လၢဟီၣ်ခိၣ်ဒီတဘ့ၣ်န့ၣ် ယဟိဝၤပှၤအုၣ်အသးတဖၣ် အိၣ်ဝဲထဲလဲၣ်
ယဟိဝၤပှၤအုၣ်အသးတဖၣ်အနီၣ်ဂံၢ်န့ၣ် ပှၤဂံၢ်အီၤဒ်လဲၣ်.
ထဲဒၣ်ယဟိဝၤပှၤအုၣ်အသးလၢ စံၣ်တဲၤတဲလီၤ ဘီမုၢ်တၢ်သးခုကစီၣ် ကိးလါဒဲးန့ၣ် ဘၣ်တၢ်ဂံၢ်အီၤဒ် ယဟိဝၤပှၤအုၣ်အသးအသိးလီၤ. (မးသဲ ၂၄:၁၄) ပှၤတဖၣ်အံၤန့ၣ် ပၣ်ဃုာ်ဒီးပှၤလၢအဒိးဘျၢထံဝံၤ ဒီးပှၤလၢ အတုၤထီၣ်ထီၣ်ဘးလၢ ကဟးစံၣ်တဲၤတဲလီၤတၢ် ဘၣ်ဆၣ်တဒိးဘျၢထံဒံးဘၣ်န့ၣ်လီၤ.
ဒ်သိးပှၤတဂၤ ကကဲထီၣ်တၢ်အိၣ်ဖှိၣ်ဖိအဂီၢ် မ့ၢ်အဝဲကဘၣ်ဟ့ၣ်ကျိၣ်စ့ဧါ.
တဘၣ်ဟ့ၣ်ဘၣ်. ပှၤတဂၤ ကကဲထီၣ်တၢ်အိၣ်ဖှိၣ်ဖိ မ့တမ့ၢ် ဒိးန့ၢ်ဘၣ် မူဒါလၢ ပတၢ်ကရၢကရိအပူၤန့ၣ် တဒိးသန့ၤထီၣ်အသးလၢ အဟ့ၣ်တၢ်မၤဘူၣ်အဖီခိၣ်ဘၣ်. (မၤတၢ် ၈:၁၈-၂၀) အါတက့ၢ် ပှၤလၢအဟ့ၣ်တၢ်မၤဘူၣ်တဖၣ်န့ၣ် တပာ်ဖျါထီၣ်ဝဲအမံၤဘၣ်. ယဟိဝၤပှၤအုၣ်အသးတဂၤစုာ်စုာ်န့ၣ် ဒ်အတိာ်ပာ်လၢ အသးကံၢ်ပူၤအသိး ဟ့ၣ်လီၤတၢ်ဆၢကတီၢ်, အဂံၢ်အဘါ ဒီးအတၢ်စုလီၢ်ခီၣ်ခိၣ် လၢဟီၣ်ခိၣ်ဒီဘ့ၣ် တၢ်စံၣ်တဲၤတဲလီၤတၢ်မၤအဂီၢ် တသ့ဖဲအသ့န့ၣ်လီၤ.—၂ ကရံၣ်သူး ၉:၇.
ပှၤစံၣ်တဲၤတဲလီၤတၢ် ကိးလါဒဲးအနီၣ်ဂံၢ် အိၣ်ထဲလဲၣ်န့ၣ် ပကသ့ၣ်ညါဒ်လဲၣ်
ကိးလါဒဲးန့ၣ် ယဟိဝၤပှၤအုၣ်အသးတဖၣ် တီၣ်ထီၣ် အတၢ်စံၣ်တဲၤတဲလီၤတၢ်မၤနီၣ်လံာ်က့ လၢအဝဲသ့ၣ်အတၢ်အိၣ်ဖှိၣ်အပူၤလၢ တၢ်သူၣ်အိၣ်သးအိၣ်အပူၤလီၤ.
တၢ်အိၣ်ဖှိၣ် အတၢ်ကွဲးနီၣ်ကွဲးဃါတဖၣ်န့ၣ် ဘၣ်တၢ်ပာ်ဖှိၣ်အီၤ ဒီးဘၣ်တၢ်ဆှၢအီၤဆူ ဝဲၤတြၢ်လီၤ. ဒီးဝဲၤတြၢ်ဆှၢက့ၤဝဲ တၢ်ဂ့ၢ်တၢ်ကျိၤတဖၣ်အံၤဆူ ဝဲၤလီၢ်ခိၣ်သ့ၣ်န့ၣ်လီၤ.
ဖဲတၢ်မၤအနံၣ်မ့ၢ်ကတၢၢ်အခါa ထံကီၢ်ကိးဘ့ၣ်ဒဲး ပာ်ဖျါထီၣ်ဝဲ ယဟိဝၤပှၤအုၣ်အသးတဖၣ် အနီၣ်ဂံၢ်လီၤ. ဝံၤဒီးယဟိဝၤပှၤအုၣ်အသးတဖၣ် အနီၣ်ဂံၢ်လၢ ထံကီၢ်ကိးဘ့ၣ်ဒဲးအပူၤဘၣ်တၢ် ပာ်ဖှိၣ်ထီၣ်အီၤ အဃိ ပသ့ၣ်ညါဘၣ် ယဟိဝၤပှၤအုၣ်အသးလၢ ဟီၣ်ခိၣ်ဒီဘ့ၣ်အနီၣ်ဂံၢ်န့ၣ်လီၤ. ထံကီၢ်ကိးဘ့ၣ်ဒဲး အတၢ်မၤနီၣ်မၤဃါတဖၣ်န့ၣ် ဘၣ်တၢ်တီၣ်ထီၣ်အီၤလၢ ပပှာ်ယဲၤသန့လၢ “Around the World” အသနၢၣ်အပူၤန့ၣ်လီၤ. တၢ်မၤနီၣ်မၤဃါတဖၣ်န့ၣ် ကဲထီၣ်တၢ်ဂံၢ်တၢ်ဘါလၢပဂီၢ်လီၤ.—မၤတၢ် ၂:၄၁; ၄:၄; ၁၅:၃.
မ့ၢ်သုဂံၢ်ဃုာ်ဒီး ပှၤလၢအဟဲထီၣ်တၢ်အိၣ်ဖှိၣ်ဘၣ်ဆၣ် တဟးစံၣ်တဲၤတဲလီၤတၢ်တဖၣ်စ့ၢ်ကီးဧါ
ပတဂံၢ်အဝဲသ့ၣ်လၢ ယဟိဝၤပှၤအုၣ်အသးတဖၣ် အတၢ်အိၣ်ဖှိၣ်ဖိအကျါဘၣ်. ဘၣ်ဆၣ်သနာ်က့ ပတူၢ်လိာ်မုာ်အဝဲသ့ၣ်လၢ ကဟဲထီၣ်ပတၢ်အိၣ်ဖှိၣ်ပူၤလီၤ. အါတက့ၢ်န့ၣ် အဝဲသ့ၣ်ဟဲထီၣ် တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူးပွဲန့ၣ်လီၤ. ပှၤသ့ၣ်တဖၣ်အံၤ ကဘၣ်တၢ်ဂံၢ်ဃုာ်အီၤလၢ ပှၤဟဲထီၣ်တၢ်အိၣ်ဖှိၣ် အကျါန့ၣ်လီၤ. တၢ်တဂံၢ်ဃုာ်အီၤလၢ ယဟိဝၤယွၤပှၤအုၣ်သးတဖၣ် အနီၣ်ဂံၢ်အကျါဘၣ်. ပှၤမၤတၢ်သ့ၣ်နီၣ်ထီၣ်က့ၤအမူး ဖဲ ၂၀၂၄ န့ၣ် ပှၤဟဲထီၣ်အိၣ်ဝဲ အဂၤ ၂၁,၁၁၉,၄၄၂ လီၤ.
ပှၤတနီၤ တထီၣ်ဝဲတၢ်အိၣ်ဖှိၣ်ဘၣ်, ဘၣ်ဆၣ်ဒိးန့ၢ်ဘၣ်တၢ်အဘျုးလၢ ပတၢ်မၤလိလံာ်စီဆှံ တၢ်ရဲၣ်တၢ်ကျဲၤလၢ အဘူးအလဲတအိၣ်ဘၣ်န့ၣ်လီၤ. ဖဲ ၂၀၂၄ အပူၤ, ကိးလါဒဲး ပမၤတၢ်မၤလိလံာ်စီဆှံဒီးပှၤဂၤန့ၣ် အိၣ်ဝဲအခါ ၇,၄၈၀,၁၄၆ ဃၣ်ဃၣ်လီၤ. ဒီးတၢ်မၤလိလံာ်စီဆှံတနီၤနီၤန့ၣ် ပှၤကမၤလိ အါန့ၢ်ဒံးတဂၤလီၤ.
ပဒိၣ်ပပှၢ်တဖၣ် ထၢဝဲယဟိဝၤပှၤအုၣ်အသးတဖၣ် အနီၣ်ဂံၢ်န့ၣ် ဘၣ်မနုၤအဃိ အိၣ်အါန့ၢ်ဒံး ယဟိဝၤပှၤအုၣ်အသးတဖၣ် အနီၣ်ဂံၢ်တၢ်ပာ်ဖျါန့ၣ်လဲၣ်
ပဒိၣ်ပပှၢ် အတၢ်ထၢထံဖိကီၢ်ဖိနီၣ်ဂံၢ်အဝဲၤကျိၤန့ၣ် ဒ်သိးကပာ်ဖျါဝဲထံဖိကီၢ်ဖိ တၢ်ဘူၣ်တၢ်ဘါအနီၣ်ဂံၢ်အဂီၢ် သံကွၢ်ဝဲ ပှၤထံဖိကီၢ်ဖိတဖၣ်လၢ အဝဲသ့ၣ်မ့ၢ် တၢ်ဘူၣ်တၢ်ဘါဖဲလဲၣ်တခါလဲၣ်န့ၣ်လီၤ. အဒိ- ကီၢ်အမဲရကၤ အတၢ်ထၢထံဖိကီၢ်ဖိနီၣ်ဂံၢ်ဝဲၤကျိၤ စံးဝဲလၢ အဝဲသ့ၣ် “ဃုသ့ၣ်ညါဝဲလၢ ပှၤတဂၤစုာ်စုာ် မ့ၢ်အဝဲသ့ၣ် ဆိကမိၣ်လီၤအသးလၢ အပၣ်ဃုာ်လၢ တၢ်ဘူၣ်တၢ်ဘါတၢ်ကရၢကရိ ဖဲလဲၣ်တဖုလဲၣ်.” ဒီးစံးကဒီးဝဲလၢ နီၣ်ဂံၢ်လၢ အဝဲသ့ၣ်ထၢဝဲန့ၣ် ‘‘ဒိးသန့ၤထီၣ်အသးလၢ ပှၤတဂၤစုာ်စုာ်အတၢ်ထံၣ်, တမ့ၢ်လၢတၢ်အုၣ်အသးနီၢ်နီၢ်အဖီခိၣ်ဘၣ်.” ထဲဒၣ်ပှၤလၢ အဟးစံၣ်တဲၤတဲလီၤတၢ်တဖၣ်န့ၣ် ဘၣ်တၢ်ဂံၢ်အီၤလၢ ယဟိဝၤပှၤအုၣ်အသးလီၤ. တမ့ၢ်ပှၤလၢ အပာ်ပနီၣ်လီၤအသးလၢ အမ့ၢ်ယဟိဝၤပှၤအုၣ်အသးတဖၣ်ဘၣ်.
a တၢ်မၤအနံၣ်န့ၣ် စးထီၣ်အသးလၢ လါစဲးပတ့ဘၢၣ် ၁ သီ တုၤလၢ လၢခံတနံၣ် လါအီကူး ၃၁ သီန့ၣ်လီၤ. အဒိ- ၂၀၁၅ တၢ်မၤအနံၣ် ဘၣ်တၢ်စးထီၣ်အီၤဖဲ ၂၀၁၄ လါစဲးပတ့ဘၢၣ် ၁ သီဒီး တုၤလၢ ၂၀၁၅ လါအီကူး ၃၁ သီန့ၣ်လီၤ.