ဖဲပထံၣ်ဘၣ် တၢ်တတီတလိၤအခါ ပကြၢးမၤဒ်လဲၣ်

၁-၂. ဖဲပှၤအါဂၤထံၣ်ဘၣ် တၢ်တတီတလိၤအခါ အဝဲသ့ၣ် တူၢ်ဘၣ်ဒ်လဲၣ် ဒီးဘၣ်သ့ၣ်သ့ၣ် ပကဆိကမိၣ်ဘၣ်ဒ်လဲၣ်.

ဆၢကတီၢ်ခဲအံၤ ခီဖျိလၢ တၢ်ဂ့ၢ်အါမံၤအဃိ ပှၤတရ့လိာ်သး တီတီလိၤလိၤဘၣ်. အဒိ ပှၤတနီၤန့ၣ် ခီဖျိလၢ အဖှီၣ်, အအိၣ်ဟဲတၢ်လီၢ်, အကလုာ်ဒူၣ် ဒီးတၢ်ဂ့ၢ်အဂၤ တမံၤမံၤအဃိ ပှၤတရ့ဒီးအဝဲသ့ၣ် တီတီလိၤလိၤဘၣ်. တကးဒံးဘၣ် ပှၤမၤစံပွါယ့လၢ အကဲဒိၣ်တနီၤ ဒီးပဒိၣ်တနီၤန့ၣ် အဝဲသ့ၣ် ဆိကမိၣ်ထဲလၢ အကန့ၢ်ဘၣ် စ့အါအါအဃိ ပှၤအါဂၤ ထံၣ်ဘၣ် တၢ်ကီတၢ်ခဲ. ခီဖျိလၢ တၢ်ဂ့ၢ်တဖၣ်အံၤ ဒီးတၢ်ဂ့ၢ်အဂၤ တနီၤအဃိ ပကထံၣ်ဘၣ် တၢ်တတီတလိၤ လၢကျဲတဘိဘိ.

^၂ ပှၤအါဂၤန့ၣ် ခီဖျိလၢ ပှၤတရ့အီၤ တီတီလိၤလိၤဘၣ် ဒီးအထံၣ်ဘၣ်လၢ ပှၤတရ့လိာ်သး တီတီလိၤလိၤဘၣ်အဃိ အဝဲသ့ၣ် သးဒိၣ်ထီၣ်တၢ်. ပဝဲခဲလၢာ်န့ၣ် ပအဲၣ်ဒိးအိၣ်ဘၣ် ပူၤပူၤဖျဲးဖျဲး ဒီးအဲၣ်ဒိးလၢ ပှၤကရ့ပှၤ တီတီလိၤလိၤ. အဃိ ပှၤတနီၤန့ၣ် အဝဲသ့ၣ် ဂုာ်ကျဲးစၢး မၤဘၣ်ထီၣ်က့ၤ တၢ်ကီတၢ်ခဲ လၢအဝဲသ့ၣ် ထံၣ်ဘၣ်ဝဲလၢ ဟီၣ်ခိၣ်ချၢ မ့တမ့ၢ် လၢအနီၢ်ကစၢ်ထံကီၢ်. အဒိ ပှၤတနီၤန့ၣ် ထီဒါက့ၤပဒိၣ် ဒီးထံကီၢ်တၢ်သိၣ်တၢ်သီ မ့တမ့ၢ် အဝဲသ့ၣ် အဲၣ်ဒိးဃုထၢထီၣ် ထံကီၢ်ခိၣ်နၢ်လၢ အအၢၣ်လီၤလၢ ကမၤဘၣ်ထီၣ်က့ၤ တၢ်ကီတၢ်ခဲ. မ့မ့ၢ် ပဝဲခရံာ်ဖိ အမ့ၢ်အတီန့ၣ် ပ “တဘၣ်ဃးဒီး ဟီၣ်ခိၣ်ဘၣ်” ဒီးပအိၣ်ခိးလၢ ကစၢ်ယွၤအဘီမုၢ် ကမၤလီၤမၢ်ကွံာ် တၢ်တတီတလိၤခဲလၢာ်. (ယိၤ ၁၇:၁၆) ဘၣ်ဆၣ် ဖဲပထံၣ်ဘၣ် ပှၤတနီၤ တရ့ဒီးပှၤဂၤ တီတီလိၤလိၤဘၣ်အခါ ပသးတမုာ်ဘၣ် ဒီးတဘျီတခီၣ်န့ၣ် ပသးဒိၣ်ထီၣ်တၢ်. ဘၣ်သ့ၣ်သ့ၣ် ပကဆိကမိၣ်ဘၣ်လၢ ‘ဖဲယထံၣ်ဘၣ် တၢ်တတီတလိၤ ကဲထီၣ်သး ဒ်န့ၣ်အခါ ယကဘၣ်မၤဒ်လဲၣ်. ခဲအံၤ တၢ်လၢယမၤသ့န့ၣ် အိၣ်တမံၤမံၤဧါ.’ ဒ်သိး ပကသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢအဂီၢ် အဆိကတၢၢ်န့ၣ် ပကကွၢ်သကိး ယဟိဝၤယွၤ ဒီးယ့ၣ်ၡူး အတၢ်ထံၣ် ဘၣ်ဃးဒီး တၢ်တတီတလိၤ လၢအကဲထီၣ်သး.

ယဟိဝၤယွၤ ဒီးယ့ၣ်ၡူး သးဟ့တၢ်တတီတလိၤ

၃. ဘၣ်မနုၤအဃိ ပအဲၣ်ဒိးလၢ ပှၤကရ့ပှၤ ဒီးပှၤဂၤ တီတီလိၤလိၤလဲၣ်. (ယၡါယၤ ၅:၇)

^၃ ဘၣ်မနုၤအဃိ ပအဲၣ်ဒိးလၢ ပှၤကရ့ပှၤ ဒီးပှၤဂၤ တီတီလိၤလိၤလဲၣ်န့ၣ် လံာ်စီဆှံ ပာ်ဖျါထီၣ် တၢ်ဂ့ၢ်အိၣ်ဝဲ. လံာ်စီဆှံ ပာ်ဖျါဝဲလၢ ယဟိဝၤယွၤ “အဲၣ်တၢ်တီတၢ်လိၤ ဒီးတၢ်စံၣ်ညီၣ်တီ” တကးဒံးဘၣ် အတ့လီၤပှၤဃုာ်ဒီး တၢ်သ့တၢ်ဘၣ် လၢပကကွၢ်လိအီၤ. (စံး ၃၃:၅; ၁ မိၤ ၁:၂၆) ယဟိဝၤယွၤန့ၣ် အရ့ပှၤဂၤ တီတီလိၤလိၤ ဒီးအဘၣ်သးလၢ ပကရ့ပှၤဂၤ တီတီလိၤလိၤစ့ၢ်ကီး. (၅ မိၤ ၃၂:၃, ၄; မံ ၆:၈; ကၤ ၇:၉) အဒိ ဖဲဝံယၡါယၤ အစိၤန့ၣ် ပှၤအံၣ်စရ့လးဖိတဖၣ် တရ့လိာ်သး တီတီလိၤလိၤဘၣ်. ဒီးပှၤအံၣ်စရ့လးဖိလၢ ပှၤတရ့အီၤ တီတီလိၤလိၤဘၣ် “အတၢ်ကိးပသူ” န့ၣ် ယဟိဝၤယွၤ နၢ်ဟူဝဲ. (ဖး ယၡါယၤ ၅:၇.) အဃိ ပှၤအံၣ်စရ့လးဖိလၢ အတမၤထွဲ ယဟိဝၤယွၤ အတၢ်သိၣ်တၢ်သီဘၣ် ဒီးတရ့ပှၤဂၤ တီတီလိၤလိၤဘၣ်န့ၣ် ယဟိဝၤယွၤ စံၣ်ညီၣ်အဝဲသ့ၣ်.—ၡါ ၅:၅, ၁၃.

၄. ဖဲပှၤတရ့ပှၤဂၤ တီတီလိၤလိၤဘၣ်အခါ ယ့ၣ်ၡူးတူၢ်ဘၣ်ဝဲဒ်လဲၣ်. (ကွၢ်စ့ၢ်ကီးတၢ်ဂီၤ.)

^၄ ဒ်ယဟိဝၤယွၤအသိး ယ့ၣ်ၡူးစ့ၢ်ကီး အအဲၣ်တၢ်စံၣ်ညီၣ်တီ ဒီးအသးဟ့ တၢ်တတီတလိၤ. ဘၣ်တဘျီန့ၣ် ယ့ၣ်ၡူးထံၣ်ဝဲ ပိာ်ခွါလၢ အစုတဂ့ၤဘၣ်တဂၤ. ယ့ၣ်ၡူး သးကညီၤအီၤအဃိ အမၤဘျါက့ၤအီၤ. ဘၣ်ဆၣ် ဖဲတၢ်ဘူၣ်တၢ်ဘါခိၣ်နၢ်တဖၣ် ထံၣ်ဝဲဒ်န့ၣ်အခါ အဝဲသ့ၣ် သးဒိၣ်ထီၣ်တၢ်. ပိာ်ခွါလၢ အစုတဂ့ၤဘၣ်တဂၤအံၤ ဘျါက့ၤန့ၣ် အဝဲသ့ၣ် တသးခုစၢၤအီၤဘၣ်. ဒီးအဝဲသ့ၣ် တဲဝဲလၢ ယ့ၣ်ၡူး တမၤထွဲ မုၢ်အိၣ်ဘှံးနံၤ အတၢ်သိၣ်တၢ်သီဘၣ်. ယ့ၣ်ၡူး ထံၣ်ဝဲလၢ “အဝဲသ့ၣ် အတၢ်ဒိသူၣ်ဒိသး တအိၣ်ဘၣ်အဃိ ယ့ၣ်ၡူး သးဘၣ်ဒိ ဒိၣ်မး.”—မၢ် ၃:၁-၆.

၅. ခီဖျိလၢ တၢ်တတီတလိၤအဃိ ပမ့ၢ်သးဒိၣ်ထီၣ်တၢ်န့ၣ် ပကဘၣ် သ့ၣ်နီၣ်ထီၣ် မနုၤလဲၣ်.

^၅ ဖဲယဟိဝၤယွၤ ဒီးယ့ၣ်ၡူးထံၣ်ဝဲ ပှၤတရ့ပှၤဂၤ တီတီလိၤလိၤဘၣ်အခါ အဝဲသ့ၣ် သးဒိၣ်ထီၣ်တၢ်. အဃိ ပမ့ၢ်တူၢ်ဘၣ် ဒ်န့ၣ်န့ၣ် အတကမၣ် စ့ၢ်ကီးဘၣ်. (အ့း ၄:၂၆) သနာ်က့ ဖဲပသးဒိၣ်ထီၣ်တၢ်အခါ ပကဘၣ်ပၢၤပသး ဒီးသ့ၣ်နီၣ်ထီၣ်လၢ ပမၤလီၤမၢ်ကွံာ် တၢ်ကီတၢ်ခဲ တန့ၢ်ဘၣ်. တကးဒံးဘၣ် ပမ့ၢ်သးဒိၣ်ထီၣ်တၢ် ဖးယံာ်န့ၣ် ကမၤဘၣ်ဒိ ပတၢ်အိၣ်ဆူၣ်အိၣ်ချ့ ဒီးပသးကဟးဂီၤနးမး. (စံး ၃၇:၁, ၈; ယၤ ၁:၂၀) အဃိ ဖဲပှၤတရ့ပှၤ ဒီးပှၤဂၤ တီတီလိၤလိၤဘၣ်အခါ ပကဘၣ်မၤဒ်လဲၣ်. ပဟံးန့ၢ် တၢ်မၤလိလၢ ယ့ၣ်ၡူးအဒိအတဲာ်သ့.

ဖဲပှၤဂၤထံၣ်ဘၣ် တၢ်တတီတလိၤအခါ ယ့ၣ်ၡူးမၤဝဲဒ်လဲၣ်

၆. ဖဲယ့ၣ်ၡူးအစိၤန့ၣ် ပှၤအါဂၤထံၣ်ဘၣ် တၢ်တတီတလိၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၆ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အထံၣ်ဘၣ်လၢ ပှၤအါဂၤန့ၣ် ပှၤတရ့အဝဲသ့ၣ် တီတီလိၤလိၤဘၣ်. အသ့ၣ်ညါဝဲလၢ တၢ်ဘူၣ်တၢ်ဘါခိၣ်နၢ်တဖၣ်န့ၣ် မၤအါထီၣ် တၢ်သိၣ်တၢ်သီ ဒီးအကီဒိၣ်မးလၢ ပှၤကမၤထွဲဝဲ. (မး ၂၃:၂-၄) တကးဒံးဘၣ် ပှၤပၢတၢ်တဖၣ် လၢဝ့ၢ်ရိမ့ၤအပူၤန့ၣ် အဝဲသ့ၣ် ရ့ဒီးပှၤဂၤ အၢအၢသီသီ. အဃိ ပှၤယူဒၤဖိအါဂၤ အဲၣ်ဒိး ထူၣ်ဖျဲးထီၣ်လၢ ပှၤရိမ့ၤဖိ အတၢ်ပၢဖီလာ်. ဒီးအဝဲသ့ၣ်တနီၤန့ၣ် ဒုးအိၣ်ထီၣ်ဝဲ ကရူၢ်တဖၣ်လၢ အထီဒါက့ၤ ပှၤရိမ့ၤဖိ. သနာ်က့ ယ့ၣ်ၡူး တဆီၣ်ထွဲကရူၢ်လၢ အထီဒါက့ၤတၢ် နီတဖုဘၣ်. ဒီးဖဲယ့ၣ်ၡူး သ့ၣ်ညါဝဲလၢ ပှၤဂီၢ်မုၢ် အဲၣ်ဒိးဒုးကဲထီၣ်အီၤလၢ စီၤပၤအခါ ယ့ၣ်ၡူးဟးယံၤထီၣ်ဒီး အဝဲသ့ၣ်.—ယိၤ ၆:၁၅.

၇-၈. ဖဲယ့ၣ်ၡူး အိၣ်လၢဟီၣ်ခိၣ်ချၢအခါ ဘၣ်မနုၤအဃိ အတမၤကတၢၢ်ကွံာ် တၢ်တတီတလိၤလဲၣ်. (ယိၤဟၣ် ၁၈:၃၆)

^၇ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အတဂုာ်ကျဲးစၢး မၤကတၢၢ်ကွံာ် တၢ်တတီတလိၤ ဒီးအတမၤဘၣ်ဃးသးဒီး ထံဂ့ၢ်ကီၢ်ဂ့ၢ်ဘၣ်. ဘၣ်မနုၤအဃိလဲၣ်. ယ့ၣ်ၡူး သ့ၣ်ညါဝဲလၢ ပှၤဟီၣ်ခိၣ်ဖိ တအိၣ်ဒီး တၢ်ခွဲးတၢ်ယာ် ဒီးတၢ်သ့တၢ်ဘၣ်လၢ ကပၢပှၤဂၤ အဂီၢ်ဘၣ်. (စံး ၁၄၆:၃; ယံး ၁၀:၂၃) တကးဒံးဘၣ် တၢ်ဂ့ၢ်လၢ အဒုးအိၣ်ထီၣ် တၢ်တတီတလိၤ လၢအမ့ၢ် မုၣ်ကီၤလံၢ် ဒီးတၢ်တလၢတပှဲၤန့ၣ် ပှၤဟီၣ်ခိၣ်ဖိ မၤလီၤမၢ်ကွံာ်ဝဲ တန့ၢ်ဘၣ်. မုၣ်ကီၤလံၢ်လၢ အကဲပှၤလၢ အမၤသံတၢ်န့ၣ် ပၢဝဲဟီၣ်ခိၣ် ဒီးအသူဝဲ အတၢ်စိတၢ်ကမီၤလၢ ကဒုးအိၣ်ထီၣ် တၢ်တတီတလိၤ. (ယိၤ ၈:၄၄; အ့း ၂:၂) ဒီးခီဖျိလၢ ပှၤဟီၣ်ခိၣ်ဖိ တကဲ ပှၤလၢပှၤပှဲၤဘၣ်အဃိ အဝဲသ့ၣ်မ့ၢ်ကဲ ပှၤလၢအသးဂ့ၤ သနာ်က့ အဝဲသ့ၣ် တမၤတၢ် တီတီလိၤလိၤ ထီဘိဘၣ်.—စံၣ် ၇:၂၀.

^၈ ယ့ၣ်ၡူး သ့ၣ်ညါဝဲလၢ ကစၢ်ယွၤအဘီမုၢ် ကမၤလီၤမၢ်ကွံာ်ဝဲ တၢ်ဂ့ၢ်လၢ အဒုးအိၣ်ထီၣ် တၢ်တတီတလိၤခဲလၢာ်. အဃိ ယ့ၣ်ၡူး ဂုာ်ကျဲးစၢး ဟ့ၣ်လီၤအသးလၢ က “စံၣ်တဲၤတဲလီၤ ကစၢ်ယွၤအဘီမုၢ် တၢ်သးခုကစီၣ်.” (လူၤ ၈:၁) ယ့ၣ်ၡူး မၤမုာ်ထီၣ်က့ၤ “ပှၤလၢအလီကီ တၢ်တီတၢ်လိၤ” တဖၣ်အသး ဒီးတဲဘၣ်အဝဲသ့ၣ်လၢ တၢ်ကီတၢ်ခဲ ဒီးတၢ်တတီတလိၤ ကကတၢၢ်ကွံာ်ဝဲခဲလၢာ်. (မး ၅:၆; လူၤ ၁၈:၇, ၈) ပှၤဟီၣ်ခိၣ်ဖိ အတၢ်ပၢ မၤကတၢၢ်ကွံာ်ဝဲ တသ့ဘၣ်. အဃိ ကစၢ်ယွၤအဘီမုၢ် ကမၤကတၢၢ်ကွံာ်ဝဲ ဒီးဘီမုၢ်အံၤ “တဘၣ်ဃးဒီး ဟီၣ်ခိၣ်အံၤဘၣ်.”—ဖး ယိၤဟၣ် ၁၈:၃၆.

ဖဲနထံၣ်ဘၣ် တၢ်တတီတလိၤအခါ ကွၢ်လိယ့ၣ်ၡူး

၉. ဘၣ်မနုၤအဃိ နနာ်လၢ ကစၢ်ယွၤအဘီမုၢ် ကမၤကတၢၢ်ကွံာ် တၢ်တတီတလိၤလဲၣ်.

^၉ ဆၢကတီၢ်ခဲအံၤ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အဃိ ပထံၣ်ဘၣ် တၢ်တတီတလိၤ အါန့ၢ်ဒံး ဖဲယ့ၣ်ၡူး အစိၤဒံး. ဘၣ်ဆၣ် ဒ်လၢညါအသိး ပှၤလၢအဒုးအိၣ်ထီၣ် တၢ်ကီတၢ်ခဲန့ၣ် အကဲဝဲ မုၣ်ကီၤလံၢ် ဒီးပှၤဟီၣ်ခိၣ်ဖိလၢ အအၢအသီတဖၣ်. (၂ တံၤ ၃:၁-၅, ၁၃; လီၣ် ၁၂:၁၂) ဒီးဒ်ယ့ၣ်ၡူးအသိး ပသ့ၣ်ညါလၢ ကစၢ်ယွၤအဘီမုၢ် ကမၤဟးဂီၤကွံာ် မုၣ်ကီၤလံၢ် လၢအကဲပှၤလၢ အဒုးအိၣ်ထီၣ် တၢ်တတီတလိၤ ဒီးကမၤကတၢၢ်ကွံာ် တၢ်အၢတၢ်သီခဲလၢာ်. ခီဖျိလၢ ပစံၣ်တဲၤတဲလီၤ ဘၣ်ဃးဒီး ကစၢ်ယွၤအဘီမုၢ် အဂ့ၢ်အဃိ ပတထီဒါက့ၤ ပဒိၣ်တဖၣ် ဒီးပတနာ်လၢ အဝဲသ့ၣ် ကမၤကတၢၢ်ကွံာ် တၢ်တတီတလိၤဘၣ်. ဆိကမိၣ်ကွၢ် ဒီပုၢ်ဝဲၢ်မုၣ်စတ့စံၤa အတၢ်လဲၤခီဖျိ. ဒီပုၢ်ဝဲၢ်မုၣ်အံၤ တချုးလၢ အသ့ၣ်ညါ တၢ်မ့ၢ်တၢ်တီဒံးဘၣ်န့ၣ် အပၣ်ဃုာ်လၢ ပှၤထီဒါတၢ်ကရူၢ် ဒီးအလဲၤထီဒါတၢ်ထီဘိ. အမၤဝဲဒ်န့ၣ် တတီၤဖိ ဒီးအဆိကမိၣ်ဝဲလၢ တၢ်လၢအမၤဝဲအံၤ ကကဲဘျုးလၢ ပှၤဂၤအဂီၢ် ဒီးမၤဂ့ၤထီၣ်က့ၤ တၢ်အိၣ်သးနီၢ်ကီၢ်ဧါ. အတဲဝဲလၢ “ယဆိကမိၣ်လီၤသးလၢ ယလဲၤထီဒါတၢ် သနာ်က့ မ့ၢ်ယမၤလၢ တၢ်တီတၢ်လိၤအဂီၢ် နီၢ်ကီၢ်ဧါ. မ့မ့ၢ်ခဲအံၤန့ၣ် ယသ့ၣ်ညါ ဒီးနာ်သပှၢ်တၢၢ်လၢ ကစၢ်ယွၤအဘီမုၢ် ကမၤဘၣ်ထီၣ်က့ၤ တၢ်ကီတၢ်ခဲ ခဲလၢာ်. ဒီးတၢ်ကီတၢ်ခဲလၢ ယမၤလီၤမၢ်ကွံာ် တသ့ဘၣ်န့ၣ် ယသ့ၣ်ညါလၢ ယဟိဝၤယွၤ ကမၤလီၤမၢ်ကွံာ်ဝဲ ခဲလၢာ်.”—စံး ၇၂:၁, ၄.

၁၀. ဒ် မးသဲ ၅:၄၃-၄၈ ပာ်ဖျါဝဲအသိး ဘၣ်မနုၤအဃိ ပတဂုာ်ကျဲးစၢး ဆီတလဲပဒိၣ် ဒီးထံကီၢ် တၢ်သိၣ်တၢ်သီဘၣ်လဲၣ်. (ကွၢ်စ့ၢ်ကီးတၢ်ဂီၤ.)

^၁၀ ဆၢကတီၢ်ခဲအံၤ ပှၤအါဂၤပၣ်ဃုာ်လၢ ကရူၢ်တဖၣ်လၢ အဂုာ်ကျဲးစၢး ဆီတလဲပဒိၣ် ဒီးထံကီၢ် တၢ်သိၣ်တၢ်သီ. ဘၣ်ဆၣ် အဝဲသ့ၣ်အါဂၤန့ၣ် အတၢ်ပာ်သး တဂ့ၤဘၣ်. အဒိ အဝဲသ့ၣ် သးထီၣ်တၢ်ချ့, တဒိကနၣ် တၢ်သိၣ်တၢ်သီဘၣ် ဒီးမၤဆါပှၤဂၤ. ယ့ၣ်ၡူး တသိၣ်လိပှၤလၢ ပကမၤဒ်န့ၣ်ဘၣ်. (အ့း ၄:၃၁) ဒီပုၢ်ဝဲၢ်ခွါ ကၠဲဖရံၤ တဲဝဲလၢ “ဖဲပှၤထီဒါတၢ်အခါ ပှၤထီဒါတၢ်တဖၣ်န့ၣ် အဝဲသ့ၣ် သးထီၣ်တၢ်ချ့, မၤဟးဂီၤတၢ်, ဟုၣ်တၢ် ဒီးမၤဘၣ်ဒိလိာ်သး.” ဘၣ်ဆၣ် ယ့ၣ်ၡူးသိၣ်လိပှၤလၢ ပကရ့ဒီး ပှၤကိးဂၤဒဲးဂ့ၤဂ့ၤ ဃုာ်ဒီး ပှၤလၢအတၢ်ထံၣ် တဒ်သိးဒီးပှၤ မ့တမ့ၢ် မၤအၢမၤနးပှၤ. (ဖး မးသဲ ၅:၄၃-၄၈.) အဃိ ပဂုာ်ကျဲးစၢး ကွၢ်လိယ့ၣ်ၡူး အဒိအတဲာ် လၢအဂ့ၤကတၢၢ်.

၁၁. ဘၣ်မနုၤအဃိ ပကွၢ်လိ ယ့ၣ်ၡူးအဒိအတဲာ် တညီထီဘိဘၣ်လဲၣ်.

^၁၁ ပသ့ၣ်ညါလၢ ယွၤအဘီမုၢ် ကမၤကတၢၢ်ကွံာ် တၢ်ကီတၢ်ခဲခဲလၢာ် သနာ်က့ ပှၤမ့ၢ်တရ့ပှၤ ဂ့ၤဂ့ၤဘၣ်န့ၣ် ပကွၢ်လိ ယ့ၣ်ၡူးအဒိအတဲာ် တညီထီဘိဘၣ်. အဒိ ဒီပုၢ်ဝဲၢ်မုၣ်ကၠါနံၤယၤန့ၣ် ခီဖျိလၢ အဖံးဘ့ၣ်လွဲၢ်အဃိ ပှၤတရ့အီၤဂ့ၤဂ့ၤဘၣ်. အတဲဝဲလၢ “တၢ်လၢပှၤတဲဝဲန့ၣ် မၤဘၣ်ဒိယသး ဒီးယသးထီၣ်တၢ်ဒိၣ်မး. ယဘၣ်သးလၢ ပှၤတဲတၢ်တဖၣ်န့ၣ် ကဘၣ်တၢ်စံၣ်ညီၣ်. ယဆိကမိၣ်လၢ ယကဆီၣ်ထွဲ ပှၤထီဒါတၢ်ကရူၢ် လၢအထီဒါန့ၢ်တၢ်လၢ ပှၤလၢပှၤထံၣ်ဆံးအီၤ ခီဖျိလၢ အကလုာ်ဒူၣ် ဒီးအဖံးဘ့ၣ်လွဲၢ်အဂီၢ်. ယဆိကမိၣ်လၢ ယမ့ၢ်မၤဒ်န့ၣ်န့ၣ် ယတူၢ်ဘၣ်ကမုာ်.” လၢခံန့ၣ် ကၠါနံၤယၤ သ့ၣ်ညါလီၤသးလၢ အကဘၣ်ဆီတလဲက့ၤ အတၢ်ဆိကမိၣ်. အတဲဝဲလၢ “ယသ့ၣ်ညါလီၤသးလၢ ယနာ်ဘၣ် တၢ်ဂ့ၢ်လၢ ပှၤဂၤတဲဝဲ ဒီးယတနာ်န့ၢ် ယဟိဝၤယွၤလၢၤဘၣ်. ယဆၢတဲာ်လီၤသးလၢ ယတမၤဘၣ်ဃးသးဒီး ပှၤထီဒါတၢ်ကရူၢ် နီတစဲးလၢၤဘၣ်.” ဖဲပှၤတရ့ပှၤ ဒီးပှၤဂၤ တီတီလိၤလိၤဘၣ်အခါ ပကဘၣ်ပလီၢ်သး ဒီးပၢၤပသး. ဒီးပတဘၣ် မၤဘၣ်ဃးသးဒီး ဟီၣ်ခိၣ်နီတစဲးဘၣ်.—ယိၤ ၁၅:၁၉.

၁၂. ဘၣ်မနုၤအဃိ ပကဘၣ်ပလီၢ်သး ဘၣ်ဃးဒီး တၢ်ဂ့ၢ်လၢပဖး, ပကွၢ် ဒီးပဒိကနၣ်အီၤလဲၣ်.

^၁၂ ဖဲပှၤတရ့ပှၤ ဒီးပှၤဂၤ တီတီလိၤလိၤဘၣ်အခါ ဒ်သိး ပကပာ်ပသး မုာ်မုာ်အဂီၢ် တၢ်မနုၤကမၤစၢၤပှၤလဲၣ်. တၢ်လၢပမၤသ့ တမံၤန့ၣ်မ့ၢ်ဝဲ ပပလီၢ်သး ဘၣ်ဃးဒီး တၢ်ဂ့ၢ်လၢပဖး, ပကွၢ် ဒီးပဒိကနၣ်. တၢ်ဂ့ၢ်တနီၤလၢ အ့ၤထၢၤနဲၣ် မ့တမ့ၢ် မံဒံယါ အပူၤန့ၣ် မၤပျံၤမၤဖုး ပှၤကမျၢၢ် ဒီးဆီၣ်ထွဲပှၤဂၤလၢ ကထီဒါက့ၤပဒိၣ်. ဒီးအါဘျီန့ၣ် ပှၤတဲတၢ်ကစီၣ်တဖၣ် တဲဖျါထီၣ် အနီၢ်ကစၢ်တၢ်ထံၣ် ဒီးတတဲတၢ်ဂ့ၢ်လၢ အကဲထီၣ်သး နီၢ်ကီၢ်ဘၣ်. တၢ်ကစီၣ်တနီၤန့ၣ် အမ့ၢ်ဘၣ် သနာ်က့ ပမ့ၢ်ဆဲးဖးအီၤန့ၣ် မ့ၢ်ပမၤဂ့ၤထီၣ်က့ၤ တၢ်အိၣ်သးကသ့ဧါ. ပမ့ၢ်ကွၢ် ဒီးဖးတၢ်ကစီၣ် အါတလၢန့ၣ် ပတၢ်ကိၢ်တၢ်ဂီၤ ကအါထီၣ်, ပသးကလီၤစၢ် ဒီးသးဒိၣ်ထီၣ်တၢ်. (ကတိၤ ၂၄:၁၀) ဘၣ်သ့ၣ်သ့ၣ် ပတပာ်ဆိ ယွၤအဘီမုၢ် လၢပတၢ်အိၣ်မူပူၤလၢၤဘၣ်. ဒီးယွၤအဘီမုၢ် ကမၤဂ့ၤထီၣ်က့ၤ တၢ်အိၣ်သးန့ၣ် ဘၣ်သ့ၣ်သ့ၣ် ပတနီၣ်ဘၣ်လၢၤဘၣ်.

၁၃. ပမ့ၢ်ဖးလံာ်စီဆှံ ဒီးဆိကမိၣ်ထံ တၢ်ဂ့ၢ်လၢပဖးန့ၣ် ကမၤစၢၤပှၤဒ်လဲၣ်.

^၁၃ ပမ့ၢ်ဖးလံာ်စီဆှံ ဒီးဆိကမိၣ်ထံ တၢ်ဂ့ၢ်လၢပဖးန့ၣ် ကမၤစၢၤပှၤစ့ၢ်ကီး. ဖဲဒီပုၢ်ဝဲၢ်မုၣ် အလံယၤထံၣ်ဝဲ ပှၤတရ့ပှၤဂၤ ဂ့ၤဂ့ၤဘၣ်အခါ အသးဘၣ်ဒိဒိၣ်မး. အထံၣ်ဘၣ်လၢ ပှၤမၤတၢ် တတီတလိၤတဖၣ်န့ၣ် ပှၤတစံၣ်ညီၣ်အဝဲသ့ၣ်ဘၣ်အဃိ အသးထီၣ်တၢ်ဒိၣ်မး. အတဲဝဲလၢ “ယမ့ၢ်နာ် သပှၢ်တၢၢ်လၢ ယဟိဝၤယွၤ ကမၤဘၣ်ထီၣ်က့ၤ တၢ်ကီတၢ်ခဲ တဖၣ်အံၤန့ၣ် ယကဘၣ်ဆီတလဲ ယတၢ်ဆိကမိၣ်. ဖဲန့ၣ်အခါ ဘၣ်လၢ ယဖး ယိၤဘး ၃၄:၂၂-၂၉. လံာ်စီဆှံအဆၢတဖၣ်အံၤ ဒုးသ့ၣ်နီၣ်ထီၣ်ယၤလၢ တၢ်ကဲထီၣ်သး ခဲလၢာ်န့ၣ် ယဟိဝၤယွၤထံၣ်ဝဲ. ပှၤလၢအစံၣ်ညီၣ်တၢ်တီ ဒီးမၤဘၣ်ထီၣ်က့ၤ တၢ်ကီတၢ်ခဲလၢ ပှၤကိးဂၤဒဲး ထံၣ်ဘၣ်ဝဲ သ့ကတၢၢ်န့ၣ် မ့ၢ်ထဲယဟိဝၤယွၤလီၤ.” ဘၣ်ဆၣ် ဖဲပအိၣ်ခိးလၢ ယွၤအဘီမုၢ် ကမၤဘၣ်ထီၣ်က့ၤ တၢ်ကီတၢ်ခဲအခါ ခဲအံၤန့ၣ် ပမၤမနုၤသ့လဲၣ်.

ခဲအံၤ ပမၤမနုၤသ့လဲၣ်

၁၄. ပှၤမ့ၢ်တရ့ဒီးပှၤဂၤ ဂ့ၤဂ့ၤဘၣ် သနာ်က့ ပကြၢးမၤမနုၤလဲၣ်. (ကလီးစဲ ၃:၁၀, ၁၁)

^၁၄ ပှၤမ့ၢ်တရ့ပှၤဂၤ ဂ့ၤဂ့ၤဘၣ် သနာ်က့ ပကြၢးရ့ဒီးပှၤဂၤဂ့ၤဂ့ၤ. ဒ်ပမၤလိဘၣ်အသိး ပကွၢ်လိယ့ၣ်ၡူးခီဖျိ ပပာ်ဖျါထီၣ် တၢ်အဲၣ်ပှၤဂၤ. အဃိ ပဂုာ်ကျဲးစၢး ရ့ဒီးပှၤကိးဂၤဒဲးဂ့ၤဂ့ၤ ဃုာ်ဒီး ပှၤလၢအမၤအၢမၤနးပှၤ. (မး ၇:၁၂; ရိ ၁၂:၁၇) ပမ့ၢ်ရ့ဒီးပှၤကိးဂၤဒဲးဂ့ၤဂ့ၤ ဒီးတီတီလိၤလိၤန့ၣ် ယဟိဝၤယွၤ ဘၣ်သူၣ်ဘၣ်သးဝဲ.—ဖး ကလီးစဲ ၃:၁၀, ၁၁.

၁၅. ပမ့ၢ်တဲဘၣ်ပှၤဂၤ လံာ်စီဆှံ တၢ်မ့ၢ်တၢ်တီန့ၣ် ကမၤစၢၤ အဝဲသ့ၣ်ဒ်လဲၣ်.

^၁၅ တၢ်အဂ့ၤကတၢၢ်တမံၤလၢ ပမၤသ့န့ၣ်မ့ၢ်ဝဲ ပတဲဘၣ်ပှၤဂၤ ဘၣ်ဃးဒီး ယဟိဝၤယွၤ. ဖဲပှၤတဂၤ သ့ၣ်ညါထီၣ် ယဟိဝၤယွၤအဂ့ၢ် ဒီးအဲၣ်ဒိးမၤ တၢ်ဘၣ်အသးအခါ အကဆီတလဲ အတၢ်အိၣ်မူ, ကဲထီၣ်ပှၤလၢအသးဂ့ၤ ဒီးအကပာ်ဖျါထီၣ် တၢ်အဲၣ်. (ၡါ ၁၁:၆, ၇, ၉) အဒိ တချုးလၢ ပိာ်ခွါတဂၤ လၢအမံၤမ့ၢ် ကၠမီ သ့ၣ်ညါ တၢ်မ့ၢ်တၢ်တီ ဒံးဘၣ်န့ၣ် အတူၢ်ဘၣ်ဝဲလၢ ပဒိၣ်ပၢတၢ် တဂ့ၤဘၣ်အဃိ အပၣ်ဃုာ်လၢ ပှၤထီဒါတၢ်ကရူၢ်. အတဲဝဲ “နမၢဆူၣ်ပှၤဂၤလၢ အကဆီတလဲသး တသ့ဘၣ်. ဘၣ်ဆၣ် လံာ်စီဆှံ တၢ်မ့ၢ်တၢ်တီ ဆီတလဲအီၤသ့. ယၤန့ၣ် လံာ်စီဆှံ တၢ်မ့ၢ်တၢ်တီ မၤစၢၤယၤလၢ ယကဆီတလဲ ယတၢ်အိၣ်မူ.” တၢ်ဂ့ၢ်လၢ ကၠမီ မၤလိဘၣ်ဝဲန့ၣ် မၤစၢၤအီၤလၢ အတပၣ်ဃုာ်လၢ ပှၤထီဒါတၢ် အကျါလၢၤဘၣ်. အဃိ ပမ့ၢ်တဲဘၣ်ပှၤဂၤ လံာ်စီဆှံ တၢ်မ့ၢ်တၢ်တီန့ၣ် ကမၤစၢၤအီၤလၢ အကဆီတလဲ အတၢ်အိၣ်မူ ဒီးပှၤလၢအမၤ တၢ်တတီတလိၤန့ၣ် ကစှၤလီၤဝဲ.

၁၆. ဘၣ်မနုၤအဃိ နအဲၣ်ဒိးတဲပှၤဂၤ ဘၣ်ဃးဒီး တၢ်လၢ ယွၤအဘီမုၢ် ကမၤဝဲအဂ့ၢ်လဲၣ်.

^၁၆ ဒ်ယ့ၣ်ၡူးအသိး ပသးဆူၣ်လၢ ပကတဲဘၣ်ပှၤဂၤ ဘၣ်ဃးဒီး ယွၤအဘီမုၢ် ကမၤကတၢၢ်ကွံာ် တၢ်တတီတလိၤ ခဲလၢာ်. တၢ်မုၢ်လၢ်အံၤ ကကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ပှၤလၢ ပှၤရ့အီၤတဂ့ၤဘၣ် အဂီၢ်ဒိၣ်မး. (ယံး ၂၉:၁၁) စတ့စံၤ လၢပတဲတ့ၢ်အဂ့ၢ်န့ၣ် အတဲဝဲလၢ “ယသ့ၣ်ညါလၢ ကစၢ်ယွၤ ကမၤကတၢၢ်ကွံာ် တၢ်ကီတၢ်ခဲအဃိ ဖဲပှၤတရ့ယၤ ဂ့ၤဂ့ၤဘၣ် ဒီးယထံၣ်လၢ ပှၤတရ့ပှၤဂၤ ဂ့ၤဂ့ၤဘၣ်အခါ ယပာ်ယသးမုာ်မုာ်သ့. ယဟိဝၤယွၤ မၤမုာ်ထီၣ်ပသး ခီဖျိ အဒုးသ့ၣ်ညါပှၤ တၢ်မုၢ်လၢ်လၢ လံာ်စီဆှံအပူၤ.” အဃိ ပကဘၣ် အိၣ်ကတီၤသးလၢ ပကတဲဘၣ်ပှၤဂၤ တၢ်မုၢ်လၢ်လၢ လံာ်စီဆှံ ပာ်ဖျါထီၣ်ဝဲထီဘိ. ပမ့ၢ်နၢ်ပၢၢ်အါထီၣ် လံာ်စီဆှံ အတၢ်သိၣ်လိ ဘၣ်ဃးဒီး ဘၣ်မနုၤအဃိ တၢ်တတီတလိၤ အိၣ်ထီၣ်လဲၣ် ဒီးယဟိဝၤယွၤ ကမၤကတၢၢ်ကွံာ် တၢ်ကီတၢ်ခဲ ဒ်လဲၣ်န့ၣ် ကမၤစၢၤပှၤဒ်သိး ပကနာ်အါထီၣ် လံာ်စီဆှံ တၢ်မ့ၢ်တၢ်တီတဖၣ်. အဃိ လၢကၠိမ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ဖဲတၢ်ခွဲးတၢ်ယာ်အိၣ်ထီၣ် အခါ ပကတဲဘၣ်ပှၤဂၤ လံာ်စီဆှံ တၢ်မ့ၢ်တၢ်တီဒူဒူ.b

၁၇. တၢ်တတီတလိၤ လၢပထံၣ်ဘၣ် ခဲအံၤန့ၣ် ဒ်သိး ပလဲၤခီဖျိအီၤ ကန့ၢ်အဂီၢ် ယဟိဝၤယွၤ မၤစၢၤပှၤဒ်လဲၣ်.

^၁၇ ပသ့ၣ်ညါလၢ မုၣ်ကီၤလံၢ်န့ၣ် အကဲဝဲ “ဟီၣ်ခိၣ်အခိၣ်” အဃိ ပကဆဲး ထံၣ်ဘၣ်ဒံး တၢ်ကီတၢ်ခဲ. ဘၣ်ဆၣ် ပတၢ်မုၢ်လၢ်အိၣ်ဒံး. ယဟိဝၤယွၤ အၢၣ်လီၤဝဲလၢ ခဲအံၤန့ၣ် အကမၤစၢၤပှၤ, ကမၤကတၢၢ်ကွံာ် တၢ်အၢတၢ်သီခဲလၢာ် ဒီးအကမၤဟးဂီၤကွံာ် မုၣ်ကီၤလံၢ်. (ယိၤ ၁၂:၃၁) အဒိ ဘၣ်မနုၤအဃိ တၢ်ကီတၢ်ခဲ အိၣ်အါမးလဲၣ်န့ၣ် ယဟိဝၤယွၤ တဲဘၣ်ပှၤလၢ လံာ်စီဆှံပူၤ ဒီးပှၤလၢ ပှၤတရ့အီၤ ဂ့ၤဂ့ၤဘၣ်န့ၣ် အသးအိၣ်ဝဲ. (စံး ၃၄:၁၇-၁၉) ဒီးဖဲပှၤတရ့ပှၤ ဂ့ၤဂ့ၤဘၣ်အခါ ပကဘၣ် မၤဆၢက့ၤဒ်လဲၣ်န့ၣ် ယ့ၣ်ၡူး သိၣ်လိပာ်စၢၤပှၤဂ့ၤဂ့ၤ. တယံာ်လၢၤဘၣ်န့ၣ် ယွၤအဘီမုၢ် ကမၤကတၢၢ်ကွံာ် တၢ်တတီတလိၤ ဒီးပှၤဟီၣ်ခိၣ်ဖိ တထံၣ်ဘၣ် တၢ်ကီတၢ်ခဲ နီတဘျီလၢၤဘၣ်. (၂ ပ့း ၃:၁၃) မ်ပဂုာ်ကျဲးစၢး စံၣ်တဲၤတဲလီၤ တၢ်သးခုကစီၣ် ဘၣ်ဃးဒီး ယွၤအဘီမုၢ်အဂ့ၢ် လၢတၢ်သးဆူၣ် ဒီးဆဲးခိးကွၢ်လၢ် တၢ်ဆၢကတီၢ်ဖဲ ဟီၣ်ခိၣ် ကပှဲၤဝဲဒီး “တၢ်စံၣ်ညီၣ်တီ ဒီးတၢ်တီတၢ်လိၤ” ထီဘိ.—ၡါ ၉:၇.