ယဟိဝၤပှၤအုၣ်အသးတဖၣ် အိၣ်ဒီးပိာ်မုၣ်လၢ အစံၣ်တဲၤတဲလီၤတၢ်ဧါ

အိၣ်ဝဲလီၤ. ယဟိဝၤပှၤအုၣ်အသးခဲလၢာ်န့ၣ် မ့ၢ်ပှၤစံၣ်တဲၤတဲလီၤတၢ် မ့တမ့ၢ် ပှၤစိာ်တၢ်သးခုကစီၣ်တဖၣ်, လၢအပာ်ဃုာ်ဒီး ပိာ်မုၣ်လၢ အကကွဲၢ်လီၤ. ဒ်လံာ်စီဆှံ တဲဆိပာ်ဝဲအသိး “ပိာ်မုၣ်အါဂၤ စိာ်တၢ်ကစီၣ်တဖၣ်” လီၤ.—စံးထီၣ်ပတြၢၤ ၆၈:၁၁, ခ့ခါစှီၤကျိာ်.

ပိာ်မုၣ်လၢအမ့ၢ် ယဟိဝၤပှၤအုၣ်အသးတဖၣ်န့ၣ် မၤထွဲဝဲပိာ်မုၣ်လၢ ဘၣ်တၢ်ပာ်ဖျါအီၤလၢ လံာ်စီဆှံပူၤတဖၣ် အဒိအတဲာ်လီၤ. (ကတိၤဒိ ၃၁:၁၀-၃၁) အဝဲသ့ၣ် တမ့ၢ်ပှၤကဲခိၣ်ကဲနၢ် တၢ်အိၣ်ဖှိၣ်သနာ်က့ အဝဲသ့ၣ်ပာ်ဃုာ် လၢလၢပှဲၤပှဲၤလၢ တၢ်စံၣ်တဲၤတဲလီၤ တၢ်မၤအပူၤလီၤ. သိၣ်လိစ့ၢ်ကီးဝဲ အဖိတဖၣ်လၢ လံာ်စီဆှံတၢ်သိၣ်တၢ်သီလီၤ. (ကတိၤဒိ ၁:၈) အဝဲသ့ၣ်ဂုာ်ကျဲးစၢး ပာ်ဖျါဒိဂ့ၤတဲာ်ဘၣ် ခိဖျိလၢ အတၢ်ကတိၤဒီး အတၢ်ဖံးတၢ်မၤန့ၣ်လီၤ.—တံတူး ၂:၃-၅.