၁ | တၢ်ဃ့ထုကဖၣ် “ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်”
လံာ်စီဆှံတဲဝဲလၢ– “မ့ၢ်လၢ ကစၢ်ယွၤ သးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်.”—၁ ပ့းတရူး ၅:၇.
အဲၣ်ဒိးတဲဝဲ အခီပညီဒ်လဲၣ်
ပမ့ၢ်အိၣ်ဒီးတၢ်ဘၣ်ယိၣ်ဘၣ်ဘှီ အဒိၣ်မ့ၢ်ဂ့ၤ အဆံးမ့ၢ်ဂ့ၤ ယဟိဝၤယွၤ ဘၣ်သးလၢပတဲပၠးအီၤခဲလၢာ်. (စံးထီၣ်ပတြၢၤ ၅၅:၂၂) တၢ်ဂ့ၢ်လၢအမၤကိၢ်မၤဂီၤပသးန့ၣ် အမၤကိၢ်မၤဂီၤစ့ၢ်ကီး ယဟိဝၤယွၤအသး. အဃိဒ်သိး ပသးကမုာ်ထီၣ်အဂီၢ် ပကဘၣ်ဃ့ထုကဖၣ်လၢ ယဟိဝၤယွၤအအိၣ်.—ဖံလံးပံၤ ၄:၆, ၇.
တၢ်ဃ့ထုကဖၣ် မၤစၢၤပှၤဒ်လဲၣ်
ဖဲပတူၢ်ဘၣ်ဒီး တၢ်သးလီၤစၢ်တၢ်ဆါအခါ တဘျီတခီၣ် မ့ၢ်လၢ ပှၤဂၤတနၢ်ပၢၢ်ပှၤဂ့ၤဂ့ၤဘၣ်အဃိ ပကတူၢ်ဘၣ်လၢ ပအိၣ်သယုၢ်သညိထဲတဂၤ. (ကတိၤဒိ ၁၄:၁၀) ဘၣ်ဆၣ် ပမ့ၢ်တဲဖျါထီၣ် ပတၢ်တူၢ်ဘၣ်လၢ ယဟိဝၤယွၤ အအိၣ်န့ၣ် အကသးကညီၤပှၤ ဒီးကနၢ်ပၢၢ်စၢၤ ပတၢ်တူၢ်ဘၣ်. မ့ၢ်လၢယဟိဝၤယွၤ ထံၣ်ဝဲဒီးနၢ်ပၢၢ်စၢၤပတၢ်တူၢ်ဘၣ်အဃိ အအဲၣ်ဒိးလၢ ပကဃ့ထုကဖၣ်လၢအအိၣ် ဒီးတဲဘၣ်အီၤ တၢ်လၢအမၤသူၣ်ကိၢ်သးဂီၤပှၤ.—၂ ကွဲးနီၣ်တၢ် ၆:၂၉, ၃၀.
ပမ့ၢ်ဃ့ထုကဖၣ်လၢ ယဟိဝၤယွၤ အအိၣ်န့ၣ် အကမၤစၢၤပှၤလၢ ပကသ့ၣ်ညါဘၣ်လၢ ယဟိဝၤယွၤ သးအိၣ်ပှၤနီၢ်ကီၢ်. ပှၤကွဲးထါစံးထီၣ်ပတြၢၤတဂၤ ဃ့ထုကဖၣ်လၢ “နထံၣ်လီၤ ယတၢ်နးတၢ်ဖှီၣ်လံ . . . ဒီးနသ့ၣ်ညါ ယတၢ်ကိၢ်တၢ်ဂီၤလၢ အဒိၣ်အမုၢ်တဖၣ်.” ပဝဲစ့ၢ်ကီး ပကတူၢ်ဘၣ်ဒ် ပှၤကွဲးထါစံးထီၣ်ပတြၢၤတဂၤအံၤတူၢ်ဘၣ်ဝဲအသိး. (စံးထီၣ်ပတြၢၤ ၃၁:၇) ဖဲပထံၣ်ဘၣ် တၢ်ကီတၢ်ခဲတဖၣ်အခါ ပသ့ၣ်ညါဘၣ်လၢ ယဟိဝၤယွၤနၢ်ပၢၢ်ဝဲအဃိ မၤစၢၤပှၤလၢ ပ လဲၤခီဖျိ ပတၢ်ကီတၢ်ခဲကန့ၢ်. ယဟိဝၤယွၤမ့ၢ်ပှၤလၢ အနၢ်ပၢၢ် ပတၢ်ကီတၢ်ခဲ ဒိၣ်န့ၢ်ဒံးပှၤအဂၤခဲလၢာ် အဃိ အဝဲသူလံာ်စီဆှံ ဒ်သိးကမၤမုာ်ထီၣ်ပသး ဒီးကဟ့ၣ်ဂံၢ်ဟ့ၣ်ဘါပှၤ.