ဃုသၢဖျၢၣ်န့ၣ် အခီပညီမ့ၢ်မနုၤလဲၣ်.
လံာ်စီဆှံတဲဝဲဒ်လဲၣ်
လံာ်လီၣ်ဖျါပာ်ဖျါထီၣ်ဝဲ ဃုသၢဖျၢၣ် (၆၆၆) န့ၣ်အဲၣ်ဒိးတဲဝဲ ဆၣ်ဖိကီၢ်ဖိလၢအအၢတဒု လၢအဟဲထီၣ်လၢပီၣ်လဲၣ်ပူၤ အမံၤဒီးအနီၣ်ဂံၢ်လီၤ. ဆၣ်ဖိကီၢ်ဖိလၢအအၢတဒုအံၤ အိၣ်ဒီးအခိၣ်သၣ်ဃံနွံဖျၢၣ် ဒီးအနၢၤအဘိတဆံ. (လီၣ်ဖျါ ၁၃:၁, ၁၇, ၁၈) ဆၣ်ဖိကီၢ်ဖိလၢအအၢတဒုအံၤန့ၣ် အဲၣ်ဒိးတဲဝဲ ဟီၣ်ခိၣ်အပဒိၣ်ခဲလၢာ် လၢအပၢဝဲ “ကလုာ်ဒူၣ်ကိးဒူၣ်ဒဲး, ပှၤကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး ဒီးပှၤကိးကလုာ်ဒဲး.” (လီၣ်ဖျါ ၁၃:၇) ဆၣ်ဖိကီၢ်ဖိတဒုအံၤ အမံၤဃုသၢဖျၢၣ် (၆၆၆) န့ၣ်အဲၣ်ဒိးတဲဝဲ ကစၢ်ယွၤထံၣ်ဝဲလၢ ဟီၣ်ခိၣ်အပဒိၣ်ပပှၢ်တဖၣ် ပၢတၢ်တကဲထီၣ်လိၣ်ထီၣ် နီတစဲးဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်.
ပှၤမံၤတနီၤ အိၣ်ဒီးအခီပညီ. ကစၢ်ယွၤကိးန့ၢ်ပှၤမံၤန့ၣ် အိၣ်ဒီးအခီပညီ. အဒိ, ပှၤတဂၤလၢအမံၤ စီၤအၤဘြၣ်န့ၣ် အခီပညီမ့ၢ်ဝဲ “ပၢ်ဘၣ်တၢ်ပာ်ထီၣ်ထီအီၤ” န့ၣ်ဖဲကစၢ်ယွၤအၢၣ်လီၤအီၤလၢ ကဒုးကဲထီၣ်အီၤ “ပှၤအါကလုာ်အပၢ်” အခါ ကစၢ်ယွၤကိးန့ၢ်က့ၤအမံၤလၢ စီၤအၤဘြၤဟၣ်လၢ အခီပညီမ့ၢ်ဝဲ “ပှၤဂီၢ်မုၢ်အပၢ်.” (၁ မိၤၡ့ ၁၇:၅, တၢ်ဂ့ၢ်အဘျဲၣ်) ဒ်န့ၣ်အသိး ကစၢ်ယွၤကိးန့ၢ် ဆၣ်ဖိကီၢ်ဖိလၢအအၢတဒုအံၤ အမံၤလၢဃုသၢဖျၢၣ် (၆၆၆) န့ၣ်အိၣ်ဒီးအခီပညီစ့ၢ်ကီး.
နီၣ်ဂံၢ်ဃုန့ၣ်အခီပညီမ့ၢ်ဝဲ တၢ်တလၢတပှဲၤဘၣ်. နီၣ်ဂံၢ်လၢ လံာ်စီဆှံပာ်ဖျါထီၣ်ဝဲန့ၣ် အါတက့ၢ်အိၣ်ဒီး အခီပညီ. နီၣ်ဂံၢ်နွံန့ၣ် အခီပညီမ့ၢ်ဝဲ တၢ်လၢတၢ်ပှဲၤ. နီၣ်ဂံၢ်ဃုန့ၣ် အနီၣ်ဂံၢ်စှၤန့ၢ်ဒံး နီၣ်ဂံၢ်နွံတဖျၢၣ်အဃိ အခီပညီမ့ၢ်ဝဲ ကစၢ်ယွၤထံၣ်ဝဲလၢ အတမ့ၢ်တၢ်လၢအလၢအပှဲၤဘၣ်. ဒီးနီၣ်ဂံၢ်ဃုန့ၣ် ဘၣ်ထွဲလိာ်သးဒီး ကစၢ်ယွၤအဒုၣ်အဒါ.—၁ ကွဲးနီၣ်တၢ် ၂၀:၆; ဒၤနံးယ့လး ၃:၁.
ဒ်သိးတၢ်ဂ့ၢ်တခါ ကဖျါလီၤတံၢ်အဂီၢ် ပှၤပာ်ဖျါထီၣ်အီၤ သၢဘျီ. တဘျီတခီၣ် ဒ်သိးလံာ်စီဆှံကပာ်ဖျါထီၣ် တၢ်ဂ့ၢ်တၢ်ကျိၤလီၤတံၢ်အဂီၢ် အပာ်ဖျါထီၣ်ဝဲ တၢ်ဂ့ၢ်တခါန့ၣ် သၢဘျီ. (လီၣ်ဖျါ ၄:၈; ၈:၁၃) ကစၢ်ယွၤကိးန့ၢ် ဟီၣ်ခိၣ်အပဒိၣ်တဖၣ်အမံၤလၢ ဃုသၢဖျၢၣ် (၆၆၆) န့ၣ်မ့ၢ်ဒ်သိး ကစၢ်ယွၤကပာ်ဖျါထီၣ်လီၤတံၢ်ဝဲလၢ အထံၣ်ဝဲလၢဟီၣ်ခိၣ်ပဒိၣ်တဖၣ် အတၢ်ပၢန့ၣ် တကဲထီၣ်လိၣ်ထီၣ် နီတစဲးဘၣ်. ဟီၣ်ခိၣ်ပဒိၣ်တဖၣ်န့ၣ် ဒုးအိၣ်ထီၣ်ဝဲ တၢ်မုာ်တၢ်ခုၣ် ဒီးတၢ်ဘံၣ်တၢ်ဘၢ နီၢ်ကီၢ်တန့ၢ်ဘၣ်. ထဲဒၣ်ကစၢ်ယွၤဘီမုၢ် တခါလီၤ ဒုးအိၣ်ထီၣ်ဝဲန့ၢ်.
ဆၣ်ဖိကီၢ်ဖိလၢအအၢတဒု အတၢ်ပနီၣ်
လံာ်စီဆှံတဲဝဲလၢ ပှၤအါဂၤန့ၣ်ပိာ်ဝဲ ဆၣ်ဖိကီၢ်ဖိလၢအအၢတဒုအံၤအခံ ဒီးဘူၣ်ထီၣ်ဘါထီၣ်ဝဲအဃိ အဝဲသ့ၣ်ဒိးန့ၢ်ဘၣ် “တၢ်ပနီၣ်လၢ အဘၣ်ဃးဒီး ဆၣ်ဖိကီၢ်ဖိလၢအအၢ” တဒုအံၤလီၤ. (လီၣ်ဖျါ ၁၃:၃, ၄; ၁၆:၂) အဝဲသ့ၣ်ဘူၣ်ထီၣ်ဘါထီၣ်ဝဲ ဆၣ်ဖိကီၢ်ဖိလၢအအၢတဒုအံၤ ခီဖျိလၢအဝဲသ့ၣ်မၤလၤကပီၤဝဲ အထံအကီၢ်, အထံကီၢ်တၢ်ပနီၣ် ဒီးအသုးမုၢ်သံၣ်ဘိတဖၣ်.
ဘၣ်မနုၤအဃိ လံာ်စီဆှံတဲဝဲလၢ ဆၣ်ဖိကီၢ်ဖိလၢအအၢတဒုအံၤ အတၢ်ပနီၣ်အိၣ်ဝဲလၢ ပှၤစုထွဲအလိၤ မ့တမ့ၢ်ပှၤမဲာ်တူၢ်ခိၣ် အလိၤလဲၣ်. (လီၣ်ဖျါ ၁၃:၁၆) အဒိ, ဘၣ်ဃးဒီးကစၢ်ယွၤ တၢ်သိၣ်တၢ်သီလၢ ပှၤအံၣ်စရ့လးဖိအဂီၢ်န့ၣ် ကစၢ်ယွၤတဲဝဲလၢ “စၢဃာ်အီၤလၢ သုစုလိၤ ဒ်တၢ်ဒုးသ့ၣ်နီၣ်ထီၣ်တၢ် တမံၤအသိးလီၤ. ဒီးတၢ်ကတိၤတဖၣ်အံၤကဘၣ်မ့ၢ် ဒ်ခိၣ်ကျီၤလၢ သုမဲာ်တူၢ်ခိၣ် အလိၤ.” (၅ မိၤၡ့ ၁၁:၁၈) ကစၢ်ယွၤတဲဝဲဒ်န့ၣ်န့ၣ် အခီပညီတမ့ၢ်လၢ ပှၤအံၣ်စရ့လးဖိတဖၣ် ကဘၣ်ပာ်ထီၣ် တၢ်သိၣ်တၢ်သီတဖၣ်လၢ အဝဲသ့ၣ်အစုလိၤ ဒီးအမဲာ်တူၢ်ခိၣ်လိၤ အနီၢ်ကီၢ်ဘၣ်. အခီပညီမ့ၢ်ဝဲ တၢ်လၢအဝဲသ့ၣ်မၤဝဲခဲလၢာ် ဒီးအတၢ်ဆိကမိၣ်န့ၣ် ကဘၣ်ဘၣ်လိာ်သးဒီး ကစၢ်ယွၤအတၢ်သိၣ်တၢ်သီ. ဒ်န့ၣ်အသိး ပှၤဒိးန့ၢ်ဘၣ် ဆၣ်ဖိကီၢ်ဖိလၢအအၢတဒု အတၢ်ပနီၣ်န့ၣ် အခီပညီတမ့ၢ်လၢ အဝဲသ့ၣ်ဆဲးလီၤဝဲ ဃုသၢဖျၢၣ် (၆၆၆) လၢအနီၢ်ကစၢ်အလိၤ အနီၢ်ကီၢ်ဘၣ်. ပှၤဒိးန့ၢ်ဘၣ် ဆၣ်ဖိကီၢ်ဖိလၢအအၢတဒု အတၢ်ပနီၣ်န့ၣ် အခီပညီမ့ၢ်ဝဲ အဝဲသ့ၣ်ဆီၣ်ထွဲ ထံဂ့ၢ်ကီၢ်ဂ့ၢ်. ပှၤလၢအဒိးန့ၢ်ဘၣ် ဆၣ်ဖိကီၢ်ဖိလၢအအၢတဒုအံၤ အတၢ်ပနီၣ်န့ၣ် အဝဲသ့ၣ်ကဲထီၣ် ကစၢ်ယွၤအဒုၣ်အဒါလီၤ.—လီၣ်ဖျါ ၁၄:၉, ၁၀; ၁၉:၁၉-၂၁.