ယကဲထီၣ် ယဟိဝၤပှၤအုၣ်အသးတဂၤ ကသ့ဒ်လဲၣ်
ဒ်သိးကကဲထီၣ် ယဟိဝၤပှၤအုၣ်အသးတဂၤအဂီၢ် ပှၤကဘၣ်ခါထီၣ်ခီၣ်ခါတဖၣ်လၢ ယ့ၣ်ၡူးတဲပှၤဖဲ မးသဲ ၂၈:၁၉, ၂၀ န့ၣ်လီၤ. လံာ်စီဆှံတဆၢအံၤ ပာ်ဖျါထီၣ်ဝဲ ပှၤလၢအအဲၣ်ဒိးကဲထီၣ် ယ့ၣ်ၡူးအပျဲၢ်အဘီၣ်န့ၣ် ကဘၣ်စံၣ်တဲၤတဲလီၤတၢ် မ့တမ့ၢ် ကဘၣ်အုၣ်အသးလၢ ယဟိဝယွၤအဂ့ၢ်လီၤ.
ခီၣ်ခါ ၁– မၤလိ လံာ်စီဆှံအတၢ်သိၣ်လိနဲၣ်လိတက့ၢ်. ယ့ၣ်ၡူးနဲၣ်လိ အပျဲၢ်အဘီၣ်တဖၣ်လၢ ‘‘လဲၤဒုးကဲထီၣ်. . . ယပျဲၢ်ယဘီၣ်တက့ၢ်. . . ဒီးသိၣ်လိသီလိအီၤ” တက့ၢ်လီၤ. (မးသဲ ၂၈:၁၉, ၂၀) တၢ်ကတိၤလၢအမ့ၢ် ‘‘ယပျဲၢ်ယဘီၣ်” န့ၣ်အဲၣ်ဒိးစံးစ့ၢ်ကီးဝဲလၢ ‘‘ပှၤမၤလိတၢ်ဖိ” လီၤ. လံာ်စီဆှံဒီဘ့ၣ် လီၤဆီဒၣ်တၢ် ယ့ၣ်ၡူးအတၢ်သိၣ်လိနဲၣ်လိတၢ်တဖၣ် ကမၤစၢၤနၤ ဒ်သိးနတၢ်အိၣ်မူ ကအိၣ်ဒီး တၢ်သူၣ်ဖှံသးညီအဂီၢ်န့ၣ်လီၤ. (၂ တံၤမသ့း ၃:၁၆, ၁၇) ပသးအိၣ်မၤစၢၤနၤလၢ နကမၤလိလံာ်စီဆှံလီၤ. ဒီးပတၢ်မၤလိလံာ်စီဆှံ တၢ်ရဲၣ်တၢ်ကျဲၤန့ၣ် အဘူးအလဲတအိၣ်ဘၣ်.—မးသဲ ၁၀:၇, ၈; ၁ သ့းစၤလနံ ၂:၁၃.
ခီၣ်ခါ ၂– တၢ်လၢနမၤလိဘၣ်အီၤတဖၣ်န့ၣ် နကဘၣ်မၤပိာ်ထွဲ. ယ့ၣ်ၡူးစံးဝဲ ပှၤလၢအမၤလိတၢ်တဖၣ် ကဘၣ် ‘တိၢ်န့ၢ် ကယဲၢ်တၢ်လၢအမၤလိာ်တ့ၢ်ခဲလၢာ်’ လီၤ. (မးသဲ ၂၈:၂၀) ယ့ၣ်ၡူးအတၢ်ကတိၤအံၤ အဲၣ်ဒိးစံးဝဲလၢ နတၢ်မၤလိလံာ်စီဆှံန့ၣ် တဘၣ်မ့ၢ်နဃုသ့ၣ်ညါအါထီၣ် တၢ်ဂ့ၢ်တၢ်ကျိၤဘၣ်, နကဘၣ်ဆီတလဲကွံာ် နတၢ်ပာ်သူၣ်ပာ်သးဒီးတၢ်အိၣ်မူလီၤ. (မၤတၢ် ၁၀:၄၂; အ့းဖ့းစူး ၄:၂၂-၂၉; ဧ့ၤဘြံၤ ၁၀:၂၄, ၂၅) အဃိ ပှၤလၢတိၢ်န့ၢ်ဖံးဃာ် ယ့ၣ်ၡူးအတၢ်မၤလိတဖၣ်န့ၣ် ကအဲၣ်ဒိး ဟ့ၣ်လုၢ်ထီၣ်အသးဆူ ယဟိဝၤယွၤအအိၣ်လီၤ.—မးသဲ ၁၆:၂၄.
ခီၣ်ခါ ၃– ဒိးဘျၢထံ. (မးသဲ ၂၈:၁၉) လၢလံာ်စီဆှံအပူၤ တၢ်ဒိးဘျၢထံန့ၣ် ဘၣ်တၢ်ထိၣ်သတြီၤအီၤဒ် ပှၤခူၣ်လီၤကွံာ်ပှၤသံအသိးန့ၣ်လီၤ. (ထိၣ်သတြီၤဒီး ရိမ့ၤ ၆:၂-၄.) တၢ်ဒိးဘျၢထံန့ၣ် မ့ၢ်တၢ်ပနီၣ်တခါလၢ ပာ်ဖျါထီၣ်ဝဲ အတၢ်အိၣ်မူအလီၢ်လံၤသံကွံာ်ဝဲ ဒီးအတၢ်အိၣ်မူ စးထီၣ်က့ၤလၢအသီန့ၣ်လီၤ. ဖဲနဒိးဘျၢထံအခါန့ၣ် မ့ၢ်ဒၣ်နပာ်ဖျါထီၣ်လၢ ပှၤအါဂၤအမဲာ်ညါလၢ နတုၤထီၣ်ထီၣ်ဘး ခီၣ်ခါအဆိကတၢၢ် ၂ ခါ ဒီးနဃ့ကညးကစၢ်ယွၤလၢ ကဟ့ၣ်နၤသးလၢအသ့ၣ်ညါဒၣ်တၢ် လၢအကဆှီန့ၣ်လီၤ.—ဧ့ၤဘြံၤ ၉:၁၄; ၁ ပ့းတရူး ၃:၂၁.
မ့ၢ်ယတုၤထီၣ်ထီၣ်ဘးလၢ ယကဒိးဘျၢထံအဂီၢ်လံဧါ
တဲသကိးတၢ်ဒီး တၢ်အိၣ်ဖှိၣ်သးပှၢ်တဖၣ်တက့ၢ်. အဝဲသ့ၣ်ကအဲၣ်ဒိးသ့ၣ်ညါလၢ မ့ၢ်နနၢ်ပၢၢ်တၢ်ဒိးဘျၢထံအဂ့ၢ်လံဧါ, မ့ၢ်နအိၣ်မူမၤထွဲ တၢ်လၢနမၤလိဘၣ်တဖၣ်ဧါ ဒီးမ့ၢ်နဟ့ၣ်လုၢ်ထီၣ်သးဆူ ယွၤအအိၣ်လၢ နတၢ်ထုကဖၣ်အပူၤလံဧါန့ၣ်လီၤ.—မၤတၢ် ၂၀:၂၈; ၁ ပ့းတရူး ၅:၁-၃.
ခီၣ်ခါတဖၣ်အံၤန့ၣ် ဘၣ်ထွဲလိာ်သးဒီး ယဟိဝၤပှၤအုၣ်အသး အဖိတဖၣ် စ့ၢ်ကီးဧါ
ဘၣ်ထွဲဝဲလီၤ. ဒ်လံာ်စီဆှံမၤလိာ်ပှၤအသိး ပကဘၣ်လုၢ်ဒိၣ်ထီၣ် ပဖိတဖၣ်လၢယဟိဝၤယွၤ “အတၢ်သိၣ်တၢ်သီ, ဒီးအတၢ်သိၣ်ဃီၣ်သီဃီၣ်အပူၤ” လီၤ. (အ့းဖ့းစူး ၆:၄) ဒ်လဲၣ်ဂ့ၤဒ်လဲၣ်ဂ့ၤ ဖဲအဝဲသ့ၣ်ဒိၣ်ထီၣ်အခါ ကဘၣ်ဆၢတဲာ်ဝဲလၢ အနီၢ်ကစၢ်ဒၣ်ဝဲလီၤ. ဒ်သိးအဝဲသ့ၣ် ကတုၤထီၣ်ထီၣ်ဘးလၢ ကဒိးဘျၢထံအဂီၢ် ကဘၣ်တူၢ်လိာ်ဒီး မၤပိာ်ထွဲဝဲ လံာ်စီဆှံအတၢ်နဲၣ်လိတဖၣ်လီၤ. (ရိမ့ၤ ၁၂:၂) လၢခံကတၢၢ် ပဝဲကိးဂၤဒဲး ပကဘူၣ်ထီၣ်ဘါထီၣ်မတၤလဲၣ်န့ၣ် ပကဘၣ်ဃုထၢလၢ ပနီၢ်ကစၢ်ဒၣ်ဝဲလီၤ.—ရိမ့ၤ ၁၄:၁၂; ကလၤတံ ၆:၅.