ဒ်သိး နတၢ်နာ်ကဂၢၢ်ကျၢၤအဂီၢ် နကဘၣ်မၤဒ်လဲၣ်

၁. ဘၣ်သ့ၣ်သ့ၣ်​ ပကသံကွၢ်လီၤဘၣ်ပသး ဒ်လဲၣ်.

ဖဲနဆိကမိၣ်ထံ ဘၣ်ဃးဒီး တၢ်ကကဲထီၣ်အသး ခါဆူညါ ဒ်သိးဒီး တၢ်ဘူၣ်တၢ်ဘါကမၣ်​ ကဘၣ်တၢ်မၤဟးဂီၤကွံာ်အီၤ, စီၤကိးလၢကီၢ်မါကူး ကဟဲဒုးတၢ် ဒီးအၢ်မက့းဒိၣ်​ တၢ်ဒုးကဟဲကဲထီၣ်အခါ မ့ၢ်နသူၣ်ကိၢ်သးဂီၤတၢ်ဧါ. ဘၣ်သ့ၣ်သ့ၣ်​ နကသံကွၢ်လီၤဘၣ်နသးလၢ ‘ဖဲတၢ်လၢအလီၤပျံၤလီၤဖုးတဖၣ်​ ဟဲကဲထီၣ်အခါ မ့ၢ်ယတၢ်နာ် ကအိၣ်ဂၢၢ်ကျၢၤတုၤလၢ အကတၢၢ်ဧါ.’ နမ့ၢ်ဆိကမိၣ်ဘၣ်​ ဒ်န့ၣ်န့ၣ်​ ယ့ၣ်ၡူးအတၢ်ကတိၤလၢ အအိၣ်လၢ လံာ်စီဆှံအဆၢလၢ တၢ်မၤလိအခီၣ်ထံးန့ၣ်​ ကကဲထီၣ်တၢ်မၤစၢၤလၢနဂီၢ်လီၤ. ဖဲန့ၣ်ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “တဘၣ်သူၣ်ကိၢ်သးဂီၤတၢ်တဂ့ၤ. စူၢ်က့ၤနာ်က့ၤ” တၢ်တက့ၢ်. (ယိၤဟၣ်​ ၁၄:၁) ပတၢ်နာ်မ့ၢ်ဂၢၢ်ကျၢၤန့ၣ်​ ခါဆူညါ တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ ပလဲၤခီဖျိအီၤလၢ တၢ်သူၣ်ဒူသးဒူအပူၤကန့ၢ်လီၤ.

၂. ပမၤဂၢၢ်ကျၢၤထီၣ်​ ပတၢ်နာ် ကသ့ဒ်လဲၣ်​ ဒီးလၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.

^၂ ဆၢကတီၢ်ခဲအံၤ ဖဲပထံၣ်ဘၣ်​ တၢ်မၤကွၢ်အခါ ပမၤအီၤဒ်လဲၣ်န့ၣ်​ ပကဘၣ်ဆိကမိၣ်ထံက့ၤအီၤ. ပမ့ၢ်မၤဒ်န့ၣ်န့ၣ်​ ကမၤစၢၤပှၤဒ်သိး ခါဆူညါ ဖဲပထံၣ်ဘၣ်တၢ်မၤကွၢ်အခါ ပတၢ်နာ် ကဂၢၢ်ကျၢၤအဂီၢ်. တကးဒံးဘၣ်​ ကမၤစၢၤပှၤဒ်သိး ပကသ့ၣ်ညါလၢ ပကဘၣ်မၤဂၢၢ်ကျၢၤထီၣ်​ ပတၢ်နာ် ဖဲလဲၣ်တကပၤလဲၣ်လီၤ. ဖဲပလဲၤခီဖျိဝဲ တၢ်မၤကွၢ်န့ၢ် တဘျီလၢ်လၢ်အခါ ပတၢ်နာ် ကဟဲဂၢၢ်ကျၢၤဒိၣ်ထီၣ်ဝဲ. တကးဒံးဘၣ်​ ကမၤစၢၤပှၤဒ်သိး ပကအိၣ်ဒီး တၢ်တူၢ်န့ၢ်ခီၣ်ကဲလၢ ခါဆူညါ ဖဲပထံၣ်ဘၣ်​ တၢ်မၤကွၢ်အခါစ့ၢ်ကီးလီၤ. လၢတၢ်မၤလိအံၤအပူၤ ပကတဲသကိး တၢ်အိၣ်သးလွံၢ်ခါလၢ အပာ်ဖျါထီၣ်ဝဲလၢ ယ့ၣ်ၡူးအပျဲၢ်အဘီၣ်တဖၣ်​ လိၣ်ဘၣ်အါထီၣ်တၢ်နာ်လီၤ. ဒီးပကတဲသကိး မုၢ်မဆါတနံၤအံၤ ပထံၣ်ဘၣ်တၢ်မၤကွၢ် ဒ်သိးအဝဲသ့ၣ်​ သ့ဒ်လဲၣ်. ဒီးတၢ်မၤကွၢ်တဖၣ်အံၤ မၤစၢၤပှၤဒ်သိး ပကအိၣ်​ ကတဲာ်ကတီၤပသးလၢ ခါဆူညါ အဂီၢ်ဒ်လဲၣ်.

နာ်လၢ ကစၢ်ယွၤ ကမၤလၢပှဲၤ တၢ်လိၣ်ဘၣ်လၢနီၢ်ခိတခီ

၃. ဖဲ မးသဲ ၆:၃၀, ၃၃ န့ၣ်​ ယ့ၣ်ၡူးဟ့ၣ်ဂံၢ်ဟ့ၣ်ဘါပှၤ ဒ်လဲၣ်.

^၃ နမ့မ့ၢ် ဟံၣ်ခိၣ်န့ၣ်​ နကအဲၣ်ဒိးလၢ နဖိနမါ အီၣ်ဘၣ်အီဘၣ်, ကူဘၣ်သိးဘၣ်ဂ့ၤဂ့ၤဘၣ်ဘၣ်​ ဒီးအိၣ်ဘၣ်​ ဘံၣ်ဘံၣ်ဘၢဘၢလီၤ. ဘၣ်ဆၣ်​ ပအိၣ်မူဘၣ်လၢ ဆၢကတီၢ်အကီအခဲအဃိ ပကမၤဒ်အံၤအဂီၢ် တညီဝဲထီဘိဘၣ်. ပဒီပုၢ်ဝဲၢ်မုၣ်ခွါတနီၤန့ၣ်​ မၤတၢ်ဆူၣ်ဆူၣ်သနာ်က့ အဝဲသ့ၣ်​ အတၢ်မၤတအိၣ်လၢၤဘၣ်​ ဒီးကဃုတၢ်မၤလၢ အသီစ့ၢ်ကီး တညီဝဲဘၣ်. အဂၤတနီၤန့ၣ်​ ဘၣ်ဟးဆှဲးဝဲ တၢ်မၤလၢအတကြၢးတဘၣ်လၢ ခရံာ်ဖိတဖၣ်အဂီၢ်လီၤ. ဖဲပထံၣ်ဘၣ်​ တၢ်အိၣ်သးဒ်အံၤအခါ ဒ်သိးပကနာ်လၢ ယဟိဝၤယွၤ ကမၤလၢပှဲၤ ပဟံၣ်ဖိဃီဖိ အတၢ်လိၣ်ဘၣ်အဂီၢ် ပလိၣ်ဘၣ်တၢ်နာ်လၢ အဂၢၢ်ကျၢၤလီၤ. ဖဲယ့ၣ်ၡူးစံၣ်တဲၤတဲလီၤတၢ်လၢ တၢ်လူၢ်ခိၣ်အခါ အတဲဘၣ်အပျဲၢ်အဘီၣ်လၢ တၢ်ဂ့ၢ်အံၤ ၡဲၡဲဖိလီၤ. (ဖး မးသဲ ၆:၃၀, ၃၃.) ဖဲပနာ်လၢ ယဟိဝၤယွၤ တပာ်တ့ၢ်ပှၤဘၣ်အခါ မၤစၢၤပှၤလၢ ပဆဲးသးစၢၢ်ဆၢ ဘီမုၢ်အတၢ်မၤ ကန့ၢ်အဂီၢ်လီၤ. ဖဲပထံၣ်ဘၣ်လၢ ယဟိဝၤယွၤ မၤစၢၤပှၤလၢ နီၢ်ခိတၢ်လိၣ်ဘၣ်တဖၣ်အခါ ပကဘူးဒိၣ်ထီၣ်ဒီးအီၤ ဒီးပတၢ်နာ် ကဟဲဂၢၢ်ကျၢၤဒိၣ်ထီၣ်လီၤ.

၄-၅. ဖဲဟံၣ်ဖိဃီဖိတဒူၣ်​ ထံၣ်ဘၣ်ဒီး တၢ်ကီတၢ်ခဲအခါ အဝဲသ့ၣ်ဒိးန့ၢ်ဘၣ်​ တၢ်မၤစၢၤဒ်လဲၣ်.

^၄ ဆိကမိၣ်ကွၢ် ဘၣ်ဃးဒီး ဟံၣ်ဖိဃီဖိတဒူၣ်လၢ ဘဲနဲၣ်စွ့လၣ်န့ၣ်​ ဖဲအဝဲသ့ၣ်​ ထံၣ်ဘၣ်ကျိၣ်စ့ တၢ်ကီတၢ်ခဲအခါ ယဟိဝၤယွၤ မၤစၢၤအဝဲသ့ၣ်ဒ်လဲၣ်. လၢညါန့ၣ်​ ဒီပုၢ်ဝဲၢ်ခွါ မံၤက့(လ်) ကးစတြိၤ အိၣ်ဒီးအစံာ်လီၢ်စံာ်ကျဲ လၢကဖံးအီၣ်မၤအီၣ်အဂီၢ် ဒီးအအိၣ်ဒီး ကျိၣ်စ့လၢလၢလီၢ်လီၢ်လၢ အဟံၣ်ဖိဃီဖိအဂီၢ်လီၤ. ဘၣ်တဘျီ ပှၤတဒူၣ်လၢ အအိၣ်ဒီးကျိန့ၣ်​ ဟဲဂုာ်န့ၢ်အဝဲသ့ၣ်​ အတၢ်လီၢ် ဒီးနီဟးထီၣ်ကွံာ်အဝဲသ့ၣ်လၢ တၢ်လီၢ်ဖဲန့ၣ်လီၤ. ဒီပုၢ်ဝဲၢ်ခွါ မံၤက့(လ်) တဲဝဲလၢ “ခဲအံၤန့ၣ်​ ပဘၣ်ငါစံာ်လီၢ် ဆံးဆံးဖိတတီၤ ဒီးဖံးအီၣ်မၤအီၣ်တၢ်လီၤ. တနံၤဘၣ်တနံၤန့ၣ်​ ယဃ့ထုကဖၣ်လၢ ယဟိဝၤယွၤ ကဟ့ၣ်ပှၤတၢ်လိၣ်ဘၣ်လၢ တနံၤအဂီၢ်.” ဒီပုၢ်ဝဲၢ်ခွါ မံၤက့(လ်) အဟံၣ်ဖိဃီဖိ အတၢ်အိၣ်မူန့ၣ်​ ကီဒိၣ်မး ဘၣ်ဆၣ်​ အဝဲသ့ၣ်နာ်ဝဲလၢ ကစၢ်ယွၤလၢ အပှဲၤဒီးတၢ်အဲၣ်တၢ်ကွံတဂၤ ကဟ့ၣ်အဝဲသ့ၣ်​ တၢ်လိၣ်ဘၣ်လၢ တနံၤဂီၢ်တနံၤဂီၢ်အဃိ အဝဲသ့ၣ်​ ထီၣ်တၢ်အိၣ်ဖှိၣ်ထီဘိ ဒီးဟးစံၣ်တဲၤတဲလီၤတၢ် ထီဘိလီၤ. အဝဲသ့ၣ်​ ပာ်ဆိယွၤအဘီအမုၢ်အတၢ်မၤလၢညါ အဃိ ယဟိဝၤယွၤ ဟ့ၣ်တၢ်လၢအဝဲသ့ၣ်​ လိၣ်ဘၣ်ဝဲတဖၣ်လီၤ.

^၅ ဖဲဒီပုၢ်ဝဲၢ်ခွါ မံၤက့(လ်) ဒီးအမါယူရဲၤ ထံၣ်ဘၣ်ဒီး တၢ်ကီတၢ်ခဲ ဒီတကတီၢ်န့ၣ်​ အဝဲသ့ၣ်သးစၢၢ်ဆၢဝဲလၢ ယဟိဝၤယွၤ ကွၢ်ထွဲအဝဲသ့ၣ်​ ဒ်လဲၣ်န့ၣ်လီၤ. တဘျီတခီၣ်​ ယဟိဝၤယွၤ သူဝဲဒီပုၢ်ဝဲၢ်မုၣ်ခွါတဖၣ်​ လၢကဟ့ၣ်လီၤအဝဲသ့ၣ်​ နီၢ်ခိတၢ်လိၣ်ဘၣ်တဖၣ်​ ဒီးမၤစၢၤ ဒီပုၢ်ဝဲၢ်ခွါ မံၤက့(လ်) လၢကဃုတၢ်မၤအဂီၢ်လီၤ. ယဟိဝၤယွၤ မၤစၢၤအဝဲသ့ၣ်​ ခီဖျိ ဝဲၤတြၢ်ဟ့ၣ်လီၤအဝဲသ့ၣ်​ တၢ်လၢအလိၣ်ဘၣ်ဝဲတဖၣ်လီၤ. ယဟိဝၤယွၤ တပာ်တ့ၢ်အဝဲသ့ၣ်​ နီတဘျီဘၣ်. လၢတၢ်န့ၣ်အဃိ အဝဲသ့ၣ်​ အဟံၣ်ဖိဃီဖိ အတၢ်နာ်ဟဲဆူၣ်ထီၣ်ဝဲ. ဖဲဒီပုၢ်ဝဲၢ်ခွါ မံၤက့(လ်) အဖိမုၣ်ဒိၣ်ကတၢၢ် ယိစလံၤ တဲဖျါထီၣ်ဝဲ တၢ်ကီတၢ်ခဲလီၤလီၤဆီဆီလၢ အဝဲသ့ၣ်ထံၣ်ဘၣ်ဝဲ ဒီးယဟိဝၤယွၤ မၤစၢၤအဝဲသ့ၣ်ဒ်လဲၣ်​ ဝံၤအခါ အတဲဝဲလၢ “ယထံၣ်ဘၣ်​ ယဟိဝၤယွၤ အစုတၢ်မၤစၢၤ လၢယမဲာ်အဃိ ယဂံၢ်ယဘါဟဲဆူၣ်ထီၣ်ဒိၣ်မး. ဒီးယထံၣ်အီၤဒ် ယသကိးတဂၤလၢ အကမၤစၢၤယၤထီဘိ. တၢ်ကီတၢ်ခဲလၢ ပဟံၣ်ဖိဃီဖိ လဲၤခီဖျိဘၣ်ဝဲတဖၣ်န့ၣ်​ မၤစၢၤပှၤဒ်သိး ပကအိၣ်ကတဲာ်ကတီၤသးလၢ တၢ်မၤကွၢ်ဖးဒိၣ်​ လၢခါဆူညါတဖၣ်အဂီၢ်.”

၆. ဖဲနထံၣ်ဘၣ်ဒီး ကျိၣ်စ့တၢ်ကီတၢ်ခဲအခါ နမၤဂၢၢ်ကျၢၤထီၣ်​ နတၢ်နာ်ကသ့ဒ်လဲၣ်.

^၆ မ့ၢ်နထံၣ်ဘၣ်ဒီး ကျိၣ်စ့အတၢ်ကီတၢ်ခဲဧါ. နမ့ၢ်ထံၣ်ဘၣ်န့ၣ်​ ကကီလၢနဂီၢ်လီၤ. နမ့ၢ်ထံၣ်ဘၣ်ဒီး တၢ်အိၣ်သးလၢ အကီအခဲဒ်လဲၣ်ဂ့ၤဒ်လဲၣ်ဂ့ၤ ထံၣ်အီၤဒ် တၢ်ခွဲးတၢ်ယာ်လၢ နကမၤဂၢၢ်ကျၢၤထီၣ်​ နတၢ်နာ်အဂီၢ်. ဃ့ဘါထုကဖၣ်​ လၢယဟိဝၤယွၤအအိၣ်​ ဒီးဖးယ့ၣ်ၡူး အတၢ်ကတိၤလၢအအိၣ်လၢ မးသဲ ၆:၂၅-၃၄ အပူၤ ဒီးဆိကမိၣ်ထံအီၤတက့ၢ်. ဆိကမိၣ်ထံ ဘၣ်ဃးဒီး ပှၤလၢအမၤကစၢ်ယွၤ အတၢ်မၤဆူၣ်ဆူၣ်​ ဒီးကစၢ်ယွၤ ကွၢ်ထွဲအဝဲသ့ၣ်​ ဒ်လဲၣ်အဂ့ၢ်န့ၣ်တက့ၢ်. (၁ ကရံၣ်သူး ၁၅:၅၈) နမ့ၢ်မၤဒ်န့ၣ်န့ၣ်​ နကနာ်အါထီၣ်လၢ ယဟိဝၤယွၤ ကမၤစၢၤနၤ ဒ်ယဟိဝၤယွၤ မၤစၢၤအဝဲသ့ၣ်အသိးလီၤ. နလိၣ်ဘၣ်တၢ်မနုၤလဲၣ်​ ဒီးအကဘၣ်ဟ့ၣ်လီၤနၤ တၢ်မနုၤလဲၣ်န့ၣ်​ ကစၢ်ယွၤသ့ၣ်ညါဝဲလီၤ. နမ့ၢ်ထံၣ်ဘၣ်​ ယဟိဝၤယွၤ အတၢ်မၤစၢၤလၢ နတၢ်အိၣ်မူပူၤန့ၣ်​ နတၢ်နာ်ကဟဲဒိၣ်ထီၣ်လၢ အဝဲကမၤစၢၤနၤ ဖဲခါဆူညါ နထံၣ်ဘၣ်တၢ်မၤကွၢ်လၢ အဒိၣ်န့ၢ်အလီၢ်အခါလီၤ.—ဃဘးကူာ် ၃:၁၇, ၁၈.

ပလဲၤခီဖျိ “ကလံၤမုၢ်ဖးဒိၣ်” ကန့ၢ်အဂီၢ် ပကဘၣ်အိၣ်ဒီးတၢ်နာ်

၇. ဒ် မးသဲ ၈:၂၃-၂၆ ပာ်ဖျါထီၣ်ဝဲအသိး ဖဲယ့ၣ်ၡူး အပျဲၢ်အဘီၣ်တဖၣ်​ ထံၣ်ဘၣ်​ “ကလံၤမုၢ်ဖးဒိၣ်” အခါ အဝဲသ့ၣ်​ အတၢ်နာ်အိၣ်ဒ်လဲၣ်.

^၇ ဖဲကလံၤမုၢ်လီၤဘၣ်​ ယ့ၣ်ၡူးဒီးအပျဲၢ်အဘီၣ်​ လၢပီၣ်လဲၣ်ပူၤအခါ ယ့ၣ်ၡူးမၤစၢၤ အပျဲၢ်အဘီၣ်တဖၣ်ဒ်သိး အဝဲသ့ၣ်ကသ့ၣ်ညါလီၤအသးလၢ အလိၣ်ဘၣ်အါထီၣ်​ တၢ်နာ်လီၤ. (ဖး မးသဲ ၈:၂၃-၂၆.) ဖဲကလံၤမုၢ်လီၤ ဒီးထံနုာ်လီၤလၢ ကဘီပူၤအခါန့ၣ်​ ယ့ၣ်ၡူးမံကမၣ်ဘၣ်အသးလီၤ. ဒီးအပျဲၢ်အဘီၣ်တဖၣ်​ ပျံၤတၢ်ဒိၣ်မး ဒီးလဲၤဃ့အီၤတၢ်မၤစၢၤလီၤ. ဖဲန့ၣ်​ ယ့ၣ်ၡူးတဲဘၣ်​ အဝဲသ့ၣ်လၢ “ပှၤလၢ အတၢ်နာ်စှၤသ့ၣ်ဧၢ, ဘၣ်မနုၤအဃိ သုပျံၤတၢ် ထဲအံၤညါလဲၣ်.” နီၢ်ကီၢ်န့ၣ်​ ယ့ၣ်ၡူးအပျဲၢ်အဘီၣ်သ့ၣ်တဖၣ်အံၤ ကြၢးသ့ၣ်ညါဝဲလၢ ယဟိဝၤယွၤ ဒီသဒၢယ့ၣ်ၡူး ဒီးအဝဲသ့ၣ်သ့လီၤ. ပန့ၢ်ဘၣ်​ တၢ်မၤလိမနုၤလဲၣ်. ပမ့ၢ်ထံၣ်ဘၣ်​ “ကလံၤမုၢ်ဖးဒိၣ်” အနီၢ်ကီၢ်မ့ၢ်ဂ့ၤ, တၢ်ကီတၢ်ခဲလၢ အလီၤဂာ်ဒ် ကလံၤမုၢ်ဖးဒိၣ်အသိးမ့ၢ်ဂ့ၤ တၢ်နာ်လၢအဂၢၢ်ကျၢၤန့ၣ်​ ကမၤစၢၤပှၤလီၤ.

၈-၉. ဒီပုၢ်ဝဲၢ်မုၣ်အဲၤနဲ ထံၣ်ဘၣ်​ တၢ်မၤကွၢ်ဒ်လဲၣ်​ ဒီးတၢ်မနုၤမၤစၢၤအီၤလဲၣ်.

^၈ ပကဆိကမိၣ်ကွၢ် ဒီပုၢ်ဝဲၢ်မုၣ်အဲၤနဲ လၢအမ့ၢ်ပှၤသဘျ့ လၢအအိၣ်လၢ ကီၢ်ဖၢၣ်ထိၣ်ရံၣ်ကိၣ်န့ၣ်​ ဖဲအတၢ်နာ် ဘၣ်တၢ်မၤကွၢ်အီၤအခါ အလဲၤခီဖျိဝဲန့ၢ်ဒ်လဲၣ်. အဝဲထံၣ်ဘၣ်ဒီး “ကလံၤမုၢ်ဖးဒိၣ်” နီၢ်ကီၢ်လီၤ. ဖဲ ၂၀၁၇ န့ၣ်ကလံၤမုၢ်ဖးဒိၣ်​ မရံယၤ လီၤဝဲအဃိ အဟံၣ်ဟးဂီၤကွံာ်ဝဲ. ဒီးတၢ်ကဲထီၣ်အသး ဒ်အံၤအဃိ အတၢ်မၤစ့ၢ်ကီး တအိၣ်လၢၤဘၣ်. ဒီပုၢ်ဝဲၢ်မုၣ်အဲၤနဲ တဲဝဲလၢ “ဖဲတၢ်ကီတၢ်ခဲ ဘၣ်ယၤအဆၢကတီၢ်န့ၣ်​ ယသူၣ်ကိၢ်သးဂီၤတၢ်ဒိၣ်မး. ဘၣ်ဆၣ်​ ယသန့ၤသးလၢ ယဟိဝၤယွၤအအိၣ်​ ခီဖျိလၢ တၢ်ဃ့ဘါထုကဖၣ်​ ဒီးယတပျၢ်စုပျၢ်ခီၣ်​ ခီဖျိလၢ တၢ်သူၣ်ကိၢ်သးဂီၤတဖၣ်အံၤ အဃိဘၣ်.”

^၉ ဒီပုၢ်ဝဲၢ်မုၣ်အဲၤနဲ တဲစ့ၢ်ကီးလၢ တၢ်ဒိကနၣ်န့ၣ်​ မၤစၢၤအီၤလၢ အလဲၤခီဖျိ တၢ်မၤကွၢ်ကန့ၢ်အဂီၢ်လီၤ. ဒီပုၢ်ဝဲၢ်မုၣ်အဲၤနဲ တဲဝဲလၢ “ယမၤထွဲ ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲအဃိ မၤစၢၤယၤဒ်သိး ယပာ်သးမုာ်မုာ်ခုၣ်ခုၣ်​ ကန့ၢ်အဂီၢ်. ယဟိဝၤယွၤ မၤစၢၤယၤခီဖျိ ဒီပုၢ်ဝဲၢ်မုၣ်ခွါတဖၣ်​ အတၢ်ဟ့ၣ်ဂံၢ်ဟ့ၣ်ဘါ လၢနီၢ်သးတခီ ဒီးအဝဲသ့ၣ်​ မၤစၢၤယၤလၢ ယနီၢ်ခိအတၢ်လိၣ်ဘၣ်တဖၣ်​ စ့ၢ်ကီး. တကးဒံးဘၣ်​ ယဟိဝၤယွၤ ဟ့ၣ်ယၤအါန့ၢ်ဒံးတၢ်လၢယဃ့အီၤ အဃိ ယတၢ်နာ် ဟဲဂၢၢ်ကျၢၤထီၣ်ဝဲဒိၣ်မး.”

၁၀. နမ့ၢ်ထံၣ်ဘၣ်​ “ကလံၤမုၢ်ဖးဒိၣ်” န့ၣ်နမၤတၢ်မနုၤသ့လဲၣ်.

^၁၀ မ့ၢ်နထံၣ်ဘၣ်​ “ကလံၤမုၢ်ဖးဒိၣ်” လၢနတၢ်အိၣ်မူပူၤဧါ. ကလံၤမုၢ်ဖးဒိၣ်အံၤန့ၣ်​ ဘၣ်သ့ၣ်သ့ၣ်​ ကမ့ၢ်ဝဲ တၢ်ဘၣ်ဒိဘၣ်ထံး လၢန့ဆၢၣ်တကပၤ မ့တမ့ၢ် တၢ်ကီတၢ်ခဲလၢ အလီၤဂာ်ဒ်သိးဒီး ကလံၤမုၢ်ဖးဒိၣ်​ လၢအမ့ၢ် တၢ်ဆူးတၢ်ဆါနးမး အဃိနသူၣ်ကိၢ်သးဂီၤတၢ် ဒီးနကဘၣ်မၤဒ်လဲၣ်န့ၣ်​ နတသ့ၣ်ညါဘၣ်. နမ့ၢ်ထံၣ်ဘၣ်​ တၢ်အိၣ်သးတဖၣ်အံၤန့ၣ်​ တဘျီတခီၣ်​ နကသူၣ်ကိၢ်သးဂီၤ ဘၣ်ဆၣ်​ တဘၣ်ပျဲနတၢ်သူၣ်ကိၢ်သးဂီၤတဖၣ်န့ၣ်​ ကမၤပတုာ်နၤလၢ နကနာ်န့ၢ် ယဟိဝၤယွၤန့ၣ်တဂ့ၤ. သန့ၤနသးလၢအအိၣ်​ ခီဖျိဃ့ဘါထုကဖၣ်ဆူၣ်ဆူၣ်​ ဒီးမၤဂၢၢ်ကျၢၤထီၣ်နတၢ်နာ် ခီဖျိဆိကမိၣ်ထံက့ၤ လၢအပူၤကွံာ်န့ၣ်​ ယဟိဝၤယွၤ မၤစၢၤတ့ၢ်နၤဒ်လဲၣ်. (စံးထီၣ်ပတြၢၤ ၇၇:၁၁, ၁၂) နနာ်သ့သပှၢ်ကတၢၢ်လၢ ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ယဟိဝၤယွၤ တပာ်တ့ၢ်နၤ နီတဘျီဘၣ်.

၁၁. ဘၣ်မနုၤအဃိ ပကဘၣ်ပာ်လီၤပသးလၢ ပကဒိကနၣ်​ ပှၤလၢအတီခိၣ်ရိၤမဲပှၤတဖၣ်​ အကလုၢ်လဲၣ်.

^၁၁ တၢ်အဂၤမနုၤ ကမၤစၢၤပှၤလၢ ပလဲၤခီဖျိ တၢ်မၤကွၢ် ကန့ၢ်အဂီၢ်လဲၣ်. ဒ်ဒီပုၢ်ဝဲၢ်မုၣ်အဲၤနဲ တဲဝဲအသိး တၢ်ဒိကနၣ်​ ကမၤစၢၤပှၤလီၤ. အဃိ ပကဘၣ်နာ်န့ၢ်ပှၤလၢ ယဟိဝၤယွၤ ဒီးယ့ၣ်ၡူး နာ်န့ၢ်အီၤတဖၣ်. တဘျီတခီၣ်​ တၢ်ဟံးစုနဲၣ်ကျဲလၢ အဝဲသ့ၣ်ဟ့ၣ်လီၤပှၤန့ၣ်​ ပကဆိကမိၣ်ဘၣ်လၢ တကဲဘျုးအါအါဘၣ်. ဘၣ်ဆၣ်​ ပမ့ၢ်အိၣ်ဒီး တၢ်ဒိကနၣ်န့ၣ်​ ယဟိဝၤယွၤ ကဆိၣ်ဂ့ၤပှၤ. ပမ့ၢ်ကွၢ်လၢ လံာ်စီဆှံပူၤမ့ၢ်ဂ့ၤ, ဒီပုၢ်ဝဲၢ်မုၣ်ခွါလၢ အအိၣ်ဒီးတၢ်သးတီတဖၣ်​ အတၢ်လဲၤခီဖျိမ့ၢ်ဂ့ၤ ပထံၣ်ဘၣ်လၢ တၢ်ဒိကနၣ်န့ၣ်​ မၤပူၤဖျဲးဝဲ ပှၤသးသမူအါမး. (၂ မိၤၡ့ ၁၄:၁-၄; ၂ ကွဲးနီၣ်တၢ် ၂၀:၁၇) အဃိ နမ့ၢ်ဆိကမိၣ်ထံ ပှၤသ့ၣ်တဖၣ်အံၤ အဒိအတဲာ်န့ၣ်​ ကမၤစၢၤနၤဒ်သိး နကပာ်လီၤနသးလၢ နကဒိကနၣ်ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲလၢ ဆၢကတီၢ်ခဲအံၤ ဒီးခါဆူညါ စ့ၢ်ကီးလီၤ. (ဧ့ၤဘြံၤ ၁၃:၁၇) နမ့ၢ်မၤဒ်န့ၣ်န့ၣ်​ နတပျံၤတၢ်လၢၤဘၣ်​ ဒီးနကအိၣ်ကတဲာ်ကတီၤနသးလၢ တၢ်နးတၢ်ဖှီၣ်ဖးဒိၣ်​ ကဟဲအဂီၢ်လီၤ.—ကတိၤဒိ ၃:၂၅.

တၢ်နာ်ကမၤစၢၤပှၤဒ်သိး ပလဲၤခီဖျိ တၢ်တတီတလိၤ ကန့ၢ်အဂီၢ်

၁၂. ဒ် လူၤကၣ်​ ၁၈:၁-၈ ပာ်ဖျါထီၣ်ဝဲအသိး ပလဲၤခီဖျိ တၢ်တတီတလိၤ ကန့ၢ်အဂီၢ် တၢ်နာ်ကမၤစၢၤပှၤဒ်လဲၣ်.

^၁၂ ယ့ၣ်ၡူးသ့ၣ်ညါဝဲလၢ ဟီၣ်ခိၣ်လၢအပှဲၤဒီး တၢ်တတီတလိၤအံၤန့ၣ်​ ကဲထီၣ်တၢ်မၤကွၢ်လၢ အပျဲၢ်အဘီၣ်တဖၣ်အဂီၢ်လီၤ. အဃိ ဒ်သိးအဝဲကမၤစၢၤ အပျဲၢ်အဘီၣ်အဂီၢ် အတဲဘၣ်အဝဲသ့ၣ်လၢ တၢ်အဒိတခါလၢ ပထံၣ်ဘၣ်အီၤလၢ လံာ်လူၤကၣ်အပူၤလီၤ. ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ မုၣ်ကမဲတဂၤအဂ့ၢ်. မုၣ်ကမဲတဂၤအံၤန့ၣ်​ လဲၤဃ့တၢ်မၤစၢၤလၢ စံၣ်ညီၣ်ကွီၢ်လၢ အတတီတလိၤတဂၤအအိၣ်​ ဒ်သိးအကစံၣ်ညီၣ်န့ၢ်အီၤတၢ် တီတီလိၤလိၤအဂီၢ်လီၤ. အနာ်ဝဲ သပှၢ်ကတၢၢ်လၢ အမ့ၢ်ဆဲးဃ့တၢ် သပှၢ်ပှၢ်န့ၣ်​ စံၣ်ညီၣ်ကွီၢ် ကမၤန့ၢ်အီၤ အဃိ အဝဲဆဲးဃ့တၢ် ဒီးလၢခံစံၣ်ညီၣ်ကွီၢ် စံၣ်ညီၣ်န့ၢ်အီၤတၢ် ဒ်အဃ့ထီၣ်ဝဲအသိးလီၤ. ပဒိးန့ၢ်ဘၣ်​ တၢ်မၤလိဒ်လဲၣ်. ယဟိဝၤယွၤန့ၣ်​ တီလိၤဝဲအဃိ ယ့ၣ်ၡူးတဲဝဲလၢ “မ့မ့ၢ် ကစၢ်ယွၤန့ၣ်​ အဝဲစံၣ်ညီၣ်တၢ် တီတီလိၤလိၤလၢ အပှၤဃုထၢဖိလၢ အကိးထီၣ်အီၤလၢ မုၢ်နၤဒီး လၢမုၢ်ဆါတဖၣ်အဂီၢ် သပှၢ်ကတၢၢ် တမ့ၢ်ဘၣ်ဧါ.” (ဖး လူၤကၣ်​ ၁၈:၁-၈.) ဝံၤဒီးယ့ၣ်ၡူးဆဲးတဲဝဲလၢ “ဖဲပှၤကညီဖိခွါ ဟဲတုၤအခါ မ့ၢ်အဝဲကထံၣ်ဝဲ တၢ်နာ်ဒ်အံၤလၢ ဟီၣ်ခိၣ်ချၢ သပှၢ်ကတၢၢ်ဧါ.” ဖဲပထံၣ်ဘၣ်​ တၢ်တတီတလိၤဘၣ်အခါ ပကဘၣ်အိၣ်ဒီး တၢ်ဝံသးစူၤ ဒီးပတဘၣ်ဟ့ၣ်အၡူ ညီညီဖိဘၣ်. ပကဘၣ်ဆဲးအိၣ်ဒီးတၢ်နာ် လၢအဂၢၢ်ကျၢၤ ဒ်မုၣ်ကမဲတဂၤအံၤ အသိးလီၤ. ပမ့ၢ်အိၣ်ဒီး တၢ်နာ်ဒ်န့ၣ်န့ၣ်​ ပနာ်သ့သပှၢ်ကတၢၢ်လၢ ယဟိဝၤယွၤကမၤန့ၢ်တၢ်လၢ ပဂီၢ်လီၤ. ဒီးပကဘၣ်နာ်စ့ၢ်ကီးလၢ တၢ်ဃ့ဘါထုကဖၣ်န့ၣ်​ အစိကမီၤအိၣ်ဝဲဒိၣ်မး. တဘျီတခီၣ်​ ကစၢ်ယွၤ ကစံးဆၢ ပတၢ်ထုကဖၣ်လၢ ကျဲလၢပတဆိကမိၣ်ဘၣ်အီၤ အပူၤလီၤ.

၁၃. ဖဲဟံၣ်ဖိဃီဖိတဒူၣ်​ ထံၣ်ဘၣ်တၢ်တတီတလိၤဘၣ်အခါ တၢ်ထုကဖၣ်​ မၤစၢၤအဝဲသ့ၣ်ဒ်လဲၣ်.

^၁၃ ပကကွၢ်သကိး ဒီပုၢ်ဝဲၢ်မုၣ်ဘဲရိၤ လၢအအိၣ်လၢ ကီၢ်ဒံၣ်မိၣ်ခြဲးထ့း ရံၣ်ဖၢဘလံး ခိကိၣ်​ အတၢ်လဲၤခီဖျိလီၤ. ဒီပုၢ်ဝဲၢ်မုၣ်ဘဲရိၤ ဒီးအဝၤလၢ တမ့ၢ်ယဟိဝၤပှၤအုၣ်အသးဘၣ်​ ဒီးအဖိမုၣ်​ လၢအအိၣ်​ ၁၅ နံၣ်န့ၣ်​ ပှၤသုးဖိသ့ၣ်တဖၣ်​ ဟဲခးတၢ်လၢ အဝဲသ့ၣ်သဝီအဃိ အဝဲသ့ၣ်​ ဘၣ်ဃ့ၢ်ထီၣ်ကွံာ်ဝဲလီၤ. ဖဲအဝဲသ့ၣ်​ ဃ့ၢ်လၢကျဲအခါ အဝဲသ့ၣ်တိဒီး ပှၤသုးဖိလၢအအိၣ်ခိးတၢ်တဒူၣ်​ ဒီးပှၤသုးဖိတဖၣ်​ မၤပျံၤမၤဖုးအဝဲသ့ၣ်​ ဒီးတဲပျံၤအဝဲသ့ၣ်လၢ ကခးသံအဝဲသ့ၣ်လီၤ. ဖဲဒီပုၢ်ဝဲၢ်မုၣ်ဘဲရိၤ ဟီၣ်ဝဲအခါ အဖိမုၣ်​ ဂုာ်ကျဲးစၢးမၤမုာ်ထီၣ်အသး ခီဖျိ ဃ့ဘါထုကဖၣ်လၢ အကလုၢ်ဖးဒိၣ်​ ဒီးကိးထီၣ်ဝဲ ယဟိဝၤယွၤအမံၤ လၢအတၢ်ဃ့ဘါထုကဖၣ်အပူၤ ခဲအံၤခဲအံၤလီၤ. ဖဲအဃ့ဘါထုကဖၣ်တၢ် ဝံၤအခါ သုးခိၣ်တဂၤသံကွၢ်အီၤလၢ “ဖိဒိၣ်မုၣ်​ မတဂၤသိၣ်လိနၤလၢ နကဘၣ်ဃ့ဘါထုကဖၣ်လဲၣ်.” အတဲဆၢက့ၤဝဲလၢ “ယမိသိၣ်လိယၤလၢ ယကဘၣ်ဃ့ဘါထုကဖၣ်တၢ်ဒ် မးသဲ ၆:၉-၁၃ အိၣ်ဝဲအသိး.” ဝံၤဘျီ သုးခိၣ်တဂၤန့ၣ်​ တဲက့ၤအီၤလၢ “ဖိဒိၣ်မုၣ်, နလဲၤတၢ်ဒီး နမိနပါ မုာ်မုာ်ခုၣ်ခုၣ်သ့လံ. မ်ယဟိဝၤယွၤ နကစၢ်န့ၣ်​ ဒီသဒၢနၤနီၤ.”

၁၄. ဘၣ်သ့ၣ်သ့ၣ်​ ပတၢ်နာ် ကဘၣ်တၢ်မၤကွၢ်အီၤ လၢအခါဖဲလဲၣ်. ဒီးတၢ်မနုၤကမၤစၢၤပှၤ လၢပကအိၣ်ဒီး တၢ်တူၢ်န့ၢ်ခီၣ်ကဲလဲၣ်.

^၁၄ တၢ်လဲၤခီဖျိဒ်အံၤတဖၣ်န့ၣ်​ ဒုးသ့ၣ်ညါပှၤလၢ တၢ်ထုကဖၣ်န့ၣ်​ မ့ၢ်တၢ်လၢအရ့ဒိၣ်ဒိၣ်မး. ဘၣ်ဆၣ်​ ကစၢ်ယွၤ မ့ၢ်တစံးဆၢ ပတၢ်ထုကဖၣ်တဘျီဃီ မ့တမ့ၢ် မ့ၢ်တစံးဆၢဝဲလၢ တၢ်လီၤလိၢ်လီၤလးအပူၤဘၣ်န့ၣ်​ ပကမၤဒ်လဲၣ်. ဒ်မုၣ်ကမဲလၢ ယ့ၣ်ၡူးဟ့ၣ်တၢ်အဒိအပူၤအသိး ဆဲးဃ့ဘါထုကဖၣ်​ ဒီးနာ်သပှၢ်ကတၢၢ်လၢ ကစၢ်ယွၤ တပာ်တ့ၢ်ကွံာ်နၤ နီတဘျီဘၣ်. ဒီးတၢ်ဆၢကတီၢ်မ့ၢ်ဘၣ်န့ၣ်​ အဝဲကစံးဆၢ နတၢ်ထုကဖၣ်​ ဒီးကစံးဆၢဝဲလၢ ကျဲအဂၤတဘိဘိလီၤ. အဃိ ဆဲးဃ့ကညး ယဟိဝၤယွၤ အသးစီဆှံတက့ၢ်. (ဖံလံးပံၤ ၄:၁၃) သ့ၣ်နီၣ်ထီၣ်လၢ တယံာ်လၢၤဘၣ်န့ၣ်​ ယဟိဝၤယွၤ ကဆိၣ်ဂ့ၤပှၤထူးထူးတီၤတီၤ ဒီးပတသ့ၣ်နီၣ်ထီၣ်ဘၣ်​ တၢ်ဆၢကတီၢ် လၢအလီၤသူၣ်အုးသအုး လၢအပူၤကွံာ်တဖၣ်လၢၤဘၣ်. ပလဲၤခီဖျိ တၢ်မၤကွၢ်တဖၣ်လၢ ယဟိဝၤယွၤ အတၢ်မၤစၢၤ လၢတၢ်သးတီအပူၤ မ့ၢ်န့ၢ်န့ၣ်​ ပတၢ်နာ် ကဟဲဂၢၢ်ကျၢၤဒိၣ်ထီၣ်​ ဒီးပလဲၤခီဖျိ တၢ်မၤကွၢ်လၢခါဆူညါ ကန့ၢ်လီၤ.—၁ ပ့းတရူး ၁:၆, ၇.

တၢ်နာ်ကမၤစၢၤနၤ ဒ်သိးနလဲၤခီဖျိ တၢ်ကီတၢ်ခဲဖးဒိၣ်တဖၣ်​ ကန့ၢ်အဂီၢ်

၁၅. ဒ် မးသဲ ၁၇:၁၉, ၂၀ ပာ်ဖျါထီၣ်ဝဲအသိး ယ့ၣ်ၡူးအပျဲၢ်အဘီၣ်တဖၣ်​ ထံၣ်ဘၣ်တၢ်ကီတၢ်ခဲ မနုၤလဲၣ်.

^၁၅ ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ တၢ်နာ်ကမၤစၢၤ အဝဲသ့ၣ်လၢ ကလဲၤခီဖျိ တၢ်ကီတၢ်ခဲ လၢအနးဒိၣ်မးတဖၣ်​ ကန့ၢ်အဂီၢ်လီၤ. (ဖး မးသဲ ၁၇:၁၉, ၂၀.) လၢအပူၤကွံာ်န့ၣ်​ ယ့ၣ်ၡူးအပျဲၢ်အဘီၣ်တဖၣ်​ နီဟးထီၣ်ကွံာ် တၢ်နါတဖၣ်န့ၢ်ဝဲ. ဘၣ်ဆၣ်​ ဘၣ်တဘျီအဝဲသ့ၣ်​ နီဟးထီၣ်ဝဲတၢ်နါ တန့ၢ်ဘၣ်. ဘၣ်မနုၤအဃိလဲၣ်. ယ့ၣ်ၡူးတဲဝဲလၢ အဝဲသ့ၣ်​ လိၣ်ဘၣ်အါထီၣ်​ တၢ်နာ်လီၤ. ယ့ၣ်ၡူးတဲလၢ အဝဲသ့ၣ်မ့ၢ်အိၣ်ဒီးတၢ်နာ် လၢလၢပှဲၤပှဲၤန့ၣ်​ အဝဲသ့ၣ်အတၢ်ကီတၢ်ခဲ မ့ၢ်ဒိၣ်ထဲသိးဒီး ကစၢၢ်ဒၣ်လဲာ် လဲၤခီဖျိဝဲကန့ၢ်လီၤ. ပဝဲစ့ၢ်ကီး ဘၣ်သ့ၣ်သ့ၣ်​ ပကထံၣ်ဘၣ်ဒီး တၢ်ကီတၢ်ခဲဖးဒိၣ်​ ဒီးပကဆိကမိၣ်ဘၣ်လၢ ပလဲၤခီဖျိအီၤတန့ၢ်ဘၣ်.

၁၆. တၢ်နာ်မၤစၢၤ ဒီပုၢ်ဝဲၢ်မုၣ်က့ဒံၤလၢ ကလဲၤခီဖျိ တၢ်ကီတၢ်ခဲဖးဒိၣ်​ ဒီးတၢ်သူၣ်အုးသးအုးနးမးဒ်လဲၣ်.

^၁၆ ပကကွၢ်သကိး ဒီပုၢ်ဝဲၢ်မုၣ်က့ဒံၤ လၢအအိၣ်လၢ ကွၤထမါလၤ အတၢ်လဲၤခီဖျိလီၤ. ဖဲအဝဲသ့ၣ်​ ထီၣ်တၢ်အိၣ်ဖှိၣ်ဝံၤ ဟဲက့ၤလၢကျဲအခါ ပှၤမၤသံအဝၤအဲဒံၤလီၤ. ဒီပုၢ်ဝဲၢ်မုၣ်က့ဒံၤ အတၢ်နာ်မၤစၢၤအီၤ ဒ်သိးအကလဲၤခီဖျိ တၢ်သူၣ်အုးသးအုးနးမး တခါအံၤဒ်လဲၣ်. ဒီပုၢ်ဝဲၢ်မုၣ်တဲဝဲလၢ “တၢ်ထုကဖၣ်​ မၤစၢၤယၤဒ်သိး ယကပာ်ထီၣ်​ ယတၢ်ဝံတၢ်ယိးလၢ ယဟိဝၤယွၤအလိၤ ဒီးယပာ်ယသး မုာ်မုာ်ခုၣ်ခုၣ်ကန့ၢ်အဂီၢ်. ယထံၣ်ဘၣ်လၢ ယဟိဝၤယွၤ ကဟုကယာ်ယၤခီဖျိ ယဟံၣ်ဖိဃီဖိ ဒီးတံၤသကိးလၢ တၢ်အိၣ်ဖှိၣ်ပူၤတဖၣ်. ယမၤယဟိဝၤယွၤ အတၢ်မၤဆူၣ်ဆူၣ်အဃိ ယတၢ်သူၣ်အုးသးအုး လီၤစှၤ ဒီးယလဲၤခီဖျိတၢ် တနံၤဘၣ်တနံၤန့ၢ်ဝဲ. ဒီးယတဘၣ်ယိၣ်တၢ် အါတလၢ လၢခဲမုၢ်ဆ့ၣ်အဂီၢ်ဘၣ်. ယလဲၤခီဖျိဘၣ်တၢ်ဒ်အံၤအဃိ ယသ့ၣ်ညါလၢ ခါဆူညါ ယမ့ၢ်ထံၣ်ဘၣ်ဒီး တၢ်မၤကွၢ်ဒ်လဲၣ်ဂ့ၤဒ်လဲၣ်ဂ့ၤ ခီဖျိလၢ ယဟိဝၤယွၤ, ယ့ၣ်ၡူးဒီးတၢ်ကရၢကရိ အတၢ်မၤစၢၤအဃိ ယလဲၤခီဖျိအီၤ ကန့ၢ်ဝဲ.”

၁၇. ဖဲပထံၣ်ဘၣ်​ တၢ်ကီတၢ်ခဲဖးဒိၣ်အခါ ပမၤတၢ်မနုၤသ့လဲၣ်.

^၁၇ မ့ၢ်ပှၤလၢနအဲၣ်ဘၣ်အီၤတဂၤ သံသဒၣ်ကွံာ်နၤအဃိ နသူၣ်အုးသးအုးဧါ. မၤဂၢၢ်ကျၢၤထီၣ်​ နတၢ်နာ်လၢ တၢ်ဂဲၤဆၢထၢၣ်သမူထီၣ်က့ၤအဂ့ၢ် ခီဖျိဟံးန့ၢ်တၢ်ဆၢကတီၢ်လၢ နကဖးလံာ်စီဆှံ လၢတၢ်ဂ့ၢ်လၢ ဘၣ်ထွဲလိာ်သးဒီး တၢ်ဂဲၤဆၢထၢၣ်သမူထီၣ်က့ၤန့ၣ်တက့ၢ်. မ့ၢ်ပှၤလၢ နဟံၣ်ဖိဃီဖိအပူၤတဂၤဂၤ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤအဃိ နသးအုးဧါ. ဃုသ့ၣ်ညါအါထီၣ်​ တၢ်ဂ့ၢ်ဘၣ်ဃးဒီးကစၢ်ယွၤ အတၢ်သိၣ်ဃီၣ်န့ၣ်​ မ့ၢ်ကျဲလၢအဂ့ၤကတၢၢ်ထီဘိတက့ၢ်. နမ့ၢ်ထံၣ်ဘၣ်ဒီး တၢ်အိၣ်သးလၢ အကီခဲဒ်လဲၣ်ဂ့ၤဒ်လဲၣ်ဂ့ၤ ထံၣ်အီၤဒ် တၢ်ခွဲးတၢ်ယာ် လၢနကမၤဂၢၢ်ကျၢၤထီၣ်​ နတၢ်နာ်အဂီၢ်. နတၢ်တူၢ်ဘၣ်​ အိၣ်ဒ်လဲၣ်န့ၣ်​ တဲဘၣ်ယဟိဝၤယွၤ လီၤတံၢ်လီၤဆဲးတက့ၢ်. နတဘၣ်အိၣ်ထဲတဂၤဧိၤဘၣ်, လၢနကအိၣ်ထဲတဂၤဧိၤအလီၢ် ဂုာ်ကျဲးစၢးရ့ဒီး ဒီပုၢ်ဝဲၢ်မုၣ်ခွါတဖၣ်. (ကတိၤဒိ ၁၈:၁) နမ့ၢ်သးအုး ဒီးနမဲာ်ထံမ့ၢ်လီၤလၢ တၢ်ကီတၢ်ခဲလၢ နထံၣ်ဘၣ်အီၤတဖၣ်​ အဃိသနာ်က့ ဆဲးမၤတၢ်လၢ ကမၤစၢၤနၤဒ်သိး နကအိၣ်ဒီး တၢ်တူၢ်န့ၢ်ခီၣ်ကဲ. (စံးထီၣ်ပတြၢၤ ၁၂၆:၅, ၆) အဃိ ဆဲးထီၣ်တၢ်အိၣ်ဖှိၣ်, ဟးစံၣ်တဲၤတဲလီၤတၢ် ဒီးဖးလံာ်စီဆှံ ထီဘိ. ဒီးဆဲးသးစၢၢ်ဆၢ တၢ်ဆိၣ်ဂ့ၤတဖၣ်လၢ ယဟိဝၤယွၤ ကဟ့ၣ်လီၤနၤလၢ ခါဆူညါ. ဖဲနထံၣ်ဘၣ်လၢ ယဟိဝၤယွၤ မၤစၢၤနၤအခါ နတၢ်နာ်န့ၢ်အီၤန့ၣ်​ ကဟဲဒိၣ်ထီၣ်အါထီၣ်ဝဲလီၤ.

“ဟ့ၣ်လီၤအါထီၣ်ပှၤတၢ်နာ်”

၁၈. နမ့ၢ်သ့ၣ်ညါလီၤနသးလၢ နတၢ်နာ်တအိၣ်အါအါဘၣ်န့ၣ်​ နကဘၣ်မၤတၢ်မနုၤလဲၣ်.

^၁၈ လၢအပူၤကွံာ်မ့ၢ်ဂ့ၤ ခဲအံၤမ့ၢ်ဂ့ၤ ဖဲနထံၣ်ဘၣ်ဒီး တၢ်မၤကွၢ်တဖၣ်အခါ နမ့ၢ်သ့ၣ်ညါလီၤနသးလၢ နတၢ်နာ် တအိၣ်အါအါဘၣ်န့ၣ်​ တဘၣ်သးဟးဂီၤတဂ့ၤ. လၢတၢ်န့ၣ်အလီၢ် ထံၣ်တၢ်မၤကွၢ်တဖၣ်အံၤ ဒ်တၢ်ခွဲးတၢ်ယာ်တခါလၢ နကမၤဂၢၢ်ကျၢၤထီၣ်​ နတၢ်နာ်အဂီၢ်. မၤအီၤဒ် ယ့ၣ်ၡူးအတၢ်မၢဖိတဖၣ်​ မၤဝဲအသိး, အဝဲသ့ၣ်တဲဝဲလၢ “ဟ့ၣ်လီၤအါထီၣ်ပှၤတၢ်နာ်တက့ၢ်.” (လူၤကၣ်​ ၁၇:၅) တကးဒံးဘၣ်​ ဆိကမိၣ်ထံက့ၤ ပှၤဂ့ၢ်ပှၤကျိၤလၢ ပမၤလိဘၣ်အီၤလၢ တၢ်မၤလိအံၤအပူၤ. ဒ်ဒီပုၢ်ဝဲၢ်ခွါ မံၤက့(လ်) ဒီးအမါယူရဲၤ အသိး ပကဘၣ်ဆိကမိၣ်ထံ တၢ်ဆၢကတီၢ်လၢ ယဟိဝၤယွၤ မၤစၢၤတ့ၢ်ပှၤတဖၣ်. ဒ်ဒီပုၢ်ဝဲၢ်မုၣ်ဘဲရိၤ အဖိမုၣ်​ ဒီးဒီပုၢ်ဝဲၢ်မုၣ်အဲၤနဲ အသိး ဖဲပထံၣ်ဘၣ်ဒီး တၢ်ကီတၢ်ခဲဖးဒိၣ်အခါ ပကဘၣ်ဃ့ဘါထုကဖၣ်​ လၢယဟိဝၤယွၤအအိၣ်သပှၢ်ပှၢ်. ဒ်ဒီပုၢ်ဝဲၢ်မုၣ်က့ဒံၤ အသိးစ့ၢ်ကီး ပကဘၣ်သ့ၣ်ညါလၢ ယဟိဝၤယွၤ ကမၤစၢၤပှၤခီဖျိလၢ ပဟံၣ်ဖိဃီဖိ ဒီးပသကိးတဖၣ်. ဖဲနသ့ၣ်ညါလၢ ယဟိဝၤယွၤ မၤစၢၤနၤဒ်သိး နလဲၤခီဖျိ တၢ်မၤကွၢ်တဖၣ်​ ကန့ၢ်အဂီၢ်အခါ နတၢ်နာ်န့ၢ်အီၤ ကဟဲဒိၣ်ထီၣ်​ ဒီးနကနာ်န့ၢ်အီၤလၢခါဆူညါ နမ့ၢ်ထံၣ်ဘၣ်ဒီး တၢ်မၤကွၢ် ဒ်လဲၣ်ဂ့ၤဒ်လဲၣ်ဂ့ၤန့ၣ်​ အဝဲကမၤစၢၤနၤဒ်သိး နလဲၤခီဖျိတၢ် ကန့ၢ်အဂီၢ်လီၤ.

၁၉. ယ့ၣ်ၡူးနာ်န့ၢ်တၢ်မနုၤလဲၣ်​ ဒီးပဝဲစ့ၢ်ကီး ပနာ်န့ၢ်တၢ်မနုၤသ့လဲၣ်.

^၁၉ ယ့ၣ်ၡူးမၤစၢၤ အပျဲၢ်အဘီၣ်တဖၣ်​ ဒ်သိးအဝဲသ့ၣ်​ ကသ့ၣ်ညါလီၤအသးလၢ အဝဲသ့ၣ်လိၣ်ဘၣ်အါထီၣ်​ တၢ်နာ်ဖဲလဲၣ်တတီၤလဲၣ်လီၤ. ယ့ၣ်ၡူးသ့ၣ်ညါဝဲလၢ ခီဖျိလၢ ယဟိဝၤယွၤ အတၢ်မၤစၢၤအဃိ အဝဲသ့ၣ်​ လဲၤခီဖျိ တၢ်မၤကွၢ်လၢ ခါဆူညါတဖၣ်ကန့ၢ် ဂ့ၤဂ့ၤလီၤ. (ယိၤဟၣ်​ ၁၄:၁; ၁၆:၃၃) ယ့ၣ်ၡူးနာ်ဝဲသပှၢ်တၢၢ်လၢ ပှၤဂီၢ်မုၢ်ဖးဒိၣ်တဖၣ်​ ကပူၤဖျဲးထီၣ်လၢ တၢ်နးတၢ်ဖှီၣ်ဖးဒိၣ်အပူၤ, မ့ၢ်လၢအဝဲသ့ၣ်​ အိၣ်ဒီးတၢ်နာ်လၢ အဂၢၢ်ကျၢၤအဃိလီၤ. (လီၣ်ဖျါ ၇:၉, ၁၄) မ့ၢ်နကပၣ်ဃုာ်လၢ အဝဲသ့ၣ်အကျါဧါ. ပပၣ်ဃုာ်ဘၣ်လၢ ပှၤဂီၢ်မုၢ်ဖးဒိၣ်အကျါသ့ ခီဖျိလၢကစၢ်ယွၤ အတၢ်သးကညီၤဒိၣ်ဒိၣ်မုၢ်မုၢ်အဃိလီၤ. ဒီးခဲအံၤပမ့ၢ်ဟံးန့ၢ် တၢ်ခွဲးတၢ်ယာ်လၢ ပကမၤဒိၣ်ထီၣ်​ ဒီးမၤဂၢၢ်ကျၢၤထီၣ်​ ပတၢ်နာ်န့ၣ်​ ပပၣ်ဃုာ်ဘၣ်လၢအဝဲသ့ၣ်အကျါသ့လီၤ.—ဧ့ၤဘြံၤ ၁၀:၃၉.