ယဟိဝၤပှၤအုၣ်အသးတဖၣ်​ အတၢ်မၤန့ၣ်​ ဒိးန့ၢ်ဘၣ်ဝဲ ကျိၣ်စ့အတၢ်မၤစၢၤဖဲလဲၣ်

ပတၢ်မၤလၢ ပမၤအီၤလၢဟီၣ်ခိၣ်ဒီဘ့ၣ်အံၤအဂီၢ်န့ၣ်​ အါတက့ၢ် ပဒိးန့ၢ်ဘၣ်​ တၢ်မၤဘူၣ်လၢ ယဟိဝၤပှၤအုၣ်အသးaလၢ အဟ့ၣ်တၢ်လၢ တၢ်သးအိၣ်အပူၤတဖၣ်​ အအိၣ်န့ၣ်လီၤ. ပအိၣ်ဒီး တၢ်မၤဘူၣ်တလါတဖၣ်လၢ ပတၢ်ဘူၣ်ထီၣ်ဘါထီၣ်အလီၢ်န့ၣ်လီၤ. ကျဲအဂၤလၢ ပှၤဟ့ၣ်တၢ်မၤဘူၣ်သ့န့ၣ်​ ဘၣ်တၢ်ပာ်ဖျါထီၣ်အီၤလၢ တၢ်မၤဘူၣ်​ လံာ်ကဘျံးပၤအပူၤန့ၣ်လီၤ. ဖဲန့ၣ်ပာ်ဖျါထီၣ်ဝဲကျဲအါဘိလၢ ပှၤကဟ့ၣ်တၢ်မၤဘူၣ်အဂီၢ်လီၤ. အဃိ ပှၤမ့ၢ်အဲၣ်ဒိး ဟ့ၣ်တၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်မၤအဂီၢ်မ့ၢ်ဂ့ၤ, လီၢ်ကဝီၤ တၢ်လၢာ်ဘူၣ်လၢာ်စ့ၤအဂီၢ်မ့ၢ်ဂ့ၤ, ခံခါလၢာ်အဂီၢ်မ့ၢ်ဂ့ၤ ပှၤဃုထၢသ့လီၤ.

ယဟိဝၤပှၤအုၣ်အသးတဖၣ်န့ၣ်​ ပှၤတဃ့အီၤလၢ ကဘၣ်ဟ့ၣ်​ တၢ်ဆံဆဲၣ်ပူတပူ, ကဘၣ်ဟ့ၣ်စ့ ထဲန့ၣ်ထဲအံၤလၢ အစ့ဟဲနုာ်တဖၣ်အကျါန့ၣ်ဘၣ်. (၂ ကရံၣ်သူး ၉:၇) ပတထၢတၢ်မၤဘူၣ်လၢ ပတၢ်အိၣ်ဖှိၣ်ရိဖှိၣ်တဖၣ်အပူၤ နီတဘျီဘၣ်, ဒီးပပှၤစံၣ်တဲၤတဲလီၤတၢ်ဖိတဖၣ်န့ၣ်​ တဒိးန့ၢ်ဘၣ်ကျိၣ်စ့ ခီဖျိ တၢ်ဒိးဘျၢပှၤဂၤလၢထံ, တၢ်ခူၣ်လီၤပှၤသံ, တၢ်တ့တၢ်ဖျီ မ့တမ့ၢ် တၢ်မၤအဂၤလၢ ဘၣ်ဃးဒီး တၢ်ဘူၣ်တၢ်ဘါတဖၣ်အဃိန့ၣ်ဘၣ်. ပတမၤ တၢ်ဆါတၢ်အီၣ်တၢ်အီအမူးပွဲ, တၢ်လိာ်ကွဲအမူးပွဲ, ဘူၣ်သးဖှံ, တၢ်အီၣ်သကိးတၢ်မူးပွဲ, တၢ်ဟ့ၣ်ဖီၣ်တၢ်ဖးမူးပွဲတဖၣ်​ ဒီးဃုအါထီၣ်​ တၢ်မၤဘူၣ်တဖၣ်ဘၣ်. ပတပာ်ဖျါထီၣ်​ ပှၤလၢအဟ့ၣ်​ တၢ်မၤဘူၣ်တဖၣ်​ အတၢ်ဂ့ၢ်တၢ်ကျိၤ ဒီးပတဒုးသ့ၣ်ညါလၢပှၤကမျၢၢ်အမဲာ်ညါဘၣ်. (မးသဲ ၆:၂-၄) ပတပျဲလၢ ပှၤကဟဲမၤ တၢ်ဘိးဘၣ်ရၤလီၤ (advertisement) တဖၣ်လၢ ပပှာ်ယဲၤသန့ မ့တမ့ၢ် ပလံာ်လဲၢ်တဖၣ်အပူၤ လၢပကဒိးန့ၢ်ဘၣ်​ ကျိၣ်စ့အဂီၢ်ဘၣ်.

ယဟိဝၤပှၤအုၣ်အသး အတၢ်အိၣ်ဖှိၣ်​ ကိးဖုဒဲးန့ၣ်​ ဖးဖျါထီၣ်ဝဲ တၢ်မၤဘူၣ်စရီ တလါတဘျီလၢ ကမျၢၢ်အမဲာ်ညါလီၤ. ဒ်သိးကလီၤတံၢ်လၢ တိၢ်မၤဘူၣ်တဖၣ်​ ဘၣ်တၢ်သူအီၤလၢ အလီၢ်ဘၣ်ကျဲဘၣ်အဂီၢ် တၢ်မၤဘူၣ်စရီတဖၣ်​ ဘၣ်တၢ်သမံသမိးအီၤထီဘိလီၤ.—၂ ကရံၣ်သူး ၈:၂၀, ၂၁.

ပှၤဟ့ၣ်တၢ်မၤဘူၣ်သ့လၢ ကျဲအါဘိ

• တၢ်မၤဘူၣ်တလါတဖၣ်– နထၢနုာ် တိၢ်မၤဘူၣ်​ မ့တမ့ၢ် ခၠဲးစးခိလၢ တၢ်မၤဘူၣ်တလါလၢ အအိၣ်လၢပဘီမုၢ်ဘျီၣ်ဒိၣ်, ကဝီၤအဘျီၣ်ဒိၣ်​ ဒီးတၢ်လီၢ်အဂၤလၢ ပမၤတၢ်အိၣ်ဖှိၣ်အလီၢ်တဖၣ်အပူၤသ့န့ၣ်လီၤ.

• တၢ်ထၢနုာ် တၢ်မၤဘူၣ်လၢ Online– လၢထံကီၢ်အါဘ့ၣ်အပူၤ ပှၤသူဝဲ “Donate to Jehovah’s Witnesses” ဒီးပှၤထၢနုာ်တၢ်မၤဘူၣ်လၢ credit cards, debit cards, bank transfers ဒီး အံၣ်လဲးထြီနံး အကျိၤအကျဲအဂၤတဖၣ်လီၤ. b ယဟိဝၤပှၤအုၣ်အသးတနီၤန့ၣ်​ “ပာ်လီၤဆီဃာ်” ဝဲကျိၣ်စ့တနီၤ ဒီးသူဝဲတၢ်အကျိၤအကျဲတဖၣ်အံၤအကျါ တမံၤမံၤဒီး ဟ့ၣ်ဝဲတၢ်မၤဘူၣ်​ ကိးလါဒဲးလီၤ.—၁ ကရံၣ်သူး ၁၆:၂.

  

• တၢ်ရဲၣ်ကျဲၤဆိပာ်လၢ ကဟ့ၣ်မၤဘူၣ်တၢ်အဂီၢ်– တၢ်ဟ့ၣ်တၢ်မၤဘူၣ်​ အကျိၤအကျဲတနီၤန့ၣ်​ လိၣ်လၢပှၤကဘၣ်​ ရဲၣ်ကျဲၤဆိပာ် /မ့တမ့ၢ် ကလိၣ်ဘၣ်​ သဲစး တၢ်ဟ့ၣ်ကူၣ်ဟ့ၣ်ဖးတဖၣ်လီၤ. ပှၤမ့ၢ်ရဲၣ်ကျဲၤပာ် ဒ်န့ၣ်န့ၣ်​ ပှၤဒိးန့ၢ်ဘၣ်​ တၢ်အဘျုးလၢ ဘၣ်ဃးဒီး တၢ်ခိတၢ်သွဲလၢ ထံကီၢ်အပူၤသ့န့ၣ်လီၤ. ပှၤအါတက့ၢ်န့ၣ်​ ဒိးန့ၢ်ဘၣ်တၢ်အဘျုး ခီဖျိသ့ၣ်ညါထီၣ်ဘၣ်ဝဲ တၢ်ဟ့ၣ်တၢ်မၤဘူၣ်​ အကျိၤအကျဲလၢ အမၤဝဲသ့ ဖဲအအိၣ်မူဒံးအခါ မ့တမ့ၢ် အဝဲသံဝံၤအလီၢ်ခံ ပှၤလၢအဟ့ၣ်လီၤဝဲတဖၣ်​ ဒိးန့ၢ်ဝဲသ့အဃိန့ၣ်လီၤ. နမ့ၢ်အဲၣ်ဒိး ဟ့ၣ်တၢ်မၤဘူၣ်​ ဒ်တၢ်ပာ်ဖျါလၢလာ်အံၤအသိးန့ၣ်​ ဆဲးကျိးဒီး ဝဲၤတြၢ်လၢ လီၢ်ကဝီၤအပူၤ ဒ်သိးနကသ့ၣ်ညါအါထီၣ်​ တၢ်ဂ့ၢ်တၢ်ကျိၤ လီၤတံၢ်လီၤဆဲးအဂီၢ်တက့ၢ်–

  • စ့စရီ (bank accounts)

  • တၢ်အုၣ်ကီၤတဖၣ်​ ဒီးပ့ၣ်စ့ၣ်​ (insurance and retirement plans)

  • ဟံၣ်ဃီတၢ်လီၢ်တၢ်ကျဲ (real estate)

  • တၢ်ဖိတၢ်လံၤ ဒီး ကျိၣ်စ့လံာ်အုၣ်သး (stocks and bonds)

  • လံာ်အုၣ်သးလၢ တၢ်န့ၢ်သါအဂီၢ် (wills and trusts)

နမ့ၢ်အဲၣ်ဒိးသ့ၣ်ညါအါထီၣ်​ ဘၣ်ဃးဒီး တၢ်ဟ့ၣ်တၢ်မၤဘူၣ်လၢ နလီၢ်ကဝီၤအပူၤအဂ့ၢ်န့ၣ်​ ကွၢ်လၢ “Donate to Jehovah’s Witnesses” တက့ၢ်.