တၢ်မၤလိ ၇
တၢ်သးဝံၣ် ၁၅ စံးပတြၢၤယဟိဝၤယွၤအဖိဝဲၢ်ကိ
ယဟိဝၤယွၤ ပျၢ်ကွံာ် ပတၢ်ကမၣ်အဃိ ပဒိးန့ၢ်ဘၣ်အဘျုး
“နပျၢ်တၢ်ကမၣ် နီၢ်ကီၢ်ကီၢ်.”—စံး ၁၃၀:၄.
တၢ်ဂ့ၢ်မိၢ်ပှၢ်
လၢတၢ်မၤလိအံၤ ပကတဲသကိး တၢ်အဒိတနီၤလၢ လံာ်စီဆှံ ပာ်ဖျါထီၣ်ဝဲ ဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ် နီၢ်ကီၢ်ကီၢ်အဂ့ၢ်. ဒီးတၢ်မၤလိအံၤ ကမၤစၢၤပှၤဒ်သိး ပကမၤအါထီၣ် တၢ်စံးဘျုး ယဟိဝၤယွၤ.
၁. ဖဲပှၤတဂၤ တဲဝဲလၢ အပျၢ်ကွံာ် ပတၢ်ကမၣ်အခါ ဘၣ်မနုၤအဃိ တဘျီတခီၣ်န့ၣ် ပတနၢ်ပၢၢ်အီၤ ဂ့ၤဂ့ၤဘၣ်လဲၣ်.
ဖဲနမၤဘၣ်ဒိဘၣ် ပှၤတဂၤအသးအခါ နသးတမုာ်ဘၣ်. ဘၣ်ဆၣ် ဖဲအတဲနၤလၢ “ယပျၢ်ကွံာ် နတၢ်ကမၣ်” အခါ နသးကမုာ်ထီၣ်ဒိၣ်မး. ဖဲအတဲလၢ “ယပျၢ်ကွံာ် နတၢ်ကမၣ်” အခါ အအဲၣ်ဒိးတဲဝဲ အခီပညီဒ်လဲၣ်. ဘၣ်သ့ၣ်သ့ၣ် ပှၤလၢ နမၤဘၣ်ဒိ အသးတဂၤန့ၣ် အဲၣ်ဒိးတဲဝဲလၢ ခဲအံၤ နဒီသကိးဒီးအီၤသ့ဒံး မ့တမ့ၢ် အတအဲၣ်ဒိး တဲတၢ်ဂ့ၢ်လၢ အကဲထီၣ်သးလၢညါ လၢၤဘၣ်အဃိ အတဲဝဲဒ်န့ၣ်. ဖဲပှၤတဂၤ တဲဝဲလၢ အပျၢ်ကွံာ် ပတၢ်ကမၣ်အခါ အအဲၣ်ဒိးတဲ အခီပညီဒ်လဲၣ်န့ၣ် တဘျီတခီၣ် ပတနၢ်ပၢၢ် ဂ့ၤဂ့ၤဘၣ်.
၂. လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ ပျၢ်ကွံာ် ပတၢ်ကမၣ်ဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)
၂ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် အလီၤဆီန့ၢ်ဒံး ပပျၢ်လိာ်သး တၢ်ကမၣ်ဒံး. ပှၤလၢကပျၢ်ကွံာ် ပတၢ်ကမၣ် ဒ်သိးဒီး ယဟိဝၤယွၤန့ၣ် တအိၣ်နီတဂၤဘၣ်. ပှၤကွဲးထါစံးထီၣ်ပတြၢၤ တဲယဟိဝၤယွၤလၢ “နပျၢ်တၢ်ကမၣ် နီၢ်ကီၢ်ကီၢ် အဃိ ပှၤယူးယီၣ်ပာ်ကဲနၤ သပှၢ်တၢၢ်.”a (စံး ၁၃၀:၄) အဃိ ပသ့ၣ်ညါဘၣ်လၢ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အ “ပျၢ်တၢ်ကမၣ် နီၢ်ကီၢ်ကီၢ်.” ဒီးပကဘၣ် ပျၢ်ကွံာ် ပှၤဂၤတၢ်ကမၣ် ဒ်လဲၣ်န့ၣ် ယဟိဝၤယွၤ ပာ်လီၤန့ၢ်ပှၤ အဒိအတဲာ် ဂ့ၤဒိၣ်မး. တဘျီတခီၣ် ပှၤကွဲးလံာ်စီဆှံဖိ သူဝဲ ဧ့ၤဘြံၤ အတၢ်ကတိၤလၢ အပာ်ဖျါထီၣ်ဝဲ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် တဒ်သိးဒီး တၢ်ကတိၤလၢ အပာ်ဖျါထီၣ်ဝဲ ပှၤဟီၣ်ခိၣ်ဖိ ပျၢ်လိာ်သး တၢ်ကမၣ်ဘၣ်.
၃. ယဟိဝၤယွၤ ပျၢ်ကွံာ် ပတၢ်ကမၣ်န့ၣ် အလီၤဆီန့ၢ်ဒံး ပပျၢ်ကွံာ် ပှၤဂၤတၢ်ကမၣ် ဒ်လဲၣ်. (ယၡါယၤ ၅၅:၆, ၇)
၃ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အပျၢ်ကွံာ်ဝဲ လၢာ်လၢာ်ဆ့ဆ့. အဃိ ပဆဲးကဲ အသကိး ဒီးအိၣ်ဒီး တၢ်ရ့လိာ်သး လၢအဂ့ၤသ့ဒံး. ခီဖျိလၢ ယဟိဝၤယွၤ သးအိၣ်ပျၢ်ကွံာ် ပတၢ်ကမၣ် လၢာ်လၢာ်ဆ့ဆ့ တဘျီဝံၤတဘျီအဃိ ပသးခုစံးဘျုးအီၤဒိၣ်မး.—ဖး ယၡါယၤ ၅၅:၆, ၇.
၄. ဒ်သိး ပကနၢ်ပၢၢ်ထီၣ် တၢ်ပျၢ်တၢ်ကမၣ် နီၢ်ကီၢ်ကီၢ်အဂီၢ် ယဟိဝၤယွၤ မၤစၢၤပှၤဒ်လဲၣ်.
၄ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် အလီၤဆီန့ၢ်ဒံး ပပျၢ်ကွံာ် ပှၤဂၤတၢ်ကမၣ်အဃိ ဘၣ်ဃးဒီး တၢ်ပျၢ်တၢ်ကမၣ် နီၢ်ကီၢ်ကီၢ်န့ၣ် ပတနၢ်ပၢၢ် အခီပညီ လီၤတံၢ်လီၤဆဲးဘၣ်. ဘၣ်ဆၣ် ယဟိဝၤယွၤ သူဝဲတၢ်အဒိဒ်သိး ကမၤစၢၤပှၤလၢ ပကနၢ်ပၢၢ်ထီၣ် ဘၣ်ဃးဒီး အပျၢ်ကွံာ် ပတၢ်ကမၣ် ဒ်လဲၣ်အဂ့ၢ်. လၢတၢ်မၤလိအံၤ ပကတဲသကိး တၢ်အဒိတနီၤ. လၢတၢ်အဒိတဖၣ်အံၤ ပကသ့ၣ်ညါဘၣ်လၢ ဖဲပပီၢ်ယၢ်လီၤသးအခါ ယဟိဝၤယွၤ ကပျၢ်ကွံာ် ပတၢ်ကမၣ် ဒီးပကအိၣ်ဒီး တၢ်ခွဲးတၢ်ယာ်လၢ ပကမၤဂ့ၤထီၣ်က့ၤ ပတၢ်ရ့လိာ်သးဒီးအီၤ. ဖဲပတဲသကိး တၢ်အဒိတဖၣ်အံၤအခါ ပတၢ်အဲၣ် ယဟိဝၤယွၤ ကဒိၣ်ထီၣ် ဒီးပတၢ်စံးဘျုးအီၤ ကအါထီၣ်. ယဟိဝၤယွၤ လၢအမ့ၢ် ပပါလၢအအိၣ်ဒီး တၢ်အဲၣ် ဒီးတၢ်သးကညီၤန့ၣ် အပာ်ဖျါထီၣ်လၢ အသးအိၣ်ပျၢ်ကွံာ် ပတၢ်ကမၣ် လၢကျဲအါဘိ.
ယဟိဝၤယွၤ ထုးကွံာ် ပတၢ်ကမၣ်
၅. ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အအဲၣ်ဒိးတဲဝဲ မနုၤလဲၣ်.
၅ လံာ်စီဆှံ ပာ်ဖျါထီၣ်ဝဲလၢ တၢ်ကမၣ်န့ၣ် အလီၤဂာ်ဒ်သိးဒီး တၢ်ဝံဃၢ. အဒိ စီၤပၤဒၤဝံး တဲဖျါထီၣ် အတၢ်ကမၣ် ဒီးအတဲဝဲလၢ “ယတၢ်ကမၣ်တဖၣ် လုၢ်ဘၢကွံာ်ယၤလံ, ဒီးယတၢ်ကမၣ်တဖၣ်န့ၣ် လီၤဂာ်ဒ် တၢ်ဝံဃၢအသိး ဒီးယဝံတန့ၢ်လၢၤဘၣ်.” (စံး ၃၈:၄) ဘၣ်ဆၣ် ပှၤလၢအပီၢ်ယၢ်လီၤသးန့ၣ် ယဟိဝၤယွၤ ပျၢ်ကွံာ် အတၢ်ကမၣ်. (စံး ၂၅:၁၈; ၃၂:၅) လၢဧ့ၤဘြံၤကျိာ် တၢ်ကတိၤ လၢအမ့ၢ် “ပျၢ်ကွံာ်” တၢ်ကမၣ်န့ၣ် အခီပညီမ့ၢ်ဝဲ “စိာ်ထီၣ်” မ့တမ့ၢ် “ယိးထီၣ်.” အဃိ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အဝဲထုးကွံာ် တၢ်ဝံဃၢလၢ ပဖံဘၣ်ခိၣ် ဒီးအစိာ်ထီၣ်ကွံာ်ဝဲ.
“ပျၢ်ကွံာ်” (စံး ၃၂:၅)
၆. ယဟိဝၤယွၤ ပာ်ယံၤကွံာ် ပတၢ်ကမၣ်ဒီးပှၤ ယံၤဝဲထဲလဲၣ်.
၆ လံာ်စီဆှံ ပာ်ဖျါထီၣ်တၢ်အဒိ အဂၤတခါ ဒီးတဲဝဲလၢ ယဟိဝၤယွၤ ပာ်ယံၤကွံာ် ပတၢ်ကမၣ်ဒီးပှၤ. အဒိ စံးထီၣ်ပတြၢၤ ၁၀၃:၁၂ တဲဝဲလၢ “ကစၢ်ယွၤ ပာ်ယံၤကွံာ် ပတၢ်ကမၣ်ဒီးပှၤ ဒ်မုၢ်ထီၣ် ယံၤဝဲဒီး မုၢ်နုာ်အသိး.” ပမ့ၢ်ဘၣ်ကွၢ် မုၢ်ထီၣ်န့ၣ် အအိၣ်ယံၤဒီး မုၢ်နုာ် ဖးယံၤညါ. အဃိ မုၢ်ဟဲထီၣ် ဒီးမုၢ်လီၤနုာ်န့ၣ် တထံၣ်လိာ်သး နီတဘျီဘၣ်. ပမ့ၢ်တဲလၢ အဂၤတမံၤန့ၣ် လီၤဂာ်ဒ်သိး ယဟိဝၤယွၤ ပာ်ယံၤကွံာ် ပတၢ်ကမၣ်ဒီးပှၤ ဖးယံၤ ဒီးပတထံၣ်လိာ်သးဒီး ပတၢ်ကမၣ်လၢၤဘၣ်. တၢ်အဒိတခါအံၤ ဒုးသ့ၣ်ညါပှၤလၢ ယဟိဝၤယွၤ ပျၢ်ကွံာ် ပတၢ်ကမၣ် လၢာ်လၢာ်ဆ့ဆ့.
“ဒ်မုၢ်ထီၣ် ယံၤဝဲဒီး မုၢ်နုာ်အသိး” (စံး ၁၀၃:၁၂)
၇. ဘၣ်ဃးဒီး ပတၢ်ကမၣ်န့ၣ် လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ မၤဝဲဒ်လဲၣ်. (မံကၤ ၇:၁၈, ၁၉)
၇ ဖဲယဟိဝၤယွၤ ပာ်ယံၤကွံာ် ပတၢ်ကမၣ် လၢအယံၤအခါ အစၢဃာ် ပတၢ်ကမၣ်ဒံးဧါ. အတစၢဃာ် ပတၢ်ကမၣ်လၢၤဘၣ်. ဘၣ်ဃးဒီး ယဟိဝၤယွၤန့ၣ် စီၤပၤဃံးစကံယၤ တဲဝဲလၢ “နသုးကွံာ် ယတၢ်ကမၣ်ခဲလၢာ် လၢနမဲာ်ညါ.” (ၡါ ၃၈:၉, ၁၇) တၢ်ကတိၤအံၤ အဲၣ်ဒိးတဲဝဲ ပှၤလၢ အပီၢ်ယၢ်လီၤသးန့ၣ် ယဟိဝၤယွၤ သုးကွံာ် အတၢ်ကမၣ် လၢအယံၤ ဒီးတကွၢ်ဘူးဝဲ အတၢ်ကမၣ်လၢၤဘၣ်. ပမ့ၢ်တဲလၢ အဂၤတမံၤန့ၣ် လီၤဂာ်ဒ်သိး စီၤပၤဃံးစကံယၤ တဲဝဲလၢ “ယတၢ်ကမၣ် အိၣ်ဘၣ်ဆၣ် နပာ်ဒ်သိးဒီး [ယတၢ်ကမၣ်] တအိၣ်ဘၣ်.” တကးဒံးဘၣ် လံာ်စီဆှံ ပာ်ဖျါထီၣ်ဝဲ တၢ်အဒိအဂၤတခါ ဖဲ မံကၤ ၇:၁၈, ၁၉. (ဖး.) လံာ်စီဆှံ အဆၢဖိခံဆၢအံၤ တဲဝဲလၢ ယဟိဝၤယွၤ ကွံာ်လီၤ ပတၢ်ကမၣ်လၢ ပီၣ်လဲၣ်ခံဒး. အဒိ တၢ်တမံၤမံၤ မ့ၢ်လီၤတဲာ်လၢ ပီၣ်လဲၣ်ပူၤလံန့ၣ် ပထံၣ်က့ၤတသ့ နီတဘျီလၢၤဘၣ်.
“နသုးကွံာ် ယတၢ်ကမၣ်ခဲလၢာ် လၢနမဲာ်ညါ” (ၡါ ၃၈:၁၇)
“နကကွံာ်လီၤ ပတၢ်ဒဲးဘး ခဲလၢာ်လၢ ပီၣ်လဲၣ်ဖးယိာ် အပူၤ” (မံ ၇:၁၉)
၈. ဘၣ်ဃးဒီး တၢ်ပျၢ်တၢ်ကမၣ် နီၢ်ကီၢ်ကီၢ်န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.
၈ လံာ်စီဆှံ ပာ်ဖျါထီၣ်ဝဲၡဲၡဲလၢ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အထုးကွံာ် ပတၢ်ကမၣ် လၢာ်လၢာ်ဆ့ဆ့အဃိ ပတလိၣ်သးအုးလၢ ပတၢ်ကမၣ်အဃိလၢၤဘၣ်. ဒ်စီၤဒၤဝံး တဲဝဲအသိး “ပှၤလၢအတၢ်ကမၣ် ဘၣ်တၢ်ပျၢ်ကွံာ်အီၤ ဒီးပှၤလၢအတၢ်ဒဲးဘး ဘၣ်တၢ်ကျၢၢ်ဘၢအီၤန့ၣ် ကသးခုဝဲလီၤ. ပှၤလၢ ယဟိဝၤယွၤ တဟံးန့ၢ်အရ့လၢ အတၢ်ဒဲးဘးအဃိဘၣ်န့ၣ် ကသးခုဝဲ.” (ရိ ၄:၇, ၈) တၢ်ပျၢ်တၢ်ကမၣ် ဒ်အံၤန့ၣ် အကဲဝဲ တၢ်ပျၢ်တၢ်ကမၣ် နီၢ်ကီၢ်ကီၢ်.
ယဟိဝၤယွၤ ထူးသံကွံာ် ပတၢ်ဒဲးဘး
၉. ယဟိဝၤယွၤ ပျၢ်ကွံာ် ပတၢ်ကမၣ် လၢာ်လၢာ်ဆ့ဆ့န့ၣ် အဟ့ၣ်ဝဲ တၢ်အဒိဒ်လဲၣ်.
၉ ခီဖျိလၢ တၢ်ပှ့ၤက့ၤအဃိ ပှၤလၢအပီၢ်ယၢ်လီၤသးန့ၣ် ယဟိဝၤယွၤ ပျၢ်ကွံာ် အတၢ်ကမၣ်. ယဟိဝၤယွၤ ပျၢ်ကွံာ် ပတၢ်ကမၣ်န့ၣ် လံာ်စီဆှံ ပာ်ဖျါထီၣ်ဝဲ တၢ်အဒိ ဒ်လဲၣ်. လၢလံာ်စီဆှံပူၤန့ၣ် ပထံၣ်ဘၣ်လၢ ယဟိဝၤယွၤ မၤကဆှီထီၣ် ဒီးသ့စီကွံာ် တၢ်ဒဲးဘး. အဃိ ပကဆှီထီၣ်ကွံာ်လၢ ပတၢ်ဒဲးဘးသ့. (စံး ၅၁:၇; ၡါ ၄:၄; ယံး ၃၃:၈) ခီဖျိလၢ ယဟိဝၤယွၤ မၤဝဲဒ်အံၤအဃိ အတဲဝဲလၢ “သုတၢ်ဒဲးဘးတဖၣ် မ့ၢ်ဂီၤဆှုၣ်ကလာ် ဘၣ်ဆၣ် အကဝါထီၣ်က့ၤဒ် မူခိၣ်ဖီအသိး ဒီးသုတၢ်ဒဲးဘး မ့ၢ်ဂီၤဒ် တၢ်သွံၣ်အသိး ဘၣ်ဆၣ် အကဝါထီၣ်က့ၤဒ် သိဆူၣ်အသိး.” (ၡါ ၁:၁၈) ပမ့ၢ်ကွၢ် တၢ်ကံးညာ်တဘ့ၣ်လၢ အဘၣ်အၢဒီး တၢ်လွဲၢ် ဂီၤဆှုၣ်ကလာ်န့ၣ် ပှၤသ့စီကွံာ်အီၤ တန့ၢ်ညီညီဘၣ်. သနာ်က့ ယဟိဝၤယွၤ သူဝဲတၢ်အဒိအံၤ ဒ်သိး ကဒုးသ့ၣ်ညါပှၤလၢ ပတၢ်ဒဲးဘးန့ၣ် အသ့စီကွံာ်ဝဲ သ့ဂ့ၤဂ့ၤ ဒီးပတထံၣ်အီၤလၢၤဘၣ်.
“သုတၢ်ဒဲးဘးတဖၣ် မ့ၢ်ဂီၤဆှုၣ်ကလာ် ဘၣ်ဆၣ် အကဝါထီၣ်က့ၤဒ် မူခိၣ်ဖီအသိး” (ၡါ ၁:၁၈)
၁၀. ယဟိဝၤယွၤ သးအိၣ်ပျၢ်ကွံာ် ပတၢ်ကမၣ် နီၢ်ကီၢ်ကီၢ်န့ၣ် လံာ်စီဆှံ ဟ့ၣ်တၢ်အဒိဒ်လဲၣ်.
၁၀ လၢတၢ်မၤလိလၢ အပူၤကွံာ်တခါန့ၣ် ပသ့ၣ်ညါဘၣ်လၢ တၢ်ဒဲးဘးန့ၣ် အလီၤဂာ်ဒီး “ကမၢ်တဖၣ်.” (မး ၆:၁၂; လူၤ ၁၁:၄, တၢ်ဂ့ၢ်အဘျဲၣ်.) အဃိ ဖဲပမၤကမၣ်တၢ် တဘျီဂ့ၤတဘျီဂ့ၤအခါ လီၤဂာ်ဒ်သိး ပကမၢ်ထီၣ်ဒီး ယဟိဝၤယွၤဒီဒူၣ်. ဘၣ်ဆၣ် ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိး အမၤလီၤတူာ်ကွံာ် ပကမၢ် ခဲလၢာ် ဒီးအတသ့ၣ်နီၣ်ထီၣ်က့ၤ ပတၢ်ကမၣ် နီတဘျီလၢၤဘၣ်. ပှၤတဂၤ မ့ၢ်တလိၣ် လိးက့ၤအကမၢ်လၢၤဘၣ်န့ၣ် အကသးခုဒိၣ်မး. ဒ်န့ၣ်အသိး ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ ပသးခုဒိၣ်မး.
“ပျၢ်ကွံာ်ပတၢ်ကမၣ်” (မး ၆:၁၂)
၁၁. လံာ်စီဆှံ ပာ်ဖျါထီၣ်ဝဲလၢ ပတၢ်ဒဲးဘး “ဘၣ်တၢ်ထူးသံကွံာ်အီၤ” န့ၣ် အဲၣ်ဒိးတဲဝဲ အခီပညီဒ်လဲၣ်. (မၤတၢ် ၃:၁၉)
၁၁ ယဟိဝၤယွၤ မၤလီၤတူာ်ကွံာ် ပကမၢ် လၢအမ့ၢ် ပတၢ်ဒဲးဘး တကးဒံးဘၣ် အထူးသံကွံာ်ဝဲ လၢာ်လၢာ်ဆ့ဆ့. (ဖး မၤတၢ် ၃:၁၉.) အဒိ ထံၣ်တမှံကွၢ်လၢ ပှၤလၢ နကမၢ်ထီၣ်ဒီးအီၤန့ၣ် အတိၤသံဝဲ စ့အနီၣ်ဂံၢ်လၢ နီၣ်က့ခံဘိဒီး ကသံၣ်ထံ. သနာ်က့ လၢလံာ်က့အလိၤန့ၣ် ပှၤကထံၣ် စ့အနီၣ်ဂံၢ်ဒံး. မ့မ့ၢ် တၢ်ထူးသံကွံာ်တၢ်န့ၣ် တမ့ၢ်ဒ်န့ၣ်ဘၣ်. ဒ်သိး ပကနၢ်ပၢၢ် တၢ်အဒိအံၤအဂီၢ် ပကဘၣ် သ့ၣ်နီၣ်ထီၣ် လၢညါန့ၣ် ပှၤသူကသံၣ်ထံလၢ ပှၤဃါဃုာ်ဝဲဒီး သွဲၣ်လး, သ့ၣ်ထုး ဒီးထံ. အဃိ တၢ်လၢ ပှၤကွဲးလီၤဝဲန့ၣ် ပှၤထူးသံကွံာ်ဝဲဒီး တၢ်ကံးညာ်ဘၣ်စီၣ် သ့ဝဲညီညီ. အဃိ ဖဲပှၤတဂၤ အကမၢ် “ဘၣ်တၢ်ထူးသံကွံာ်အီၤ” အခါ အကမၢ်လၢ ပှၤကွဲးလီၤဝဲန့ၣ် ပှၤတထံၣ်ဝဲ နီတစဲးလၢၤဘၣ်. ဒီးလီၤဂာ်ဒ်သိး အကမၢ် တအိၣ်နီတဘျီဘၣ်. ဒ်န့ၣ်အသိး ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး ပတၢ်ကမၣ် တအိၣ်နီတဘျီဘၣ်. ပသ့ၣ်ညါဘၣ် ဒ်အံၤအဃိ ပသးခုဒိၣ်မး.—စံး ၅၁:၉.
“သုတၢ်ဒဲးဘး ကဘၣ်တၢ်ထူးသံကွံာ်အီၤ” (မၤတၢ် ၃:၁၉)
၁၂. တၢ်အဒိ ဘၣ်ဃးဒီး တၢ်အၢၣ်ခံးသူန့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.
၁၂ ယဟိဝၤယွၤ ထူးသံကွံာ် ပတၢ်ဒဲးဘး လၢာ်လၢာ်ဆ့ဆ့န့ၣ် အပာ်ဖျါထီၣ်ဝဲ တၢ်အဒိ လၢအဂၤတခါ. အတဲဝဲလၢ “ယကထူးသံကွံာ် သုတၢ်ကမၣ်တဖၣ် ဒီးသုတၢ်ဒဲးဘးတဖၣ်န့ၣ် ယကကးဘၢအီၤဒီး တၢ်အၢၣ်ခံးသူ.” (ၡါ ၄၄:၂၂) ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး အကးဘၢ ပတၢ်ကမၣ်ဒီး တၢ်အၢၣ်တီၣ်တီၣ်တလိၣ် အဃိ အတထံၣ် ပတၢ်ကမၣ်လၢၤဘၣ် ဒီးပတထံၣ်စ့ၢ်ကီး ပတၢ်ကမၣ်လၢၤဘၣ်.
“သုတၢ်ဒဲးဘးတဖၣ်န့ၣ် ယကကးဘၢအီၤဒီး တၢ်အၢၣ်ခံးသူ” (ၡါ ၄၄:၂၂)
၁၃. ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ ပတူၢ်ဘၣ်ဒ်လဲၣ်.
၁၃ ဘၣ်ဃးဒီး တၢ်အဒိတဖၣ်န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်. ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ ပတဘၣ်ဆိကမိၣ်လၢ ပတၢ်ကမၣ် ဆဲးအိၣ်ဒံးထီဘိဘၣ်. ယ့ၣ်ၡူး ဟ့ၣ်လုၢ်ထီၣ်သး လၢပဂီၢ်အဃိ ပကမၢ် လၢအမ့ၢ် ပတၢ်ဒဲးဘးန့ၣ် ယဟိဝၤယွၤ မၤလီၤတူာ်ကွံာ်ဝဲ လၢာ်လၢာ်ဆ့ဆ့. အဃိ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး ပတၢ်ကမၣ်တအိၣ် နီတဘျီဘၣ်. ဒီးဖဲပပီၢ်ယၢ်လီၤသးအခါ ယဟိဝၤယွၤ သးအိၣ်ပျၢ်ကွံာ် ပတၢ်ကမၣ် နီၢ်ကီၢ်ကီၢ်န့ၣ် အပာ်ဖျါထီၣ်ဝဲ လၢကျဲဒ်န့ၣ်.
ယဟိဝၤယွၤ ဘၣ်သးလၢ ပတၢ်ရ့လိာ်သးဒီးအီၤ ကဂ့ၤထီၣ်က့ၤ
ယဟိဝၤယွၤ ပျၢ်ကွံာ် ပတၢ်ကမၣ်အဃိ ပဆဲးကဲ အသကိး ဒီးအိၣ်ဒီး တၢ်ရ့လိာ်သးဒီးအီၤ လၢအဂ့ၤသ့ဒံး (ကွၢ်လံာ်အဆၢ ၁၄)
၁၄. ဘၣ်မနုၤအဃိ ပနာ်လၢ ယဟိဝၤယွၤ ပျၢ်ကွံာ် ပတၢ်ကမၣ် လၢာ်လၢာ်ဆ့ဆ့လဲၣ်. (ကွၢ်စ့ၢ်ကီးတၢ်ဂီၤ.)
၁၄ ယဟိဝၤယွၤ ပျၢ်ကွံာ် ပတၢ်ကမၣ်အဃိ ပဆဲးကဲ အသကိး ဒီးအိၣ်ဒီး တၢ်ရ့လိာ်သးဒီးအီၤ လၢအဂ့ၤသ့ဒံး. ဒီးပတလိၣ် တူၢ်ဘၣ်လၢ ပတၢ်ကမၣ်အိၣ်လၢၤဘၣ်. ပတလိၣ် ဘၣ်ယိၣ်လၢ ယဟိဝၤယွၤ ကဃုထံၣ်ဒံးပတၢ်ကမၣ် ဒီးကစံၣ်ညီၣ်ပှၤဘၣ်. ယဟိဝၤယွၤ တမၤဝဲဒ်န့ၣ် နီတဘျီဘၣ်. ဖဲယဟိဝၤယွၤ တဲဝဲလၢ အပျၢ်ကွံာ် ပတၢ်ကမၣ်အခါ ဘၣ်မနုၤအဃိ ပနာ်န့ၢ်အီၤသ့လဲၣ်. ယဟိဝၤယွၤ တဲဘၣ် ဝံယံးရမံယၤလၢ “ယကပျၢ်ကွံာ် အဝဲသ့ၣ် အတၢ်ကမၣ် ဒီးယတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးလၢၤဘၣ်.” (ယံး ၃၁:၃၄) ပထံၣ်ဘၣ်စ့ၢ်ကီးလၢ တၢ်မၢဖိပီလူး တဲဖျါထီၣ်က့ၤ တၢ်ကတိၤတဖၣ်န့ၣ် ဒီးအတဲဝဲလၢ “ယတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးလၢၤဘၣ်.” (ဧ့ၤ ၈:၁၂) ဘၣ်ဆၣ် အဲၣ်ဒိးတဲဝဲ အခီပညီဒ်လဲၣ်.
“ယတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးလၢၤဘၣ်” (ယံး ၃၁:၃၄)
၁၅. ယဟိဝၤယွၤ တသ့ၣ်နီၣ်ထီၣ် ပတၢ်ကမၣ်လၢၤဘၣ်န့ၣ် အဲၣ်ဒိးတဲဝဲ မနုၤလဲၣ်.
၁၅ လၢလံာ်စီဆှံပူၤ တၢ်ကတိၤ လၢအမ့ၢ် “သ့ၣ်နီၣ်ထီၣ်” န့ၣ် တအဲၣ်ဒိးတဲဝဲ ပှၤတဂၤဂၤ ယၢၤထီၣ်ကဒါ မ့တမ့ၢ် ဆိကမိၣ်ထီၣ်ကဒါက့ၤ တၢ်ကဲထီၣ်သးလၢ အပူၤကွံာ် ထီဘိဘၣ်. အဲၣ်ဒိးတဲစ့ၢ်ကီးဝဲ ဘၣ်ဃးဒီး ပှၤတဂၤ မၤတၢ်တမံၤမံၤ. အဒိ တၢ်ဘျၣ်တဂၤလၢ ပှၤပျၤထီအီၤလၢ ယ့ၣ်ၡူးအကပၤန့ၣ် အတဲဝဲလၢ “ယ့ၣ်ၡူးဧၢ, ဖဲနနုာ်လီၤလၢ နဘီမုၢ်အပူၤအခါ သ့ၣ်နီၣ်ထီၣ်က့ၤယၤနီၤ.” (လူၤ ၂၃:၄၂, ၄၃) ဖဲအံၤ ပထံၣ်ဘၣ်လၢ အမၢယ့ၣ်ၡူး မၤန့ၢ်အီၤ တၢ်တမံၤမံၤ. ယ့ၣ်ၡူး တဲက့ၤအီၤလၢ ယကမၤဂဲၤဆၢထၢၣ် သမူထီၣ်က့ၤနၤ. အဃိ ဖဲယဟိဝၤယွၤ တဲဝဲလၢ အတသ့ၣ်နီၣ်ထီၣ် ပတၢ်ကမၣ်လၢၤဘၣ်အခါ အအဲၣ်ဒိး တဲဝဲလၢ အပျၢ်ကွံာ် ပတၢ်ကမၣ် ဒီးခါဆူညါစ့ၢ်ကီး အတစံၣ်ညီၣ်ပှၤလၢ တၢ်ကမၣ်လၢ ပမၤတ့ၢ် လၢအပူၤကွံာ်လၢၤဘၣ်.
၁၆. ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ ပထူၣ်ဖျဲးထီၣ်ကွံာ်လၢ မနုၤလဲၣ်.
၁၆ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ ပထူၣ်ဖျဲးထီၣ်ကွံာ်လၢ ပတၢ်ကမၣ်. ဒီးလံာ်စီဆှံ ပာ်ဖျါထီၣ်ဝဲ တၢ်အဒိအဂၤတခါလၢ ကမၤစၢၤပှၤဒ်သိး ပကနၢ်ပၢၢ်ထီၣ် တၢ်ဂ့ၢ်အံၤ. ခီဖျိလၢ ပတလၢတပှဲၤဘၣ်အဃိ လံာ်စီဆှံ တဲဝဲလၢ ပကဲ “တၢ်ဒဲးဘးအကုၢ်.” ဘၣ်ဆၣ် ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး ‘တၢ်မၤထူၣ်ဖျဲးထီၣ်ပှၤလၢ တၢ်ဒဲးဘး.’ (ရိ ၆:၁၇, ၁၈; လီၣ် ၁:၅) ဖဲပသ့ၣ်ညါလၢ ယဟိဝၤယွၤ ပျၢ်ကွံာ် ပတၢ်ကမၣ်အခါ ပသးခု ဒ်သိးဒီးကုၢ်လၢ အထူၣ်ဖျဲးထီၣ်ကွံာ်တဂၤ.
“တၢ်မၤထူၣ်ဖျဲးထီၣ်သုလၢ တၢ်ဒဲးဘး” (ရိ ၆:၁၈)
၁၇. ယဟိဝၤယွၤ ပျၢ်ကွံာ် ပတၢ်ကမၣ်န့ၣ် လီၤဂာ်ဒ်သိးဒီး အမၤဘျါက့ၤပှၤဒ်လဲၣ်. (ယၡါယၤ ၅၃:၅)
၁၇ ဖး ယၡါယၤ ၅၃:၅. လံာ်စီဆှံ ပာ်ဖျါထီၣ်ဝဲ တၢ်အဒိလၢ အလီၢ်ခံကတၢၢ်တခါ လၢအပာ်ဖျါထီၣ်ဝဲလၢ ခီဖျိလၢ ပမ့ၢ်ပှၤတၢ်ဒဲးဘးဖိအဃိ ပလီၤဂာ်ဒီး ပှၤလၢအအိၣ်ဒီး တၢ်ဆါလၢ အမၤသံတၢ်သ့. ဘၣ်ဆၣ် ခီဖျိလၢ ယဟိဝၤယွၤ ဟ့ၣ်ပှၤအဖိခွါ ဒ်တၢ်ပှ့ၤက့ၤ အသိးအဃိ ယဟိဝၤယွၤ မၤဘျါက့ၤ ပတၢ်ဆါ. (၁ ပ့း ၂:၂၄) ဖဲပမၤကမၣ်တၢ်အခါ ပတၢ်ရ့လိာ်သးဒီး ယဟိဝၤယွၤ ဟးဂီၤဝဲ. ဘၣ်ဆၣ် ခီဖျိလၢ တၢ်ပှ့ၤက့ၤအဃိ အပျၢ်ကွံာ် ပတၢ်ကမၣ် ဒီးပတၢ်ရ့လိာ်သးဒီးအီၤ ဂ့ၤထီၣ်က့ၤ သ့ဒံး. ပမ့ၢ်ဘၣ်ကွၢ် ဖဲပှၤလၢအအိၣ်ဒီး တၢ်ဆါလၢအနးတဂၤ ဘျါက့ၤအခါ အသးခုဒိၣ်မး. ဒ်န့ၣ်အသိး ပဝဲစ့ၢ်ကီး ဖဲပတၢ်ရ့လိာ်သးဒီး ယဟိဝၤယွၤ ဂ့ၤထီၣ်က့ၤ ဒီးပသ့ၣ်ညါလၢ ယဟိဝၤယွၤ ဘၣ်သူၣ်ဘၣ်သးပှၤအခါ ပသးခုဒိၣ်မး.
“ခီဖျိလၢ အတၢ်ပူၤလီၢ်တဖၣ်အဃိ ပဘျါက့ၤ” (ၡါ ၅၃:၅)
ယဟိဝၤယွၤ ပျၢ်ကွံာ် ပတၢ်ကမၣ်အဃိ ပန့ၢ်ဘၣ်အဘျုးဒ်လဲၣ်
၁၈. လံာ်စီဆှံ ပာ်ဖျါထီၣ်ဝဲ တၢ်အဒိဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ်န့ၣ် ပန့ၢ်ဘၣ်တၢ်မၤလိဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ယဟိဝၤယွၤ ပျၢ်ကွံာ် ပတၢ်ကမၣ်န့ၣ် အပာ်ဖျါထီၣ်ဝဲဒ်လဲၣ်.”)
၁၈ လံာ်စီဆှံ ပာ်ဖျါထီၣ်ဝဲ တၢ်အဒိဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ်န့ၣ် ပန့ၢ်ဘၣ်တၢ်မၤလိဒ်လဲၣ်. ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး ပတၢ်ကမၣ် တအိၣ်နီတဘျီဘၣ်. ဒီးပနာ်သပှၢ်တၢၢ်လၢ ခါဆူညါစ့ၢ်ကီး အတစံၣ်ညီၣ်ပှၤလၢ တၢ်ကမၣ်လၢ ပမၤတ့ၢ်အဃိဘၣ်. အဃိ ပအိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤသ့ဒံး. တကးဒံးဘၣ် ပသ့ၣ်ညါလၢ တၢ်ပျၢ်တၢ်ကမၣ်န့ၣ် အကဲဝဲ ယဟိဝၤယွၤ အတၢ်ဟ့ၣ်တခါ. နီၢ်ကီၢ်န့ၣ် ပတကြၢးဒီး တၢ်ဟ့ၣ်အံၤဘၣ်. ဘၣ်ဆၣ် ခီဖျိလၢ ယဟိဝၤယွၤ အဲၣ်ပှၤ ဒီးအသးအိၣ်ပှၤ နီၢ်ကီၢ်ကီၢ်အဃိ အဟ့ၣ်ပှၤတၢ်ဟ့ၣ် တခါအံၤ.—ရိ ၃:၂၄.
၁၉. (က) ပသးခုလၢ တၢ်ဂ့ၢ်မနုၤအဃိလဲၣ်. (ရိမ့ၤ ၄:၈) (ခ) တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၁၉ ဖး ရိမ့ၤ ၄:၈. ယဟိဝၤယွၤ ပျၢ်ကွံာ် ပတၢ်ကမၣ် နီၢ်ကီၢ်ကီၢ်အဃိ ပသးခုဒိၣ်မး. (စံး ၁၃၀:၄) သနာ်က့ ပမ့ၢ်ဘၣ်သးလၢ ယဟိဝၤယွၤ ကပျၢ်ကွံာ် ပတၢ်ကမၣ်န့ၣ် ပကဘၣ် မၤတၢ်လၢ အရ့ဒိၣ်အိၣ်တမံၤ. ယ့ၣ်ၡူးတဲဝဲလၢ “သုမ့ၢ်တပျၢ်ကွံာ် ပှၤဂၤအတၢ်ကမၣ်ဘၣ်န့ၣ် သုပၢ်အိၣ်လၢမူခိၣ် တပျၢ်ကွံာ် သုတၢ်ကမၣ်စ့ၢ်ကီးဘၣ်.” (မး ၆:၁၄, ၁၅) အဃိ ပကဘၣ်ကွၢ်လိ ယဟိဝၤယွၤ ဒီးပျၢ်ကွံာ် ပှၤဂၤတၢ်ကမၣ်. ပကွၢ်လိ ယဟိဝၤယွၤ ကသ့ဒ်လဲၣ်. တၢ်မၤလိလၢခံတခါ ကပာ်ဖျါထီၣ်န့ၢ်ပှၤ တၢ်ဂ့ၢ်တနီၤ.
တၢ်သးဝံၣ် ၄၆ ပစံးဘျုးနၤ ယဟိဝၤယွၤ
a လၢလံာ်စီဆှံပူၤ ဧ့ၤဘြံၤ အတၢ်ကတိၤ လၢအမ့ၢ် “တၢ်ပျၢ်တၢ်ကမၣ်” န့ၣ် အဲၣ်ဒိးတဲဝဲ တၢ်ပျၢ်တၢ်ကမၣ် နီၢ်ကီၢ်ကီၢ်. မ့မ့ၢ်တၢ်ပျၢ်တၢ်ကမၣ် အဂၤတဖၣ်န့ၣ် အခီပညီ တဒ်သိးဒီး တၢ်ပျၢ်တၢ်ကမၣ် နီၢ်ကီၢ်ကီၢ် လၢဧ့ၤဘြံၤ အတၢ်ကတိၤ ပာ်ဖျါထီၣ်ဝဲအံၤဘၣ်.