ဘၣ်မနုၤအဃိ ပှၤဟီၣ်ခိၣ်ဖိတဖၣ် အိၣ်ဃူအိၣ်ဖိး တန့ၢ်ဘၣ်လဲၣ်—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ဟီၣ်ခိၣ်ပဒိၣ်ပပှၢ် ဒီးဟီၣ်ခိၣ်ဒီဘ့ၣ် အတၢ်ကရၢကရိတဖၣ် ဒုးအိၣ်ထီၣ် တၢ်ဃူတၢ်ဖိးတန့ၢ်ဘၣ်. စးထီၣ်လၢ ဟီၣ်ခိၣ်တၢ်ဒုး ခံဘျီတဘျီဝံၤအလီၢ်ခံ တၢ်သဘံၣ်သဘုၣ်လၢ အလီၤပျံၤလီၤဖုးတဖၣ် တအိၣ်အါထဲသိးဒီး ဆၢကတီၢ်ခဲအံၤ နီတဘျီဘၣ်. ပှၤဟီၣ်ခိၣ်ဖိ အကကွဲၢ် ခံကထိဃၣ်ဃၣ် လၢအကအိၣ်ဝဲ ပှၤဟီၣ်ခိၣ်ဖိ လွံၢ်ပူတပူန့ၣ် ထံၣ်ဘၣ်ဒီး တၢ်ကီတၢ်ခဲ ခီဖျိလၢ တၢ်သဘံၣ်သဘုၣ် ဒ်အံၤတဖၣ်အဃိ.

ဘၣ်မနုၤအဃိ ပှၤဟီၣ်ခိၣ်ဖိတဖၣ် အိၣ်ဃူအိၣ်ဖိး တန့ၢ်ဘၣ်လဲၣ်. ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်.

ဘၣ်မနုၤအဃိ ပှၤဟီၣ်ခိၣ်ဖိ ဒုးအိၣ်ထီၣ် တၢ်ဃူတၢ်ဖိး တန့ၢ်ဘၣ်လဲၣ်န့ၣ် တၢ်ဂ့ၢ်အိၣ်ဝဲသၢခါ

1. ၁. ပှၤဟီၣ်ခိၣ်ဖိတဖၣ် အိၣ်ဒီး တၢ်ပာ်သူၣ်ပာ်သးတဖၣ်လၢ အဒုးအိၣ်ထီၣ် တၢ်ဃူတၢ်ဖိးတန့ၢ်ဘၣ်. လံာ်စီဆှံ တဲဆိပာ်စၢၤဝဲလၢ လၢပစိၤန့ၣ် “ပှၤဟီၣ်ခိၣ်ဖိ ကအဲၣ်လီၤထဲ အနီၢ်ကစၢ်အသး, ကအဲၣ်ကျိၣ်အဲၣ်စ့, ကပတြၢၤလီၤအသး, ကပာ်ထီၣ်ထီအသး . . . အသးတတီဘၣ် . . . ကမ့ၢ်ပှၤလၢအခိၣ်ကိၤ . . . တအိၣ်ဒီး တၢ်ပၢၤသူၣ်ပၢၤသးဘၣ်, ကမ့ၢ်ပှၤလၢ အမၤဆူၣ်မၤစိးတၢ် . . . ပှၤလၢအမၤဖဲအသး, ပှၤလၢ အပာ်ကဖၢလၢအသး.”—၂ တံၤမသ့း ၃:၂-၄.

2. ၂. ပှၤတဂၤဂ့ၤတဂၤဂ့ၤ မ့တမ့ၢ် တၢ်ကရၢကရိ တဖုဂ့ၤတဖုဂ့ၤ ဒုးအိၣ်ထီၣ် တၢ်ဃူတၢ်ဖိးတန့ၢ်ဘၣ်. ပှၤလၢအဒုးအိၣ်ထီၣ် တၢ်ဃူတၢ်ဖိးသ့န့ၣ် ထဲဒၣ် တၢ်ဘၣ်တ့ကစၢ် ယဟိဝၤယွၤa တဂၤလီၤ. လံာ်စီဆှံတဲဝဲလၢ “ပှၤဟီၣ်ခိၣ်ဖိ တဒိးန့ၢ်ဘၣ် တၢ်ခွဲးတၢ်ယာ်လၢ ကဟံးစုနဲၣ်ကျဲလီၤ အနီၢ်ကစၢ် အခီၣ်ခါဘၣ်.”—ယံးရမံယၤ ၁၀:၂၃.

3. ၃. ဟီၣ်ခိၣ်န့ၣ် အိၣ်လၢ မုၣ်ကီၤလံၢ် အတၢ်ပၢဖီလာ်. ဒီးမုၣ်ကီၤလံၢ်န့ၣ် “အဆှၢကမၣ် ပှၤဟီၣ်ခိၣ်ဖိခဲလၢာ်.” (လီၣ်ဖျါ ၁၂:၉) အဃိ ပသ့ၣ်ညါဘၣ်လၢ ဖဲ “ဟီၣ်ခိၣ်ခဲလၢာ်န့ၣ် အိၣ်ဝဲလၢ မုၣ်ကီၤလံၢ် အစုပူၤ” အဆၢကတီၢ် တၢ်ဒုးတၢ်ယၤ ဒီးတၢ်သဘံၣ်သဘုၣ်ကအိၣ်ဝဲ သပှၢ်တၢၢ်.—၁ ယိၤဟၣ် ၅:၁၉.

မတဂၤဒုးအိၣ်ထီၣ် တၢ်ဃူတၢ်ဖိးသ့လဲၣ်

လံာ်စီဆှံ ပာ်ဖျါထီၣ်န့ၢ်ပှၤလၢ ပှၤလၢကဒုးအိၣ်ထီၣ် တၢ်ဃူတၢ်ဖိးန့ၣ် တမ့ၢ်ပှၤဟီၣ်ခိၣ်ဖိဘၣ်, မ့ၢ်ဝဲကစၢ်ယွၤ.

• “ယဟိဝၤယွၤ တဲဝဲလၢ ‘တၢ်လၢ ယကမၤန့ၢ်သုန့ၣ် ယသ့ၣ်ညါအီၤ လီၤတံၢ်လီၤဆဲးလီၤ. ယကဟ့ၣ်သု တၢ်မုာ်တၢ်ခုၣ် ဒီးတမ့ၢ် တၢ်ကီတၢ်ခဲဘၣ်. ဒီးယကဟ့ၣ်သု တၢ်မုၢ်လၢ် ဒီးတၢ်အိၣ်မူလၢ အဂ့ၤလၢ ခါဆူညါလီၤ.’”—ယံးရမံယၤ ၂၉:၁၁.

ကစၢ်ယွၤ ကမၤလၢထီၣ်ပှဲၤထီၣ် အတၢ်အၢၣ်လီၤအံၤဒ်လဲၣ်. “ကစၢ်ယွၤလၢ အဟ့ၣ်လီၤ တၢ်ဃူတၢ်ဖိးတဂၤန့ၣ် တယံာ်လၢၤဘၣ် ကမၤသဘှံး မုၣ်ကီၤလံၢ်.” (ရိမ့ၤ ၁၆:၂၀) ကစၢ်ယွၤ ကဒုးအိၣ်ထီၣ် တၢ်ဃူတၢ်ဖိးလၢ ဟီၣ်ခိၣ် ခီဖျိလၢ အတၢ်ပၢတၢ်ပြးလၢ မူခိၣ်. ဒီးတၢ်ပၢတၢ်ပြးအံၤ လံာ်စီဆှံကိးဝဲလၢ “ယွၤအဘီအမုၢ်.” (လူၤကၣ် ၄:၄၃) ယွၤအဘီအမုၢ် အစီၤပၤ ယ့ၣ်ၡူးန့ၣ် ကသိၣ်လိဝဲ ပှၤဟီၣ်ခိၣ်ဖိတဖၣ်လၢ ကဘၣ်အိၣ်ဃူအိၣ်ဖိးဒ်လဲၣ်.—ယၡါယၤ ၉:၆, ၇.

• ဒ်သိးနကသ့ၣ်ညါအါထီၣ် ဘၣ်ဃးဒီး တၢ်ဂ့ၢ်အံၤအဂီၢ် ဖးကွၢ် တၢ်ဂ့ၢ်အခိၣ်တီလၢအမ့ၢ် “ယွၤအဘီအမုၢ် ကမၤလၢထီၣ်ပှဲၤထီၣ်ဝဲ တၢ်မနုၤလဲၣ်.”