ပှၤတနာ်အီၣ် ထံကီၢ်ပှၤခိၣ်ပှၤနၢ်တဖၣ်လၢၤဘၣ်—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

လၢ ၂၀၂၄ နံၣ်အတီၢ်ပူၤ လၢဟီၣ်ခိၣ်ဒီဘ့ၣ်န့ၣ် ပှၤဃုထၢထီၣ် ထံကီၢ်အပှၤခိၣ်ပှၤနၢ်တဖၣ် ကအိၣ်ဝဲအါန့ၢ်ဒံး ကိးနံၣ်ဒဲးဒံး. ဘၣ်ဆၣ် ပှၤအါဂၤန့ၣ် တနာ်အီၣ် ထံကီၢ်ပှၤခိၣ်ပှၤနၢ်တဖၣ် လၢၤဘၣ်.

• တၢ်ဃုသ့ၣ်ညါ ပာ်ဖျါထီၣ်ဝဲလၢ ပှၤအမဲရကၤဖိ အါတက့ၢ် တဲဝဲလၢ “ထံကီၢ်ခိၣ်နၢ် အါတက့ၢ်န့ၣ် အဲၣ်ဒိးကဲဝဲ ပှၤခိၣ်ပှၤနၢ် ခီဖျိလၢ အနီၢ်ကစၢ်အဂီၢ်” တမ့ၢ်လၢ အအဲၣ်ဒိးမၤစၢၤ ပှၤထံဖိကီၢ်ဖိ အဃိဘၣ်.a—Pew Research Center, လါစဲးပတ့ဘၢၣ် ၁၉, ၂၀၂၃.

ပှၤသးစၢ် အါဂၤစ့ၢ်ကီး တနာ်အီၣ်ဝဲ ထံကီၢ်အပှၤခိၣ်ပှၤနၢ်တဖၣ်လၢၤဘၣ်.

• “ပှၤသးစၢ်တဖၣ်န့ၣ် ဂုာ်ကျဲးစၢး ဃုကျဲလၢ ကမၤလီၤမၢ် တၢ်ကီတၢ်ခဲဖးဒိၣ်တဖၣ်. ဘၣ်ဆၣ် တၢ်ဃုသ့ၣ်ညါ ပာ်ဖျါထီၣ်ဝဲလၢ အဝဲသ့ၣ် တဲဝဲလၢ ထံကီၢ်ပဒိၣ်ပပှၢ်တဖၣ်န့ၣ် မၤလီၤမၢ်ကွံာ် တၢ်ကီတၢ်ခဲတဖၣ်အံၤ တန့ၢ်ဘၣ်.”—နူယီး တၢ်ကစီၣ်, လါယနူၤအါရံၤ ၂၉, ၂၀၂၄.

• “ပမ့ၢ်ကွၢ်လၢ ပှၤထၢနုာ်မဲ အဖီခိၣ်န့ၣ် ပှၤသးစၢ်တဖၣ်န့ၣ် နာ်အီၣ်ဝဲ ပှၤလၢအတီၣ်ထီၣ် တၢ်ဂီၤမူလၢ အ့ၤထၢၤနဲၣ်အဖီခိၣ် လၢပှၤကၠဲးအီၤအါတဖၣ် ဒိၣ်န့ၢ်ဒံး အနာ်အီၣ်ဝဲ ထံကီၢ်အပှၤခိၣ်ပှၤနၢ်တဖၣ်.”—ခိရံယါ တၢ်ကစီၣ်, လါယနူၤအါရံၤ ၂၂, ၂၀၂၄.

နဆိကမိၣ် ထံကီၢ်အပှၤခိၣ်ပှၤနၢ်တဖၣ် မၤဂ့ၤထီၣ် တၢ်အိၣ်သးလၢ ခါဆူညါအဂီၢ် ကသ့ဧါ. မတဂၤ မၤဝဲကသ့လဲၣ်.

ပလီၢ်သး ဘၣ်ဃးဒီး ပှၤလၢနနာ်န့ၢ်အီၤ

ပကြၢးပလီၢ်သး ဘၣ်ဃးဒီး ပှၤလၢ ပနာ်န့ၢ်အီၤတဖၣ်. လံာ်စီဆှံတဲဝဲလၢ “ပှၤလၢ အတၢ်လဲၤခီဖျိ အိၣ်စှၤန့ၣ် နာ်တၢ်ကတိၤ ကိးထံၣ်ဒဲးလီၤ. မ့မ့ၢ် ပှၤကူၣ်တၢ်သ့န့ၣ် ဆိကမိၣ်ထံ အခီၣ်ခါ ကိးခါဒဲးလီၤ.”—ကတိၤဒိ ၁၄:၁၅.

• တၢ်ကစီၣ်လၢ နနၢ်ဟူဘၣ်တဖၣ် ဘၣ်ဧါ တဘၣ်ဧါန့ၣ် နသ့ၣ်ညါကသ့ဒ်လဲၣ်. နမ့ၢ်အဲၣ်ဒိး သ့ၣ်ညါန့ၣ် ဖးကွၢ်တၢ်ဂ့ၢ် လၢအမ့ၢ် “ဒီသဒၢနသးလၢ တၢ်ကစီၣ်လၢအကမၣ်.”

ထံကီၢ် အပှၤခိၣ်ပှၤနၢ်လၢ အမၤတၢ်တီတီလိၤလိၤ ဒီးအသူၣ်အိၣ်သးအိၣ် ထံဖိကီၢ်ဖိနီၢ်ကီၢ်တဖၣ်နာ်က့ အဝဲသ့ၣ် မၤတၢ်တသ့ ခဲလၢာ်ဘၣ်. အဃိ လံာ်စီဆှံ ဟ့ၣ်ပလီၢ်ပှၤလၢ

• “တဘၣ်နာ်န့ၢ် ပဒိၣ်ဖးဒိၣ်တဖၣ် ဒီးပှၤဟီၣ်ခိၣ်ဖိ လၢအအုၣ်က့ၤခီၣ်က့ၤတၢ် တသ့ဘၣ်န့ၣ်တဂ့ၤ.”—စံးထီၣ်ပတြၢၤ ၁၄၆:၃.

ခိၣ်နၢ် လၢနနာ်န့ၢ်အီၤသ့တဂၤ

လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ ဃုထၢထီၣ်ဝဲ ခိၣ်နၢ်တဂၤလၢ ပှၤနာ်န့ၢ်အီၤသ့ ဒီးအတုၤထီၣ်ထီၣ်ဘး လၢကကဲခိၣ်နၢ်. ဒီးခိၣ်နၢ်တဂၤအံၤန့ၣ် မ့ၢ်ဝဲယ့ၣ်ၡူး. (လူၤကၣ် ၁:၃၂, ၃၃) ယ့ၣ်ၡူးမ့ၢ်ဝဲ ယွၤအဘီအမုၢ်လၢ အပၢတၢ်လၢမူခိၣ် အစီၤပၤ.—မးသဲ ၆:၁၀.

• ဃုသ့ၣ်ညါ ဘၣ်ဃးဒီး ဘၣ်မနုၤအဃိ ပနာ်န့ၢ်ယ့ၣ်ၡူးသ့လဲၣ် ဒီးအဝဲကမၤလီၤမၢ်ကွံာ် ပတၢ်ကီတၢ်ခဲတဖၣ် ဒ်လဲၣ်. ဖးကွၢ် တၢ်ဂ့ၢ်လၢအမ့ၢ် “ယွၤအဘီအမုၢ် အစီၤပၤန့ၣ် ကမ့ၢ်မတဂၤလဲၣ်.” ဒီး “ယွၤအဘီအမုၢ် ကမၤလၢထီၣ်ပှဲၤထီၣ်ဝဲ တၢ်မနုၤလဲၣ်.”