ပှၤသးစၢ်သ့ၣ်ဧၢ မ့ၢ်နသးစၢၢ်ဆၢလၢ နီၢ်သးအဖီတၢၣ်ဧါ

၁-၃. (က) ပှၤသးစၢ်တဖၣ်​ ထံၣ်ဘၣ်တၢ်အိၣ်သးဒ်လဲၣ်, ဒီးပထိၣ်သတြီၤအီၤဒီး တၢ်မနုၤသ့ဝဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) ဖဲပှၤသးစၢ်တဖၣ်​ ထံၣ်ဘၣ်တၢ်အိၣ်သးဒ်အံၤအခါ တၢ်မနုၤကမၤစၢၤအီၤလဲၣ်.

ဆိကမိၣ်ကွၢ် တၢ်အဒိတခါတက့ၢ်. နကလဲၤလၢ မူးပွဲလၢအရ့ဒိၣ်တခါလၢ သဝီလၢအယံၤန့ၣ်လီၤ. ဒ်သိးနလဲၤကတုၤအဂီၢ် နဘၣ်လဲၤဒီးဘၢး(စ်)ကါ လီၤ. လၢဘၢး(စ်)ကါ သန့န့ၣ်ပှၤအိၣ်ဝဲအါအါဂီၢ်ဂီၢ် ဒီးဘၢး(စ်)ကါ အိၣ်ဝဲအါမးအဃိ နခိၣ်နူာ်ကဘံဘူလီၤ. ဘၣ်ဆၣ်​ တၢ်လီၢ်လၢနကလဲၤ ဒီးနကဘၣ်ဒိးကါဖဲလဲၣ်တခိၣ်လဲၣ်န့ၣ်​ နသ့ၣ်ညါလီၤ. အဃိနတဒိးထီၣ်ကြီကါ တခိၣ်ဂ့ၤတခိၣ်ဂ့ၤဘၣ်. နမ့ၢ်ဒိးထီၣ်ကြီကါန့ၣ်​ နကလဲၤတုၤလၢတၢ်လီၢ်အဂၤလီၤ.

^၂ ပတၢ်အိၣ်မူန့ၣ်​ လီၤဂာ်ဒ်တၢ်လဲၤတၢ်က့ၤ တခါအသိးစ့ၢ်ကီးလီၤ. ဒီးပှၤသးစၢ်တဖၣ်န့ၣ်လီၤဂာ်ဒ် ပှၤအါအါဂီၢ်ဂီၢ် လၢအအိၣ်လၢဘၢး(စ်)ကါ သန့န့ၣ်လီၤ. တဘျီတခီၣ်​ လၢနတၢ်အိၣ်မူအပူၤ တၢ်ဃုထၢလၢနကဘၣ်မၤန့ၣ်​ အိၣ်ဝဲအါမးအဃိ နခိၣ်နူာ်ကဘံဘူလီၤ. ဘၣ်ဆၣ်​ နမ့ၢ်သ့ၣ်ညါလီၤတံၢ်လီၤဆဲးလၢ နအဲၣ်ဒိးလဲၤဖဲလဲၣ်န့ၣ်​ နကဆၢတဲာ်တၢ်လၢအဘၣ်အဂီၢ် ကညီထီၣ်ဝဲလီၤ. မ့မ့ၢ်ဒ်န့ၣ်​ နကြၢးမၤတၢ်မနုၤလဲၣ်.

^၃ တၢ်မၤလိအံၤ ကပာ်ဖျါထီၣ်န့ၢ်ပှၤ တၢ်သံကွၢ်အံၤ အတၢ်စံးဆၢလီၤ. တကးဒံးဘၣ်​ ကဟ့ၣ်ဂံၢ်ဟ့ၣ်ဘါ စ့ၢ်ကီး ပှၤသးစၢ်တဖၣ်​ ဒ်သိးအဝဲသ့ၣ်​ ကသးစၢၢ်ဆၢဒီးဖီတၢၣ်လၢ ကမၤသးခု ယဟိဝၤယွၤအသးန့ၣ်လီၤ. အခီပညီန့ၣ်​ နကဘၣ်မၤထွဲယဟိဝၤယွၤ အတၢ်ဟံးစုနဲၣ်ကျဲလၢ နတၢ်အိၣ်မူကိးသနၢၣ်ဒဲးအပူၤ ဒ်သိးဒီးတၢ်ဃုထၢ တၢ်ကူၣ်ဘၣ်ကူၣ်သ့, တၢ်ဖံးတၢ်မၤ, တၢ်ဆီဟံၣ်ဆီဃီ ဒီးတၢ်ဟံးဖိဟံးလံၤန့ၣ်လီၤ. တကးဒံးဘၣ်​ နမ့ၢ်ဂုာ်ကျဲးစၢးဒ်သိး နကတုၤလၢ နနီၢ်သးဖီတၢၣ်န့ၣ်​ နကဘူးထီၣ်ဒီး ယဟိဝၤယွၤလီၤ. နမ့ၢ်သးစၢၢ်ဆၢဒီး ကစၢ်ယွၤအတၢ်မၤန့ၣ်​ နနာ်သ့သပှၢ်ကတၢၢ်လၢ အဝဲကဆိၣ်ဂ့ၤနၤ ဒီးကမၤစၢၤနၤ ဒ်သိးနတၢ်မၤ ကကဲထီၣ်လိၣ်ထီၣ်အဂီၢ်လီၤ.—ဖး ကတိၤဒိ ၁၆:၃ တက့ၢ်.

ဘၣ်မနုၤအဃိ ပဘၣ်ပာ်လီၤနီၢ်သးဖီတၢၣ်လဲၣ်

၄. လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်.

^၄ ပမ့ၢ်အိၣ်ဒီး နီၢ်သးအဖီတၢၣ်န့ၣ်ဂ့ၤဝဲလီၤ. ဘၣ်မနုၤအဃိလဲၣ်. ပကတဲသကိး တၢ်ဂ့ၢ်သၢခါလီၤ. အဆိကတၢၢ်ခံခါန့ၣ်​ ကမၤစၢၤနၤဒ်သိး နကသ့ၣ်ညါထီၣ်လၢ နမ့ၢ်ဂုၢ်ကျဲးစၢး မၤလၢပှဲၤနနီၢ်သးအဖီတၢၣ်န့ၣ်​ နတၢ်ရ့လိာ်သးဒီး ယဟိဝၤယွၤကဂၢၢ်ကျၢၤဝဲလီၤ. သၢခါတခါန့ၣ်​ ကပာ်ဖျါထီၣ်န့ၢ်ပှၤလၢ ဘၣ်မနုၤအဃိ ဖဲနသးစၢ်ဒံးအခါ နမ့ၢ်အိၣ်ဒီး နီၢ်သးဖီတၢၣ်န့ၣ်ဂ့ၤဝဲလဲၣ်.

၅. တၢ်ဂ့ၢ်အရ့ဒိၣ်ကတၢၢ်တထံၣ်လၢ ပကဘၣ်ပာ်လီၤနီၢ်သးဖီတၢၣ်န့ၣ်​ မ့ၢ်မနုၤလဲၣ်.

^၅ တၢ်ဂ့ၢ်အရ့ဒိၣ်ကတၢၢ်တထံၣ်လၢ ပကဘၣ်ပာ်လီၤ နီၢ်သးဖီတၢၣ်န့ၣ်​ မ့ၢ်ဒ်သိး ပကစံးဘျုးယဟိဝၤယွၤ လၢအတၢ်အဲၣ်​ ဒီးတၢ်လၢအမၤန့ၢ်ပှၤတဖၣ်အဃိလီၤ. ပှၤကွဲးထါစံးထီၣ်ပတြၢၤတဂၤ တဲဝဲလၢ “ပစံးထီၣ်ပတြၢၤယွၤ, . . . န့ၣ်​ မ့ၢ်တၢ်အဂ့ၤ . . . အဂ့ၢ်ဒ်အံၤ, နဒုးသးခုယၤလၢ နမၤတၢ်အဃိ, ယွၤဧၢ, လၢတၢ်လၢနမၤလၢ နစုတဖၣ်အဃိန့ၣ်​ ယကသူၣ်ဖှံသးညီလီၤ.” (စံးထီၣ်ပတြၢၤ ၉၂:၁, ၄) ဆိကမိၣ်ထီၣ်က့ၤ တၢ်ခဲလၢာ်လၢ ယဟိဝၤယွၤ ဟ့ၣ်လီၤနၤ ဒ်သိးဒီးသးသမူ, တၢ်စူၢ်တၢ်နာ်, လံာ်စီဆှံ, တၢ်အိၣ်ဖှိၣ်​ ဒီးတၢ်မုၢ်လၢ်လၢ နကအိၣ်မူဘၣ်လီၤထူလီၤယိာ်လၢ ပၤရဒံစူးအပူၤန့ၣ်တက့ၢ်. နမ့ၢ်ပာ်လီၤနီၢ်သးအဖီတၢၣ်န့ၣ်​ မ့ၢ်ဒၣ်နပာ်ဖျါထီၣ်လၢ နစံးဘျုးစံးဖှိၣ်ယဟိဝၤယွၤလၢ အဟ့ၣ်နၤတၢ်တဖၣ်အံၤအဃိလီၤ. ဒီးနမ့ၢ်မၤဒ်န့ၣ်န့ၣ်​ နတၢ်ရ့လိာ်သးဒီးအီၤကဘူးထီၣ်လီၤ.

၆. (က) နီၢ်သးဖီတၢၣ်န့ၣ်​ ကဲဘျုးလၢနတၢ်ရ့လိာ်သးဒီး ယဟိဝၤယွၤအဂီၢ်ဒ်လဲၣ်. (ခ) ဖဲနနီၢ်ဆံးဒံးအခါ နပာ်လီၤဖီတၢၣ်​ မနုၤတဖၣ်သ့ဝဲလဲၣ်.

^၆ တၢ်ဂ့ၢ်ခံထံၣ်တထံၣ်န့ၣ်​ ဖဲနဂုာ်ကျဲးစၢးမၤလၢပှဲၤ နနီၢ်သးဖီတၢၣ်လၢ နကမၤတၢ်ဘၣ်​ ယဟိဝၤယွၤအသးအခါ နကဘူးထီၣ်ဒီးအီၤလီၤ. တၢ်မၢဖိပီလူး အၢၣ်လီၤဝဲလၢ “ယွၤတမ့ၢ်ဘၣ်​ ပှၤတတီတလိၤဘၣ်လၢ အကသးပ့ၤနီၣ်သုတၢ်မၤ, ဒီးသုတၢ်အဲၣ်တၢ်ကွံလၢ သုအဲၣ်အမံၤ, ဒီးသုတၢ်မၤစၢၤတ့ၢ်, ဒီးသုမၤစၢၤဒံးပှၤစီဆှံန့ၣ်, အဂ့ၢ်ဘၣ်.” (ဧ့ၤဘြံၤ ၆:၁၀) ပှၤဖိသၣ်တဖၣ်ဒၣ်လဲာ် ပာ်လီၤဖီတၢၣ်သ့လီၤ. အဒိ, ခရံာ်စတံန့ၣ်​ ဖဲအသးအိၣ်အနံၣ်​ ၁၀ အခါ အဝဲပာ်လီၤဖီတၢၣ်လၢ ကဖးဝဲ ဒီပုၢ်ဝဲၢ်လၢ အိၣ်ဒီးတၢ်သးတီတဖၣ်​ အတၢ်အိၣ်မူတၢ်လဲၤခီဖျိ အဂ့ၢ်ထီဘိလီၤ. ဒီးထိဘံၤန့ၣ်​ ဖဲအသးအိၣ်​ ၁၂ နံၣ်အခါပာ်လီၤဖီတၢၣ်လၢ တချုးလၢအဝဲဒိးဘျၢထံဒံးဘၣ်န့ၣ်​ ကဖးဝဲလံာ်စီဆှံ တုၤအဝံၤဒီဘ့ၣ်လီၤ. မ့မ့ၢ် မဲၣ်ကစံ(မ်)န့ၣ်​ ဖဲအသးအိၣ်​ ၁၁ နံၣ်​ ဒီးအဒ့မုၣ်​ န့ၤဧိမံၤ အသးအိၣ်အနံၣ်​ ၁၀ အခါအဝဲသ့ၣ်ဒိးဘျၢထံလီၤ. အဝဲသ့ၣ်ခံဂၤလၢာ် ပာ်လီၤဖီတၢၣ်လၢ ကလဲၤမၤတၢ်လၢ ဘ့ၤသ့လးလီၤ. ဒ်သိးအဝဲသ့ၣ်​ ကသးစၢၢ်ဆၢဒီး အဖီတၢၣ်အဂီၢ် ကျးထီၣ်ဝဲ ဘ့ၤသ့လးလံာ်ပတံထီၣ်လၢ အဟံၣ်ဒူၣ်ကပၤလီၤ. မ့မ့ၢ်နၤမီၤ. မ့ၢ်နပာ်လီၤဖီတၢၣ်​ ဒီးနစးထီၣ်ဂုာ်ကျဲးစၢး မၤလၢပှဲၤနဖီတၢၣ်ကသ့ဧါ.—ဖး ဖံလံးပံၤ ၁:၁၀, ၁၁ တက့ၢ်.

၇, ၈. (က) နမ့ၢ်အိၣ်ဒီး ဖီတၢၣ်န့ၣ်​ နဆၢတဲာ်တၢ် ကညီထီၣ်ဝဲဒ်လဲၣ်. (ခ) ဘၣ်မနုၤအဃိ ပှၤသးစၢ်တဂၤ တဃုထၢလၢ ကလဲၤထီၣ်ဖၠၣ်စိမိၤဘၣ်လဲၣ်.

^၇ တၢ်ဂ့ၢ်သၢထံၣ်တထံၣ်လၢ နကပာ်လီၤဖီတၢၣ်လၢ နသးစၢ်ဒံးအခါန့ၣ်​ မ့ၢ်မနုၤလဲၣ်. ဖဲနသးစၢ်အခါ နကဘၣ်ဆၢတဲာ်တၢ်အါမးလီၤ. နကဘၣ်ဆၢတဲာ်တၢ်လၢ နကဃုတၢ်ကူၣ်ဘၣ်ကူၣ်သ့ အပတီၢ်ထဲလဲၣ်, တၢ်ဖံးတၢ်မၤဒ်လဲၣ်တကလုာ်လဲၣ်​ ဒီးတၢ်အဂၤတဖၣ်န့ၣ်လီၤ. နတၢ်ဆၢတဲာ်တဖၣ်အံၤ လီၤဂာ်ဒ်နလဲၤတုၤလၢကျဲဖးဒ့ ဒီးနကဘၣ်ဃုထၢကျဲတဘိဘိလၢ ကလဲၤတုၤလၢ တၢ်လီၢ်လၢနအဲၣ်ဒိးလဲၤန့ၣ်လီၤ. နမ့ၢ်သ့ၣ်ညါလီၤတံၢ်လီၤဆဲး တၢ်လီၢ်လၢနကလဲၤန့ၣ်​ နဃုထၢကျဲကညီဝဲလီၤ. ဒ်န့ၣ်အသိး နမ့ၢ်အိၣ်ဒီးဖီတၢၣ်န့ၣ်​ နဆၢတဲာ်တၢ် ကညီထီၣ်ဝဲလီၤ. ကတိၤဒိ ၂၁:၅ တဲဝဲလၢ “ပှၤအခုအကူၣ်ထီၣ်တၢ်န့ၣ်​ ကဲထီၣ်ထဲတၢ်အါထီၣ်လီၤ.” နမ့ၢ်ပာ်လီၤနဖီတၢၣ်လၢ အဆိအချ့န့ၣ်​ နကတုၤလၢနဖီတၢၣ်လၢ အဆိအချ့လီၤ. ဒဲမရဲး(စ်) စ့ၢ်ကီး ဖဲအသးစၢ်အခါ အဝဲဘၣ်မၤတၢ်ဆၢတဲာ်လၢ အရ့ဒိၣ်ဒ်န့ၣ်လီၤ.

^၈ ဒဲမရဲး(စ်)န့ၣ်​ ဖဲအဝဲဖျိထီၣ်တီၤထီကၠိအခါ အမးဂ့ၤမးလီၤ. အဃိအဝဲမ့ၢ်အဲၣ်ဒိးလဲၤထီၣ်​ ဖၠၣ်စိမိၤလၢ ပီၢ်ရီအဂီၢ်န့ၣ်​ အဝဲတလိၣ်ဟ့ၣ်စ့ဘၣ်. ဘၣ်ဆၣ်​ အဝဲဃုထၢဝဲလၢ ကလဲၤမၤတၢ်လၢ စ့တၢးလီၤ. ဘၣ်မနုၤအဃိလဲၣ်. မ့ၢ်လၢဖဲအနီၢ်ဆံးဒံးအခါ အဝဲပာ်လီၤဖီတၢၣ်လၢ ကမၤပှၤလဲၤလၢညါအဃိလီၤ. အဝဲတဲဝဲလၢ “ဒ်သိးယမၤပှၤလဲၤလၢညါ ကန့ၢ်အဂီၢ်ယကဘၣ်မၤ တၢ်မၤလၢနၣ်ရံၣ်တပှဲၤဘၣ်လီၤ. ယမ့ၢ်ထီၣ်ဖၠၣ်စိမိၤလၢ ပီၢ်ရီအဂီၢ်န့ၣ်​ ယကန့ၢ်စ့ဒီဒူၣ်​ ဘၣ်ဆၣ်​ ယကဃုတၢ်မၤလၢ နၣ်ရံၣ်တပှဲၤဘၣ်န့ၣ်​ တညီဝဲဘၣ်.” ဒဲမရဲး(စ်)န့ၣ်​ မၤဝဲပှၤလဲၤလၢညါန့ၢ်ဝဲ အနံၣ်၂၀ လံ. မ့ၢ်အဝဲတူၢ်ဘၣ်ဝဲလၢ အဖီတၢၣ်ဒီးအတၢ်ဆၢတဲာ် လၢအမၤဝဲဖဲအသးစၢ်ဒံးအခါန့ၣ်​ အကမၣ်ဧါ. အဝဲတတူၢ်ဘၣ်ဝဲဒ်န့ၣ်ဘၣ်. အဝဲတဲဝဲလၢ ဖဲအမၤတၢ်လၢ စ့တၢးအခါထံၣ်ဘၣ်ဒီး ပီၢ်ရီအါဂၤလီၤ. အဝဲစ့ၢ်ကီးမ့ၢ်လဲၤထီၣ်ဘၣ်​ ဖၠၣ်စိမိၤလၢပီၢ်ရီအဂီၢ်န့ၣ်​ ကဘၣ်မၤတၢ်ဒ် ပီၢ်ရီတဖၣ်အံၤအသိးလီၤ. အဝဲသ့ၣ်အါဂၤန့ၣ်​ တအိၣ်ဒီးတၢ်သူၣ်ခုသးခုလၢ အတၢ်မၤပူၤဘၣ်. ဘၣ်ဆၣ်​ ဒဲမရဲး(စ်)န့ၣ်​ မၤပှၤလဲၤလၢညါတၢ်မၤအဃိ ဒိးန့ၢ်ဘၣ်တၢ်သးခုအါမးလီၤ. ဒီးအဝဲတထံၣ်ဘၣ်​ တၢ်သူၣ်အ့န့သးအ့န့ ဒ်ပီၢ်ရီတဖၣ်အံၤအသိးဘၣ်.

၉. မုၢ်မဆါတနံၤအံၤ ဘၣ်မနုၤအဃိ ပှၤသးစၢ်တဖၣ်​ လီၤစံးပတြၢၤဒိၣ်မးလဲၣ်.

^၉ လၢဟီၣ်ခိၣ်ဒီဘ့ၣ်န့ၣ်​ ပှၤသးစၢ်လၢ အကထိတဖၣ်​ လီၤစံးပတြၢၤဒိၣ်မးလီၤ. မ့ၢ်လၢအဝဲသ့ၣ်ပာ်ဒိၣ်ဝဲ တၢ်ရ့လိာ်အသးဒီးယဟိဝၤယွၤ ဒီးအနီၢ်သးအဖီတၢၣ်အဃိလီၤ. ပှၤသးစၢ်တဖၣ်အံၤ အတၢ်အိၣ်မူပှဲၤဒီးသးခုလီၤ. တကးဒံးဘၣ်​ အဝဲသ့ၣ်ဂုာ်ကျဲးစၢးမၤထွဲဝဲ ယဟိဝၤယွၤအတၢ်ဟံးစုနဲၣ်ကျဲ ဖဲအဃုထၢတၢ်ကူၣ်ဘၣ်ကူၣ်သ့, တၢ်ဖံးတၢ်မၤ, တၢ်ဆီဟံၣ်ဆီဃီ မ့တမ့ၢ် တၢ်ဟံးဖိဟံးလံၤအခါန့ၣ်လီၤ. စီၤၡလိၤမိၤ တဲဝဲလၢ “သန့ၤနသးလၢယွၤလၢ နသးဒီဖျၢၣ်ညါတက့ၢ်.” ဒီးဆဲးတဲကဒီးဝဲလၢ “သ့ၣ်ညါယွၤလၢ နကျဲခဲလၢာ်အပူၤတက့ၢ်. ဒီးအဝဲဒၣ်ကမၤလိၤနကျဲလီၤ.” (ကတိၤဒိ ၃:၅, ၆) ပှၤသးစၢ်သ့ၣ်ဧၢ, ယဟိဝၤယွၤအဲၣ်သုဒိၣ်မး ဒီးသုမ့ၢ်ပှၤလၢ အလုၢ်ဒိၣ်ပှ့ၤဒိၣ်လၢအဂီၢ်အဃိ အဝဲကဒီသဒၢ, ဟံးစုနဲၣ်ကျဲ ဒီးကဆိၣ်ဂ့ၤသုလီၤ.

ဒ်သိးနကတဲပၠးပှၤဂၤလၢ ယဟိဝၤယွၤအဂ့ၢ်အဂီၢ် အိၣ်ကတဲာ်ကတီၤနသး ဂ့ၤဂ့ၤတက့ၢ်

၁၀. (က) တၢ်စံၣ်တဲၤတဲလီၤတၢ်မၤန့ၣ်​ ဘၣ်မနုၤအဃိ ကဘၣ်မ့ၢ်တၢ်အရ့ဒိၣ်လၢ ပဂီၢ်လဲၣ်. (ခ) ဒ်သိးနတဲနၢ်ပၢၢ်ပှၤဂၤလၢ နတၢ်နာ်အဂ့ၢ် ကသ့ဂ့ၤဂ့ၤအဂီၢ် နမၤကသ့ဒ်လဲၣ်.

^၁၀ လၢနတၢ်အိၣ်မူအပူၤ နမ့ၢ်သးစၢၢ်ဆၢလၢ နကမၤသးခု ယဟိဝၤယွၤအသးန့ၣ်​ နကအဲၣ်ဒိးတဲဘၣ်​ ပှၤဂၤလၢအဂ့ၢ်လီၤ. ယ့ၣ်ၡူးခရံာ်တဲဝဲလၢ “တၢ်သးခုအကစီၣ်န့ၣ်​ ကဘၣ်တၢ်စံၣ်တဲၤတဲလီၤဆိအီၤ” လီၤ. (မၢ်ကူး ၁၃:၁၀) တၢ်စံၣ်တဲၤတဲလီၤတၢ်မၤန့ၣ်​ မ့ၢ်တၢ်လၢအရ့ဒိၣ်အဃိ ပကြၢးပာ်ဒိၣ်အီၤလၢ ပတၢ်အိၣ်မူအပူၤလီၤ. မ့ၢ်နပာ်လီၤဖီတၢၣ်လၢ နကမၤအါထီၣ်​ တၢ်စံၣ်တဲၤတဲလီၤတၢ်မၤဧါ. မ့ၢ်နမၤပှၤလဲၤလၢညါကသ့ဧါ. နဟးစံၣ်တဲၤတဲလီၤတၢ် မ့ၢ်တမုာ်အါအါဘၣ်န့ၣ်​ နကမၤဒ်လဲၣ်. ဒ်သိးနတဲနၢ်ပၢၢ်ပှၤဂၤလၢ နတၢ်နာ်အဂ့ၢ်ကသ့ဂ့ၤဂ့ၤအဂီၢ် နမၤကသ့ဒ်လဲၣ်. တၢ်ဂ့ၢ်ခံမံၤအံၤ ကမၤစၢၤနၤလီၤ. ကတဲာ်ကတီၤနသးဂ့ၤဂ့ၤ ဒီးယဟိဝၤယွၤအဂ့ၢ်လၢ နသ့ၣ်ညါတဖၣ်န့ၣ်​ တဲဘၣ်ပှၤဂၤတက့ၢ်. နမ့ၢ်မၤဒ်န့ၣ်န့ၣ်​ လၢခံနစံၣ်တဲၤတဲလီၤတၢ် ကမုာ်ထီၣ်ဝဲလီၤ.

၁၁, ၁၂. (က) ဒ်သိးနကတဲပၠးပှၤဂၤလၢ ယဟိဝၤယွၤအဂ့ၢ်အဂီၢ် နအိၣ်ကတဲာ်ကတီၤနသး ကသ့ဒ်လဲၣ်. (ခ) ဒီပုၢ်ဝဲၢ်သးစၢ်တဂၤ ဒ်သိးအကတဲဘၣ်​ အတံၤသကိးလၢကၠိတဖၣ်​ လၢယဟိဝၤယွၤအဂ့ၢ် ကသ့အဂီၢ် ဟံးန့ၢ်ဝဲတၢ်ခွဲးတၢ်ယာ်ဒ်လဲၣ်.

^၁၁ အိၣ်ကတဲာ်ကတီၤနသး ဒ်သိးနကစံးဆၢ တၢ်သံကွၢ်လၢ နတံၤသကိးလၢကၠိတဖၣ်​ ကသံကွၢ်ဝဲန့ၣ်တက့ၢ်. အဒိ, နသကိးမ့ၢ်သံကွၢ်နၤ “ဘၣ်ဃးဒီးတၢ်နာ်ကစၢ်ယွၤအဂ့ၢ်” န့ၣ်နဃုထံၣ်န့ၢ် တၢ်စံးဆၢလၢ jw.org အပူၤသ့ဝဲလီၤ. နမ့ၢ်နုာ်လီၤလၢ လံာ်လဲၢ်တဖၣ်​ > တၢ်ဂီၤမူ > ပှၤသးစၢ်တဖၣ် > န့ၣ်နကထံၣ်ဘၣ်​ တၢ်ဂီၤမူလၢအခိၣ်တီမ့ၢ်ဝဲ “နသကိးသးစၢ်တဖၣ်စံးဝဲ ဘၣ်ဃးဒီးတၢ်နာ်ကစၢ်ယွၤအဂ့ၢ်” လီၤ. တၢ်ဂီၤမူအံၤကမၤစၢၤနၤ ဒ်သိးနကကတဲာ်ကတီၤနသးလၢ နကစံးဆၢက့ၤပှၤဂၤအဂီၢ်လီၤ. နဃုထၢပာ်စၢၤ လံာ်စီဆှံအဆၢတနီၤသ့ဝဲလီၤ. အဒိ, ဒ်သိးနတဲပၠးပှၤဂၤ ဘၣ်ဃးတၢ်ဂ့ၢ်အံၤကသ့အဂီၢ် နသူလံာ်စီဆှံအဆၢ ဒ်သိးဒီး ဧ့ၤဘြံၤ ၃:၄, ရိမ့ၤ ၁:၂၀ ဒီး စံးထီၣ်ပတြၢၤ ၁၃၉:၁၄ သ့ဝဲလီၤ. နမ့ၢ်သူတၢ်ဂီၤမူတဖၣ်အံၤန့ၣ်​ ကမၤစၢၤနၤဒ်သိး နစံးဆၢက့ၤပှၤဂၤ အတၢ်သံကွၢ်ကသ့အဂီၢ်လီၤ.—ဖး ၁ ပ့းတရူး ၃:၁၅ တက့ၢ်.

^၁၂ ဟ့ၣ်ဂံၢ်ဟ့ၣ်ဘါ နတံၤသကိးတဖၣ်လၢ ကနုာ်လီၤကွၢ်တၢ်ဂ့ၢ်တၢ်ကျိၤလၢ jw.org အပူၤတက့ၢ်. လူခးမၤဝဲဒ်န့ၣ်လီၤ. ဘၣ်တဘျီလၢ အတီၤပူၤန့ၣ်​ ဖဲအဝဲသ့ၣ်တဲသကိးဝဲ တၢ်ဘူၣ်တၢ်ဘါအဂ့ၢ်အခါ လူခးထံၣ်ဝဲလၢ လံာ်တဘ့ၣ်အပူၤန့ၣ်​ ပာ်ဖျါထီၣ်ဝဲ ယဟိဝၤပှၤအုၣ်အသးတဖၣ်အဂ့ၢ်လၢ တမ့ၢ်တတီဘၣ်န့ၣ်လီၤ. လူခးန့ၣ်​ ပျံၤတၢ်ဘၣ်ဆၣ်​ တဲဘၣ်အသရၣ်မုၣ်လၢ အဝဲအဲၣ်ဒိးပာ်ဖျါထီၣ်လၢ ဘၣ်မနုၤအဃိ တၢ်ဂ့ၢ်လၢလံာ်အံၤအပူၤတဖၣ်​ ကမၣ်ဝဲလဲၣ်န့ၣ်လီၤ. အသရၣ်မုၣ်ဟ့ၣ်အီၤအခွဲးလၢ ကတဲဖျါထီၣ်​ အတၢ်နာ်အဂ့ၢ်န့ၣ်လီၤ. အဝဲဒိးန့ၢ်ဘၣ်တၢ်ခွဲးတၢ်ယာ်လၢ ကပၠးဝဲပှၤလၢအတီၤပူၤတဖၣ်လၢ ပှာ်ယဲၤသန့န့ၣ်လီၤ. ဒီးသရၣ်မုၣ်မၢဝဲကၠိဖိတဖၣ်​ ဖဲအဝဲသ့ၣ်က့ၤလၢအဟံၣ်အခါ ကကွၢ်ဝဲတၢ်ဂီၤမူလၢအမ့ၢ် ပတသူ ပစုခိၣ်သၣ်​ သနာ်က့ ပမၤနၢၤ ပှၤလၢအမၤနၢၤအီၣ်ပှၤသ့ န့ၣ်လီၤ. လူခးတဲဘၣ်​ အတံၤသကိးလၢကၠိတဖၣ်​ လၢယဟိဝၤယွၤအဂ့ၢ်အဃိ ကသးခုဝဲထဲလဲၣ်န့ၣ်​ ဆိကမိၣ်ကွၢ်တက့ၢ်.

၁၃. ပမ့ၢ်ထံၣ်ဘၣ်​ တၢ်ကီတၢ်ခဲဒၣ်လဲာ် ဘၣ်မနုၤအဃိ ပတကြၢးဟ့ၣ်ၡူလဲၣ်.

^၁၃ ဖဲနထံၣ်ဘၣ်​ တၢ်ကီတၢ်ခဲအခါ တဘၣ်သးဟးဂီၤတဂ့ၤ. ဆဲးဂုာ်ကျဲးစၢး ဒ်သိး နကတုၤလၢ နဖီတၢၣ် အဂီၢ်တက့ၢ်. (၂ တံၤမသ့း ၄:၂) ခဲၤသရံနၤ မၤဝဲဒ်န့ၣ်လီၤ. ဖဲအဝဲအသးအိၣ်​ ၁၇ နံၣ်အခါ အဝဲပာ်လီၤဖီတၢၣ်လၢ ကစံၣ်တဲၤတဲလီၤဝဲ အတံၤသကိးတဖၣ်လၢ အတၢ်မၤလီၢ်န့ၣ်လီၤ. အသကိးတဂၤ တဲဆါအီၤတဘျုးဘျီညါ. ဘၣ်ဆၣ်အဝဲတဟ့ၣ်အၡူဘၣ်. ခီဖျိလၢ အတၢ်ဒိဂ့ၤတဲာ်ဘၣ်အဃိ ထုးန့ၢ်ဝဲအသကိး ဟဲၤ(စ်) အသးလီၤ. လၢတၢ်န့ၣ်အဃိ ဟဲၤ(စ်) စးထီၣ်ဖးဝဲပလံာ်လဲၢ်တဖၣ်, မၤလိလံာ်စီဆှံ ဒီးဒိးဘျၢထံန့ၣ်လီၤ. ဘၣ်ဆၣ်​ ခဲၤသရံနၤန့ၣ်​ မ့ၢ်လၢအဝဲလဲၤသုးအသးလၢ တၢ်လီၢ်အဂၤအဃိ အဝဲတသ့ၣ်ညါဝဲ တၢ်ဂ့ၢ်အံၤဘၣ်. ပူၤကွံာ် ၁၃ နံၣ်အလီၢ်ခံ ဖဲခဲၤသရံနၤ ဒီးအဟံၣ်ဖိဃီဖိတဖၣ်​ လဲၤထီၣ်တၢ်အိၣ်ဖှိၣ်အခါ ထံၣ်ဘၣ်ဝဲ ဟဲၤ(စ်) ဟ့ၣ်တၢ်စံၣ်တဲၤတဲလီၤတၢ်အဃိ အဝဲကမၢကမၣ်ဝဲဒိၣ်မးလီၤ. အဝဲတဟ့ၣ်ၡူးအသးလၢ ကစံၣ်တဲၤတဲလီၤ ပှၤလၢအတၢ်မၤလီၢ်တဖၣ်အဃိ အဝဲသးခုဝဲဒိၣ်မးလီၤ.

တဘၣ်သးပ့ၤနီၣ်နဖီတၢၣ်တဂ့ၤ

၁၄, ၁၅. (က) ဖဲပှၤဂၤမၢဆူၣ်နၤလၢ နကမၤပိာ် အဝဲသ့ၣ်အခံအခါ နကြၢးသ့ၣ်နီၣ်ထီၣ်​ တၢ်မနုၤလဲၣ်. (ခ) ဖဲပှၤဂၤမၢဆူၣ်နၤလၢ နကမၤပိာ် အဝဲသ့ၣ်အခံအခါ ဒ်သိးနသုတမၤပိာ် အခံတဂ့ၤအဂီၢ် နကဘၣ်ပလီၢ်နသးဒ်လဲၣ်.

^၁၄ တၢ်ဂ့ၢ်လၢတၢ်မၤလိအံၤအပူၤန့ၣ်​ ဟ့ၣ်သဆၣ်ထီၣ်နၤလၢ နကမၤသးခု ယဟိဝၤယွၤအသး ဒီးနကပာ်လီၤ နနီၢ်သးအဖီတၢၣ်န့ၣ်လီၤ. ဘၣ်ဆၣ်​ ပှၤသးစၢ်ဒ်သိးသုအါတက့ၢ်န့ၣ်​ အဝဲသ့ၣ်အဲၣ်ဒိးလူၤဝဲ တၢ်မုာ်တၢ်ပၠီၣ်လီၤ. ဘၣ်သ့ၣ်သ့ၣ်အဝဲသ့ၣ်​ ကကွဲမုာ်နၤလၢ နကမၤဒ်အဝဲသ့ၣ်အသိးလီၤ. ဒ်လဲၣ်ဂ့ၤဒ်လဲၣ်ဂ့ၤ မုၢ်ကအိၣ်ဝဲတနံၤ နကဘၣ်ဒုးသ့ၣ်ညါ အဝဲသ့ၣ်လၢနဖီတၢၣ်န့ၣ်​ မ့ၢ်တၢ်လၢအရ့ဒိၣ်လၢနဂီၢ်န့ၣ်လီၤ. တဘၣ်ပျဲ ပှၤဂၤမၤတံာ်တာ်နၤ တုၤလၢနကသးပ့ၤနီၣ်ကွံာ် နဖီတၢၣ်တဂ့ၤ. ဒ်ပတဲတ့ၢ်လၢ တၢ်မၤလိအခီၣ်ထံးအသိး ဖဲနအိၣ်လၢ ဘၢး(စ်)ကါ သန့အခါ နမ့ၢ်ထံၣ်လၢပှၤအိၣ်လၢကါပူၤတဖၣ်​ ပှဲၤဒီးတၢ်သးခုဘၣ်ဆၣ်​ ကါတခိၣ်အံၤမ့ၢ်တလဲၤလၢ တၢ်လီၢ်လၢ နအဲၣ်ဒိးလဲၤဘၣ်န့ၣ်​ မ့ၢ်နကဒိးထီၣ်အီၤဧါ. တမ့ၢ်လၢနကမၤဒ်န့ၣ်ဘၣ်.

^၁၅ ဖဲပှၤဂၤ မၢဆူၣ်နၤလၢ နကမၤပိာ် အဝဲသ့ၣ်အခံအခါ ဒ်သိးနသုတမၤပိာ် အခံတဂ့ၤအဂီၢ် နကဘၣ် ပလီၢ်နသးဒ်လဲၣ်. ဟးဆှဲးတၢ်အိၣ်သးလၢ အကကဲထီၣ်တၢ်လ့ပစီလၢ နဂီၢ်တက့ၢ်. (ကတိၤဒိ ၂၂:၃) ဆိကမိၣ်ထီၣ်ဘၣ်ဃး နမ့ၢ်မၤတၢ်ကမၣ်န့ၣ်​ နကထံၣ်ဘၣ်တၢ်ကီတၢ်ခဲ ဒ်လဲၣ်န့ၣ်တက့ၢ်. (ကလၤတံ ၆:၇) လၢတၢ်ဆီၣ်လီၤသးအပူၤ တူၢ်လိာ်လၢနလိၣ်ဘၣ်​ တၢ်ဟ့ၣ်ကူၣ်လၢအဂ့ၤတက့ၢ်. ဒိကနၣ်​ နမိၢ်နပၢ်ဒီး ဒီပုၢ်ဝဲၢ်မုၣ်ခွါလၢ အိၣ်ဒီးတၢ်လဲၤခီဖျိတဖၣ်​ အတၢ်ကတိၤတက့ၢ်.—ဖး ၁ ပ့းတရူး ၅:၅, ၆ တက့ၢ်.

၁၆. တၢ်ဆီၣ်လီၤသး မ့ၢ်တၢ်လၢအရ့ဒိၣ်န့ၣ်​ ခရံာ်စတိ အတၢ်လဲၤခီဖျိ ပာ်ဖျါထီၣ်ဝဲဒ်လဲၣ်.

^၁၆ ခရံာ်စတိအိၣ်ဒီး တၢ်ဆီၣ်လီၤသးအဃိ မၤစၢၤအီၤလၢ ကတူၢ်လိာ်ဝဲ တၢ်ဟ့ၣ်ကူၣ်လၢအဂ့ၤလီၤ. အဝဲဘျၢထံဝံၤတယံာ်ဘၣ်ဒီး စးထီၣ်လဲၤလိာ်ကွဲလၢ တၢ်လိာ်ကွဲအလီၢ်ထီဘိလီၤ. ဒီးပှၤသးစၢ်အဂၤလၢ အလိာ်ကွဲဖဲန့ၣ်တဖၣ်​ ကွဲမုာ်အီၤလၢ ကနုာ်လီၤလိာ်ကွဲလၢ အဝဲသ့ၣ်အကျါလီၤ. ဘၣ်ဃးဒီးတၢ်ဂ့ၢ်အံၤန့ၣ်​ အဝဲတဲပၠးဝဲ တၢ်အိၣ်ဖှိၣ်သးပှၢ်တဂၤလီၤ. ဒီးတၢ်အိၣ်ဖှိၣ်သးပှၢ် မၢအဆိကမိၣ်ထံဝဲ တၢ်ဂ့ၢ်တနီၤလၢ တၢ်လိာ်ကွဲအံၤ ကဲထီၣ်တၢ်လီၤဘၣ်ယိၣ်​ ဒ်သိးတၢ်အဲၣ်ဒိးမၤနၢၤတၢ် ဒီးတၢ်ပြၢလိာ်သးန့ၣ်လီၤ. ဘၣ်ဆၣ်​ ခရံာ်စတိ နုာ်လီၤလိာ်ကွဲဝဲလၢ အဝဲသ့ၣ်အကျါလီၤ. လၢခံအဝဲပာ်သူၣ်ပာ်သးဝဲလၢ တၢ်လိာ်ကွဲအံၤ ပှၤလိာ်ကွဲဝဲဆူၣ်ဆူၣ်ကိၤကိၤအဃိ တၢ်ဘၣ်ယိၣ်အိၣ်လၢ အသးသမူအဂီၢ်လီၤ. ဖဲအဝဲလဲၤဃ့ကဒီး တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ်တဖၣ်​ အအိၣ်အခါ အဝဲသ့ၣ်ဟ့ၣ်ကူၣ်အီၤလၢ လံာ်စီဆှံအပူၤလီၤ. ခရံာ်စတိ တဲဝဲလၢ “ယဟိဝၤယွၤ ဆှၢလီၤန့ၢ်ယၤ ပှၤဟ့ၣ်ကူၣ်တၢ်လၢအဂ့ၤတဖၣ်​ ဒီးယတဒိကနၣ်အီၤတဘျီဃီ ဘၣ်ဆၣ်​ လၢခံယဒိကနၣ်အီၤလီၤ.” မ့ၢ်နအိၣ်ဒီးတၢ်ဆီၣ်လီၤသးလၢ နကတူၢ်လိာ် တၢ်ဟ့ၣ်ကူၣ်လၢအဂ့ၤဧါ.

၁၇, ၁၈. (က) မုၢ်မဆါတနံၤအံၤ ယဟိဝၤယွၤ အဲၣ်ဒိးလၢ ပှၤသးစၢ်တဖၣ်​ ကဒိးန့ၢ်ဘၣ်တၢ်မနုၤလဲၣ်. (ခ) ဖဲနသးပှၢ်ထီၣ်အခါ ဒ်သိးနသုတအိၣ်ဒီး တၢ်သးအုးတဂ့ၤအဂီၢ် နမၤတၢ်မနုၤသ့လဲၣ်. ဟ့ၣ်တၢ်အဒိတက့ၢ်.

^၁၇ လံာ်စီဆှံ တဲဝဲလၢ “ဖိၣ်သၣ်ခွါ [မ့တမ့ၢ် မုၣ်ကနီၤ] ဧၢ, လၢနဖိၣ်သၣ်ခွါအဖၢမုၢ်ဒီး, သးခုတက့ၢ်. ဒီးမၤမုာ်နသးလၢ နဖိၣ်သၣ်ခွါ အမုၢ်နံၤအတီၢ်ပူၤ” တက့ၢ်. (စံၣ်တဲၤတဲလီၤတၢ် ၁၁:၉) ဖဲနသးစၢ်အခါ ယဟိဝၤယွၤအဲၣ်ဒိးဝဲလၢ နကအိၣ်ဒီးတၢ်သးခုလီၤ. လၢတၢ်မၤလိအံၤအပူၤ နသ့ၣ်ညါဘၣ်လၢ ဒ်သိးနကအိၣ်ဒီးတၢ်သးခုအဂီၢ် နကဘၣ်သးစၢၢ်ဆၢ နနီၢ်သးဖီတၢၣ်​ ဒီးမၤထွဲယဟိဝၤယွၤအတၢ်ဟ့ၣ်ကူၣ်​ လၢနတၢ်အိၣ်မူကိးသနၢၣ်ဒဲးအပူၤလီၤ. နမ့ၢ်မၤဒ်အံၤလၢအဆိအချ့န့ၣ်​ နကထံၣ်ဘၣ်​ ယဟိဝၤယွၤအတၢ်ဟံးစုနဲၣ်ကျဲ, အတၢ်ကဟုကယာ် ဒီးအတၢ်ဆိၣ်ဂ့ၤတဖၣ်​ လၢအဆိအချ့လီၤ. ဆိကမိၣ်ထံ တၢ်ဟ့ၣ်ကူၣ်လၢ ကစၢ်ယွၤဟ့ၣ်နၤ ခီဖျိအကလုၢ်ကထါ လံာ်စီဆှံ ဒီးမၤထွဲအတၢ်ဟ့ၣ်ကူၣ်လၢအမ့ၢ် “လၢနသးစၢ်ဒံးအမုၢ်နံၤန့ၣ်​ သ့ၣ်နီၣ်ထီၣ်က့ၤ ပှၤလၢအတ့လီၤနၤတက့ၢ်.”—စံၣ်တဲၤတဲလီၤတၢ် ၁၂:၁.

^၁၈ ပှၤသးစၢ်သ့ၣ်တဖၣ်န့ၣ်​ ဒိၣ်ထီၣ်ချ့မးလီၤ. ဘၣ်ဆၣ်​ အဝဲသ့ၣ်အါဂၤန့ၣ်​ သးအုးဝဲဒိၣ်မး မ့ၢ်လၢဖဲ အသးစၢ်ဒံးအခါ ပာ်လီၤဝဲအဖီတၢၣ်လၢ အကမၣ်​ ဒီးတနီၤနီၤန့ၣ်​ အဖီတၢၣ် တအိၣ်ဘၣ်အဃိလီၤ. ဘၣ်ဆၣ်​ ဖဲနသးစၢ်အခါ နမ့ၢ်အိၣ်ဒီးနီၢ်သးဖီတၢၣ်န့ၣ်​ တုၤနသးပှၢ်ထီၣ်ဒၣ်လဲာ် နကအိၣ်ဒီးတၢ်သးခုလီၤ. ဒီပုၢ်ဝဲၢ်မုၣ်​ မံၤရံၤယါနၤ တူၢ်ဘၣ်ဝဲဒ်န့ၣ်လီၤ. ဖဲအသးစၢ်ဒံးအခါ အဝဲလိာ်ကွဲဖၠဲးမးအဃိ ပှၤကွဲမုာ်အီၤလၢ ကနုာ်လီၤပြၢတၢ်လၢ အိၣ်လၣ်ပ့း (Olympic Games) လီၤ. ဘၣ်ဆၣ်​ အဝဲဃုထၢဝဲလၢ ကမၤကစၢ်ယွၤ အတၢ်မၤလၢ ဆၢကတီၢ်လၢပှဲၤလီၤ. အဝဲဒီးအဝၤန့ၣ်​ မၤကစၢ်ယွၤအတၢ်မၤလၢ ဆၢကတီၢ်လၢပှဲၤန့ၢ်အနံၣ်​ ၃၀ ဘျဲၣ်လံ. အဝဲတဲဝဲလၢ ပှၤလၢအအဲၣ်ဒိးအမံၤဟူသၣ်ဖျါ, တၢ်အလီၢ်အလၤ, တၢ်စိတၢ်ကမီၤ ဒီးအဲၣ်ဒိးကဲဒိၣ်တဖၣ်န့ၣ်​ တအိၣ်ဒီးတၢ်သးခုနီၢ်ကီၢ်ဘၣ်. တကးဒံးဘၣ်​ အဝဲတဲစ့ၢ်ကီးဝဲလၢ ဖီတၢၣ်လၢအဂ့ၤကတၢၢ်န့ၣ်မ့ၢ်ဝဲ တၢ်မၤကစၢ်ယွၤအတၢ်မၤ ဒီးမၤစၢၤပှၤဂၤလၢ ကသ့ၣ်ညါထီၣ်ယွၤအဂ့ၢ်လီၤ.

၁၉. ဖဲနသးစၢ်အခါ နမ့ၢ်အိၣ်ဒီးနီၢ်သးဖီတၢၣ်န့ၣ်​ ဘၣ်မနုၤအဃိဂ့ၤဝဲလဲၣ်.

^၁၉ ပှၤသးစၢ်သ့ၣ်ဧၢ, သုထံၣ်ဘၣ်တၢ်မၤကွၢ် ဒီဒူၣ်ဘၣ်ဆၣ်​ သုမၤနၢၤကွံာ်အီၤ ဒီးသုသးစၢၢ်ဆၢလၢ သုကမၤယဟိဝၤယွၤအတၢ်မၤလီၤ. တကးဒံးဘၣ်​ သုပာ်လီၤနီၢ်သးအဖီတၢၣ်, ပာ်ဒိၣ်တၢ်စံၣ်တဲၤတဲလီၤတၢ်မၤလၢ သုတၢ်အိၣ်မူအပူၤ ဒီးသုတပျဲလၢ ပှၤဂၤကမၤတံာ်တာ်သုလၢ ကမၤလၢပှဲၤသုဖီတၢၣ်အဃိ ပပတြၢၤသုဒိၣ်မးလီၤ. သုနာ်သ့သပှၢ်ကတၢၢ်လၢ သုတၢ်ဟ့ၣ်လီၤသးန့ၣ်​ တကဲထီၣ်တၢ်ကလီကလီဘၣ်. သုအိၣ်ဒီးဒီပုၢ်ဝဲၢ်မုၣ်ခွါတဖၣ်လၢ အအဲၣ်​ ဒီးဆီၣ်ထွဲမၤစၢၤသုန့ၣ်လီၤ. လၢတၢ်န့ၣ်အဃိ “တလ့ၣ်နမၤတၢ်တဖၣ်လၢ ယွၤအလိၤတက့ၢ်, ဒီးနကူၣ်ထီၣ်ဖးလီၤတၢ်န့ၣ်​ ကကဲထီၣ်တၢ်လီၤ.”