ပှၤသးစၢ်တဖၣ်အတၢ်သံကွၢ်
ပှၤမ့ၢ်ဟးတဲယဂ့ၢ်န့ၣ် ယကဘၣ် မၤဒ်လဲၣ်
ပှၤမ့ၢ်ဟးတဲပဂ့ၢ်န့ၣ် မၤဘၣ်ဒိပသးသ့
ပှၤတနီၤန့ၣ် ဟးတဲပဂ့ၢ် ဒ်သိး ကမၤဟးဂီၤ ပမံၤဂ့ၤသၣ်ဂ့ၤအဂီၢ်. မ့မ့ၢ် ပှၤတနီၤန့ၣ် ဟးတဲပဂ့ၢ် ဘၣ်ဆၣ် အတၢ်တိာ်ပာ် တအိၣ်ဒ်န့ၣ်ဘၣ်. သနာ်က့ အမၤဘၣ်ဒိပသးသ့ဒံး. လီၤဆီဒၣ်တၢ် ပှၤလၢအဟးတဲပဂ့ၢ်တဂၤ မ့မ့ၢ် ပသကိးန့ၣ် ပသးကဘၣ်ဒိဝဲ ဒိၣ်မး.—စံးထီၣ်ပတြၢၤ ၅၅:၁၂-၁၄.
“ယသကိးတဂၤ ဟးတဲယဂ့ၢ် လၢယလီၢ်ခံ, အတဲဝဲလၢ ယတဆိကမိၣ်န့ၢ်တၢ်လၢ ပှၤဂၤအဂီၢ်ဘၣ်. အဃိ ယသးဘၣ်ဒိဒိၣ်မး. ဘၣ်မနုၤအဃိ အဟးတဲယဂ့ၢ် ဒ်န့ၣ်လဲၣ်န့ၣ် ယတနၢ်ပၢၢ်ဘၣ်.”—အဲၡလံၤ.
တၢ်မ့ၢ်တၢ်တီ– ပှၤလၢအတဲအီၣ်ပဂ့ၢ်တဂၤ မ့မ့ၢ်ပသကိးမ့ၢ်ဂ့ၤ တမ့ၢ်ဘၣ်မ့ၢ်ဂ့ၤ ပမ့ၢ်သ့ၣ်ညါလၢ ပှၤဟးတဲအီၣ်ပဂ့ၢ် လၢအတဂ့ၤန့ၣ် ပသးတမုာ်ဘၣ်.
ပှၤတဟးတဲပဂ့ၢ် တဂ့ၤအဂီၢ် ပတြီအီၤတသ့ဘၣ်
ဘၣ်မနုၤအဃိ ပှၤဟးတဲပဂ့ၢ်လဲၣ်န့ၣ် တၢ်ဂ့ၢ်ကအိၣ်ဝဲအါမံၤ. အဒိ
ပှၤသူၣ်အိၣ်သးအိၣ်ပှၤအဃိ. တၢ်လၢပှၤဟီၣ်ခိၣ်ဖိန့ၣ် ကအိၣ်ဒီး တၢ်ရ့လိာ်မုာ်လိာ်သးလီၤ. အဃိ အဝဲသ့ၣ် ကတဲသကိးတၢ် ဒီးတဲပှၤဂၤအဂ့ၢ်န့ၣ် တမ့ၢ်တၢ်လၢ အလီၤကမၢကမၣ်ဘၣ်. လံာ်စီဆှံစ့ၢ်ကီး ဟ့ၣ်ဂံၢ်ဟ့ၣ်ဘါပှၤလၢ ပကဘၣ် “ဆိကမိၣ်န့ၢ်တၢ်လၢ ပှၤဂၤအဂီၢ်.”—ဖံလံးပံၤ ၂:၄.
“တၢ်ဂ့ၢ်လၢ အလီၤသူၣ်အိၣ်သးအိၣ် ဒိၣ်ကတၢၢ် လၢပတဲအီၤမုာ်န့ၣ် မ့ၢ်ဝဲ ပှၤဟီၣ်ခိၣ်ဖိအဂ့ၢ်.”—ဘံၤယါခၤ.
“ယမ့ၢ်ဘၣ်တဲတီတီန့ၣ် ယဘၣ်သးသ့ၣ်ညါ ပှၤဂၤအဂ့ၢ် ဒီးတဲအဝဲသ့ၣ်အဂ့ၢ်. ဘၣ်မနုၤအဃိလဲၣ်န့ၣ် ယတသ့ၣ်ညါဘၣ်, ဘၣ်ဆၣ် အမုာ်ဘၣ်ယၤဒိၣ်မး.”—ခ့ထံၤ.
တၢ်ကၢၣ်ထီၣ်အသးအဃိ. လၢလံာ်စီဆှံအစိၤန့ၣ် ပှၤအိၣ်ဝဲတနီၤလၢ “ဖဲအဝဲသ့ၣ် ချုးအဆၢကတီၢ် တမၤတၢ်အဂၤ နီတမံၤဘၣ်, အိၣ်ဒၣ်ထဲ အဝဲသ့ၣ် တဲသကိးဝဲ မ့တမ့ၢ် ဒိကနၣ်ဝဲ တၢ်ဂ့ၢ်အသီ တမံၤမံၤလီၤ.” (မၤတၢ် ၁၇:၂၁) ဆၢကတီၢ်ခဲအံၤ ပှၤတနီၤနီၤ မၤဝဲဒ်န့ၣ်စ့ၢ်ကီး.
“တဘျီတခီၣ် တၢ်ဂ့ၢ်လီၤဆီ မ့ၢ်တအိၣ်နီတမံၤဘၣ် သနာ်က့ ပှၤတနီၤန့ၣ် ဟးတဲကြီတၢ်ဒ်သိး ကဒုးအိၣ်ထီၣ်တၢ်ဂ့ၢ်လၢ အလီၤထုးန့ၢ်သူၣ်ထုးန့ၢ်သးအဂီၢ်.”—ကၠိၤအဲနၤ.
ဆိကမိၣ်ဆံးလီၤအသးအဃိ. လံာ်စီဆှံ ဟ့ၣ်ပလီၢ်ပှၤလၢ ပတကြၢး ထိၣ်သတြီၤပသးဒီး ပှၤဂၤဘၣ်. (ကလၤတံ ၆:၄) ပှၤတနီၤန့ၣ် ထိၣ်သတြီၤလီၤအသးဒီးပှၤဂၤ ဒီးဆိကမိၣ်ဆံးလီၤအသးအဃိ ဒ်သိး အသးကမုာ်ထီၣ်အဂီၢ် အဝဲသ့ၣ် ဟးတဲပှၤဂ့ၢ်လၢ အတဂ့ၤတဖၣ်.
“ပှၤတဂၤမ့ၢ်တဲအီၣ်ပှၤဂ့ၢ်န့ၣ် အပာ်ဖျါထီၣ် အနီၢ်ကစၢ် အတၢ်ပာ်သူၣ်ပာ်သး အိၣ်ဒ်လဲၣ်စ့ၢ်ကီး. ညီနုၢ်န့ၣ် အဝဲသ့ၣ် သူၣ်က့ၣ်သးကါပှၤအဃိ တဲအီၣ်ပှၤဂ့ၢ်. ဒီးအဝဲသ့ၣ် တဲအီၣ်ပှၤဂၤအဂ့ၢ် ဒ်သိးအကမၤမုာ်ထီၣ် အနီၢ်ကစၢ်သး ဒီးအကတူၢ်ဘၣ်လၢ အဂ့ၤဒိၣ်န့ၢ်ဒံးပှၤဂၤအဂီၢ်.”—ဖံၤ.
တၢ်မ့ၢ်တၢ်တီ– ပှၤဟးတဲပှၤဂ့ၢ်န့ၣ် နဘၣ်သးမ့ၢ်ဂ့ၤ တဘၣ်သးမ့ၢ်ဂ့ၤ ပှၤကတဲလီၤ. ဒီးပှၤကတဲနဂ့ၢ်စ့ၢ်ကီး.
ပှၤမ့ၢ်ဟးတဲပဂ့ၢ်န့ၣ် တၢ်လၢပမၤအီၤသ့န့ၣ် အိၣ်ဝဲ
ဒ်သိး ပှၤတဟးတဲနဂ့ၢ် တဂ့ၤအဂီၢ် နမၤတသ့ဘၣ်. ဘၣ်ဆၣ် တၢ်လၢနမၤအီၤသ့န့ၣ် အိၣ်ဝဲ. ပကတဲသကိး တၢ်လၢနမၤအီၤသ့ခံမံၤ.
တၢတမံၤ– ကွၢ်ကပာ်ကွံာ်အီၤ. တၢ်ဂ့ၢ်လၢပှၤတဲအီၤတဖၣ် မ့မ့ၢ် တၢ်ဂ့ၢ်လၢ အရ့တဒိၣ်အါအါဘၣ်န့ၣ် နမ့ၢ်ကွၢ်ကပာ်ကွံာ်အီၤန့ၣ် မ့ၢ်ကျဲလၢ အဂ့ၤကတၢၢ်. ဘၣ်ဃးဒီး တၢ်ဂ့ၢ်အံၤ လံာ်စီဆှံ အတၢ်ဟံးစုနဲၣ်ကျဲ အိၣ်ဝဲလၢ “တဘၣ်သးထီၣ်တၢ် ချ့ချ့တဂ့ၤ.”—စံၣ်တဲၤတဲလီၤတၢ် ၇:၉.
“ပှၤဟးရၤလီၤယဂ့ၢ်လၢ ယပာ်တၢ်အဲၣ်တီဒီး ပိာ်ခွါတဂၤ. ဒီးပှၤတဂၤန့ၣ် ယတသ့ၣ်ညါအီၤ နီတစဲးဘၣ်. အဃိ အလီၤနံၤဘၣ်ယၤ ဒီးယနံၤဒီး ဝံၤလီၤ.”—အလံၤ.
“နတၢ်မံၤဂ့ၤသၣ်ဂ့ၤန့ၣ် အကဲထီၣ် တၢ်ဒီသဒၢ အဂ့ၤကတၢၢ်လၢနဂီၢ်. နမ့ၢ်အိၣ်ဒီး မံၤဂ့ၤသၣ်ဂ့ၤန့ၣ် ပှၤဂၤမ့ၢ်တဲ နဂ့ၢ်လၢအတဂ့ၤ ဒ်လဲၣ်ဂ့ၤဒ်လဲၣ်ဂ့ၤ တမ့ၢ်လၢ ပှၤကနာ်အီၤ ညီညီဘၣ်.”—အဲလဲစၢၤ.
တၢ်ဟ့ၣ်ကူၣ်– ကွဲးလီၤ (၁) ပှၤဟးတဲနဂ့ၢ် ဒ်လဲၣ် ဒီး (၂) ပှၤတဲဒ်န့ၣ်အဃိ နသးမၤသးဒ်လဲၣ်. နမ့ၢ်မၤဒ်န့ၣ်န့ၣ် အကမၤစၢၤနၤ ဒ်သိး နကဆိကမိၣ်ထံတၢ် လၢနသးပူၤ အဃိ ကညီထီၣ်လၢ နကကွၢ်ကပာ်ကွံာ်အီၤအဂီၢ်.—စံးထီၣ်ပတြၢၤ ၄:၄.
ခံမံၤတမံၤ– လဲၤတဲတၢ်ဒီး ပှၤလၢအဟးတဲ နဂ့ၢ်တဂၤ. တဘျီတခီၣ် တၢ်ဂ့ၢ်လၢ ပှၤတဲန့ၣ် အမၤဘၣ်ဒိနသးဖးဒိၣ်အဃိ နကွၢ်ကပာ်ကွံာ်အီၤ မ့ၢ်တန့ၢ်ဘၣ်န့ၣ် နကဘၣ်လဲၤတဲတၢ်ဒီးအီၤ.
“နမ့ၢ်လဲၤတဲတၢ်ဒီး ပှၤလၢအဟးတဲနဂ့ၢ် တဂၤန့ၣ် အဝဲကသ့ၣ်ညါလီၤအသးလၢ နနၢ်ဟူက့ၤ တၢ်ဂ့ၢ်လၢ အတဲဝဲလၢ နလီၢ်ခံ. ဒီးနကန့ၢ်ဘၣ် တၢ်ခွဲးတၢ်ယာ်လၢ ကဘှီဘၣ်ထီၣ်က့ၤ တၢ်ဂ့ၢ်ကီအံၤ.”—အလံၤ.
တချုးနလဲၤတဲတၢ်ဒီး ပှၤလၢအဟးတဲနဂ့ၢ်တဂၤ ဒံးဘၣ်န့ၣ် ဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲ ဒီးတၢ်သံကွၢ် လၢတၢ်ဖီလာ်တဖၣ်အံၤ.
“ပှၤတဂၤလၢ အစံးဆၢတၢ်ချ့ချ့ တချုးလၢ အနၢ်ဟူတၢ်ဂ့ၢ် လီၤတံၢ်လီၤဆဲးဒံးဘၣ်န့ၣ် မ့ၢ်ဒၣ်အမၤကြီတၢ်.” (ကတိၤဒိ ၁၈:၁၃) ‘ယသ့ၣ်ညါ တၢ်ဂ့ၢ်လီၤတံၢ်လီၤဆဲးလံဧါ. ပှၤလၢအဟဲတဲဘၣ်က့ၤယၤ တၢ်လၢအနၢ်ဟူ ဘၣ်ဃးဒီး ယဂ့ၢ်န့ၣ် မ့ၢ်အနၢ်ပၢၢ်ကမၣ် တၢ်လၢအနၢ်ဟူဝဲအဃိဟီဧါ.’
“ပှၤကိးဂၤဒဲး ကဘၣ်သးအိၣ် ဒိကနၣ်တၢ် ဘၣ်ဆၣ် တဘၣ်ကရီတဲတၢ်ဘၣ် ဒီးတဘၣ်သးဒိၣ်ထီၣ်တၢ် ချ့ချ့ဘၣ်.” (ယၤကိာ် ၁:၁၉) ‘မ့ၢ်ယဘၣ် လဲၤတဲတၢ်ဒီးအီၤ ခဲအံၤဧါ. ယမ့ၢ်လဲၤတဲဘၣ်ဖုး ခဲအံၤန့ၣ် ယတဲတၢ်ဒီးအီၤ ဂ့ၤဂ့ၤဘၣ်ဘၣ် ကသ့ဧါ. မ့တမ့ၢ်ဘၣ်န့ၣ် ယဘၣ်အိၣ်ခိး တုၤလၢ ယသးခုၣ်လီၤဧါ.’
“တၢ်လၢ သုအဲၣ်ဒိးလၢ ပှၤဂၤကမၤသုန့ၣ် မၤအဝဲသ့ၣ်ဒ်န့ၣ် စ့ၢ်ကီး.” (မးသဲ ၇:၁၂) ‘ယမ့မ့ၢ် ပှၤလၢအဟးတဲ ပှၤဂၤအဂ့ၢ်န့ၣ် ယကအဲၣ်ဒိးလၢ ပှၤဟဲတဲတၢ်ဒီးယၤ ဒ်လဲၣ်. ပှၤမ့ၢ်တဲ တၢ်ကတိၤလၢအမုာ် ဒီးပာ်ဖျါထီၣ် တၢ်မဲာ်မုာ်နါဆၢန့ၣ် ယကတူၢ်ဘၣ်ဒ်လဲၣ်. ဒီးယကအဲၣ်ဒိးလၢ ပှၤဟဲတဲတၢ်ဒီးယၤ လၢတၢ်ဆၢကတီၢ် ဒီးတၢ်လီၢ်ဖဲလဲၣ်.’
တၢ်ဟ့ၣ်ကူၣ်– တချုးနလဲၤတဲတၢ်ဒီး ပှၤလၢဟးတဲနဂ့ၢ်တဂၤန့ၣ် ကွဲးလီၤဆိပာ်စၢၤ တၢ်လၢနအဲၣ်ဒိးတဲအီၤ. ဝံၤဒီး အိၣ်ခိးတနွံခံနွံ ဒီးက့ၤဖးကဒါက့ၤအီၤ, ဘၣ်သ့ၣ်သ့ၣ် နကထံၣ်ဘၣ်လၢ တၢ်ဂ့ၢ်လၢနကဘၣ်သး ဆီတလဲန့ၣ် အိၣ်ဝဲ ဒီးနဆီတလဲအီၤသ့. အဂၤတမံၤန့ၣ် တဲသကိးတၢ်ဒီး နမိနပါ မ့တမ့ၢ် နသကိးလၢ အဒိၣ်တုာ်ခိၣ်ပှဲၤ ဘၣ်ဃးဒီးတၢ်ဂ့ၢ်အံၤ ဒီးဃ့အဝဲသ့ၣ် တၢ်ဟ့ၣ်ကူၣ်.
တၢ်မ့ၢ်တၢ်တီ– လၢပတၢ်အိၣ်မူပူၤ တၢ်လၢအကဲထီၣ်အသး အါတက့ၢ်န့ၣ် ပတြီအီၤ တန့ၢ်ဘၣ်. ဒီးဒ်သိး ပှၤတတဲပဂ့ၢ် တဂ့ၤအဂီၢ် ပတြီတသ့စ့ၢ်ကီးဘၣ်. ဘၣ်ဆၣ် ပကမၤဆၢက့ၤ ဒ်လဲၣ်န့ၣ် ပဃုထၢသ့.