မၤဘၣ်လိာ်က့ၤ တၢ်သဘံၣ်သဘုၣ်လၢ တၢ်အဲၣ်တၢ်ကွံအပူၤတက့ၢ်
“အိၣ်ဃူလိာ်ဖိးလိာ် သုသးတက့ၢ်.”—မၢ်ကူး ၉:၅၀.
၁, ၂. လၢလံာ် ၁ မိၤၡ့အပူၤန့ၣ် ပှၤဟီၣ်ခိၣ်ဖိ ကွၢ်ဆၢၣ်မဲာ်ဘၣ် ဒီးတၢ်မနုၤလဲၣ်, ဒီးဘၣ်မနုၤအဃိ တၢ်ဂ့ၢ်အံၤကဲဘျုးလၢပဂီၢ်လဲၣ်.
တၢ်သဘံၣ်သဘုၣ် လၢလံာ်စီဆှံအပူၤတဖၣ်န့ၣ် မ့ၢ်နဆိကမိၣ်ဘၣ် တဘျီဘျီဧါ. ထဲ ၁ မိၤၡ့ အဆၢဒိၣ်စှၤကိာ်အပူၤန့ၣ် ပထံၣ်ဘၣ်လၢ စီၤကၤယံၣ်မၤသံဝဲ စီၤဟ့းဘ့းလး (၁ မိၤၡ့ ၄:၃-၈), စီၤလ့ၤမ့း မၤသံပှၤသးစၢ်တဂၤ (၁ မိၤၡ့ ၄:၂၃), မ့မ့ၢ်စီၤအၤဘြၤဟၣ် အပှၤကွၢ်သိ ဒီးစီၤလိာ်အပှၤကွၢ်သိန့ၣ် အ့ၣ်လိာ်အသးလီၤ. (၁ မိၤၡ့ ၁၃:၅-၇) တကးဒံးဘၣ် နီၢ်ဟၤကၢ် ပာ်ဒိၣ်အသးလၢ နီၢ်စၤရါ အဖီခိၣ်အဃိ နီၢ်စၤရါသးထီၣ် စီၤအၤဘြၤဟၣ်လီၤ. (၁ မိၤၡ့ ၁၆:၃-၆) မ့မ့ၢ် စီၤယံးၡမၤဧ့လးတခီ ထီဒါဝဲပှၤကိးဂၤဒဲးအဃိ ပှၤသ့ၣ်တဖၣ်အံၤ ထီဒါက့ၤအီၤလီၤ. —၁ မိၤၡ့ ၁၆:၁၂.
၂ ဘၣ်မနုၤအဃိ တၢ်သဘံၣ်သဘုၣ်တဖၣ်အံၤ ဘၣ်တၢ်ပာ်ဖျါထီၣ်အီၤလၢ လံာ်စီဆှံအပူၤလဲၣ်. မ့ၢ်လၢ ပဟံးန့ၢ်တၢ်မၤလိလၢ ပှၤတလၢတပှဲၤတဖၣ်အံၤ အဒိအတဲာ်သ့ဝဲအဃိန့ၣ်လီၤ. ပဝဲစ့ၢ်ကီး ပတလၢတပှဲၤဘၣ် ဒီးပကွၢ်ဆၢၣ်မဲာ်ဘၣ် တၢ်ကီတၢ်ခဲ ဒ်အဝဲသ့ၣ်အသိးလီၤ. လၢတၢ်န့ၣ်အဃိ တၢ်ဒိတၢ်တဲာ်လၢ လံာ်စီဆှံအပူၤလၢ အဂ့ၤတဖၣ်န့ၣ် ပကကွၢ်လိအီၤဒီး ပကဟးဆှဲး တၢ်အဒိအတဲာ်လၢ အတဂ့ၤတဖၣ်လီၤ. (ရိမ့ၤ ၁၅:၄) ပမ့ၢ်မၤဒ်အံၤန့ၣ် ပကအိၣ်ဃူအိၣ်ဖိးဒီးပှၤဂၤလီၤ.
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၃ ဘၣ်မနုၤအဃိ ပဘၣ်မၤဃူမၤဖိးက့ၤ ပတၢ်သဘံၣ်သဘုၣ်တဖၣ်လဲၣ်. ဒီးပမၤဘၣ်လိာ်က့ၤ တၢ်သဘံၣ်သဘုၣ်တဖၣ်အံၤ ကသ့လၢကျဲဒ်လဲၣ်အဂ့ၢ်န့ၣ် ပကမၤလိဘၣ်လၢ တၢ်မၤလိအံၤအပူၤလီၤ. ပကမၤလိဘၣ်စ့ၢ်ကီး လံာ်စီဆှံ တၢ်သိၣ်တၢ်သီမိၢ်ပှၢ်တနီၤလၢ ကမၤစၢၤပှၤဒ်သိး ပမၤဘၣ်လိာ်က့ၤ တၢ်ကီတၢ်ခဲတဖၣ် ဒီးပပၢၤဃာ် ပတၢ်ရ့လိာ်သးဒီး ယဟိဝၤယွၤဒီး ပှၤဂၤကသ့အဂီၢ်န့ၣ်လီၤ.
ဘၣ်မနုၤအဃိ ယွၤအခ့အပှၤတဖၣ် ဘၣ်မၤဃူမၤဖိးတၢ်လဲၣ်
၄. လၢဟီၣ်ခိၣ်ဒီဘ့ၣ် တၢ်ပာ်သူၣ်ပာ်သးဒ်လဲၣ်တကလုာ် ရၤလီၤအသးလဲၣ်, ဒီးတၢ်ကဲထီၣ်အသးဒ်လဲၣ်.
၄ တၢ်သဘံၣ်သဘုၣ် ဒီးတၢ်လီၤမုၢ်လီၤဖး အိၣ်ထီၣ်လၢပှၤဟီၣ်ခိၣ်ဖိအကျါန့ၣ် မ့ၢ်လၢမုၣ်ကီၤလံၢ်အဃိလီၤ. ဘၣ်မနုၤအဃိ ပတဲဒ်န့ၣ်လဲၣ်. လၢဧ့ၤဒ့ၣ်တၤသၣ်လီၢ်အပူၤန့ၣ် မုၣ်ကီၤလံၢ်တဲဝဲလၢ ပှၤဟီၣ်ခိၣ်ဖိခဲလၢာ် အိၣ်ဒီးတၢ်ခွဲးတၢ်ယာ်လၢ ကဃုထၢတၢ်ဂ့ၤဒီးတၢ်အၢ, တၢ်အဘၣ်ဒီးတၢ်ကမၣ်လၢ အနီၢ်ကစၢ်သ့ဝဲလီၤ. (၁ မိၤၡ့ ၃:၁-၅) ဘၣ်ဆၣ် ပမ့ၢ်ကွၢ်က့ၤလၢ မုၢ်မဆါတနံၤအံၤန့ၣ် တၢ်ပာ်သူၣ်ပာ်သးဒ်အံၤ ဒုးအိၣ်ထီၣ်ဝဲ တၢ်ကီတၢ်ခဲတဖၣ်လီၤ. ပှၤအါဂၤထံၣ်ဝဲလၢ အဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကဆၢတဲာ်တၢ်လၢ အဘၣ်ဒီးအကမၣ်လၢ အနီၢ်ကစၢ်လီၤ. အဝဲသ့ၣ် ပာ်ထီၣ်ထီအသး, အဲၣ်လီၤထဲအသး, ဒီးပြၢလိာ်အသးလီၤ. ဒီးအဝဲသ့ၣ် အတၢ်ဆၢတဲာ် ကမၤဘၣ်ဒိဘၣ်ထံးပှၤဂၤဒ်လဲၣ်န့ၣ် တဆိကမိၣ်ဝဲဘၣ်. ခီဖျိလၢ တၢ်ပာ်သူၣ်ပာ်သးဒ်အံၤအဃိ ဒုးအိၣ်ထီၣ်ဝဲ တၢ်အ့ၣ်လိာ်ဆိးက့လီၤ. လၢတၢ်န့ၣ်အဃိ လံာ်စီဆှံ တဲဘၣ်ပှၤလၢ ပမ့ၢ်သးဒိၣ်ထီၣ်တၢ်ညီန့ၣ် ကဒုးအိၣ်ထီၣ် တၢ်သးတလီၤပလိာ်ဒီးပှၤဂၤ ဒီးပကမၤဘၣ် တၢ်ဒဲးဘးအါမံၤလီၤ.—ကတိၤဒိ ၂၉:၂၂.
၅. တၢ်သးတလီၤပလိာ် မ့ၢ်အိၣ်ထီၣ်န့ၣ် ယ့ၣ်ၡူးသိၣ်လိပှၤဂီၢ်မုၢ်လၢ ကဘၣ်မၤဝဲဒ်လဲၣ်.
၅ ဖဲယ့ၣ်ၡူး စံၣ်တဲၤတဲလီၤတၢ်လၢ တၢ်လူၢ်ခိၣ်အခါ အဝဲသိၣ်လိအပျဲၢ်အဘီၣ်တဖၣ်လၢ ကဘၣ်မၤဃူမၤဖိးတၢ်ဒီး ဟးဆှဲးတၢ်အ့ၣ်လိာ်ဆိးက့လီၤ. အဒိ ယ့ၣ်ၡူးတဲဘၣ် အဝဲသ့ၣ်လၢ ကဘၣ်အိၣ်ဒီးတၢ်သးကညီၤ, မၤဃူမၤဖိးတၢ်ဒီးပှၤဂၤ, မၤလီၤမၢ်ကွံာ် တၢ်သူၣ်ဒိၣ်သးဖျိး မၤဘၣ်လိာ်ဖိးဒ့က့ၤ တၢ်သဘံၣ်သဘုၣ်လၢအချ့ ဒီးဘၣ်အဲၣ်အဒုၣ်ဒါန့ၣ်လီၤ.—မးသဲ ၅:၅, ၉, ၂၂, ၂၅, ၄၄.
၆, ၇. (က) ဘၣ်မနုၤအဃိ အရ့ဒိၣ်လၢ ပကဘၣ်ပျၢ်ပှၤဂၤ အတၢ်ကမၣ် လၢအဆိအချ့လဲၣ်. (ခ) ပကြၢးသံကွၢ်လီၤက့ၤပသးလၢ တၢ်သံကွၢ်မနုၤတဖၣ်လဲၣ်.
၆ မုၢ်မဆါတနံၤအံၤ ပဘူၣ်ထီၣ်ဘါထီၣ် ယဟိဝၤယွၤ ဖဲပဃ့ဘါထုကဖၣ်, ပစံၣ်တဲၤတဲလီၤတၢ် ဒီးပလဲၤထီၣ်တၢ်အိၣ်ဖှိၣ်ရိဖှိၣ်အခါန့ၣ်လီၤ. ပမ့ၢ်တမၤဃူမၤဖိးတၢ်ဒီး ပဒီပုၢ်ဝဲၢ်ဘၣ်န့ၣ် ယဟိဝၤယွၤစ့ၢ်ကီး တတူၢ်လိာ် ပတၢ်ဘူၣ်ထီၣ်ဘါထီၣ်ဘၣ်. (မၢ်ကူး ၁၁:၂၅) ဒ်သိးပကဲထီၣ် ယဟိဝၤယွၤအတံၤသကိးကသ့အဂီၢ် ပကဘၣ်ပျၢ်ပှၤဂၤ အတၢ်ကမၣ်ဖဲ အမၤကမၣ်ပှၤအခါန့ၣ်လီၤ.—ဖး လူၤကၣ် ၁၁:၄; အ့းဖ့းစူး ၄:၃၂ တက့ၢ်.
၇ ယဟိဝၤယွၤ မုၢ်လၢ်ဝဲလၢအခ့အပှၤခဲလၢာ် ကဘၣ်ပျၢ်ပှၤဂၤအတၢ်ကမၣ် ဒီးအိၣ်ဒီးတၢ်ဃူတၢ်ဖိး တဂၤဒီးတဂၤလီၤ. ပကြၢးသံကွၢ်လီၤပသးလၢ- ‘မ့ၢ်ယပျၢ်ယဒီပုၢ်ဝဲၢ်တဖၣ် အတၢ်ကမၣ်ညီဧါ. မ့ၢ်ယရ့ဒီးအဝဲသ့ၣ် မုာ်စ့ၢ်ကီးဧါ.’ နမ့ၢ်သ့ၣ်ညါလီၤနသးလၢ နပျၢ်ပှၤဂၤအတၢ်ကမၣ်တညီဘၣ်န့ၣ် ဃ့ဘါထုကဖၣ်တၢ်ဆူ ယဟိဝၤယွၤအအိၣ် ဒ်သိးကမၤစၢၤနၤန့ၣ်တက့ၢ်. ပမ့ၢ်ဃ့ဘါထုကဖၣ် လၢတၢ်ဆီၣ်လီၤသးအပူၤန့ၣ် ပပၢ်လၢမူခိၣ် ကဒိကနၣ်ပတၢ်ထုကဖၣ် ဒီးကစံးဆၢက့ၤပတၢ်ထုကဖၣ်လီၤ.—၁ ယိၤဟၣ် ၅:၁၄, ၁၅.
မ့ၢ်နကွၢ်ကပာ် တၢ်လီၤတူာ်လီၤကာ်ဧါ
၈, ၉. ဖဲပှၤမၤကမၣ်ပှၤအခါ ပကြၢးမၤဒ်လဲၣ်.
၈ ပမ့ၢ်ပှၤတလၢတပှဲၤဘၣ်အဃိ ပကြၢးသ့ၣ်ညါလၢ ဒ်ပတဲကမၣ် မ့တမ့ၢ် ပမၤကမၣ်ပှၤဂၤသ့ဝဲအသိး ပှၤဂၤတဲကမၣ်ပှၤ မ့တမ့ၢ် မၤကမၣ်ဘၣ်ပှၤသ့ဝဲစ့ၢ်ကီးလီၤ. (စံၣ်တဲၤတဲလီၤတၢ် ၇:၂၀; မးသဲ ၁၈:၇) မ့မ့ၢ်ဒ်န့ၣ်န့ၣ် နကမၤဒ်လဲၣ်. ပဟံးန့ၢ်တၢ်မၤလိလၢ တၢ်လဲၤခီဖျိလၢလာ်အံၤသ့ဝဲလီၤ. ဒီပုၢ်ဝဲၢ်မုၣ်တဂၤ ဆၢဂ့ၤဆၢဝါ ဒီပုၢ်ဝဲၢ်ခွါခံဂၤလၢ တၢ်ထံၣ်လိာ်အိၣ်သကိးအလီၢ်လီၤ. ဘၣ်ဆၣ် ဒီပုၢ်ဝဲၢ်ခွါတဂၤ အသးတမုာ်ဘၣ် မ့ၢ်လၢဒီပုၢ်ဝဲၢ်မုၣ်တဂၤအံၤ ဆၢဂ့ၤဆၢဝါအီၤကျဲလၢ တဘၣ်အသးဘၣ်လီၤ. ဖဲဒီပုၢ်ဝဲၢ်ခွါအံၤအိၣ်ဝဲဒီး အသကိးအဂၤတဂၤအခါ တဲပၠးဝဲဒီပုၢ်ဝဲၢ်မုၣ်တဂၤအံၤအဂ့ၢ်ဒီး ပာ်တၢ်ကမၣ်လၢအလိၤလီၤ. အတံၤသကိးန့ၣ်တဲအီၤလၢ ဒီပုၢ်ဝဲၢ်မုၣ်အံၤကွၢ်ဆၢၣ်မဲာ်ဘၣ်ဒီး တၢ်ကီတၢ်ခဲအါမံၤ ဘၣ်ဆၣ် မၤဝဲယဟိဝၤယွၤအတၢ်မၤလၢ တၢ်သးတီအပူၤအိၣ်ဝဲ အနံၣ် ၄၀ လံန့ၣ်လီၤ. ဒီပုၢ်ဝဲၢ်ခွါအဂၤတဂၤန့ၣ် နာ်ဝဲလၢ ဒီပုၢ်ဝဲၢ်မုၣ်အံၤ တအဲၣ်ဒိးမၤဘၣ်ဒိ ဒီပုၢ်ဝဲၢ်ခွါအံၤအသးဘၣ်. ဒီပုၢ်ဝဲၢ်ခွါလၢ အသးဘၣ်ဒိတဂၤ ကစံးဆၢက့ၤဝဲဒ်လဲၣ်. အဝဲတူၢ်လိာ်ဝဲ တၢ်ဟ့ၣ်ကူၣ်အံၤဒီးစံးဝဲ “နတဲတၢ်န့ၣ်ဘၣ်မးလီၤ.” လၢခံဒီပုၢ်ဝဲၢ်ခွါတဂၤအံၤ တဆဲးတဲ တၢ်ဂ့ၢ်အံၤလၢၤဘၣ်.
၉ တၢ်လဲၤခီဖျိအံၤ သိၣ်လိပှၤတၢ်မနုၤလဲၣ်. ဖဲပှၤတဂၤဂၤ မ့ၢ်မၤကမၣ်ပှၤအခါ ပကဃုထၢလၢ ပကမၤဆၢက့ၤအီၤလၢ ကျဲတဘိဘိသ့လီၤ. မ့မ့ၢ်ပှၤလၢအိၣ်ဒီး တၢ်အဲၣ်တၢ်ကွံတဂၤန့ၣ် ကပျၢ်ကွံာ်ပှၤဂၤအတၢ်ကမၣ်လီၤ. (ဖး ကတိၤဒိ ၁၀:၁၂; ၁ ပ့းတရူး ၄:၈ တက့ၢ်.) ပမ့ၢ် “ကွၢ်ကပာ်ကွံာ်”တၢ်ကမၣ်န့ၣ် ပကကဲထီၣ်ပှၤလၢ အဃံအလၤလၢ ယဟိဝၤယွၤ အမဲာ်ညါလီၤ. (ကတိၤဒိ ၁၉:၁၁ ခ့ခါစှီၤကျိာ်; စံၣ်တဲၤတဲလီၤတၢ် ၇:၉) လၢတၢ်န့ၣ်အဃိ ဖဲပှၤတဂၤဂၤ မ့ၢ်တဲကမၣ်နၤ မ့တမ့ၢ် မၤကမၣ်နၤအခါန့ၣ် သံကွၢ်လီၤနသးဒ်အံၤ– ‘မ့ၢ်ယကွၢ်ကပာ်ကွံာ် အဝဲအတၢ်လီၤတူာ်လီၤကာ်ကသ့ဧါ. မ့ၢ်ယကဘၣ် ဆိကမိၣ်ဝံၤ ဆိကမိၣ်က့ၤ တၢ်ဂ့ၢ်အံၤဧါ.’
၁၀. (က) ဖဲပှၤဂၤတဲဆါအီၤအခါန့ၣ် ဒီပုၢ်ဝဲၢ်မုၣ်တဂၤမၤဝဲဒ်လဲၣ်. (ခ) ဒီပုၢ်ဝဲၢ်မုၣ်တဂၤအံၤ ပၢၤဃာ်အတၢ်သူၣ်ခုသးခု ကန့ၢ်အဂီၢ် လံာ်စီဆှံမၤစၢၤအီၤဒ်လဲၣ်.
၁၀ ဖဲပှၤအဂၤ မ့ၢ်ကတိၤဆါပှၤအခါန့ၣ် ကကီဝဲလၢ ပကကွၢ်ကပာ်ကွံာ် အတၢ်ကတိၤအဂီၢ်လီၤ. ပကကွၢ်သကိး တၢ်မၤအသးဒီး ဒီပုၢ်ဝဲၢ်မုၣ် လူၣ်စံၣ် လၢအမ့ၢ်ပှၤလဲၤလၢညါတဂၤ အဂ့ၢ်န့ၣ်တက့ၢ်. လၢတၢ်အိၣ်ဖှိၣ်အပူၤ ဒီပုၢ်ဝဲၢ်တနီၤန့ၣ်တဲဆါအီၤ ဘၣ်ဃးအတၢ်စံၣ်တဲၤတဲလီၤတၢ်မၤ အကံၢ်အစီ ဒီးအဝဲသူဝဲ အတၢ်ဆၢကတီၢ်ဒ်လဲၣ်အဂ့ၢ်န့ၣ်လီၤ. ဖဲအဝဲနၢ်ဟူဝဲအခါ အသးဘၣ်ဒိဒိၣ်မး ဒီးလဲၤဃ့ဝဲတၢ်ဟ့ၣ်ကူၣ်လၢ ဒီပုၢ်ဝဲၢ်အအိၣ်လီၤ. ခီဖျိလၢဒီပုၢ်ဝဲၢ်မုၣ် လူၣ်စံၣ် မၤဝဲဒ်န့ၣ်အဃိ တၢ်မၤအသးဒ်လဲၣ်. ဒီပုၢ်ဝဲၢ်မုၣ်လူၣ်စံၣ်စံးဝဲလၢ ဒီပုၢ်ဝဲၢ်သူဝဲလံာ်စီဆှံ ဒ်သိးကမၤစၢၤအီၤလၢ တဘၣ်ဆိကမိၣ် တၢ်ကတိၤလၢ ပှၤတဲဆါအီၤန့ၣ်ဘၣ်. မ့မ့ၢ်အဝဲဘၣ်ဆိကမိၣ်အါထီၣ် ယဟိဝၤယွၤအဂ့ၢ်န့ၣ်လီၤ. ဒီပုၢ်ဝဲၢ်မုၣ် လူၣ်စံၣ်ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ ဖဲအဝဲဖးဝဲ မးသဲ ၆:၁–၄ န့ၣ်လီၤ. (ဖးတက့ၢ်.) လံာ်စီဆှံအဆၢအံၤ ဒုးသ့ၣ်နီၣ်ထီၣ်အီၤလၢ တၢ်မၤသးခု ယဟိဝၤယွၤအသးန့ၣ် မ့ၢ်တၢ်လၢအရ့ဒိၣ်ကတၢၢ်လီၤ. လၢတၢ်န့ၣ်အဃိ အဝဲပာ်လီၤအသးလၢ ကကွၢ်ကပာ်ကွံာ် တၢ်ကတိၤလၢ အမၤဘၣ်ဒိအသးန့ၣ်လီၤ. ခဲအံၤပှၤမ့ၢ်တဲဆါအီၤ ဘၣ်ဃးဒီးအတၢ်စံၣ်တဲၤတဲလီၤ တၢ်မၤအဂ့ၢ်သနာ်က့ အသးတဘၣ်ဒိလၢၤဘၣ်. မ့ၢ်လၢအဝဲသ့ၣ်ညါဝဲလၢ အမၤတၢ်အဂ့ၤကတၢၢ်လၢ ယဟိဝၤယွၤအဂီၢ်လီၤ.
ဖဲနကွၢ်ကပာ် တၢ်ကမၣ်တသ့ဘၣ်အခါ
၁၁, ၁၂. (က) ခရံာ်ဖိတဂၤမ့ၢ်သ့ၣ်ညါဝဲလၢ အဒီပုၢ်ဝဲၢ် ‘ပာ်တၢ်ကမၣ်လၢအလိၤတမံၤမံၤ’ န့ၣ်ကြၢးမၤဝဲဒ်လဲၣ်. (ခ) ဘၣ်ဃးစီၤအၤဘြၤဟၣ် မၤဘၣ်လိာ်က့ၤ တၢ်သဘံၣ်သဘုၣ်န့ၣ် ပဟံးန့ၢ်တၢ်မၤလိမနုၤသ့လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၁ “ပမၤကမၣ်တၢ်အါမံၤခဲလၢာ်လီၤ.” (ယၤကိာ် ၃:၂) အဒိ နသ့ၣ်ညါဘၣ်လၢ ဒီပုၢ်ဝဲၢ်တဂၤအသးဘၣ်ဒိလၢ နတဲကမၣ်အဝဲသ့ၣ်တမံၤမံၤ မ့တမ့ၢ် နမၤကမၣ်အဝဲသ့ၣ်တမံၤမံၤအဃိလီၤ. နမ့ၢ်သ့ၣ်ညါဒ်န့ၣ် ဒီးနကြၢးမၤဒ်လဲၣ်. ယ့ၣ်ၡူးစံးဝဲလၢ “မၤသးဒ်န့ၣ်ဒီး နမ့ၢ်လဲၤစိာ်နတၢ်မၤဘူၣ်ဆူ တၢ်လုၢ်လီၢ်, ဒီးဖဲန့ၣ်နမ့ၢ်သ့ၣ်နီၣ်ထီၣ်က့ၤလၢ နဒီပုၢ်ဝဲၢ်ပာ်တၢ်ကမၣ်လၢ နလိၤတမံၤမံၤဒီး, ပာ်တ့ၢ်နတၢ်မၤဘူၣ်ဖဲန့ၣ် လၢတၢ်လုၢ်လီၢ်အမဲာ်ညါ, ဒီးက့ၤက့ၤတက့ၢ်. အိၣ်ဃူလိာ်ဒီးနဒီပုၢ်ဝဲၢ်တက့ၢ်. တုၤနုၤတစု ဟဲစိာ်နတၢ်မၤဘူၣ်တက့ၢ်.” (မးသဲ ၅:၂၃, ၂၄) လၢတၢ်န့ၣ်အဃိ လဲၤတဲသကိးတၢ်ဒီး နဒီပုၢ်ဝဲၢ်တက့ၢ်. ဖဲနမၤဒ်န့ၣ်အခါ နတၢ်တိာ်ပာ်ကဘၣ်မ့ၢ်ဝဲ လၢနကလဲၤ မၤဃူမၤဖိးတၢ်ဒီးအီၤလီၤ. နတဘၣ်ပာ်တၢ်ကမၣ်လၢအလိၤဘၣ်, နကြၢးအၢၣ်လီၤတူၢ်လိာ် နတၢ်ကမၣ်လီၤ. တၢ်အိၣ်ဃူအိၣ်ဖိး ဒီးပဒီပုၢ်ဝဲၢ်န့ၣ် မ့ၢ်တၢ်လၢအရ့ဒိၣ်ကတၢၢ်လီၤ.
၁၂ ဖဲယွၤအခ့အပှၤတဖၣ်အကျါ တၢ်သးတလီၤပလိာ်အိၣ်ထီၣ်အခါ အဝဲသ့ၣ်မၤဃူမၤဖိးက့ၤဝဲဒ်လဲၣ်န့ၣ် လံာ်စီဆှံပာ်ဖျါထီၣ်ဝဲလီၤ. အဒိ စီၤအၤဘြၤဟၣ် ဒီးအဖိဒိၣ်ခွါစီၤလိာ် အိၣ်ဒီးဆၣ်ဖိကီၢ်ဖိအါမးလီၤ. ဒီးအဝဲသ့ၣ်အခ့အပှၤတဖၣ် အ့ၣ်လိာ်အသး ခီဖျိလၢ ဆၣ်ဖိကီၢ်ဖိအီၣ်ဆၣ်အလီၢ် တလၢတလီၢ်အဃိန့ၣ်လီၤ. မ့ၢ်လၢစီၤအၤဘြၤဟၣ် အဲၣ်ဒိးအိၣ်ဒီး တၢ်ဃူတၢ်ဖိးအဃိ အဝဲပျဲစီၤလိာ်လၢကဃုထၢ တၢ်လီၢ်လၢအဂ့ၤကတၢၢ်လီၤ. (၁ မိၤၡ့ ၁၃:၁, ၂, ၅-၉) စီၤအၤဘြၤဟၣ်အဒိအတဲာ်အံၤ ဂ့ၤဒိၣ်မးလၢပဂီၢ်လီၤ. ခီဖျိလၢ စီၤအၤဘြၤဟၣ် သးအိၣ်ဟ့ၣ်တၢ်ညီအဃိ အဝဲတဘၣ်ကီဘၣ်ခဲထီဘိဘၣ်. ဖဲစီၤအၤဘြၤဟၣ်ပျဲ စီၤလိာ်ဃုထၢတၢ်လီၢ်ဝံၤအလီၢ်ခံ ယဟိဝၤယွၤ ဆိၣ်ဂ့ၤစီၤအၤဘြၤဟၣ် ဒီးအဆၣ်ဖိကီၢ်ဖိအိၣ်အါန့ၢ်ဒံးလၢညါလီၤ. (၁ မိၤၡ့ ၁၃:၁၄-၁၇) ပမၤလိန့ၢ် တၢ်မနုၤလဲၣ်. ဖဲပမၤဘၣ်လိာ်က့ၤ တၢ်သဘံၣ်သဘုၣ်လၢ တၢ်အဲၣ်တၢ်ကွံပူၤအခါ ပမ့ၢ်ဘၣ်တူၢ်ဆါပသး ဘၣ်ဆၣ် ယဟိဝၤယွၤကဆိၣ်ဂ့ၤပှၤလီၤ.[၁] —ကွၢ်တၢ်ဂ့ၢ်လၢ တၢ်မၤလိအကတၢၢ်တက့ၢ်.
၁၃. ဖဲဒီပုၢ်ဝဲၢ်ခွါတဂၤတဲဆၢက့ၤ ဒီပုၢ်ဝဲၢ်လၢအတီခိၣ်ရိၣ်မဲတၢ်အသီတဂၤ လၢတၢ်ကတိၤအဆူၣ်အခါ အဝဲမၤဝဲဒ်လဲၣ်, ဒီးပဟံးန့ၢ်တၢ်မၤလိလၢ အအိၣ်ကသ့ဒ်လဲၣ်.
၁၃ ပကကွၢ်သကိး တၢ်အဒိအတဲာ်လၢ ဆၢကတီၢ်ခဲအံၤစ့ၢ်ကီးလီၤ. လၢတၢ်အိၣ်ဖှိၣ်ဖးဒိၣ်အဂီၢ် ဒီပုၢ်ဝဲၢ်ခွါလၢအတီခိၣ်ရိၣ်မဲတၢ်အသီတဂၤ ကိးဝဲဒီပုၢ်ဝဲၢ်တဂၤ ဒ်သိးကဟဲမၤစၢၤတၢ်လီၤ. ဘၣ်ဆၣ်ဒီပုၢ်ဝဲၢ်တဂၤအံၤ တဲဆၢက့ၤအီၤ တၢ်ကတိၤလၢအဆူၣ် ဒီးပာ်လီၤကွံာ်အလီတဲစိ မ့ၢ်လၢအသးထီၣ်ဒံး ဒီပုၢ်ဝဲၢ်လၢအတီခိၣ်ရိၣ်မဲတၢ် လၢညါတဂၤအဃိန့ၣ်လီၤ. မ့မ့ၢ်ဒီပုၢ်ဝဲၢ်ခွါအသီတဂၤအံၤ ပှၤတဲဆါအီၤဘၣ်ဆၣ် တသးထီၣ်ဝဲဒီပုၢ်ဝဲၢ်အံၤဘၣ်. တနၣ်ရံၣ်ဝံၤအလီၢ်ခံ ဒီပုၢ်ဝဲၢ်လၢ အတီခိၣ်ရိၣ်မဲတၢ်အသီတဂၤအံၤ ကိးက့ၤဝဲဒီပုၢ်ဝဲၢ်ခွါတဂၤန့ၣ် ဒီးဃ့ထံၣ်လိာ်အသးဒီးအီၤလီၤ. တနွံဝံၤအလီၢ်ခံ ဒီပုၢ်ဝဲၢ်ခွါခံဂၤအံၤ ထံၣ်လိာ်အသးဖဲ ဘီမုၢ်ဘျီၣ်ဒိၣ်အပူၤ ဒီးအဝဲသ့ၣ်ဃ့ဘါထုကဖၣ်ဆူ ယဟိဝၤယွၤအအိၣ်လီၤ. ဖဲဃ့ဘါထုကဖၣ်တၢ်ဝံၤအလီၢ်ခံ အဝဲသ့ၣ်တဲသကိးတၢ်ယံာ်ဝဲ တနၣ်ရံၣ်ညါလီၤ. ဒီပုၢ်ဝဲၢ်ခွါတဂၤအံၤ တဲဘၣ်ဒီပုၢ်ဝဲၢ် လၢအတီခိၣ်ရိၣ်မဲတၢ်အသီတဂၤလၢ တၢ်သဘံၣ်သဘုၣ်အိၣ်ထီၣ်တ့ၢ်ဒီး ဒီပုၢ်ဝဲၢ်လၢ တီခီၣ်ရိၣ်မဲတၢ်လၢညါတဂၤအဂ့ၢ်န့ၣ်လီၤ. ဒီပုၢ်ဝဲၢ်လၢအတီခိၣ်ရိၣ်မဲတၢ်အသီတဂၤအံၤ ဒိကနၣ်ဝဲလၢ တၢ်သးအိၣ်အပူၤဒီး အဝဲသ့ၣ် ကွၢ်သကိးလံာ်စီဆှံအဆၢတနီၤလီၤ. လၢခံန့ၣ် ဒီပုၢ်ဝဲၢ်ခွါခံဂၤအံၤ နၢ်ပၢၢ်လိာ်က့ၤအသး ဒီးမၤသကိးတၢ်မၤတပူၤဃီလၢ တၢ်အိၣ်ဖှိၣ်ဖးဒိၣ်အဂီၢ်လီၤ. မ့ၢ်လၢဒီပုၢ်ဝဲၢ်ခွါလၢ အတီခိၣ်ရိၣ်မဲတၢ်အသီတဂၤအံၤ တဲတၢ်မုာ်မုာ် လၢတၢ်အဲၣ်တၢ်ကွံပူၤအဃိ အဝဲသူၣ်မံသးမုာ်ဝဲလီၤ.
ပတၢ်ဂ့ၢ်န့ၣ် ပကဘၣ်လဲၤတဲ တၢ်အိၣ်ဖှိၣ်သးပှၢ်တဖၣ်ဧါ
၁၄, ၁၅. (က) တၢ်ဟ့ၣ်ကူၣ်လၢမးသဲ ၁၈:၁၅-၁၇ န့ၣ်ပကြၢးမၤထွဲအီၤ အခါဖဲလဲၣ်. (ခ) ယ့ၣ်ၡူးအတၢ်ဟ့ၣ်ကူၣ်သၢခါန့ၣ် မ့ၢ်မနုၤလဲၣ်, ဒီးပကြၢးမၤထွဲဒ်လဲၣ်.
၁၄ တၢ်ကီတၢ်ခဲအါတက့ၢ်လၢ အဟဲကဲထီၣ်အသးလၢ ခရံာ်ဖိခံဂၤအဘၢၣ်စၢၤန့ၣ် အဝဲသ့ၣ် ကြၢးမၤဘၣ်လိာ်က့ၤဒၣ်အတၢ်လီၤ. ဘၣ်ဆၣ်သနာ်က့ တဘျီတခီၣ် ပမၤဒ်န့ၣ်တသ့ဘၣ်. ဒ် မးသဲ ၁၈:၁၅–၁၇ (ဖးတက့ၢ်.) ပာ်ဖျါထီၣ်ဝဲအသိး တၢ်အိၣ်အသးတနီၤန့ၣ် လိၣ်ဘၣ်ပှၤဂၤ အတၢ်မၤစၢၤလီၤ. တၢ် “ကမၣ်” လၢယ့ၣ်ၡူးယၢၤထီၣ်ဝဲလၢ လံာ်စီဆှံအဆၢအံၤန့ၣ် တမ့ၢ်တၢ်ကမၣ်ဆံးဆံးဖိဘၣ်. ပသ့ၣ်ညါဘၣ်ဒ်လဲၣ်. ယ့ၣ်ၡူးစံးဝဲလၢ ဒီပုၢ်ဝဲၢ်လၢ အတၢ်ကမၣ်တအိၣ်ဘၣ်တဂၤအံၤ တဲသကိးတၢ်ဒီး ဒီပုၢ်ဝဲၢ်လၢ အမၤကမၣ်ဘၣ်အီၤ, တဲသကိးဒီးအီၤဃုာ်ဒီး ပှၤအုၣ်အသးတဂၤခံဂၤ, ဒီးတဲသကိးဒီးတၢ်အိၣ်ဖှိၣ်သးပှၢ်တဖၣ် မ့ၢ်ဝံၤအလီၢ်ခံဒၣ်လဲာ် ပှၤမၤတၢ်ကမၣ်တဂၤအံၤ မ့ၢ်တပီၢ်ယၢ်လီၤက့ၤအသးဒံးဘၣ်န့ၣ် ပှၤကဘၣ်ရ့အီၤဒ် “ပှၤကလုာ်တဖၣ်အဖိ ဒီးပှၤဃ့သွဲတဂၤအသိး” လီၤ. မ့မ့ၢ်လၢပစိၤခဲအံၤန့ၣ် တၢ်အံၤအခီပညီမ့ၢ်ဝဲ ကဘၣ်တၢ်နီဟးထီၣ်ကွံာ်အီၤလီၤ. တၢ် “ကမၣ်” အံၤပၣ်ဃုာ်ဒီး တၢ်တဲဟးဂီၤပှၤဂၤ မ့တမ့ၢ် တၢ်သူဝဲတၢ်လီတၢ်ဝ့ၤလၢ ကမၤန့ၢ်ပှၤ တၢ်ဖိတၢ်လံၤအဂီၢ်လီၤ. မ့မ့ၢ်တၢ်ဒဲးဘး ဒ်သိးဒီးတၢ်မၤကမၣ်မုၣ်ကမၣ်ခွါ, ပိာ်မုၣ်ကဒဲကဒဲ, ပိာ်ခွါကဒဲကဒဲ မံဃုာ်လိာ်သး, ပှၤလၢအထီဒါက့ၤ တၢ်မ့ၢ်တၢ်တီတဖၣ် မ့တမ့ၢ် ပှၤဘူၣ်ထီၣ်ဘါထီၣ် တၢ်ဂီၤတၢ်ဖီၣ်တဖၣ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ဟံးမူဒါ ဒီးစံၣ်ညီၣ်တဲာ်ဝဲသပှၢ်ကတၢၢ်လီၤ.
ဒ်သိး တၢ်ဃူတၢ်ဖိးကအိၣ်ထီၣ်က့ၤအဂီၢ် ဘၣ်သ့ၣ်သ့ၣ် နကဘၣ်လဲၤတဲသကိးတၢ်ဒီး နဒီပုၢ်ဝဲၢ်တဘျုးဘျီညါလီၤ (ကွၢ်လံာ်အဆၢ ၁၅)
၁၅ ယ့ၣ်ၡူးအတၢ်တိာ်ပာ်လၢ ဘၣ်ဃးဒီးတၢ်ဟ့ၣ်ကူၣ်အံၤန့ၣ် မ့ၢ်ဒ်သိးကဒုးသ့ၣ်ညါပှၤလၢ ပကဘၣ်အဲၣ် ပဒီပုၢ်ဝဲၢ်ဒီး မၤစၢၤအီၤန့ၣ်လီၤ. (မးသဲ ၁၈:၁၂-၁၄) ပမၤထွဲ တၢ်ဟ့ၣ်ကူၣ်အံၤကသ့ဒ်လဲၣ်. (၁) အဆိကတၢၢ် ပကြၢးဂုာ်ကျဲးစၢး မၤဘၣ်လိာ်ဖိးဒ့လိာ်ပသးဒီး ပဒီပုၢ်ဝဲၢ်ထဲခံဂၤဧိၤလီၤ. ဘၣ်သ့ၣ်သ့ၣ် ပကဘၣ်တဲတၢ်ဒီးအီၤ အါဘျီလီၤ. ဘၣ်ဆၣ် ပမၤဘၣ်လိာ်ဖိးဒ့လိာ်ပသးဒီးအီၤ မ့ၢ်တန့ၢ်ဘၣ်န့ၣ် ပကြၢးမၤဒံးတၢ်မနုၤလဲၣ်. (၂) ပကြၢးလဲၤကိးဃုာ်ဒီး ပှၤအုၣ်အသးလၢ အသ့ၣ်ညါထွဲတၢ်ဂ့ၢ်တဂၤ ဒီးတဲသကိးတၢ်ဒီး ပဒီပုၢ်ဝဲၢ်န့ၣ်လီၤ. တၢ်ဘၣ်လိာ်ဖိးဒ့ မ့ၢ်အိၣ်ထီၣ်က့ၤန့ၣ်န “န့ၢ်က့ၤလံ နဒီပုၢ်ဝဲၢ်” လီၤ. ဘၣ်ဆၣ် နတဲသကိးတၢ်ဒီးအီၤအါဘျီလံသနာ်က့ နမၤဘၣ်လိာ်ဖိးဒ့လိာ်သးဒီးအီၤ မ့ၢ်တန့ၢ်ဒံးဘၣ်န့ၣ် နကြၢးမၤဒံးတၢ်မနုၤလဲၣ်. (၃) နကြၢးလဲၤတဲဖျါထီၣ် တၢ်ကီတၢ်ခဲလၢ တၢ်အိၣ်ဖှိၣ်သးပှၢ်အအိၣ်န့ၣ်လီၤ.
၁၆. ပမ့ၢ်မၤထွဲ ယ့ၣ်ၡူးခရံာ်အတၢ်ဟ့ၣ်ကူၣ်န့ၣ် မ့ၢ်ကျဲတဘိလၢ ပှဲၤဒီးတၢ်အဲၣ် ဒီးကဲဘျုးကဲဖှိၣ်န့ၣ် ပသ့ၣ်ညါဘၣ်အီၤဒ်လဲၣ်.
၁၆ တၢ်ဂ့ၢ်အါဒၣ်တက့ၢ်န့ၣ် တလိၣ်လၢပကဘၣ်မၤတုၤလၢ သၢပတီၢ်တပတီၢ်လၢ မးသဲ ၁၈:၁၅-၁၇ အပူၤဘၣ်အဃိ မ့ၢ်ဒၣ် တၢ်ဟ့ၣ်ဂံၢ်ဟ့ၣ်ဘါတခါလီၤ. ဘၣ်မနုၤအဃိ ပတဲဒ်န့ၣ်လဲၣ်. အါဒၣ်တက့ၢ်န့ၣ် မ့ၢ်လၢ ပှၤမၤကမၣ်တၢ်တဂၤ ထံၣ်လီၤအတၢ်ကမၣ်ဒီး ပီၢ်ယၢ်လီၤက့ၤအသးအဃိ တလိၣ်လၢ ပှၤနီဟးထီၣ်ကွံာ်အီၤ လၢတၢ်အိၣ်ဖှိၣ်အပူၤဘၣ်. ဒီးပှၤလၢအတၢ်ကမၣ်တအိၣ်ဘၣ်တဂၤန့ၣ် ကြၢးပျၢ်ကွံာ် အဒီပုၢ်ဝဲၢ်အတၢ်ကမၣ် ဒ်သိးကဒုးအိၣ်ထီၣ် တၢ်ဃူတၢ်ဖိးအဂီၢ်လီၤ. ယ့ၣ်ၡူးအတၢ်ဟ့ၣ်ကူၣ်အံၤ ဒုးသ့ၣ်ညါပှၤလၢ ပတလိၣ်လဲၤတဲ တၢ်အိၣ်ဖှိၣ်သးပှၢ်တဘျီဃီဘၣ်. လၢတၢ်န့ၣ်အလီၢ် တၢ်အုၣ်အသးမ့ၢ်အိၣ်နီၢ်နီၢ် ဒီးပမၤထွဲယ့ၣ်ၡူးအတၢ်ဟ့ၣ်ကူၣ်အဆိကတၢၢ် ခံမံၤမ့ၢ်ဝံၤအလီၢ်ခံမး ပကြၢးလဲၤတဲ တၢ်အိၣ်ဖှိၣ်သးပှၢ်လီၤ.
၁၇. ပှၤလၢအ “ဃုတၢ်ဃူတၢ်ဖိး” ဒီးပှၤအဂၤန့ၣ် ကဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်.
၁၇ မ့ၢ်လၢပတလၢတပှဲၤဘၣ်အဃိ ပကမၤကမၣ်လိာ်ဘၣ်ပသး တဂၤဒီးတဂၤသ့ဝဲလီၤ. တၢ်မၢဖိယၤကိာ် ကွဲးဝဲလၢ– “ပှၤမ့ၢ်တမၤကမၣ် ဘၣ်လၢတၢ်ကတိၤ ဘၣ်တဂၤဂၤဒီး, အဝဲဒၣ်န့ၣ်မ့ၢ်ပှၤအလၢအပှဲၤတဂၤ, ဒီးမၤနၢၤအနီၢ်ခိဒီဂၤညါသ့စ့ၢ်ကီးလီၤ.” (ယၤကိာ် ၃:၂) ဒ်သိးပကအိၣ် ဒီးတၢ်သးတဖျၢၣ်ဃီအဂီၢ် ပကဘၣ်ဂုာ်ကျဲးစၢးအဂ့ၤကတၢၢ်လၢပက “ဃုတၢ်ဃူတၢ်ဖိး, ဒီးလူၤအီၤ”လီၤ. (စံးထီၣ်ပတြၢၤ ၃၄:၁၄) ဖဲပမၤဘၣ်လိာ်ဖိးဒ့က့ၤပသး ဒီးပဒီပုၢ်ဝဲၢ်အခါ ပကအိၣ်ဒီးတၢ်ရ့လိာ်သး ဒီးပဒီပုၢ်ဝဲၢ်လၢအဂ့ၤလီၤ. ပမ့ၢ်မၤဒ်န့ၣ်န့ၣ် ပကအိၣ်ဒီးတၢ်ဃူတၢ်ဖိးလီၤ. (စံးထီၣ်ပတြၢၤ ၁၃၃:၁-၃) ဒီးတၢ်လၢအရ့ဒိၣ်ကတၢၢ်တခါန့ၣ် မ့ၢ်ဝဲပတၢ်ရ့လိာ်သးဒီး “တၢ်ဃူတၢ်ဖိးအကစၢ်”ယဟိဝၤယွၤလီၤ. (ရိမ့ၤ ၁၅:၃၃) ဖဲပမၤဘၣ်လိာ်က့ၤ တၢ်သဘံၣ်သဘုၣ်လၢ တၢ်အဲၣ်တၢ်ကွံပူၤအခါ ပကဒိးန့ၢ်ဘၣ် တၢ်ဆိၣ်ဂ့ၤအါမံၤလီၤ.
^ [၁] (လံာ်အဆၢ ၁၂) ပှၤဂၤလၢအမၤ ဘၣ်လိာ်က့ၤတၢ်သဘံၣ်သဘုၣ်လၢ တၢ်မုာ်တၢ်ခုၣ်အပူၤန့ၣ် မ့ၢ်ဝဲ စီၤယၤကိာ်ဒီး စီၤဧ့ၤၡီၤ (၁ မိၤၡ့ ၂၇:၄၁-၄၅; ၃၃:၁-၁၁) စီၤယိၤသးဒီး အဒီပုၢ်ဝဲၢ်ခွါတဖၣ် (၁ မိၤၡ့ ၄၅:၁-၁၅) စီၤကံးဒဧိၣ်ဒီး အ့ဖရဲၣ်ဖိတဖၣ်လီၤ. (စံၣ်ညီၣ်ကွီၢ် ၈:၁-၃) ဘၣ်သ့ၣ်သ့ၣ် နကသ့ၣ်နီၣ်ထီၣ် တၢ်အဒိအတဲာ်အဂၤလၢ လံာ်စီဆှံအပူၤန့ၣ်လီၤ.