ယဟိဝၤယွၤအိၣ်ဒီးပှၤ အဃိ ပတအိၣ်ထဲတဂၤဧိၤဘၣ်

၁. ဘၣ်မနုၤအဃိ တဘျီတခီၣ်​ ယဟိဝၤယွၤအခ့အပှၤတနီၤန့ၣ်​ အတူၢ်ဘၣ်ဝဲလၢ အအိၣ်သယုၢ်သညိလဲၣ်.

ပဝဲဒၣ်အါတက့ၢ်န့ၣ်​ တဘျီတခီၣ်​ ပအိၣ်သယုၢ်သညိ ထဲတဂၤဧိၤလီၤ. ပှၤတနီၤနီၤန့ၣ်​ တူၢ်ဘၣ်ဝဲလၢ အအိၣ်သယုၢ်သညိဖးယံာ် ဒီးအဂၤတနီၤနီၤန့ၣ်​ တူၢ်ဘၣ်ဝဲတစိၢ်ဖိလီၤ. ပှၤအဂၤတနီၤ ကဃုအတံၤသကိးလၢ တၢ်အိၣ်ဖှိၣ်အသီအပူၤ တညီဝဲဘၣ်. မ့မ့ၢ်ပှၤအဂၤတနီၤ ဒိၣ်ထီၣ်ဘၣ်လၢ ဟံၣ်ဖိဃီဖိဖးဒိၣ်အကျါ ဒီးလၢခံအဝဲသ့ၣ်ဘၣ်အိၣ်ယံၤဒီး အဟံၣ်ဖိဃီဖိတဖၣ်အဃိ အဝဲသ့ၣ်တူၢ်ဘၣ်ဝဲလၢ အအိၣ်သယုၢ်သညိလီၤ. ဘၣ်ဆၣ်​ အဂၤတနီၤ ကသးသယုၢ်ဘၣ်​ ပှၤလၢအအဲၣ်ဘၣ်ဝဲတဂၤ လၢအသံသဒၣ်အီၤ ဒိၣ်မးလီၤ. ဒီးဒီပုၢ်ဝဲၢ်မုၣ်ခွါလၢ အမၤန့ၢ်ဘၣ်တၢ်မ့ၢ်တၢ်တီ သီသီတဖၣ်န့ၣ်​ ကတူၢ်ဘၣ်လၢ အအိၣ်သယုၢ်သညိ မ့ၢ်လၢ အဘူးအတံၢ်ဒီးအသကိးလၢ အတမ့ၢ် ယဟိဝၤပှၤအုၣ်အသးတဖၣ်​ ပာ်တ့ၢ်ဒီးထီဒါ အဝဲသ့ၣ်အဃိလီၤ.

၂. ပကစံးဆၢ တၢ်သံကွၢ်မနုၤလဲၣ်.

^၂ ယဟိဝၤယွၤနၢ်ပၢၢ်စၢၤပှၤ ဒီးသ့ၣ်ညါပှၤဂ့ၤဂ့ၤလီၤ. ဖဲပအိၣ်သယုၢ်သညိ ထဲတဂၤဧိၤအခါ ယဟိဝၤယွၤသ့ၣ်ညါဝဲ ဒီးအဝဲအဲၣ်ဒိးမၤစၢၤပှၤလီၤ. ယဟိဝၤယွၤမၤစၢၤပှၤလၢ ကျဲဒ်လဲၣ်. ပမၤစၢၤလီၤ ပနီၢ်ကစၢ်အသး ကသ့ဒ်လဲၣ်. ဒီးပှၤလၢအတူၢ်ဘၣ်ဝဲလၢ အအိၣ်ထဲတဂၤဧိၤလၢ တၢ်အိၣ်ဖှိၣ်အပူၤန့ၣ်​ ပမၤစၢၤအဝဲသ့ၣ်​ ကသ့ဒ်လဲၣ်. ပကကွၢ်သကိး တၢ်သံကွၢ်တဖၣ်အံၤ အတၢ်စံးဆၢလီၤ.

ယဟိဝၤယွၤ သူၣ်အိၣ်သးအိၣ်ပှၤ

၃. ယဟိဝၤယွၤပာ်ဖျါထီၣ်ဝဲလၢ အသူၣ်အိၣ်သးအိၣ်​ ဝံအ့ၤလံယၤဒ်လဲၣ်.

^၃ ယဟိဝၤယွၤအဲၣ်ဒိးဝဲလၢ အခ့အပှၤတဖၣ်​ ကသးခုဝဲလီၤ. ယဟိဝၤယွၤအိၣ်ဘူးဒီး ပဝဲတဂၤစုာ်စုာ် ဒီးဖဲပသူၣ်အုးသးအုးဒီး သးလီၤစၢ်အခါ အဝဲသ့ၣ်ညါဝဲလီၤ. (စံးထီၣ်ပတြၢၤ ၁၄၅:၁၈, ၁၉) ယဟိဝၤယွၤထံၣ်ဝဲ ဝံအ့ၤလံယၤ အိၣ်ဒီးအတၢ်ဘၣ်ယိၣ်ဘၣ်ဘှီအဃိ အဝဲသူၣ်အိၣ်သးအိၣ်အီၤဒီး မၤစၢၤအီၤဒ်လဲၣ်န့ၣ်​ ဆိကမိၣ်ကွၢ်တက့ၢ်. ပိာ်ခွါလၢအသးတီတဂၤအံၤ အိၣ်မူဘၣ်ဝဲ တၢ်ဆၢကတီၢ်အကီအခဲ ဖဲပှၤအံၣ်စရ့လးဖိအစိၤလီၤ. ပှၤလၢအဘူၣ်ထီၣ်ဘါထီၣ်​ ယဟိဝၤယွၤန့ၣ်​ ပှၤမၤအၢမၤနးအဝဲသ့ၣ်လီၤ. ဒီးပှၤလၢအအိၣ်ဒီးအစိကမီၤတဖၣ်​ လၢအတဘူၣ်ထီၣ်ဘါထီၣ်​ ယဟိဝၤယွၤန့ၣ်​ အဲၣ်ဒိး မၤအၢမၤနးဒီးမၤသံ ဝံအ့ၤလံယၤလီၤ. (၁ စီၤပၤ ၁၉:၁, ၂) ဝံအ့ၤလံယၤ ဆိကမိၣ်ဝဲလၢ ပှၤလၢအမၤယဟိဝၤယွၤအတၢ်မၤန့ၣ်​ အိၣ်တ့ၢ်ထဲအီၤတဂၤဧိၤလီၤ. ခီဖျိလၢ ဝံအ့ၤလံယၤဆိကမိၣ်ဝဲ ဒ်အံၤအဃိ အသးလီၤစၢ်ဒိၣ်ထီၣ်ဝဲလီၤ. (၁ စီၤပၤ ၁၉:၁၀) ကစၢ်ယွၤမၤစၢၤ ဝံအ့ၤလံယၤတဘျီဃီလီၤ. ယဟိဝၤယွၤဆှၢလီၤ မူခိၣ်ကလူးလၢ ကမၤမုာ်ထီၣ်က့ၤ ဝံအ့ၤလံယၤအသးဒီး တဲဘၣ်အီၤလၢ အဝဲတအိၣ်ထဲတဂၤဧိၤဘၣ်​ ဒီးပှၤလၢအပျံၤကစၢ်ယွၤလၢ အံၣ်စရ့လးအကျါန့ၣ်​ အိၣ်ဒံးဒီဒူၣ်ညါလီၤ.—၁ စီၤပၤ ၁၉:၅, ၁၈.

၄. မၢ်ကူး ၁၀:၂၉, ၃၀ ပာ်ဖျါထီၣ်ဝဲလၢ ယဟိဝၤယွၤ သူၣ်အိၣ်သးအိၣ်​ ပှၤလၢအတဒိးန့ၢ်ဘၣ်​ အဟံၣ်ဖိဃီဖိဒီး အတံၤသကိး တၢ်မၤစၢၤဘၣ်န့ၣ်ဒ်လဲၣ်.

^၄ ဖဲပပာ်လီၤပသးလၢ ပကမၤယဟိဝၤယွၤ အတၢ်မၤအခါ ပဝဲတနီၤပကဘၣ်​ ပာ်တ့ၢ်ကွံာ်တၢ်အါမး အဃိ ယဟိဝၤယွၤသ့ၣ်ညါဝဲလီၤ. ဖဲန့ၣ်အကျါ ကပၣ်ဃုာ်ဒီး ပတဒိးန့ၢ်ဘၣ်​ ယဟံၣ်ဖိဃီဖိဒီးပတံၤသကိး လၢအတမ့ၢ် ယဟိဝၤပှၤအုၣ်အသးတဖၣ်​ အတၢ်မၤစၢၤလၢၤဘၣ်. ဘၣ်သ့ၣ်သ့ၣ်​ တၢ်မၢဖိပ့းတရူး ဘၣ်ယိၣ်တၢ်အဃိ အဝဲသံကွၢ်ဝဲ ယ့ၣ်ၡူးလၢ “ပပာ်တ့ၢ်ကွံာ် တၢ်ခဲလၢာ် ဒီးပိာ်နခံလံ. အဃိ ပကဒိးန့ၢ်ဘၣ်​ တၢ်မနုၤလဲၣ်.” (မးသဲ ၁၉:၂၇) ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ အဝဲသ့ၣ်ကဒိးန့ၢ်ဘၣ်က့ၤ ဟံၣ်ဖိဃီဖိလၢ နီၢ်သးတခီလီၤ. (ဖး မၢ်ကူး ၁၀:၂၉, ၃၀ တက့ၢ်.) ဒီးယဟိဝၤယွၤ မ့ၢ်ပနီၢ်သးအဟံၣ်ဖိဃီဖိအခိၣ်​ အဃိအအၢၣ်လီၤဝဲလၢ ကမၤစၢၤပှၤလၢအမၤ အတၢ်မၤတဖၣ်လီၤ. (စံးထီၣ်ပတြၢၤ ၉:၁၀) ဆိကမိၣ်ကွၢ် ကျဲတနီၤလၢ နမၤအီၤသ့ ဒ်သိးနကဒိးန့ၢ်ဘၣ်​ ယဟိဝၤယွၤအတၢ်မၤစၢၤ လၢနကမၤနၢၤကွံာ် တၢ်အိၣ်သယုၢ်သညိန့ၣ်တက့ၢ်.

နမ့ၢ်တူၢ်ဘၣ်လၢ နအိၣ်သယုၢ်သညိန့ၣ်​ နကဘၣ်မၤတၢ်မနုၤလဲၣ်

၅. ပမ့ၢ်ဆိကမိၣ်ထီၣ်က့ၤ ယဟိဝၤယွၤမၤစၢၤတ့ၢ်ပှၤ လၢကျဲဒ်လဲၣ်န့ၣ်​ ကဲဘျုးဝဲဒ်လဲၣ်.

^၅ ဆိကမိၣ်ထီၣ်က့ၤ ယဟိဝၤယွၤမၤစၢၤနၤလၢ ကျဲဒ်လဲၣ်န့ၣ်တက့ၢ်. (စံးထီၣ်ပတြၢၤ ၅၅:၂၂) နမ့ၢ်မၤဒ်န့ၣ်န့ၣ်​ ကမၤစၢၤနၤလၢ နတတူၢ်ဘၣ်လၢ နအိၣ်ထဲတဂၤဧိၤဘၣ်. ဒီပုၢ်ဝဲၢ်မုၣ်ခၤရိၤb လၢအမ့ၢ်ပှၤသဘျ့ဒီး အဟံၣ်ဖိဃီဖိတအိၣ်​ လၢတၢ်မ့ၢ်တၢ်တီအပူၤဘၣ်န့ၣ်​ တဲဝဲလၢ “ယမ့ၢ်ကွၢ်ဒီး ဆိကမိၣ်ထံက့ၤ ယဟိဝၤယွၤ မၤစၢၤယၤဒ်သိး ယကလဲၤခီဖျိ တၢ်ကီတၢ်ခဲတဖၣ်​ ဒ်လဲၣ်အခါန့ၣ်​ ယသ့ၣ်ညါဘၣ်လၢ ယတအိၣ်ထဲတဂၤဧိၤဘၣ်. ဒီးယနာ်သပှၢ်ကတၢၢ်လၢ ခါဆူညါန့ၣ်​ ယဟိဝၤယွၤ ကမၤစၢၤယၤထီဘိလီၤ.”

၆. ၁ ပ့းတရူး ၅:၉, ၁၀ ဟ့ၣ်ဂံၢ်ဟ့ၣ်ဘါဝဲ ပှၤလၢအတူၢ်ဘၣ်ဝဲလၢ အအိၣ်သယုၢ်သညိတဖၣ်ဒ်လဲၣ်.

^၆ ဆိကမိၣ်ကွၢ် ယဟိဝၤယွၤမၤစၢၤ ဒီပုၢ်ဝဲၢ်မုၣ်ခွါလၢ အတူၢ်ဘၣ်ဝဲလၢ အအိၣ်သယုၢ်သညိတဖၣ်ဒ်လဲၣ်. (ဖး ၁ ပ့းတရူး ၅:၉, ၁၀ တက့ၢ်.) ဒီပုၢ်ဝဲၢ်ခွါဟ့ရိၡံၤ လၢအါနံၣ်အတီၢ်ပူၤလၢ အဟံၣ်ဖိဃီဖိအကျါန့ၣ်​ အမ့ၢ်ယဟိဝၤပှၤအုၣ်အသး ထဲတဂၤဧိၤလီၤ. အဝဲတဲဝဲလၢ “လၢတၢ်အိၣ်ဖှိၣ်အပူၤန့ၣ်​ ပထံၣ်ဘၣ်လၢ ပှၤကိးဂၤဒဲးအိၣ်ဒီး တၢ်ကီတၢ်ခဲတဖၣ်လီၤ. ဒီးပှၤခဲလၢာ်န့ၣ်​ ဂုာ်ကျဲးစၢးမၤ ယဟိဝၤယွၤအတၢ်မၤ လၢအဂ့ၤကတၢၢ် အဃိဟ့ၣ်ဂံၢ်ဟ့ၣ်ဘါဝဲ ပှၤလၢ အဟံၣ်ဖိဃီဖိတအိၣ်လၢ တၢ်မ့ၢ်တၢ်တီအပူၤတဖၣ်လီၤ.”

၇. တၢ်ဃ့ဘါထုကဖၣ်​ မၤစၢၤနၤဒ်လဲၣ်.

^၇ ဃ့ဘါထုကဖၣ်, ဖးလံာ်စီဆှံ ဒီးထီၣ်တၢ်အိၣ်ဖှိၣ်ထီဘိတက့ၢ်. နကဘၣ်တဲဘၣ်​ ယဟိဝၤယွၤလၢ နတၢ်တူၢ်ဘၣ်တဖၣ်ပျီပျီလီၤ. (၁ ပ့းတရူး ၅:၇) ဒီပုၢ်ဝဲၢ်မုၣ်မဲးစံလ် တဲဝဲလၢ “တၢ်အရ့ဒိၣ်ကတၢၢ်တခါလၢ အမၤစၢၤယၤလၢ ယကလဲၤခီဖျိ တၢ်အိၣ်သယုၢ်သညိန့ၣ်​ မ့ၢ်ဝဲယဃ့ဘါထုကဖၣ်လၢ ယဟိဝၤယွၤအအိၣ်ထီဘိလီၤ.” အဝဲစးထီၣ်မၤ ယဟိဝၤယွၤအတၢ်မၤလၢအသးစၢ်ခါ ဒီးအဟံၣ်ဖိဃီဖိတဖၣ်​ တဘူၣ်ထီၣ်ဘါထီၣ်​ ယဟိဝၤယွၤဘၣ်အဃိ အဝဲတူၢ်ဘၣ်လၢ အအိၣ်သယုၢ်သညိလီၤ. ဒီးအတဲကဒီးဝဲလၢ “ယဟိဝၤယွၤမ့ၢ် ပၢ်အနီၢ်ကီၢ်လၢယဂီၢ် ဒီးယဃ့ဘါထုကဖၣ်လၢ အအိၣ်ကိးနံၤဒဲး, လၢတနံၤအတီၢ်ပူၤန့ၣ်​ ယဃ့ဘါထုကဖၣ်တဘျုးဘျီညါ ဒီးယတဲဘၣ်အီၤလၢ ယတၢ်တူၢ်ဘၣ်တဖၣ်လီၤ.”

၈. တၢ်ဖးလံာ်စီဆှံဒီး တၢ်ဆိကမိၣ်ထံတၢ်န့ၣ်​ မၤစၢၤနၤဒ်လဲၣ်.

^၈ ဖးလံာ်စီဆှံထီဘိ ဒီးဆိကမိၣ်ထံတၢ်ဂ့ၢ်လၢ အပာ်ဖျါထီၣ်လၢ ယဟိဝၤယွၤအဲၣ်နၤန့ၣ်တက့ၢ်. ဒီပုၢ်ဝဲၢ်မုၣ်ဘံၤယါခၤ အသးလီၤစၢ်ခီဖျိလၢ အဟံၣ်ဖိဃီဖိ တဲဆါအီၤအဃိလီၤ. ဒီးအတဲဝဲလၢ “တၢ်ဖးလံာ်စီဆှံ ဒီးဆိကမိၣ်ထံ တၢ်ဂ့ၢ်လၢလံာ်စီဆှံပူၤ ဒီးယဟိဝၤယွၤအခ့အပှၤလၢ အထံၣ်ဘၣ်ဒီးတၢ်ကီတၢ်ခဲ လၢအလီၤဂာ်ဒီးယၤအဂ့ၢ်န့ၣ်​ မၤစၢၤယၤဒိၣ်မးလီၤ.” ခရံာ်ဖိတနီၤ တိၢ်နီၣ်သံဃာ်ဝဲ လံာ်စီဆှံအဆၢလၢ အမၤမုာ်ထီၣ်ပှၤသး ဒ်သိးဒီး စံးထီၣ်ပတြၢၤ ၂၇:၁၀ ဒီး ယၡါယၤ ၄၁:၁၀ လီၤ. အဂၤတနီၤဒိကနၣ်ဝဲ တၢ်ကလုၢ်လၢ ဘၣ်ဃးဒီးတၢ်ဂ့ၢ်တၢ်ကျိၤလၢ တၢ်ထီၣ်တၢ်အိၣ်ဖှိၣ်အဂီၢ် ဒီးတၢ်ဖးလံာ်စီဆှံအဂီၢ်လီၤ.

၉. တၢ်ထီၣ်တၢ်အိၣ်ဖှိၣ်န့ၣ်​ အကဲဘျုးဝဲဒ်လဲၣ်.

^၉ ဂုာ်ကျဲးစၢးအဂ့ၤကတၢၢ် လၢနကထီၣ်ဘၣ်​ တၢ်အိၣ်ဖှိၣ်ထီဘိတက့ၢ်. တၢ်အိၣ်ဖှိၣ်​ အတၢ်ရဲၣ်တၢ်ကျဲၤတဖၣ်န့ၣ်​ ကမၤစၢၤနၤလၢ နကသ့ၣ်ညါထီၣ်​ ဒီပုၢ်ဝဲၢ်မုၣ်ခွါတဖၣ်လီၤ. (ဧ့ၤဘြံၤ ၁၀:၂၄, ၂၅) ဒီပုၢ်ဝဲၢ်မုၣ်မဲးစံလ် တဲဝဲလၢ “ယမ့ၢ်ပှၤလၢ အမဲာ်ဆှးသ့ ဘၣ်ဆၣ်​ ယဂုာ်ကျဲးစၢး ထီၣ်တၢ်အိၣ်ဖှိၣ်ကိးဘျီဒဲး ဒီးဟ့ၣ်ထီၣ်တၢ်စံးဆၢလီၤ. ယမၤဒ်အံၤအဃိ ယဘူးဒိၣ်ထီၣ်ဒီး ဒီပုၢ်ဝဲၢ်မုၣ်ခွါတဖၣ်​ လၢတၢ်အိၣ်ဖှိၣ်အပူၤလီၤ.”

၁၀. ဘၣ်မနုၤအဃိအရ့ဒိၣ်လၢ ပကဘၣ်ရ့ဒီး ဒီပုၢ်ဝဲၢ်မုၣ်ခွါတဖၣ်လၢ တၢ်အိၣ်ဖှိၣ်အပူၤလဲၣ်.

^၁၀ မၤဂ့ၤထီၣ်နတၢ်ရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်တက့ၢ်. ရ့ဒီးဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ ဒ်သိးနကမၤလိန့ၢ် တၢ်လၢအဝဲသ့ၣ်အအိၣ်​ ဒီးအဝဲသ့ၣ်အသးပှၢ်မ့ၢ်ဂ့ၤ, အသးစၢ်မ့ၢ်ဂ့ၤ ဒီးအကလုာ်မ့ၢ် တဒ်သိးဒီးနၤဘၣ်မ့ၢ်ဂ့ၤ ရ့ဒီးအဝဲသ့ၣ်တက့ၢ်. လံာ်စီဆှံတဲဘၣ်ပှၤလၢ တၢ်ကူၣ်ဘၣ်ကူၣ်သ့န့ၣ်​ “အိၣ်ဝဲဒီးပှၤသးပှၢ်” လီၤ. (ယိၤဘး ၁၂:၁၂) ပှၤသးပှၢ်စ့ၢ်ကီး မၤလိန့ၢ်တၢ်လၢ ပှၤသးစၢ်တဖၣ်​ အအိၣ်သ့ဝဲလီၤ. စီၤဒၤဝံးန့ၣ်​ အသးစၢ်န့ၢ် စီၤယိနၤသၣ်​ အနံၣ်အါမး ဘၣ်ဆၣ်​ အဝဲသ့ၣ်ရ့လိာ်အသးမုာ်ဒိၣ်မးလီၤ. (၁ ၡမူၤအ့လး ၁၈:၁) စီၤဒၤဝံးဒီး စီၤယိနၤသၣ်န့ၣ်​ ထံၣ်ဘၣ်တၢ်ကီတၢ်ခဲတဖၣ်ဒၣ်လဲာ် အဝဲသ့ၣ်မၤစၢၤလိာ်အသး တဂၤဒီးတဂၤလၢ ကမၤယဟိဝၤယွၤ အတၢ်မၤအဂီၢ်လီၤ. (၁ ၡမူၤအ့လး ၂၃:၁၆-၁၈) ဒီပုၢ်ဝဲၢ်မုၣ်အရံၣ်နၣ်​ လၢအမ့ၢ်ယဟိဝၤပှၤအုၣ်အသး ထဲအဂၤဧိၤလၢ အဟံၣ်ဖိဃီဖိအကျါန့ၣ်​ တဲဝဲလၢ “ပဒီပုၢ်ဝဲၢ်မုၣ်ခွါတဖၣ်န့ၣ်​ လီၤဂာ်ဒ် ပမိၢ်ပပၢ်ဒီး ပဒီပုၢ်ဝဲၢ်တံၢ်နီၢ်လီၤ. ယဟိဝၤယွၤ သူအဝဲသ့ၣ်လၢ ကမၤလၢပှဲၤ ပတၢ်လိၣ်ဘၣ်တဖၣ်လီၤ.”

၁၁. ဒ်သိး ပတံၤသကိးကအိၣ်အဂီၢ် ပကဘၣ်မၤတၢ်မနုၤလဲၣ်.

^၁၁ နမ့မ့ၢ်ပှၤလၢ အမဲာ်ဆှးသ့န့ၣ်​ ကီလၢနကဃု တံၤသကိးအသီလီၤ. ဒီပုၢ်ဝဲၢ်မုၣ်ရဲနၤ လၢအမ့ၢ်ပှၤလၢအမဲာ်ဆှးသ့ ဒီးဖဲအမၤလိတၢ်မ့ၢ်တၢ်တီအခါန့ၣ်​ အထံၣ်ဘၣ်ဒီး တၢ်ထီဒုၣ်ထီဒါလီၤ. အတဲဝဲလၢ “ယသ့ၣ်ညါလၢ ယလိၣ်ဘၣ်​ ဒီပုၢ်ဝဲၢ်မုၣ်ခွါတဖၣ်​ အတၢ်ဆီၣ်ထွဲမၤစၢၤလီၤ.” နကတဲဘၣ်ပှၤဂၤလၢ နတၢ်တူၢ်ဘၣ်တဖၣ်န့ၣ်​ တညီဝဲဘၣ်. ဘၣ်ဆၣ်​ ဖဲနတဲသကိးတၢ်ဒီးပှၤဂၤအခါ အဝဲသ့ၣ်ကဲထီၣ်​ နတံၤသကိးသ့လီၤ. နတံၤသကိးတဖၣ်န့ၣ်​ အဲၣ်ဒိးဟ့ၣ်ဂံၢ်ဟ့ၣ်ဘါနၤ ဒီးမၤစၢၤနၤလီၤ. ဘၣ်ဆၣ်​ ဒ်သိးအဝဲသ့ၣ်မၤစၢၤနၤ ကသ့အဂီၢ် နကဘၣ်တဲဘၣ်ဝဲသ့ၣ်လီၤ.

၁၂. ဒ်သိးနတံၤသကိးကအိၣ်အဂီၢ် တၢ်စံၣ်တဲၤတဲလီၤတၢ်မၤ မၤစၢၤနၤသ့ဒ်လဲၣ်.

^၁၂ ကျဲအဂ့ၤကတၢၢ်တဘိလၢ နဃုထံၣ်န့ၢ် နတံၤသကိးသ့န့ၣ်​ မ့ၢ်ဝဲနလဲၤ စံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ခွါတဖၣ်လီၤ. ဒီပုၢ်ဝဲၢ်မုၣ်ခၤရိၤတဲဝဲလၢ “ခီဖျိလၢ ယလဲၤစံၣ်တဲၤတဲလီၤတၢ် ဃုာ်ဒီးဒီပုၢ်ဝဲၢ်မုၣ်တဖၣ်​ ဒီးပၣ်ဃုာ်လၢဘီမုၢ် အတၢ်ဖံးတၢ်မၤတဖၣ်အဃိ ယဒိးန့ၢ်အါထီၣ်​ ယတံၤသကိးလီၤ. နံၣ်လၢအပူၤကွံာ်တဖၣ်န့ၣ်​ ယဟိဝၤယွၤမၤစၢၤယၤ ခီဖျိလၢ တံၤသကိးတဖၣ်အံၤလီၤ.” ပမ့ၢ်ဂုာ်ကျဲးစၢးရ့ဒီး ဒီပုၢ်ဝဲၢ်လၢအအိၣ်ဒီးတၢ်သးတီတဖၣ်န့ၣ်​ မ့ၢ်ဝဲကျဲလၢ အဂ့ၤကတၢၢ်လီၤ. ယဟိဝၤယွၤသူဝဲ ပှၤသ့ၣ်တဖၣ်အံၤလၢ ပကမၤနၢၤကွံာ် ပတၢ်အိၣ်သယုၢ်သညိလီၤ.—ကတိၤဒိ ၁၇:၁၇

မၤစၢၤပှၤဂၤဒ်သိး ကတူၢ်ဘၣ်ဝဲလၢ အဝဲသ့ၣ်မ့ၢ်ပဟံၣ်ဖိဃီဖိ

၁၃. ပဝဲဒၣ်ခဲလၢာ်လၢ တၢ်အိၣ်ဖှိၣ်အပူၤန့ၣ်​ ပအိၣ်ဒီးမူဒါဒ်လဲၣ်.

^၁၃ ပဝဲဒၣ်ခဲလၢာ်လၢ တၢ်အိၣ်ဖှိၣ်အပူၤန့ၣ်​ ပအိၣ်ဒီးမူဒါလၢ ပကဘၣ်ပာ်ဖျါထီၣ်တၢ်အဲၣ်​ ဒီးဆီၣ်ထွဲတၢ်ဃူတၢ်ဖိးလီၤ. ပမ့ၢ်မၤဒ်န့ၣ်​ ပဒီပုၢ်ဝဲၢ်တဖၣ်တတူၢ်ဘၣ်ဝဲလၢ အအိၣ်ထဲတဂၤဧိၤလၢၤဘၣ်. (ယိၤဟၣ်​ ၁၃:၃၅) တၢ်လၢပတဲဒီးပမၤန့ၣ်​ ဟ့ၣ်ဂံၢ်ဟ့ၣ်ဘါပှၤဂၤသ့စ့ၢ်ကီးလီၤ. ဒီပုၢ်ဝဲၢ်မုၣ်တဂၤ တဲဝဲလၢ “ဖဲယမၤလိတၢ်မ့ၢ်တၢ်တီအခါ တၢ်အိၣ်ဖှိၣ်ဖိန့ၣ်​ ကဲထီၣ်ဝဲယဟံၣ်ဖိဃီဖိလီၤ. အဝဲသ့ၣ်မ့ၢ်တဆီၣ်ထွဲမၤစၢၤယၤဘၣ်န့ၣ်​ ယတကဲထီၣ်ဘၣ်​ ယဟိဝၤပှၤအုၣ်အသးဘၣ်.” ပှၤလၢအအိၣ်လၢ တၢ်မ့ၢ်တၢ်တီအပူၤ ထဲတဂၤဧိၤတဖၣ်န့ၣ်​ ပကမၤစၢၤအဝဲသ့ၣ်ဒ်သိး ကတူၢ်ဘၣ်ဝဲလၢ ဒီပုၢ်ဝဲၢ်မုၣ်ခွါတဖၣ်အဲၣ်အီၤနၣ်​ ကသ့ဒ်လဲၣ်.

၁၄. ပကဲထီၣ်တံၤသကိးလၢ ပှၤသီအဂီၢ်ကသ့ဒ်လဲၣ်.

^၁၄ ဂုာ်ကျဲးစၢး ရ့ဆိဒီးပှၤဂၤတက့ၢ်. ပကဘၣ်တူၢ်လိာ်မုာ် ပှၤသီတဖၣ်လၢ တၢ်အဲၣ်တၢ်ကွံအပူၤလီၤ. (ရိမ့ၤ ၁၅:၇) ဘၣ်ဆၣ်​ ပအဲၣ်ဒိးမၤအါန့ၢ်ဒံး ပဆၢဂ့ၤဆၢဝါအဝဲသ့ၣ်လီၤ. ပကဘၣ်ကဲထီၣ်​ ပှၤသီတဖၣ်အတံၤသကိးလီၤ. အဃိ ပကဘၣ်ပာ်ဖျါထီၣ်လၢ ပသူၣ်အိၣ်သးအိၣ်​ အဝဲသ့ၣ်နီၢ်နီၢ်လီၤ. ပဘၣ်ယိၣ်န့ၢ်တၢ်လၢ ပှၤသီတဖၣ်အဂီၢ်ဒ်လဲၣ်န့ၣ်​ ပသံကွၢ်အီၤသ့လီၤ. ဘၣ်ဆၣ်​ ပတဘၣ်သံကွၢ်တၢ်လၢ ကမၤမဲာ်ဆှးအီၤဘၣ်. လၢတၢ်န့ၣ်အလီၢ် ပကဂုာ်ကျဲးစၢးနၢ်ပၢၢ်စၢၤအဝဲသ့ၣ်​ အတၢ်အိၣ်သးလီၤ. ပှၤတနီၤန့ၣ်​ ကတဲဖျါထီၣ်အတၢ်တူၢ်ဘၣ်အဂီၢ် တညီဝဲဘၣ်. အဃိ ပတဘၣ်မၢဆူၣ်အီၤလၢ ကတဲဖျါထီၣ်​ အတၢ်တူၢ်ဘၣ်တဖၣ်ဘၣ်. လၢတၢ်န့ၣ်အလီၢ် သံကွၢ်အီၤလၢတၢ်အဲၣ်တၢ်ကွံဒီး တၢ်ကူၣ်သ့အပူၤ ဒီးဒိကနၣ်န့ၢ်အီၤလၢ တၢ်ဝံသးစူၤအပူၤတက့ၢ်. အဒိ, နကသံကွၢ်အဝဲသ့ၣ်လၢ အဒိးန့ၢ်ဘၣ်တၢ်မ့ၢ်တၢ်တီဒ်လဲၣ်.

၁၅. ဒီပုၢ်ဝဲၢ်လၢ အဒိၣ်တုာ်ခိၣ်ပှဲၤတဖၣ်​ မၤစၢၤပှၤဂၤလၢ တၢ်အိၣ်ဖှိၣ်အပူၤကသ့ဒ်လဲၣ်.

^၁၅ ပမ့ၢ်သူၣ်အိၣ်သးအိၣ်လိာ်သး တဂၤဒီးတဂၤန့ၣ်​ ပှၤလၢတၢ်အိၣ်ဖှိၣ်ပူၤ အတၢ်နာ် ကဂၢၢ်ကျၢၤထီၣ်ဝဲလီၤ. လီၤဆီဒၣ်တၢ် တၢ်အိၣ်ဖှိၣ်သးပှၢ်ဒီး ပှၤလၢအနီၢ်သးဆူၣ်တဖၣ်​ မ့ၢ်မၤဝဲဒ်န့ၣ်န့ၣ်​ တၢ်အိၣ်ဖှိၣ်ဖိတဖၣ်​ အတၢ်နာ်ဟဲဂၢၢ်ကျၢၤထီၣ်ဝဲလီၤ. ဒီပုၢ်ဝဲၢ်မုၣ်မလံစၤန့ၣ်​ အမိၢ်ကွၢ်လုၢ်ဒိၣ်ထီၣ်အီၤလၢ တၢ်မ့ၢ်တၢ်တီအပူၤ ထဲတဂၤဧိၤလီၤ. အတဲဝဲလၢ “ဒီပုၢ်ဝဲၢ်ခွါလၢ အနီၢ်သးဆူၣ်တဖၣ်လၢ အလီၤဂာ်ဒီးယပၢ်လၢနီၢ်သးတခီန့ၣ်​ အဝဲသ့ၣ်ဟ့ၣ်ယၤ အတၢ်ဆၢကတီၢ်ဒီး သူၣ်အိၣ်သးအိၣ်ယၤ အဃိယပာ်လုၢ်ပာ်ပှ့ၤ အဝဲသ့ၣ်ဒိၣ်မးလီၤ. တဘျီလၢ်လၢ် ယမ့ၢ်လိၣ်ဘၣ်တဲတၢ်န့ၣ်​ ယတဲတၢ်ဒီးအဝဲသ့ၣ်သ့လီၤ.” ပှၤလၢအမၤလိ ဒီပုၢ်ဝဲၢ်ခွါမီရံစံအိ အလံာ်စီဆှံန့ၣ်​ ပာ်တ့ၢ်ကွံာ်တၢ်မ့ၢ်တၢ်တီ အဃိအသးဘၣ်ဒိ ဒီးအဝဲတူၢ်ဘၣ်ဝဲလၢ အအိၣ်တီၢ်ထဲတဂၤဧိၤလီၤ. ဒီးအတဲဝဲလၢ “တၢ်အိၣ်ဖှိၣ်သးပှၢ်တဖၣ်​ သူၣ်အိၣ်သးအိၣ်ယၤအဃိ ကဲထီၣ်တၢ်မၤစၢၤ လၢယဂီၢ်ဒိၣ်မးလီၤ. အဝဲသ့ၣ်တဲသကိးတၢ်ဒီးယၤထီဘိ ဒီးဟးစံၣ်တဲၤတဲလီၤတၢ်ဒီးယၤလီၤ. အဝဲသ့ၣ်တဲပၠးယၤ တၢ်လုၢ်ဒိၣ်ပှ့ၤဒိၣ်လၢ အထံၣ်န့ၢ်လၢ လံာ်စီဆှံအပူၤလီၤ. တကးဒံးဘၣ်​ အဝဲသ့ၣ်​ ဟဲဂဲၤလိာ်ကွဲဒီးယၤလီၤ.” ခဲအံၤ ဒီပုၢ်ဝဲၢ်မုၣ်မလံစၤ ဒီးဒီပုၢ်ဝဲၢ်ခွါမီရံစံအိ မၤယွၤအတၢ်မၤလၢ ဆၢကတီၢ်လၢပှဲၤလီၤ.

၁၆-၁၇. နမၤစၢၤပှၤဂၤ ကသ့လၢကျဲဒ်လဲၣ်.

^၁၆ မၤစၢၤဒီပုၢ်ဝဲၢ်မုၣ်ခွါတဖၣ်တက့ၢ်. (ကလၤတံ ၆:၁၀) ဒီပုၢ်ဝဲၢ်ခွါလံအိၤ လၢအမၤဝဲ မံးၡ့ၣ်နရ့ၣ်တၢ်မၤလၢ တၢ်လီၢ်ဖးယံၤ ဒီးအအိၣ်ယံၤဒီးအဟံၣ်ဖိဃီဖိန့ၣ်​ တဲဝဲလၢ “ညီနုၢ်နကပာ်ဖျါထီၣ်တၢ်အဲၣ်အဂီၢ် တၢ်လၢနကဘၣ်မၤအီၤန့ၣ်​ ယိယိဖိလီၤ. ယနီၣ်ဘၣ်က့ၤ ဘၣ်တနံၤဖဲ ယကါဘၣ်တဲးအခါ ယက့ၤတုၤလၢဟံၣ်​ ဒီးယသူၣ်ကိၢ်သးဂီၤတၢ်ဒိၣ်မးလီၤ. ဘၣ်ဆၣ်​ ပှၤနီၢ်ဒီမါဝါခံဂၤ ကွဲမုာ်ယၤလၢ ယကလဲၤအီၣ်သကိးမ့ၤဒီးအဝဲသ့ၣ်လီၤ. ပအီၣ်ဘၣ်တၢ်မနုၤလဲၣ်ဒု ယတနီၣ်ဘၣ်လၢၤဘၣ်​ ဘၣ်ဆၣ်​ ယနီၣ်ဘၣ်လၢ အဝဲသ့ၣ်သးအိၣ်ဒိကနၣ်န့ၢ်ယၤလီၤ. လၢခံ ယသးသမုာ်ထီၣ်က့ၤဝဲလီၤ.

^၁၇ ပဝဲခဲလၢာ်န့ၣ်​ ပဘၣ်သူၣ်ဘၣ်သးဝဲ ဘီမုၢ်အတၢ်ရဲၣ်တၢ်ကျဲၤတဖၣ်​ ဒ်သိးဒီး ကဝီၤတၢ်အိၣ်ဖှိၣ်​ ဒီးတၢ်အိၣ်ဖှိၣ်ဖးဒိၣ်တဖၣ်လီၤ. ဖဲန့ၣ်​ ပရ့လိာ်ဘၣ်ပသးဒီး ပှၤအဂၤတဖၣ်​ ဒီးပမၤလိန့ၢ်ဘၣ်တၢ်လၢ တဂၤဒီးတဂၤအအိၣ်လီၤ. ဘၣ်ဆၣ်​ ဒီပုၢ်ဝဲၢ်မုၣ်ခၤရိၤတဲဝဲလၢ “လၢကဝီၤတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ်န့ၣ်​ ယတူၢ်ဘၣ်လၢ ယအိၣ်ထဲတဂၤဧိၤလီၤ.” ဘၣ်မနုၤအဃိ အဝဲတူၢ်ဘၣ်ဝဲဒ်အံၤလဲၣ်. ဒီပုၢ်ဝဲၢ်မုၣ်တဲဝဲလၢ “ယအိၣ်ဘၣ်တပူၤဃီဒီး ဒီပုၢ်ဝဲၢ်မုၣ်ခွါလၢ အကထိတဖၣ်ဒၣ်လဲာ် ယတူၢ်ဘၣ်လၢ ယအိၣ်ထဲတဂၤဧိၤ မ့ၢ်လၢ အဝဲသ့ၣ်ဆ့ၣ်နီၤတပူၤဃီဒီး အဟံၣ်ဖိဃီဖိတဖၣ်အဃိလီၤ.” လၢပှၤတနီၤနီၤအဂီၢ် မ့ၢ်လၢအသးသမူတံၤသကိး သံသဒၣ်ကွံာ်အဝဲသ့ၣ်​ အဃိ ကီလၢအဝဲသ့ၣ်ကလဲၤထီၣ်​ ကဝီၤတၢ်အိၣ်ဖှိၣ်​ ဒီးတၢ်အိၣ်ဖှိၣ်ဖးဒိၣ်အဂီၢ်လီၤ. ပှၤလၢအထံၣ်ဘၣ်ဒီး တၢ်အိၣ်သးဒ်အံၤန့ၣ်​ မ့ၢ်နသ့ၣ်ညါအိၣ်ဧါ. မ့ၢ်အိၣ်န့ၣ်​ ကွဲမုာ်အဝဲသ့ၣ်လၢ ကလဲၤထီၣ်တၢ်အိၣ်ဖှိၣ်ဖးဒိၣ်တပူၤဃီ ဒီးနဟံၣ်ဖိဃီဖိသ့လီၤ.

၁၈. ဖဲပတူၢ်လိာ်ခီၣ်ဆၢ ပှၤတမှံၤအခါ ပမၤထွဲ ၂ ကရံၣ်သူး ၆:၁၁-၁၃ ကသ့ဒ်လဲၣ်.

^၁၈ ဟ့ၣ်တၢ်ဆၢကတီၢ်လၢ သုကရ့လိာ်သး ဒ်သိးသိးတက့ၢ်. ရ့ဒီးဒီပုၢ်ဝဲၢ်မုၣ်ခွါအသီတဖၣ်, လီၤဆီဒၣ်တၢ် ပှၤလၢအတူၢ်ဘၣ်ဝဲလၢ အအိၣ်ထဲတဂၤဧိၤန့ၣ်တက့ၢ်. ပအဲၣ်ဒိး “အိးထီၣ်​ [ပ]သးလဲၢ်လဲၢ်” လၢပှၤသ့ၣ်တဖၣ်အံၤအဖီခိၣ်လီၤ. (ဖး ၂ ကရံၣ်သူး ၆:၁၁-၁၃ တက့ၢ်.) ဒီပုၢ်ဝဲၢ်မုၣ်မလံစၤ တဲဝဲလၢ “ဖဲဒီပုၢ်ဝဲၢ်မုၣ်ခွါတဖၣ်ကွဲမုာ်ယၤလၢ အဝဲသ့ၣ်အဟံၣ်​ ဒီးယရ့လိာ်ဘၣ်သးဒီး အဟံၣ်ဖိဃီဖိအခါ ပသးခုဒိၣ်မးလီၤ.” လၢတၢ်အိၣ်ဖှိၣ်အပူၤ ပှၤလၢနကဘၣ်တူၢ်လိာ်ခီၣ်ဆၢအီၤ ဒ်ပှၤတမှံၤအသိးန့ၣ်​ မ့ၢ်အအိၣ်တဂၤဂၤဧါ.

၁၉. ပကဘၣ်ဟ့ၣ်​ ပတၢ်ဆၢကတီၢ်ဒီး ဒီပုၢ်ဝဲၢ်မုၣ်ခွါတဖၣ်​ လၢအခါဖဲလဲၣ်.

^၁၉ တဘျီတခီၣ်​ ပမ့ၢ်သူတၢ်ဆၢကတီၢ်လၢ ပကရ့ဒီး ပဒီပုၢ်ဝဲၢ်မုၣ်ခွါတဖၣ်န့ၣ်​ အဝဲသ့ၣ်ပာ်လုၢ်ပာ်ပှ့ၤဝဲလီၤ. ဒီပုၢ်ဝဲၢ်မုၣ်ခွါတနီၤန့ၣ်​ အဟံၣ်ဖိဃီဖိတဖၣ်​ တမ့ၢ်ယဟိၤယွၤပှၤအုၣ်အသးဘၣ်​ ဒီးမၤဝဲတၢ်ဘူၣ်တၢ်ဘါ အမူးပွဲတဖၣ်အဃိ ကီလၢအဝဲသ့ၣ်​ ကရ့လိာ်သးအဂီၢ်လီၤ. ဒီးအဂၤတနီၤ ဖဲပှၤလၢအဲၣ်ဘၣ်ဝဲတဂၤ သံဝဲအနံၤန့ၣ်​ ဘၣ်သ့ၣ်သ့ၣ်အဝဲသ့ၣ်​ ကသးအုးဒိၣ်မးလီၤ. ဖဲပရ့ဒီး ပှၤလၢအထံၣ်ဘၣ်​ တၢ်အိၣ်သးဒ်န့ၣ်အခါ မ့ၢ်ဝဲ ပပာ်ဖျါထီၣ်​ “တၢ်သူၣ်အိၣ်သးအိၣ်” အဝဲသ့ၣ်နီၢ်ကီၢ်လီၤ.—ဖံလံးပံၤ ၂:၂၀.

၂၀. ဖဲပတူၢ်ဘၣ်လၢ ပအိၣ်သယုၢ်သညိ ထဲတဂၤဧိၤအခါ ယ့ၣ်ၡူးအတၢ်ကတိၤလၢ မးသဲ ၁၂:၄၈-၅၀ အပူၤန့ၣ်​ မၤစၢၤပှၤဒ်လဲၣ်.

^၂၀ ခရံာ်ဖိတဂၤ ကတူၢ်ဘၣ်ဝဲလၢ အအိၣ်သယုၢ်သညိ ထဲတဂၤဧိၤခီဖျိလၢ တၢ်ဂ့ၢ်အါမံၤအဖီခိၣ်လီၤ. ပကဘၣ်သ့ၣ်နီၣ်ထီၣ်က့ၤလၢ ယဟိဝၤယွၤသူၣ်အိၣ်သးအိၣ်ဘၣ်ဝဲ ပှၤသ့ၣ်တဖၣ်အံၤလီၤ. ယဟိဝၤယွၤသူဝဲ ဒီပုၢ်ဝဲၢ်မုၣ်ခွါတဖၣ်​ ဒ်သိးကမၤစၢၤပှၤအဂီၢ်လီၤ. (ဖး မးသဲ ၁၂:၄၈-၅၀ တက့ၢ်.) ပစံးဘျုးက့ၤ ယဟိဝၤယွၤသ့ခီဖျိ ပဂုာ်ကျဲးစၢးအဂ့ၤကတၢၢ်လၢ ပကမၤစၢၤဒီပုၢ်ဝဲၢ်မုၣ်ခွါတဖၣ်လီၤ. တဘျီတခီၣ်​ ပမ့ၢ်တူၢ်ဘၣ်လၢ ပအိၣ်ထဲတဂၤဧိၤ သနာ်က့ ခီဖျိလၢယဟိဝၤယွၤ အိၣ်လၢပကပၤထီဘိအဃိ ပတအိၣ်ထဲတဂၤဧိၤ နီတဘျီဘၣ်.