ကစၢ်ယွၤ အတၢ်အဲၣ်န့ၣ် အိၣ်ဂၢၢ်ဆိးကျၢၤ လီၤထူလီၤယိာ်

၁-၂. ဒီပုၢ်ဝဲၢ်မုၣ်ခွါအါဂၤ လဲၤခီဖျိဘၣ် တၢ်အိၣ်သးကီခဲ မနုၤလဲၣ်.

ထံၣ်တမှံကွၢ်လၢ ကဘီတဘ့ၣ် အိၣ်လၢပီၣ်လဲၣ်ပူၤ ဒီးကလံၤမုၢ်လီၤဝဲနးမး. လပီဆီၣ်သနံးဝဲ ကဘီဆူၣ်မးအဃိ ကဘီတဂၢၢ်လၢၤဘၣ် ဒီးထီၣ်လီၤထီၣ်လီၤဝဲ. ပှၤဒိးကဘီတဖၣ် မ့ၢ်တတ့ၢ်လီၤ ကဘီအနီၣ်သက့ၤဘၣ်န့ၣ် ကဘီအံၤ ကလဲၤဝဲဒ် လပီဆီၣ်အီၤအသိး. အဃိ ဖဲကလံၤမုၢ် ဖးဒိၣ်လီၤဝဲအခါ ပှၤမ့ၢ်တ့ၢ်လီၤ ကဘီအနီၣ်သက့ၤမး ကဘီကအိၣ်ဂၢၢ် ဒီးတလီၤဘျၢဘၣ်.

^၂ ဖဲနလဲၤခီဖျိ တၢ်အိၣ်သးကီခဲ နးမးအခါ ဘၣ်သ့ၣ်သ့ၣ် နကတူၢ်ဘၣ်လၢ နလီၤဂာ်ဒ်သိးဒီး ကဘီတဘ့ၣ်န့ၣ်. အဃိ နတၢ်တူၢ်ဘၣ်န့ၣ် ကထီၣ်လီၤထီၣ်လီၤဝဲ. အဒိ တနံၤအံၤ ဘၣ်သ့ၣ်သ့ၣ် နနာ်သပှၢ်တၢၢ်လၢ ယဟိဝၤယွၤအဲၣ်နၤ ဒီးအသးအိၣ်မၤစၢၤနၤ. ဘၣ်ဆၣ် လၢခံတနံၤန့ၣ် နကဆိကမိၣ်ဘၣ်လၢ မ့ၢ်ယဟိဝၤယွၤ ထံၣ်ဝဲတၢ်လၢ ယဘၣ်လဲၤခီဖျိစ့ၢ်ကီးဧါ. (စံး ၁၀:၁; ၁၃:၁) ဘၣ်သ့ၣ်သ့ၣ် နသကိးတဂၤ ကတဲနၤ တၢ်ကတိၤလၢ အကဲထီၣ်တၢ်ဂံၢ်တၢ်ဘါ ဒီးနသးကမုာ်ထီၣ် တတီၤဖိ. (ကတိၤ ၁၇:၁၇; ၂၅:၁၁) ဘၣ်ဆၣ် နတၢ်သးဒ့ဒီ အိၣ်ထီၣ်ကဒါက့ၤ ဒီးဘၣ်သ့ၣ်သ့ၣ် နကဆိကမိၣ်လၢ ယဟိဝၤယွၤ တကနၣ်ဃုာ် ယၤလၢၤဘၣ်. အဃိ ဖဲနတူၢ်ဘၣ် ဒ်န့ၣ်အခါ ဒ်သိးနကအိၣ် ဂၢၢ်ဂၢၢ်ကျၢၤကျၢၤအဂီၢ် တၢ်မနုၤကမၤစၢၤနၤလဲၣ်. ပမ့ၢ်တဲလၢ အဂၤတမံၤန့ၣ် ယဟိဝၤယွၤအဲၣ်နၤ ဒီးကမၤစၢၤနၤထီဘိန့ၣ် နဆဲးနာ်န့ၢ်အီၤ ကသ့ဒ်လဲၣ်.

၃. (က) တၢ်ကတိၤ လၢအမ့ၢ် “တၢ်အဲၣ်လၢအတီ” လၢ စံးထီၣ်ပတြၢၤ ၃၁:၇; ၁၃၆:၁ ပာ်ဖျါဝဲန့ၣ် အဲၣ်ဒိးတဲဝဲ မနုၤလဲၣ်. (ခ) ဘၣ်မနုၤအဃိ ပတဲလၢ ယဟိဝၤယွၤန့ၣ် အကဲ ပှၤဒိဂ့ၤတဲာ်ဘၣ်ကတၢၢ် လၢအပာ်ဖျါထီၣ် တၢ်အဲၣ်လၢအတီလဲၣ်. (ကွၢ်စ့ၢ်ကီးတၢ်ဂီၤ.)

^၃ တၢ, ဖဲနလဲၤခီဖျိ တၢ်အိၣ်သးကီခဲအခါ နမ့ၢ်သ့ၣ်နီၣ်ထီၣ် ယဟိဝၤယွၤ အတၢ်အဲၣ်လၢအတီန့ၣ် နပာ်နသးဂၢၢ်ဂၢၢ်သ့. (ဖး စံးထီၣ်ပတြၢၤ ၃၁:၇; ၁၃၆:၁.) တၢ်ကတိၤလၢအမ့ၢ် “တၢ်အဲၣ်လၢအတီ” န့ၣ် အဲၣ်ဒိးတဲဝဲ ပှၤခံဂၤ ရ့လိာ်သး ဘူးဘူးတံၢ်တံၢ် ဒီးသးအိၣ်လိာ်သးဒိၣ်မး. ယဟိဝၤယွၤန့ၣ်အကဲ ပှၤဒိဂ့ၤတဲာ်ဘၣ်ကတၢၢ် လၢအပာ်ဖျါထီၣ် တၢ်အဲၣ်လၢအတီ. လံာ်စီဆှံ တဲဝဲလၢ ယဟိဝၤယွၤန့ၣ် အ “အိၣ်ဒီး တၢ်အဲၣ်လၢအတီဒိၣ်မး.” (၂ မိၤ ၃၄:၆, ၇) တကးဒံးဘၣ် ဘၣ်ဃးဒီး ယဟိဝၤယွၤန့ၣ် လံာ်စီဆှံ တဲစ့ၢ်ကီးဝဲလၢ “နတၢ်အဲၣ်လၢအတီ အိၣ်ဝဲအါမးလၢ ပှၤလၢအကိးထီၣ်နၤတဖၣ် အဖီခိၣ်လီၤ.” (စံး ၈၆:၅) လံာ်စီဆှံ အဆၢတဖၣ်အံၤ အဲၣ်ဒိးတဲဝဲလၢ ယဟိဝၤယွၤန့ၣ် အတပာ်တ့ၢ် အခ့အပှၤလၢ အတီဒီးအီၤ နီတဘျီဘၣ်. အဃိ ဖဲနလဲၤခီဖျိ တၢ်အိၣ်သးကီခဲ နးမးအခါ နမ့ၢ်သ့ၣ်နီၣ်ထီၣ်လၢ ယဟိဝၤယွၤ အိၣ်ဒီးတၢ်သးတီန့ၣ် ကမၤစၢၤနၤဒ်သိး နကပာ်နသးဂၢၢ်ဂၢၢ်.—စံး ၂၃:၄.

ယဟိဝၤယွၤ အတၢ်အဲၣ် မ့ၢ်ဝဲ လံာ်စီဆှံ အတၢ်သိၣ်လိ အခီၣ်ထံးခီၣ်ဘိ

၄. လံာ်စီဆှံ အတၢ်သိၣ်လိ အခီၣ်ထံးခီၣ်ဘိတဖၣ်န့ၣ် မ့ၢ်မနုၤလဲၣ် ဒီးဘၣ်မနုၤအဃိ ပနာ်အီၤလဲၣ်.

^၄ ခံ, ဖဲနလဲၤခီဖျိ တၢ်အိၣ်သးကီခဲအခါ နမ့ၢ်သ့ၣ်နီၣ်ထီၣ်လၢ ယဟိဝၤယွၤ အတၢ်အဲၣ်မ့ၢ်ဝဲ လံာ်စီဆှံ အတၢ်သိၣ်လိ အခီၣ်ထံးခီၣ်ဘိန့ၣ် ကမၤစၢၤနၤဒ်သိး နကပာ်နသးဂၢၢ်ဂၢၢ်. ဖဲနနၢ်ဟူ တၢ်ကတိၤ လၢအမ့ၢ် “လံာ်စီဆှံ အတၢ်သိၣ်လိ အခီၣ်ထံးခီၣ်ဘိ” အခါ နဆိကမိၣ်ထီၣ် တၢ်ဂ့ၢ်မနုၤလဲၣ်. ဘၣ်သ့ၣ်သ့ၣ် နကဆိကမိၣ်ထီၣ် တၢ်ဂ့ၢ်လၢ နမၤလိဘၣ်လၢ လံာ်စီဆှံအပူၤ. အဒိ နမၤလိဘၣ်လၢ ကစၢ်ယွၤ အမံၤမ့ၢ် ယဟိဝၤ, ယ့ၣ်ၡူးန့ၣ်အကဲ ကစၢ်ယွၤအဖိခွါ ထဲတဂၤ, ပှၤသံန့ၣ် အတသ့ၣ်ညါတၢ် နီတမံၤလၢၤဘၣ်, ခါဆူညါန့ၣ် ဟီၣ်ခိၣ်ကကဲထီၣ် ပၤရဒံစူး ဒီးပှၤဟီၣ်ခိၣ်ဖိ ကအိၣ်မူဘၣ် လီၤထူလီၤယိာ်. (စံး ၈၃:၁၈; ယိၤ ၃:၁၆; စံၣ် ၉:၅; လီၣ် ၂၁:၃, ၄) ဖဲနနာ်လၢ တၢ်သိၣ်လိတဖၣ်အံၤ အကဲ တၢ်မ့ၢ်တၢ်တီ နီၢ်ကီၢ်အခါ ပှၤမ့ၢ်တဲနၤ ဒ်လဲၣ်ဘၣ်ဆၣ် နသးတဒ့ဒီဘၣ်. ဘၣ်မနုၤအဃိလဲၣ်. ခီဖျိလၢ နသ့ၣ်ညါလၢ တၢ်ဂ့ၢ်လၢ နမၤလိဘၣ်တဖၣ်န့ၣ် အကဲတၢ်ဂ့ၢ်နီၢ်ကီၢ်လၢ နနာ်န့ၢ်အီၤသ့. အဃိ နမ့ၢ်သ့ၣ်နီၣ်ထီၣ်လၢ ယဟိဝၤယွၤ အတၢ်အဲၣ် မ့ၢ်ဝဲ လံာ်စီဆှံ အတၢ်သိၣ်လိ အခီၣ်ထံးခီၣ်ဘိန့ၣ် ကမၤစၢၤနၤဒ်လဲၣ်. ဖဲနလဲၤခီဖျိ တၢ်အိၣ်သးကီခဲအခါ နသးတဒ့ဒီဘၣ် ဒီးနသ့ၣ်ညါလၢ ယဟိဝၤယွၤ နၢ်ပၢၢ်နတၢ်အိၣ်သး ဒီးအက ကဟုကယာ်နၤ.

၅. နပာ်တ့ၢ်ကွံာ် တၢ်သိၣ်လိလၢ အကမၣ် ကန့ၢ်အဂီၢ် နမၤဒ်လဲၣ်.

^၅ ဖဲနစးထီၣ်မၤလိ လံာ်စီဆှံအခါ ဒ်သိးနပာ်တ့ၢ်ကွံာ် တၢ်သိၣ်လိလၢ အကမၣ် ကန့ၢ်အဂီၢ် နမၤဒ်လဲၣ်. လံာ်စီဆှံ အတၢ်သိၣ်လိ လၢနမၤလိဘၣ်န့ၣ် နထိၣ်သတြီၤအီၤဒီး နတၢ်ဘူၣ်တၢ်ဘါ အတၢ်သိၣ်လိတဖၣ်. အဒိ လၢညါန့ၣ် ဘၣ်သ့ၣ်သ့ၣ် နနာ်လၢ ယ့ၣ်ၡူးန့ၣ် အကဲဝဲ သ့တၢ်လၢာ်ကစၢ်. ဘၣ်ဆၣ် ဖဲနမၤလိ လံာ်စီဆှံအခါ နဆိကမိၣ်ဘၣ်လၢ ‘တၢ်သိၣ်လိအံၤ မ့ၢ်အဘၣ်နီၢ်ကီၢ်ဧါ.’ ဒီးဖဲနဃုသ့ၣ်ညါ လံာ်စီဆှံ အတၢ်သိၣ်လိ ဝံၤအလီၢ်ခံ နသ့ၣ်ညါဘၣ်လၢ ယ့ၣ်ၡူးန့ၣ် အတကဲ ကစၢ်ယွၤဘၣ်. အဃိနနာ်က့ၤ တၢ်မ့ၢ်တၢ်တီလၢ လံာ်စီဆှံတဲဝဲ ဒီးနနာ်လၢ ယ့ၣ်ၡူးန့ၣ် အကဲ “တၢ်ဘၣ်တ့ခဲလၢာ် အပှၤဝဲၢ်ကိ” ဒီးအမ့ၢ် “ကစၢ်ယွၤ အဖိခွါနီၢ်နီၢ်ထဲတဂၤဧိၤ.” (ကလီး ၁:၁၅; ယိၤ ၃:၁၈) ဘၣ်ဆၣ် တၢ်သိၣ်လိလၢ အကမၣ် “လၢအလီၤဂာ်ဒီး တၢးထီလၢ အကျၢၤတဖၣ်” န့ၣ် နကမၤလီၤပှီၢ်ကွံာ်အီၤအဂီၢ် အတညီဘၣ်. (၂ ကရံၣ် ၁၀:၄, ၅) သနာ်က့ ဖဲနသ့ၣ်ညါထီၣ် တၢ်မ့ၢ်တၢ်တီ ဝံၤအလီၢ်ခံ နတနာ် တၢ်သိၣ်လိလၢ အကမၣ်လၢၤဘၣ်.—ဖံလံး ၃:၁၃.

၆. ယဟိဝၤယွၤ “အတၢ်အဲၣ်လၢအတီ အိၣ်ဂၢၢ်ဆိးကျၢၤ လီၤထူလီၤယိာ်” န့ၣ် ဘၣ်မနုၤအဃိ ပနာ်သ့လဲၣ်.

^၆ နကနာ် လံာ်စီဆှံ အတၢ်သိၣ်လိ ဘၣ်ဃးဒီး ယဟိဝၤယွၤ အတၢ်အဲၣ်အဂီၢ် နမၤဒ်အံၤသ့. ဖဲနလဲၤခီဖျိ တၢ်အိၣ်သးကီခဲအခါ နမ့ၢ်ဆိကမိၣ်လၢ ယဟိဝၤယွၤ တအဲၣ်နၤလၢၤဘၣ်န့ၣ် သံကွၢ်လီၤနသးလၢ ‘မ့ၢ်ယတၢ်ဆိကမိၣ်န့ၣ် အဘၣ်ဧါ.’ နသးမ့ၢ်ဒ့ဒီန့ၣ် ဆိကမိၣ်ထံ လံာ်စီဆှံအဆၢလၢ ပတၢ်မၤလိအံၤအဂီၢ်ဖဲ စံးထီၣ်ပတြၢၤ ၁၃၆:၁ ပာ်ဖျါထီၣ်ဝဲ. ဘၣ်မနုၤအဃိ ယဟိဝၤယွၤ တဲဝဲလၢ အတၢ်အဲၣ်န့ၣ် အမ့ၢ် “တၢ်အဲၣ်လၢအတီ” လဲၣ်. ဒီးလၢ စံးထီၣ်ပတြၢၤ ၁၃၆ အပူၤန့ၣ် ဘၣ်မနုၤအဃိ တၢ်ကတိၤ လၢအမ့ၢ် ယဟိဝၤယွၤ “အတၢ်အဲၣ်လၢအတီ အိၣ်ဂၢၢ်ဆိးကျၢၤ လီၤထူလီၤယိာ်” န့ၣ် အိၣ်ဝဲ ၂၆ ဘျီညါလဲၣ်. ဒ်ပသ့ၣ်ညါဘၣ်အသိး လံာ်စီဆှံ အတၢ်သိၣ်လိ အခီၣ်ထံးခီၣ်ဘိန့ၣ် အပၣ်ဃုာ်စ့ၢ်ကီးဒီး ကစၢ်ယွၤ ပာ်ဖျါထီၣ် အတၢ်အဲၣ်လၢ အခ့အပှၤတဖၣ်အဖီခိၣ်. အဃိ နမ့ၢ်နာ် လံာ်စီဆှံ အတၢ်သိၣ်လိ အခီၣ်ထံးခီၣ်ဘိ အဂၤတဖၣ်န့ၣ် ကညီလၢ နကနာ်စ့ၢ်ကီး ယဟိဝၤယွၤ အတၢ်အဲၣ်လၢအတီ. နမ့ၢ်ဆိကမိၣ်လၢ ယဟိဝၤယွၤ သူနၤတသ့ဘၣ် မ့တမ့ၢ် အတအဲၣ်နၤဘၣ်န့ၣ် နတၢ်ထံၣ်အံၤ အတဘၣ်ဘၣ်. အဃိ ဒ်နပာ်တ့ၢ်ကွံာ် တၢ်သိၣ်လိလၢ အကမၣ်အသိး နတၢ်ထံၣ်လၢ အတဘၣ်ဘၣ်န့ၣ် နကဘၣ် မၤလီၤမၢ်ကွံာ်အီၤ လၢာ်လၢာ်ဆ့ဆ့.

၇. ယဟိဝၤယွၤ အဲၣ်ပှၤနီၢ်ကီၢ်န့ၣ် လံာ်စီဆှံအဆၢတနီၤ ပာ်ဖျါထီၣ်ဝဲဒ်လဲၣ်. တဲဖျါထီၣ် တၢ်အဒိ.

^၇ ယဟိဝၤယွၤ အဲၣ်ပှၤန့ၣ် လံာ်စီဆှံ ပာ်ဖျါထီၣ်န့ၢ်ပှၤ တၢ်အုၣ်သးအဂၤ အိၣ်ဝဲအါမး. အဒိ ယ့ၣ်ၡူးတဲဘၣ် ပှၤလၢအပိာ်အခံတဖၣ်လၢ “သုလုၢ်သုပှ့ၤဒိၣ်န့ၢ်ဒံး ထိၣ်ဖှံးဖိအါဘ့ၣ်လီၤ.” (မး ၁၀:၃၁) ယဟိဝၤယွၤ တဲဘၣ်စ့ၢ်ကီး အပှၤဂီၢ်မုၢ်လၢ “ယကမၤဆူၣ်ထီၣ် သုဂံၢ်သုဘါ ဒီးယကမၤစၢၤသု သပှၢ်တၢၢ်လီၤ. ယကဖီၣ်ဃာ်သုဒီး ယစုထွဲလၢ အတီအလိၤ ကျၢၤကျၢၤလီၤ.” (ၡါ ၄၁:၁၀) တၢ်အုၣ်သးတဖၣ်အံၤ ပနာ်သ့ သပှၢ်တၢၢ်. ခီဖျိလၢ ယ့ၣ်ၡူး တတဲဝဲလၢ ‘ဘၣ်သ့ၣ်သ့ၣ် သုလုၢ်သုပှ့ၤ ဒိၣ်န့ၢ်ဒံး’ ဘၣ်. ဒီးယဟိဝၤယွၤ စ့ၢ်ကီး တတဲဝဲလၢ ‘ဘၣ်သ့ၣ်သ့ၣ် ယကမၤစၢၤသု’ ဘၣ်. ယ့ၣ်ၡူး တဲဝဲလၢ “သုလုၢ်သုပှ့ၤဒိၣ်န့ၢ်ဒံး” ဒီးယဟိဝၤယွၤ တဲဝဲလၢ “ယကမၤစၢၤသု သပှၢ်တၢၢ်.” အဃိ ဖဲပလဲၤခီဖျိ တၢ်အိၣ်သးကီခဲအခါ ပမ့ၢ်တူၢ်ဘၣ်လၢ ယဟိဝၤယွၤ တအဲၣ်ပှၤဘၣ်န့ၣ် လံာ်စီဆှံအဆၢ တဖၣ်အံၤ ကမၤမုာ်ထီၣ်ပသး. တကးဒံးဘၣ် အပာ်ဖျါထီၣ်န့ၢ်ပှၤ တၢ်အုၣ်သးလၢ ယဟိဝၤယွၤ အဲၣ်ပှၤနီၢ်ကီၢ်. လံာ်စီဆှံအဆၢ တဖၣ်အံၤကဲဝဲ တၢ်သိၣ်လိ အခီၣ်ထံးခီၣ်ဘိလၢ ပနာ်အီၤသ့. အဃိ ပမ့ၢ်ဃ့ထုကဖၣ် ဒီးဆိကမိၣ်ထံ လံာ်စီဆှံအဆၢ တဖၣ်အံၤန့ၣ် ပက “သ့ၣ်ညါထီၣ် ဒီးပနာ်လၢကစၢ်ယွၤ အဲၣ်ပှၤ.”a—၁ ယိၤ ၄:၁၆.

၈. တဘျီတခီၣ် ပမ့ၢ်တူၢ်ဘၣ်လၢ ယဟိဝၤယွၤ တအဲၣ်ပှၤဘၣ်န့ၣ် ပကဘၣ်မၤဒ်လဲၣ်.

^၈ တဘျီတခီၣ် ပမ့ၢ်တူၢ်ဘၣ်လၢ ယဟိဝၤယွၤ တအဲၣ်ပှၤဘၣ်န့ၣ် ပကဘၣ်မၤဒ်လဲၣ်. ပကဘၣ် ထိၣ်သတြီၤ ပတၢ်တူၢ်ဘၣ် ဒီးတၢ်လၢပသ့ၣ်ညါ. ပတၢ်ဆိကမိၣ်န့ၣ် အဆီတလဲသးသ့, မ့မ့ၢ် တၢ်မ့ၢ်တၢ်တီန့ၣ် တဆီတလဲဘၣ်. ဒီးလံာ်စီဆှံ အတၢ်သိၣ်လိ ဘၣ်ဃးဒီး ယဟိဝၤယွၤ အတၢ်အဲၣ်န့ၣ် အကဲဝဲ တၢ်မ့ၢ်တၢ်တီနီၢ်ကီၢ်. အဃိ ပမ့ၢ်တနာ်လၢ ယဟိဝၤယွၤ အဲၣ်ပှၤဘၣ်န့ၣ် လီၤဂာ်ဒ်သိးဒီး ပကွၢ်ကပာ်ကွံာ် အတၢ်အဲၣ်.—၁ ယိၤ ၄:၈.

ဆိကမိၣ်ထံ ယဟိဝၤယွၤ “အဲၣ်သု” အဂ့ၢ်

၉-၁၀. ဖဲယ့ၣ်ၡူး တဲဝဲလၢ “ပၢ်အနီၢ်ကစၢ်ဒၣ်ဝဲ အဲၣ်သု” အခါ အအဲၣ်ဒိးတဲ ဘၣ်ဃးဒီး တၢ်ဂ့ၢ်မနုၤလဲၣ်. (ယိၤဟၣ် ၁၆:၂၆, ၂၇) (ကွၢ်စ့ၢ်ကီးတၢ်ဂီၤ.)

^၉ ယ့ၣ်ၡူးတဲဘၣ် ပှၤလၢအပိာ်အခံတဖၣ်လၢ “ပၢ်အနီၢ်ကစၢ်ဒၣ်ဝဲ အဲၣ်သု.” ခဲအံၤစ့ၢ်ကီး ဒ်သိး ပကသ့ၣ်ညါအါထီၣ် ယဟိဝၤယွၤ အတၢ်အဲၣ်အဂီၢ် ပဆိကမိၣ်ထံ ဘၣ်ဃးဒီး ယ့ၣ်ၡူး အတၢ်ကတိၤအံၤသ့. (ဖး ယိၤဟၣ် ၁၆:၂၆, ၂၇.) ယ့ၣ်ၡူး တဲတၢ်ကတိၤအံၤန့ၣ် တမ့ၢ်ထဲလၢ အအဲၣ်ဒိး မၤသးခု အပျဲၢ်အဘီၣ်တဖၣ် အသးဘၣ်. နီၢ်ကီၢ်န့ၣ် ယ့ၣ်ၡူး တအဲၣ်ဒိးတဲ ဘၣ်ဃးဒီး အဝဲသ့ၣ် အတၢ်တူၢ်ဘၣ်ဘၣ်, အအဲၣ်ဒိးတဲဝဲ ဘၣ်ဃးဒီး တၢ်ထုကဖၣ်အဂ့ၢ်.

^၁၀ ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ အဝဲသ့ၣ် တဘၣ် ဃ့ထုကဖၣ်လၢ အအိၣ်ဘၣ်, ဘၣ်ဆၣ် အဝဲသ့ၣ် ကဘၣ်ဃ့တၢ် ခီဖျိ အမံၤ. (ယိၤ ၁၆:၂၃, ၂၄) ဒီးအရ့ဒိၣ်လၢ အဝဲသ့ၣ် ကသ့ၣ်ညါဝဲ တၢ်ဂ့ၢ်အံၤ. ဖဲယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံ ဘၣ်သ့ၣ်သ့ၣ် အပျဲၢ်အဘီၣ်တဖၣ် ကအဲၣ်ဒိး ဃ့ထုကဖၣ်လၢ အအိၣ်. မ့ၢ်လၢ အဝဲသ့ၣ် ကဲယ့ၣ်ၡူးအသကိး အဃိ ဘၣ်သ့ၣ်သ့ၣ် အဝဲသ့ၣ် ကဆိကမိၣ်ဝဲလၢ ယ့ၣ်ၡူး အဲၣ်အဝဲသ့ၣ်ဒိၣ်မး. ဒီးယ့ၣ်ၡူး ကသးအိၣ်ဒိကနၣ် တၢ်လၢအဝဲသ့ၣ်တဲဝဲ ဒီးကဃ့န့ၢ်တၢ်လၢ အဝဲသ့ၣ်အဂီၢ် လၢပၢ်အအိၣ်. ဘၣ်ဆၣ် ယ့ၣ်ၡူးတဲဝဲလၢ အဝဲသ့ၣ်တဘၣ် ဆိကမိၣ် ဒ်န့ၣ်ဘၣ်. ဘၣ်မနုၤအဃိလဲၣ်. ယ့ၣ်ၡူးတဲဘၣ် အဝဲသ့ၣ်လၢ “ပၢ်အနီၢ်ကစၢ်ဒၣ်ဝဲ အဲၣ်သု.” ဒီးအတၢ်ကတိၤအံၤ ပၣ်ဃုာ်လၢ အတၢ်သိၣ်လိ ဘၣ်ဃးဒီး တၢ်ထုကဖၣ် အကျါစ့ၢ်ကီး. တၢ်လၢယ့ၣ်ၡူးတဲဝဲအံၤ အဘၣ်ထွဲဒီးပှၤဒ်လဲၣ်. ခီဖျိလၢ ပမၤလိလံာ်စီဆှံအဃိ ပသ့ၣ်ညါထီၣ် ယ့ၣ်ၡူးအဂ့ၢ် ဒီးပအဲၣ်အီၤ. (ယိၤ ၁၄:၂၁) ဘၣ်ဆၣ် ဒ်ယ့ၣ်ၡူး အပျဲၢ်အဘီၣ် လၢညါတဖၣ်အသိး ပသ့ၣ်ညါလၢ ကစၢ်ယွၤ “အနီၢ်ကစၢ်ဒၣ်ဝဲ” အဲၣ်ပှၤအဃိ ပဃ့ထုကဖၣ် လၢအအိၣ်ဘူၣ်. ဒီးဖဲပဃ့ထုကဖၣ်လၢ ယဟိဝၤယွၤအအိၣ် တဘျီဂ့ၤ တဘျီဂ့ၤအခါ ပပာ်ဖျါထီၣ်လၢ ပနာ်န့ၢ် တၢ်လၢလံာ်စီဆှံတဲဝဲ.—၁ ယိၤ ၅:၁၄.

ဘၣ်မနုၤအဃိ ပတူၢ်ဘၣ်လၢ ယဟိဝၤယွၤ တအဲၣ်ပှၤဘၣ်လဲၣ်

၁၁. ပမ့ၢ်ဆိကမိၣ်လၢ ယဟိဝၤယွၤ တအဲၣ်ပှၤဘၣ်န့ၣ် ဘၣ်မနုၤအဃိ မုၣ်ကီၤလံၢ် ကသးခုလဲၣ်.

^၁၁ ဘၣ်မနုၤအဃိ ပကတူၢ်ဘၣ်လၢ ယဟိဝၤယွၤ တအဲၣ်ပှၤဘၣ်လဲၣ်. ဘၣ်သ့ၣ်သ့ၣ် ပကတဲလၢ မုၣ်ကီၤလံၢ် အဲၣ်ဒိးလၢ ပကတူၢ်ဘၣ်ဒ်န့ၣ် ဒီးပတဲဒ်န့ၣ်န့ၣ် အတကမၣ် စ့ၢ်ကီးဘၣ်. ခီဖျိလၢ မုၣ်ကီၤလံၢ် “ဃုပှၤတဂၤဂၤလၢ အကယူၢ်လီၤကွံာ်ဝဲ” ဒီပမ့ၢ်တနာ်လၢ ယဟိဝၤယွၤ အဲၣ်ပှၤဘၣ်န့ၣ် မုၣ်ကီၤလံၢ် ကသးခု. (၁ ပ့း ၅:၈) ပမ့ၢ်ကွၢ် ခီဖျိလၢ ယဟိဝၤယွၤ အဲၣ်ပှၤအဃိ အကတဲာ်ကတီၤန့ၢ်ပှၤ တၢ်ပှ့ၤက့ၤ. ဘၣ်ဆၣ် မုၣ်ကီၤလံၢ် အဲၣ်ဒိး ဒုးဆိကမိၣ်ပှၤလၢ ပကဲပှၤတၢ်ဒဲးဘးဖိအဃိ ပတကြၢးဒီး တၢ်ပှ့ၤက့ၤဘၣ်. (ဧ့ၤ ၂:၉) အဃိ ပမ့ၢ်ဆိကမိၣ်လၢ ယဟိဝၤယွၤ တအဲၣ်ပှၤဘၣ်န့ၣ် မုၣ်ကီၤလံၢ် ကသးခု. ဒီးဖဲပသးလီၤစၢ်အခါ ပမ့ၢ်တဆဲး ဘူၣ်ထီၣ်ဘါထီၣ် ယဟိဝၤယွၤ လၢၤဘၣ်န့ၣ် မုၣ်ကီၤလံၢ် ကသးခုစ့ၢ်ကီး. နီၢ်ကီၢ်န့ၣ် မုၣ်ကီၤလံၢ် တဒိးန့ၢ်ဘၣ် ယဟိဝၤယွၤ အတၢ်အဲၣ် လၢၤဘၣ်အဃိ အအဲၣ်ဒိးဒုးဆိကမိၣ်ပှၤလၢ ယဟိဝၤယွၤ တအဲၣ်ပှၤဘၣ်. တၢ်ဆိကမိၣ် ဒ်အံၤန့ၣ် မ့ၢ်ဒၣ်မုၣ်ကီၤလံၢ် အ “တၢ်ကူၣ်ထီၣ်ဖးလီၤတဖၣ်” လီၤ. (အ့း ၆:၁၁) ပဒုၣ်ပဒါ မုၣ်ကီၤလံၢ် အဲၣ်ဒိးကူၣ်ထီၣ်တၢ် ဒ်လဲၣ်န့ၣ် ပသ့ၣ်ညါဘၣ်အဃိ ပကဘၣ် ပာ်လီၤသး ဂၢၢ်ဂၢၢ်ကျၢၤကျၢၤလၢ ပက “ထီဒါမုၣ်ကီၤလံၢ်.”—ယၤ ၄:၇.

၁၂-၁၃. ခီဖျိလၢ ပကဲပှၤတၢ်ဒဲးဘးဖိအဃိ တၢ်တူၢ်ဘၣ်လၢ အကဒုးဆိကမိၣ်ပှၤလၢ ယဟိဝၤယွၤ တအဲၣ်ပှၤဘၣ်န့ၣ် မ့ၢ်မနုၤတဖၣ်လဲၣ်.

^၁၂ ဘၣ်မနုၤအဃိ ပဆိကမိၣ်လၢ ယဟိဝၤယွၤ တအဲၣ်ပှၤဘၣ်လဲၣ်န့ၣ် တၢ်ဂ့ၢ်အဂၤ အိၣ်ဝဲတမံၤဒံး. အကဲဝဲ တၢ်ဒဲးဘး လၢပန့ၢ်သါဘၣ်အီၤ. (စံး ၅၁:၅; ရိ ၅:၁၂) တၢ်ဒဲးဘးန့ၣ် အမၤဟးဂီၤ ပတၢ်ရ့လိာ်သးဒီး ကစၢ်ယွၤ. တကးဒံးဘၣ် အမၤဟးဂီၤ ပတၢ်ဆိကမိၣ်, ပတၢ်တူၢ်ဘၣ် ဒီးပတၢ်အိၣ်ဆူၣ်အိၣ်ချ့.

^၁၃ ခီဖျိလၢ ပကဲပှၤတၢ်ဒဲးဘးဖိအဃိ ပအိၣ်ဒီး တၢ်တူၢ်ဘၣ်လၢ ပတၢ်ကမၣ်အိၣ်ထီဘိ, ပသူၣ်ကိၢ်သးဂီၤတၢ်, ပတနာ်န့ၢ်လီၤပသးဘၣ် ဒီးပမဲာ်ဆှး. လီၤဆီဒၣ်တၢ် ဖဲပမၤဘၣ် တၢ်ကမၣ်အခါ ပကအိၣ်ဒီး တၢ်တူၢ်ဘၣ်တဖၣ်အံၤ. ဒီးခီဖျိလၢ ပတၢ်ဒဲးဘးအဃိ ပကတူၢ်ဘၣ် ဒ်အံၤစ့ၢ်ကီး. ဘၣ်ဆၣ် ယဟိဝၤယွၤ တတ့လီၤ ပှၤဟီၣ်ခိၣ်ဖိလၢ ကကဲထီၣ် ပှၤတၢ်ဒဲးဘးဖိဘၣ်. (ရိ ၈:၂၀, ၂၁) အဒိ ကါပ့ အကလံၤ မ့ၢ်လီၤစှၤန့ၣ် ပှၤနီအီၤ တဒ်သိးဒီး ကါပ့လၢ အကလံၤအိၣ်ပှဲၤပှဲၤ လၢပှၤတ့ဝဲလၢ အခီၣ်ထံးန့ၣ်ဘၣ်. ဒ်န့ၣ်အသိး ခီဖျိလၢ ပကဲပှၤတၢ်ဒဲးဘးဖိအဃိ ပတၢ်အိၣ်သး တဒ်သိးဒီး ယဟိဝၤယွၤ တ့လီၤပှၤလၢ အခီၣ်ထံးဘၣ်. အဃိ တဘျီတခီၣ်န့ၣ် ပကတူၢ်ဘၣ်လၢ ယဟိဝၤယွၤ တအဲၣ်ပှၤဘၣ်. ပမ့ၢ်တူၢ်ဘၣ်ဒ်န့ၣ်န့ၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤန့ၣ် အကဲ ‘ယွၤလၢအဒိၣ်အမုၢ် ဒီးအလီၤယူးယီၣ်ပာ်ကဲ ဒီးအမၤလၢပှဲၤ အတၢ်အၢၣ်လီၤအီလီၤ ဒီးအပာ်ဖျါထီၣ် တၢ်အဲၣ်လၢအတီ လၢပှၤလၢအအဲၣ်အီၤ ဒီးအမၤထွဲ အတၢ်မၤလိာ်တဖၣ် အဖီခိၣ်.’—ဃ့ ၁:၅.

၁၄. ပမ့ၢ်ဆိကမိၣ်ထံ တၢ်ပှ့ၤက့ၤ အဂ့ၢ်န့ၣ် ကမၤစၢၤပှၤလၢ ပကမၤလီၤမၢ်ကွံာ် ပတၢ်ဆိကမိၣ်လၢ ယဟိဝၤယွၤ တအဲၣ်ပှၤဘၣ်န့ၣ် ဒ်လဲၣ်. (ရိမ့ၤ ၅:၈) (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ပလီၢ်သးလၢ “တၢ်ဒဲးဘးအစိကမီၤလၢ အလံၣ်န့ၢ်လီန့ၢ်တၢ်သ့.”)

^၁၄ တဘျီတခီၣ်န့ၣ် ပကတူၢ်ဘၣ်လၢ ပတကြၢးဒိးန့ၢ်ဘၣ် ယဟိဝၤယွၤ အတၢ်အဲၣ်ဘၣ်. ဒီးယဟိဝၤယွၤ အဲၣ်ပှၤန့ၣ် တမ့ၢ်ခီဖျိလၢ ပမၤတၢ်ဂ့ၤတမံၤမံၤ အဃိဘၣ်. နီၢ်ကီၢ်န့ၣ် ပတကြၢးဒီး အတၢ်အဲၣ်ဘၣ်, ဘၣ်ဆၣ် အအဲၣ်ပှၤဒံးအဃိ အတၢ်အဲၣ်အံၤ လီၤကမၢကမၣ် ဒိၣ်မး. ဒီးခီဖျိလၢ အအဲၣ်ပှၤအဃိ ဒ်သိး အကပျၢ်ကွံာ် ပတၢ်ကမၣ်အဂီၢ် အဟ့ၣ်ပှၤ တၢ်ပှ့ၤက့ၤ. (၁ ယိၤ ၄:၁၀) ပကဘၣ် သ့ၣ်နီၣ်စ့ၢ်ကီးလၢ ယ့ၣ်ၡူးန့ၣ် အဟဲမၤပူၤဖျဲး ပှၤတၢ်ဒဲးဘးဖိ, တမ့ၢ်ပှၤလၢပှၤပှဲၤဘၣ်. (ဖး ရိမ့ၤ ၅:၈.) ဒီးပတကဲ ပှၤလၢပှၤပှဲၤဘၣ် အဃိ ယဟိဝၤယွၤ တမုၢ်လၢ် တၢ်လၢတၢ်ပှဲၤ လၢပအိၣ်ဘၣ်. ဘၣ်ဆၣ် ခီဖျိလၢ ပန့ၢ်သါဘၣ် တၢ်ဒဲးဘးအဃိ ပကဆိကမိၣ်လၢ ယဟိဝၤယွၤ တအဲၣ်ပှၤဘၣ်. အဃိ ဖဲပသ့ၣ်ညါထီၣ် တၢ်ဂ့ၢ်အံၤအခါ ပကဂုာ်ကျဲးစၢး မၤလီၤမၢ်ကွံာ် တၢ်ဆိကမိၣ်အံၤ ဒီးတပျဲလၢ အကမၤနၢၤပှၤဘၣ်.—ရိ ၇:၂၄, ၂၅.

ပာ်လီၤသးလၢ နကတီဒီး ယဟိဝၤယွၤ

၁၅-၁၆. ပမ့ၢ်တီဒီး ယဟိဝၤယွၤန့ၣ် ပနာ်န့ၢ် တၢ်မနုၤသ့လဲၣ် ဒီးဘၣ်မနုၤအဃိလဲၣ်. (၂ ၡမူၤအ့လး ၂၂:၂၆)

^၁၅ ယဟိဝၤယွၤ အဲၣ်ဒိးလၢ ပကဆၢတဲာ် တၢ်လၢအဘၣ်. ဒီးပဆၢတဲာ် တၢ်လၢအဘၣ် သ့ခီဖျိ ပ “တီဒီးအီၤထီဘိ.” (၅ မိၤ ၃၀:၁၉, ၂၀) ပမ့ၢ်တီဒီးအီၤန့ၣ် ပနာ်သ့သပှၢ်တၢၢ်လၢ အကတီဒီးပှၤ. (ဖး ၂ ၡမူၤအ့လး ၂၂:၂၆.) တကးဒံးဘၣ် ဖဲပထံၣ်ဘၣ် တၢ်အိၣ်သးကီခဲ တမံၤမံၤအခါ ဒ်သိးပလဲၤခီဖျိအီၤ ကန့ၢ်အဂီၢ် ပနာ်သ့သပှၢ်တၢၢ်လၢ အကမၤစၢၤပှၤ.

^၁၆ ဒ်ပတဲသကိးတ့ၢ်အသိး ဖဲပထံၣ်ဘၣ် တၢ်အိၣ်သးကီခဲအခါ ပပာ်ပသးဂၢၢ်ဂၢၢ်သ့. ပသ့ၣ်ညါလၢ ယဟိဝၤယွၤ အဲၣ်ပှၤ ဒီးကမၤစၢၤပှၤ. ဒီးလံာ်စီဆှံ သိၣ်လိဝဲ ဒ်န့ၣ်စ့ၢ်ကီး. အဃိ ဖဲပတူၢ်ဘၣ်လၢ ယဟိဝၤယွၤ တအဲၣ်ပှၤဘၣ်အခါ ပတကြၢး သးစၢၢ်ဆၢထဲ ပနီၢ်ကစၢ် တၢ်တူၢ်ဘၣ်ဘၣ်. ပကြၢးဆိကမိၣ်ထီၣ်က့ၤ တၢ်ဂ့ၢ်လၢ ပသ့ၣ်ညါ ဘၣ်ဃးဒီး ယဟိဝၤယွၤ အတၢ်အဲၣ်အဂ့ၢ်. ဒ်လံာ်စီဆှံ တဲဝဲအသိး ပအဲၣ်ဒိးဆဲးနာ် သပှၢ်တၢၢ်လၢ ယဟိဝၤယွၤ အတၢ်အဲၣ်လၢအတီန့ၣ် အိၣ်ဂၢၢ်ဆိးကျၢၤ လီၤထူလီၤယိာ်.