နမ့ၢ်ဟ့ၣ်တၢ်န့ၣ် နကသးခုနီၢ်ကီၢ်

၁-၂. ဖဲပဟ့ၣ်တၢ်အခါ ဘၣ်မနုၤအဃိ ပဒိးန့ၢ်ဘၣ် တၢ်သးခုလဲၣ်.

ဖဲယဟိဝၤယွၤ တ့လီၤပှၤအခါ အတ့လီၤပှၤဃုာ်ဒီး တၢ်တူၢ်ဘၣ် တခါလၢ ပမ့ၢ်ဟ့ၣ်တၢ်န့ၣ် ပကန့ၢ်ဘၣ် တၢ်သးခုအါန့ၢ်ဒံး ပဒိးန့ၢ်ဘၣ်တၢ်လၢ ပှၤဂၤအအိၣ်ဒံး. (မၤတၢ် ၂၀:၃၅) ဘၣ်ဆၣ် အဲၣ်ဒိးတဲဝဲလၢ ဖဲပဒိးန့ၢ် တၢ်ဟ့ၣ်လၢ ပှၤဂၤအအိၣ်အခါ ပတသးခုဘၣ်ဧါ. တမ့ၢ်ဒ်န့ၣ်ဘၣ်. ပသ့ၣ်ညါလၢ ဖဲပဒိးန့ၢ် တၢ်ဟ့ၣ်အခါ ပသးခု. သနာ်က့ ဖဲပဟ့ၣ်ပှၤဂၤ တၢ်ဟ့ၣ်အခါ ပသးခုဒိၣ်ဒံး. ယဟိဝၤယွၤ တ့လီၤပှၤဃုာ်ဒီး တၢ်တူၢ်ဘၣ်ဒ်အံၤန့ၣ် အကဲဘျုး လၢပဂီၢ်ဒ်လဲၣ်.

^၂ ခီဖျိလၢ ယဟိဝၤယွၤ တ့လီၤပှၤဒ်အံၤအဃိ ပမၤအါထီၣ် တၢ်သးခုသ့. ဒီးပမၤအါထီၣ် တၢ်သးခု သ့ခီဖျိ ပဃုအါထီၣ်ကျဲလၢ ကမၤစၢၤပှၤဂၤ. ယဟိဝၤယွၤ တ့လီၤပှၤ ဒ်အံၤန့ၣ် အဂ့ၤဒိၣ်မး တမ့ၢ်ဧီၤ.—စံး ၁၃၉:၁၄.

၃. ဘၣ်မနုၤအဃိ ယဟိဝၤယွၤန့ၣ် အကဲ “ကစၢ်ယွၤလၢ အသးခု” လဲၣ်.

^၃ လံာ်စီဆှံ တဲဝဲလၢ ပမ့ၢ်ဟ့ၣ်တၢ်န့ၣ် ပကန့ၢ်ဘၣ် တၢ်သးခု. ဒီးပသ့ၣ်ညါဘၣ်လၢ ယဟိဝၤယွၤန့ၣ် အကဲဝဲ “ကစၢ်ယွၤလၢ အသးခု.” (၁ တံၤ ၁:၁၁) ယဟိဝၤယွၤန့ၣ် အကဲပှၤအဆိကတၢၢ် တဂၤလၢ အသးအိၣ်ဟ့ၣ်တၢ် ဒီးပှၤလၢ အဟ့ၣ်တၢ်အါန့ၢ်အီၤန့ၣ် တအိၣ်နီတဂၤဘၣ်. ဘၣ်ဃးဒီး တၢ်ဂ့ၢ်အံၤန့ၣ် တၢ်မၢဖိပီလူး တဲဝဲလၢ ယဟိဝၤယွၤန့ၣ် အဟ့ၣ်လီၤပှၤသးသမူ ဒီးခီဖျိလၢ အီၤအဃိ “ပမူ, ပဟူးပဂဲၤ ဒီးပဟဲကဲထီၣ်.” (မၤတၢ် ၁၇:၂၈) အဃိ ပသ့ၣ်ညါဘၣ်လၢ “တၢ်ဟ့ၣ်လၢအဂ့ၤ ဒီးတၢ်ဟ့ၣ်လၢအလၢအပှဲၤ ခဲလၢာ်န့ၣ်” ဟဲလၢ ယဟိဝၤယွၤအအိၣ်.—ယၤ ၁:၁၇.

၄. ဒ်သိး ပတၢ်သးခု ကအါထီၣ်အဂီၢ် ပကဘၣ်မၤဒ်လဲၣ်.

^၄ ပဝဲကိးဂၤဒဲးန့ၣ် ပအဲၣ်ဒိး န့ၢ်အါထီၣ် တၢ်သးခု ဖဲပဟ့ၣ်တၢ်အခါ. အဃိ ပမ့ၢ်ကွၢ်လိ ယဟိဝၤယွၤ လၢအသးအိၣ်ဟ့ၣ်တၢ်ညီန့ၣ် ပကသးခုနီၢ်ကီၢ်. (အ့း ၅:၁) ဒီးလၢတၢ်မၤလိအံၤ ပကမၤလိဘၣ် တၢ်အဒိတနီၤလၢ ဘၣ်ဃးဒီး တၢ်ဟ့ၣ်တၢ်အဂ့ၢ်. တကးဒံးဘၣ် ပကမၤလိဘၣ်လၢ ဖဲပမၤစၢၤပှၤဂၤအခါ ပှၤမ့ၢ်တစံးဘျုးပှၤဘၣ်န့ၣ် ပကဘၣ်မၤဒ်လဲၣ်. ဒီးတၢ်မၤလိအံၤ ကမၤစၢၤပှၤလၢ ပကဆဲး မၤစၢၤပှၤဂၤ ဒီးပမ့ၢ်မၤစၢၤပှၤဂၤန့ၣ် ပကဒိးန့ၢ်အါထီၣ် တၢ်သးခု.

ကွၢ်လိ ယဟိဝၤယွၤ လၢအသးအိၣ်ဟ့ၣ်တၢ်

၅. ယဟိဝၤယွၤ ဟ့ၣ်ပှၤမနုၤလဲၣ်.

^၅ ယဟိဝၤယွၤ သးအိၣ်ဟ့ၣ်တၢ်န့ၣ် အပာ်ဖျါထီၣ်ဝဲဒ်လဲၣ်. ခဲအံၤ ပကတဲသကိး တၢ်အဒိတနီၤ. ယဟိဝၤယွၤ ဟ့ၣ်ပှၤ တၢ်လၢပလိၣ်ဘၣ်တဖၣ်. ဘၣ်သ့ၣ်သ့ၣ် အတဟ့ၣ်ပှၤ တၢ်ထူးတၢ်တီၤဘၣ် သနာ်က့ တၢ်လၢပလိၣ်ဘၣ်န့ၣ် အဟ့ၣ်ပှၤထီဘိ. အဒိ အဟ့ၣ်ပှၤ တၢ်အီၣ်တၢ်အီ, တၢ်ကူတၢ်ကၤ ဒီးတၢ်လီၢ်တၢ်ကျဲ လၢပကအိၣ်အဂီၢ်. (စံး ၄:၈; မး ၆:၃၁-၃၃; ၁ တံၤ ၆:၆-၈) ယဟိဝၤယွၤ ဟ့ၣ်ပှၤ တၢ်လၢပလိၣ်ဘၣ်န့ၣ် တမ့ၢ်လၢ အဘၣ်ဟ့ၣ်ပှၤ အဃိဘၣ်. သနာ်က့ ဘၣ်မနုၤအဃိ အဟ့ၣ်ပှၤလဲၣ်.

၆. ယ့ၣ်ၡူး အတၢ်ကတိၤဖဲ မးသဲ ၆:၂၅, ၂၆ န့ၣ် သိၣ်လိပှၤ မနုၤလဲၣ်.

^၆ ယဟိဝၤယွၤ အဲၣ်ပှၤအဃိ အဟ့ၣ်ပှၤ တၢ်လၢပလိၣ်ဘၣ်တဖၣ်. ဆိကမိၣ်ကွၢ် ယ့ၣ်ၡူး အတၢ်ကတိၤဖဲ မးသဲ ၆:၂၅, ၂၆. (ဖး.) ယ့ၣ်ၡူး သူဝဲ တၢ်ဘၣ်တ့တဖၣ် ဒ်သိး ကဟ့ၣ်တၢ်အဒိအဂီၢ်. အဒိ အတဲဖျါထီၣ် ဘၣ်ဃး ထိၣ်အဂ့ၢ် ဒီးအတဲဝဲလၢ ထိၣ်တဖၣ်န့ၣ် “တဖှံတၢ်ချံ ဒီးတကူးတၢ် ဒီးတပာ်ဖှိၣ်တၢ်လၢ ဘုဖီပူၤဘၣ်.” ဒီးအဆဲးတဲဝဲလၢ “သုပၢ်အိၣ်လၢ မူခိၣ်န့ၣ် ဒုးအီၣ်ဒုးအီ အဝဲသ့ၣ်.” ဝံၤဘျီ ယ့ၣ်ၡူးတဲဝဲလၢ “သုဝဲသ့ၣ်အံၤ သုလုၢ်ဒိၣ်ပှ့ၤဒိၣ်န့ၢ်ဒံး ထိၣ်တဖၣ်အံၤ တမ့ၢ်ဧီၤ.” ယ့ၣ်ၡူး တဲဝဲဒ်အံၤန့ၣ် အအဲၣ်ဒိး သိၣ်လိပှၤ မနုၤလဲၣ်. အသိၣ်လိပှၤလၢ ယဟိဝၤယွၤ ပာ်လုၢ်ပာ်ပှ့ၤ အခ့အပှၤလၢ အတီဒီးအီၤ ဒိၣ်န့ၢ်ဒံး ဆၣ်ဖိကီၢ်ဖိ စၢၢ်တလၢၢ်ဒံး. ဆၣ်ဖိကီၢ်ဖိမး ယဟိဝၤယွၤ မ့ၢ်ကွၢ်ထွဲ အဝဲသ့ၣ်န့ၣ် ပနာ်သ့ သပှၢ်တၢၢ်လၢ အကဟ့ၣ်ပှၤ တၢ်လၢပလိၣ်ဘၣ်တဖၣ်. ယဟိဝၤယွၤန့ၣ် အလီၤဂာ်ဒီး ပါလၢအအိၣ်ဒီး တၢ်အဲၣ်တၢ်ကွံအဃိ အကမၤလၢပှဲၤ အဖိအလံၤတဖၣ် အတၢ်လိၣ်ဘၣ်.—စံး ၁၄၅:၁၆; မး ၆:၃၂.

၇. ပကွၢ်လိ ယဟိဝၤယွၤ လၢအသးအိၣ်ဟ့ၣ်တၢ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ)

^၇ ဒ်ယဟိဝၤယွၤအသိး ခီဖျိလၢ ပအဲၣ်ပှၤဂၤအဃိ ပဟ့ၣ်အဝဲသ့ၣ် တၢ်လၢအဝဲသ့ၣ် လိၣ်ဘၣ်ဝဲ. အဒိ နသ့ၣ်ညါ ဒီပုၢ်ဝဲၢ်မုၣ်ခွါလၢ အလိၣ်ဘၣ်တၢ်မၤစၢၤ ဘၣ်ဃးဒီး တၢ်အီၣ်တၢ်အီ ဒီးတၢ်ကူတၢ်ကၤ အိၣ်တဂၤဂၤဧါ. မ့ၢ်အိၣ်န့ၣ် ယဟိဝၤယွၤ ကသူနၤလၢ နကဟ့ၣ်မၤစၢၤ အဝဲသ့ၣ်. ဒီးဖဲတၢ်ကီတၢ်ခဲ အိၣ်ထီၣ်အခါ ယဟိဝၤယွၤ အခ့အပှၤတဖၣ်န့ၣ် အဝဲသ့ၣ် သးအိၣ်မၤစၢၤတၢ် တဘျီဃီ. အဒိ ဖဲခိၤရိၤနၤတၢ်ဆါ ရၤလီၤသးအခါ ဒီပုၢ်ဝဲၢ်မုၣ်ခွါတဖၣ် မၤစၢၤဝဲ ဒီပုၢ်ဝဲၢ်မုၣ်ခွါလၢ အလိၣ်ဘၣ် တၢ်မၤစၢၤတဖၣ်လၢ တၢ်အီၣ်တၢ်အီ, တၢ်ကူတၢ်ကၤ ဒီးတၢ်လိၣ်ဘၣ် လၢအဂၤ. ဒီးဒီပုၢ်ဝဲၢ်မုၣ်ခွါအါဂၤန့ၣ် ဟ့ၣ်ဝဲ တၢ်မၤဘူၣ်လၢ ဟီၣ်ခိၣ်ဒီဘ့ၣ် တၢ်ဖံးတၢ်မၤအဂီၢ်. တၢ်မၤဘူၣ်တဖၣ်အံၤ ပသူအီၤလၢ ကမၤစၢၤ ဒီပုၢ်ဝဲၢ်မုၣ်ခွါလၢ အအိၣ်လၢ ဟီၣ်ခိၣ်ဒီဘ့ၣ် လၢအလိၣ်ဘၣ် တၢ်မၤစၢၤ. ဒီပုၢ်ဝဲၢ်မုၣ်ခွါလၢ အသးအိၣ်ဟ့ၣ်တၢ်န့ၣ် အဝဲသ့ၣ် မၤထွဲဝဲ ဧ့ၤဘြံၤ ၁၃:၁၆ လၢအတဲဝဲ “တဘၣ်သးပ့ၤနီၣ် မၤတၢ်ဂ့ၤ ဒီးတဘၣ်သးပ့ၤနီၣ် ဟ့ၣ်နီၤလီၤပှၤဂၤလၢ တၢ်လၢအအိၣ်ဒီးနၤန့ၣ်တဂ့ၤ. တၢ်လုၢ်ဒ်အံၤတဖၣ်န့ၣ် ကစၢ်ယွၤ ဘၣ်သူၣ်ဘၣ်သးဝဲ ဒိၣ်မး.”

၈. ယဟိဝၤယွၤ အတၢ်ဂံၢ်တၢ်ဘါန့ၣ် မၤစၢၤပှၤ သ့ဒ်လဲၣ်. (ဖံလံးပံၤ ၂:၁၃)

^၈ ယဟိဝၤယွၤ ကဟ့ၣ်ပှၤ တၢ်ဂံၢ်တၢ်ဘါ. ယဟိဝၤယွၤ သးအိၣ်ဟ့ၣ်ဝဲ အခ့အပှၤ လၢအတီဒီးအီၤတဖၣ်လၢ တၢ်ဂံၢ်တၢ်ဘါ. (ဖး ဖံလံးပံၤ ၂:၁၃.) ဒ်သိး နလဲၤခီဖျိ တၢ်လ့ပစီ ဒီးတၢ်ကီတၢ်ခဲ ကန့ၢ်အဂီၢ် နဃ့ထုကဖၣ်လၢ ယဟိဝၤယွၤ ကဟ့ၣ်နၤ တၢ်ဂံၢ်တၢ်ဘါ တဘျီဘျီဧါ. ဘၣ်သ့ၣ်သ့ၣ် နဃ့ထုကဖၣ်လၢ နကအိၣ်ဒီး တၢ်ဂံၢ်တၢ်ဘါလၢ နကမၤ တၢ်လၢနဘၣ်မၤ လၢတနံၤဘၣ်တနံၤအဂီၢ်. ဖဲကစၢ်ယွၤ စံးဆၢ နတၢ်ထုကဖၣ်အခါ နကတူၢ်ဘၣ် ဒ်သိးဒီး တၢ်မၢဖိပီလူး လၢအတဲဝဲလၢ “ယအိၣ်ဒီး တၢ်ဂံၢ်တၢ်ဘါလၢ ယကလဲၤခီဖျိတၢ်ခဲလၢာ် ခီဖျိပှၤတဂၤလၢ အဟ့ၣ်ယၤ တၢ်စိကမီၤန့ၣ်အဃိ.”—ဖံလံး ၄:၁၃.

၉. ပကွၢ်လိ ယဟိဝၤယွၤ လၢအသးအိၣ် ဟ့ၣ်ပှၤတၢ်ဂံၢ်တၢ်ဘါ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၉ ပတကဲ ပှၤလၢပှၤပှဲၤဘၣ် သနာ်က့ ပကွၢ်လိ ယဟိဝၤယွၤ လၢအသးအိၣ် ဟ့ၣ်ပှၤတၢ်ဂံၢ်တၢ်ဘါ တဂၤအံၤသ့. ပတအိၣ်ဒီး တၢ်ဂံၢ်တၢ်ဘါဒ် ယဟိဝၤယွၤဘၣ်အဃိ ပဟ့ၣ်ပှၤဂၤ တၢ်ဂံၢ်တၢ်ဘါ ဒ်သိးဒီးအီၤ တသ့ဘၣ်. ဘၣ်ဆၣ် ပကွၢ်လိအီၤ ဒီးသူပဂံၢ်ပဘါလၢ ကမၤစၢၤပှၤဂၤသ့. အဒိ ပမၤစၢၤ ဒီပုၢ်ဝဲၢ်လၢအသးပှၢ် ဒီးဒီပုၢ်ဝဲၢ်မုၣ်ခွါ လၢအအိၣ်တဆူၣ်ဘၣ်တဖၣ် ခီဖျိ မၤကဆှီန့ၢ် အဟံၣ် ဒီးလဲၤပှ့ၤန့ၢ် တၢ်လၢအဝဲသ့ၣ် လိၣ်ဘၣ်ဝဲသ့. တကးဒံးဘၣ် တၢ်ခွဲးတၢ်ယာ်မ့ၢ်အိၣ်န့ၣ် ပလဲၤမၤကဆှီ ဒီးဘှီဂ့ၤထီၣ်က့ၤ တၢ်အိၣ်ဖှိၣ်လီၢ် သ့စ့ၢ်ကီး. ပမ့ၢ်သူ ပတၢ်ဂံၢ်တၢ်ဘါ ဒ်အံၤန့ၣ် ပကမၤစၢၤဘၣ် ပဒီပုၢ်ဝဲၢ်မုၣ်ခွါအါမး.

၁၀. တၢ်လၢပတဲန့ၣ် အကဲထီၣ် တၢ်ဂံၢ်တၢ်ဘါ လၢပှၤဂၤအဂီၢ် သ့ဒ်လဲၣ်.

^၁၀ ပကဘၣ် နီၣ်ဘၣ်လၢ တၢ်လၢပတဲန့ၣ် အကဲထီၣ် တၢ်ဂံၢ်တၢ်ဘါလၢ ပှၤဂၤအဂီၢ်သ့. အဒိ ပှၤလၢကဒိးန့ၢ်ဘၣ် တၢ်ဂံၢ်တၢ်ဘါ ခီဖျိ နတဲအီၤလၢ နပာ်လုၢ်ပာ်ပှ့ၤ တၢ်လၢအမၤဝဲန့ၣ် အိၣ်တဂၤဂၤဧါ. ဒီးပှၤလၢ အလိၣ်ဘၣ် တၢ်မၤမုာ်ထီၣ်က့ၤန့ၣ် နသ့ၣ်ညါ အိၣ်တဂၤဂၤဧါ. မ့ၢ်အိၣ်န့ၣ် တဲဘၣ်အီၤလၢ နသးအိၣ်အီၤနီၢ်ကီၢ်. ဒီးနပာ်ဖျါထီၣ်လၢ နသးအိၣ်အီၤ ခီဖျိ လဲၤဟးလၢအအိၣ်, ကိးအီၤလၢ လီတဲစိ, ဆှၢန့ၢ်အီၤ ခးဖိတဘ့ၣ်, ဆှၢန့ၢ်အီၤ လံာ်လၢအံမ့ မ့တမ့ၢ် လၢမဲးစ့းသ့. နကဘၣ် တဲအီၤဒ်လဲၣ်န့ၣ် နတလိၣ် သးကိၢ်တၢ် အါတလၢဘၣ်. နမ့ၢ်တဲအီၤ တၢ်ကတိၤလၢ အပှဲၤဒီးတၢ်အဲၣ်တၢ်ကွံ စှၤကိာ်ဖျၢၣ်န့ၣ် ဘၣ်သ့ၣ်သ့ၣ် ကကဲထီၣ် တၢ်ဂံၢ်တၢ်ဘါလၢ အကလဲၤခီဖျိ တၢ်ကီတၢ်ခဲ လၢတနံၤအဂီၢ်. ဒီးဘၣ်သ့ၣ်သ့ၣ် အသးကမုာ်ထီၣ်က့ၤ.—ကတိၤ ၁၂:၂၅; အ့း ၄:၂၉.

၁၁. ယဟိဝၤယွၤ သးအိၣ်ဟ့ၣ်ပှၤ တၢ်ကူၣ်သ့န့ၣ် ပသ့ၣ်ညါဘၣ်ဒ်လဲၣ်.

^၁၁ ယဟိဝၤယွၤ ဟ့ၣ်ပှၤ တၢ်ကူၣ်သ့. တၢ်မၢဖိယၤကိာ် တဲဝဲလၢ “ကစၢ်ယွၤသးအိၣ်ဟ့ၣ်ဝဲ ပှၤခဲလၢာ်လၢ တၢ်အါအါဂီၢ်ဂီၢ် ဒီးအတဒူပှၤဘၣ်. အဃိ သုဝဲတဂၤဂၤ မ့ၢ်လိၣ်ဘၣ်အါထီၣ် တၢ်ကူၣ်သ့န့ၣ် မ်အဆဲးဃ့တၢ်လၢ ကစၢ်ယွၤအအိၣ်.” (ယၤ ၁:၅) ဘၣ်ဃးဒီး တၢ်ဂ့ၢ်အံၤန့ၣ် ပသ့ၣ်ညါဘၣ်လၢ ယဟိဝၤယွၤန့ၣ် အတပံဒံဘၣ် ဒီးအသးအိၣ်ဟ့ၣ် ပှၤဂၤလၢ အတၢ်ကူၣ်သ့. ဖဲယဟိဝၤယွၤ ဟ့ၣ်လီၤပှၤ တၢ်ကူၣ်သ့အခါ “အတဒူပှၤ” မ့တမ့ၢ် “အတဃု ပှၤတၢ်ကမၣ်ဘၣ်.” ဒီးဖဲပဃ့ အတၢ်ဟံးစုနဲၣ်ကျဲအခါ ပတလိၣ်သးကိၢ်လၢ အကဒူပှၤ ဒီးထံၣ်ကမၣ်ပှၤဘၣ်. နီၢ်ကီၢ်န့ၣ် အအဲၣ်ဒိးလၢ ပကဃ့ တၢ်ဟံးစုနဲၣ်ကျဲ လၢအအိၣ်.—ကတိၤ ၂:၁-၆.

၁၂. ပသူပတၢ်ကူၣ်သ့လၢ ကမၤစၢၤပှၤဂၤ ကသ့ဒ်လဲၣ်.

^၁၂ မ့မ့ၢ်ပှၤမီၤ. ပကွၢ်လိ ယဟိဝၤယွၤ ဒီးသူပတၢ်ကူၣ်သ့လၢ ကမၤစၢၤပှၤဂၤ ကသ့ဒ်လဲၣ်. (စံး ၃၂:၈) ယဟိဝၤယွၤ အခ့အပှၤတဖၣ် အိၣ်ဒီးတၢ်ခွဲးတၢ်ယာ် အါမးလၢ ကမၤစၢၤက့ၤပှၤဂၤ ဘၣ်ဃးဒီး တၢ်လၢအဝဲသ့ၣ် မၤလိဘၣ်ဝဲ. အဒိ ပမၤစၢၤ ပှၤစံၣ်တဲၤတဲလီၤတၢ်ဖိ အသီတဖၣ်လၢ အဝဲသ့ၣ် ကမၤလိသ့ထီၣ်သးလၢ တၢ်စံၣ်တဲၤတဲလီၤတၢ်မၤ. တၢ်အိၣ်ဖှိၣ်သးပှၢ်တဖၣ် မၤစၢၤ တၢ်အိၣ်ဖှိၣ်အပှၤမၤစၢၤတၢ်တဖၣ် လၢတၢ်ဝံသးစူၤအပူၤ. တကးဒံးဘၣ် အဝဲသ့ၣ် မၤစၢၤစ့ၢ်ကီး ဒီပုၢ်ဝဲၢ်ခွါတဖၣ်လၢ ကမၤလၢပှဲၤ အမူဒါ လၢတၢ်အိၣ်ဖှိၣ်အပူၤ. ဒီးဒီပုၢ်ဝဲၢ်မုၣ်ခွါလၢ အအိၣ်ဒီး တၢ်သ့တၢ်ဘၣ်လၢ တၢ်တ့ထီၣ်ဘှီထီၣ် တကပၤန့ၣ် အဝဲသ့ၣ် သိၣ်လိဝဲ ဒီပုၢ်ဝဲၢ်အဂၤတဖၣ်ဒ်သိး ကတ့ထီၣ်ဘှီထီၣ် တၢ်သူၣ်ထီၣ်တဖၣ်လၢ ယဟိဝၤယွၤ အတၢ်မၤအဂီၢ်.

၁၃. ဖဲပသိၣ်လိ ပှၤဂၤအခါ ပကွၢ်လိ ယဟိဝၤယွၤ ကသ့ဒ်လဲၣ်.

^၁၃ ဖဲပသိၣ်လိ ပှၤဂၤအခါ ပဂုာ်ကျဲးစၢး ကွၢ်လိယဟိဝၤယွၤ လၢအဟ့ၣ်လီၤပှၤ တၢ်ကူၣ်သ့ တဂၤအံၤသ့. ယဟိဝၤယွၤန့ၣ် အသးအိၣ်ဟ့ၣ်ပှၤ တၢ်ကူၣ်သ့ ဒီးအတပံဒံဘၣ်. အဃိ တၢ်ကူၣ်သ့လၢ ပန့ၢ်ဘၣ်လၢ ယဟိဝၤယွၤအအိၣ်န့ၣ် ပကဘၣ် ဟ့ၣ်နီၤလီၤစ့ၢ်ကီး ပှၤလၢ အမၤလိတၢ်တဖၣ်. ပသိၣ်လိက့ၤပှၤဂၤ တၢ်လၢပမၤလိဘၣ်ခဲလၢာ် ဒီးပတဘၣ်ယိၣ်လၢ ပှၤကဒိးန့ၢ်ဘၣ်မူဒါ လၢပလီၢ်ဘၣ်. ပှၤတနီၤ ဆိကမိၣ်ဝဲလၢ တၢ်လၢအဝဲသ့ၣ် သ့ၣ်ညါဘၣ်ဝဲန့ၣ် အဝဲသ့ၣ် နီၢ်ကစၢ်ဘၣ်မၤလိဝဲ ဒီးပှၤတသိၣ်လိ အဝဲသ့ၣ် နီတဂၤဘၣ်အဃိ အဝဲသ့ၣ် တဘၣ်သး သိၣ်လိပှၤဂၤစ့ၢ်ကီးဘၣ်. ယဟိဝၤယွၤ အခ့အပှၤတဖၣ် တဘၣ်အိၣ်ဒီး တၢ်ထံၣ်ဒ်အံၤဘၣ်. ပကဘၣ် သးအိၣ် “ဟ့ၣ်လီၤ ပသး,” နီၤလီၤပှၤဂၤ တၢ်လၢပသ့ၣ်ညါ ဒီးဂုာ်ကျဲးစၢး သိၣ်လိအဝဲသ့ၣ် လၢအဂ့ၤကတၢၢ်. (၁ သ့း ၂:၈) ဒီးပမုၢ်လၢ်လၢ အဝဲသ့ၣ် “ကတုၤထီၣ်ထီၣ်ဘး လၢကသိၣ်လိ ပှၤဂၤ” စ့ၢ်ကီး. (၂ တံၤ ၂:၁, ၂) ပဝဲကိးဂၤ မ့ၢ်သးအိၣ် ဟ့ၣ်နီၤလီၤလိာ်သး တၢ်ကူၣ်သ့န့ၣ် ပတၢ်ကူၣ်သ့ ဒီးတၢ်သးခု ကအါထီၣ်.

ပှၤမ့ၢ်တစံးဘျုးပှၤဘၣ်န့ၣ် ပကမၤဒ်လဲၣ်

၁၄. ဖဲပဟ့ၣ်တၢ် ဒီးမၤန့ၢ်တၢ်လၢ ပှၤဂၤအဂီၢ်အခါ အဝဲသ့ၣ်အါတက့ၢ် မၤဆၢက့ၤဝဲဒ်လဲၣ်.

^၁၄ ဖဲပဟ့ၣ်တၢ် ဒီးမၤန့ၢ်တၢ်လၢ ပှၤဂၤအဂီၢ် လီၤဆီဒၣ်တၢ် လၢဒီပုၢ်ဝဲၢ်မုၣ်ခွါ အဂီၢ်အခါ ညီနုၢ်အဝဲသ့ၣ် စံးဘျုးပှၤ. အဝဲသ့ၣ် စံးဘျုးပှၤ ခီဖျိ ကွဲးန့ၢ်ပှၤလံာ်လၢ ခးက့ပူၤ မ့တမ့ၢ် အဝဲသ့ၣ် ပာ်ဖျါထီၣ် တၢ်စံးဘျုးစံးဖှိၣ် လၢကျဲအဂၤတဘိဘိ. (ကလီး ၃:၁၅) ဖဲပမၤန့ၢ်တၢ်လၢ အဝဲသ့ၣ်ဂီၢ် တမံၤမံၤအခါ ပသးခု ဘၣ်ဆၣ် ဖဲအဝဲသ့ၣ် စံးဘျုးပှၤအခါန့ၣ် ပသးခုအါန့ၢ်အလီၢ်ဒံး.

၁၅. ဖဲပမၤစၢၤပှၤဂၤအခါ အဝဲသ့ၣ် မ့ၢ်တစံးဘျုးပှၤဘၣ်န့ၣ် ပကဘၣ် သ့ၣ်နီၣ်ထီၣ် မနုၤလဲၣ်.

^၁၅ တဘျီတခီၣ် ပှၤတနီၤန့ၣ် ပမၤန့ၢ်တၢ်လၢ အဝဲသ့ၣ်ဂီၢ်ဘၣ်ဆၣ် အဝဲသ့ၣ် တစံးဘျုးပှၤဘၣ်. အဒိ ပသူပတၢ်ဆၢကတီၢ်, ပတၢ်ဂံၢ်တၢ်ဘါ ဒီးကျိၣ်စ့ လၢကမၤစၢၤ အဝဲသ့ၣ် ဘၣ်ဆၣ် တဘျီတခီၣ်န့ၣ် ဖျါလၢအဝဲသ့ၣ် တပာ်လုၢ်ပာ်ပှ့ၤ တၢ်လၢပမၤဘၣ်. ပမ့ၢ်တူၢ်ဘၣ် ဒ်န့ၣ်န့ၣ် ဒ်သိး ပကဆဲးအိၣ်ဒီး တၢ်သးခု ဒီးသးတဟးဂီၤ တဂ့ၤအဂီၢ် ပကဘၣ် မၤဒ်လဲၣ်. ပကဘၣ် သ့ၣ်နီၣ်ထီၣ် လံာ်စီဆှံအဆၢလၢ တၢ်မၤလိတခါအံၤ အခီၣ်ထံး လၢအမ့ၢ် မၤတၢ် ၂၀:၃၅. ဖဲပမၤစၢၤပှၤဂၤအခါ ပသးခုဒိၣ်မး ဒီးပတၢ်သးခုန့ၣ် တဒိးသန့ၤထီၣ်သးလၢ ပှၤဂၤစံးဘျုးပှၤ အဃိဘၣ်. ပှၤမ့ၢ်တစံးဘျုးပှၤဘၣ် သနာ်က့ ပဆဲးဟ့ၣ်တၢ်လၢ တၢ်သးခုအပူၤ ကသ့ဒ်လဲၣ်. ပကတဲသကိး တၢ်ဟ့ၣ်ကူၣ်တနီၤ.

၁၆. ဒ်သိး ပကဆဲး ဟ့ၣ်တၢ်လၢ တၢ်သူၣ်ဖှံသးညီအပူၤအဂီၢ် ပကဘၣ် သ့ၣ်နီၣ်ထီၣ် မနုၤလဲၣ်.

^၁၆ ဖဲပမၤစၢၤပှၤဂၤအခါ မ့ၢ်ဝဲပကွၢ်လိ ယဟိဝၤယွၤ. ယဟိဝၤယွၤန့ၣ် ပှၤစံးဘျုးအီၤမ့ၢ်ဂ့ၤ တစံးဘျုးအီၤမ့ၢ်ဂ့ၤ အဝဲဟ့ၣ် ပှၤကိးဂၤဒဲး တၢ်ဟ့ၣ်လၢအဂ့ၤ. (မး ၅:၄၃-၄၈) ယဟိဝၤယွၤ ကဟ့ၣ်ပှၤ “ခိၣ်ဖးဖးဒိၣ်” အဃိ ဖဲပဟ့ၣ်ပှၤဂၤ တၢ်ဟ့ၣ်အခါ ပ ‘တဘၣ်မုၢ်လၢ်လၢ ပကက့ၤဒိးန့ၢ်ဘၣ်က့ၤ’ တၢ်ဟ့ၣ် လၢပှၤဂၤအအိၣ်ဘၣ်. (လူၤ ၆:၃၅) တၢ်ကတိၤလၢ “က့ၤဒိးန့ၢ်ဘၣ်က့ၤ” န့ၣ် အပၣ်ဃုာ်ဒီး တၢ်ပာ်ဖျါထီၣ် တၢ်စံးဘျုးစံးဖှိၣ်. အဃိ ပှၤမ့ၢ်တစံးဘျုးပှၤ ဘၣ်ဆၣ် ပတလိၣ်သးဟးဂီၤဘၣ်. ပကဘၣ် သ့ၣ်နီၣ်ထီၣ်လၢ ခီဖျိလၢ ပမၤစၢၤပှၤဂၤ ဒီးပ ‘ဟ့ၣ်တၢ်လၢ တၢ်သူၣ်ဖှံသးညီအပူၤ’ အဃိ ယဟိဝၤယွၤ ကဆိၣ်ဂ့ၤက့ၤပှၤ.—ကတိၤ ၁၉:၁၇; ၂ ကရံၣ် ၉:၇.

၁၇. ဖဲပဟ့ၣ်တၢ်အခါ ပမၤထွဲ ယ့ၣ်ၡူး အတၢ်ဟ့ၣ်ကူၣ် ကသ့ဒ်လဲၣ်. (လူၤကၣ် ၁၄:၁၂-၁၄)

^၁၇ အဂၤတမံၤန့ၣ် ဖဲပဟ့ၣ်တၢ်အခါ ပကွၢ်လိ ယဟိဝၤယွၤ သ့ခီဖျိ ပမၤထွဲ ယ့ၣ်ၡူး အတၢ်ဟ့ၣ်ကူၣ်ဖဲ လူၤကၣ် ၁၄:၁၂-၁၄. (ဖး.) အဒိ ဖဲပကွဲမုာ်ပှၤဂၤ လၢပဟံၣ်အခါ ပမ့ၢ်ကွဲမုာ်ပှၤလၢ အကွဲမုာ်က့ၤပှၤန့ၢ်န့ၣ် အတကမၣ်ဘၣ်. ဘၣ်ဆၣ် ဖဲပကွဲမုာ် ပှၤဂၤအခါ ပမ့ၢ်အိၣ်ဒီး တၢ်တိာ်ပာ်လၢ ပှၤကဘၣ် ကွဲမုာ်က့ၤပှၤန့ၣ် ပကဘၣ် မၤဒ်လဲၣ်. ပကဘၣ် မၤထွဲ ယ့ၣ်ၡူးအတၢ်ဟ့ၣ်ကူၣ်. ပမၤထွဲ အတၢ်ဟ့ၣ်ကူၣ် သ့ခီဖျိ ပကွဲမုာ်ပှၤလၢ အဟ့ၣ်ဆၢက့ၤပှၤတၢ် တန့ၢ်ဘၣ်. ပမ့ၢ်မၤဒ်န့ၣ်န့ၣ် ပကန့ၢ်ဘၣ် တၢ်သးခု ခီဖျိလၢ ပကွၢ်လိ ယဟိဝၤယွၤအဃိ. ဒီးပမ့ၢ်တမုၢ်လၢ်လၢ ပကန့ၢ်ဘၣ်က့ၤ တၢ်လၢ ပှၤဂၤအအိၣ်ဘၣ် ဒီးတမုၢ်လၢ်လၢ ပှၤကစံးဘျုးပှၤဘၣ်န့ၣ် ဖဲပဟ့ၣ်တၢ် တဘျီဂ့ၤ တဘျီဂ့ၤအခါ ပကသးခု.

၁၈. ဒ်သိး ပကအိၣ်ဒီးတၢ်ထံၣ်အဂ့ၤ လၢပှၤဂၤအဖီခိၣ်အဂီၢ် ပကဘၣ်မၤဒ်လဲၣ်.

^၁၈ အိၣ်ဒီးတၢ်ထံၣ်အဂ့ၤ လၢပှၤဂၤအဖီခိၣ်. (၁ ကရံၣ် ၁၃:၇) ပမ့ၢ်တူၢ်ဘၣ်လၢ ပှၤတစံးဘျုးပှၤဘၣ်န့ၣ် ပကဘၣ် သံကွၢ်လီၤပသးလၢ ‘မ့ၢ်အဝဲသ့ၣ် တဘၣ်သး စံးဘျုးပှၤဘၣ်န့ၣ် နီၢ်ကီၢ်ဧါ မ့တမ့ၢ် ခီဖျိလၢ အဝဲသ့ၣ် သးပ့ၤနီၣ်ဝဲ အဃိဧါ.’ ဒီးအဝဲသ့ၣ် တစံးဘျုးပှၤဘၣ်န့ၣ် ဘၣ်သ့ၣ်သ့ၣ် တၢ်ဂ့ၢ်ကအိၣ်တမံၤမံၤ. ပှၤတနီၤန့ၣ် အဘၣ်သး စံးဘျုးက့ၤတၢ် နီၢ်ကီၢ် ဘၣ်ဆၣ် အတဲဝဲတထီၣ်ဘၣ်. လၢညါန့ၣ် အမၤစၢၤဘၣ် ပှၤအါမး ဒီးခဲအံၤ ပှၤဘၣ်မၤစၢၤက့ၤအီၤအဃိ ဘၣ်သ့ၣ်သ့ၣ် အကမဲာ်ဆှး. အဃိ ပမ့ၢ်အဲၣ် ပဒီပုၢ်ဝဲၢ်မုၣ်ခွါ နီၢ်ကီၢ်န့ၣ် ပကထံၣ်အဝဲသ့ၣ်လၢ အဂ့ၤတခီ ဒီးပကဆဲး မၤစၢၤအဝဲသ့ၣ် လၢတၢ်သးခုအပူၤ.—အ့း ၄:၂.

၁၉-၂၀. ဖဲပမၤစၢၤပှၤဂၤအခါ ပမ့ၢ်ပာ်ဖျါထီၣ် တၢ်ဝံသးစူၤန့ၣ် ကကဲဘျုးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၉ အိၣ်ဒီးတၢ်ဝံသးစူၤ. ဘၣ်ဃးဒီး တၢ်သးအိၣ်ဟ့ၣ်တၢ်န့ၣ် ပှၤကူၣ်ဘၣ်ကူၣ်သ့ စီၤပၤၡလိၤမိၤ တဲဝဲလၢ “ကွံာ်လီၤနတၢ်အီၣ်လၢ ထံကျါတက့ၢ်. လၢခံတဘျုးသီ ဝံၤအလီၢ်ခံ နကထံၣ်ကဒီးအီၤလီၤ.” (စံၣ် ၁၁:၁) တၢ်ကတိၤလၢအမ့ၢ် “လၢခံတဘျုးသီ ဝံၤအလီၢ်ခံ” န့ၣ်အဲၣ်ဒိးတဲစ့ၢ်ကီးဝဲ တဘျီတခီၣ် ပှၤတနီၤန့ၣ် တၢ်ဆၢကတီၢ် လဲၤပူၤကွံာ် ဖးယံာ်မး အဝဲသ့ၣ် ပာ်ဖျါထီၣ်က့ၤ တၢ်စံးဘျုးလၢ ပှၤဂၤအဖီခိၣ်. ဘၣ်ဃးဒီး တၢ်ဂ့ၢ်အံၤန့ၣ် ပကကွၢ် ဒီပုၢ်ဝဲၢ်မုၣ်တဂၤ အတၢ်လဲၤခီဖျိ.

^၂၀ လၢအပူၤကွံာ် တဘျုးနံၣ်န့ၣ် ကဝီၤအပှၤကွၢ်တၢ်အမါ ကွဲးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်လၢ အဘျၢထံဝံၤသီသီတဂၤ. ဒီးလၢလံာ်ပရၢအပူၤန့ၣ် အကွဲးဝဲလၢ ပကဘၣ်ဆဲးတီဒီး ယဟိဝၤယွၤန့ၣ် အရ့ဒိၣ်ဒိၣ်မး. ဒီးကအိၣ်ဃိးနံၣ် ဝံၤအလီၢ်ခံ ဒီပုၢ်ဝဲၢ်မုၣ်န့ၣ် ကွဲးန့ၢ်က့ၤ ကဝီၤအပှၤကွၢ်တၢ်အမါ လံာ်ပရၢ ဒီးတဲဝဲလၢ “လၢအပူၤကွံာ် တဘျုးနံၣ်န့ၣ် ယဘၣ်သး တဲပၠးနၤလၢ နမၤစၢၤယၤအါမး ဒီးဘၣ်သ့ၣ်သ့ၣ် နတသ့ၣ်ညါဘၣ်.” ဒီးအဆဲးတဲဝဲလၢ “နလံာ်ပရၢန့ၣ် ဟ့ၣ်ဂံၢ်ဟ့ၣ်ဘါယၤဒိၣ်မး. လံာ်စီဆှံအဆၢလၢ နဟ့ၣ်ယၤန့ၣ် ယတသးပ့ၤနီၣ်ဘၣ်.”a ဒီပုၢ်ဝဲၢ်မုၣ် ၡဲပၠးဝဲလၢ အထံၣ်ဘၣ် တၢ်ကီတၢ်ခဲ တဘျုးနံၣ်ညါ ဒီးအတဲဝဲလၢ “တဘျီတခီၣ်န့ၣ် ယတဘၣ်သးကဲ ယဟိဝၤပှၤအုၣ်အသးလၢၤဘၣ် ဒီးယတဘၣ်သး မၤတၢ်နီတမံၤလၢၤဘၣ်. ဘၣ်ဆၣ် လံာ်စီဆှံအဆၢလၢ နကွဲးန့ၢ်ယၤန့ၣ် မၤစၢၤယၤလၢ ယကဆဲးအိၣ်ဒီး တၢ်သးတီ.” တကးဒံးဘၣ် အဆဲးတဲဝဲလၢ “လၢဃိးနံၣ်အတီၢ်ပူၤ တၢ်လၢအမၤစၢၤယၤန့ၣ် အိၣ်ထဲ နလံာ်ပရၢ ဒီးလံာ်စီဆှံ အဆၢလၢ နကွဲးန့ၢ်ယၤ. တၢ်အဂၤ တအိၣ်နီမံၤဘၣ်.” အဃိ ထံၣ်တမှံကွၢ်လၢ ဖဲကဝီၤအပှၤကွၢ်တၢ်အမါ ဒိးန့ၢ်ဘၣ် ဒီပုၢ်ဝဲၢ်မုၣ်တဂၤန့ၣ် အလံာ်ပရၢ “လၢခံတဘျုးသီ ဝံၤအလီၢ်ခံ” အကသးခုထဲလဲၣ်. ဘၣ်သ့ၣ်သ့ၣ် ပဝဲစ့ၢ်ကီး ပမၤစၢၤပှၤဂၤ ပူၤကွံာ် ဖးယံာ်မး အဝဲသ့ၣ် ကစံးဘျုးက့ၤပှၤ လၢကျဲဒ်အံၤ.

၂၁. ဘၣ်မနုၤအဃိ ပကဘၣ် ပာ်လီၤသးလၢ ပကဆဲးကွၢ်လိ ယဟိဝၤယွၤလဲၣ်.

^၂၁ ဖဲယဟိဝၤယွၤ တ့လီၤပှၤအခါ အတ့လီၤပှၤဃုာ်ဒီး တၢ်တူၢ်ဘၣ် တခါလၢ ပမ့ၢ်ဟ့ၣ်တၢ်န့ၣ် ပကန့ၢ်ဘၣ် တၢ်သးခုအါန့ၢ်ဒံး ပဒိးန့ၢ်ဘၣ်တၢ်လၢ ပှၤဂၤအအိၣ်ဒံး. ဖဲပမၤစၢၤ ဒီပုၢ်ဝဲၢ်မုၣ်ခွါအခါ ပသးခုဒိၣ်မး. ဒီးဖဲအဝဲသ့ၣ် စံးဘျုးပှၤအခါ ပသးခုစ့ၢ်ကီး. ဘၣ်ဆၣ် ပှၤစံးဘျုးပှၤမ့ၢ်ဂ့ၤ တစံးဘျုးပှၤဘၣ်မ့ၢ်ဂ့ၤ ခီဖျိလၢ ပမၤတၢ်လၢအဘၣ်အဃိ ပသးခု. တကးဒံးဘၣ် ဖဲပဟ့ၣ်တၢ် တမံၤဂ့ၤ တမံၤဂ့ၤအခါ ပကဘၣ် နီၣ်ဘၣ်လၢ ‘ယဟိဝၤယွၤ ဟ့ၣ်ပှၤသ့ အါန့ၢ်အန့ၣ် စၢၢ်တလၢၢ်.’ (၂ ကွဲး ၂၅:၉) အဃိ ပဟ့ၣ်တၢ် တအါထဲသိးဒီး ယဟိဝၤယွၤ နီတဘျီဘၣ်. ဒီးဖဲယဟိဝၤယွၤ ဟ့ၣ်ပှၤတၢ်ဟ့ၣ်အခါ အကဲတၢ်ဟ့ၣ်လၢ အမၤသးခုပသး ဒိၣ်ကတၢၢ်. အဃိ ခဲအံၤန့ၣ် ပကဘၣ် ပာ်လီၤသးလၢ ပကဆဲးကွၢ်လိ ပပါယဟိဝၤယွၤ လၢအကဲ ပှၤလၢ အသးအိၣ်ဟ့ၣ်တၢ်.