ဆဲးမၤလိအါထီၣ် တၢ်ဂ့ၢ်အသီလၢ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိ

၁. ဖဲနစးထီၣ်မၤလိ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိအခါ နဒိးန့ၢ်ဘၣ် အဘျုးဒ်လဲၣ်.

လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိလၢ ပမၤလိဘၣ်အီၤ လၢညါန့ၣ် အဆီတလဲ ပတၢ်အိၣ်မူအါမး. အဒိ ဖဲပမၤလိလံာ်စီဆှံ ဒီးသ့ၣ်ညါဘၣ်လၢ ကစၢ်ယွၤအမံၤမ့ၢ် ယဟိဝၤအခါ တၢ်မ့ၢ်တၢ်တီအံၤ မၤစၢၤပှၤလၢ ပကကဲထီၣ်အသကိး. (ၡါ ၄၂:၈) ဒီးဖဲပသ့ၣ်ညါထီၣ် တၢ်မ့ၢ်တၢ်တီဘၣ်ဃးဒီး ပှၤသံအတၢ်အိၣ်သးအခါ ပတဘၣ်ယိၣ်လၢ ပှၤလၢပအဲၣ် လၢအသံသဒၣ်ကွံာ်ပှၤန့ၣ် ကတူၢ်ဘၣ် တၢ်နးတၢ်ဖှီၣ်ဘၣ်. (စံၣ် ၉:၁၀) ပသ့ၣ်ညါထီၣ်စ့ၢ်ကီး ကစၢ်ယွၤ အတၢ်အၢၣ်လီၤ ဘၣ်ဃးဒီး ဟီၣ်ခိၣ်ကကဲထီၣ် ပၤရဒံစူးအဃိ ပတလိၣ် ဘၣ်ယိၣ်တၢ်လၢ ခါဆူညါအဂီၢ်ဘၣ်. ဒီးပသ့ၣ်ညါထီၣ်ဘၣ်လၢ ပတအိၣ်မူဘၣ်ထဲ အနံၣ် ၇၀ မ့တမ့ၢ် ၈၀ ဘၣ်, ဘၣ်ဆၣ် ပကအိၣ်မူဘၣ် လီၤထူလီၤယိာ်.—စံး ၃၇:၂၉; ၉၀:၁၀.

၂. ဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် ဘၣ်မနုၤအဃိ စီၤပ့းတရူး ဒုးသ့ၣ်နီၣ်ထီၣ်ဒံး အဝဲသ့ၣ်လၢ တၢ်သိၣ်လိ အခီၣ်ထံးခီၣ်ဘိလဲၣ်. (၂ ပ့းတရူး ၁:၁၂, ၁၃)

^၂ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိလၢ ပမၤလိဘၣ်န့ၣ် အရ့ဒိၣ်ဒိၣ်မး ဒီးပတဘၣ်သးပ့ၤနီၣ်အီၤ နီတဘျီဘၣ်. အဒိ လၢတၢ်မၢဖိပ့းတရူး အလံာ်ပရၢ ခံဘ့ၣ်တဘ့ၣ် အပူၤန့ၣ် အကွဲးန့ၢ် ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီ ဒီးတဲဝဲလၢ “တၢ်မ့ၢ်တၢ်တီ . . . အိၣ်သူၣ်လီၤအသးလၢ သုပူၤကျၢၤကျၢၤလံ.” (ဖး ၂ ပ့းတရူး ၁:၁၂, ၁၃.) ဘၣ်ဆၣ် ဖဲန့ၣ်အခါ ပှၤအၢပှၤသီတနီၤလၢ တၢ်အိၣ်ဖှိၣ်အပူၤန့ၣ် အဝဲသ့ၣ်ဘၣ်သး မၤယံၤထီၣ် ဒီပုၢ်ဝဲၢ်မုၣ်ခွါတဖၣ်လၢ တၢ်မ့ၢ်တၢ်တီအကျဲ. (၂ ပ့း ၂:၁-၃) ဒီးဒ်သိး ဒီပုၢ်ဝဲၢ်မုၣ်ခွါတဖၣ် တကနၣ်ဃုာ် တၢ်သိၣ်လိလၢ အကမၣ်တဂ့ၤအဂီၢ် စီၤပ့းတရူး ဘၣ်သးမၤစၢၤအဝဲသ့ၣ်. အဃိ စီၤပ့းတရူး ဒုးသ့ၣ်နီၣ်ထီၣ်အဝဲသ့ၣ် တၢ်သိၣ်လိ အခီၣ်ထံးခီၣ်ဘိ တနီၤလၢ အဝဲသ့ၣ် မၤလိဘၣ်ဝဲ. ဒီးတၢ်သိၣ်လိတဖၣ်အံၤ မၤစၢၤအဝဲသ့ၣ်ဒ်သိး ကဆဲးတီဒီး ယဟိဝၤယွၤ တုၤလၢအကတၢၢ်.

၃. ဘၣ်မနုၤအဃိ ခရံာ်ဖိတဖၣ် ကြၢးဆိကမိၣ်ထံ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိ ထီဘိလဲၣ်. တဲဖျါထီၣ် တၢ်အဒိ.

^၃ ပအိၣ်လၢ တၢ်မ့ၢ်တၢ်တီ အနံၣ်ဖးယံာ် သနာ်က့ ပမၤလိန့ၢ် တၢ်ဂ့ၢ်အသီလၢ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိသ့ဒံး. အဒိ မိလၢအဖီအီၣ်တၢ် ဖၠဲးတဂၤ ဒီးအဖိမုၣ်လၢ အမၤလိထီၣ်အသးလၢ ကဖီအီၣ်တၢ်န့ၣ် ဖဲအဝဲသ့ၣ် ဖီအီၣ်တၢ်အခါ ကသူဝဲ တၢ်အီၣ်တၢ်အီ အပီးအလီ ဒ်သိးသိး. ဘၣ်ဆၣ် ခီဖျိလၢ မိတဂၤန့ၣ် အတၢ်လဲၤခီဖျိ ဟဲအါထီၣ်အဃိ အသ့ၣ်ညါဝဲလၢ တၢ်အီၣ်တၢ်အီ အပီးအလီလၢ အသူတ့ၢ်ဝဲန့ၣ် အသူဝဲလၢ ကဖီအီၣ်တၢ်အီၣ် လၢအသီတကလုာ် ဒီးအလီၤအီၣ်န့ၣ် သ့စ့ၢ်ကီး. ဒ်န့ၣ်အသိး လံာ်စီဆှံအဆၢတဖၣ်လၢ ပှၤလၢအအိၣ်လၢ တၢ်မ့ၢ်တၢ်တီ အနံၣ်ဖးယံာ်တဂၤ မၤလိဘၣ်ဝဲန့ၣ် အဒ်သိးဒီး ပှၤလၢအအိၣ်လၢ တၢ်မ့ၢ်တၢ်တီ သီသီတဂၤ မၤလိဘၣ်ဝဲ. ဘၣ်ဆၣ် ပှၤလၢအအိၣ်လၢ တၢ်မ့ၢ်တၢ်တီ အနံၣ်ဖးယံာ်တဂၤန့ၣ် အန့ၢ်ဘၣ်တၢ်မၤလိ ကလီၤဆီန့ၢ်ဒံး ပှၤသီတဂၤန့ၣ် န့ၢ်ဘၣ်ဝဲ. အလီၤဆီဒ်လဲၣ်. ပတၢ်အိၣ်သး ဒီးပတၢ်ခွဲးတၢ်ယာ်လၢ ပမၤယဟိဝၤယွၤ အတၢ်မၤန့ၣ် ဘၣ်သ့ၣ်သ့ၣ် အဆီတလဲအသး. ဘၣ်ဆၣ် ဖဲပဆိကမိၣ်ထီၣ် ဘၣ်ဃးဒီး လံာ်စီဆှံ အတၢ်သိၣ်လိလၢ ပမၤလိဘၣ် လၢအပူၤကွံာ်အခါ အကဲဘျုးလၢ ပတၢ်အိၣ်သးလၢ ဆၢကတီၢ်ခဲအံၤသ့. ပကတဲသကိး လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိ သၢခါအဂ့ၢ်. ဒီးပှၤလၢအအိၣ်လၢ တၢ်မ့ၢ်တၢ်တီ အနံၣ်ဖးယံာ်တဖၣ် ဒိးန့ၢ်ဘၣ်တၢ်မၤလိ အသီလၢ တၢ်မ့ၢ်တၢ်တီ သၢခါအံၤ ကသ့ဒ်လဲၣ်.

ယဟိဝၤယွၤ မ့ၢ်တၢ်ဘၣ်တ့ကစၢ်

၄. ပသ့ၣ်ညါထီၣ်လၢ ယဟိဝၤယွၤ မ့ၢ်တၢ်ဘၣ်တ့ကစၢ်အဃိ အကဲဘျုးလၢ ပဂီၢ်ဒ်လဲၣ်.

^၄ လံာ်စီဆှံ တဲဝဲလၢ “ပှၤလၢ အတ့တၢ်ခဲလၢာ်တဂၤန့ၣ် မ့ၢ်ဝဲကစၢ်ယွၤလီၤ.” (ဧ့ၤ ၃:၄) အဃိ ပသ့ၣ်ညါဘၣ်လၢ ဟီၣ်ခိၣ် ဒီးတၢ်သးသမူလၢ အအိၣ်လၢအပူၤခဲလၢာ်န့ၣ် ဟဲကဲထီၣ်အသး ခီဖျိ တၢ်ဘၣ်တ့ကစၢ်လၢ အအိၣ်ဒီးတၢ်ကူၣ်သ့ ဒီးတၢ်စိတၢ်ကမီၤဒိၣ်မးတဂၤ တ့လီၤဝဲ. ဘၣ်ဃးဒီး တၢ်ဂ့ၢ်အံၤန့ၣ် ပမၤလိန့ၢ် တၢ်လၢအဂၤ အိၣ်အါမးဒံး. ယဟိဝၤယွၤန့ၣ် အတ့လီၤပှၤအဃိ အသ့ၣ်ညါပှၤဂ့ၤဂ့ၤ, အကဟုကယာ်ပှၤ ဒီးအသ့ၣ်ညါ တၢ်အဂ့ၤကတၢၢ်လၢပဂီၢ်. ပသ့ၣ်ညါထီၣ်လၢ ယဟိဝၤယွၤ မ့ၢ်တၢ်ဘၣ်တ့ကစၢ်အဃိ အဆီတလဲ ပတၢ်အိၣ်မူ, ပအိၣ်ဒီးတၢ်တိာ်ပာ် ဒီးအိၣ်ဒီး တၢ်သးခုလၢ ပတၢ်အိၣ်မူအပူၤ.

၅. ဒ်သိး ပကအိၣ်ဒီး တၢ်ဆီၣ်လီၤသးအဂီၢ် တၢ်မ့ၢ်တၢ်တီလၢ အမၤစၢၤပှၤန့ၣ် မ့ၢ်မနုၤလဲၣ်. (ယၡါယၤ ၄၅:၉-၁၂)

^၅ ပသ့ၣ်ညါထီၣ် တၢ်မ့ၢ်တၢ်တီ ဘၣ်ဃးဒီး ယဟိဝၤယွၤ မ့ၢ်တၢ်ဘၣ်တ့ကစၢ်န့ၣ် အမၤစၢၤစ့ၢ်ကီးပှၤလၢ ပကအိၣ်ဒီး တၢ်ဆီၣ်လီၤသး. အဒိ စီၤယိၤဘးန့ၣ် အပာ်ဖျါထီၣ် အတၢ်ထံၣ်လၢ ယဟိဝၤယွၤ အဖီခိၣ် ဒီးအတဲကမၣ် ယဟိဝၤယွၤအဂ့ၢ် တဘျုးသီညါ. အသးပ့ၤနီၣ်ကွံာ် တၢ်ဂ့ၢ်လၢအရ့ဒိၣ် ဒီးအဆိကမိၣ်အါလၢ အနီၢ်ကစၢ်အဂီၢ်အဃိ အဂုာ်ကျဲးစၢး ပာ်ဖျါထီၣ်လၢ အတၢ်ကမၣ်တအိၣ်ဘၣ်. ဘၣ်ဆၣ် ယဟိဝၤယွၤ ဒုးသ့ၣ်နီၣ်ထီၣ် စီၤယိၤဘးလၢ အကဲဝဲ သ့တၢ်လၢာ်ကစၢ်. (ဘး ၃၈:၁-၄) အဃိ စီၤယိၤဘး သ့ၣ်ညါထီၣ်ဝဲလၢ ယဟိဝၤယွၤ မၤတၢ်အကျိၤအကျဲန့ၣ် အပတီၢ်ထီန့ၢ် ပှၤဟီၣ်ခိၣ်ဖိ မၤတၢ်အကျိၤအကျဲ စၢၢ်တလၢၢ်. ဘၣ်ဃးဒီး တၢ်ဂ့ၢ်အံၤ လၢခံဝံယၡါယၤ ကွဲးဝဲလၢ “ကပံာ်န့ၣ် မ့ၢ်အကြၢးတဲ ပှၤတ့သပၢၤတဂၤလၢ ‘နဟးတ့တၢ်မနုၤလဲၣ်န့ၣ်ဧါ.’”—ဖး ယၡါယၤ ၄၅:၉-၁၂.

၆. ပတၢ်ဘၣ်တ့ကစၢ် ယဟိဝၤယွၤ အတၢ်ကူၣ်သ့ ဒီးအတၢ်စိတၢ်ကမီၤ အဂ့ၢ်န့ၣ် ပကြၢးဆိကမိၣ်ထံအီၤ လီၤဆီဒၣ်တၢ် လၢအခါဖဲလဲၣ်. (ကွၢ်စ့ၢ်ကီးတၢ်ဂီၤ.)

^၆ ခရံာ်ဖိလၢ အတၢ်လဲၤခီဖျိ အိၣ်အါမးတဂၤန့ၣ် ဘၣ်သ့ၣ်သ့ၣ် အကသန့ၤလီၤအသး ထဲလၢအနီၢ်ကစၢ် အတၢ်ထံၣ် ဒီးအတသန့ၤအသးလၢ ယဟိဝၤယွၤ ဒီးဃုလံာ်စီဆှံ အတၢ်ဟံးစုနဲၣ်ကျဲလၢၤဘၣ်. (ဘး ၃၇:၂၃, ၂၄) ဘၣ်ဆၣ် အမ့ၢ်ဆိကမိၣ်ထံ အတၢ်ဘၣ်တ့ကစၢ် ယဟိဝၤယွၤအဂ့ၢ်, အတၢ်ကူၣ်သ့ ဒီးအတၢ်စိတၢ်ကမီၤအဂ့ၢ်န့ၣ် ကကဲဘျုးလၢအဂီၢ်ဒ်လဲၣ်. (ၡါ ၄၀:၂၂; ၅၅:၈, ၉) တၢ်မ့ၢ်တၢ်တီအရ့ဒိၣ်အံၤ ကမၤစၢၤအီၤဒ်သိး အကဆဲးအိၣ်ဒီး တၢ်ဆီၣ်လီၤသး ဒီးအတသန့ၤအသး ထဲလၢအနီၢ်ကစၢ် အတၢ်ထံၣ်ဘၣ်.

၇. ဒ်သိး ဒီပုၢ်ဝဲၢ်မုၣ်ရၤဟံလၤ တူၢ်လိာ် ပတၢ်ကရၢကရိ အတၢ်ဆီတလဲ ကန့ၢ်အဂီၢ် အမၤမနုၤလဲၣ်.

^၇ ပကကွၢ်သကိး ဒီပုၢ်ဝဲၢ်မုၣ်ရၤဟံလၤ လၢအအိၣ်လၢ စလိၤဘံနံယၢၤန့ၣ် အတၢ်လဲၤခီဖျိ. ဒီပုၢ်ဝဲၢ်မုၣ်အံၤ အဆိကမိၣ်ထံဝဲ အတၢ်ဘၣ်တ့ကစၢ် ယဟိဝၤယွၤအဂ့ၢ်အဃိ မၤစၢၤအီၤဒ်သိး အကတူၢ်လိာ် ပတၢ်ကရၢကရိ အတၢ်ဆီတလဲ. အတဲဝဲလၢ “တဘျီတခီၣ် ပှၤလၢအတီခိၣ်ရိၤမဲတၢ် အတၢ်ဆၢတဲာ်န့ၣ် ယတူၢ်လိာ်အီၤ တန့ၢ်ညီညီဘၣ်. အဒိ ယကွၢ် ၂၀၂၃ ပှၤပၢဆှၢတၢ်ကမံးတံာ် ပာ်ဖျါထီၣ်တၢ်ကစီၣ်အသီ—၈ ဝံၤလံသနာ်က့ ဖဲယထံၣ် ဒီပုၢ်ဝဲၢ်ခွါလၢ အပာ်ထီ အခၣ်ဆူၣ်တဂၤ ဟ့ၣ်တၢ်စံၣ်တဲၤတဲလီၤတၢ်အခါ ခီၣ်ထံးခါန့ၣ် ယဖုးဘၣ်ယသးညါ. အဃိ ဒ်သိး ယတူၢ်လိာ် တၢ်ဆီတလဲအံၤ ကန့ၢ်အဂီၢ် ယဃ့ထုကဖၣ်လၢ ယဟိဝၤယွၤ ကမၤစၢၤယၤ.” ဒီပုၢ်ဝဲၢ်မုၣ်အံၤ သ့ၣ်ညါထီၣ်ဝဲလၢ ယဟိဝၤယွၤန့ၣ် အကဲဝဲ တၢ်ဘၣ်တ့ကစၢ် ဒီးအကဘၣ် ဟံးစုနဲၣ်ကျဲဝဲ အတၢ်ကရၢကရိ ဒ်လဲၣ်န့ၣ် အသ့ၣ်ညါဝဲ အဂ့ၤကတၢၢ်. နၤစ့ၢ်ကီး နမ့ၢ်တူၢ်ဘၣ်လၢ နတူၢ်လိာ် တၢ်ဆီတလဲ ဒီးတၢ်ဟံးစုနဲၣ်ကျဲအသီ မ့ၢ်တန့ၢ်ညီညီဘၣ်န့ၣ် ပာ်လီၤတၢ်ဆၢကတီၢ်လၢ နကဆိကမိၣ်ထံ ပတၢ်ဘၣ်တ့ကစၢ် အတၢ်စိတၢ်ကမီၤ ဒီးအတၢ်ကူၣ်သ့လၢ အပတီၢ်ထီ ဒိၣ်မးအဂ့ၢ်.—ရိ ၁၁:၃၃-၃၆.

ဘၣ်မနုၤအဃိ ကစၢ်ယွၤဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်

၈. ကစၢ်ယွၤဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးန့ၣ် ပသ့ၣ်ညါဘၣ် တၢ်စံးဆၢအဃိ ကဲဘျုးလၢ ပဂီၢ်ဒ်လဲၣ်.

^၈ ဘၣ်မနုၤအဃိ ကစၢ်ယွၤဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်. ပှၤတနီၤလၢ အတသ့ၣ်ညါ တၢ်သံကွၢ်အံၤ အတၢ်စံးဆၢဘၣ်န့ၣ် အဝဲသ့ၣ် သးဒိၣ်ထီၣ် ကစၢ်ယွၤ ဒီးတနာ်ဝဲလၢ ကစၢ်ယွၤအိၣ်ဘၣ်. (ကတိၤ ၁၉:၃) မ့မ့ၢ်ပှၤန့ၣ် ပမၤလိဘၣ်လၢ ယဟိဝၤယွၤ တဒုးအိၣ်ထီၣ် တၢ်နးတၢ်ဖှီၣ်ဘၣ်. ဒီးပှၤဟီၣ်ခိၣ်ဖိ ထံၣ်ဘၣ် တၢ်နးတၢ်ဖှီၣ် ဒီးဘၣ်သံန့ၣ် ခီဖျိလၢ ပန့ၢ်သါဘၣ် တၢ်ဒဲးဘး ဒီးတၢ်တလၢတပှဲၤအဃိ. တကးဒံးဘၣ် ပမၤလိဘၣ်လၢ ယဟိဝၤယွၤန့ၣ် အအိၣ်ဒီး တၢ်ဝံသးစူၤ ဒီးခီဖျိလၢ အတမၤကတၢၢ်ကွံာ် တၢ်နးတၢ်ဖှီၣ်ဒံးဘၣ်အဃိ ပှၤလၢအကကွဲၢ်တဖၣ် မၤလိဘၣ်အဂ့ၢ် ဒီးအကမၤကတၢၢ်ကွံာ် တၢ်နးတၢ်ဖှီၣ်ဒ်လဲၣ်န့ၣ် အဝဲသ့ၣ် သ့ၣ်ညါထီၣ်ဝဲ. (၂ ပ့း ၃:၉, ၁၅) ပသ့ၣ်ညါဘၣ် တၢ်မ့ၢ်တၢ်တီတဖၣ်အံၤအဃိ ပသးမုာ်ထီၣ်ဒိၣ်မး ဒီးပတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ်.

၉. ယဟိဝၤယွၤ ဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးန့ၣ် ပကြၢးဆိကမိၣ်ထံအီၤ လီၤဆီဒၣ်တၢ် လၢအခါဖဲလဲၣ်.

^၉ ဖဲပအိၣ်ခိးလၢ ယဟိဝၤယွၤ ကမၤကတၢၢ်ကွံာ် တၢ်နးတၢ်ဖှီၣ်အခါ ပသ့ၣ်ညါလၢ ပကဘၣ်အိၣ်ဒီး တၢ်ဝံသးစူၤ. ဘၣ်ဆၣ် ဖဲပှၤလၢပအဲၣ်တဂၤဂၤ သံသဒၣ်ကွံာ်ပှၤ, ဖဲပနီၢ်ကစၢ် မ့တမ့ၢ် ပဟံၣ်ဖိဃီဖိ ထံၣ်ဘၣ်တၢ်ကိၢ်တၢ်ဂီၤ ဒီးဖဲပှၤတရ့ပှၤ တီတီလိၤလိၤဘၣ်အခါ ဘၣ်သ့ၣ်သ့ၣ် ပကဆိကမိၣ်လၢ ဘၣ်မနုၤအဃိ ယဟိဝၤယွၤ တမၤကတၢၢ်ကွံာ် တၢ်အိၣ်သးကီခဲတဖၣ်အံၤ တဘျီဃီဘၣ်လဲၣ်. (ဃဘး ၁:၂, ၃) ပမ့ၢ်တူၢ်ဘၣ် ဒ်န့ၣ်န့ၣ် ပကြၢးဆိကမိၣ်ထံက့ၤ တၢ်ဂ့ၢ်လၢ ဘၣ်မနုၤအဃိ ယဟိဝၤယွၤ ဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်.a (စံး ၃၄:၁၉) တကးဒံးဘၣ် ပမ့ၢ်ဆိကမိၣ်ထံ ဘၣ်ဃးဒီး ယဟိဝၤယွၤ အတၢ်တိာ်ပာ်လၢ အကမၤကတၢၢ်ကွံာ် တၢ်နးတၢ်ဖှီၣ် လီၤထူလီၤယိာ်န့ၣ် ကကဲဘျုးလၢ ပဂီၢ်စ့ၢ်ကီး.

၁၀. ဒီပုၢ်ဝဲၢ်မုၣ်အဲ အမိသံသဒၣ်အီၤ ဝံၤအလီၢ်ခံ အလဲၤခီဖျိ တၢ်သူၣ်အုးသးအုး န့ၢ်ဒ်လဲၣ်.

^၁၀ ပမ့ၢ်သ့ၣ်ညါလၢ ဘၣ်မနုၤအဃိ ကစၢ်ယွၤဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်န့ၣ် ကမၤစၢၤပှၤဒ်သိး ပကအိၣ်ဒီး တၢ်တူၢ်န့ၢ်ခီၣ်ကဲ. ဒီပုၢ်ဝဲၢ်မုၣ်အဲ လၢအအိၣ်လၢ ကီးမဲၣ်ယိၤ လၢအ့ဒံယါ ပီၣ်လဲၣ်မိၢ်ပှၢ်န့ၣ် အတဲဝဲဒ်အံၤ. “ပူၤကွံာ်စှၤကိာ်နံၣ်န့ၣ် ယမိသံသဒၣ်ယၤအဃိ ယသးအုးဒိၣ်မး. သနာ်က့ ထီဘိန့ၣ် ယဆိကမိၣ်ထီၣ်က့ၤလၢ ယဟိဝၤယွၤ တဒုးအိၣ်ထီၣ် တၢ်နးတၢ်ဖှီၣ်ဘၣ်. အသးဆူၣ်လၢ အကမၤကတၢၢ်ကွံာ် တၢ်နးတၢ်ဖှီၣ်ခဲလၢာ် ဒီးအအဲၣ်ဒိး မၤသမူထီၣ်က့ၤပှၤသံ. ယသးအုးဒိၣ်မး သနာ်က့ ခီဖျိလၢ ယဆိကမိၣ်ထံက့ၤ တၢ်မ့ၢ်တၢ်တီတဖၣ်အံၤအဃိ ယပာ်သးမုာ်မုာ် ဒီးယဒိးန့ၢ်ဘၣ် တၢ်သူၣ်မံသးမုာ်.”

၁၁. ပမ့ၢ်သ့ၣ်ညါ တၢ်မ့ၢ်တၢ်တီ ဘၣ်ဃးဒီး ဘၣ်မနုၤအဃိ ကစၢ်ယွၤ ဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်န့ၣ် ကမၤစၢၤပှၤလၢ တၢ်စံၣ်တဲၤတဲလီၤတၢ်မၤအဂီၢ် ဒ်လဲၣ်.

^၁၁ ပမ့ၢ်သ့ၣ်ညါ တၢ်မ့ၢ်တၢ်တီ ဘၣ်ဃးဒီး ဘၣ်မနုၤအဃိ ကစၢ်ယွၤ ဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်န့ၣ် ကမၤစၢၤပှၤဒ်သိး ပကဆဲး စံၣ်တဲၤတဲလီၤတၢ်. စီၤပ့းတရူး တဲဖျါထီၣ်ဝဲလၢ ယဟိဝၤယွၤ အိၣ်ဒီးတၢ်ဝံသးစူၤန့ၣ် ခီဖျိလၢ အအဲၣ်ဒိးလၢ ပှၤကပီၢ်ယၢ်လီၤက့ၤသး ဒီးဒိးန့ၢ်ဘၣ် တၢ်အုၣ်က့ၤခီၣ်က့ၤ. ဝံၤဒီး အဆဲးတဲဝဲလၢ “သုကြၢးကဲထီၣ် ပှၤဒ်လဲၣ်န့ၣ် ဆိကမိၣ်ထံတက့ၢ်. သုကြၢးမ့ၢ်ပှၤလၢအအိၣ်ဒီး လုၢ်လၢ်သကဲာ်ပဝးလၢ အစီဆှံ ဒီးမၤတၢ်လၢ အပာ်ဖျါထီၣ်လၢ သုသးတီဒီးကစၢ်ယွၤ.” (၂ ပ့း ၃:၁၁) ကျဲတဘိလၢ ပပာ်ဖျါထီၣ်လၢ ပ “သးတီဒီးကစၢ်ယွၤ” န့ၣ် မ့ၢ်ဝဲ ပစံၣ်တဲၤတဲလီၤတၢ်. ဒ်ပပၢ်ယဟိဝၤယွၤ အဲၣ်ပှၤဂၤအသိး ပဝဲစ့ၢ်ကီး ပအဲၣ်ပှၤဂၤ. ပအဲၣ်ဒိးလၢ ပှၤဂၤကအိၣ်ဘၣ်လၢ ဟီၣ်ခိၣ်သီလၢ အပှဲၤဒီးတၢ်တီတၢ်လိၤ. ဒီးခီဖျိလၢ ယဟိဝၤယွၤ အတၢ်ဝံသးစူၤအဃိ ပှၤလၢအအိၣ်လၢ ပဟီၣ်ကဝီၤတဖၣ်န့ၣ် အဟ့ၣ်အဝဲသ့ၣ် တၢ်ခွဲးတၢ်ယာ်လၢ ကဘူၣ်ထီၣ်ဘါထီၣ်အီၤ. တချုးလၢ တၢ်အကတၢၢ် ဟဲတုၤဒံးဘၣ်န့ၣ် ပမၤသကိးဘၣ်တၢ်ဒီး ယဟိဝၤယွၤ ဒီးဂုာ်ကျဲးစၢးမၤစၢၤ ပှၤအါဂၤဒ်သိး ကသ့ၣ်ညါထီၣ်အီၤအဃိ အကဲဝဲ တၢ်ခွဲးတၢ်ယာ်လီၤဆီ ဖးဒိၣ်ညါ.—၁ ကရံၣ် ၃:၉.

ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အဆၢကတီၢ်

၁၂. ပသ့ၣ်ညါလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အဆၢကတီၢ်အဃိ အကဲဘျုးလၢ ပဂီၢ်ဒ်လဲၣ်.

^၁၂ ဖဲ “မုၢ်နံၤခံကတၢၢ်တဖၣ်” အဆၢကတီၢ် ပှၤဟီၣ်ခိၣ်ဖိ အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝး ကအိၣ်ဒ်လဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ လီၤတံၢ်လီၤဆဲး. (၂ တံၤ ၃:၁-၅) ဒီးဖဲပကွၢ် ပှၤလၢပဃၢၤတဖၣ် အတၢ်ပာ်သူၣ်ပာ်သး ဒီးတၢ်လၢ အဝဲသ့ၣ်မၤဝဲအခါ ပထံၣ်ဘၣ်လၢ တၢ်လၢလံာ်စီဆှံ တဲဝဲန့ၣ် ဟဲလၢပှဲၤထီၣ်နီၢ်ကီၢ်. ပထံၣ်ဘၣ်လၢ ပှၤဟီၣ်ခိၣ်ဖိတဖၣ် အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝးန့ၣ် အၢထီၣ်မးအၢထီၣ်. ဒီးပထံၣ်ဘၣ် ဒ်အံၤအဃိ ပတၢ်နာ် ကစၢ်ယွၤ အကလုၢ်ကထါန့ၣ် ဟဲဂၢၢ်ကျၢၤဒိၣ်ထီၣ်.—၂ တံၤ ၃:၁၃-၁၅.

၁၃. တၢ်အဒိလၢ ယ့ၣ်ၡူး တဲဝဲဖဲ လူၤကၣ် ၁၂:၁၅-၂၁ န့ၣ် ပန့ၢ်ဘၣ် တၢ်မၤလိဒ်လဲၣ်.

^၁၃ ပသ့ၣ်ညါလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အဆၢကတီၢ်အဃိ မၤစၢၤပှၤဒ်သိး ပကသးစၢၢ်ဆၢ တၢ်လၢအရ့ဒိၣ်. ဘၣ်မနုၤအဃိ အရ့ဒိၣ်လၢ ပကမၤဒ်အံၤလဲၣ်န့ၣ် ပကကွၢ်သကိး တၢ်အဒိလၢ ယ့ၣ်ၡူးသိၣ်လိဝဲ ဖဲ လူၤကၣ် ၁၂:၁၅-၂၁ အပူၤ. (ဖး.) ဘၣ်မနုၤအဃိ လံာ်စီဆှံကိးဝဲ ပှၤထူးပှၤတီၤတဂၤအံၤလၢ “ပှၤလၢအသးတဆးဘၣ်” လဲၣ်. တမ့ၢ်ခီဖျိလၢ အကဲဒိၣ်အဃိဘၣ်, ဘၣ်ဆၣ် ခီဖျိလၢ အတပာ်ဆိ တၢ်လၢအရ့ဒိၣ်ဘၣ်အဃိ. ပှၤထူးပှၤတီၤ တဂၤအံၤ “ပာ်ဖှိၣ် တၢ်လုၢ်ဒိၣ်ပှ့ၤဒိၣ်တဖၣ်လၢ အနီၢ်ကစၢ်အဂီၢ် ဘၣ်ဆၣ် ကစၢ်ယွၤ . . . တထံၣ်အီၤလၢ ပှၤထူးပှၤတီၤတဂၤဘၣ်.” ခီဖျိလၢ အတသူ အတၢ်ဆၢကတီၢ်လၢ အဂ့ၤကတၢၢ်ဘၣ် အဃိ အတၢ်ဆၢကတီၢ် တအိၣ်အါအါလၢၤဘၣ်. ဒီးကစၢ်ယွၤ တဲဘၣ်အီၤလၢ “ခဲမနၤကၢာ်န့ၣ် နကသံလီၤ.” တၢ်အဒိလၢ ယ့ၣ်ၡူးတဲဝဲအံၤ ပန့ၢ်ဘၣ် တၢ်မၤလိဒ်လဲၣ်. တၢ်အကတၢၢ် ဘူးထီၣ်ဒိၣ်မးလံအဃိ ပကြၢးသံကွၢ်လီၤပသးလၢ ‘ယဖီတၢၣ်တဖၣ်န့ၣ် အပာ်ဖျါထီၣ်လၢ ယသးစၢၢ်ဆၢ တၢ်လၢအရ့ဒိၣ်ဧါ. ယမၤစၢၤယဖိလၢ အဝဲသ့ၣ် ကပာ်လီၤဖီတၢၣ် ဒ်လဲၣ်တကလုာ်လဲၣ်. မ့ၢ်ယသူ ယတၢ်ဂံၢ်တၢ်ဘါ, တၢ်ဆၢကတီၢ် ဒီးကျိၣ်စ့တၢ်ထူးတၢ်တီၤလၢ ကပာ်ဖှိၣ် တၢ်လုၢ်ဒိၣ်ပှ့ၤဒိၣ်လၢ ယနီၢ်ကစၢ်အဂီၢ်ဧါ မ့တမ့ၢ် ယပာ်ဖှိၣ် တၢ်လုၢ်ဒိၣ်ပှ့ၤဒိၣ် လၢမူခိၣ်ဧါ.’

၁၄. ဘၣ်မနုၤအဃိ အရ့ဒိၣ်လၢ ပကသ့ၣ်နီၣ်ထီၣ်လၢ ပအိၣ်မူဘၣ်လၢ မုၢ်နံၤခံကတၢၢ် အဆၢကတီၢ်လဲၣ် ဒီးလၢဒီပုၢ်ဝဲၢ်မုၣ်မံၣ်ကံၤ အတၢ်လဲၤခီဖျိန့ၣ် ပန့ၢ်ဘၣ် တၢ်မၤလိဒ်လဲၣ်.

^၁၄ ပမ့ၢ်ဆိကမိၣ်ထံ ဘၣ်ဃးဒီး ပအိၣ်မူဘၣ်လၢ မုၢ်နံၤခံကတၢၢ် အဆၢကတီၢ် နီၢ်ကီၢ်ကီၢ်န့ၣ် ကမၤစၢၤပှၤဒ်သိး ပကဆၢတဲာ်တၢ်လၢအဘၣ် ဒီးသူပတၢ်ဆၢကတီၢ် လၢအဂ့ၤကတၢၢ်. ဘၣ်ဃးဒီး တၢ်ဂ့ၢ်အံၤ ဒီပုၢ်ဝဲၢ်မုၣ်မံၣ်ကံၤ တဲဖျါထီၣ် အတၢ်လဲၤခီဖျိဒ်အံၤ. အတဲဝဲလၢ “ယဖျိထီၣ် တီၤထီကၠိ ဝံၤအလီၢ်ခံ ယလီကီတၢ်မၤတခါလၢ ကမၤစၢၤယၤဒ်သိး ယကမၤလိဘၣ် ဆၣ်ဖိကီၢ်ဖိအဂ့ၢ်. တကးဒံးဘၣ် ယအိၣ်ဒီးဖီတၢၣ်လၢ ကမၤပှၤလဲၤလၢညါ ဒီးလဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ် တၢ်မၤစၢၤစ့ၢ်ကီး. ဒီပုၢ်ဝဲၢ်မုၣ်ခွါလၢ အနီၢ်သးဆူၣ်တဖၣ် ဟ့ၣ်ကူၣ်ယၤလၢ ယကဆိကမိၣ်ထံ ဘၣ်ဃးဒီး ယမ့ၢ်န့ၢ်ဘၣ် တၢ်မၤလၢ ယလီကီန့ၣ် ယမၤလၢပှဲၤ ယနီၢ်သးဖီတၢၣ် ကန့ၢ်ဒံးဧါ. အဝဲသ့ၣ် ဒုးသ့ၣ်နီၣ်ထီၣ်ယၤလၢ တၢ်အကတၢၢ် ဘူးထီၣ်ဒိၣ်မးလံ. ဘၣ်ဆၣ် အဝဲသ့ၣ် ဒုးသ့ၣ်နီၣ်စ့ၢ်ကီးယၤလၢ ခါဆူညါ လၢဟီၣ်ခိၣ်သီန့ၣ် ယကအိၣ်ဒီး တၢ်ခွဲးတၢ်ယာ်လၢ ကမၤလိဘၣ် ဆၣ်ဖိကီၢ်ဖိအဂ့ၢ် လီၤထူလီၤယိာ်. အဃိ ယဃုထၢ တၢ်မၤလိတခါလၢ အကဲဘျုးလၢ တၢ်ဖံးအီၣ်မၤအီၣ်အဂီၢ် ဒီးအတလၢာ် ယတၢ်ဆၢကတီၢ် အါအါဘၣ်. ဒီးတၢ်မၤလၢ ယန့ၢ်ဘၣ်န့ၣ် မၤစၢၤယၤဒ်သိး ယမၤပှၤလဲၤလၢညါကန့ၢ် ဒီးလၢခံ ယလဲၤပၠီလၢ တၢ်လီၢ်လၢ ပှၤလိၣ်ဘၣ်တၢ်မၤစၢၤ ဖဲကီၢ်အဲးခွံးဒီ.” ခဲအံၤ ဒီပုၢ်ဝဲၢ်မုၣ်မံၣ်ကံၤ ဒီးအဝၤန့ၣ် အဝဲသ့ၣ်မၤဝဲ ကဝီၤအပှၤကွၢ်တၢ် အတၢ်မၤဖဲ ကီၢ်အဲးခွံးဒီ.

၁၅. ခဲအံၤ ပှၤမ့ၢ်တဒိကနၣ် ပတၢ်စံၣ်တဲၤတဲလီၤဘၣ် သနာ်က့ စီၤယၤကိာ် အဒိအတဲာ်န့ၣ် ဒုးသ့ၣ်နီၣ်ထီၣ်ပှၤ တၢ်ဂ့ၢ်မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၅ ပှၤမ့ၢ်တဘၣ်သး ဒိကနၣ် တၢ်သးခုကစီၣ်လၢ ပစံၣ်တဲၤတဲလီၤဘၣ်န့ၣ် ပတလိၣ် သးဟးဂီၤဘၣ်. ပှၤဟီၣ်ခိၣ်ဖိန့ၣ် အသးဆီတလဲသ့. ဆိကမိၣ်ကွၢ် ယ့ၣ်ၡူး အဒီပုၢ်ဝဲၢ်ခိၣ်ချၢ စီၤယၤကိာ် အဒိအတဲာ်. စီၤယၤကိာ်န့ၣ် အထံၣ်ဘၣ်ယ့ၣ်ၡူးဒိၣ်ထီၣ်, ကဲထီၣ်မ့းၡံအၤ ဒီးအသ့ၣ်ညါဝဲလၢ ယ့ၣ်ၡူး သိၣ်လိတၢ် ဖၠဲးဒိၣ်န့ၢ်ဒံး ပှၤဟီၣ်ခိၣ်ဖိ စၢၢ်တလၢၢ်ဒံး. သနာ်က့ စီၤယၤကိာ် တကဲထီၣ် ယ့ၣ်ၡူးအပျဲၢ်အဘီၣ် တဘျီဃီဘၣ်. ယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံမး အကဲထီၣ် ယ့ၣ်ၡူးအပျဲၢ်အဘီၣ်လၢ အသးဆူၣ်ဒိၣ်မးတဂၤ.b (ယိၤ ၇:၅; ကလၤ ၂:၉) နဘူးနတံၢ် ဒီးပှၤလၢ နလီၢ်ကဝီၤလၢ နတဲဘၣ်အီၤ တၢ်သးခုကစီၣ် ခဲအံၤခဲအံၤ ဘၣ်ဆၣ် အတသးအိၣ်ဒိကနၣ် တၢ်သးခုကစီၣ်ဒံးဘၣ်န့ၣ် ဆဲးမၤစၢၤအဝဲသ့ၣ် ဒီးတဘၣ်ဟ့ၣ်အၡူတဂ့ၤ. ပကဘၣ် သ့ၣ်နီၣ်ထီၣ်လၢ ပအိၣ်မူဘၣ်လၢ မုၢ်နံၤခံကတၢၢ်တဖၣ် အဆၢကတီၢ် ဒီးတၢ်စံၣ်တဲၤတဲလီၤ တၢ်မၤန့ၣ် အရ့ဒိၣ်ဒိၣ်မး. တၢ်လၢပတဲဘၣ် အဝဲသ့ၣ်ခဲအံၤန့ၣ် ဘၣ်သ့ၣ်သ့ၣ် အဝဲသ့ၣ် ကဆိကမိၣ်ထံက့ၤဝဲ ဒီးဖဲတၢ်နးတၢ်ဖှီၣ်ဖးဒိၣ် စးထီၣ်အခါ ဘၣ်သ့ၣ်သ့ၣ် အဝဲသ့ၣ် ကမၤထွဲဝဲ.c

ပာ်လုၢ်ပာ်ပှ့ၤ ယဟိဝၤယွၤ အတၢ်ဒုးသ့ၣ်နီၣ်ထီၣ်

၁၆. ယဟိဝၤယွၤ အတၢ်ဒုးသ့ၣ်နီၣ်ထီၣ်တဖၣ်န့ၣ် အကဲဘျုးလၢ နဂီၢ်ဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “သူအီၤလၢ ကမၤစၢၤက့ၤပှၤဂၤ.”)

^၁၆ နီၢ်သးတၢ်အီၣ်တနီၤန့ၣ် ပတၢ်ကရၢကရိ ကတဲာ်ကတီၤန့ၢ်ဝဲလၢ ပှၤလၢ တသ့ၣ်ညါနၢ်ပၢၢ် လံာ်စီဆှံဂ့ၤဂ့ၤဘၣ်အဂီၢ်. အဒိ တၢ်စံၣ်တဲၤတဲလီၤတၢ်လၢ ကမျၢၢ်အဂီၢ် လၢပနၢ်ဟူဘၣ် ကိးနွံဒဲး, တၢ်ဂ့ၢ်ဒီးတၢ်ဂီၤမူ တနီၤလၢ jw.org ဝဲးပဆဲးအပူၤ ဒီးမဲးကစံလၢ ကမျၢၢ်အဂီၢ်န့ၣ် ပတၢ်ကရၢကရိ ကတဲာ်ကတီၤဝဲ လီၤလီၤဆီဆီလၢ ပှၤလၢတကဲ ယဟိဝၤပှၤအုၣ်အသးဘၣ်အဂီၢ်. သနာ်က့ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိတဖၣ်အံၤ အကဲဘျုးလၢ ပဂီၢ်စ့ၢ်ကီး. တၢ်ဒုးသ့ၣ်နီၣ်ထီၣ်တဖၣ်အံၤ မၤစၢၤပှၤဒ်သိး ပကမၤဒိၣ်ထီၣ်အါထီၣ် ပတၢ်အဲၣ်ယဟိဝၤယွၤ, မၤဂၢၢ်ကျၢၤထီၣ် ပတၢ်နာ်လၢ ကစၢ်ယွၤ အကလုၢ်ကထါ ဒီးမၤစၢၤပှၤဒ်သိး ပသိၣ်လိပှၤဂၤ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိ ကသ့ဂ့ၤဂ့ၤ.—စံး ၁၉:၇.

၁၇. ပကြၢးဆိကမိၣ်ထံက့ၤ လံာ်စီဆှံအတၢ်သိၣ်လိ အခီၣ်ထံးခီၣ်ဘိ လီၤဆီဒၣ်တၢ် လၢအခါဖဲလဲၣ်.

^၁၇ ပဝဲလၢ အဘူၣ်ထီၣ်ဘါထီၣ် ယဟိဝၤယွၤ ဖးယံာ်လံန့ၣ် ဖဲပဒိးန့ၢ်ဘၣ် တၢ်နၢ်ပၢၢ်အသီ တမံၤမံၤအခါ ပသးခုဒိၣ်မး. ဘၣ်ဆၣ် လံာ်စီဆှံအတၢ်သိၣ်လိ အခီၣ်ထံးခီၣ်ဘိလၢ ပသ့ၣ်ညါဘၣ် ဖဲပစးထီၣ်မၤလိတၢ် သီသီခါန့ၣ် အမၤစၢၤပှၤဒ်သိး ပကကဲထီၣ်ဘၣ် ယဟိဝၤယွၤ အသကိးအဃိ ပပာ်လုၢ်ပာ်ပှ့ၤဒံးအီၤဒိၣ်မး. ဒ်ပသ့ၣ်ညါဘၣ်အသိး တၢ်မ့ၢ်တၢ်တီတဖၣ်အံၤ ကဲဘျုးဒံးလၢ ပဂီၢ်အါမး. အဒိ ဖဲပဒိးန့ၢ်ဘၣ် တၢ်ဟံးစုနဲၣ်ကျဲလၢ ပတၢ်ကရၢကရိ အအိၣ်အခါ ပမ့ၢ်ဆိကမိၣ်လၢ ပတၢ်ထံၣ်ဂ့ၤန့ၢ်ဒံး ပတၢ်ကရၢကရိ အတၢ်ဟံးစုနဲၣ်ကျဲန့ၣ် ပကဘၣ်အိၣ်ဒီး တၢ်ဆီၣ်လီၤသး. ဒီးပကဘၣ် သ့ၣ်နီၣ်ထီၣ်လၢ ယဟိဝၤယွၤ လၢအမ့ၢ် ပတၢ်ဘၣ်တ့ကစၢ်လၢ အကူၣ်တၢ်သ့ ဒီးအစိကမီၤ ဒိၣ်ကတၢၢ်န့ၣ် အကဲပှၤလၢ အဟံးစုနဲၣ်ကျဲ အတၢ်ကရၢကရိ. ဖဲပနီၢ်ကစၢ် မ့တမ့ၢ် ပှၤလၢပအဲၣ် တဂၤဂၤ လဲၤခီဖျိ တၢ်ကီတၢ်ခဲအခါ ပကဘၣ်အိၣ်ဒီး တၢ်ဝံသးစူၤ ဒီးဆိကမိၣ်ထံလၢ ဘၣ်မနုၤအဃိ ယဟိဝၤယွၤ ဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်. ဒီးဖဲပဆၢတဲာ်လီၤသးလၢ ပကသူပတၢ်ဆၢကတီၢ် ဒီးကျိၣ်စ့တၢ်ထူးတၢ်တီၤ ဒ်လဲၣ်အခါ ပကဘၣ် သ့ၣ်နီၣ်ထီၣ်လၢ ပအိၣ်မူဘၣ်လၢ မုၢ်နံၤခံကတၢၢ်တဖၣ် အဆၢကတီၢ် ဒီးပတၢ်ဆၢကတီၢ် တအိၣ်အါအါလၢၤဘၣ်. မ်ယဟိဝၤယွၤ အတၢ်ဒုးသ့ၣ်နီၣ်ထီၣ် မၤစၢၤပှၤဒ်သိး ပကဆဲးကဲ ပှၤကူၣ်တၢ်သ့ ဒီးမၤစၢၤပှၤ ဒ်သိး ပကဆဲးတီဒီးအီၤထီဘိ.