တၢ်မၤလိ ၄၂
တၢ်သးဝံၣ် ၁၀၃ ပှၤကွၢ်သိ—ပှၤပိာ်ခွါလၢအမ့ၢ်တၢ်ဟ့ၣ်တဖၣ်
ပာ်ဖျါထီၣ် တၢ်စံးဘျုးလၢ ပိာ်ခွါလၢ ယဟိဝၤယွၤ ဒီးယ့ၣ်ၡူးသူဝဲ “ဒ်တၢ်ဟ့ၣ်တဖၣ် အသိး”
“ဖဲအဝဲက့ၤထီၣ်လၢ တၢ်လီၢ်လၢအထီၣ်ထီအခါန့ၣ် အ . . . ဟ့ၣ်လီၤ ပိာ်ခွါတဖၣ်အံၤ ဒ်တၢ်ဟ့ၣ်တဖၣ် အသိး.”—အ့း ၄:၈.
တၢ်ဂ့ၢ်မိၢ်ပှၢ်
တၢ်အိၣ်ဖှိၣ်အပှၤမၤစၢၤတၢ်, တၢ်အိၣ်ဖှိၣ်သးပှၢ် ဒီးကဝီၤအပှၤကွၢ်တၢ်တဖၣ်န့ၣ် မၤစၢၤပှၤအါမးအဃိ ပပာ်ဖျါထီၣ် တၢ်စံးဘျုးစံးဖှိၣ် အဝဲသ့ၣ် ကသ့ဒ်လဲၣ်.
၁. တၢ်ဟ့ၣ်လၢ ပဒိးန့ၢ်ဘၣ်လၢ ယ့ၣ်ၡူးအအိၣ်န့ၣ် မ့ၢ်မနုၤလဲၣ်.
ပှၤဟီၣ်ခိၣ်ဖိလၢ အမၤစၢၤတၢ် အါထဲသိးဒီး ယ့ၣ်ၡူးန့ၣ် တအိၣ်နီတဂၤဘၣ်. ဖဲယ့ၣ်ၡူး အိၣ်လၢ ဟီၣ်ခိၣ်ချၢအခါ အသူဝဲ အစိကမီၤလၢ အကမၤစၢၤပှၤဂၤ. (လူၤ ၉:၁၂-၁၇) တၢ်ဟ့ၣ် အဂ့ၤကတၢၢ်တခါလၢ ယ့ၣ်ၡူးဟ့ၣ်ပှၤန့ၣ် မ့ၢ်ဝဲအဟ့ၣ်လီၤကွံာ် အသးသမူလၢပဂီၢ်. (ယိၤ ၁၅:၁၃) ဒီးဖဲအဂဲၤဆၢထၢၣ် သမူထီၣ်က့ၤ ဝံၤအလီၢ်ခံစ့ၢ်ကီး အဆဲးမၤစၢၤပှၤဒံး. ဒ်ယ့ၣ်ၡူး အၢၣ်လီၤပာ်စၢၤဝဲအသိး အဝဲဃ့ ယဟိဝၤယွၤ လၢကဟ့ၣ်လီၤ အသးစီဆှံ လၢကသိၣ်လိပှၤ ဒီးကမၤမုာ်ထီၣ်ပသး. (ယိၤ ၁၄:၁၆, ၁၇, တၢ်ဂ့ၢ်အဘျဲၣ်; ၁၆:၁၃) ယ့ၣ်ၡူးမၤစၢၤပှၤ ခီဖျိတၢ်အိၣ်ဖှိၣ် အတၢ်ရဲၣ်တၢ်ကျဲၤ တကးဒံးဘၣ် ဒ်သိး ပသိၣ်လိပှၤဂၤ ဒီးဒုးကဲထီၣ် အဝဲသ့ၣ်လၢ ခရံာ်အပျဲၢ်အဘီၣ် ကသ့အဂီၢ် ယ့ၣ်ၡူး ဟ့ၣ်လီၤပှၤ တၢ်ပီးတၢ်လီလၢ ပလိၣ်ဘၣ်တဖၣ်.—မး ၂၈:၁၈-၂၀.
၂. ဒ် အ့းဖ့းစူး ၄:၇, ၈ ပာ်ဖျါထီၣ်ဝဲအသိး တၢ်ဟ့ၣ်လၢအမ့ၢ် “ပိာ်ခွါတဖၣ်အံၤ” န့ၣ် ပၣ်ဃုာ်ဒီး မတၤတဖၣ်လဲၣ်.
၂ ယ့ၣ်ၡူး ဟ့ၣ်ပှၤတၢ်ဟ့ၣ်လၢ အဂၤတမံၤဒံး. တၢ်မၢဖိပီလူး ကွဲးဝဲလၢ ဖဲယ့ၣ်ၡူး က့ၤထီၣ်လၢ မူခိၣ်ဝံၤအလီၢ်ခံ အဝဲ “ဟ့ၣ်လီၤ ပိာ်ခွါတဖၣ်အံၤ ဒ်တၢ်ဟ့ၣ်တဖၣ် အသိး.” (ဖး အ့းဖ့းစူး ၄:၇, ၈.) အဃိ စီၤပီလူး ၡဲပၠးဝဲလၢ ယ့ၣ်ၡူးဟ့ၣ်လီၤပှၤ ပိာ်ခွါတဖၣ်အံၤ ဒ်သိး အဝဲသ့ၣ် ကမၤစၢၤပှၤ လၢကျဲအါဘိ. (အ့း ၁:၂၂, ၂၃; ၄:၁၁-၁၃) ဆၢကတီၢ်ခဲအံၤ လၢ “ပိာ်ခွါတဖၣ်အံၤ” အကျါန့ၣ် ပၣ်ဃုာ်ဒီး တၢ်အိၣ်ဖှိၣ်အပှၤမၤစၢၤတၢ်, တၢ်အိၣ်ဖှိၣ်သးပှၢ် ဒီးကဝီၤအပှၤကွၢ်တၢ်တဖၣ်.a ဘၣ်ဆၣ် ပိာ်ခွါတဖၣ်အံၤန့ၣ် တကဲပှၤလၢပှၤပှဲၤဘၣ်အဃိ အဝဲသ့ၣ် မၤကမၣ်တၢ်သ့. (ယၤ ၃:၂) သနာ်က့ ပိာ်ခွါလၢ အလုၢ်ဒိၣ်ပှ့ၤဒိၣ်တဖၣ်အံၤ ပကစၢ်ယ့ၣ်ၡူးခရံာ် သူအဝဲသ့ၣ်လၢ ကမၤစၢၤပှၤအဂီၢ်.
၃. ပဝဲကိးဂၤဒဲးန့ၣ် ပဆီၣ်ထွဲ တၢ်ဟ့ၣ်လၢအမ့ၢ် “ပိာ်ခွါတဖၣ်အံၤ” ကသ့ဒ်လဲၣ်. တဲဖျါထီၣ် တၢ်အဒိ.
၃ ယ့ၣ်ၡူးဟ့ၣ်လီၤဝဲ မူဒါလၢ “ပိာ်ခွါတဖၣ်အံၤ” အအိၣ် ဒ်သိး အဝဲသ့ၣ် ကမၤဂၢၢ်ကျၢၤထီၣ် တၢ်အိၣ်ဖှိၣ်. (အ့း ၄:၁၂) ဖဲအဝဲသ့ၣ် မၤဝဲမူဒါလၢ အရ့ဒိၣ်အခါ ပဝဲကိးဂၤဒဲးန့ၣ် ပဆီၣ်ထွဲမၤစၢၤ အဝဲသ့ၣ်သ့. အဒိ ပှၤတနီၤန့ၣ် ကပၣ်ဃုာ်လၢ တၢ်သူၣ်ထီၣ်ဘှီထီၣ် ဘီမုၢ်ဘျီၣ်ဒိၣ်, ဒီးအဂၤတနီၤ မၤစၢၤတၢ် ခီဖျိ ကတဲာ်ကတီၤဝဲ တၢ်အီၣ်တၢ်အီ, တၢ်ဆှၢထီၣ်ဆှၢလီၤတၢ် ဒီးမၤစၢၤတၢ်လၢ ကျဲအဂၤတဖၣ်. ပဝဲစ့ၢ်ကီး ပဆီၣ်ထွဲ တၢ်အိၣ်ဖှိၣ်အပှၤမၤစၢၤတၢ်, တၢ်အိၣ်ဖှိၣ်သးပှၢ် ဒီးကဝီၤအပှၤကွၢ်တၢ်တဖၣ် သ့ခီဖျိ ပတၢ်ဖံးတၢ်မၤ ဒီးပတၢ်စံးတၢ်ကတိၤ. ပကတဲသကိး ဘၣ်ဃးဒီး တၢ်လၢအဝဲသ့ၣ် မၤဝဲတဖၣ်န့ၣ် ပဒိးန့ၢ်ဘၣ်အဘျုးဒ်လဲၣ်. ဒီးခီဖျိလၢ ယ့ၣ်ၡူး ဟ့ၣ်ပှၤတၢ်ဟ့ၣ် လၢအမ့ၢ် “ပိာ်ခွါတဖၣ်အံၤ” အဃိ ပပာ်ဖျါထီၣ်လၢ ပစံးဘျုး အဝဲသ့ၣ် ကသ့ဒ်လဲၣ်.
တၢ်အိၣ်ဖှိၣ်အပှၤမၤစၢၤတၢ်န့ၣ် ကဲဝဲ “ပှၤလၢ အမၤစၢၤပှၤဂၤ”
၄. ဖဲတၢ်မၢဖိအစိၤ တၢ်အိၣ်ဖှိၣ်အပှၤမၤစၢၤတၢ် လၢအကဲဝဲ “ပှၤလၢ အမၤစၢၤပှၤဂၤ” န့ၣ် အဝဲသ့ၣ် မၤစၢၤတၢ်ဒ်လဲၣ်.
၄ ဖဲတၢ်မၢဖိအစိၤ ဒီပုၢ်ဝဲၢ်ခွါတနီၤန့ၣ် ပှၤဃုထၢထီၣ်အဝဲသ့ၣ်လၢ ကကဲထီၣ်ဝဲ တၢ်အိၣ်ဖှိၣ်အပှၤမၤစၢၤတၢ်. (၁ တံၤ ၃:၈) တၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ် စီၤပီလူး ပာ်ဖျါထီၣ်ဝဲလၢ အကဲဝဲ “ပှၤလၢ အမၤစၢၤပှၤဂၤ.” (၁ ကရံၣ် ၁၂:၂၈) တၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ် အဝဲသ့ၣ် မၤစၢၤတၢ်အါမး. အဃိ အညီထီၣ်လၢ တၢ်အိၣ်ဖှိၣ်သးပှၢ်တဖၣ် ကသးစၢၢ်ဆၢ တၢ်လၢအဝဲသ့ၣ် ကဘၣ်သိၣ်လိဝဲ ဒီးကလဲၤအိၣ်သကိးဝဲ တၢ်အိၣ်ဖှိၣ်ဖိတဖၣ်အဂီၢ်. အဒိ ဖဲတၢ်မၢဖိအစိၤန့ၣ် တၢ်အိၣ်ဖှိၣ်အပှၤမၤစၢၤတၢ်တဖၣ် မၤစၢၤတၢ်လၢ ကကွဲးကူဝဲ လံာ်စီဆှံအဆၢတဖၣ် ဒီးဘၣ်လဲၤပှ့ၤဝဲ တၢ်ပီးတၢ်လီလၢ ကကွဲးကူ လံာ်စီဆှံအဂီၢ်.
၅. ဆၢကတီၢ်ခဲအံၤ တၢ်အိၣ်ဖှိၣ်အပှၤမၤစၢၤတၢ်တဖၣ် ဘၣ်မၤမူဒါမနုၤလဲၣ်.
၅ ပကတဲသကိး ဘၣ်ဃးဒီး တၢ်အိၣ်ဖှိၣ်အပှၤမၤစၢၤတၢ် အမူဒါတနီၤလၢ တၢ်အိၣ်ဖှိၣ်ပူၤ. (၁ ပ့း ၄:၁၀) ဘၣ်သ့ၣ်သ့ၣ် အဝဲသ့ၣ် ကန့ၢ်ဘၣ်မူဒါလၢ ကကွၢ်ထွဲ စ့စရီ မ့တမ့ၢ် ကွၢ်ထွဲ တၢ်စံၣ်တဲၤတဲလီၤတၢ် အဟီၣ်ကဝီၤ, မၤလိာ်လံာ်လဲၢ်တဖၣ် လၢတၢ်အိၣ်ဖှိၣ်ဖိအဂီၢ်, ဖီၣ်စဲးလၢ တၢ်ကလုၢ် ဒီးတၢ်ဂီၤမူအဂီၢ်, တူၢ်လိာ်ပှၤတမှံၤ ဒီးကွၢ်ထွဲ ဘီမုၢ်ဘျီၣ်ဒိၣ်. (၁ ကရံၣ် ၁၄:၄၀) တကးဒံးဘၣ် အဝဲသ့ၣ် ဘၣ်မၤမူဒါလၢ ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိအဂီၢ် ဒီးဟ့ၣ်တၢ်စံၣ်တဲၤတဲလီၤတၢ်. ဒီးအဝဲသ့ၣ် ဘၣ်တီခိၣ်ရိၤမဲတၢ်လၢ တၢ်စံၣ်တဲၤတဲလီၤတၢ် အဂီၢ်စ့ၢ်ကီး. တဘျီတခီၣ်န့ၣ် အဝဲသ့ၣ် ဘၣ်လဲၤပိာ် တၢ်အိၣ်ဖှိၣ်သးပှၢ်တဖၣ်အခံလၢ ကလဲၤဟးအိၣ်သကိး တၢ်အိၣ်ဖှိၣ်ဖိ.
၆. ဘၣ်မနုၤအဃိ ပဘၣ်စံးဘျုး တၢ်အိၣ်ဖှိၣ်အပှၤမၤစၢၤတၢ်တဖၣ်လဲၣ်.
၆ တၢ်အိၣ်ဖှိၣ်အပှၤမၤစၢၤတၢ်တဖၣ် မၤတၢ်ဆူၣ်ဆူၣ် လၢတၢ်အိၣ်ဖှိၣ်အဂီၢ်အဃိ ဒီပုၢ်ဝဲၢ်တနီၤ တဲဝဲဒ်လဲၣ်. ဒီပုၢ်ဝဲၢ်မုၣ်ဘဲဘလံၤb လၢအအိၣ်လၢ ကီၢ်ဘိၣ်လ့ဘံယါန့ၣ် တဲဝဲလၢ “ယထီၣ်ဘၣ် တၢ်အိၣ်ဖှိၣ် ဂ့ၤဂ့ၤအဃိ ယစံးဘျုးဘၣ် တၢ်အိၣ်ဖှိၣ်အပှၤမၤစၢၤတၢ်ဒိၣ်မး.” ဒီးအဆဲးတဲဝဲလၢ “တၢ်အိၣ်ဖှိၣ်အပှၤမၤစၢၤတၢ်တဖၣ် မၤတၢ်ဆူၣ်ဆူၣ်အဃိ ဖဲတၢ်အိၣ်ဖှိၣ် အဆၢကတီၢ်န့ၣ် ယသးဝံၣ်ဘၣ်တၢ်, ဟ့ၣ်ထီၣ်ဘၣ်တၢ်စံးဆၢ, နၢ်ဟူဘၣ် တၢ်စံၣ်တဲၤတဲလီၤတၢ်, ထံၣ်ဘၣ်တၢ်ဂီၤ ဒီးကွၢ်ဘၣ်တၢ်ဂီၤမူ. ဒီးဒ်သိး ပကထီၣ်ဘၣ် တၢ်အိၣ်ဖှိၣ် ပူၤပူၤဖျဲးဖျဲးအဂီၢ် တၢ်အိၣ်ဖှိၣ်အပှၤမၤစၢၤတၢ်တဖၣ် အိၣ်ခိးတၢ်လၢတၢ်ချၢ. ဒီးဖဲတၢ်အိၣ်ဖှိၣ်ဝံၤန့ၣ် အဝဲသ့ၣ် ရဲၣ်ကျဲၤတၢ်လၢ တၢ်မၤကဆှဲကဆှီတၢ်, ဒွးတိၢ်မၤဘူၣ် ဒီးကွၢ်ထွဲဝဲ လံာ်လဲၢ်လၢပလိၣ်ဘၣ်တဖၣ်. အဃိ ယစံးဘျုးဘၣ် အဝဲသ့ၣ်ဒိၣ်မး.” ဒီပုၢ်ဝဲၢ်မုၣ်လဲၣ်စလံၤ လၢအအိၣ်လၢ ခိၤလါဘံၤယၤ ဒီးအဝၤကဲ တၢ်အိၣ်ဖှိၣ်သးပှၢ်န့ၣ် အတဲဝဲလၢ “ယဝၤန့ၣ် အလိၣ်ဘၣ် တၢ်အိၣ်ဖှိၣ်အပှၤမၤစၢၤတၢ်တဖၣ် အတၢ်မၤစၢၤ. မ့တမ့ၢ် လၢအဝဲသ့ၣ် အတၢ်မၤစၢၤဘၣ်န့ၣ် ယဝၤကဘၣ်မၤ အမူဒါဒီဒူၣ်. အဃိ ယစံးဘျုးဘၣ် တၢ်အိၣ်ဖှိၣ်အပှၤမၤစၢၤတၢ် လၢအဝဲသ့ၣ် သးဆူၣ်လၢ ကမၤစၢၤတၢ်.” ပဝဲစ့ၢ်ကီး ပစံးဘျုးဘၣ် တၢ်အိၣ်ဖှိၣ်အပှၤမၤစၢၤတၢ်တဖၣ် ခီဖျိလၢ အဝဲသ့ၣ် မၤတၢ်ဆူၣ်ဆူၣ်အဃိ.—၁ တံၤ ၃:၁၃.
၇. ပပာ်ဖျါထီၣ်လၢ ပစံးဘျုးစံးဖှိၣ် တၢ်အိၣ်ဖှိၣ်အပှၤမၤစၢၤတၢ်တဖၣ် သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၇ ပဆိကမိၣ်လၢ ပစံးဘျုး တၢ်အိၣ်ဖှိၣ်အပှၤမၤစၢၤတၢ်တဖၣ်လံ ဘၣ်ဆၣ် လံာ်စီဆှံ ဟ့ၣ်ဂံၢ်ဟ့ၣ်ဘါဒံးပှၤလၢ ပကဘၣ် “ပာ်ဖျါထီၣ် တၢ်စံးဘျုးစံးဖှိၣ်” အဝဲသ့ၣ်ဒံး. (ကလီး ၃:၁၅) တၢ်အိၣ်ဖှိၣ်သးပှၢ် လၢအမံၤမ့ၢ် ခြံၣ်စတီး လၢအအိၣ်လၢ ကီၢ်ဖ့လဲန့ၣ် အပာ်ဖျါထီၣ် တၢ်စံးဘျုး ဒီးအတဲဝဲဒ်အံၤ. “ယဆှၢန့ၢ် တၢ်အိၣ်ဖှိၣ်အပှၤမၤစၢၤတၢ် လၢလံာ်စီဆှံအဆၢ လၢခးက့ပူၤ မ့တမ့ၢ် ယကွဲးလၢမဲးစ့း. ဒီးယတဲအီၤလၢ တၢ်လၢအတဲဝဲ မ့တမ့ၢ် တၢ်လၢအမၤဝဲန့ၣ် ကဲထီၣ်တၢ်ဂံၢ်တၢ်ဘါ လၢယဂီၢ်အဃိ ယစံးဘျုးအီၤဒိၣ်မး.” ဒီပုၢ်ဝဲၢ်ခွါဖးစကဲ ဒီးအမါကၠ့ၤအဲ လၢအအိၣ်လၢ ကီၢ်နၠူခဲၣ်လဒိနံယါန့ၣ် အဝဲသ့ၣ် ဃ့ထုကဖၣ်န့ၢ်တၢ်လၢ တၢ်အိၣ်ဖှိၣ်အပှၤမၤစၢၤတၢ် အဂီၢ်ထီဘိ. ဒီပုၢ်ဝဲၢ်ခွါဖးစကဲ တဲဝဲလၢ “ပဃ့ထုကဖၣ်န့ၢ်တၢ်လၢ တၢ်အိၣ်ဖှိၣ်အပှၤမၤစၢၤတၢ်အဂီၢ် ဆူၣ်ဆူၣ်, ပစံးဘျုး ယဟိဝၤယွၤလၢ အသူအဝဲသ့ၣ် ဒီးဃ့လၢ ယဟိဝၤယွၤ ကအိၣ်ဒီးအဝဲသ့ၣ် ဒီးမၤစၢၤအဝဲသ့ၣ်.” ယဟိဝၤယွၤ ဒိကနၣ်ဝဲ တၢ်ထုကဖၣ်ဒ်န့ၣ်အဃိ တၢ်အိၣ်ဖှိၣ်ဖိခဲလၢာ် ဒိးန့ၢ်ဘၣ်အဘျုး.—၂ ကရံၣ် ၁:၁၁.
တၢ်အိၣ်ဖှိၣ်သးပှၢ်တဖၣ် “မၤတၢ်ဆူၣ်ဆူၣ်” လၢပဂီၢ်
၈. ဘၣ်မနုၤအဃိ စီၤပီလူးတဲဝဲလၢ တၢ်အိၣ်ဖှိၣ်သးပှၢ်ဖဲအစိၤန့ၣ် “မၤတၢ်ဆူၣ်ဆူၣ်” လဲၣ်. (၁ သ့းစၤလနံ ၅:၁၂, ၁၃)
၈ တၢ်အိၣ်ဖှိၣ်သးပှၢ်တဖၣ် လၢတၢ်မၢဖိအစိၤန့ၣ် အဝဲသ့ၣ် မၤတၢ်ဆူၣ်ဆူၣ်လၢ တၢ်အိၣ်ဖှိၣ်ဖိအဂီၢ်. (ဖး ၁ သ့းစၤလနံ ၅:၁၂, ၁၃; ၁ တံၤ ၅:၁၇) အဝဲသ့ၣ် “တီခိၣ်ရိၤမဲတၢ်” လၢတၢ်အိၣ်ဖှိၣ်ပူၤ ဒ်သိးဒီး မၤဝဲမူဒါလၢ တၢ်အိၣ်ဖှိၣ်ရိဖှိၣ်အဂီၢ် ဒီးဆၢတဲာ်တၢ်လၢ တၢ်အိၣ်ဖှိၣ်အဂီၢ်. ဒီးအဝဲသ့ၣ် “ဟ့ၣ်ကူၣ်ဟ့ၣ်ဖး” ဒီပုၢ်ဝဲၢ်မုၣ်ခွါတဖၣ် လၢတၢ်အဲၣ်တၢ်ကွံ ဒ်သိး ဒီပုၢ်ဝဲၢ်မုၣ်ခွါတဖၣ် အတၢ်နာ် ကဂၢၢ်ကျၢၤထီၣ်အဂီၢ်. (၁ သ့း ၂:၁၁, ၁၂; ၂ တံၤ ၄:၂) တကးဒံးဘၣ် တၢ်အိၣ်ဖှိၣ်သးပှၢ်တဖၣ် ဘၣ်မၤတၢ်ဆူၣ်ဆူၣ် လၢကကွၢ်ထွဲ အဟံၣ်ဖိဃီဖိ. ဒီးအဝဲသ့ၣ် ကဘၣ်မၤဂၢၢ်ကျၢၤထီၣ်စ့ၢ်ကီး အတၢ်နာ် ဒီးအတၢ်ရ့လိာ်သးဒီး ယဟိဝၤယွၤ.—၁ တံၤ ၃:၂, ၄; တံ ၁:၆-၉.
၉. တၢ်အိၣ်ဖှိၣ်သးပှၢ်တဖၣ်န့ၣ် အဝဲသ့ၣ် ဘၣ်မၤဝဲမူဒါ မနုၤလဲၣ်.
၉ ခဲအံၤစ့ၢ်ကီး တၢ်အိၣ်ဖှိၣ်သးပှၢ်တဖၣ် ဘၣ်မၤတၢ်အါမး. ဒီးအဝဲသ့ၣ်မၤစ့ၢ်ကီး ပှၤစံၣ်တဲၤတဲလီၤ တၢ်သးခုကစီၣ်ဖိ အတၢ်မၤ. (၂ တံၤ ၄:၅) အဝဲသ့ၣ် ပာ်လီၤဒိဂ့ၤတဲာ်ဘၣ် ခီဖျိ အစံၣ်တဲၤတဲလီၤတၢ်လၢတၢ်သးဆူၣ်, ရဲၣ်ကျဲၤဝဲ လီၢ်ကဝီၤ တၢ်စံၣ်တဲၤတဲလီၤတၢ်မၤ ဒီးအဝဲသ့ၣ် သိၣ်လိ တၢ်အိၣ်ဖှိၣ်ဖိတဖၣ် ဒ်သိးအဝဲသ့ၣ် စံၣ်တဲၤတဲလီၤတၢ် ကသ့ဂ့ၤဂ့ၤ. ဒီးအဝဲသ့ၣ် လီၤဂာ်ဒ်သိးဒီး စံၣ်ညီၣ်ကွီၢ် လၢ အတကွၢ်မဲာ်တၢ်ဘၣ်, အအိၣ်ဒီး တၢ်သးကညီၤ ဒီးမၤတၢ်တီတီလိၤလိၤ. ဖဲခရံာ်ဖိတဂၤ မၤဘၣ်တၢ်ကမၣ်ဖးဒိၣ်အခါ တၢ်အိၣ်ဖှိၣ်သးပှၢ် မၤစၢၤအီၤဒ်သိး အတၢ်ရ့လိာ်သးဒီး ယဟိဝၤယွၤ ကဂ့ၤထီၣ်က့ၤအဂီၢ်. တကးဒံးဘၣ် အဝဲသ့ၣ်ဂုာ်ကျဲးစၢး မၤတၢ်ဆူၣ်ဆူၣ် ဒ်သိးတၢ်အိၣ်ဖှိၣ် ကကဆှီအဂီၢ်. (၁ ကရံၣ် ၅:၁၂, ၁၃; ကလၤ ၆:၁) တၢ်အိၣ်ဖှိၣ်သးပှၢ်တဖၣ်န့ၣ် အဝဲသ့ၣ် လီၤဂာ်ဒ် ပှၤကွၢ်သိ. (၁ ပ့း ၅:၁-၃) ဒီးအဝဲသ့ၣ် ဟ့ၣ်တၢ်စံၣ်တဲၤတဲလီၤတၢ်လၢ အဒိးသန့ၤထီၣ်အသးလၢ လံာ်စီဆှံ, ဂုာ်ကျဲးစၢးရ့ဒီး ဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်ပူၤ ဒီးလဲၤအိၣ်သကိး တၢ်အိၣ်ဖှိၣ်ဖိ တဂၤစုာ်စုာ်. တၢ်အိၣ်ဖှိၣ်သးပှၢ် တနီၤန့ၣ် မၤစၢၤတၢ်လၢ တၢ်သူၣ်ထီၣ်ဘှီထီၣ် ဘီမုၢ်ဘျီၣ်ဒိၣ်တၢ်မၤ, ကတဲာ်ကတီၤ ဒီးပၣ်ဃုာ်လၢ တၢ်အိၣ်ဖှိၣ်ဖးဒိၣ် တၢ်ရဲၣ်တၢ်ကျဲၤ. ဒီးအဂၤတနီၤန့ၣ် မၤစၢၤတၢ်လၢ တၢ်လဲၤဟးအိၣ်သကိး ပှၤဆါ အကရူၢ် မ့တမ့ၢ် ကမံးတံာ်လၢ အဆဲးကျိးဒီး တၢ်ဆါဟံၣ်. တကးဒံးဘၣ် အဝဲသ့ၣ် ဘၣ်မၤဝဲ မူဒါလၢအဂၤစ့ၢ်ကီး. တၢ်အိၣ်ဖှိၣ်သးပှၢ်တဖၣ် မၤတၢ်လၢပဂီၢ်ဆူၣ်မး.
၁၀. ပစံးဘျုး တၢ်အိၣ်ဖှိၣ်သးပှၢ်တဖၣ် လၢတၢ်ဂ့ၢ်မနုၤတဖၣ်လဲၣ်.
၁၀ ယဟိဝၤယွၤ တဲဆိပာ်စၢၤဝဲလၢ တၢ်အိၣ်ဖှိၣ်သးပှၢ် လၢအလီၤဂာ်ဒီး ပှၤကွၢ်သိတဖၣ်န့ၣ် ကကွၢ်ထွဲပှၤ ဂ့ၤဂ့ၤအဃိ ပ “တဘၣ်ယိၣ်တၢ် ဒီးပျံၤတၢ်ဖုးတၢ်လၢၤဘၣ်.” (ယံး ၂၃:၄) အဒိ ဒီပုၢ်ဝဲၢ်မုၣ်ကၠိၤအဲနၤ လၢအအိၣ်လၢ ကီၢ်ဖ့လဲန့ၣ် တဲဝဲလၢ ဖဲအမိအိၣ်တဆူၣ်ဘၣ်အခါ အတူၢ်ဘၣ်ဝဲလၢ လံာ်စီဆှံတဆၢအံၤ တဲတၢ်ဘၣ်နီၢ်ကီၢ်. အတဲဝဲလၢ “ယကတဲဖျါထီၣ် ယတၢ်တူၢ်ဘၣ်လၢ တၢ်အိၣ်ဖှိၣ်သးပှၢ်လၢ ယတသ့ၣ်ညါအီၤ ဂ့ၤဂ့ၤဘၣ်တဂၤ အအိၣ်န့ၣ် အတညီဘၣ်. ဘၣ်ဆၣ် အဒိကနၣ်န့ၢ်ယၤဂ့ၤဂ့ၤ, ဃ့ထုကဖၣ်တၢ်ဒီးယၤ ဒီးအဒုးသ့ၣ်နီၣ်ထီၣ်ယၤလၢ ယဟိဝၤယွၤအဲၣ်ယၤ. ဒီးတၢ်အိၣ်ဖှိၣ်သးပှၢ်အံၤ အတဲယၤ မနုၤလဲၣ်န့ၣ် ယတနီၣ်ဘၣ်ခဲလၢာ်ဘၣ်, ဘၣ်ဆၣ် ယတဘၣ်ယိၣ်တၢ်လၢၤဘၣ်. အဃိ ယနာ်လၢ ယဟိဝၤယွၤ သူဝဲတၢ်အိၣ်ဖှိၣ်သးပှၢ်အံၤ ဒ်သိး အကမၤစၢၤယၤ ဖဲယလိၣ်ဘၣ် တၢ်မၤစၢၤအခါ.” တၢ်အိၣ်ဖှိၣ်သးပှၢ်လၢ နတၢ်အိၣ်ဖှိၣ်န့ၣ် အဝဲသ့ၣ် မၤစၢၤနၤဒ်လဲၣ်.
၁၁. ပပာ်ဖျါထီၣ် တၢ်စံးဘျုးစံးဖှိၣ် တၢ်အိၣ်ဖှိၣ်သးပှၢ်တဖၣ် သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၁ ယဟိဝၤယွၤ ဘၣ်သးလၢ ပကပာ်ဖျါထီၣ် တၢ်စံးဘျုးစံးဖှိၣ် တၢ်အိၣ်ဖှိၣ်သးပှၢ်တဖၣ် ခီဖျိလၢ “အဝဲသ့ၣ် အတၢ်မၤအဃိ.” (၁ သ့း ၅:၁၂, ၁၃) ဟဲရံၤအဲထၤ လၢအအိၣ်လၢ ကီၢ်ဖ့လဲန့ၣ် တဲဝဲလၢ “တၢ်အိၣ်ဖှိၣ်သးပှၢ်တဖၣ် သးအိၣ်မၤစၢၤပှၤဂၤဒိၣ်မး. ဘၣ်ဆၣ် အဝဲသ့ၣ် မၤဝဲဒ်န့ၣ် တမ့ၢ်ခီဖျိလၢ အတၢ်ဆၢကတီၢ် ဒီးအတၢ်ဂံၢ်တၢ်ဘါ အိၣ်အါန့ၢ်ပှၤဂၤ မ့တမ့ၢ် အဝဲသ့ၣ် တထံၣ်ဘၣ် တၢ်ကီတၢ်ခဲ နီတမံၤဘၣ်န့ၣ်ဘၣ်. တဘျီတခီၣ်န့ၣ် ယတဲအဝဲသ့ၣ်လၢ ‘နၤန့ၣ် နကဲ တၢ်အိၣ်ဖှိၣ်သးပှၢ်လၢ အဂ့ၤဒိၣ်မးတဂၤ.’” ဒီပုၢ်ဝဲၢ်မုၣ်စဲရၤ လၢအအိၣ်လၢ ထၢခံၤc န့ၣ်တဲဝဲလၢ “တၢ်အိၣ်ဖှိၣ်သးပှၢ်တဖၣ်န့ၣ် ဒ်သိး အဝဲသ့ၣ် ဆဲးမၤအတၢ်မၤကန့ၢ်အဂီၢ် အဝဲသ့ၣ်လိၣ်ဘၣ် တၢ်ဟ့ၣ်ဂံၢ်ဟ့ၣ်ဘါစ့ၢ်ကီး. အဃိ ပကွဲးန့ၢ်အဝဲသ့ၣ် လံာ်လၢခးက့, ကွဲမုာ်အဝဲသ့ၣ်လၢ ကအီၣ်သကိးတၢ်ဒီးပှၤ ဒီးလဲၤစံၣ်တဲၤတဲလီၤတၢ်ဒီး အဝဲသ့ၣ်ဒ်သိးသိးသ့.” တၢ်အိၣ်ဖှိၣ်သးပှၢ်လၢ နဘၣ်သးစံးဘျုးအီၤ လီၤလီၤဆီဆီ အိၣ်တဂၤဂၤဧါ. မ့ၢ်အိၣ်န့ၣ် ဃုကျဲလၢ နကပာ်ဖျါထီၣ် တၢ်စံးဘျုးစံးဖှိၣ်အီၤ.—၁ ကရံၣ် ၁၆:၁၈.
ဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်သးပှၢ်ဒ်သိး အဝဲသ့ၣ် ဆဲးမၤအမူဒါကန့ၢ်အဂီၢ် (ကွၢ်လံာ်အဆၢ ၇, ၁၁, ၁၅)
ကဝီၤအပှၤကွၢ်တၢ်တဖၣ် မၤဂၢၢ်ကျၢၤထီၣ် တၢ်အိၣ်ဖှိၣ်
၁၂. ဖဲတၢ်မၢဖိအစိၤန့ၣ် ဒ်သိး ယ့ၣ်ၡူးကမၤဂၢၢ်ကျၢၤထီၣ် တၢ်အိၣ်ဖှိၣ်အဂီၢ် အရဲၣ်ကျဲၤဝဲဒ်လဲၣ်. (၁ သ့းစၤလနံ ၂:၇, ၈)
၁၂ ယ့ၣ်ၡူး ဟ့ၣ်လီၤပှၤ “ပိာ်ခွါတဖၣ်အံၤ ဒ်တၢ်ဟ့ၣ်တဖၣ် အသိး” လၢကမၤစၢၤ တၢ်အိၣ်ဖှိၣ်လၢ ကျဲအဂၤတဘိ. လၢညါ တၢ်အိၣ်ဖှိၣ်သးပှၢ်တဖၣ်လၢ ဝ့ၢ်ယရူၤၡလ့ၣ်န့ၣ် ယ့ၣ်ၡူး ဟံးစုနဲၣ်ကျဲ အဝဲသ့ၣ် လၢကဆှၢလီၤဝဲ စီၤပီလူး, စီၤဘၢ်နါဘၤ ဒီးပှၤအဂၤတဖၣ် ဒ်သိး ကမၤဝဲ ပှၤလဲၤတရံးအံးက့ၤကွၢ်က့ၤတၢ် အတၢ်မၤ. (မၤတၢ် ၁၁:၂၂) ဘၣ်မနုၤအဃိ အဆှၢလီၤ ပှၤတဖၣ်အံၤလဲၣ်. အတၢ်တိာ်ပာ်န့ၣ် မ့ၢ်ဒ်သိး ကဃုထၢထီၣ်ဝဲ တၢ်အိၣ်ဖှိၣ်အပှၤမၤစၢၤတၢ် ဒီးတၢ်အိၣ်ဖှိၣ်သးပှၢ်တဖၣ်လၢ ကမၤဂၢၢ်ကျၢၤထီၣ် တၢ်အိၣ်ဖှိၣ်အဂီၢ်. (မၤတၢ် ၁၅:၄၀, ၄၁) ဒ်သိး ပိာ်ခွါတဖၣ်အံၤ ကမၤလၢပှဲၤ အမူဒါအဂီၢ် အဝဲသ့ၣ် ကဘၣ်တူၢ်ဆါအသးသပှၢ်. တကးဒံးဘၣ် ဒ်သိးအဝဲသ့ၣ် ကသိၣ်လိနဲၣ်လိတၢ် ဒီးဟ့ၣ်ဂံၢ်ဟ့ၣ်ဘါ ပှၤဂၤအဂီၢ် တဘျီတခီၣ်န့ၣ် တၢ်လီၤဘၣ်ယိၣ် အိၣ်လၢ အဝဲသ့ၣ် သးသမူအဂီၢ်.—ဖး ၁ သ့းစၤလနံ ၂:၇, ၈.
၁၃. မူဒါတနီၤလၢ ကဝီၤအပှၤကွၢ်တၢ်တဖၣ် ဘၣ်မၤဝဲန့ၣ် မ့ၢ်မနုၤလဲၣ်.
၁၃ ကဝီၤအပှၤကွၢ်တၢ်တဖၣ် ကဘၣ်ဟးအိၣ်သကိး တၢ်အိၣ်ဖှိၣ်တဖၣ်ထီဘိ. ဒီးအဝဲသ့ၣ် ကလဲၤအိၣ်သကိး တၢ်အိၣ်ဖှိၣ်အဂီၢ် အဝဲသ့ၣ် ဘၣ်လဲၤတၢ်ဖးယံၤညါ. တနွံဘၣ်တနွံန့ၣ် ကဝီၤအပှၤကွၢ်တၢ်တဂၤ ဘၣ်ဟ့ၣ်တၢ်စံၣ်တဲၤတဲလီၤတၢ် တဘျုးခါညါ, အဘၣ်ဟးအိၣ်သကိး တၢ်အိၣ်ဖှိၣ်ဖိ, အိၣ်ဖှိၣ်ဒီး ပှၤလဲၤလၢညါတဖၣ်, အိၣ်ဖှိၣ်ဒီး တၢ်အိၣ်ဖှိၣ်သးပှၢ်တဖၣ် ဒီးတီခိၣ်ရိၤမဲ တၢ်စံၣ်တဲၤတဲလီၤတၢ်မၤ. အဝဲသ့ၣ် ဘၣ်ကတဲာ်ကတီၤဝဲ တၢ်စံၣ်တဲၤတဲလီၤတဖၣ် ဒီးရဲၣ်ကျဲၤဝဲ ကဝီၤအတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်စ့ၢ်ကီး. အဝဲသ့ၣ် သိၣ်လိတၢ်လၢ ပှၤလဲၤလၢညါကၠိ, ဘၣ်မၤ တၢ်အိၣ်ဖှိၣ်လီၤဆီဒီး ပှၤလဲၤလၢညါတဖၣ် လၢအဟီၣ်ကဝီၤပူၤ. တကးဒံးဘၣ် အကဘၣ်မၤဝံၤ အမူဒါလၢအရ့ဒိၣ် ဒီးတဘျီတခီၣ် ဘၣ်မၤဝဲမူဒါလၢ ဝဲၤတြၢ်ဟ့ၣ်လီၤအီၤ သတူၢ်ကလာ်.
၁၄. တၢ်ဂ့ၢ်တနီၤလၢ ပစံးဘျုးစံးဖှိၣ် ကဝီၤအပှၤကွၢ်တၢ်သ့န့ၣ် မ့ၢ်မနုၤလဲၣ်
၁၄ ကဝီၤအပှၤကွၢ်တၢ်တဖၣ် မၤတၢ်ဆူၣ်ဆူၣ်အဃိ တၢ်အိၣ်ဖှိၣ်ဖိတဖၣ် န့ၢ်ဘၣ်အဘျုးဒ်လဲၣ်. ဒီပုၢ်ဝဲၢ်ခွါတဂၤ လၢအအိၣ်လၢ ထၢခံၤန့ၣ် ပတြၢၤဝဲ ကဝီၤအပှၤကွၢ်တၢ် ဒီးတဲဝဲလၢ “ဖဲကဝီၤအပှၤကွၢ်တၢ် တဂၤဂ့ၤတဂၤဂ့ၤ ဟဲအိၣ်သကိးပှၤအခါ အမၤဆူၣ်ထီၣ်ယသးလၢ ယကရ့အါထီၣ်ဒီး ဒီပုၢ်ဝဲၢ်မုၣ်ခွါတဖၣ် ဒီးမၤစၢၤအဝဲသ့ၣ်. ယထံၣ်ဘၣ်ဒီး ကဝီၤအပှၤကွၢ်တၢ်အါဂၤ. အဝဲသ့ၣ်န့ၣ် ဘၣ်မၤတၢ်ဒီဒူၣ် သနာ်က့ အတဲတၢ်ဒီးယၤ တချုးဘၣ်န့ၣ် တအိၣ်နီတဂၤဘၣ်.” ဒီပုၢ်ဝဲၢ်မုၣ်ကၠိၤအဲနၤ လၢပတဲတ့ၢ်အဂ့ၢ်န့ၣ် အလဲၤစံၣ်တဲၤတဲလီၤတၢ်ဒီး ကဝီၤအပှၤကွၢ်တၢ် ဒီးဟံၣ်ကစၢ် တအိၣ်လၢဟံၣ် နီတဂၤဘၣ်. အတဲဝဲလၢ “တၢ်တနံၤန့ၣ် ယနီၣ်ဘၣ်တုၤလၢခဲအံၤ. ယနီခံဂၤ လဲၤပၠီလၢတၢ်လီၢ်အဂၤ မးတယံာ်ဒံးဘၣ် ဒီးယသ့ၣ်နီၣ်ဘၣ် အဝဲသ့ၣ်ဒိၣ်မး. ကဝီၤအပှၤကွၢ်တၢ် ဟ့ၣ်ဂံၢ်ဟ့ၣ်ဘါယၤ ဒီးတဲယၤလၢ ခဲအံၤန့ၣ် ခီဖျိလၢ ပမၤယဟိဝၤယွၤ အတၢ်မၤအဃိ ပကဘၣ်အိၣ်ယံၤလိာ်သး တစိၢ်ဖိ. ဘၣ်ဆၣ် လၢဟီၣ်ခိၣ်သီအပူၤန့ၣ် ပကအိၣ်ဒီး တၢ်ခွဲးတၢ်ယာ်လၢ ပကအိၣ်ဘၣ်ဒီးအဝဲသ့ၣ် တပူၤဃီလီၤစိၤ.” ပဝဲအါဂၤန့ၣ် ပမၤသကိးဘၣ်တၢ်ဒီး ကဝီၤအပှၤကွၢ်တၢ်အဃိ အကဲဝဲတၢ်သ့ၣ်နီၣ်တခါလၢ အမၤသးခုပသးဒိၣ်မး.—မၤတၢ် ၂၀:၃၇–၂၁:၁.
၁၅. (က) ဒ်ပထံၣ်ဘၣ်လၢ ၃ ယိၤဟၣ် ၅-၈ အသိး ပပာ်ဖျါထီၣ် တၢ်စံးဘျုးစံးဖှိၣ်လၢ ကဝီၤအပှၤကွၢ်တၢ် အဖီခိၣ်သ့ဒ်လဲၣ်. (ကွၢ်စ့ၢ်ကီးတၢ်ဂီၤ.) (ခ) ဒီပုၢ်ဝဲၢ်ခွါလၢ အမၤတၢ်ဆူၣ်ဆူၣ် လၢတၢ်အိၣ်ဖှိၣ်အပူၤန့ၣ် ပပာ်ဖျါထီၣ် တၢ်စံးဘျုးလၢ အမါအဖီခိၣ် သ့ဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “သ့ၣ်နီၣ်ထီၣ် အဝဲသ့ၣ်အမါ.”)
၁၅ တၢ်မၢဖိယိၤဟၣ် ဟ့ၣ်ကူၣ်ဟ့ၣ်ဖး စီၤကါယူးလၢ ဖဲဒီပုၢ်ဝဲၢ်ခွါတဖၣ် ဟဲအိၣ်သကိး တၢ်အိၣ်ဖှိၣ် ဒီး “ဖဲအဝဲသ့ၣ်က့ၤအခါ ဝံသးစူၤ မၤစၢၤအဝဲသ့ၣ် ဒ်ကစၢ်ယွၤ အတၢ်ဘၣ်သး အိၣ်ဝဲအသိးန့ၣ်တက့ၢ်.” (ဖး ၃ ယိၤဟၣ် ၅-၈.) အဃိ ဖဲကဝီၤအပှၤကွၢ်တၢ် ဟဲအိၣ်သကိးပှၤအခါ ပမၤစၢၤအဝဲသ့ၣ်သ့ခီဖျိ ပလဲၤအိၣ်ဖှိၣ်လၢ တၢ်စံၣ်တဲၤတဲလီၤတၢ်အဂီၢ် ဒီးကွဲမုာ်အီၤလၢ အကဟဲအီၣ်သကိးတၢ်ဒီးပှၤ. ဒီပုၢ်ဝဲၢ်မုၣ်လဲၣ်စလံၤ လၢပတဲတ့ၢ်အဂ့ၢ်န့ၣ် အပာ်ဖျါထီၣ် တၢ်စံးဘျုး လၢကျဲအဂၤတမံၤ. အတဲဝဲလၢ “ယဃ့ထုကဖၣ်လၢ ယဟိဝၤယွၤ ကမၤလၢပှဲၤန့ၢ် ကဝီၤအပှၤကွၢ်တၢ်တဖၣ် အတၢ်လိၣ်ဘၣ်.” ဒီးအဆဲးတဲဝဲလၢ “ယၤဒီးယဝၤန့ၣ် ပကွဲးန့ၢ်အဝဲသ့ၣ်လံာ်ပရၢ ဒီးတဲအဝဲသ့ၣ်လၢ သုဟဲဟးအိၣ်သကိးပှၤန့ၣ် ကဲထီၣ်တၢ်မၤစၢၤလၢ ပဂီၢ်ဒိၣ်မး.” ပကဘၣ် သ့ၣ်နီၣ်ထီၣ်လၢ ကဝီၤအပှၤကွၢ်တၢ်တဖၣ်န့ၣ် အနီၢ်ကစၢ် တၢ်ကီတၢ်ခဲအိၣ်ဝဲ ဒီးအလီၤဘှံးဒ်သိးပှၤစ့ၢ်ကီး. တဘျီတခီၣ်န့ၣ် အဝဲသ့ၣ် အိၣ်တဆူၣ်ဘၣ်, ဘၣ်ယိၣ်တၢ် ဒီးအသးလီၤစၢ်. အဃိ နတၢ်ကတိၤလၢအမုာ် ဒီးတၢ်ဟ့ၣ်ဆံးဆံးဖိလၢ နဟ့ၣ်အီၤန့ၣ် အကထံၣ်ဝဲဒ်သိးဒီး တၢ်မၤစၢၤလၢ အဟဲလၢ ယဟိဝၤယွၤအအိၣ်.—ကတိၤ ၁၂:၂၅.
ပလိၣ်ဘၣ်ပိာ်ခွါလၢ ကဟ့ၣ်လီၤအသး “ဒ်တၢ်ဟ့ၣ်တဖၣ် အသိး”
၁၆. ဒ် ကတိၤဒိ ၃:၂၇ ပာ်ဖျါထီၣ်ဝဲအသိး ဒီပုၢ်ဝဲၢ်ခွါတဖၣ် ကဘၣ်သံကွၢ်လီၤ အသးဒ်လဲၣ်.
၁၆ လၢဟီၣ်ခိၣ်ဒီဘ့ၣ်န့ၣ် ပလိၣ်ဘၣ်အါထီၣ် ဒီပုၢ်ဝဲၢ်ခွါတဖၣ် လၢကဟ့ၣ်လီၤအသး “ဒ်တၢ်ဟ့ၣ်တဖၣ် အသိး.” နမ့ၢ်ကဲ ဒီပုၢ်ဝဲၢ်ခွါလၢ အဒိးဘျၢထံဝံၤလံန့ၣ် နပာ်လီၤနသးလၢ နကမၤစၢၤအါထီၣ်တၢ်ဧါ. (ဖး ကတိၤဒိ ၃:၂၇.) နပာ်လီၤဖီတၢၣ်လၢ နကကဲထီၣ် တၢ်အိၣ်ဖှိၣ်အပှၤမၤစၢၤတၢ်ဧါ. နမ့ၢ်ကဲ တၢ်အိၣ်ဖှိၣ်အပှၤမၤစၢၤတၢ်လံန့ၣ် နပာ်လီၤဖီတၢၣ်လၢ နကဲထီၣ် တၢ်အိၣ်ဖှိၣ်သးပှၢ်ဧါ.d ဒ်သိး နတီၣ်ထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ ကန့ၢ်အဂီၢ် နဘၣ်မၤ တၢ်ဆီတလဲအိၣ်တမံၤမံၤဧါ. ကၠိအံၤ ကမၤစၢၤနၤလၢ နကဒိးသူနသး အါထီၣ်လၢ ယ့ၣ်ၡူးအဂီၢ်. နမ့ၢ်ဆိကမိၣ်လၢ နတတုၤထီၣ်ထီၣ်ဘးဘၣ်န့ၣ် ဃ့ထုကဖၣ်လၢ ယဟိဝၤယွၤအအိၣ်. ဒီးဒ်သိး နမၤလၢပှဲၤနမူဒါ တခါဂ့ၤတခါဂ့ၤ ကန့ၢ်အဂီၢ် ဃ့ယဟိဝၤယွၤ အသးစီဆှံလၢ ကမၤစၢၤနၤ.—လူၤ ၁၁:၁၃; မၤတၢ် ၂၀:၂၈.
၁၇. ယ့ၣ်ၡူး “ဟ့ၣ်လီၤ ပိာ်ခွါတဖၣ်အံၤ ဒ်တၢ်ဟ့ၣ်တဖၣ် အသိး” အဃိ ပသ့ၣ်ညါဘၣ်လၢ ယ့ၣ်ၡူးန့ၣ် အကဲစီၤပၤဒ်လဲၣ်.
၁၇ ဒီပုၢ်ဝဲၢ်ခွါတဖၣ်လၢ ယ့ၣ်ၡူးဃုထၢထီၣ်ဝဲ “ဒ်တၢ်ဟ့ၣ်တဖၣ် အသိး” န့ၣ် ယ့ၣ်ၡူး သူအဝဲသ့ၣ်လၢ ကဟံးစုနဲၣ်ကျဲပှၤ လၢမုၢ်နံၤခံကတၢၢ်. (မး ၂၈:၂၀) တကးဒံးဘၣ် ပစီၤပၤယ့ၣ်ၡူးန့ၣ် အအိၣ်ဒီးတၢ်အဲၣ်တၢ်ကွံ, အဟ့ၣ်တၢ်ညီ, အသူၣ်အိၣ်သးအိၣ်ပှၤ ဒီးရဲၣ်ကျဲၤဝဲလၢ ဒီပုၢ်ဝဲၢ်ခွါ လၢအတုၤထီၣ်ထီၣ်ဘးတဖၣ် ကမၤစၢၤပှၤအဃိ ပစံးဘျုးအီၤဒိၣ်မး. အဃိ ပကဘၣ် ဃုတၢ်ခွဲးတၢ်ယာ်လၢ ပကပာ်ဖျါထီၣ်လၢပစံးဘျုး ဒီပုၢ်ဝဲၢ်ခွါလၢ အမၤတၢ်ဆူၣ်ဆူၣ်တဖၣ်အံၤ. ခီဖျိလၢ ယဟိဝၤယွၤ ဟ့ၣ်ပှၤ “တၢ်ဟ့ၣ်လၢအဂ့ၤ ဒီးတၢ်ဟ့ၣ်လၢအလၢအပှဲၤ ခဲလၢာ်” အဃိ ပကဘၣ် စံးဘျုးအီၤထီဘိ.—ယၤ ၁:၁၇.
တၢ်သးဝံၣ် ၉၉ ဒီပုၢ်ဝဲၢ်ဂီၢ်မုၢ်ဂီၢ်ပၤ
a တၢ်အိၣ်ဖှိၣ်သးပှၢ်တဖၣ်လၢ အမၤတၢ်ဒ် ပှၤပၢဆှၢတၢ်ကမံးတံာ်, ပှၤပၢဆှၢတၢ်ကမံးတံာ် အပှၤမၤစၢၤတၢ်တဖၣ်, ဝဲၤတြၢ်ကမံးတံာ် ဒီးဒီပုၢ်ဝဲၢ်ခွါလၢ အဒိးန့ၢ်ဘၣ် မူဒါလၢအဂၤစ့ၢ်ကီးန့ၣ် အဝဲသ့ၣ် မ့ၢ်ဝဲ “တၢ်ဟ့ၣ်တဖၣ်” လၢဒီပုၢ်ဝဲၢ်မုၣ်ခွါအဂီၢ်.
b ပှၤမံၤတနီၤန့ၣ် ပှၤဆီတလဲဝဲ.
c လၢညါန့ၣ် ပှၤကိးဝဲလၢ ကီၢ်ထၢးကံၣ်.
d နမ့ၢ်အဲၣ်ဒိး တုၤထီၣ်ထီၣ်ဘးလၢ နကကဲထီၣ် တၢ်အိၣ်ဖှိၣ်အပှၤမၤစၢၤတၢ် မ့တမ့ၢ် တၢ်အိၣ်ဖှိၣ်သးပှၢ်န့ၣ် ကွၢ်တၢ်ဂ့ၢ် လၢအမ့ၢ် “ဒီပုၢ်ဝဲၢ်ခွါ—နအိၣ်ဒီးဖီတၢၣ်လၢ နကကဲထီၣ် တၢ်အိၣ်ဖှိၣ်အပှၤမၤစၢၤတၢ်ဧါ” ဒီး “ဒီပုၢ်ဝဲၢ်ခွါ—နအိၣ်ဒီးဖီတၢၣ်လၢ နကကဲထီၣ် တၢ်အိၣ်ဖှိၣ်သးပှၢ်ဧါ” လၢအအိၣ်လၢ လါနိၣ်ဝ့ဘၢၣ် ၂၀၂၄ တၢးထီခိးတၢ် အပူၤ.