ပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်ဃုထၢတၢ်လၢ တၢ်သ့ဘျ့န့ၣ်တက့ၢ်
“ဖဲဒၣ်ယွၤအသးစီဆှံ အိၣ်ဝဲအလီၢ်န့ၣ် တၢ်သဘျ့အိၣ်ဝဲလီၤ.” —၂ ကရံၣ်သူး ၃:၁၇, ခ့ခါစှီၤကျိာ်.
၁, ၂. (က) ဘၣ်ဃးဒီး တၢ်သဘျ့လၢ ပကဃုထၢတၢ်လၢပနီၢ်ကစၢ်န့ၣ် ပှၤအါဂၤအတၢ်ထံၣ် လီၤဆီလိာ်အသးဒ်လဲၣ်. (ခ) ဘၣ်ဃးဒီးပဃုထၢတၢ်လၢပနီၢ်ကစၢ်န့ၣ် လံာ်စီဆှံသိၣ်လိပှၤဒ်လဲၣ် ဒီးပကတဲသကိးတၢ်သံကွၢ် မနုၤတဖၣ်လဲၣ်.
ပိာ်မုၣ်တဂၤဖဲအကဘၣ် မၤတၢ်ဆၢတဲာ်အခါ စံးဘၣ်အသကိးတဂၤလၢ “တဘၣ်မၢယဆိကမိၣ်တၢ်တဂ့ၤ, တဲပၠးယၤလၢ ယကဘၣ်မၤဒ်လဲၣ်. နမ့ၢ်မၤဒ်န့ၣ်န့ၣ် ကညီတစဲး.” ပိာ်မုၣ်တဂၤအံၤ တသူဝဲအတၢ်သဘျ့လၢ ကဆၢတဲာ်တၢ်လၢ အနီၢ်ကစၢ်ဒၣ်ဝဲဘၣ် လၢတၢ်န့ၣ်အလီၢ် အဝဲအဲၣ်ဒိးလၢ ပှၤဂၤကဆၢတဲာ်န့ၢ်တၢ်လၢအဂီၢ်လီၤ. ဒီးအဝဲတပာ်လုၢ်ပာ်ပှ့ၤဝဲ တၢ်ဘၣ်တ့ကစၢ် အတၢ်ဟ့ၣ်အံၤဘၣ်. မ့မ့ၢ်နၤန့ၣ်နကမၤဒ်လဲၣ်. မ့ၢ်နကအဲၣ်ဒိးမၤ တၢ်ဆၢတဲာ်လၢ နနီၢ်ကစၢ်ဧါ မ့တမ့ၢ် နကမၢပှၤဂၤမၤန့ၢ်နဂီၢ်ဧါ. တၢ်သဘျ့အံၤ မ့ၢ်နထံၣ်အီၤဒ်လဲၣ်.
၂ ဘၣ်ဃးဒီးတၢ်သဘျ့လၢ ပကဃုထၢတၢ်လၢပနီၢ်ကစၢ်န့ၣ် ပှၤအါဂၤအတၢ်ထံၣ် တလီၤဂာ်လိာ်အသးဘၣ်. ပှၤတနီၤနီၤတဲဝဲလၢ တၢ်သဘျ့ဒ်အံၤန့ၣ် တအိၣ်နီၢ်ကီၢ်ဘၣ် တၢ်ကကဲထီၣ်အသးဒီးပှၤ ဒ်လဲၣ်ဒ်လဲၣ်န့ၣ် ကစၢ်ယွၤရဲၣ်ကျဲၤပာ်စၢၤဝဲဝံၤလံ. မ့မ့ၢ်အဂၤတနီၤစံးဝဲလၢ နကဃုထၢတၢ်လၢ နနီၢ်ကစၢ်အဂီၢ် နကဘၣ်အိၣ်ဒီး တၢ်သဘျ့လၢာ်လၢာ်ဆ့ဆ့န့ၣ်လီၤ. ဘၣ်ဆၣ်လံာ်စီဆှံ သိၣ်လိဝဲလၢ ပဝဲဒၣ်သ့ၣ်တဖၣ် ပဘၣ်တၢ်တ့လီၤပှၤဃုာ်ဒီး တၢ်သ့တၢ်ဘၣ်ဒီးတၢ်သဘျ့လၢ ပကမၤတၢ်ဆၢတဲာ်လၢ အဂ့ၤကတၢၢ်န့ၣ်လီၤ. (ဖး ယိၤၡူ ၂၄:၁၅ တက့ၢ်.) တၢ်သံကွၢ်လၢလာ်တဖၣ်အံၤ အတၢ်စံးဆၢန့ၣ် အိၣ်လၢလံာ်စီဆှံအပူၤလီၤ. တၢ်သဘျ့လၢနကဃုထၢတၢ်လၢ နနီၢ်ကစၢ်အံၤန့ၣ် မ့ၢ်နသူအီၤဖဲနသးသ့ဧါ. ဖဲပမၤတၢ်ဆၢတဲာ်အခါတၢ်သဘျ့အံၤ ပကြၢးသူအီၤဒ်လဲၣ်. ပတၢ်ဆၢတဲာ်န့ၣ် ပာ်ဖျါထီၣ်လၢ ပအဲၣ်ယဟိဝၤယွၤထဲလဲၣ်. ပပာ်ဖျါထီၣ်လၢပပာ်ကဲ ပှၤဂၤအတၢ်ဆၢတဲာ်ကသ့ဒ်လဲၣ်.
လၢယဟိဝၤယွၤဒီး ယ့ၣ်ၡူးအအိၣ်န့ၣ် ပမၤလိန့ၢ်တၢ်မနုၤလဲၣ်
၃. ယဟိဝၤယွၤ အိၣ်ဒီးတၢ်သဘျ့လၢာ်လၢာ်ဆ့ဆ့ ဘၣ်ဆၣ်အဝဲသူဝဲဒ်လဲၣ်.
၃ ယဟိဝၤယွၤအိၣ်ဒီး တၢ်သဘျ့လၢာ်လၢာ်ဆ့ဆ့ ဒီးအဝဲသူဝဲတၢ်သဘျ့အံၤလၢ ကျဲဒ်လဲၣ်န့ၣ် ပမၤလိန့ၢ်တၢ်လၢအအိၣ်သ့လီၤ. အဒိ, ယဟိဝၤယွၤဃုထၢဝဲပှၤအံၣ်စရ့လးဖိ လၢကကဲထီၣ်အပှၤဂီၢ်မုၢ် ဒီးစံးဝဲလၢ “နကကဲထီၣ် ပှၤတကလုာ်လၢ အလုၢ်ဒိၣ်ပှ့ၤဒိၣ်” လၢယဂီၢ်လီၤ. (၅ မိၤၡ့ ၇:၆-၈) ယဟိဝၤယွၤဃုထၢဝဲပှၤတဖုအံၤ မ့ၢ်လၢအဝဲအဲၣ်ဒိးတီဒီး အတၢ်အၢၣ်လီၤအီလီၤလၢ အမၤဝဲဒီးအတံၤသကိး စီၤအၤဘြၤဟၣ်အဃိလီၤ. (၁ မိၤၡ့ ၂၂:၁၅-၁၈) ထဲန့ၣ်တကးဒံးဘၣ် ယဟိဝၤယွၤအဲၣ်ပှၤဒိၣ်မးအဃိ သူဝဲအတၢ်သဘျ့လၢ ကျဲလၢအကြၢးအဘၣ်လီၤ. ယွၤအတၢ်အဲၣ်ပှၤဒိၣ်ထဲလဲၣ်န့ၣ် ပသ့ၣ်ညါဘၣ်အီၤဖဲ အဝဲသိၣ်ဃီၣ်ဝဲ ပှၤအံၣ်စရ့လးဖိတဖၣ်လၢ အတဒိကနၣ်အကလုၢ်အခါန့ၣ်လီၤ. ဖဲအဝဲသ့ၣ်ပီၢ်ယၢ်လီၤက့ၤအသးအခါ ယဟိဝၤယွၤ ပာ်ဖျါထီၣ်တၢ်အဲၣ်ဒီး တၢ်သးကညီၤန့ၣ်လီၤ. အဝဲစံးဝဲလၢ– “ယကမၤဘျါက့ၤ အသးဟးဂီၤန့ၣ်လီၤ. ယကအဲၣ်က့ၤကွံက့ၤ” အီၤလီၤ. (ဟိၤၡ့ ၁၄:၄) ယဟိဝၤယွၤ ပာ်လီၤဒိဂ့ၤတဲာ်ဘၣ်လၢပဂီၢ် ခီဖျိသူဝဲ အတၢ်သဘျ့အံၤလၢ ကမၤစၢၤပှၤဂၤန့ၣ်လီၤ.
တချုးလၢယ့ၣ်ၡူးဟဲလီၤလၢ ဟီၣ်ခိၣ်အခါ အဝဲပာ်လီၤအသး ဂၢၢ်ဂၢၢ်ကျၢၤကျၢၤလၢ ကတီဒီးယွၤ ဒီးတပၣ်ဃုာ်လၢ မုၣ်ကီၤလံၢ်ဒီး အတၢ်ပူထီၣ်ထီဒါတၢ်အကျါဘၣ်.
၄, ၅. (က) ယွၤအတၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့န့ၣ် မတၤဒိးန့ၢ်ဘၣ် အဆိကတၢၢ်လဲၣ်. ဒီးအဝဲသူဝဲဒ်လဲၣ်. (ခ) ပကြၢးသံကွၢ်လီၤပသးလၢ တၢ်သံကွၢ်မနုၤလဲၣ်.
၄ ယဟိဝၤယွၤတ့လီၤမူခိၣ်ကလူးဒီး ပှၤဟီၣ်ခိၣ်ဖိတဖၣ်ဃုာ်ဒီး တၢ်သဘျ့လၢ ကဃုထၢတၢ်လၢအသးဒၣ်ဝဲလီၤ. အဆိကတၢၢ်ယဟိဝၤယွၤ တ့လီၤဝဲယ့ၣ်ၡူး ဒ်အက့ၢ်အဂီၤအသိး ဒီးဟ့ၣ်အီၤတၢ်သဘျ့လၢ ကဃုထၢတၢ်လၢအသးဒၣ်ဝဲစ့ၢ်ကီးလီၤ. (ကလီးစဲ ၁:၁၅) ယ့ၣ်ၡူးသူဝဲ အတၢ်သဘျ့အံၤဒ်လဲၣ်. တချုးလၢယ့ၣ်ၡူးဟဲလီၤလၢ ဟီၣ်ခိၣ်အခါ အဝဲပာ်လီၤအသး ဂၢၢ်ဂၢၢ်ကျၢၤကျၢၤလၢ ကတီဒီးယွၤ ဒီးတပၣ်ဃုာ်လၢ မုၣ်ကီၤလံၢ်ဒီး အတၢ်ပူထီၣ်ထီဒါတၢ်အကျါဘၣ်. ဖဲအဝဲဟဲလီၤလၢ ဟီၣ်ခိၣ်အခါ ဃုထၢဝဲလၢကဂ့ၢ်လိာ်ကွံာ် မုၣ်ကီၤလံၢ်အတၢ်လ့ပစီန့ၣ်လီၤ. (မးသဲ ၄:၁၀) တချုးအသံအနၤန့ၣ် ယ့ၣ်ၡူးတဲဘၣ်အပၢ်လၢ အဲၣ်ဒိးမၤအပၢ်အတၢ်ဘၣ်သးလီၤ. အဝဲတဲဝဲလၢ– “ပၢ်ဧၢ, မ့ၢ်ဘၣ်နသးဒီး တၢ်လၢလီခီအံၤ, မ်အလဲၤပူၤကွံာ်လၢယၤတက့ၢ်. ဘၣ်ဆၣ်ဒီးဖဲယသးဒၣ်ယဲတမ့ၢ်ဘၣ်, မ့ၢ်ဖဲဒၣ်နသးဒၣ်နဲတက့ၢ်.” (လူၤကၣ် ၂၂:၄၂) မ့ၢ်ပကွၢ်လိမၤဒိး ယ့ၣ်ၡူးဒီးသူပတၢ်သဘျ့လၢ ပကမၤလၤကပီၤယဟိဝၤယွၤဒီး မၤအတၢ်ဘၣ်သးကသ့ဧါ.
၅ မ့ၢ်လၢကစၢ်ယွၤတ့လီၤပှၤဒ် အက့ၢ်အဂီၤအသိးအဃိ ပကွၢ်လိမၤဒိး ယ့ၣ်ၡူးသ့ဝဲလီၤ. (၁ မိၤၡ့ ၁:၂၆) ဘၣ်ဆၣ်ပတအိၣ်ဒီးတၢ်သဘျ့ လၢာ်လၢာ်ဆ့ဆ့ဒ် ယဟိဝၤယွၤအသိးဘၣ်. လံာ်စီဆှံပာ်ဖျါထီၣ်န့ၢ်ပှၤလၢ ယဟိဝၤယွၤဟ့ၣ်ပှၤတၢ်သိၣ်တၢ်သီ ဒီးအဝဲမုၢ်လၢ်ဝဲလၢ ပကမၤပိာ်ထွဲအီၤန့ၣ်လီၤ. အဒိ, လၢဟံၣ်ပူၤဃီပူၤန့ၣ် မါတဖၣ်ကဘၣ်ဆီၣ်လီၤအသးလၢ အဝၤအဖီလာ်ဒီး ဖိတဖၣ်ကြၢးဒိကနၣ် မိၢ်ပၢ်အကလုၢ်လီၤ. (အ့းဖ့းစူး ၅:၂၂; ၆:၁) ဖဲပသူပတၢ်သဘျ့အခါ တၢ်သိၣ်တၢ်သီအံၤကကဲဘျုးလၢပဂီၢ်ဒ်လဲၣ်. ပတၢ်အိၣ်မူခါဆူညါန့ၣ် ကဒိးသန့ၤထီၣ်အသးလၢ ပစံးဆၢက့ၤတၢ်သံကွၢ်အံၤ ဒ်လဲၣ်န့ၣ်လီၤ.
တၢ်သူတၢ်သဘျ့လၢ အဘၣ်ဒီးအကမၣ်
၆. ပအိၣ်ဒီးတၢ်သဘျ့သနာ်က့ တၢ်သိၣ်တၢ်သီန့ၣ်အရ့ဒိၣ်လၢ ပဂီၢ်ဒ်လဲၣ် ဟ့ၣ်အဒိတက့ၢ်.
၆ တၢ်သိၣ်တၢ်သီလၢ ပဘၣ်လူၤပိာ်ထွဲ မ့ၢ်အိၣ်ဒံးန့ၣ် မ့ၢ်ပတဲလၢပအိၣ်ဒီး တၢ်သဘျ့နီၢ်နီၢ်သ့ဧါ. မ့ၢ်, ပတဲသ့လီၤ. ဘၣ်မနုၤအဃိပတဲဒ်န့ၣ်သ့လဲၣ်. မ့ၢ်လၢတၢ်သိၣ်တၢ်သီတဖၣ်အံၤ ဒီသဒၢပှၤအဃိလီၤ. အဒိ, နကဘၣ်လဲၤနီကါဆူ ဝ့ၢ်ဖးယံၤတဖျၢၣ်လီၤ. ဘၣ်ဆၣ်ထံၣ်တမှံကွၢ်လၢ ကျဲမုၢ်ဖးဒိၣ်အဖီခိၣ်န့ၣ် တၢ်သိၣ်တၢ်သီလၢ ဘၣ်ဃးဒီးပှၤကဘၣ်နီကါဒ်လဲၣ်ဒ်လဲၣ် အဂီၢ်န့ၣ်တအိၣ်ဘၣ်. ဒီးပှၤကိးဂၤဒဲးန့ၣ် ဆၢတဲာ်လီၤအသးလၢ ကနီကါဖဲဒၣ်အသးလီၤ. ဖဲန့ၣ်အခါနကတူၢ်ဘၣ်ဒ်လဲၣ်. နကတူၢ်ဘၣ်လၢ တၢ်ဘၣ်ယိၣ်အလီၢ်အိၣ်လၢ နသးသမူအဂီၢ် တမ့ၢ်ဘၣ်ဧါ. ဒ်န့ၣ်အသိး ပအိၣ်ဒီးတၢ်သဘျ့သနာ်က့ ဒ်သိးပကအိၣ်ဒီးတၢ်သူၣ်ခုသးခုအဂီၢ် ပလိၣ်ဘၣ်တၢ်သိၣ်တၢ်သီတဖၣ်လီၤ. ယဟိဝၤယွၤ ပာ်လီၤဝဲတၢ်သိၣ်တၢ်သီအဃိ ကဲဘျုးလၢပဂီၢ်ဒ်လဲၣ်န့ၣ် ပကကွၢ်သကိး တၢ်အဒိအတဲာ်တနီၤလၢ လံာ်စီဆှံအပူၤန့ၣ်လီၤ.
၇. (က) စီၤအၤဒၣ်ဒီး ဆၣ်ဖိကီၢ်ဖိတဖၣ် လီၤဆီလိာ်အသးဒ်လဲၣ်. (ခ) စီၤအၤဒၣ်သူဝဲအတၢ်သဘျ့လၢ ကျဲဒ်လဲၣ်န့ၣ် ပာ်ဖျါထီၣ်တက့ၢ်.
၇ ဖဲယဟိဝၤယွၤ တ့လီၤဝဲစီၤအၤဒၣ်အခါ တ့လီၤဝဲဒ်သိး အဝဲကဃုထၢတၢ်လၢအနီၢ်ကစၢ် ဒ်မူခိၣ်ကလူးတဖၣ်အသိးလီၤ. ဘၣ်ဆၣ်တၢ်ဟ့ၣ်အံၤ ယဟိဝၤယွၤတဟ့ၣ်ဝဲ ဆၣ်ဖိကီၢ်ဖိတဖၣ်ဘၣ်. မ့ၢ်စီၤအၤဒၣ် သူဝဲတၢ်သဘျ့အံၤလၢ ကျဲလၢအဂ့ၤတကပၤန့ၣ်ဧါ. စီၤအၤဒၣ်အိၣ်ဒီး တၢ်ခွဲးတၢ်ယာ်လၢ ကယုၢ်န့ၢ်ဆၣ်ဖိကီၢ်ဖိအမံၤလီၤ. ကစၢ်ယွၤ “ဒုးဟဲဝဲဆူပှၤကညီအအိၣ် ဒ်သိးအကထံၣ်ဝဲလၢ အဝဲဒၣ်ကယုၢ်အမံၤ ဒ်လဲၣ်ဒ်လဲၣ်န့ၣ်လီၤ.” ဒီးစီၤအၤဒၣ်ကွၢ်ဝဲ ဆၣ်ဖိကီၢ်ဖိတဒုစုာ်စုာ်ဒီး ဟ့ၣ်ဝဲအမံၤလီၤ. ဒီးယဟိဝၤယွၤ တဆီတလဲက့ၤဝဲ ဆၣ်ဖိကီၢ်ဖိတဖၣ်အံၤအမံၤဘၣ်. လၢတၢ်န့ၣ်အလီၢ် ကစၢ်ယွၤစံးဝဲလၢ “ဖဲဒၣ်ပှၤကညီယုၢ်တၢ်အသးအမံၤန့ၣ် မ့ၢ်အမံၤလီၤ.”—၁ မိၤၡ့ ၂:၁၉.
၈. စီၤအၤဒၣ်သူကမၣ်ဝဲ အတၢ်သဘျ့ဒ်လဲၣ်. ဒီးအဝဲမၤဝဲဒ်န့ၣ်အဃိ ဒိးန့ၢ်ဘၣ်တၢ်မနုၤလဲၣ်.
၈ ယဟိဝၤယွၤ ဟ့ၣ်လီၤစီၤအၤဒၣ်မူဒါလၢ ကမၤကဲထီၣ်ဟီၣ်ခိၣ်လၢ ပၤရဒံစူးဒီးတဲအီၤလၢ– “မ်သုသၣ်ထီၣ်, ဒီးအါထီၣ်, ဒီးမၤပှဲၤထီၣ်ဟီၣ်ခိၣ် ဒီးမၤနၢၤအီၤ, ဒီးပၢဒ့ၣ်ဧိၤညၣ်ဧိၤလၢ ပီၣ်လဲၣ်ပူၤ, ဒီးထိၣ်ဧိၤလံၣ်ဧိၤလၢတၢ်ဖးဖီ, ဒီးကယဲၢ်တၢ်အသးလၢ အဟူးအဂဲၤလၢဟီၣ်ခိၣ်ချၢန့ၣ်တက့ၢ်.” (၁ မိၤၡ့ ၁:၂၈) ဘၣ်ဆၣ် စီၤအၤဒၣ်ဃုထၢဝဲလၢကအီၣ်ဝဲသ့ၣ်သၣ်လၢ ယွၤတြီအီၤန့ၣ်လီၤ. လၢတၢ်န့ၣ်အဃိ တၢ်သိၣ်တၢ်သီလၢ ယဟိဝၤယွၤပာ်လီၤဝဲန့ၣ် အဝဲတဒိကနၣ်ဝဲဘၣ်. အဝဲသူကမၣ်ဝဲ အတၢ်သဘျ့အံၤအဃိ အစၢၤအသွဲၣ်တဖၣ်တူၢ်ဘၣ်ဝဲတၢ်နးတၢ်ဖှီၣ် အနံၣ်လၢအကထိလံန့ၣ်လီၤ. (ရိမ့ၤ ၅:၁၂) ပကဘၣ်သ့ၣ်နီၣ်ထီၣ်လၢ စီၤအၤဒၣ်အတၢ်ဆၢတဲာ်အဃိ ပဝဲခဲလၢာ်ပတူၢ်ဘၣ် တၢ်နးတၢ်ဖှီၣ်ဒီးတၢ်သံန့ၣ်လီၤ. တၢ်အံၤဟ့ၣ်ပလီၢ်ပှၤဒ်သိး ပကသူပတၢ်သဘျ့လၢ ကျဲလၢအဘၣ်ဒီး ဒိကနၣ်ကစၢ်ယွၤအတၢ်သိၣ်တၢ်သီလၢ အဟ့ၣ်လီၤပှၤတဖၣ်န့ၣ်လီၤ.
ပှၤအံၣ်စရ့လးဖိတဖၣ် ဃုထၢဝဲလၢကကဲထီၣ် ယွၤအပှၤဂီၢ်မုၢ် ဒီးကမၤပိာ်ထွဲဝဲ တၢ်သိၣ်တၢ်သီလၢ ယွၤဟ့ၣ်လီၤအီၤန့ၣ်လီၤ
၉. ယဟိဝၤယွၤ ဟ့ၣ်ပှၤအံၣ်စရ့လးဖိတဖၣ် တၢ်ခွဲးတၢ်ယာ် လၢကဃုထၢဝဲတၢ်မနုၤလဲၣ်. ဒီးအဝဲသ့ၣ်အၢၣ်လီၤအီလီၤဝဲလၢ ကမၤတၢ်မနုၤလဲၣ်.
၉ မ့ၢ်လၢစီၤအၤဒၣ်ဒီး နီၢ်အံၣ်အုအဃိ ပှၤဟီၣ်ခိၣ်ဖိခဲလၢာ် ကဲထီၣ်ဝဲပှၤတလၢတပှဲၤ ဒီးဘၣ်သံဝဲလီၤ. ဘၣ်ဆၣ် ပဝဲခဲလၢာ် ကစၢ်ယွၤဟ့ၣ်ပှၤ တၢ်သဘျ့လၢ ပကဃုထၢတၢ်လၢပသးဒၣ်ဝဲလီၤ. ကစၢ်ယွၤဟ့ၣ်ပှၤတၢ်သဘျ့န့ၣ် ပသ့ၣ်ညါအီၤခီဖျိလၢ အဝဲရ့ဒီးပှၤအံၣ်စရ့လးဖိတဖၣ် ဒ်လဲၣ်န့ၣ်လီၤ. ဖဲန့ၣ်အဆၢကတီၢ် ယဟိဝၤယွၤဟ့ၣ်အဝဲသ့ၣ် တၢ်ခွဲးတၢ်ယာ်လၢ ကဃုထၢဝဲလၢ ကကဲယွၤအပှၤဂီၢ်မုၢ်ဧါ မ့တမ့ၢ် ကဂ့ၢ်လိာ်ကွံာ်ဝဲဧါန့ၣ်လီၤ. (၂ မိၤၡ့ ၁၉:၃-၆) အဝဲသ့ၣ်ဃုထၢဝဲလၢ ကကဲထီၣ်ယွၤအပှၤဂီၢ်မုၢ် ဒီးကမၤပိာ်ထွဲဝဲ တၢ်သိၣ်တၢ်သီလၢယွၤဟ့ၣ်လီၤအီၤန့ၣ်လီၤ. အဝဲသ့ၣ် စံးဝဲလၢ– “ကယဲၢ်တၢ်လၢယွၤ စံးတၢ်န့ၣ် ပကမၤခဲလၢာ်လီၤ.” (၂ မိၤၡ့ ၁၉:၈) လၢခံန့ၣ် အဝဲသ့ၣ်မၤဟးဂီၤအတၢ်အၢၣ်လီၤအီလီၤဒီး ယဟိဝၤယွၤအဃိ လီၤသးအုးဒိၣ်မးလီၤ. ပဝဲသ့ၣ်တဖၣ်ပဟံးန့ၢ်တၢ်မၤလိလၢ တၢ်အဒိအတဲာ်တခါအံၤ သ့ဝဲစ့ၢ်ကီးလီၤ. မ်ပကပာ်လုၢ်ပာ်ပှ့ၤတၢ်ဟ့ၣ်လၢအမ့ၢ် တၢ်ဃုထၢတၢ်လၢ တၢ်သဘျ့အံၤ ဒီးဆဲးပၢၤဃာ် ပတၢ်ရ့လိာ်သးဒီးယဟိဝၤယွၤ ဒီးဒိကနၣ်အတၢ်သိၣ်တၢ်သီတက့ၢ်.— ၁ ကရံၣ်သူး ၁၀:၁၁.
၁၀. ဧ့ၤဘြံၤ အဆၢဒိၣ် ၁၁ န့ၣ်ပာ်ဖျါထီၣ်ဝဲ ပှၤလၢတလၢတပှဲၤတဖၣ် သူဝဲအတၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့အံၤ ဒ်သိးကမၤလၤကပီၤ ယွၤအဂီၢ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၀ လၢဧ့ၤဘြံၤ အဆၢဒိၣ် ၁၁ အပူၤန့ၣ် ပထံၣ်ဘၣ်ပိာ်မုၣ်ဒီးပိာ်ခွါ တဆံဃုဂၤလၢ အအိၣ်ဒီးတၢ်သးတီဒီး ဃုထၢဝဲလၢကဒိကနၣ် တၢ်သိၣ်တၢ်သီလၢ ယဟိဝၤယွၤဟ့ၣ်လီၤဝဲန့ၣ်လီၤ. လၢတၢ်န့ၣ်အဃိ အဝဲသ့ၣ်ဒိးန့ၢ်ဘၣ်ဝဲ တၢ်ဆိၣ်ဂ့ၤအါမးဒီး အိၣ်ဒီးတၢ်မုၢ်လၢ်လၢ ခါဆူညါအဂီၢ်န့ၣ်လီၤ. အဒိ, စီၤနိအၤ အိၣ်ဒီးတၢ်နာ်လၢအဂၢၢ်အကျၢၤ ဒီးဃုထၢဝဲလၢကဒိကနၣ်ကစၢ်ယွၤ အတၢ်ဟံးစုနဲၣ်ကျဲလၢ ကတ့ထီၣ်ကဘီ ဒီးမၤပူၤဖျဲးအဟံၣ်ဖိဃီဖိ ဒီးအစၢၤအသွဲၣ်လၢ ခါဆူညါတဖၣ်လီၤ. (ဧ့ၤဘြံၤ ၁၁:၇) စီၤအၤဘြၤဟၣ် ဒီးနီၢ်စၤရါ ဒိကနၣ်ကစၢ်ယွၤအကလုၢ်လၢ တၢ်သူၣ်အိၣ်သးအိၣ်အပူၤ ဒီးလဲၤဝဲလၢထံကီၢ်လၢ ကစၢ်ယွၤအၢၣ်လီၤဝဲလၢ ကဟ့ၣ်အီၤန့ၣ်လီၤ. လၢခံန့ၣ် အဝဲသ့ၣ်ဒိးန့ၢ်ဘၣ် တၢ်ခွဲးတၢ်ယာ်လၢ “ကက့ၤ” ဆူဝ့ၢ်အူၢ်သနာ်က့ တက့ၤဝဲဘၣ်. မ့ၢ်လၢအဝဲသ့ၣ်နာ်ဝဲ ယွၤအတၢ်အၢၣ်လီၤအီလီၤလၢ ခါဆူညါအဂီၢ်အဃိလီၤ. လံာ်စီဆှံစံးဝဲလၢ အဝဲသ့ၣ်– “ဆၢန့ၢ်တၢ်လၢ အဂ့ၤန့ၢ်အန့ၣ်တက့ၢ်” လီၤ. (ဧ့ၤဘြံၤ ၁၁:၈, ၁၃, ၁၅, ၁၆) စီၤမိၤၡ့ ဂ့ၢ်လိာ်တၢ်ထူးတၢ်တီလၢ ကီၢ်အဲၤကူပတူးအပူၤဒီး ဃုထၢဝဲလၢအက “ဘၣ်နးဘၣ်ဖှီၣ်ဃုာ်ဒီး ယွၤအပှၤဂီၢ်မုၢ်န့ၣ်, ဘၣ်အသးဒိၣ်န့ၢ်အမုာ်လၤတၢ်လၢ တၢ်ဒဲးဘးအတၢ်မုာ်တၢ်လၤအပူၤ တစိၢ်တလီၢ်န့ၣ်တက့ၢ်လီၤ.” (ဧ့ၤဘြံၤ ၁၁:၂၄-၂၆) မ်ပကွၢ်လိမၤဒိး ပိာ်မုၣ်ဒီးပိာ်ခွါလၢ အိၣ်ဒီးတၢ်သးတီတဖၣ် အဒိအတဲာ်ဒီး ပာ်လုၢ်ပာ်ပှ့ၤတၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့ ဒီးသူအီၤလၢကမၤ တၢ်ဘၣ်ယွၤအသးတက့ၢ်.
၁၁. (က) တၢ်ဆိၣ်ဂ့ၤလၢ ပဒိးန့ၢ်ဘၣ်အီၤ ခီဖျိလၢပဃုထၢတၢ်လၢတၢ်သဘျ့န့ၣ် မ့ၢ်မနုၤလဲၣ်. (ခ) ဒ်သိးနကသူ နတၢ်သဘျ့လၢ ကျဲအဘၣ်အဂီၢ် တၢ်မနုၤထိၣ်ဟူးထိၣ်ဂဲၤထီၣ်နၤလဲၣ်.
၁၁ ပကဆိကမိၣ်ဘၣ်လၢ ပှၤတဂၤဂၤမ့ၢ်မၤဝဲ တၢ်ဆၢတဲာ်လၢပဂီၢ်န့ၣ် ကညီဝဲလီၤ. ဘၣ်ဆၣ်ပမ့ၢ်မၤဒ်န့ၣ်န့ၣ် ပတဒိးန့ၢ်ဘၣ်တၢ်ဆိၣ်ဂ့ၤလၢ အဂ့ၤကတၢၢ်တခါဘၣ်. တၢ်ဆိၣ်ဂ့ၤမနုၤလဲၣ်. ၅ မိၤၡ့ ၃၀:၁၉, ၂၀ (ဖးတက့ၢ်) တဲဝဲဒ်အံၤလီၤ. ဖဲအဆၢဖိ ၁၉ န့ၣ်စံးဝဲလၢ ယွၤဟ့ၣ်ပှၤအံၣ်စရ့လးဖိတဖၣ်တၢ်ခွဲးတၢ်ယာ်လၢ ကဃုထၢတၢ်လၢအနီၢ်ကစၢ်လီၤ. ဒီးအဆၢဖိ ၂၀ န့ၣ်ပသ့ၣ်ညါဘၣ်လၢ ယဟိဝၤယွၤဟ့ၣ်အဝဲသ့ၣ်တၢ်ခွဲးတၢ်ယာ် ဒ်သိးကပာ်ဖျါထီၣ်လၢ အအဲၣ်ကစၢ်ယွၤထဲလဲၣ်န့ၣ်လီၤ. ပဝဲသ့ၣ်စ့ၢ်ကီး ပဃုထၢလၢပကဘူၣ်ထီၣ်ဘါထီၣ် ယဟိဝၤယွၤသ့လီၤ. ဒီးပဝဲဒၣ်သ့ၣ်တဖၣ် ပအိၣ်ဒီးတၢ်ခွဲးတၢ်ယာ်လီၤဆီလၢ ပကသူတၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့အံၤဒ်သိး ကမၤလၤကပီၤ ယဟိဝၤယွၤဒီးပာ်ဖျါထီၣ်လၢ ပအဲၣ်အီၤထဲလဲၣ်န့ၣ်လီၤ.
တၢ်ဟ့ၣ်လၢအမ့ၢ် တၢ်ဃုထၢတၢ်လၢ တၢ်သဘျ့န့ၣ် တဘၣ်သူကမၣ်အီၤတဂ့ၤ
၁၂. တၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့အံၤ ပတကြၢးသူအီၤဒ်လဲၣ်.
၁၂ ထံၣ်တမှံကွၢ်လၢ နဟ့ၣ်နသကိးတဂၤလၢ တၢ်ဟ့ၣ်အလုၢ်ဒိၣ်ပှ့ၤဒိၣ်တခါတက့ၢ်. အဝဲမ့ၢ်တၢၤကွံာ် တၢ်ဟ့ၣ်အံၤလၢ တၢ်ကမှံၤဒၢပူၤ မ့တမ့ၢ် သူဝဲတၢ်ဟ့ၣ်တခါအံၤလၢ ကမၤဘၣ်ဒိပှၤဂၤန့ၣ် နကတူၢ်ဘၣ်ဒ်လဲၣ်. နသးကဘၣ်ဒိ သပှၢ်ကတၢၢ်လီၤ. ယဟိဝၤယွၤ ဟ့ၣ်ပှၤတၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့လီၤ. ဖဲအထံၣ်ဝဲပှၤသူကမၣ် တၢ်ဟ့ၣ်အံၤဒီး ဆၢတဲာ်တၢ်လၢအကမၣ် မ့တမ့ၢ် မၤဘၣ်ဒိဆါပှၤဂၤအခါ ယဟိဝၤယွၤအသး ကဘၣ်ဒိဝဲဒိၣ်မးလီၤ. လံာ်စီဆှံစံးဝဲလၢ “မုၢ်နံၤအခံကတၢၢ်တဖၣ်အပူၤန့ၣ်” ကအိၣ်ဒီး “ပှၤတသ့ၣ်ညါဘၣ် တၢ်အဘျုးအဖှိၣ်” တဖၣ်လီၤ. (၂ တံၤမသ့း ၃:၁, ၂) လၢတၢ်န့ၣ်အဃိ ပဝဲဒၣ်သ့ၣ်တဖၣ် ပပာ်ဖျါထီၣ်လၢပပာ်လုၢ်ပာ်ပှ့ၤ တၢ်ဟ့ၣ်အလုၢ်ဒိၣ်ပှ့ၤဒိၣ်လၢ ယဟိဝၤယွၤဟ့ၣ်ပှၤအံၤ ကသ့ဒ်လဲၣ်. ဒ်သိးပသုတသူကမၣ်ဘၣ် တၢ်ဟ့ၣ်အံၤအဂီၢ် ပကဘၣ်မၤဒ်လဲၣ်.
၁၃. ကျဲတဘိလၢ ပဟးဆှဲးတၢ်သူကမၣ် ပတၢ်သဘျ့န့ၣ် မ့ၢ်မနုၤလဲၣ်.
၁၃ ပဝဲခဲလၢာ်န့ၣ် ပအိၣ်ဒီးတၢ်သဘျ့လၢ ပကဃုထၢပတံၤသကိး, တၢ်ကူတၢ်ကၤ ဒီးတၢ်မၤမုာ်မၤဖှံသး ဖဲပသးန့ၣ်လီၤ. ဘၣ်ဆၣ် ပမ့ၢ်တပလီၢ်ပသးဘၣ်န့ၣ် ပကသူကမၣ်ဘၣ်တၢ်သဘျ့အံၤလၢ ပကမၤတၢ်လၢအတဘၣ် ယွၤအသးဒီးကွၢ်လိမၤဒိး ပှၤတၢ်ချၢတဖၣ်န့ၣ်လီၤ. (ဖး ၁ ပ့းတရူး ၂:၁၆ တက့ၢ်.) တၢ်သဘျ့အံၤ ပတကြၢးသူအီၤလၢ ပကမၤတၢ်ကမၣ်အဂီၢ်ဘၣ်. လၢတၢ်န့ၣ်အလီၢ် ပကြၢးသူအီၤလၢ “ယွၤအလၤကပီၤအဂီၢ်” လီၤ.—၁ ကရံၣ်သူး ၁၀:၃၁; ကလၤတံ ၅:၁၃.
၁၄. ဖဲပသူပတၢ်သဘျ့အခါ ဘၣ်မနုၤအဃိ ပကဘၣ်သန့ၤပသးလၢ ယဟိဝၤယွၤလဲၣ်.
၁၄ ယဟိဝၤယွၤ စံးဝဲလၢ– “ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢ ကျဲလၢနဂ့ၤလဲၤန့ၣ်လီၤ.” (ယၡါယၤ ၄၈:၁၇) ဒ်သိးပဃုထၢတၢ်လၢအဘၣ်ကသ့အဂီၢ် ပကဘၣ်သန့ၤပသးလၢ ယဟိဝၤယွၤ ဒီးမၤထွဲတၢ်သိၣ်တၢ်သီလၢ အဟ့ၣ်လီၤပှၤန့ၣ်လီၤ. လၢတၢ်ဆီၣ်လီၤသးအပူၤ ပတူၢ်လိာ်လၢ “ပှၤကညီတပၢဘၣ်အကျဲဘၣ်, ဒီးပှၤလၢအလဲၤတၢ်န့ၣ် စံၣ်ညီၣ်အထွဲတၢ် တသ့ဘၣ်ဝဲဘၣ်.” (ယံးရမံယၤ ၁၀:၂၃) စီၤအၤဒၣ်ဒီးပှၤအံၣ်စရ့လးဖိလၢ တအိၣ်ဒီးတၢ်သးတီတဖၣ် ဃုထၢဝဲလၢ ကဂ့ၢ်လိာ်ကွံာ်တၢ်သိၣ်တၢ်သီလၢ ယဟိဝၤယွၤဟ့ၣ်လီၤအဝဲသ့ၣ် ဒီးမၤဖဲအသးန့ၣ်လီၤ. ဒ်တၢ်အဒိလၢအတဂ့ၤ တဖၣ်အံၤအသိး ပသုတသန့ၤပသးလၢ ပနီၢ်ကစၢ်တဂ့ၤ မ်ပက ‘သန့ၤပသးလၢ ယွၤလၢပသးဒီဖျၢၣ်ညါတက့ၢ်.’—ကတိၤဒိ ၃:၅.
ပာ်ကဲ ပှၤဂၤအတၢ်ဃုထၢတၢ်လၢ တၢ်သဘျ့တက့ၢ်
၁၅. တၢ်သိၣ်တၢ်သီမိၢ်ပှၢ်လၢ ကလၤတံ ၆:၅ အပူၤန့ၣ် ဒုးသ့ၣ်ညါပှၤတၢ်မနုၤလဲၣ်.
၁၅ ပကဘၣ်ပာ်ကဲ ပှၤဂၤအတၢ်ဆၢတဲာ်စ့ၢ်ကီးလီၤ. ဘၣ်မနုၤအဃိလဲၣ်. မ့ၢ်လၢပဝဲခဲလၢာ် ပဒိးန့ၢ်ဘၣ်တၢ်ဟ့ၣ်လၢအမ့ၢ် တၢ်ဃုထၢတၢ်လၢ တၢ်သဘျ့အဃိလီၤ. ခရံာ်ဖိတဂၤဒီးတဂၤန့ၣ် အတၢ်ဆၢတဲာ် တဒ်သိးထီဘိဘၣ်. အဒိ ဘၣ်ဃးဒီးလုၢ်လၢ်သကဲးပဝးဒီး တၢ်ဘူၣ်တၢ်ဘါအဂ့ၢ်န့ၣ် ခရံာ်ဖိတဖၣ်အတၢ်ဆၢတဲာ် တဂၤဒီးတဂၤတဒ်သိးလိာ်အသးဘၣ်. သ့ၣ်နီၣ်ထီၣ်က့ၤ တၢ်သိၣ်တၢ်သီမိၢ်ပှၢ်လၢ ကလၤတံ ၆:၅ (ဖးတက့ၢ်) အပူၤတက့ၢ်. ပမ့ၢ်တူၢ်လိာ်လၢ ခရံာ်ဖိတဂၤစုာ်စုာ် ကဘၣ်ဟံးမူဒါလၢ အနီၢ်ကစၢ်အတၢ်ဆၢတဲာ်အဂီၢ်န့ၣ် ပကပာ်ကဲ ပှၤဂၤအတၢ်ဃုထၢန့ၣ်လီၤ.
ပကဘၣ်မၤတၢ်ဆၢတဲာ်လၢ ပနီၢ်ကစၢ် ဒီးပတဘၣ်မၢဆူၣ်ပှၤဂၤလၢ ကမၤတၢ်ဆၢတဲာ်ဒ်သိးပှၤဘၣ်. (ကွၢ်လံာ်အဆၢ ၁၅)
၁၆, ၁၇. (က) ဘၣ်ဃးဒီးတၢ်ဃုထၢတၢ်လၢ တၢ်သဘျ့န့ၣ် လၢကရံၣ်သူးတၢ်အိၣ်ဖှိၣ်အပူၤ တၢ်ဂ့ၢ်လိာ်ဘှီလိာ် မနုၤကဲထီၣ်ဝဲလဲၣ်. (ခ) စီၤပီလူးမၤစၢၤ ခရံာ်ဖိတဖၣ်ဒ်လဲၣ်. ဒီးသိၣ်လိပှၤ တၢ်ဂ့ၢ်မနုၤလဲၣ်.
၁၆ ဘၣ်မနုၤအဃိ ပဘၣ်ပာ်ကဲပှၤဂၤ အတၢ်ဃုထၢတၢ်လၢ တၢ်သဘျ့လဲၣ်န့ၣ် ပကကွၢ်သကိးတၢ်အဒိလၢ လံာ်စီဆှံအပူၤတခါလီၤ. လၢကရံၣ်သူးတၢ်အိၣ်ဖှိၣ်အပူၤန့ၣ် ခရံာ်ဖိတဖၣ် ဂ့ၢ်လိာ်ဘှီလိာ်အသး ဘၣ်ဃးဒီးပှၤအီၣ် တၢ်ဖံးတၢ်ညၣ်လၢ ပှၤလုၢ်ထီၣ်ပာ်ထီၣ်လၢ တၢ်ဂီၤတၢ်ဖှီၣ်အမဲာ်ညါဝံၤ ပှၤလဲၤဆါလၢ ဖၠါပူၤအဂ့ၢ်န့ၣ်လီၤ. ခရံာ်ဖိတနီၤ သ့ၣ်ညါဝဲလၢတၢ်ဂီၤတဖှီၣ်န့ၣ် မၤတၢ်တသ့နီတမံၤဘၣ်အဃိ အသးလၢအသ့ၣ်ညါဒၣ်တၢ် ပျဲအီၤလၢကအီၣ်ဝဲ တၢ်ဖံးတၢ်ညၣ်တဖၣ်အံၤလီၤ. ဘၣ်ဆၣ်ပှၤလၢ အဘူၣ်ထီၣ်ဘါထီၣ်တ့ၢ် တၢ်ဂီၤတၢ်ဖှီၣ်တဖၣ်တခီ အဝဲသ့ၣ်တူၢ်ဘၣ်ဝဲလၢ ပှၤအီၣ်တၢ်ဖံးတၢ်ညၣ်အံၤန့ၣ် လီၤဂာ်ဒ်ပှၤဘူၣ်ထီၣ်ဘါထီၣ် တၢ်ဂီၤတၢ်ဖှီၣ်အသိးန့ၣ်လီၤ. (၁ ကရံၣ်သူး ၈:၄, ၇) တၢ်သဘံၣ်သဘုၣ်အံၤ မၤလီၤဖးတၢ်အိၣ်ဖှိၣ်သ့ဝဲလီၤ. စီၤပီလူးမၤစၢၤ ခရံာ်ဖိတဖၣ်လၢ ကမၤဘၣ်လိာ်က့ၤ တၢ်ဂ့ၢ်လၢအရ့ဒိၣ်အံၤဒ်လဲၣ်.
၁၇ အဆိကတၢၢ် စီၤပီလူးဟ့ၣ်ပလီၢ် အဝဲသ့ၣ်ခံဖုလၢာ်လၢ တၢ်အီၣ်တၢ်အီတဖၣ်အံၤတမၤဂ့ၤထီၣ် အဝဲသ့ၣ်အတၢ်ရ့လိာ်သးဒီးယွၤဘၣ်. (၁ ကရံၣ်သူး ၈:၈) ဒီးလၢခံစီၤပီလူး ဟ့ၣ်ပလီၢ်အဝဲသ့ၣ်လၢ သုတပျဲသု “တၢ်သဘျ့လၢသုကမၤဖဲသုသး” န့ၣ် မၤလီၤဃံၢ်ပှၤလၢ အဂံၢ်စၢ်ဘါစၢ်တဖၣ်တဂ့ၤ. (၁ ကရံၣ်သူး ၈:၉) လၢခံအဝဲတဲဘၣ်ဝဲ ပှၤလၢအသးလၢအသ့ၣ်ညါဒၣ်တၢ်လၢ အဆူၣ်တလၢတဖၣ် ဒ်သိးအသုတစံၣ်ညီၣ် ပှၤလၢအအီၣ် တၢ်ဖံးတၢ်ညၣ်တဖၣ်အံၤတဂ့ၤန့ၣ်လီၤ. (၁ ကရံၣ်သူး ၁၀:၂၅, ၂၉, ၃၀) လၢတၢ်န့ၣ်အဃိ ဖဲပဘၣ်မၤတၢ်ဆၢတဲာ်လၢ အဘၣ်ထွဲလိာ်သးဒီး တၢ်ဘူၣ်တၢ်ဘါအဂ့ၢ်အခါန့ၣ် ခရံာ်ဖိတဂၤစုာ်စုာ် ကဘၣ်မၤတၢ်ဆၢတဲာ်လၢ အနီၢ်ကစၢ်ဒၣ်ဝဲလီၤ. ပဝဲသ့ၣ်စ့ၢ်ကီး ပကြၢးပာ်ကဲ ပဒီပုၢ်ဝဲၢ်တဖၣ်အတၢ်သဘျ့လၢ အဆၢတဲာ်တၢ်လၢ အနီၢ်ကစၢ်ဒၣ်ဝဲန့ၣ် တမ့ၢ်ဘၣ်ဧါ.—၁ ကရံၣ်သူး ၁၀:၃၂, ၃၃.
၁၈. နကပာ်ဖျါထီၣ်လၢ နပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့အံၤဒ်လဲၣ်.
၁၈ ယဟိဝၤယွၤ ဟ့ၣ်ပှၤတၢ်ဟ့ၣ်လၢအမ့ၢ် တၢ်ဃုထၢတၢ်လၢတၢ်သဘျ့ဒီး ပအိၣ်ဒီး တၢ်သဘျ့နီၢ်နီၢ်လီၤ. (၂ ကရံၣ်သူး ၃:၁၇) ပပာ်လုၢ်ပာ်ပှ့ၤတၢ်ဟ့ၣ်အံၤဒိၣ်မး မ့ၢ်လၢအဟ့ၣ်ပှၤ တၢ်ခွဲးတၢ်ယာ်လၢ ပကပာ်ဖျါထီၣ်လၢ ပအဲၣ်ယဟိဝၤယွၤ ထဲလဲၣ်အဃိန့ၣ်လီၤ. မ်ပကဆဲးပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ဟ့ၣ်အံၤခီဖျိ ပဃုထၢလၢပကမၤလၤကပီၤကစၢ်ယွၤ ဒီးပာ်ကဲပှၤဂၤ အတၢ်ဃုထၢတၢ်လၢ တၢ်သဘျ့န့ၣ်လီၤ.