ပှၤသးစၢ်တဖၣ်အတၢ်သံကွၢ်
ယတြီဆၢကွံာ် တၢ်လ့ပစီ ကသ့ဒ်လဲၣ်
စီၤပီလူး ကွဲးဝဲလၢ “ဖဲယအဲၣ်ဒိးမၤ တၢ်လၢအဘၣ်အခါ တၢ်အၢအိၣ်ဒီးယၤလီၤ.” (ရိမ့ၤ ၇:၂၁) နၤမီၤ နတူၢ်ဘၣ်ဒ် စီၤပီးလူးအသိး တဘျီဘျီဧါ. နမ့ၢ်တူၢ်ဘၣ်ဒ်န့ၣ်န့ၣ် တၢ်မၤလိအံၤ ကမၤစၢၤနၤ ဒ်သိး နတြီဆၢ တၢ်လ့ပဆီကန့ၢ်.
တၢ်လၢနကြၢးသ့ၣ်ညါ
ပှၤဆီၣ်သနံးနၤ မ့ၢ်အါန့ၣ် နမၤကမၣ်ဘၣ်တၢ် ညီညီဖိသ့. ဒီးလံာ်စီဆှံတဲဝဲလၢ “တၢ်ရ့လိာ်လၢ အတဂ့ၤဘၣ်တဖၣ်န့ၣ် မၤဟးဂီၤဝဲ လုၢ်လၢ်လၢအဂ့ၤတဖၣ်.” (၁ ကရံၣ်သူး ၁၅:၃၃) ပှၤဂၤအတၢ်ဆီၣ်သနံး ဒီးတၢ်ဆီၣ်သနံးလၢ စိၤၡၢၤမံဒံယါ အပူၤန့ၣ် ဒုးအိၣ်ထီၣ် တၢ်မိၣ်န့ၢ်သးလီလၢ အတဂ့ၤဘၣ်သ့. ဒီးဘၣ်သ့ၣ်သ့ၣ် ကဆီၣ်သနံးနၤလၢ နက “မၤပိာ် ပှၤဂီၢ်မုၢ်အခံ လၢတၢ်မၤလၢ အအၢအသီ.”—၂ မိၤ ၂၃:၂.
“ခီဖျိလၢ နအဲၣ်ဒိးလၢ ပှၤဂၤ ကဘၣ်သူၣ်ဘၣ်သးနၤအဃိ ဖဲအဝဲသ့ၣ် ဆီၣ်သနံးနၤလၢ ကမၤတၢ်တမံၤမံၤအခါန့ၣ် ညီဝဲလၢ နကမၤဒ်အဝဲသ့ၣ် တဲဝဲအသိး.”—ကၠဲရဲမံၤ.
တၢ်လၢနကဘၣ် ဆိကမိၣ်ထံ– နမ့ၢ်ဘၣ်ယိၣ်ဘၣ်ဃးဒီး ပှၤဂၤကထံၣ်နၤဒ်လဲၣ် အါတလၢန့ၣ် ကကီလၢ နကတြီဆၢ တၢ်လ့ပဆီ.—ကတိၤဒိ ၂၉:၂၅.
တၢ်ဂ့ၢ်လၢအရ့ဒိၣ်– တဘၣ်ပျဲနသကိး အတၢ်ဆီၣ်သနံး မၤဟးဂီၤ နသကဲာ်ပဝး လၢအဂ့ၤန့ၣ်တဂ့ၤ.
တၢ်လၢနမၤသ့
မၤဂၢၢ်ကျၢၤထီၣ်နတၢ်နာ်. နမ့ၢ်တနၢ်ပၢၢ် တၢ်လၢနနာ်အီၤဘၣ်န့ၣ် ပှၤကွဲန့ၢ်လွဲန့ၢ်နၤ ကန့ၢ်ဝဲညီညီဖိ. အဃိ နမ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲ တခါအံၤန့ၣ် ကကဲဘျုးဝဲဒိၣ်မး. လံာ်စီဆှံ တဲဝဲလၢ “တၢ်တမံၤဂ့ၤ တမံၤဂ့ၤ မ့ၢ်အဘၣ်ဧါ တဘၣ်ဧါန့ၣ် ဃုသ့ၣ်ညါအီၤ လီၤတံၢ်လီၤဆဲးတက့ၢ်. ဒီးဟံးဃာ်တၢ်လၢ အဂ့ၤတက့ၢ်.” (၁ သ့းစၤလနံ ၅:၂၁) နမ့ၢ်နၢ်ပၢၢ် တၢ်လၢ နနာ်အီၤတဖၣ်ဂ့ၤဂ့ၤန့ၣ် နတသးဒ့ဒီ ညီညီဖိဘၣ် ဒီးအကမၤစၢၤနၤဒ်သိး နတြီဆၢ တၢ်လ့ပစီ ကန့ၢ်အါထီၣ်အဂီၢ်
တၢ်လၢ ပကဘၣ်ဆိကမိၣ်ထံအီၤ– ဘၣ်မနုၤအဃိ နနာ်လၢ ကစၢ်ယွၤ အတၢ်သိၣ်တၢ်သီန့ၣ် အကဲဘျုးလၢနဂီၢ်လဲၣ်.
“ဖဲယမၤထွဲ ဒ်တၢ်လၢ ယနာ်အီၤ ဒီးယတဟ့ၣ်ၡူဘၣ် တဘျီလၢ်လၢ်န့ၣ် ယထံၣ်ဘၣ်လၢ ပှၤပာ်ကဲယၤအါထီၣ်.”—ခ့ဘၢၤလံး.
ပှၤဒိတဲာ်လၢ လံာ်စီဆှံပူၤ– စီၤဒၤနံးယ့လး. ဖဲစီၤဒၤနံးယ့လး အသးစၢ်အခါအ “ဆၢတဲာ်လီၤအသး ဂၢၢ်ဂၢၢ်ကျၢၤကျၢၤလၢ” အကဒိကနၣ် ကစၢ်ယွၤ တၢ်သိၣ်တၢ်သီ.—ဒၤနံးယ့လး ၁:၈.
နမ့ၢ်တအိၣ်ဒီး နနီၢ်ကစၢ် အတၢ်နာ်ဂၢၢ်ဂၢၢ်ကျၢၤကျၢၤဘၣ်န့ၣ် နကလီၤဂာ်ဒ်သိးဒီး တၢ်ဂီၤဖိလၢ ပှၤမၤဟူးမၤဝးအီၤ ဒ်ပှၤအဲၣ်ဒိးဝဲအသိး
သ့ၣ်ညါလီၤ နတၢ်ဂံၢ်စၢ်ဘါစၢ်. လံာ်စီဆှံ တဲဝဲလၢ ဖဲနသးစၢ်အခါ “ပှၤသးစၢ် အတၢ်သူၣ်လီသးကွံ” န့ၣ် အသဟီၣ်ဆူၣ်ဒိၣ်မး. (၂ တံၤမသ့း ၂:၂၂) ပှၤသးစၢ် အတၢ်သူၣ်လီသးကွံန့ၣ် တမ့ၢ်ထဲ တၢ်သးကွံလၢ တၢ်မံဃုာ်တကပၤဘၣ် အပၣ်ဃုာ်စ့ၢ်ကီးဒီး နဘၣ်သးလၢ နသကိးတဖၣ် ကတူၢ်လိာ်နၤ ဒီးနအဲၣ်ဒိးဆၢထၢၣ်လၢ နကစၢ်ခီၣ် တချုးလၢ နမၤအီၤသ့ဒံးဘၣ်အခါ.
တၢ်လၢ နကဘၣ်ဆိကမိၣ်ထံအီၤ– လံာ်စီဆှံတဲဝဲလၢ “ပှၤတဂၤစုာ်စုာ်န့ၣ် ဘၣ်တၢ်မၤကွၢ်အီၤ ခီဖျိလၢ အနီၢ်ကစၢ် အတၢ်သူၣ်လီသးကွံ ကွဲန့ၢ်လွဲန့ၢ်အီၤ ဒီးလ့ပစီအီၤအဃိလီၤ. (ယၤကိာ် ၁:၁၄) နတၢ်သူၣ်လီသးကွံလၢ အကဲထီၣ် တၢ်လ့ပစီလၢ နဂီၢ်အဒိၣ်ကတၢၢ်န့ၣ် မ့ၢ်မနုၤလဲၣ်
“သမံသမိးလီၤနသး တီတီလိၤလိၤ ဘၣ်ဃးဒီး တၢ်လၢအကဲထီၣ် တၢ်လ့ပစီလၢ နတြီဆၢအီၤ အကီကတၢၢ်န့ၣ် မ့ၢ်မနုၤလဲၣ်. ဝံၤဒီး ဃုသ့ၣ်ညါဘၣ်ဃးဒီး နတြီဆၢအီၤ ကသ့ဒ်လဲၣ်. ဝံၤဒီးကွဲးလီၤ တၢ်လၢနမၤထွဲအီၤ ကသ့တဖၣ် နမ့မၤဒ်န့ၣ်န့ၣ် လၢခံဖဲနထံၣ်ဘၣ်ဒီး တၢ်မၤကွၢ်အခါ နကဘၣ် တြီဆၢအီၤဒ်လဲၣ်န့ၣ် နကသ့ၣ်ညါ.”—စဲဘံယၤ.
ပှၤဒိတဲာ်လၢ လံာ်စီဆှံအပူၤ– စီၤဒၤဝံး. တဘျီတခီၣ် စီၤဒၤဝံး တြီဆၢကွံာ် တၢ်လ့ပစီလၢ ပှၤဂၤအအိၣ် ဒီးအနီၢ်ကစၢ် အတၢ်သူၣ်လီသးကွံ တန့ၢ်ဘၣ်. သနာ်က့ အဝဲဟံးန့ၢ် တၢ်မၤလိလၢ အတၢ်ကမၣ် ဒီးဂုာ်ကျဲးစၢး မၤဂ့ၤထီၣ်အသး အဝဲဃ့ ယဟိဝၤယွၤလၢ “ဟ့ၣ်ယၤ သးလၢအကဆှီ ဒီးဟ့ၣ်ယၤ တၢ်ပာ်သူၣ်ပာ်သးလၢအသီ ဒီးလၢအဂၢၢ်ကျၢၤတက့ၢ်.”—စံးထီၣ်ပတြၢၤ ၅၁:၁၀.
အိၣ်ဒီးတၢ်ကီၤသူၣ်ကီၤသး. လံာ်စီဆှံတဲဝဲလၢ “တဘၣ်ပျဲတၢ်အၢ မၤနၢၤနၤတဂ့ၤ.” (ရိမ့ၤ ၁၂:၂၁) အဃိ အအဲၣ်ဒိးတဲဝဲ တဘၣ်ဟ့ၣ်ၡူ တၢ်လ့ပစီတဂ့ၤ. နဃုထၢလၢ နကမၤတၢ်လၢအဘၣ်သ့.
ဖဲနထံၣ်ဘၣ်ဒီး တၢ်လ့ပစီလၢ နကမၤကမၣ်တၢ်အဂီၢ်အခါ နမ့ၢ်အိၣ်ဒီး တၢ်ကီၤသူၣ်ကီၤသးန့ၣ် အကကဲဘျုး လၢနဂီၢ်ဒ်လဲၣ်.
“ယဆိကမိၣ်လၢ ဖဲယထံၣ်ဘၣ်ဒီး တၢ်လ့ပစီအခါ ယမ့ၢ်ဟ့ၣ်ၡူန့ၣ် ဘၣ်သ့ၣ်သ့ၣ် ယကသးခု တစိၢ်တလီၢ် သနာ်က့ တမ့ၢ်လၢ ယကသးခုထီဘိဘၣ်. ယတၢ်အိၣ်သး ကနးထီၣ် အဃိ အတကြၢးဒီး တၢ်လၢ ယကဘၣ် ဟ့ၣ်ၡူအီၤန့ၣ်ဘၣ်.”—စိၤဖံၤယၤ.
ပှၤဒိပှၤတဲာ်လၢ လံာ်စီဆှံပူၤ– စီၤပီလူး. စီၤပီလူးန့ၣ် အအၢၣ်လီၤတူၢ်လိာ်ဝဲလၢ အအိၣ်ဒီး တၢ်မိၣ်န့ၢ်သးလီလၢတဂ့ၤ ဘၣ်ဆၣ် အဝဲအိၣ်ဒီး တၢ်ကီၤသူၣ်ကီၤသး. အဝဲတဲဝဲလၢ “ယဒိလီၤတီၢ်လီၤ ယနီၢ်ခိ ဒီးဒုးကဲထီၣ်အီၤ လၢကုၢ်လီၤ.”—၁ ကရံၣ်သူး ၉:၂၇.
တၢ်ဂ့ၢ်လၢအရ့ဒိၣ်– နကမၤဆၢက့ၤ တၢ်လ့ပစီ ဒ်လဲၣ်န့ၣ် အိၣ်လၢနစုပူၤလီၤ.
သ့ၣ်နီၣ်ထီၣ်လၢ တၢ်လ့ပစီတဖၣ်န့ၣ် အကဲဝဲ တစိၢ်တလီၢ်လီၤ. မလံစၤ လၢအသးနံၣ်အိၣ် ၂၀ န့ၣ် အတဲဝဲလၢ “တၢ်လ့ပစီလၢ ပထံၣ်ဘၣ်အီၤဖဲ ယထီၣ်ကၠိအခါန့ၣ် လၢအပူၤကွံာ်န့ၣ် အကဲဝဲ တၢ်ကီတၢ်ခဲဖးဒိၣ် လၢယဂီၢ်. သနာ်က့ မ့ၢ်ဆိမိၣ်ခဲအံၤန့ၣ် အတကဲ တၢ်နီတမံၤလၢၤဘၣ်. အဃိ ယသ့ၣ်ညါဘၣ်လၢ တၢ်လ့ပစီလၢ ယထံၣ်ဘၣ်အီၤ ခဲအံၤတဖၣ်န့ၣ် အကလဲၤပူၤကွံာ်ဒီး ဖဲယက့ၤဆိကမိၣ်ထံက့ၤအီၤအခါ ယကတူၢ်ဘၣ်လၢ ကိၢ်ညၢ်လၢ ယတြီဆၢတ့ၢ် တၢ်လ့ပစီတဖၣ်အံၤမီၤ.”