တၢးထီခိးတၢ် online လံာ်ရိဒၢး
တၢးထီခိးတၢ်
online လံာ်ရိဒၢး
ကညီ(စှီၤ)ကျိာ်
ဃုထၢ
  • ဃုကွၢ်
  • လံာ်စီဆှံ
  • လံာ်လဲၢ်တဖၣ်
  • တၢ်အိၣ်ဖှိၣ်ရိဖှိၣ်တဖၣ်
  • တၢး၂၂ လါအ့ဖြ့ၣ် လံာ်ကဘျံးပၤ ၂၈-လံာ်ကဘျံးပၤ ၂၉ လံာ်အဆၢ ၅
  • ပှၤဖးလံာ်ဖိတဖၣ်​ အတၢ်သံကွၢ်

တၢ်ဂီၤမူတအိၣ်ဘၣ်.

ဝံသးစူၤ, တၢ်ကီတၢ်ခဲအိၣ်လၢ နကကွၢ်တၢ်ဂီၤမူအဂီၢ်.

  • ပှၤဖးလံာ်ဖိတဖၣ်​ အတၢ်သံကွၢ်
  • တၢးထီခိးတၢ် ဘိးဘၣ်သ့ၣ်ညါယဟိဝၤယွၤအဘီမုၢ် (လံာ်လၢတၢ်မၤလိအဂီၢ်)—၂၀၂၂
  • တၢ်ဂ့ၢ်လၢအလီၤဂာ်လိာ်သး
  • မ့ၢ်နသ့ၣ်ညါဧါ
    တၢးထီခိးတၢ် ဘိးဘၣ်သ့ၣ်ညါယဟိဝၤယွၤအဘီမုၢ် (လံာ်လၢတၢ်မၤလိအဂီၢ်)—၂၀၁၇
  • မ့ၢ်နတီဒီး နတၢ်အၢၣ်လီၤဧါ
    ခရံာ်ဖိ အတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ—ကၠိဖိလံာ်တၢ်မၤလိ (၂၀၁၇)
တၢးထီခိးတၢ် ဘိးဘၣ်သ့ၣ်ညါယဟိဝၤယွၤအဘီမုၢ် (လံာ်လၢတၢ်မၤလိအဂီၢ်)—၂၀၂၂
တၢး၂၂ လါအ့ဖြ့ၣ် လံာ်ကဘျံးပၤ ၂၈-လံာ်ကဘျံးပၤ ၂၉ လံာ်အဆၢ ၅

ပှၤဖးလံာ်ဖိတဖၣ်​ အတၢ်သံကွၢ်

ဘၣ်ဃးဒီး ပှၤမၤတၢ်အၢၣ်လီၤန့ၣ်​ လံာ်စီဆှံတဲဝဲဒ်လဲၣ်

▪ တၢ်ကတိၤလၢအမ့ၢ် တၢ်အၢၣ်လီၤန့ၣ်​ အခီပညီမ့ၢ်ဝဲ “နအၢၣ်လီၤတၢ် လီၤတံၢ်လီၤဆဲး လၢပှၤမဲာ်ညါ မ့တမ့ၢ် နအၢၣ်လီၤလၢ နကမၤလၢပှဲၤ တၢ်တမံၤမံၤ ဒီးညီနုၢ်န့ၣ်​ ပှၤအၢၣ်လီၤလၢ ကစၢ်ယွၤအမဲာ်ညါ.” ပှၤမၤတၢ်အၢၣ်လီၤအံၤလၢ တၢ်ကတိၤ မ့တမ့ၢ် ကွဲးလီၤအီၤလၢလံာ်သ့ဝဲ.

ယ့ၣ်ၡူးတဲဝဲလၢ “သုတဘၣ်မၤတၢ်အၢၣ်လီၤ နီတမံၤတဂ့ၤ. . . . နမ့ၢ်တဲလၢ ‘အမ့ၢ်’ န့ၣ်​ မၤလၢပှဲၤ နတၢ်ကတိၤတက့ၢ်. ဒီးနမ့ၢ်တဲလၢ ‘တမ့ၢ်ဘၣ်’ န့ၣ်​ မၤအီၤဒ် နတဲအသိးတက့ၢ်. နမ့ၢ်တဲတၢ် အါန့ၢ်ဒံးအန့ၣ်န့ၣ်​ မ့ၢ်အဟဲ လၢ မုၣ်ကီၤလံၢ် အအိၣ်လီၤ.” (မးသဲ ၅:၃၃-၃၇) အဃိ ပှၤတနီၤဆိကမိၣ်ဝဲလၢ ပှၤမ့ၢ်မၤတၢ်အၢၣ်လီၤန့ၣ်​ မ့ၢ်တၢ်လၢအကမၣ်လီၤ. စီၤမိၤၡ့ အတၢ်သိၣ်တၢ်သီအိၣ်ဝဲလၢ ပှၤအံၣ်စရ့လးဖိ ဘၣ်မၤဝဲ တၢ်အၢၣ်လီၤအီလီၤ လၢတၢ်အိၣ်သးတနီၤအဖီခိၣ်န့ၣ်​ ယ့ၣ်ၡူးသ့ၣ်ညါဝဲ. ဒီးအသ့ၣ်ညါဝဲလၢ ကစၢ်ယွၤအခ့အပှၤလၢ အအိၣ်ဒီးတၢ်သးတီတဖၣ်စ့ၢ်ကီး မၤဝဲတၢ်အၢၣ်လီၤလီၤ. (၁ မိၤၡ့ ၁၄:၂၂, ၂၃; ၂ မိၤၡ့ ၂၂:၁၀, ၁၁) ဒီးအသ့ၣ်ညါစ့ၢ်ကီးဝဲလၢ ယဟိဝၤယွၤ အၢၣ်လီၤတၢ်လၢ အနီၢ်ကစၢ်အမံၤပူၤလီၤ. (ဧ့ၤဘြံၤ ၆:၁၃-၁၇) ယ့ၣ်ၡူးသ့ၣ်ညါဝဲ တၢ်ဂ့ၢ်တဖၣ်အံၤအဃိ ဖဲယ့ၣ်ၡူးတဲဝဲ တၢ်ကတိၤတဖၣ်န့ၣ်အခါ တမ့ၢ်လၢ အကအဲၣ်ဒိးတဲဝဲ အခီပညီလၢ ပတဘၣ်အၢၣ်လီၤတၢ် နီတဘျီဘၣ်န့ၣ်ဘၣ်. လၢတၢ်န့ၣ်အလီၢ် ယ့ၣ်ၡူးဟ့ၣ်ပလီၢ်ပှၤ ဘၣ်ဃးဒီး ပတဘၣ်အၢၣ်လီၤတၢ်လၢ တၢ်လၢအရ့တဒိၣ်အါအါဘၣ်​ မ့တမ့ၢ် တၢ်လၢအတကြၢးတဘၣ်​ အဂီၢ်န့ၣ်ဘၣ်. ပကဘၣ်မၤဒ် ပအၢၣ်လီၤတၢ်အသိးထီဘိ, မ့ၢ်လၢယဟိဝၤယွၤအဲၣ်ဒိးလၢ ပကမၤဒ်န့ၣ်အဃိ.

ပှၤမ့ၢ်မၢနမၤတၢ်အၢၣ်လီၤန့ၣ်​ နကမၤဒ်လဲၣ်. အဆိကတၢၢ်န့ၣ်​ ဆိကမိၣ်ထံ မ့ၢ်နမၤလၢပှဲၤနတၢ်အၢၣ်လီၤအံၤ ကန့ၢ်သပှၢ်တၢၢ်ဧါ. နမ့ၢ်တသ့ၣ်ညါလီၤတံၢ်ဘၣ်န့ၣ်​ နမ့ၢ်တမၤတၢ်အၢၣ်လီၤဘၣ်န့ၣ်​ ကဂ့ၤဒိၣ်ဝဲ. ကစၢ်ယွၤကလုၢ်ကထါ ဟ့ၣ်ပလီၢ်ပှၤလၢ “တၢ်တအၢၣ်လီၤအီလီၤတၢ် နီတမံၤန့ၣ်, ဂ့ၤဒိၣ်န့ၢ်ဒံး တၢ်အၢၣ်လီၤအီလီၤတၢ် ဝံၤဒီးတဘၣ်​ တၢ်မၤလၢပှဲၤက့ၤအီၤ တက့ၢ်န့ၣ်လီၤ.” (စံၣ်တဲၤတဲလီၤတၢ် ၅:၅, ခ့ခါစှီၤကျိာ်) မ့ၢ်ဝံၤန့ၣ်​ ဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲတဖၣ်​ လၢဘၣ်ဃးဒီး ပှၤမၤတၢ်အၢၣ်လီၤအဂ့ၢ် ဒီးမၤထွဲဒ် နသးလၢအသ့ၣ်ညါဒၣ်တၢ် တဲနၤအသိး. လံာ်စီဆှံ အတၢ်ဟံးစုနဲၣ်ကျဲတနီၤလၢ နကဘၣ်ဆိကမိၣ်ထံအီၤန့ၣ်​ မ့ၢ်မနုၤလဲၣ်.

ပိာ်ခွါတဂၤ အမၤတၢ်အၢၣ်လီၤ ဖဲအထီၣ်ရူအခါ. အညိၣ်ထီၣ်အစုထွဲ ဒီးမ့မ့ၢ်လၢအစုစ့ၣ်န့ၣ်​ အပာ်လီၤလၢ လံာ်စီဆှံအလိၤ.

တၢ်အၢၣ်လီၤတနီၤန့ၣ်​ ကစၢ်ယွၤ ဘၣ်သူၣ်ဘၣ်သးဝဲ. အဒိ, ဖဲယဟိဝၤပှၤအုၣ်အသးတဖၣ်​ ဖျီသးအခါ အဝဲသ့ၣ်​ မၤတၢ်အၢၣ်လီၤလီၤ. လၢကစၢ်ယွၤ ဒီးပှၤအါဂၤအမဲာ်ညါန့ၣ်​ တလးမူးပိာ်မုၣ်​ ဒီးတလးမူးပိာ်ခွါ အၢၣ်လီၤဝဲလၢ အဝဲသ့ၣ်​ ကအဲၣ်လိာ်သး, ကပာ်လုၢ်ပာ်ပှ့ၤလိာ်သး ဒီးပာ်ကဲလိာ်သး “တစိၤသး” လီၤ. (မ့မ့ၢ်ပှၤလၢအဖျီအသး အဂၤတနီၤန့ၣ်​ တတဲဝဲ တၢ်ကတိၤတဖျၢၣ်ဃီဒ်အံၤဘၣ်​ သနာ်က့ အဝဲသ့ၣ်မၤဝဲ တၢ်အၢၣ်လီၤလၢ ကစၢ်ယွၤအမဲာ်ညါ.) ဒီးဖဲန့ၣ်​ အဝဲသ့ၣ်ကဲထီၣ်​ နီၢ်ဒီမိၢ်ဝၤ ဒီးကဘၣ်အိၣ်​ တပူၤဃီ တစိၤသးလီၤ. (၁ မိၤၡ့ ၂:၂၄; ၁ ကရံၣ်သူး ၇:၃၉) တၢ်အၢၣ်လီၤဒ်အံၤန့ၣ်​ မ့ၢ်တၢ်လၢအကြၢးအဘၣ်​ ဒီးဘၣ်ကစၢ်ယွၤအသးလီၤ.

တၢ်အၢၣ်လီၤတနီၤန့ၣ်​ တဘၣ်ကစၢ်ယွၤအသးဘၣ်. ခရံာ်ဖိနီၢ်ကီၢ်တဖၣ်န့ၣ်​ တမၤဝဲ တၢ်အၢၣ်လီၤဒ်သိး ကဒီသဒၢ ထံကီၢ်လၢ တၢ်စုကဝဲၤ မ့တမ့ၢ် ကပာ်တ့ၢ်ကွံာ် အတၢ်နာ်ကစၢ်ယွၤန့ၣ်ဘၣ်. အဝဲသ့ၣ်မ့ၢ်မၤဝဲ တၢ်အၢၣ်လီၤဒ်န့ၣ်န့ၣ်​ မ့ၢ်ဒၣ်အမၤကမၣ်​ ကစၢ်ယွၤအတၢ်သိၣ်တၢ်သီ. ခရံာ်ဖိတဖၣ်န့ၣ်​ “တဘၣ်ဃးဒီး ဟီၣ်ခိၣ်ဘၣ်” အဃိ ပပၣ်ဃုာ်လၢ ဟီၣ်ခိၣ်အတၢ်ဂ့ၢ်လိာ်ဘှီလိာ်, တၢ်ဒုးတၢ်ယၤအပူၤတသ့ဘၣ်.—ယိၤဟၣ်​ ၁၅:၁၉; ယၡါယၤ ၂:၄; ယၤကိာ် ၁:၂၇.

တၢ်အၢၣ်လီၤတနီၤလၢ ပကဘၣ်မၤအီၤန့ၣ်​ ဒိးသန့ၤထီၣ်အသးလၢ ပသးလၢအသ့ၣ်ညါဒၣ်တၢ်အဖီခိၣ်. အဃိ တချုးလၢပမၤတၢ်အၢၣ်လီၤဒံးဘၣ်​ အခါ ပကဘၣ်ဆိကမိၣ်ထံ ယ့ၣ်ၡူးအတၢ်ကတိၤတခါ လီၤတံၢ်လီၤဆဲး. ယ့ၣ်ၡူးတဲဝဲလၢ “တၢ်လၢအဘၣ်ဃးဒီး ကဲစၢ်န့ၣ်​ ဟ့ၣ်က့ၤလၢ ကဲစၢ်တက့ၢ်. ဘၣ်ဆၣ်​ တၢ်လၢအဘၣ်ဃးဒီး ကစၢ်ယွၤန့ၣ်​ ဟ့ၣ်က့ၤလၢ ကစၢ်ယွၤတက့ၢ်.”—လူၤကၣ်​ ၂၀:၂၅.

အဒိ, လၢထံကီၢ်တနီၤန့ၣ်​ ဖဲခရံာ်ဖိတဂၤ ကတီၣ်ထီၣ်ဝဲလံာ်ဒ်သိး ကကဲထီၣ်ဝဲ ထံဖိကီၢ်ဖိ မ့တမ့ၢ် ကန့ၢ်ဘၣ်​ ထံဖိကီၢ်ဖိ အလံာ်အုၣ်သးအဂီၢ်အခါ အသ့ၣ်ညါဝဲလၢ အကဘၣ်မၤတၢ်အၢၣ်လီၤလီၤ. တၢ်အၢၣ်လီၤလၢ အကဘၣ်မၤဝဲန့ၣ်​ အခီပညီ မ့ၢ်ဖျါလၢ အအၢၣ်လီၤလၢကမၤဝဲ တၢ်လၢအထီဒါဒီး ကစၢ်ယွၤအတၢ်သိၣ်တၢ်သီန့ၣ်​ တမ့ၢ်လၢ အသးလၢအသ့ၣ်ညါဒၣ်တၢ် ကဟ့ၣ်အီၤအခွဲးလၢ ကမၤတၢ်အၢၣ်လီၤဒ်န့ၣ်ဘၣ်. ဘၣ်ဆၣ်​ ပဒိၣ်မ့ၢ်ဟ့ၣ်အီၤအခွဲးလၢ ကဆီတလဲ တၢ်ကတိၤတနီၤလၢ အပၣ်ဃုာ်လၢ တၢ်အၢၣ်လီၤအပူၤန့ၣ်​ အသးလၢအသ့ၣ်ညါဒၣ်တၢ် ကဟ့ၣ်အီၤအခွဲးလၢ ကမၤဝဲတၢ်အၢၣ်လီၤလီၤ.

အဝဲမ့ၢ်ဆီတလဲဝဲ တၢ်ကတိၤ ဒီးအၢၣ်လီၤတၢ်ဒ်အံၤ သနာ်က့ အလီၤပလိာ်လိာ်အသးဒီး ရိမ့ၤ ၁၃:၁ လၢအတဲဝဲ “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်န့ၣ်​ မ်ပှၤကိးဂၤဒဲး ဒိးပၢအသးလၢ အဝဲသ့ၣ်​ အဖီလာ်တက့ၢ်.” မ့ၢ်လၢခရံာ်ဖိတဖၣ်န့ၣ်​ ကစၢ်ယွၤ ဟ့ၣ်လီၤပာ်စၢၤအီၤ တၢ်သိၣ်တၢ်သီ ဒ်န့ၣ်အဃိ အဝဲသ့ၣ်​ မ့ၢ်မၤတၢ်အၢၣ်လီၤဒ်အံၤန့ၣ်​ တမ့ၢ်တၢ်လၢ အကမၣ်ဘၣ်.

ဖဲနမၤတၢ်အၢၣ်လီၤအခါ ပှၤမ့ၢ်မၢနသူတၢ်ပီးတၢ်လီတမံၤမံၤ မ့တမ့ၢ် ပာ်ဖျါထီၣ်​ တၢ်ဟူးတၢ်ဂဲၤတမံၤမံၤန့ၣ်​ အရ့ဒိၣ်ဒိၣ်မးလၢ နကဆၢတဲာ်တၢ်ဒ် နသးလၢအသ့ၣ်ညါဒၣ်တၢ်လၢ အဘၣ်တၢ်သိၣ်လိအီၤဒ်လံာ်စီဆှံအသိး. လၢပျၢၤပှၤရိမ့ၤဖိတဖၣ်ဒီး ပှၤစကူသ့ၤဖိတဖၣ်န့ၣ်​ (Scythians) ဖဲအဝဲသ့ၣ်​ မၤတၢ်အၢၣ်လီၤအခါ သူဝဲနး (ဃဲာ်ဒီ). အဝဲသ့ၣ်မၤဝဲဒ်န့ၣ်န့ၣ်​ အခီပညီမ့ၢ်ဝဲ အဝဲသ့ၣ်အၢၣ်လီၤတၢ်လၢ တၢ်ဒုးတၢ်ယၤအကစၢ်ယွၤအမဲာ်ညါ လၢအဝဲသ့ၣ်မ့ၢ်ပှၤလၢ ပှၤနာ်န့ၢ်အီၤသ့. ဖဲပှၤကြံးဖိတဖၣ်​ မၤတၢ်အၢၣ်လီၤခါ အယူာ်ထီၣ်အစုလၢမူခိၣ်, အဝဲသ့ၣ်နာ်ဝဲလၢ တၢ်လၢပှၤတဲဝဲဒီးပှၤမၤဝဲန့ၣ်​ ကစၢ်ယွၤထံၣ်ဒီးသ့ၣ်ညါဝဲ အဃိ ပှၤကဘၣ်ၡဲတၢ်ဂ့ၢ်ဒီး ကစၢ်ယွၤ.

ယဟိဝၤယွၤအခ့အပှၤတဖၣ်​ ဖဲအမၤတၢ်အၢၣ်လီၤအခါ တသူဝဲကလုာ်ဒူၣ်အတၢ်ပနီၣ်​ လၢအဘၣ်ဃးလိာ်သးဒီး တၢ်ဘူၣ်တၢ်ဘါကမၣ်တဖၣ်န့ၣ်ဘၣ်. ဘၣ်ဆၣ်​ ဖဲပှၤထီၣ်ရူထီၣ်တ့အခါ အဝဲသ့ၣ်မ့ၢ်ကဲပှၤအုၣ်အသး ဒီးပှၤမ့ၢ်မၢအပာ်ထီၣ်အစုလၢ လံာ်စီဆှံအလိၤမီၤ. နမ့ၢ်ထံၣ်ဘၣ်ဒီး တၢ်အိၣ်အသးဒ်န့ၣ်န့ၣ်​ နပာ်ထီၣ်နစုလၢ လံာ်စီဆှံအလိၤသ့. လၢလံာ်စီဆှံအပူၤန့ၣ်​ ကစၢ်ယွၤအခ့အပှၤတနီၤန့ၣ်​ ဖဲအမၤဝဲတၢ်အၢၣ်လီၤအခါ အမၤဝဲတၢ်ဟူးတၢ်ဂဲၤဒ်န့ၣ်န့ၣ်​ အိၣ်ဝဲ. (၁ မိၤၡ့ ၂၄:၂, ၃, ၉; ၄၇:၂၉-၃၁) နမ့ၢ်မၤတၢ်အၢၣ်လီၤဒ်န့ၣ်န့ၣ်​ အရ့ဒိၣ်ဒိၣ်မးလၢ နကဘၣ်သ့ၣ်နီၣ်ထီၣ်လၢ နမၤဝဲတၢ်အၢၣ်လီၤလၢ ကစၢ်ယွၤအမဲာ်ညါ ဒီးနကဘၣ်တဲတၢ်မ့ၢ်တၢ်တီ. ဒီးနကဘၣ်​ အိၣ်ကတဲာ်ကတီၤနသးလၢ နကစံးဆၢ တၢ်သံကွၢ်တခါဂ့ၤတခါဂ့ၤ တီတီလိၤလိၤ.

လံာ်စီဆှံ အတၢ်ဟံးစုနဲၣ်ကျဲလၢ ပကဘၣ်ဆိကမိၣ်ထံအီၤတဖၣ်

  • မးသဲ ၅:၃၇– “နမ့ၢ်တဲလၢ ‘အမ့ၢ်’ န့ၣ်​ မၤလၢပှဲၤ နတၢ်ကတိၤတက့ၢ်. ဒီးနမ့ၢ်တဲလၢ ‘တမ့ၢ်ဘၣ်’ န့ၣ်​ မၤအီၤဒ် နတဲအသိးတက့ၢ်.”

  • ယိၤဟၣ်​ ၁၅:၁၉– “သုတဘၣ်ဃးဒီး ဟီၣ်ခိၣ်ဘၣ်.”

  • ၅ မိၤၡ့ ၅:၉– “ယဲဒၣ်ယွၤနကစၢ်အံၤ, . . . အသးက့ၣ်တၢ်, [မၤလိာ်ဝဲလၢ ပှၤကဘၣ်​ တီဒီးအီၤလၢ သးဒီဖျၢၣ်, NWT]”

  • ရိမ့ၤ ၁၃:၁– “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်န့ၣ်​ မ်ပှၤကိးဂၤဒဲး ဒိးပၢအသးလၢ အဝဲသ့ၣ်​ အဖီလာ်တက့ၢ်.”

  • လူၤကၣ်​ ၂၀:၂၅– “တၢ်လၢအဘၣ်ဃးဒီး ကဲစၢ်န့ၣ်​ ဟ့ၣ်က့ၤလၢ ကဲစၢ်တက့ၢ်. ဘၣ်ဆၣ်​ တၢ်လၢအဘၣ်ဃးဒီး ကစၢ်ယွၤန့ၣ်​ ဟ့ၣ်က့ၤလၢ ကစၢ်ယွၤတက့ၢ်.”

  • ၁ ပ့းတရူး ၂:၁၂– “ဆဲးပၢၤဃာ် သုလုၢ်လၢ်သကဲာ်ပဝး လၢအဂ့ၤလၢ ပှၤကလုာ်တဖၣ်အကျါတက့ၢ်. သုမ့ၢ်မၤဒ်န့ၣ်န့ၣ်​ . . . အဝဲသ့ၣ်ကထံၣ်ဘၣ်​ သုတၢ်မၤလၢ အဂ့ၤတဖၣ်လီၤ.”

ပှၤမ့ၢ်မၢပမၤတၢ်အၢၣ်လီၤ တခါဂ့ၤတခါဂ့ၤန့ၣ်​ မ့ၢ်လၢပပာ်လုၢ်ပာ်ပှ့ၤ ပတၢ်ရ့လိာ်သးဒီး ကစၢ်ယွၤအဃိ ပကဘၣ်ဃ့ဘါထုကဖၣ်​ ဒီးဆိကမိၣ်ထံအီၤ ဒ်သိးအကလီၤပလိာ်ဒီး လံာ်စီဆှံအတၢ်သိၣ်တၢ်သီ ဒီးတမၤတံာ်တာ် ပသးလၢအသ့ၣ်ညါဒၣ်တၢ်တဂ့ၤအဂီၢ်. နမ့ၢ်မၤတၢ်အၢၣ်လီၤန့ၣ်​ နကဘၣ်မၤထွဲဒ် နအၢၣ်လီၤအီၤအသိး.—၁ ပ့းတရူး ၂:၁၂.

    ကညီ (စှီၤ) လံာ်လဲၢ်တဖၣ် (၂၀၀၂–၂၀၂၅)
    ဟးထီၣ်
    နုာ်လီၤ
    • ကညီ(စှီၤ)ကျိာ်
    • နီၤလီၤ
    • တၢ်ဂ့ၢ်အဂၤလၢ အဘၣ်ထွဲတဖၣ်
    • Copyright © 2025 Watch Tower Bible and Tract Society of Pennsylvania
    • တၢ်ဘျၢလၢနကသူအဂီၢ်
    • တၢ်ဂ့ၢ်ခူသူၣ် အတၢ်ဘျၢ
    • တၢ်လၢဘၣ်ဃးဒီး တၢ်ဂ့ၢ်ခူသူၣ်
    • JW.ORG
    • နုာ်လီၤ
    နီၤလီၤ