မ့ၢ်ကစၢ်ယွၤ အိၣ်လၢ တၢ်လီၢ်ကိးပူၤဒဲးဧါ
လံာ်စီဆှံ တဲဝဲလၢ
ကစၢ်ယွၤန့ၣ်ထံၣ်တၢ်ခဲလၢာ် ဒီးအမၤတၢ်သ့လၢ တၢ်လီၢ်ကိးပူၤဒဲး. (ကတိၤဒိ ၁၅:၃; ဧ့ၤဘြံၤ ၄:၁၃) ဘၣ်ဆၣ် လံာ်စီဆှံ တသိၣ်လိပှၤလၢ ကစၢ်ယွၤအိၣ်လၢ တၢ်လီၢ်ကိးပူၤဒဲး ဒီးတၢ်ကိးမံၤဒဲး အကျါဘၣ်. လၢတၢ်န့ၣ်အလီၢ် လံာ်စီဆှံ ပာ်ဖျါထီၣ်ဝဲလၢ အဝဲမ့ၢ်ပှၤတဂၤ ဒီးအဝဲအိၣ်ဝဲလၢ တၢ်လီၢ်တတီၤလီၤ.
ကစၢ်ယွၤ အက့ၢ်အဂီၤ- ကစၢ်ယွၤန့ၣ် မ့ၢ်ပှၤနီၢ်သးတဂၤ. (ယိၤဟၣ် ၄:၂၄) ဒီးပှၤဟီၣ်ခိၣ်ဖိထံၣ်အီၤတသ့ဘၣ်. (ယိၤဟၣ် ၁:၁၈) တၢ်ထံၣ်လၢညါခီ လၢလံာ်စီဆှံပူၤန့ၣ် ညီနုၢ်ပာ်ဖျါထီၣ်ဝဲလၢ ကစၢ်ယွၤအိၣ်လၢ တၢ်လီၢ်လီၤလီၤဆီဆီ တတီၤလီၤ. ကစၢ်ယွၤအိၣ်လၢ တၢ်လီၢ်ကိးပူၤဒဲးန့ၣ် လံာ်စီဆှံ တပာ်ဖျါထီၣ်ဝဲ နီတဘျီဘၣ်.—ယၡါယၤ ၆:၁, ၂; လီၣ်ဖျါ ၄:၂, ၃, ၈.
ကစၢ်ယွၤ အတၢ်အိၣ်တၢ်ဆိးအလီၢ်- လံာ်စီဆှံ တဲဝဲလၢ ကစၢ်ယွၤ ‘အအိၣ်အဆိးအလီၢ်’ အိၣ်လၢ “မူခိၣ်” အဃိ ကစၢ်ယွၤအိၣ်ဝဲလၢ တၢ်လီၢ်လၢ ပှၤနီၢ်သးဖိ အိၣ်ဝဲအလီၢ်လီၤ. (၁ စီၤပၤ ၈:၃၀) တဘျီတခီၣ် လံာ်စီဆှံ ပာ်ဖျါထီၣ်ဝဲလၢ ပှၤနီၢ်သးဖိတဖၣ် “ဟဲပာ်အသးလၢယွၤအမဲာ်ညါ” လီၤ. အဃိ ပသ့ၣ်ညါသ့လၢ ကစၢ်ယွၤန့ၣ် အိၣ်လၢတၢ်လီၢ် လီၤလီၤဆီဆီ တတီၤလီၤ.—ယိၤဘး ၁:၆.
ကစၢ်ယွၤမ့ၢ်တအိၣ်လၢ တၢ်လီၢ်ကိးပူၤဒဲးဘၣ်န့ၣ် မ့ၢ်အကွၢ်ထွဲ ပဝဲတဂၤစုာ်စုာ် ကသ့ဧါ
ကစၢ်ယွၤန့ၣ် ကွၢ်ထွဲ ပဝဲတဂၤစုာ်စုာ် ဂ့ၤဂ့ၤလီၤ. ကစၢ်ယွၤ အိၣ်လၢမူခိၣ်သနာ်က့ အပာ်သူၣ်ပာ်သး ဒီးမၤစၢၤဝဲ ပှၤဟီၣ်ခိၣ်ဖိလၢ အအဲၣ်ဒိးမၤ အတၢ်ဘၣ်သးလီၤ. (၁ စီၤပၤ ၈:၃၉; ၂ ကွဲးနီၣ်တၢ် ၁၆:၉) ပကကွၢ်သကိး ယဟိဝၤယွၤ ပာ်ဖျါထီၣ် တၢ်သူၣ်အိၣ်သးအိၣ်လၢ ပှၤသးဘျၢလၢ အဘူၣ်ထီၣ်ဘါထီၣ်အီၤတဖၣ် အဖီခိၣ်လီၤ.
ဖဲနဃ့ဘါထုကဖၣ်တၢ်အခါ- ဖဲနဃ့ဘါထုကဖၣ်တၢ်အခါ ယဟိဝၤယွၤ နၢ်ဟူနၤ တဘျီဃီ.—၂ ကွဲးနီၣ်တၢ် ၁၈:၃၁.
ဖဲနသူၣ်ဟးဂီၤသးဟးဂီၤအခါ- “ယွၤအိၣ်ဘူးဒီး ပှၤလၢအသူၣ်ကၢ်အသးလီၤ, ဒီးပှၤလၢအပီၢ်ယၢ်လီၤက့ၤအသးန့ၣ် အုၣ်က့ၤခီၣ်က့ၤဝဲလီၤ.”—စံးထီၣ်ပတြၢၤ ၃၄:၁၈.
ဖဲနလိၣ်ဘၣ် တၢ်ဟံးစုနဲၣ်ကျဲအခါ- ယဟိဝၤယွၤ “ကသိၣ်က့ၤသီက့ၤနၤ, ဒီးဒုးနဲၣ်နၤ” ကျဲခီဖျိ အကလုၢ်ကထါ လံာ်စီဆှံလီၤ.—စံးထီၣ်ပတြၢၤ ၃၂:၈.
တၢ်နၢ်ပၢၢ်ကမၣ် ဘၣ်ဃးဒီး ကစၢ်ယွၤအိၣ်လၢ တၢ်လီၢ်ကိးပူၤဒဲး
တၢ်နၢ်ပၢၢ်ကမၣ်- ကစၢ်ယွၤအိၣ်လၢ အတၢ်ဘၣ်တ့အကျါ လၢတၢ်လီၢ်ကိးပူၤဒဲး.
တၢ်မ့ၢ်တၢ်တီ- ကစၢ်ယွၤန့ၣ် တအိၣ်လၢဟီၣ်ခိၣ် မ့တမ့ၢ် အတၢ်ဘၣ်တ့လၢ ပှၤထံၣ်အီၤသ့တဖၣ် အကျါဘၣ်. (၁ စီၤပၤ ၈:၂၇) ကစၢ်ယွၤအတၢ်ဘၣ်တ့ ဒ်သိးဒီး ဆၣ်တဖၣ် ဒီးတၢ်ဘၣ်တ့အဂၤတဖၣ်န့ၣ် “လီၣ်ဖျါထီၣ် ယွၤအလၤကပီၤ” လီၤ. (စံးထီၣ်ပတြၢၤ ၁၉:၁) ဒ်သိးဒီး ပှၤဆွဲတၢ်ဂီၤဖိတဂၤန့ၣ် တအိၣ်လၢ အတၢ်ဂီၤပူၤဘၣ်အသိး ကစၢ်ယွၤစ့ၢ်ကီး တအိၣ်လၢ အတၢ်ဘၣ်တ့တဖၣ် အကျါဘၣ်. တၢ်ဂီၤန့ၣ် ပာ်ဖျါထီၣ်ဝဲ ပှၤဆွဲတၢ်ဂီၤဖိတဂၤ အဂ့ၢ်အကျိၤတဖၣ်လီၤ. ဒ်န့ၣ်အသိး တၢ်ဘၣ်တ့လၢ ပထံၣ်အီၤသ့တဖၣ်န့ၣ် ပာ်ဖျါထီၣ်ဝဲ တၢ်ဘၣ်တ့ကစၢ် “အတၢ်ဂ့ၤတၢ်ဝါလၢ ပထံၣ်အီၤ တသ့ဘၣ်တဖၣ်” ဒ်သိးဒီး အတၢ်စိတၢ်ကမီၤ, အတၢ်ကူၣ်ဘၣ်ကူၣ်သ့ ဒီးအတၢ်အဲၣ်တၢ်ကွံလီၤ.—ရိမ့ၤ ၁:၂၀.
တၢ်နၢ်ပၢၢ်ကမၣ်- ကစၢ်ယွၤ သ့ၣ်ညါတၢ်ခဲလၢာ် ဒီးမၤတၢ်သ့ခဲလၢာ်အဃိ အကဘၣ်အိၣ်လၢ တၢ်လီၢ်ကိးပူၤဒဲးလီၤ.
တၢ်မ့ၢ်တၢ်တီ- ကစၢ်ယွၤ အသးစီဆှံန့ၣ် မ့ၢ်ဝဲ အတၢ်စိတၢ်ကမီၤ လၢကမၤတၢ်အဂီၢ်လီၤ. ကစၢ်ယွၤ မ့ၢ်တအိၣ်လၢ တၢ်လီၢ်ကိးပူၤဒဲးဘၣ် ဒၣ်လဲာ် ခီဖျိလၢ အသးစီဆှံအဃိ အဝဲသ့ၣ်ညါတၢ် ဒီးမၤတၢ်သ့ခဲလၢာ် လၢတၢ်ဆၢကတီၢ် ကိးဆၢကတီၢ်ဒဲး ဒီးလၢတၢ်လီၢ်ကိးပူၤဒဲးလီၤ.—စံးထီၣ်ပတြၢၤ ၁၃၉:၇.
တၢ်နၢ်ပၢၢ်ကမၣ်- စံးထီၣ်ပတြၢၤ ၁၃၉:၈ တဲဝဲလၢ “ယမ့ၢ်လဲၤထီၣ်ဘးလၢမူခိၣ်ဒီး, နအိၣ်ဖဲန့ၣ်လီၤ. ယမ့ၢ်ဒါလီၤ ယလီၢ်မံလၢပျုၤပူၤဒီး ကွၢ်ကွၢ်, နအိၣ်ဖဲန့ၣ်လီၤ.” အဃိ ပှၤဆိမိၣ်ကမၣ်ဝဲလၢ လံာ်စီဆှံတဆၢအံၤ သိၣ်လိဝဲလၢ ကစၢ်ယွၤအိၣ်လၢ တၢ်လီၢ်ကိးပူၤဒဲးလီၤ.
တၢ်မ့ၢ်တၢ်တီ- လံာ်စီဆှံတဆၢအံၤ တအဲၣ်ဒိးတဲဝဲ ကစၢ်ယွၤ အတၢ်အိၣ်တၢ်ဆိးအလီၢ်ဘၣ်. လံာ်စီဆှံတဆၢအံၤ ဘၣ်တၢ်ကွဲးအီၤဒ် ထါအသိးလီၤ. တၢ်လီၢ်လၢအအိၣ်ယံၤဒီး ကစၢ်ယွၤ ဒိၣ်တလၢ တုၤဒၣ်လဲာ် ကစၢ်ယွၤမၤစၢၤပှၤ တတုၤန့ၣ် တအိၣ်ဘၣ်.