ဘၣ်ဃးဒီး ဟီၣ်ခိၣ်ဒီဘ့ၣ် ထံလၢအကဆှီ စှၤလီၤဝဲန့ၣ် လံာ်စီဆှံတဲဝဲဒ်လဲၣ်

ပလိၣ်ဘၣ်ထံလၢ အကဆှီ ဒ်သိးပကဆဲးအိၣ်မူအဂီၢ်. UN အနဲၣ်ရွဲၣ်ခိၣ်ကျၢၢ် အဲၤထိနံၤယိၤ ကူထါရဲၤ တဲဝဲလၢ “လၢဟီၣ်ခိၣ်ချၢဒီဘ့ၣ်န့ၣ် ပှၤလိၣ်ဘၣ် ထံလၢအကဆှီ အိၣ်အါထီၣ်မးအါထီၣ်အဃိ ပထံၣ်ဘၣ်ဒီး ထံအတၢ်ကီတၢ်ခဲ.” လၢဟီၣ်ခိၣ်ဒီဘ့ၣ်န့ၣ် ပှၤလၢအကကွဲၢ်လၢ အကထိတဖၣ် တဒိးန့ၢ်ဘၣ်ဝဲ ထံလၢအကဆှီတဖၣ် ညီညီလၢၤဘၣ်.

Strdel/AFP via Getty Images

ပှၤကိးဂၤဒဲး ကဒိးန့ၢ်ဘၣ်ဝဲ ထံလၢအကဆှီ လၢလၢပှဲၤပှဲၤဒံးဧါ. မ့တမ့ၢ်ဘၣ်န့ၣ် တၢ်ကီတၢ်ခဲတခါအံၤ ကဆဲးအိၣ်ဝဲထီဘိဧါ. လံာ်စီဆှံတဲဝဲဒ်လဲၣ်.

ဘၣ်ဃးဒီးထံန့ၣ် လံာ်စီဆှံ အၢၣ်လီၤဝဲဒ်လဲၣ်

လံာ်စီဆှံ ပာ်ဖျါထီၣ်ဝဲလၢ မုၢ်ကအိၣ်ဝဲတနံၤလၢ ထံကၤနိကၤ တအိၣ်ဝဲလၢၤဘၣ်. ဖဲန့ၣ် အဆၢကတီၢ်န့ၣ် ထံလၢအကဆှီ ဒီးအဂ့ၤ ကအိၣ်ဝဲအါမး.

“လၢပှၢ်မုၢ်ကနၢအပူၤန့ၣ် ထံတဖၣ် ကဟဲဖျိးထီၣ် ဒီးထံကျိဖိတဖၣ် ကအိၣ်လၢ မဲးမုၢ်ပျီလီၤ. ဟီၣ်ခိၣ်လၢအဃ့ထီန့ၣ် ကကဲထီၣ်က့ၤလၢနိၣ် ဒီးဟီၣ်ခိၣ်လၢ ထံတအိၣ်ဘၣ်အလီၢ်န့ၣ် ကကဲထီၣ်က့ၤလၢ ထံထီၣ်ပၢၢ်တဖၣ် အလီၢ်လီၤ.”—ယၡါယၤ ၃၅:၆, ၇.

လံာ်စီဆှံ အတၢ်အၢၣ်လီၤအံၤ ကဟဲလၢထီၣ်ပှဲၤထီၣ်ဝဲ အနီၢ်ကီၢ်န့ၣ် ဘၣ်မနုၤအဃိ ပနာ်န့ၢ်အီၤသ့လဲၣ်. ပကဆိကမိၣ်ကွၢ် လံာ်စီဆှံတဲဝဲ ဘၣ်ဃးဒီး ဟီၣ်ခိၣ်အဂ့ၢ်အံၤတစဲး.

ဘၣ်ဃးဒီး ဟီၣ်ခိၣ် ဒီးထံအတၢ်လဲၤတရံးန့ၣ် လံာ်စီဆှံ တဲဝဲဒ်လဲၣ်

“[ကစၢ်ယွၤ] တတ့လီၤဟီၣ်ခိၣ် ကလီကလီဘၣ်, အဝဲတ့လီၤဝဲ ဒ်သိး ပှၤကအိၣ်ဝဲဆိးဝဲ လၢအပူၤအဂီၢ်လီၤ.”—ယၡါယၤ ၄၅:၁၈.

“ကစၢ်ယွၤ ပာ်ဖှိၣ်ထီၣ် ထံလီၤစီၤ အဖျၢၣ်တဖၣ်, ဒီးတၢ်ကသွံ ပာ်ဖှိၣ်ထီၣ်အသး ဒ်မူခိၣ်ထံအသိးလီၤ. ဒီးတၢ်အၢၣ်တဖၣ် ဒုးစူၤလီၤ မူခိၣ်ထံတဖၣ် ဒီးဒုးလီၤဖှံၣ် မူခိၣ်ထံလၢ ပှၤဟီၣ်ခိၣ်ဖိ အလိၤလီၤ.”—ယိၤဘး ၃၆:၂၇, ၂၈.

“ယကဒုးစူၤလီၤန့ၢ်သု မူခိၣ်ထံ လၢတၢ်ဆၢကတီၢ်လၢ အကြၢးဝဲဘၣ်ဝဲ ဒီးတၢ်ကမဲထီၣ်သၣ်ထီၣ် လၢကီၢ်ပူၤ ဒီးသ့ၣ်ထူၣ်တဖၣ် လၢပျီပူၤန့ၣ် ကသၣ်ထီၣ်ဝဲလီၤ.”—၃ မိၤၡ့ ၂၆:၄.

ကစၢ်ယွၤ သ့ၣ်ညါဝဲလၢ ဒ်သိး ပှၤသူၣ်အီၣ်ဖျးအီၣ်တၢ် ကမဲထီၣ်သၣ်ထီၣ်အဂီၢ် ပှၤလိၣ်ဘၣ်ဝဲ မူခိၣ်ထံ လၢလၢပှဲၤပှဲၤ. အဃိ အဝဲအၢၣ်လီၤ ပှၤအံၣ်စရ့လးဖိ လၢအသူၣ်အီၣ်ဖျးအီၣ်တၢ်တဖၣ်လၢ အကဒုးစူၤလီၤဝဲထံ ဒ်သိးအဝဲသ့ၣ် သူၣ်အီၣ်ဖျးအီၣ်တၢ် ကမဲထီၣ်သၣ်ထီၣ် အါအါဂီၢ်ဂီၢ်အဂီၢ်.

တယံာ်လၢဘၣ် လၢဟီၣ်ခိၣ်ဒီဘ့ၣ်န့ၣ် ကစၢ်ယွၤ ကမၤန့ၢ်ပှၤ ဒ်သိးအမၤန့ၢ်ပှၤအံၣ်စရ့လးဖိ လၢပျၢၤတဖၣ်. (ယၡါယၤ ၃၀:၂၃) ဆၢကတီၢ်ခဲအံၤ လၢဟီၣ်ခိၣ်ဒီဘ့ၣ် လၢတၢ်လီၢ်အါတီၤန့ၣ် ပှၤလိၣ်ဘၣ်ဝဲထံ လၢအကဆှီတဖၣ် အိၣ်အါထီၣ်မးအါထီၣ်. ဒီးတၢ်လီၢ်တနီၤန့ၣ် မူခိၣ်တစူၤဘၣ်အဃိ ပှၤလိၣ်ဘၣ်ဝဲထံ. ဘၣ်ဃးဒီး ထံအတၢ်ဂ့ၢ်ကီတဖၣ်အံၤ ကဘၣ်ဂီၢ်ထီၣ်က့ၤ ဒ်လဲၣ်န့ၣ် လံာ်စီဆှံ တဲဝဲဒ်လဲၣ်.

ထံကၤနိကၤ ကလီၤမၢ်ကွံာ်ဝဲဒ်လဲၣ်

လံာ်စီဆှံ ပာ်ဖျါထီၣ်ဝဲလၢ ကစၢ်ယွၤအဘီမုၢ် ကမၤလီၤမၢ်ကွံာ်ဝဲ တၢ်လၢအမၤဘၣ်ဒိ ဟီၣ်ခိၣ်ဖျၢၣ် ဒီးတၢ်လၢအဒုးအိၣ်ထီၣ် ထံကၤနိကၤတဖၣ်. (မးသဲ ၆:၉, ၁၀) ကစၢ်ယွၤအဘီအမုၢ်န့ၣ် မ့ၢ်ဝဲကစၢ်ယွၤ အတၢ်ပၢတၢ်ပြးလၢမူခိၣ် ဒီးအကပၢဝဲ ဟီၣ်ခိၣ်ဒီဘ့ၣ်. (ဒၤနံးယ့လး ၂:၄၄; လီၣ်ဖျါ ၁၁:၁၅) ယွၤအဘီအမုၢ် ကမၤဝဲ တၢ်လၢဟီၣ်ခိၣ်ပဒိၣ်ပပှၢ်တဖၣ် မၤဝဲတန့ၢ်ဘၣ် ဒီးအကမၤလီၤမၢ်ကွံာ်ဝဲ တၢ်လၢအဒုးအိၣ်ထီၣ်ဝဲ တၢ်ကီတၢ်ခဲလၢ ထံတကပၤ.

တၢ်ကီတၢ်ခဲ– မူခိၣ်ကလံၤသီၣ်ဂီၤ တဘၣ်လီၢ်ဘၣ်စးလၢၤဘၣ်အဃိ ထံအတၢ်လဲၤတရံးစ့ၢ်ကီး တဘၣ်လီၢ်ဘၣ်စးလၢၤဘၣ်. အဃိ လၢတၢ်လီၢ်တနီၤန့ၣ် မူခိၣ်တစူၤဘၣ်အဃိ တၢ်ဃ့ထီဝဲ သပှၢ်ကတၢၢ် ဒီးမ့မ့ၢ်လၢ တၢ်လီၢ်တနီၤန့ၣ် မူခိၣ်စူၤဖးဒိၣ် မ့တမ့ၢ် ပီၣ်လဲၣ်အထံထီၣ်ဝဲအဃိ ထံဒိၣ်ထီၣ်ဝဲဖးဒိၣ်.

တၢ်လၢကမၤဘၣ်ဂီၢ်က့ၤတၢ်– ယွၤအဘီအမုၢ် ကမၤဂ့ၤထီၣ်က့ၤဝဲ န့ဆၢၣ် အတၢ်လဲၤတရံးတဖၣ် ဒ်သိးဟီၣ်ခိၣ်ဖျၢၣ်အံၤ ကဂ့ၤထီၣ်က့ၤအဂီၢ်. ကစၢ်ယွၤ အၢၣ်လီၤဝဲလၢ “ကွၢ်မီၤ, ယမၤကဲထီၣ် တၢ်အသီ ခဲလၢာ်လီၤ.” (လီၣ်ဖျါ ၂၁:၅) အဃိ တၢ်လီၢ်လၢ ထံတအိၣ်ဘၣ်တဖၣ်န့ၣ် ထံကအိၣ်ဝဲ အါအါဂီၢ်ဂီၢ် ဒီးတၢ်လီၢ်လၢ တၢ်မုၢ်တၢ်ဘိ တမဲထီၣ်ဘၣ်န့ၣ် တၢ်မုၢ်တၢ်ဘိတဖၣ် ကမဲထီၣ်ဝဲ အါအါဂီၢ်ဂီၢ်. (ယၡါယၤ ၄၁:၁၇-၂၀) ဒီးယွၤအဘီအမုၢ် အစီၤပၤယ့ၣ်ၡူး ကကွၢ်ထွဲဝဲ န့ဆၢၣ်အတၢ်လဲၤတရံးတဖၣ် လၢဟီၣ်ခိၣ်ချၢ.

တၢ်ကီတၢ်ခဲ– ခီဖျိလၢ ပှၤဟီၣ်ခိၣ်ဖိလၢ အတဆိကမိၣ်ထံ တၢ်လၢအမၤဝဲတဖၣ် ဒီးအလီပးတဖၣ်အဃိ ထံကျိ, ထံကမါ ဒီးထံလၢဟီၣ်ခိၣ်လာ်တဖၣ် ဘၣ်အၢဘၣ်သီဝဲ. အဃိ ထံလၢအကဆှီတဖၣ် တအိၣ်အါအါလၢၤဘၣ်.

တၢ်လၢကမၤဘၣ်ဂီၢ်က့ၤတၢ်– ကစၢ်ယွၤ ကမၤကဆှီထီၣ် ဟီၣ်ခိၣ် ဒီးကမၤဂ့ၤထီၣ်က့ၤဝဲ ထံကျိ, ထံကမါ ဒီးဟီၣ်ခိၣ်ညၣ်တဖၣ်. ဒီးဟီၣ်ခိၣ်ကကဲထီၣ်က့ၤပၤရဒံစူး. ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံ ကွဲးဝဲဒ်ထါအသိး ဒီးကွဲးဝဲလၢ “ပှၢ်မုၢ်ကနၢ ဒီးကီၢ်ဃ့ထီန့ၣ် ကသးခု ဒီးမဲးမုၢ်ပျီန့ၣ် ကသူၣ်ဖှံသးညီ ဒီးကပှဲၤဒီး ဖီတဖၣ်လီၤ.”—ယၡါယၤ ၃၅:၁.

တၢ်ကီတၢ်ခဲ– ပှၤသူလၢာ်ဂီၤထံအါမးအဃိ ဟီၣ်ခိၣ်ဒုးအိၣ်ထီၣ်က့ၤဝဲထံ တချုးလိာ်ခံဘၣ်.

တၢ်လၢကမၤဘၣ်ဂီၢ်က့ၤတၢ်– ယွၤအဘီအမုၢ် ကမၤဝဲဒ်သိး တၢ်က “မၤအသးလၢ ဟီၣ်ခိၣ်ချၢ” ဒ်တၢ်ဘၣ်ကစၢ်ယွၤအသးအသိး ဒီးတမ့ၢ်ဒ် ပှၤဟီၣ်ခိၣ်ဖိလၢ အအဲၣ်လီၤအနီၢ်ကစၢ်အသးတဖၣ် အတၢ်ဘၣ်သးအသိးဘၣ်. (မး ၆:၉, ၁၀) ဒီးယွၤအဘီအမုၢ်န့ၣ် ကသိၣ်လိဝဲ ပှၤဟီၣ်ခိၣ်ဖိတဖၣ်လၢ တၢ်ကူၣ်ဘၣ်ကူၣ်သ့ လၢအဂ့ၤဒိၣ်မး. ဒီးယၡါယၤ ၁၁:၉a တဲဝဲလၢ “ဟီၣ်ခိၣ်န့ၣ် ကပှဲၤဝဲဒီး တၢ်သ့ၣ်ညါ ယဟိဝၤယွၤ သပှၢ်တၢၢ်.” ဒီးခီဖျိလၢ ပှၤဟီၣ်ခိၣ်ဖိတဖၣ် ကအိၣ်ဒီး တၢ်ကူၣ်ဘၣ်ကူၣ်သ့အံၤ ဒီးကအဲၣ်ကစၢ်ယွၤ ဒီးကစၢ်ယွၤ အတၢ်ဘၣ်တ့တဖၣ် အဃိ အဝဲသ့ၣ် ကကွၢ်ထွဲဝဲ ဟီၣ်ခိၣ် ဒီးခိၣ်ဃၢၤန့ဆၢၣ် ဂ့ၤဂ့ၤဘၣ်ဘၣ်.

• နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃးဒီး ယွၤအဘီအမုၢ်အဂ့ၢ်န့ၣ် ဖးကွၢ်တၢ်ဂ့ၢ်လၢ အမ့ၢ် “ယွၤအဘီအမုၢ် ကမၤလၢထီၣ်ပှဲၤထီၣ်ဝဲ တၢ်မနုၤလဲၣ်”

• ဖးကွၢ်ယၡါယၤ အဆၢဒိၣ် ၃၅ ဒ်သိး နကသ့ၣ်ညါအါထီၣ် ဘၣ်ဃးဒီး ဟီၣ်ခိၣ်ကကဲထီၣ် ပၤရဒံစူးဒ်လဲၣ်.

• နမ့ၢ်အဲၣ်ဒိးသ့ၣ်ညါအါထီၣ် ကစၢ်ယွၤအတၢ်တိာ်ပာ်လၢ ဟီၣ်ခိၣ် ဒီးပှၤဟီၣ်ခိၣ်ဖိတဖၣ်အဂီၢ်န့ၣ် ကွၢ်တၢ်ဂီၤမူလၢအမ့ၢ် ဘၣ်မနုၤအဃိ ကစၢ်ယွၤတ့လီၤဟီၣ်ခိၣ်လဲၣ်