢ်တဖၣ်န့ၣ် တပတုာ်ဟးစံၣ်တဲၤတဲလီၤတၢ်ဘၣ်လဲၣ်.
၁၅ ဟီၣ်ခိၣ်လၢ မုၣ်ကီၤလံၢ်ပၢဝဲအံၤ သးဟ့ပှၤ လၢတၢ်ဂ့ၢ်အါမးလီၤ. ခီဖျိလၢ ပတပၣ်ဃုာ်လၢ ထံဂ့ၢ်ကီၢ်ဂ့ၢ်ဒီး တၢ်ဒုးတၢ်ယၤအကျါဘၣ်အဃိလီၤ. ပဘိးဘၣ်သ့ၣ်ညါ ကစၢ်ယွၤအမံၤ, ကစၢ်ယွၤအဘီအမုၢ်ထဲတခါဧိၤလၢ ကမၤလၢထီၣ်ပှဲၤထီၣ်ပှၤဟီၣ်ခိၣ်ဖိ အတၢ်မုၢ်လၢ်လၢ ကအိၣ်ဒီးတၢ်ဃူတၢ်ဖိး တကးဒံးဘၣ် ပဆီၣ်ထွဲယဟိဝၤယွၤ အတၢ်ပၢအခွဲးလီၤ. ပပာ်ဖျါထီၣ်လၢ ပှၤဟီၣ်ခိၣ်အတၢ်ပၢအံၤန့ၣ် အိၣ်ပှဲၤထဲတၢ်လံၢ်တၢ်လီ ဒီးတၢ်မၤသံမၤဝီလီၤ. (ယိၤဟၣ် ၈:၄၄) ပဘိးဘၣ်သ့ၣ်ညါလၢ တယံာ်လၢၤဘၣ် ဟီၣ်ခိၣ်လၢ မုၣ်ကီၤလံၢ်ပၢဝဲတဘ့ၣ်အံၤ ကဟးဂီၤကွံာ်ဝဲလီၤ. ဘၣ်ဆၣ် မုၣ်ကီၤလံၢ် ဒီးအခ့အပှၤတဖၣ် ကမၤပတုာ် ပတၢ်ဖံးတၢ်မၤလီၤ. လၢတၢ်န့ၣ်အဃိ ပကဂုာ်ကျဲးစၢး စံးထီၣ်ပတြၢၤကစၢ်ယွၤ လၢကျဲလၢအဂ့ၤကတၢၢ်လီၤ. မုၣ်ကီၤလံၢ်အိၣ်ဒီးအစိကမီၤ သနာ်က့ ကမၤပတုာ်ဝဲ ဘီမုၢ်တၢ်သးခုကစီၣ် ဒ်သိးတရၤလီၤအသးလၢ ဟီၣ်ခိၣ်ဒီတဘ့ၣ်တဂ့ၤအဂီၢ် အမၤဝဲတန့ၢ်ဘၣ်. ပမၤတၢ်သ့ၣ်တဖၣ်အံၤသ့ ခီဖျိလၢ ယဟိဝၤယွၤအတၢ်ဒီသဒၢအဃိလီၤ.—ဖး ယၡါယၤ ၅၄:၁၅, ၁၇ တက့ၢ်.
၁၆. ဖဲတၢ်နးတၢ်ဖှီၣ်ဖးဒိၣ်အဆၢကတီၢ်န့ၣ် ယဟိဝၤယွၤကမၤပူၤဖျဲး အခ့အပှၤတဖၣ် လၢကျဲဒ်လဲၣ်.
၁၆ ခါဆူညါန့ၣ် တၢ်ကမၤအသးဒ်လဲၣ်. ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် ယဟိဝၤယွၤ ကမၤပူၤဖျဲးပှၤလၢ ကျဲလီၤဆီခံဘိလီၤ. အဆိကတၢၢ် ဖဲယဟိဝၤယွၤ မၤဟးဂီၤ ဘၤဘူၤလိၣ်ဖးဒိၣ် လၢအမ့ၢ်ဝဲ တၢ်ဘူၣ်တၢ်ဘါအကမၣ် လၢအဒိၣ်စိတဖၣ်အခါ အကမၤပူၤဖျဲး အခ့အပှၤလၢအတီအလိၤတဖၣ်လီၤ. (လီၣ်ဖျါ ၁၇:၁၆-၁၈; ၁၈:၂, ၄) ဝံၤဒီး ယဟိဝၤယွၤ ကဒီသဒၢအခ့အပှၤ ခီဖျိကမၤဟးဂီၤ ဟီၣ်ခိၣ်လၢ မုၣ်ကီၤလံၢ်ပၢဝဲတဘ့ၣ်အံၤ လၢအၢ်မက့းဒိၣ်အတၢ်ဒုးန့ၣ်လီၤ.—လီၣ်ဖျါ ၇:၉, ၁၀; ၁၆:၁၄, ၁၆.
၁၇. ပမ့ၢ်အိၣ်ဘူးဒီး ယဟိဝၤယွၤထီဘိန့ၣ် ပကဒိးန့ၢ်ဘၣ် အဘျုးအဖှိၣ်ဒ်လဲၣ်.
၁၇ ပမ့ၢ်ဆဲးအိၣ်ဘူးဒီး ယဟိဝၤယွၤထီဘိန့ၣ် မုၣ်ကီၤလံၢ်မၤဟးဂီၤပှၤ လီၤထူလီၤယိာ်တန့ၢ်ဘၣ်. ပမ့ၢ်တဲတီတီန့ၣ် မုၣ်ကီၤလံၢ် ကဘၣ်တၢ်မၤဟးဂီၤအီၤ လီၤထူလီၤယိာ်လီၤ. (ရိမ့ၤ ၁၆:၂၀) အဃိ ကယဲၢ်တၢ်ဖိတၢ်လံၤခဲလၢာ်လၢ အဟဲလၢကစၢ်ယွၤအအိၣ် လၢတၢ်ဒုးအဂီၢ်န့ၣ် ပကဘၣ်သူအီၤထီဘိ ဒီးပတဘၣ်ပာ်လီၤကွံာ်အီၤ နီတဘျီဘၣ်. ပတဘၣ်ဒုးမုၣ်ကီၤလံၢ် ဒီးဟီၣ်ခိၣ်လၢ မုၣ်ကီၤလံၢ်ပၢဝဲတဘ့ၣ်အံၤ ထဲတဂၤဧိၤဘၣ်. ဆီၣ်ထွဲမၤစၢၤ ဒီပုၢ်ဝဲၢ်မုၣ်ခွါတဖၣ်တက့ၢ်. ဒီးမၤထွဲ ယဟိဝၤယွၤ အတၢ်ဟံးစုနဲၣ်ကျဲတက့ၢ်. နမ့ၢ်မၤဒ်န့ၣ်န့ၣ် နနာ်သ့သပှၢ်ကတၢၢ်လၢ နပၢ်လၢမူခိၣ် ကမၤဆူၣ်ထီၣ်နဂံၢ်နဘါ ဒီးကဒီသဒၢနၤလီၤ.—ယၡါယၤ ၄၁:၁၀.
တၢ်သးဝံၣ် ၁၄၉ တၢ်မၤနၢၤအတၢ်သးဝံၣ်
a လံာ်စီဆှံအၢၣ်လီၤပှၤလၢ ယဟိဝၤယွၤ ကဒုးဆူၣ်ထီၣ် ပဂံၢ်ပဘါ ဒီးကဒီသဒၢပှၤ လၢတၢ်လီၤဘၣ်ယိၣ် လၢနီၢ်သးတကပၤ တကးဒံးဘၣ် ကဒီသဒၢပှၤလၢ တၢ်လီၤဘၣ်ယိၣ်လၢအဂၤ လၢကမၤဘၣ်ဒိပှၤ လီၤထူလီၤယိာ်တဖၣ် စ့ၢ်ကီးလီၤ. လၢတၢ်မၤလိအံၤအပူၤ ပကစံးဆၢတၢ်သံကွၢ်တဖၣ်အံၤလီၤ. ဘၣ်မနုၤအဃိ ပလိၣ်ဘၣ်တၢ်ဒီသဒၢလဲၣ်. ယဟိဝၤယွၤ ဒီသဒၢပှၤဒ်လဲၣ်. ဒ်သိးပကဒိးန့ၢ်ဘၣ်အဘျုးလၢ ယဟိဝၤယွၤ အတၢ်မၤစၢၤအဂီၢ် ပကဘၣ်မၤတၢ်မနုၤလဲၣ်.