အိၣ်ဒီးတၢ်ဃူတၢ်ဖိး ဒီးတဘၣ်ဒုးအိၣ်ထီၣ်​ တၢ်ပြၢလိာ်သးတဂ့ၤ

၁. ပှၤမ့ၢ်ဆိကမိၣ်လီၤသးလၢ အဂ့ၤဒိၣ်န့ၢ်ဒံးပှၤဂၤန့ၣ်​ တၢ်ကကဲထီၣ်အသးဒ်လဲၣ်.

မုၢ်မဆါတနံၤအံၤ ပှၤဟီၣ်ခိၣ်ဖိတဖၣ်​ ဆိကမိၣ်ဒိၣ်လီၤအသး ဒီးအဝဲသ့ၣ်အတၢ်ဖံးတၢ်မၤတဖၣ်​ ကမၤဘၣ်ဒိပှၤဂၤဒ်လဲၣ်န့ၣ်​ တဆိကမိၣ်ဝဲဘၣ်. အဒိ, ပှၤမၤစံပွါယ့တဂၤ ဒ်သိးအတၢ်မၤ ကကဲထီၣ်လိၣ်ထီၣ်​ အါန့ၢ်ဒံးပှၤဂၤအဂီၢ် အဝဲကမၤဘၣ်ဒိဆါ ပှၤအဂၤတဖၣ်လီၤ. ပှၤလိာ်ကွဲပြၢတၢ်ဖိတဂၤ ဒ်သိးအကမၤနၢၤတၢ်အဂီၢ် အဝဲကမၤဘၣ်ဒိပှၤလိာ်ဖိ လၢအဂၤတဂၤလီၤ. ပှၤကၠိဖိတဂၤ ဒ်သိးအကထီၣ်ဘၣ်​ ဖၠၣ်စိမိၤကၠိလၢ အမံၤဒိၣ်တဖျၢၣ်အဂီၢ် ဘၣ်သ့ၣ်သ့ၣ်​ အကကွၢ်ဟုၣ်ဝဲ တၢ်ဒိးစဲးအလံာ်လီၤ. မ့မ့ၢ်ပဝဲခရံာ်ဖိတဖၣ်န့ၣ်​ ပသ့ၣ်ညါလၢ တၢ်သ့ၣ်တဖၣ်အံၤန့ၣ်​ အကမၣ်ဒီးမ့ၢ်ဝဲ “တၢ်ဖံးတၢ်ညၣ်​ အတၢ်သူၣ်လီသးကွံအတၢ်မၤတဖၣ်” လီၤ. (ကလၤတံ ၅:၁၉-၂၁) ဘၣ်ဆၣ်​ ဒီပုၢ်ဝဲၢ်မုၣ်ခွါတနီၤ ကဆိကမိၣ်ဘၣ်ဝဲလၢ အဂ့ၤဒိၣ်န့ၢ်ဒံးပှၤဂၤ ဒီးအဲၣ်ဒိးလၢ ပှၤဂၤကအိၣ်ဒီး တၢ်ထံၣ်ဒ်သိးဒီးအဝဲသ့ၣ်န့ၣ်​ မ့ၢ်အသ့ၣ်ညါလီၤအသးစ့ၢ်ကီးဧါ. ပကဘၣ်ဆိကမိၣ်ထံဘၣ်ဃး ဒီးတၢ်ဂ့ၢ်အံၤလီၤ. မ့ၢ်လၢပှၤလၢတၢ်အိၣ်ဖှိၣ်အပူၤတဖၣ်​ မ့ၢ်ဆိကမိၣ်လၢ အဂ့ၤဒိၣ်န့ၢ်ဒံးပှၤဂၤန့ၣ်​ တၢ်ဃူတၢ်ဖိးတအိၣ်လၢၤဘၣ်.

၂. လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်.

^၂ လၢတၢ်မၤလိအံၤအပူၤ ပကတဲသကိး တၢ်ပာ်သူၣ်ပာ်သးတနီၤလၢ ကဒုးအိၣ်ထီၣ်ဝဲ တၢ်ဆိကမိၣ်လၢ ပဂ့ၤဒိၣ်န့ၢ်ဒံး ပဒီပုၢ်ဝဲၢ်မုၣ်ခွါတဖၣ်လီၤ. ပကတဲသကိးစ့ၢ်ကီး ယဟိဝၤယွၤအခ့အပှၤလၢ အသးတီလၢ တဆိကမိၣ်ဒိၣ်လီၤအသးတဖၣ်အဂ့ၢ်တနီၤ လၢလံာ်စီဆှံအပူၤလီၤ. အဆိကတၢၢ် ပတၢ်ပာ်သူၣ်ပာ်သးတဖၣ်အိၣ်ဒ်လဲၣ်န့ၣ်​ ပကသမံသမိးကွၢ်အီၤလီၤ.

သမံသမိးကွၢ်က့ၤ နတၢ်ပာ်သူၣ်ပာ်သးတဖၣ်

၃. ပကဘၣ်​ သံကွၢ်လီၤပသးဒ်လဲၣ်.

^၃ ပမ့ၢ်သမံသမိးလီၤက့ၤ ပတၢ်ပာ်သူၣ်ပာ်သး ခဲအံၤခဲအံၤန့ၣ်​ ကဂ့ၤဝဲလီၤ. ပကဘၣ်သံကွၢ်လီၤပသးလၢ ‘ဖဲယထိၣ်သတြီၤယသးဒီး ပှၤဂၤအခါ မ့ၢ်ယတူၢ်ဘၣ်အီၤမုာ်ဧါ. ယမၤတၢ်ဆူၣ်ဆူၣ်လၢ တၢ်အိၣ်ဖှိၣ်အပူၤ မ့ၢ်လၢယအဲၣ်ဒိး ကဲပှၤအဂ့ၤကတၢၢ် မ့တမ့ၢ် မ့ၢ်ယအဲၣ်ဒိးဖျါဂ့ၤဒိၣ်န့ၢ် ဒီပုၢ်ဝဲၢ်မုၣ်ခွါတဖၣ်ဧါ. မ့တမ့ၢ် ယဂုာ်ကျဲးစၢး မၤတၢ်ဆူၣ်ဆူၣ်ဒ်သိး ကမၤသးခု ယဟိဝၤယွၤအသးဧါ.’ ဘၣ်မနုၤအဃိ ပကဘၣ်သံကွၢ် တၢ်သံကွၢ်ဒ်အံၤလဲၣ်. ဘၣ်ဃးဒီးတၢ်ဂ့ၢ်အံၤ ကစၢ်ယွၤကလုၢ်ကထါ တဲဝဲဒ်လဲၣ်.

၄. ဒ် ကလၤတံ ၆:၃, ၄ ပာ်ဖျါထီၣ်ဝဲအသိး ဘၣ်မနုၤအဃိ ပတကြၢးထိၣ်သတြီၤပသးဒီးပှၤဂၤလဲၣ်.

^၄ လံာ်စီဆှံဟ့ၣ်ပလီၢ်ပှၤလၢ ပတဘၣ်ပြၢလိာ်ပသး ဒီးပှၤဂၤဘၣ်. (ဖး ကလၤတံ ၆:၃, ၄ တက့ၢ်.) ဘၣ်မနုၤအဃိလဲၣ်. တၢ်ဂ့ၢ်တၢတခါန့ၣ်​ ပမ့ၢ်ဆိကမိၣ်လၢ ပဂ့ၤဒိၣ်န့ၢ်ဒံးဒီပုၢ်ဝဲၢ်မုၣ်ခွါန့ၣ်​ ပကပာ်ထီၣ်ထီ ဘၣ်ပသးလီၤ. ဒီးပမ့ၢ်ဆိကမိၣ်လၢ ဒီပုၢ်ဝဲၢ်မုၣ်ခွါတဖၣ်​ မၤတၢ်ကဲထီၣ်လိၣ်ထီၣ်​ ဒိၣ်န့ၢ်ဒံးပှၤန့ၣ်​ ပသးကလီၤစၢ်လီၤ. ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်မၤဒ်န့ၣ်န့ၣ်​ ပတအိၣ်ဒီးတၢ်ကူၣ်သ့ဘၣ်. (ရိမ့ၤ ၁၂:၃) ဒီပုၢ်ဝဲၢ်မုၣ်တဂၤ အမံၤလၢ ခဲၣ်ထရံနၤb လၢအအိၣ်လၢကြံး(စ်) န့ၣ်တဲဝဲလၢ “ယထိၣ်သတြီၤယသးဒီး ပှၤလၢအဒိၣ်တၢ်ဂ့ၤ ဒိၣ်န့ၢ်ဒံးယၤ, ပှၤလၢအအိၣ်ဒီး တၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအပူၤ ဒီးပှၤလၢအရ့တံၤရ့သကိး သ့တဖၣ်လီၤ. ခီဖျိလၢယမၤဒ်အံၤအဃိ ယတူၢ်ဘၣ်လၢ ယလုၢ်ယပှ့ၤတအိၣ်လၢၤဘၣ်.” ပကဘၣ်သ့ၣ်နီၣ်ထီၣ်က့ၤလၢ ယဟိဝၤယွၤမူၤဃီၤပှၤဆူအအိၣ်န့ၣ်​ တမ့ၢ်ခီဖျိလၢပဒိၣ်တၢ်ဂ့ၤ, တဲတၢ်ဖၠဲး မ့တမ့ၢ် ပှၤသ့ၣ်ညါပှၤအါအဃိဘၣ်. ယဟိဝၤယွၤမူၤဃီၤပှၤဆူအအိၣ်​ ခီဖျိပအဲၣ်အီၤနီၢ်နီၢ် ဒီးဒိကနၣ်အဖိခွါ အကလုၢ်အဃိလီၤ.—ယိၤဟၣ်​ ၆:၄၄; ၁ ကရံၣ်သူး ၁:၂၆-၃၁.

၅. ဘၣ်ဃးဒီး ဒီပုၢ်ဝဲၢ်ခွါယူ အတၢ်လဲၤခီဖျိန့ၣ်​ ပမၤလိန့ၢ်တၢ်မနုၤလဲၣ်.

^၅ ပကဘၣ်သံကွၢ်လီၤဒံးပသးလၢ ‘မ့ၢ်ဒီပုၢ်ဝဲၢ်မုၣ်ခွါတဖၣ်ထံၣ်ယၤဒ် ပှၤလၢအမၤဃူမၤဖိးတၢ်ဒီး ပှၤဂၤဧါ မ့တမ့ၢ် ပှၤလၢအသး တလီၤပလိာ်ဒီးပှၤဂၤ ထီဘိဘၣ်ဧါ.’ ဆိကမိၣ်ကွၢ် တၢ်ကဲထီၣ်အသးဒီး ဒီပုၢ်ဝဲၢ်ခွါယူ လၢအအိၣ်လၢခိရံယါ န့ၣ်တက့ၢ်. အဝဲဆိကမိၣ်ဝဲလၢ ဒီပုၢ်ဝဲၢ်လၢ အအိၣ်ဒီးအမူဒါလၢ တၢ်အိၣ်ဖှိၣ်အပူၤတနီၤန့ၣ်​ ဖျါလၢအဝဲသ့ၣ်အဲၣ်ဒိး ဂ့ၤဒိၣ်န့ၢ်ဒံးအီၤလီၤ. အဝဲတဲဝဲလၢ “ယတကၠဲး ဒီပုၢ်ဝဲၢ်ခွါသ့ၣ်တဖၣ်အံၤဘၣ်​ ဒီးညီနုၢ် တၢ်လၢအဝဲသ့ၣ်တဲဝဲန့ၣ်​ ယသးတလီၤပလိာ်ဘၣ်.” တၢ်ကဲထီၣ်အသးဒီးအီၤဒ်လဲၣ်. အတဲဝဲလၢ “ခီဖျိလၢယတၢ်ပာ်သူၣ်ပာ်သး အိၣ်ဒ်အံၤအဃိ တၢ်အိၣ်ဖှိၣ်တၢ်ဃူတၢ်ဖိး တအိၣ်ဝဲဘၣ်.” ဒီပုၢ်ဝဲၢ်ခွါယူ အသကိးတနီၤ မၤစၢၤအီၤဒ်သိး အကထံၣ်လီၤက့ၤ အတၢ်ဂံၢ်စၢ်ဘါစၢ်လီၤ. ဒီပုၢ်ဝဲၢ်ခွါယူ ဆီတလဲအတၢ်ပာ်သူၣ်ပာ်သး ဒီးခဲအံၤ အဝဲကဲတၢ်အိၣ်ဖှိၣ်သးပှၢ် လၢအဂ့ၤတဂၤလီၤ. ပမ့ၢ်သ့ၣ်ညါလီၤပသးလၢ ပအိၣ်ဒီးသးလၢအဲၣ်ဒိးပြၢတၢ်န့ၣ်​ ပကဘၣ်ဆီတလဲ ပတၢ်ပာ်သူၣ်ပာ်သးအံၤ လၢအချ့လီၤ.

ပတဘၣ်ပာ်ဒိၣ်လီၤပသး ဒီးသူၣ်က့ၣ်သးကါပှၤဂၤဘၣ်

၆. ဒ် ကလၤတံ ၅:၂၆ ပာ်ဖျါထီၣ်ဝဲအသိး တၢ်ပာ်သူၣ်ပာ်သး ဒ်လဲၣ်တကလုာ်လၢ အဒုးအိၣ်ထီၣ်တၢ်ပြၢလိာ်သးလဲၣ်.

^၆ ဖး ကလၤတံ ၅:၂၆ တက့ၢ်. တၢ်ပာ်သူၣ်ပာ်သး ဒ်လဲၣ်တကလုာ်လၢ အဒုးအိၣ်ထီၣ်တၢ်ပြၢလိာ်သး သ့န့ၣ်လဲၣ်. တၢတခါန့ၣ်​ မ့ၢ်ဝဲ တၢ်ပာ်ဒိၣ်လီၤသးလီၤ. ပှၤလၢအပာ်ဒိၣ်လီၤသးန့ၣ်​ အိၣ်ဒီးတၢ်ပာ်ထီၣ်ထီလီၤအသး ဒီးအဲၣ်လီၤထဲအသးလီၤ. တၢ်ပာ်သူၣ်ပာ်သး ခံခါတခါန့ၣ်​ မ့ၢ်ဝဲ တၢ်သူၣ်က့ၣ်သးကါတၢ်လီၤ. ပှၤလၢအသူၣ်က့ၣ်သးကါပှၤဂၤန့ၣ်​ တမ့ၢ်ထဲအလီကီပှၤဂၤ အတၢ်ဖိတၢ်လံၤယိယိဖိဘၣ်. အဝဲအဲၣ်ဒိးဟံးန့ၢ်ကွံာ် ပှၤဂၤအတၢ်ဖိတၢ်လံၤ စ့ၢ်ကီးလီၤ. အဃိ ပှၤလၢအသူၣ်က့ၣ်သးကါပှၤဂၤန့ၣ်​ အသးဟ့ပှၤဂၤလီၤ. တၢ်ပာ်သူၣ်ပာ်သး လၢအတဂ့ၤဘၣ်တဖၣ်အံၤ ပအဲၣ်ဒိးဟးဆှဲးအီၤလီၤ.

၇. ပမ့ၢ်ပာ်ထီၣ်ထီသးဒီး သူၣ်က့ၣ်သးကါတၢ်န့ၣ်​ ကမၤဘၣ်ဒိပှၤဒ်လဲၣ်​ ဒီးဟ့ၣ်တၢ်အဒိတက့ၢ်.

^၇ တၢ်ပာ်ဒိၣ်လီၤသးဒီး တၢ်သူၣ်က့ၣ်သးကါန့ၣ်​ အလီၤဂာ်ဒီး တၢ်ကမှံၤလၢအအိၣ်လၢ ကဘီယူၤသိအကျါလီၤ. ကဘီယူၤန့ၣ်​ ယူၤထီၣ်ဝဲသ့ ဘၣ်ဆၣ်တၢ်ကမှံၤအံၤ ကမၤပံးဝဲကဘီယူၤသိအကျိၤ အဃိ ကဘီယူၤစဲး တမၤတၢ်ဂ့ၤဂ့ၤလၢၤဘၣ်. ဒီးဖဲကဘီယူၤကစီၢ်လီၤအခါန့ၣ်​ ပှၤပၢၤအီၤတန့ၢ်လၢၤဘၣ်အဃိ ကဘီယူၤကဟးဂီၤဝဲလီၤ. ဒ်န့ၣ်အသိး ပှၤတဂၤကဆဲးမၤဒံး ယဟိဝၤယွၤအတၢ်မၤလီၤ. ဘၣ်ဆၣ်​ အဝဲမ့ၢ်ပာ်ထီၣ်ထီသးဒီး သူၣ်က့ၣ်သးကါတၢ်န့ၣ်​ လၢခံအနီၢ်ကစၢ် ကဘၣ်ဒိဝဲလီၤ. (ကတိၤဒိ ၁၆:၁၈) အဝဲကပတုာ်မၤ ယဟိဝၤယွၤအတၢ်မၤ ဒီးအကမၤဘၣ်ဒိ အနီၢ်ကစၢ်ဒီး ပှၤဂၤလီၤ. ဒ်သိးပသု တပာ်ထီၣ်ထီသးဒီး သူၣ်က့ၣ်သးကါတၢ်တဂ့ၤအဂီၢ် ပကဘၣ်မၤဒ်လဲၣ်.

၈. ပမၤနၢၤကွံာ် တၢ်ပာ်ထီၣ်ထီသး ကသ့ဒ်လဲၣ်.

^၈ ပမၤနၢၤကွံာ် တၢ်ပာ်ထီၣ်ထီသးသ့ ခီဖျိ ပမၤထွဲ စီၤပီလူးအတၢ်ဟ့ၣ်ကူၣ်လီၤ. စီၤပီလူးဟ့ၣ်ကူၣ်​ ပှၤဖံလံးပံၤဖိလၢ “တဘၣ်မၤတၢ်လၢ တၢ်သးထီၣ်​ မ့တမ့ၢ် တၢ်ဆိကမိၣ်ဒိၣ်လီၤသးအဃိ နီတမံၤတဂ့ၤ. မ့မ့ၢ်လၢ တၢ်ဆီၣ်လီၤသးအပူၤ ဆိကမိၣ်လၢပှၤဂၤတဖၣ်​ ဒိၣ်န့ၢ်ဒံးသုတက့ၢ်.” (ဖံလံးပံၤ ၂:၃) ပမ့ၢ်ထံၣ်လၢ ပှၤဂၤဂ့ၤဒိၣ်န့ၢ်ဒံးပှၤန့ၣ်​ ပတထိၣ်သတြီၤပသးဒီး ပှၤလၢအတၢ်သ့တၢ်ဘၣ်​ အိၣ်အါန့ၢ်ဒံးပှၤတဖၣ်ဘၣ်. လၢတၢ်န့ၣ်အလီၢ် ပကသးခုဃုာ်ဒီးပှၤဂၤ လီၤဆီဒၣ်တၢ်ဖဲ အဝဲသ့ၣ်သူအတၢ်သ့တၢ်ဘၣ်လၢ ကမၤယဟိဝၤယွၤ အတၢ်မၤအခါလီၤ. ပဒီပုၢ်ဝဲၢ်မုၣ်ခွါတဖၣ်လၢ အအိၣ်ဒီးတၢ်သ့တၢ်ဘၣ်လၢ အမၤထွဲစီၤပီလူးအတၢ်ဟ့ၣ်ကူၣ်န့ၣ်​ အဝဲသ့ၣ်ကထံၣ်​ ပတၢ်ဂ့ၤတၢ်ဝါတဖၣ်လီၤ. ပမ့ၢ်မၤဒ်န့ၣ်န့ၣ်​ ပဝဲခဲလၢာ် ကဒုးအိၣ်ထီၣ်​ တၢ်ဃူတၢ်ဖိး ဒီးတၢ်မုာ်တၢ်ခုၣ်လၢ တၢ်အိၣ်ဖှိၣ်အပူၤလီၤ.

၉. ဒ်သိးပသုတပာ်ထီၣ်ထီသးလၢ ဒီပုၢ်ဝဲၢ်မုၣ်ခွါအဖီခိၣ်​ တဂ့ၤအဂီၢ် ပကဘၣ်မၤမနုၤလဲၣ်.

^၉ ပဒီသဒၢလီၤပသးသ့ ခီဖျိပတသူၣ်က့ၣ်သးကါ ပဒီပုၢ်ဝဲၢ်မုၣ်ခွါဘၣ်. မ့ၢ်လၢပသ့ၣ်ညါလီၤပသးလၢ ပမၤတၢ်တသ့ဂ့ၤဂ့ၤ ခဲလၢာ်ဘၣ်. ပမ့ၢ်ဆီၣ်လီၤပသးန့ၣ်​ ပတဂုာ်ကျဲးစၢးလၢ ပဂ့ၤဒိၣ်န့ၢ်ပှၤဂၤဘၣ်. လၢတၢ်န့ၣ်အလီၢ် ပကဂုာ်ကျဲးစၢးမၤလိန့ၢ်တၢ်လၢ ပှၤလၢအဖၠဲးန့ၢ်ဒံးပှၤ အအိၣ်လီၤ. အဒိ, ဒီပုၢ်ဝဲၢ်ခွါလၢ အဟ့ၣ်ကမျၢၢ်တၢ်စံၣ်တဲၤတဲလီၤတၢ်ဖၠဲးတဂၤန့ၣ်​ ပကဃ့တၢ်ဟ့ၣ်ကူၣ်လၢအအိၣ်လီၤ. ပကသံကွၢ်အီၤလၢ အဝဲကတဲာ်ကတီၤ တၢ်စံၣ်တဲၤတဲလီၤတၢ်လၢ ကမျၢၢ်အဂီၢ် ဒ်လဲၣ်န့ၣ်လီၤ. ဒီပုၢ်ဝဲၢ်မုၣ်တဂၤလၢ အဖီအီၣ်တၢ်ဖၠဲးန့ၣ်​ ပကသံကွၢ်အီၤဒ်သိး အကဟ့ၣ်ကူၣ်ပှၤလၢ ပဖီအီၣ်တၢ်ကဝံၣ်ထီၣ်အဂီၢ်လီၤ. ဒီးဒီပုၢ်ဝဲၢ်သးစၢ်တဂၤ အရ့ဒီးပှၤဂၤမ့ၢ်တသ့ဘၣ်န့ၣ်​ အကဘၣ်ဃ့ပှၤဂၤတၢ်မၤစၢၤဒ်သိး အရ့ဒီးပှၤဂၤကသ့ထီၣ်အဂီၢ်လီၤ. ပမ့ၢ်မၤဒ်အံၤန့ၣ်​ ပတအိၣ်ဒီးတၢ်ပာ်ထီၣ်ထီသး ဒီးပကမၤဂ့ၤထီၣ်​ ပတၢ်သ့တၢ်ဘၣ်တဖၣ်လီၤ.

မၤလိန့ၢ်တၢ်လၢ ပှၤဒိဂ့ၤတဲာ်ဘၣ်လၢ လံာ်စီဆှံအပူၤ

၁၀. စီၤကံးဒဧိၣ်ထံၣ်ဘၣ်ဒီး တၢ်ကီတၢ်ခဲမနုၤလဲၣ်.

^၁၀ ဆိကမိၣ်ကွၢ် တၢ်ကဲထီၣ်သးဒီး စီၤကံးဒဧိၣ်​ လၢအမ့ၢ်ဝဲ ပှၤမနၤၡ့ၤအဒူၣ်​ ဒီးပှၤလၢအမ့ၢ်ဝဲ အ့ဖရဲၣ်အဒူၣ်န့ၣ်တက့ၢ်. ခီဖျိလၢ ယဟိဝၤယွၤမၤစၢၤစီၤကံးဒဧိၣ်ဒီးအပှၤ ၃၀၀ အဃိ အဝဲသ့ၣ်ဒုးတၢ်နၢၤဝဲလီၤ. ဒီးအဝဲသ့ၣ်မ့ၢ်ပာ်ထီၣ်ထီသးသ့ဝဲလီၤ. ပှၤလၢအ့ဖရဲၣ်အဒူၣ်တဖၣ်​ လၢကပတြၢၤစီၤကံးဒဧိၣ်အလီၢ်န့ၣ်​ အဝဲသ့ၣ်ဟဲဃုတၢ်အ့ၣ်လိာ်ဒီးစီၤကံးဒဧိၣ်လီၤ. ပှၤအ့ဖရဲၣ်ပိာ်ခွါတဖၣ်​ သးထီၣ်တၢ် ခီဖျိစီၤကံးဒဧိၣ်တကွဲမုာ်အဝဲသ့ၣ်လၢ ကလဲၤဒုးဝဲကစၢ်ယွၤအဒုၣ်အဒါဘၣ်အဃိလီၤ. အဝဲသ့ၣ်သးစၢၢ်ဆၢထဲလၢ ပှၤဂၤကဘၣ်ပာ်ကဲအ့ဖရဲၣ်အဒူၣ်​ အဃိ အဝဲသ့ၣ်တဆိကမိၣ်ဘၣ်ဝဲလၢ တၢ်အရ့ဒိၣ်ကတၢၢ်လၢ စီၤကံးဒဧိၣ်အဂီၢ်န့ၣ်​ မ့ၢ်ဝဲကဒီသဒၢ ယဟိဝၤယွၤအမံၤ ဒီးအပှၤဂီၢ်မုၢ်အဂီၢ်န့ၣ်ဘၣ်.—စံၣ်ညီၣ်ကွီၢ် ၈:၁.

၁၁. စီၤကံးဒဧိၣ်တဲဘၣ်​ ပှၤအ့ဖရဲၣ်ဖိတဖၣ်ဒ်လဲၣ်.

^၁၁ စီၤကံးဒဧိၣ်အိၣ်ဒီး တၢ်ဆီၣ်လီၤသးဒီး တဲဘၣ်ပှၤအ့ဖရဲၣ်ဖိလၢ “ယမၤသတြီၤတၢ်ဒီးသု မနုၤတမံၤလဲၣ်.” ဝံၤဒီး စီၤကံးဒဧိၣ်​ ဒုးသ့ၣ်နီၣ်ထီၣ်က့ၤ အဝဲသ့ၣ်လၢ ယဟိဝၤယွၤမၤစၢၤ အဝဲသ့ၣ်ဒ်လဲၣ်န့ၣ်လီၤ. ဖဲအဝဲသ့ၣ်နၢ်ဟူ စီၤကံးဒဧိၣ်တဲဝဲဒ်န့ၣ်အခါ ပိာ်ခွါတဖၣ်အံၤ “အတၢ်သးထီၣ်အီၤန့ၣ်စၢ်လီၤဝဲလီၤ.” (စံၣ်ညီၣ်ကွီၢ် ၈:၂, ၃) ဒ်သိးစီၤကံးဒဧိၣ်​ အကအိၣ်ဃူအိၣ်ဖိးဒီး ကစၢ်ယွၤအပှၤဂီၢ်မုၢ်အဂီၢ် အဆီၣ်လီၤအသးလီၤ.

၁၂. ပှၤအ့ဖရဲၣ်ဒီးစီၤကံးဒဧိၣ်​ အဒိအတဲာ်န့ၣ်​ ပမၤလိန့ၢ်ဘၣ်​ တၢ်မနုၤလဲၣ်.

^၁၂ ဘၣ်ဃးဒီးတၢ်ဂ့ၢ်အံၤန့ၣ်​ ပမၤလိန့ၢ်တၢ်မနုၤလဲၣ်. ဘၣ်ဃးဒီး ပှၤအ့ဖရဲၣ်အဒိအတဲာ်န့ၣ်​ ပမၤလိန့ၢ်ဘၣ်လၢ ပတဘၣ်သးစၢၢ်ဆၢလၢ ပှၤဂၤကထံၣ်ပှၤဒ်လဲၣ်န့ၣ်ဘၣ်. လၢတၢ်န့ၣ်အလီၢ် ပကဘၣ်သးစၢၢ်ဆၢလၢ ယဟိဝၤယွၤလီၤ. နမ့မ့ၢ်ဟံၣ်ခိၣ်ဒီး တၢ်အိၣ်ဖှိၣ်သးပှၢ်န့ၣ်​ နမၤလိန့ၢ်တၢ်လၢ စီၤကံးဒဧိၣ်​ အအိၣ်သ့ဝဲလီၤ. ပှၤတဂၤမ့ၢ်သးဘၣ်ဒိ ခီဖျိလၢ နတၢ်ဖံးတၢ်မၤအဃိန့ၣ်​ နကဘၣ်ဂုာ်ကျဲးစၢးနၢ်ပၢၢ် ဘၣ်မနုၤအဃိ အဝဲသ့ၣ်သးဘၣ်ဒိလဲၣ်န့ၣ်လီၤ. နပတြၢၤပှၤလၢ အမၤတၢ် ကဲထီၣ်လိၣ်ထီၣ်တဖၣ်န့ၣ်​ သ့ဝဲလီၤ. နကမၤဒ်န့ၣ်အဂီၢ် နကဘၣ်အိၣ်ဒီး တၢ်ဆီၣ်လီၤသး လီၤဆီဒၣ်တၢ် ဖဲပှၤတဂၤမၤကမၣ်ဘၣ်​ တၢ်အခါန့ၣ်လီၤ.

၁၃. နီၢ်ဃးနၤထံၣ်ဘၣ်ဒီး တၢ်ကီတၢ်ခဲဒ်လဲၣ်​ ဒီးအမၤဝဲဒ်လဲၣ်.

^၁၃ ဆိကမိၣ်ကွၢ် နီၢ်ဃးနၤအဂ့ၢ်တက့ၢ်. အဝဲဖျီအသးဒီး စီၤအ့လကါနၤ လၢအမ့ၢ်ဝဲပှၤလ့ၤဝံဖိအဒူၣ်​ ဒီးအဝဲအဲၣ်နီၢ်ဃးနၤဒိၣ်မးလီၤ. ဘၣ်ဆၣ်​ စီၤအ့လကါနၤ အမါအိၣ်ဒံးဝဲတဂၤ လၢအမံၤမ့ၢ် နီၢ်ပနံးနၤလီၤ. စီၤအ့လကါနၤအဲၣ်နီၢ်ဃးနၤ ဒိၣ်န့ၢ်ဒံးနီၢ်ပနံးနၤလီၤ. ဘၣ်ဆၣ်​ “နီၢ်ပနံးနၤအိၣ်ဒီးအဖိတဖၣ်လီၤ. မ့မ့ၢ်နီၢ်ဃးနၤအဖိတအိၣ်ဘၣ်.” ခီဖျိလၢတၢ်ဂ့ၢ်အံၤအဃိ နီၢ်ပနံးနၤ “မၤဆါအသးနးနးကလဲာ်” လီၤ. နီၢ်ဃးနၤမၤဆၢက့ၤဝဲဒ်လဲၣ်. နီၢ်ဃးနၤသးဘၣ်ဒိဒိၣ်မး တုၤဒၣ်လဲာ်အ “တအီၣ်ဘၣ်တၢ်ဘၣ်.” (၁ ၡမူၤအ့လး ၁:၂, ၆, ၇) ဘၣ်ဆၣ်​ လံာ်စီဆှံတပာ်ဖျါထီၣ်ဝဲလၢ နီၢ်ဃးနၤ မၤကၣ်က့ၤ နီၢ်ပနံးနၤလၢကျဲတဘိဘိဘၣ်. လၢတၢ်န့ၣ်အလီၢ် နီၢ်ဃးနၤတဲဘၣ်​ အတၢ်တူၢ်ဘၣ်တဖၣ်လၢ ယဟိဝၤယွၤအိၣ်ဒီး အနာ်ဝဲလၢ ယဟိဝၤယွၤ ကမၤဘၣ်ဂီၢ်ထီၣ်က့ၤ အတၢ်အိၣ်သးတဖၣ်လီၤ. မ့ၢ်နီၢ်ပနံးနၤ အတၢ်ပာ်သူၣ်ပာ်သးလၢ နီၢ်ဃးနၤအဖီခိၣ်​ ဆီတလဲဧါ. လံာ်စီဆှံတပာ်ဖျါထီၣ်ဝဲဘၣ်. ဘၣ်ဆၣ်​ ပသ့ၣ်ညါဘၣ်လၢ နီၢ်ဃးနၤအသးမုာ်ထီၣ်က့ၤ “ဒီးအမဲာ်တအုၣ်သပှီၤလၢၤဘၣ်လီၤ.”—၁ ၡမူၤအ့လး ၁:၁၀, ၁၈.

၁၄. ပမၤလိန့ၢ်တၢ်လၢ နီၢ်ဃးနၤ အအိၣ်သ့ဒ်လဲၣ်.

^၁၄ ပမၤလိန့ၢ်တၢ်လၢ နီၢ်ဃးနၤအအိၣ်ဒ်လဲၣ်. ပှၤတဂၤဂၤမ့ၢ်ဂုာ်ကျဲးစၢး ပြၢလိာ်အသးဒီးနၤန့ၣ်​ သ့ၣ်နီၣ်ထီၣ်လၢ နမ့ၢ်ပှၤလၢ ကဘၣ်မၤဘၣ်ဂီၢ်က့ၤ တၢ်သဘံၣ်သဘုၣ်လီၤ. ပတဟ့ၣ်အခွဲးလၢ ပှၤဂၤကမၤတံာ်တာ်ပှၤဘၣ်. လၢနကမၤဆၢတၢ်အၢလၢ တၢ်အၢအဂီၢ် ဂုာ်ကျဲးစၢး မၤဃူမၤဖိးနသးဒီးပှၤဂၤတက့ၢ်. (ရိမ့ၤ ၁၂:၁၇-၂၁) အဝဲသ့ၣ်မ့ၢ်တဆီတလဲအသးဘၣ်​ ဒၣ်လဲာ် နဆဲးပာ်နသးမုာ်မုာ်ဒီး သးခုသ့ဝဲလီၤ.

၁၅. စီၤအပီးလိၤဒီးစီၤပီလူးန့ၣ်​ လီၤဂာ်လိာ်အသးဒ်လဲၣ်.

^၁၅ ပကကွၢ်သကိး ပမၤလိန့ၢ်တၢ်လၢ စီၤအပီးလိၤ ဒီးတၢ်မၢဖိပီလူး အအိၣ်သ့ဒ်လဲၣ်. အဝဲသ့ၣ်သ့ၣ်ညါနၢ်ပၢၢ် လံာ်စီဆှံဂ့ၤဂ့ၤလီၤ. ပှၤသ့ၣ်ညါစီၤအပီးလိၤဒီးစီၤပီလူးအါမး ဒီးအဝဲသ့ၣ်မ့ၢ်ပှၤသိၣ်လိတၢ်ဖိ လၢအဖၠဲးလီၤ. အဝဲသ့ၣ်မၤစၢၤဘၣ်​ ပှၤအါဒံအါဂၤလၢ ကကဲထီၣ်​ ခရံာ်အပျဲၢ်အဘီၣ်လီၤ. ဘၣ်ဆၣ်​ အဝဲသ့ၣ်တသူၣ်က့ၣ်သးကါ လိာ်အသးဘၣ်.

၁၆. စီၤအပီးလိၤန့ၣ်​ မ့ၢ်ပှၤဒ်လဲၣ်တဂၤလဲၣ်.

^၁၆ စီၤအပီးလိၤ “အိၣ်ဖျဲၣ်ထီၣ်ဖဲ ဝ့ၢ်အလ့းစၣ်ဒြူး” လီၤ. ဒီးတၢ်လီၢ်အံၤ အမံၤဟူသၣ်ဖျါလၢ တၢ်ကူၣ်ဘၣ်ကူၣ်သ့တကပၤလီၤ. စီၤအပီးလိၤ “အဝဲမ့ၢ် ပှၤလၢအကလုၢ်သ့ ဒီးနၢၤဝဲ တၢ်ကွဲးအသးတဖၣ်လီၤ.” (မၤတၢ် ၁၈:၂၄) ဖဲစီၤအပီးလိၤအိၣ်လၢ ဝ့ၢ်ကရံၣ်သူးအပူၤအခါ တၢ်အိၣ်ဖှိၣ်ဖိတနီၤ ဘၣ်သူၣ်ဘၣ်သးအီၤအါန့ၢ်ဒံး စီၤပီလူးလီၤ. (၁ ကရံၣ်သူး ၁:၁၂, ၁၃) မ့ၢ်စီၤအပီးလိၤဒုးအိၣ်ထီၣ်​ တၢ်လီၤမုၢ်လီၤဖးဧါ. ဒီးပတထံၣ်လၢ စီၤအပီးလိၤ အတၢ်ပာ်သူၣ်ပာ်သး အိၣ်ဒ်န့ၣ်ဘၣ်. ဖဲစီၤအပီးလိၤတအိၣ်လၢ ကရံၣ်သူးအပူၤလၢၤဘၣ်အခါ စီၤပီလူးဟ့ၣ်ဂံၢ်ဟ့ၣ်ဘါအီၤလၢ ကဟဲက့ၤကဒါက့ၤဖဲန့ၣ်လီၤ. (၁ ကရံၣ်သူး ၁၆:၁၂) စီၤပီလူးမ့ၢ်ဒုးအိၣ်ထီၣ်​ တၢ်လီၤမုၢ်လီၤဖးလၢ တၢ်အိၣ်ဖှိၣ်အပူၤန့ၣ်​ တမ့ၢ်လၢအဝဲ ကဟ့ၣ်ဂံၢ်ဟ့ၣ်ဘါ စီၤအပီးလိၤဒ်န့ၣ်ဘၣ်. စီၤအပီးလိၤသူ အတၢ်သ့တၢ်ဘၣ်လၢ ကစံၣ်တဲၤတဲလီၤတၢ်သးခုကစီၣ်​ ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်အဂီၢ်လီၤ. ပသ့ၣ်ညါစ့ၢ်ကီးလၢ စီၤအပီးလိၤန့ၣ်​ မ့ၢ်ပှၤလၢအဆီၣ်လီၤသးလီၤ. အဒိ, စီၤအပီးလိၤန့ၣ်​ ဖဲနီၢ်ပြံစကံးလၤဒီးစီၤအကူလၤ “တဲနၢ်ပၢၢ်အါထီၣ်အီၤ ကစၢ်ယွၤအကျဲ လီၤတံၢ်လီၤဆဲး” အခါ လံာ်စီဆှံတပာ်ဖျါထီၣ်ဝဲလၢ အသးထီၣ်တၢ်ဘၣ်.—မၤတၢ် ၁၈:၂၄-၂၈.

၁၇. ဒ်သိးတၢ်ဃူတၢ်ဖိး ကအိၣ်အဂီၢ် စီၤပီလူးမၤဝဲဒ်လဲၣ်.

^၁၇ စီၤပီလူးပာ်လုၢ်ပာ်ပှ့ၤဝဲ စီၤအပီးလိၤ အတၢ်ဖံးတၢ်မၤလၢ အကဲထီၣ်လိၣ်ထီၣ်တဖၣ်လီၤ. ဘၣ်ဆၣ်​ စီၤပီလူးတဘၣ်ယိၣ်ဝဲလၢ ပှၤကထံၣ်လၢ စီၤအပီးလိၤဂ့ၤဒိၣ်န့ၢ်ဒံးအီၤဘၣ်. ဖဲပဖးလံာ်ကရံၣ်သူးလၢ စီၤပီလူးကွဲးဝဲန့ၣ်​ ပထံၣ်ဘၣ်လၢ စီၤပီလူးအိၣ်ဒီးတၢ်ဆီၣ်လီၤသး ဒီးမ့ၢ်ပှၤလၢ အကွၢ်န့ၢ်တၢ်လၢ ပှၤဂၤအဂီၢ်လီၤ. လၢအကသးထီၣ်ပှၤလၢ အတဲဝဲလၢ “ယမ့ၢ် စီၤပီလူးအပျဲၢ်” အလီၢ်န့ၣ်​ အဝဲဟ့ၣ်ဂံၢ်ဟ့ၣ်ဘါ ပှၤဂၤလၢကသးစၢၢ်ဆၢလၢ ယဟိဝၤယွၤဒီး ယ့ၣ်ၡူးခရံာ်အဂ့ၢ်န့ၣ်လီၤ.—၁ ကရံၣ်သူး ၃:၃-၆

၁၈. ဒ် ၁ ကရံၣ်သူး ၄:၆, ၇ ပာ်ဖျါထီၣ်ဝဲအသိး ပမၤလိန့ၢ်တၢ်လၢ စီၤအပီးလိၤဒီး စီၤပီလူးအဒိအတဲာ်ဒ်လဲၣ်.

^၁၈ စီၤအပီးလိၤဒီး စီၤပီလူးအဒိအတဲာ်န့ၣ်​ ပမၤလိန့ၢ်ဘၣ်တၢ်မနုၤလဲၣ်. ပမၤယဟိဝၤယွၤအတၢ်မၤဆူၣ်ဆူၣ်​ ဒီးမၤစၢၤဘၣ်ပှၤအါဂၤလၢ ကဒိးဘျၢဘၣ်ထံအဂီၢ်လီၤ. ဘၣ်ဆၣ်​ ပသ့ၣ်ညါလၢ ပမၤတၢ်ကဲထီၣ်လိၣ်ထီၣ်တဖၣ်န့ၣ်​ ခီဖျိလၢ ယဟိဝၤယွၤအတၢ်မၤစၢၤအဃိလီၤ. စီၤအပီးလိၤဒီးစီၤပီလူး အဒိအတဲာ်န့ၣ်​ ပမၤလိန့ၢ်ဘၣ်လၢ ပမ့မ့ၢ်ပှၤလၢ အမူဒါအိၣ်အါလၢ တၢ်အိၣ်ဖှိၣ်အပူၤန့ၣ်​ ပကဘၣ်ဒုးအိၣ်ထီၣ်​ တၢ်ဃူတၢ်ဖိးအါန့ၢ်ဒံးပှၤဂၤလီၤ. ပသးခုဒိၣ်မးလၢ တၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ်အပှၤမၤစၢၤတၢ်တဖၣ်​ မၤစၢၤပှၤဒ်သိး ပကအိၣ်ဃူအိၣ်ဖိးလိာ်သး တဂၤဒီးတဂၤအဂီၢ်လီၤ. အဝဲသ့ၣ်မၤဝဲဒ်အံၤ ခီဖျိအဟ့ၣ်ကူၣ်ဟ့ၣ်ဖးပှၤလၢ လံာ်စီဆှံအပူၤလီၤ. အဝဲသ့ၣ်တဆိကမိၣ်​ ဒိၣ်လီၤအသးဘၣ်. ဒီးအဝဲသ့ၣ်မၤစၢၤတၢ်အိၣ်ဖှိၣ်ဖိလၢ ကဒိကနၣ်ယ့ၣ်ၡူးအကလုၢ် ဒီးမၤထွဲအဒိအတဲာ်လီၤ.—ဖး ၁ ကရံၣ်သူး ၄:၆, ၇ တက့ၢ်.

၁၉. ပဝဲတဂၤစုာ်စုာ် ပမၤတၢ်မနုၤသ့လဲၣ်. (ကွၢ်တၢ်လွံၢ်နၢၣ်လၢမ့ၢ် “ဟးဆှဲးတၢ်ပာ်သူၣ်ပာ်သးလၢအမ့ၢ် တၢ်ပြၢလိာ်သး” တက့ၢ်.)

^၁၉ ပဝဲတဂၤစုာ်စုာ်န့ၣ်​ ပအိၣ်ဒီးတၢ်သ့တၢ်ဘၣ်​ တဂၤတမံၤလီၤ. ပသူတၢ်ဟ့ၣ်အံၤလၢ “ကမၤစၢၤလိာ်သး တဂၤဒီးတဂၤအဂီၢ်” လီၤ. (၁ ပ့းတရူး ၄:၁၀) ပကဆိကမိၣ်ဘၣ်လၢ တၢ်လၢပမၤအီၤန့ၣ်​ တမ့ၢ်တၢ်လၢအရ့ဒိၣ်ဘၣ်. သ့ၣ်နီၣ်ထီၣ်က့ၤလၢပှၤဆး ဆ့ကၤအတိၤဖိတဖၣ်န့ၣ်​ မၤကျၢၤထီၣ်ဝဲဆ့ကၤဒီတဘ့ၣ်လီၤ. အဃိ ကယဲၢ်တၢ်လၢ နမၤအီၤသ့ၣ်တဖၣ်န့ၣ်​ မၤစၢၤဝဲတၢ်အိၣ်ဖှိၣ်​ ဒီတဖျၢၣ်လၢ ကအိၣ်ဃူအိၣ်ဖိးအဂီၢ်လီၤ. မ်ပဝဲခဲလၢာ်မၤတၢ်ဆူၣ်ဆူၣ်​ ဒ်သိးပတဂုာ်ကျဲးစၢးလၢ ပဂ့ၤဒိၣ်န့ၢ်ဒံးပှၤဂၤဘၣ်. မ်ပပာ်လီၤပသးလၢ ပကဂုာ်ကျဲးစၢးဒုးအိၣ်ထီၣ်​ တၢ်ဃူတၢ်ဖိးဒီး အိၣ်ဃူအိၣ်ဖိးဒီးပှၤဂၤလၢ တၢ်အိၣ်ဖှိၣ်အပူၤတက့ၢ်.—အ့းဖ့းစူး ၄:၃.