မ့ၢ်နသ့ၣ်နီၣ်ဘၣ်ဒံးဧါ
မ့ၢ်နဖးဘၣ်တၢ်ဂ့ၢ်သ့ၣ်တဖၣ်အံၤလၢ တၢးထီခိးတၢ် တနံၣ်အံၤအဂီၢ်ဧါ. နကစံးဆၢတၢ်သံကွၢ်တဖၣ်အံၤဒ်လဲၣ်–
ဒ် ယၤကိာ် ၅:၁၁ ပာ်ဖျါထီၣ်ဝဲအသိး ယဟိဝၤယွၤ “ပှဲၤဝဲဒီးတၢ်အဲၣ် တၢ်ကဟုကယာ်” ဒီး “တၢ်သးကညီၤ” လၢကျဲဒ်လဲၣ်.
ယဟိဝၤယွၤ ပာ်ဖျါထီၣ်တၢ်သးကညီၤ ခီဖျိ အပျၢ်ကွံာ်ပတၢ်ကမၣ်လီၤ. ယၤကိာ် ၅:၁၁ ပာ်ဖျါထီၣ်ဝဲလၢ အသးအိၣ် မၤစၢၤပှၤ သပှၢ်ကတၢၢ်လီၤ. ဒီးပအဲၣ်ဒိး ကွၢ်လိမၤဒိးအီၤလီၤ.—တၢး၂၁.၀၁, ကဘျံးပၤ ၂၁.
ဘၣ်မနုၤအဃိ ယဟိဝၤယွၤဟ့ၣ်လီၤဝဲ ပှၤတနီၤလၢကအိၣ်ဒီး တၢ်စိတၢ်ကမီၤလဲၣ်.
အမၤဝဲဒ်န့ၣ် ခီဖျိလၢ တၢ်အဲၣ်အဃိလီၤ. အဒုးအိၣ်ထီၣ်ဝဲ တၢ်ရဲၣ်တၢ်ကျဲၤအံၤ ဒ်သိး အဟံၣ်ဖိဃီဖိ လၢအအိၣ်ဒီး တၢ်သးတီတဖၣ် ကအိၣ်ဒီးတၢ်ဃူတၢ်ဖိး ဒီးတၢ်ကလဲၤအသး ဂ့ၤဂ့ၤဘၣ်ဘၣ် အဂီၢ်လီၤ. ဟံၣ်ဖိဃီဖိ တဒူၣ်စုာ်စုာ်လၢအမၤထွဲဝဲ တၢ်ရဲၣ်တၢ်ကျဲၤအံၤန့ၣ် သ့ၣ်ညါဝဲလၢ မတဂၤ ကဘၣ်ဆၢတဲာ်တၢ်လဲၣ် ဒီးမတဂၤ ကတီခိၣ်ရိၤမဲတၢ်လၢ ကမၤထွဲဝဲဒ် တၢ်ဆၢတဲာ်အံၤအသိးလဲၣ်လီၤ.—တၢး၂၁.၀၂, ကဘျံးပၤ ၃.
ဘၣ်မနုၤအဃိ ခရံာ်ဖိတဖၣ် ကဘၣ်ပလီၢ်အသးဖဲ အဝဲသ့ၣ်ဆှၢဝဲ တၢ်ဂ့ၢ်တၢ်ကျိၤလၢ အံၣ်လဲးထြီနံး ဒီးအ့ထၢၣ်နဲးအပူၤလဲၣ်.
ပှၤတဂၤ မ့ၢ်သူဝဲအံၣ်လဲးထြီနံး ဒ်သိးကဆှၢတၢ်ဂ့ၢ်တၢ်ကျိၤအဂီၢ်န့ၣ် အကဘၣ်ဃုထၢ အသကိး လီၤတံၢ်လီၤဆဲး. ဘၣ်ဆၣ် အမ့ၢ်ပၣ်ဃုာ်လၢ မဲးစ့းကရူၢ်ဖးဒိၣ်လၢ အအိၣ်ဒီး ပှၤအါမးအခါ ကမၤဝဲဒ်န့ၣ်အဂီၢ် တညီဘၣ်. (၁ တံၤမသ့း ၅:၁၃) ပမ့ၢ်ပၣ်ဃုာ်လၢ မဲးစ့းကရူၢ်ဖးဒိၣ်ဒ်အံၤန့ၣ် တၢ်ဂ့ၢ်လၢ အတလီၤတံၢ်လီၤဆဲးတဖၣ် ရၤလီၤအသးသ့ ဒီးပသူဘၣ် ပဒီပုၢ်ဝဲၢ်မုၣ်ခွါလၢ ပကမၤဘၣ် စံပွါယ့အဂီၢ်သ့အဃိ တၢ်လီၤဘၣ်ယိၣ်အိၣ်ဝဲလီၤ.—တၢး၂၁.၀၃, ကဘျံးပၤ ၃၁.
ဘၣ်မနုၤအဃိ ကစၢ်ယွၤပျဲလၢ အဖိခွါကထံၣ်ဘၣ်ဝဲ တၢ်မၤအၢမၤနးဒီးတၢ်သံလဲၣ်.
တၢ်ဂ့ၢ်တၢတထံၣ်န့ၣ် မ့ၢ်ဝဲယ့ၣ်ၡူး ဘၣ်တၢ်ပျၤထီအီၤလၢသ့ၣ်တၢၣ်လိၤ ဒ်သိး ပှၤယူဒၤဖိတဖၣ် ကထူၣ်ဖျဲးထီၣ်လၢ တၢ်ဆိၣ်အၢအဂီၢ်လီၤ. (ကလၤတံ ၃:၁၀, ၁၃) ခံထံၣ်တထံၣ်န့ၣ် မ့ၢ်ဝဲ ယဟိဝၤယွၤ သိၣ်လိယ့ၣ်ၡူး ဒ်သိး ကကဲဝဲ ပှၤလုၢ်တၢ်ခိၣ် အဒိၣ်ကတၢၢ်အဂီၢ်လီၤ. သၢထံၣ်တထံၣ်န့ၣ် မ့ၢ်ဝဲ ယ့ၣ်ၡူးသံလၢ တၢ်သးတီအပူၤန့ၣ် ပာ်ဖျါထီၣ်ဝဲလၢ ပှၤဟီၣ်ခိၣ်ဖိတဖၣ် မ့ၢ်ထံၣ်ဘၣ် တၢ်မၤကွၢ်ဒိၣ်ဒိၣ်မုၢ်မုၢ်ဒၣ်လဲာ် အဝဲသ့ၣ် အိၣ်ဒီးတၢ်သးတီသ့လီၤ. (ယိၤဘး ၁:၉-၁၁)—တၢး၂၁.၀၄, ကဘျံးပၤ ၁၆-၁၇.
ဖဲပတထံၣ်လိာ်သးဒီးပှၤဂၤ လၢတၢ်စံၣ်တဲၤတဲလီၤတၢ်မၤအပူၤဘၣ်အခါ ပကဘၣ်မၤ တၢ်မနုၤလဲၣ်.
ပကဘၣ်ဂုာ်ကျဲးစၢး လဲၤစံၣ်တဲၤတဲလီၤတၢ်လၢ ပှၤအိၣ်ဟံၣ် အဆၢကတီၢ်လီၤ. ပဟးစံၣ်တဲၤတဲလီၤလၢ တၢ်လီၢ်အဂၤသ့စ့ၢ်ကီး. ဒီးပမၤတၢ်စံၣ်တဲၤတဲလီၤ အကျိၤအကျဲလၢအဂၤ ဒ်သိးဒီး တၢ်ကွဲးလံာ်ပရၢသ့လီၤ.—တၢး၂၁.၀၅, ကဘျံးပၤ ၁၅-၁၆.
တၢ်မၢဖိပီလူး တဲဝဲလၢ “ခီဖျိလၢ တၢ်သိၣ်တၢ်သီအဃိ ယသံသဒၣ်ကွံာ် တၢ်သိၣ်တၢ်သီ” န့ၣ် အဲၣ်ဒိးတဲဝဲ အခီပညီဒ်လဲၣ်. (ကလၤတံ ၂:၁၉)
စီၤမိၤၡ့ အတၢ်သိၣ်တၢ်သီန့ၣ် ပာ်ဖျါထီၣ်ဝဲလၢ ပှၤဟီၣ်ခိၣ်ဖိတဖၣ်န့ၣ် အအိၣ်ဒီး တၢ်လီၤတူာ်လီၤကာ် ဒီးဆှၢဝဲ ပှၤအံၣ်စရ့လးဖိတဖၣ်ဆူ ခရံာ်အအိၣ်လီၤ. (ကလၤတံ ၃:၁၉, ၂၄) စီၤပီလူး တူၢ်လိာ်ဝဲခရံာ်အဃိ အဝဲ “သံသဒၣ်ကွံာ် တၢ်သိၣ်တၢ်သီ” လီၤ. အဃိ အဝဲတအိၣ်လၢ တၢ်သိၣ်တၢ်သီအဖီလာ်လၢၤဘၣ်. —တၢး၂၁.၀၆, ကဘျံးပၤ ၃၁.
ယဟိဝၤယွၤ ပာ်ဖျါထီၣ်လၢ အအိၣ်ဒီး တၢ်တူၢ်န့ၢ်ခီၣ်ကဲဒ်လဲၣ်.
ယဟိဝၤယွၤ ထံၣ်ဘၣ်ဒီး တၢ်အိၣ်သးတဖၣ် ဒ်သိးဒီး အမံၤဘၣ်တၢ်ဒုၣ်ဒွဲၣ်စံးဆၢအီၤ, ပှၤအါဂၤထီဒါ အတၢ်ပၢအခွဲး, အဖိတဖၣ် ပူထီၣ်ထီဒါတၢ်, မုၣ်ကီၤလံၢ်လံၣ်တၢ် ခဲအံၤခဲအံၤ, အခ့အပှၤတဖၣ် ထံၣ်ဘၣ်ဒီးတၢ်နးတၢ်ဖှီၣ်, အဘၣ်လီၤဖးဒီး အတံၤသကိးလၢ အသံသဒၣ်အီၤတဖၣ်, ပှၤအၢပှၤသီတဖၣ် မၤနၢၤအီၣ်ဃီၣ် အခ့အပှၤ ဒီးပှၤမၤဟးဂီၤ အတၢ်ဘၣ်တ့တဖၣ်လီၤ.—တၢး၂၁.၀၇, ကဘျံးပၤ ၉-၁၂.
ဘၣ်ဃးဒီး တၢ်ဝံသးစူၤန့ၣ် စီၤယိၤသး ပာ်လီၤဒိဂ့ၤတဲာ်ဘၣ် ဒ်လဲၣ်.
စီၤယိၤသးန့ၣ် အကၠီတဖၣ် ရ့ဒီးအီၤ တတီတလိၤဘၣ်. အဝဲဘၣ်တၢ်ပာ်ဒ့ၣ်ပာ်ကမၣ်အီၤ ဒီးလီၤဘၣ်လၢဃိာ်ပူၤလၢ ကီၢ်အဲၤကူပတူး လၢအနံၣ်တဖၣ်အနံၣ်ညါ. —တၢး၂၁.၀၈, ကဘျံးပၤ ၁၂.
ဃးကဲ ၂:၆-၉, ၂၀-၂၂ တဲဆိပာ်စၢၤဝဲ တၢ်မၤဟူးဝး ဒ်လဲၣ်တကလုာ်လဲၣ်.
ပှၤကလုာ်တဖၣ် တတူၢ်လိာ် ဘီမုၢ်တၢ်သးခုကစီၣ်ဘၣ် သနာ်က့ ပှၤအါဂၤ ဟဲနုာ်လီၤလၢ တၢ်မ့ၢ်တၢ်တီအပူၤလီၤ. တယံာ်လၢၤဘၣ် ပှၤကလုာ်တဖၣ် ကဘၣ်တၢ်မၤဟးဂီၤအီၤ ဒီးတၢ်မၤအသးအံၤ မ့ၢ်ဝဲ တၢ်မၤဟူးဝး အလီၢ်ခံကတၢၢ်လီၤ.—တၢး၂၁.၀၉, ကဘျံးပၤ ၁၅-၁၉.
ဘၣ်မနုၤအဃိ ပတဘၣ်ဟ့ၣ်အၡူ လၢတၢ်စံၣ်တဲၤတဲလီၤတၢ်မၤအပူၤလဲၣ်.
ယဟိဝၤယွၤထံၣ် ပတၢ်ဂုာ်ကျဲးစၢး ဒီးအဝဲဘၣ်သူၣ်ဘၣ်သးပှၤလီၤ. ပမ့ၢ်တလီၤဘှံး ဒီးဟ့ၣ်အၡူဘၣ်န့ၣ် ပကဒိးန့ၢ်ဘၣ် တၢ်မူအထူအယိာ်လီၤ.—တၢး၂၁.၁၀, ကဘျံးပၤ ၂၅-၂၆.
၃ မိၤၡ့ အဆၢဒိၣ် ၁၉ မၤစၢၤပှၤလၢ ပကမၤထွဲ တၢ်ဟ့ၣ်ကူၣ်လၢအမ့ၢ် “ကဲထီၣ်ပှၤလၢအစီဆှံ လၢတၢ်လၢ သုမၤအီၤခဲလၢာ်အပူၤ” ဒ်လဲၣ်. (၁ ပ့းတရူး ၁:၁၅)
လီၤဂာ်လၢ လံာ်စီဆှံတဆၢအံၤန့ၣ် ဘၣ်တၢ်ဟံးန့ၢ်အီၤလၢ ၃ မိၤၡ့ ၁၉:၂ အပူၤလီၤ. ၃ မိၤၡ့ အဆၢဒိၣ် ၁၉ ပာ်ဖျါထီၣ်ဝဲ တၢ်ဂ့ၢ်အါမံၤလၢအမၤစၢၤပှၤဒ်သိး ပမၤထွဲ ၁ ပ့းတရူး ၁:၁၅ လၢပတၢ်အိၣ်မူပူၤ ကသ့အဂီၢ်လီၤ.—တၢး၂၁.၁၂, ကဘျံးပၤ ၃-၄.