ကစၢ်ယွၤအတၢ်မၤလိာ် အဘီတဆံန့ၣ် မ့ၢ်မနုၤလဲၣ်
လံာ်စီဆှံတဲဝဲဒ်လဲၣ်
တၢ်မၤလိာ်အဘီတဆံန့ၣ် ကစၢ်ယွၤဟ့ၣ်လီၤဝဲ ပှၤအံၣ်စရ့လးဖိလၢပျၢၤတဖၣ်. ဧ့ၤဘြံၤ အတၢ်ကတိၤလၢအမ့ၢ် အဲးစဲ(လ်)ရဲး ဟဲးဒံဘၢၤရဲ န့ၣ်ပှၤကွဲးကျိာ်ထံက့ၤအီၤလၢ တၢ်မၤလိာ်အဘီတဆံ. တၢ်ကတိၤတဖျၢၣ်အံၤ ပထံၣ်ဘၣ်အီၤလၢ လံာ်စီဆှံအဆိကတၢၢ် ယဲၢ်ကတြူၢ် (ထိရၤ) အပူၤန့ၣ်သၢဘျီ. (၂ မိၤၡ့ ၃၄:၂၈; ၅ မိၤၡ့ ၄:၁၃; ၁၀:၄) လၢကြံးကျိာ်န့ၣ် တၢ်ကတိၤတဖျၢၣ်အံၤ မ့ၢ်ဝဲ ဒဲကး (တဆံ), လီကဲး (တၢ်ကတိၤအဖျၢၣ်တဖၣ်) ဒီးတၢ်ကတိၤတဖျၢၣ်အံၤ ဟဲလီၤစၢၤလၢ တၢ်ကတိၤလၢအမ့ၢ် “ဒဲကလီၣ်.”
ကစၢ်ယွၤ ကွဲးလီၤဝဲ တၢ်မၤလိာ်အဘီတဆံအံၤလၢ လၢၢ်ဘ့ၣ်ဘၣ်ခံဘ့ၣ်အလိၤ. ဝံၤဒီး အဝဲဟ့ၣ်လီၤဝဲ အဝံစီၤမိၤၡ့လၢ လၢၢ်ဘ့ၣ်ဘၣ်ခံဘ့ၣ်အံၤ ဖဲကစၢၢ်စံၤနါအလိၤ. (၂ မိၤၡ့ ၂၄:၁၂-၁၈) တၢ်မၤလိာ်အဘီတဆံအံၤန့ၣ် ပထံၣ်ဘၣ်အီၤဖဲ ၂ မိၤၡ့ ၂၀:၁-၁၇ ဒီး ၅ မိၤၡ့ ၅:၆-၂၁ အပူၤ.
တၢ်မၤလိာ်အဘီတဆံန့ၣ် ဘၣ်မနုၤအဃိ ပှၤရဲၣ်လီၤဝဲ လီၤဆီလိာ်အသးလဲၣ်
လံာ်တၢ်အၢၣ်လီၤအီလီၤအသီအပူၤန့ၣ် အိၣ်ဒီး တၢ်ဟံးစုနဲၣ်ကျဲလၢ အလီၤဂာ်လိာ်သးဒီး တၢ်မၤလိာ်အဘီတဆံ
တၢ်မၤလိာ်အဘီတဆံန့ၣ် မ့ၢ်ဝဲ
၁. ဘူၣ်ထီၣ်ဘါထီၣ်ထဲ ယဟိဝၤယွၤတဂၤ.—၂ မိၤၡ့ ၂၀:၃.
၂. ဘါထီၣ်တၢ်ဂီၤတၢ်ဖှီၣ်တဂ့ၤ.—၂ မိၤၡ့ ၂၀:၄-၆.
၃. တဘၣ်သူကစၢ်ယွၤအမံၤလၢ တၢ်တပာ်ကဲဘၣ်အပူၤတဂ့ၤ.—၂ မိၤၡ့ ၂၀:၇.
၄. မၤထွဲမုၢ်အိၣ်ဘှံးနံၤ အတၢ်သိၣ်တၢ်သီ.—၂ မိၤၡ့ ၂၀:၈-၁၁.
၅. ယူးယီၣ်ပာ်ကဲ နမိၢ်ဒီးနပၢ်တက့ၢ်.—၂ မိၤၡ့ ၂၀:၂၁.
၆. တဘၣ်မၤသံပှၤနီတဂၤတဂ့ၤ.—၂ မိၤၡ့ ၂၀:၁၃.
၇. တဘၣ်အဲၣ်ဘၢမါအဲၣ်ဘၢဝၤတဂ့ၤ.—၂ မိၤၡ့ ၂၀:၁၄.
၈. တဘၣ်ဟုၣ်တၢ်တဂ့ၤ.—၂ မိၤၡ့ ၂၀:၁၅.
၉. တဘၣ်အုၣ်နသး ကဘျံးကဘျၣ် ဘၣ်ဃးဒီး ပှၤအဂၤတဂ့ၤ.—၂ မိၤၡ့ ၂၀:၁၆.
၁၀. တဘၣ်လီကီ ပှၤတၢ်တဂ့ၤ.—၂ မိၤၡ့ ၂၀:၁၇.
တၢ်မၤလိာ်အဘီတဆံန့ၣ် ဘၣ်မနုၤအဃိ ပှၤရဲၣ်လီၤဝဲ လီၤဆီလိာ်အသးလဲၣ်
လံာ်စီဆှံပာ်ဖျါထီၣ်ဝဲ တၢ်မၤလိာ်အဘီတဆံ ဘၣ်ဆၣ် တရဲၣ်လီၤဝဲအနီၣ်ဂံၢ်ဘၣ်. အဃိ ပှၤရဲၣ်လီၤဝဲ တၢ်မၤလိာ်အဘီတဆံန့ၣ် လီၤဆီလိာ်အသး. တၢ်မၤလိာ်အဘီတဆံလၢ ပပာ်ဖျါထီၣ်အီၤလၢ တၢ်ဖီခိၣ်န့ၣ် ပှၤအါတက့ၢ် ရဲၣ်လီၤဝဲဒ်န့ၣ်. ဘၣ်ဆၣ် ပှၤရဲၣ်လီၤတၢ်မၤလိာ်အဘီတဆံလၢအဂၤန့ၣ် လီၤဆီဝဲ. အဒိ, တၢ်မၤလိာ်အဆိကတၢၢ်တထံၣ်, ခံထံၣ်တထံၣ် ဒီးအလီၢ်ခံကတၢၢ်တထံၣ်န့ၣ် ပှၤရဲၣ်လီၤဝဲ လီၤဆီလိာ်အသး.a
တၢ်မၤလိာ်အဘီတဆံ အတၢ်တိာ်ပာ်န့ၣ် မ့ၢ်မနုၤလဲၣ်
စီၤမိၤၡ့အတၢ်သိၣ်တၢ်သီန့ၣ် အိၣ်ဝဲအထံၣ် ဃုကယၤဘျဲၣ် ဒီးလၢအကျါန့ၣ် ပၣ်ဃုာ်ဒီး တၢ်မၤလိာ်အဘီတဆံ. ဒီးကစၢ်ယွၤ ဒုးအိၣ်ထီၣ်ဝဲ တၢ်သိၣ်တၢ်သီတဖၣ်အံၤန့ၣ် မ့ၢ်လၢ ကစၢ်ယွၤ ဒီးပှၤအံၣ်စရ့လးဖိလၢညါတဖၣ် အသးလီၤပလိာ်လိာ်အသးအဃိ. ဒီးတၢ်သိၣ်တၢ်သီတဖၣ်အံၤန့ၣ် ပၣ်ဃုာ်ဒီး တၢ်မၤလိာ်လၢအဘၣ်ဃးဒီး တၢ်အၢၣ်လီၤအီလီၤ. (၂ မိၤၡ့ ၃၄:၂၇) ကစၢ်ယွၤအၢၣ်လီၤ ပှၤအံၣ်စရ့လးဖိတဖၣ်လၢ အဝဲသ့ၣ် မ့ၢ်ဒိကနၣ် စီၤမိၤၡ့အတၢ်သိၣ်တၢ်သီန့ၣ် အဝဲသ့ၣ် ကအိၣ်ဘၣ်မုာ်မုာ်ခုၣ်ခုၣ်. (၅ မိၤၡ့ ၂၈:၁-၁၄) ဘၣ်ဆၣ် စီၤမိၤၡ့အတၢ်သိၣ်တၢ်သီ အတၢ်တိာ်ပာ်ခိၣ်သ့ၣ်န့ၣ် မ့ၢ်ဝဲ အကဆှၢအဝဲသ့ၣ်လၢ မ့းၡံအၤ မ့တမ့ၢ် ခရံာ်လၢအကဟဲအိၣ်ဖျါထီၣ်အအိၣ်.—ကလၤတံ ၃:၂၄.
ခရံာ်ဖိတဖၣ် လိၣ်မၤထွဲ တၢ်မၤလိာ်အဘီတဆံဒံးဧါ
တလိၣ်လၢၤဘၣ်. ကစၢ်ယွၤဟ့ၣ်လီၤ စီၤမိၤၡ့အတၢ်သိၣ်တၢ်သီ ဃုာ်ဒီး တၢ်မၤလိာ်အဘီတဆံန့ၣ် မ့ၢ်ဝဲဒၣ်လၢ ပှၤအံၣ်စရ့လးဖိလၢညါတဖၣ် အဂီၢ်လီၤ. (၅ မိၤၡ့ ၅:၂, ၃; စံးထီၣ်ပတြၢၤ ၁၄၇:၁၉, ၂၀) စီၤမိၤၡ့ အတၢ်သိၣ်တၢ်သီန့ၣ် တဘၣ်ဃးဒီး ခရံာ်ဖိဘၣ်. ဒီးပှၤယူဒၤဖိလၢ အကဲထီၣ် ခရံာ်ဖိတဖၣ်စ့ၢ်ကီး အဝဲသ့ၣ် “ထူၣ်ဖျဲးထီၣ်လၢ စီၤမိၤၡ့ အတၢ်သိၣ်တၢ်သီ.” (ရိမ့ၤ ၇:၆)b ကစၢ်ယွၤ ပာ်လီၤက့ၤဝဲ ခရံာ်အတၢ်သိၣ်တၢ်သီလၢ စီၤမိၤၡ့ အတၢ်သိၣ်တၢ်သီအလီၢ်. “ခရံာ်အတၢ်သိၣ်တၢ်သီ” န့ၣ် ပၣ်ဃုာ်ဒီး တၢ်လၢ ယ့ၣ်ၡူးမၢအပျဲၢ်အဘီၣ်တဖၣ် မၤဝဲခဲလၢာ်.—ကလၤတံ ၆:၂; မးသဲ ၂၈:၁၉, ၂၀.
တၢ်မၤလိာ်အဘီတဆံန့ၣ် ကဲဘျုးလၢ မုၢ်မဆါတနံၤအံၤဒံးဧါ
ကဲဘျုးဒံး. တၢ်မၤလိာ်အဘီတဆံန့ၣ် ဒုးသ့ၣ်ညါပှၤလၢ ကစၢ်ယွၤ အတၢ်ဆိကမိၣ်. အဃိ ပမ့ၢ်မၤလိ အဂ့ၢ်န့ၣ် ကကဲဘျုးလၢပဂီၢ်. (၂ တံၤမသ့း ၃:၁၆, ၁၇) တၢ်မၤလိာ်အဘီတဆံန့ၣ် ဒိးသန့ၤထီၣ်အသးလၢ လံာ်စီဆှံ အတၢ်ဟံးစုနဲၣ်ကျဲလၢ အကဲဘျုးဝဲထီဘိ. (စံးထီၣ်ပတြၢၤ ၁၁၁:၇, ၈) တၢ်သိၣ်လိလၢ အအိၣ်လၢ လံာ်တၢ်အၢၣ်လီၤအီလီၤအသီအပူၤန့ၣ် အါတက့ၢ် ဒိးသန့ၤထီၣ်အသးလၢ တၢ်ဟံးစုနဲၣ်ကျဲတဖၣ်အံၤ အဖီခိၣ်.—ကွၢ် “လံာ်တၢ်အၢၣ်လီၤအီလီၤ အသီအပူၤန့ၣ် အိၣ်ဒီး တၢ်ဟံးစုနဲၣ်ကျဲလၢ အလီၤဂာ်လိာ်သးဒီး တၢ်မၤလိာ်အဘီတဆံ.”
ယ့ၣ်ၡူးသိၣ်လိဝဲလၢ စီၤမိၤၡ့ အတၢ်သိၣ်တၢ်သီခဲလၢာ် ပၣ်ဃုာ်ဒီး တၢ်မၤလိာ်အဘီတဆံန့ၣ် ဒိးသန့ၤထီၣ်အသးလၢ တၢ်မၤလိာ်အခိၣ်သ့ၣ်ခံထံၣ်အံၤ. ယ့ၣ်ၡူးတဲဝဲလၢ “‘နကဘၣ်အဲၣ် နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ ဒီးလၢနတၢ်ကူၣ်တၢ်ဆး ခဲလၢာ်လီၤ.’ အဝဲအံၤမ့ၢ်ဝဲ တၢ်မၤလိာ် အဒိၣ်ကတၢၢ် ဒီးအဆိကတၢၢ် တထံၣ်လီၤ. ခံထံၣ်တထံၣ်န့ၣ် လီၤဂာ်ဒီးအီၤ ဒီးမ့ၢ်ဝဲ ‘နကဘၣ်အဲၣ် ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး အသိးလီၤ.’ စီၤမိၤၡ့ အတၢ်သိၣ်တၢ်သီခဲလၢာ် . . . န့ၣ် ဒိးသန့ၤထီၣ်အသးလၢ တၢ်မၤလိာ်ခံထံၣ်အံၤ အဖီခိၣ်လီၤ.” (မးသဲ ၂၂:၃၄-၄၀) ခရံာ်ဖိတဖၣ် တလိၣ်မၤထွဲ စီၤမိၤၡ့ အတၢ်သိၣ်တၢ်သီသနာ်က့ အဝဲသ့ၣ် ကဘၣ်မၤထွဲ ခရံာ်အတၢ်သိၣ်တၢ်သီလၢအမ့ၢ် အဲၣ်ကစၢ်ယွၤ ဒီးပှၤလၢအဃၢၤတဖၣ်.—ယိၤဟၣ် ၁၃:၃၄; ၁ ယိၤဟၣ် ၄:၂၀, ၂၁.
လံာ်တၢ်အၢၣ်လီၤအီၤလီၤအသီအပူၤန့ၣ် အိၣ်ဒီး တၢ်ဟံးစုနဲၣ်ကျဲလၢ အလီၤဂာ်လိာ်သးဒီး တၢ်မၤလိာ်အဘီတဆံ
လံာ်စီဆှံအတၢ်ဟံးစုနဲၣ်ကျဲ |
လံာ်တၢ်အၢၣ်လီၤအီလီၤအသီ |
|---|---|
ဘူၣ်ထီၣ်ဘါထီၣ်ထဲ ယဟိဝၤယွၤတဂၤ |
|
ဘါထီၣ်တၢ်ဂီၤတၢ်ဖှီၣ်တဂ့ၤ |
|
ပာ်ကဲကစၢ်ယွၤအမံၤ |
|
ဘူၣ်ထီၣ်ဘါထီၣ် ကစၢ်ယွၤထီဘိ |
|
ယူးယီၣ်ပာ်ကဲ နမိၢ်နပၢ် |
|
မၤသံပှၤနီတဂၤတဂ့ၤ |
|
အဲၣ်ဘၢမါအဲၣ်ဘၢဝၤတဂ့ၤ |
|
ဟုၣ်တၢ်တဂ့ၤ |
|
တဘၣ်အုၣ်နသး ကဘျံးကဘျၣ် ဘၣ်ဃးဒီးပှၤဂၤတဂ့ၤ |
|
တဘၣ်လီကီပှၤတၢ်တဂ့ၤ |
a ပှၤယူဒၤဖိ အလံာ်အဲၣ်စဲကလိၣ်ဖံဒံယါ (Encyclopedia) တဘ့ၣ်ပာ်ဖျါထီၣ်ဝဲလၢ လၢပှၤယူဒၤဖိ အလုၢ်အလၢ်န့ၣ် အဝဲသ့ၣ် ပာ်ပနီၣ်ဝဲ ၂ မိၤၡ့ ၂၀:၂ လၢတၢ်မၤလိာ်အဆိကတၢၢ်တထံၣ်, မ့မ့ၢ် အဆၢဖိ ၃-၆ န့ၣ် အဝဲသ့ၣ် ပာ်ပနီၣ်ဝဲလၢ တၢ်မၤလိာ်ခံထံၣ်တထံၣ်. ဘၣ်ဆၣ် ပှၤခဲးသလ့းဖိတဖၣ်န့ၣ် ပာ်ပနီၣ်ဝဲလၢ ၂ မိၤၡ့ ၂၀:၁-၆ န့ၣ်အကဲဝဲ တၢ်မၤလိာ်တထံၣ်လီၤ. အဃိ တၢ်သူကစၢ်ယွၤအမံၤလၢ တၢ်တပာ်ကဲဘၣ်အပူၤန့ၣ် အဝဲသ့ၣ် ပာ်ပနီၣ်ဝဲလၢ တၢ်မၤလိာ်ခံထံၣ်တထံၣ်. ဒီးဒ်သိး တၢ်မၤလိာ်အဘီတဆံ ကပှဲၤထီၣ်အဂီၢ် တၢ်မၤလိာ်အလီၢ်ခံကတၢၢ်တထံၣ်န့ၣ် အဝဲသ့ၣ် နီၤဖးဝဲခံထံၣ်. အဃိ တၢ်လီကီပှၤဂၤအမါ ဒီးတၢ်လီကီပှၤဂၤ အတၢ်ဖိတၢ်လံၤန့ၣ် အဝဲသ့ၣ် ဒုးကဲထီၣ်က့ၤဝဲလၢ တၢ်မၤလိာ်ခံထံၣ်.