ဘၣ်ဃးဒီးတၢ်မၤလီၤတဲာ်ဖိန့ၣ် လံာ်စီဆှံတဲဝဲဒ်လဲၣ်

လံာ်စီဆှံတဲဝဲဒ်လဲၣ်

ဘၣ်ဃးဒီး “တၢ်မၤလီၤတဲာ်ဖိ” န့ၣ်လံာ်စီဆှံတပာ်ဖျါထီၣ်ဝဲ တၢ်သိၣ်တၢ်သီလီၤတံၢ်လီၤဆဲးဘၣ်. ဘၣ်ဆၣ်လံာ်စီဆှံပာ်ဖျါထီၣ်ဝဲလၢ ကစၢ်ယွၤပာ်လုၢ်ပာ်ပှ့ၤ ပှၤကညီအသးသမူ ဃုာ်ဒီးဖိသၣ်လၢ အတအိၣ်ဖျဲၣ်ထီၣ်ဒံးဘၣ်တဖၣ်.

သးသမူန့ၣ်မ့ၢ်တၢ်ဟ့ၣ်လၢ အဟဲလၢကစၢ်ယွၤအိၣ်. (၁ မိၤၡ့ ၉:၆, စံးထီၣ်ပတြၢၤ ၃၆:၉) ကစၢ်ယွၤထံၣ်ဝဲလၢ ပှၤသးသမူခဲလၢာ် ဃုာ်ဒီးဖိသၣ်လၢ အအိၣ်လၢအမိၢ်ဟၢဖၢပူၤ အသးသမူန့ၣ် မ့ၢ်တၢ်လုၢ်ဒိၣ်ပှ့ၤဒိၣ်. အဃိ ပှၤမ့ၢ်မၤသံဖိသၣ်လၢ အတအိၣ်ဖျဲၣ်ထီၣ်ဒံးဘၣ်န့ၣ် လီၤဂာ်ဒ်သိးဒီး အမၤသံပှၤကညီလီၤ.

တၢ်သိၣ်တၢ်သီလၢ ကစၢ်ယွၤဟ့ၣ်လီၤပှၤအံၣ်စရ့လးဖိန့ၣ် တဲဝဲလၢ “ပိာ်ခွါ မ့ၢ်ထိလိာ်အသး တဂၤဒီးတဂၤ ဒီးအမ့ၢ်မၤဘၣ်ဒိ ပိာ်မုၣ်လၢအဒၢတဂၤ ဒီးပိာ်မုၣ်တဂၤအံၤ မ့ၢ်အိၣ်ဖျဲၣ်ထီၣ်အဖိ တချုးလၢ အလါဘၣ်ဒံးဘၣ် ဒီးမိၢ်မ့ၢ်ဂ့ၤ ဖိမ့ၢ်ဂ့ၤ မ့ၢ်တဘၣ်ဒိ ဒိၣ်ဒိၣ်မုၢ်မုၢ်ဘၣ်န့ၣ် ပှၤလၢ အမၤဘၣ်ဒိတၢ်တဂၤ ကဘၣ်လိးဝဲ တၢ်လၢ ပိာ်မုၣ်အဝၤဃ့အီၤ, ဒ်စံၣ်ညီၣ်ကွီၢ်တဖၣ် ဆၢတဲာ်ဝဲအသိးလီၤ. ဘၣ်ဆၣ် အဝဲသ့ၣ် မ့ၢ်သံတဂၤဂၤန့ၣ် နကဘၣ် ဟ့ၣ်လီၤကွံာ် သးသမူလၢ သးသမူအဂီၢ်.”—၂ မိၤၡ့ ၂၁:၂၂, ၂၃.a

• ပှၤတဂၤအသးသမူ စးထီၣ်အိၣ်ထီၣ်လၢ အခါဖဲလဲၣ်.

• ပှၤလၢအမၤလီၤတဲာ်အဖိန့ၣ် မ့ၢ်ကစၢ်ယွၤကပျၢ်ကွံာ် အတၢ်ကမၣ်ဒံးဧါ.

• တၢ်လီၤဘၣ်ယိၣ် မ့ၢ်အိၣ်ထီၣ်လၢ ဖိသၣ် မ့တမ့ၢ် အမိၢ် သးသမူအဂီၢ်န့ၣ် မိၢ်တဂၤမၤလီၤတဲာ်အဖိန့ၢ်ဧါ.

ပှၤတဂၤအသးသမူ စးထီၣ်အိၣ်ထီၣ်လၢ အခါဖဲလဲၣ်.

ကစၢ်ယွၤထံၣ်ဝဲလၢ ပှၤကညီအသးသမူန့ၣ် စးထီၣ်အသးလၢ အမိၢ်ဒၢထီၣ်အီၤ သီသီအခါလံ. ကစၢ်ယွၤကလုၢ်ကထါ လံာ်စီဆှံပာ်ဖျါထီၣ်ဝဲလၢ ဖဲမိၢ်တဂၤဒၢထီၣ်အဖိအခါ ဖိသၣ်မ့ၢ်တအိၣ်ဖျဲၣ်ထီၣ်ဒံးဘၣ် သနာ်က့ ကစၢ်ယွၤထံၣ်ဝဲလၢ အမ့ၢ်ပှၤကညီတဂၤလံ. ပကကွၢ်သကိး တၢ်အဒိတနီၤလၢ အပာ်ဖျါထီၣ်ဝဲ ကစၢ်ယွၤထံၣ်ဖိသၣ်လၢ အအိၣ်လၢအမိၢ်ဟၢဖၢပူၤတဂၤ ဒ်သိးဒီး ဖိသၣ်လၢအအိၣ်ဖျဲၣ်ထီၣ်ဝံၤ တဂၤအသိး.

• သးစီဆှံထိၣ်ဟူးထိၣ်ဂဲၤထီၣ် စီၤပၤဒၤဝံးအသးလၢ အကတဲကစၢ်ယွၤလၢ “ဖဲယမ့ၢ်ဒံး ဖိသၣ်ကိၣ်လိၣ်အခါ နမဲာ်ထံၣ်တ့ၢ်ယၤလီၤ.” (စံးထီၣ်ပတြၢၤ ၁၃၉:၁၆) အဃိဖဲစီၤဒၤဝံးတအိၣ်ဖျဲၣ်ထီၣ် ဒံးဘၣ်အခါ ကစၢ်ယွၤထံၣ်အီၤလၢ အမ့ၢ်ပှၤကညီတဂၤလံ.

• တကးဒံးဘၣ် တချုးလၢ ဝံယံးရမံယၤ အိၣ်ဖျဲၣ်ထီၣ်ဒံးဘၣ်န့ၣ် ကစၢ်ယွၤအိၣ်ဒီး အတၢ်တိာ်ပာ် လီၤလီၤဆီဆီလၢ ဝံယံးရမံယၤအဂီၢ်. ကစၢ်ယွၤတဲ ဝံယံးရမံယၤလၢ “တချုးလၢ ယတ့နၤလၢ နမိဒၢလီၢ်ဒံးဘၣ်န့ၣ် ယသ့ၣ်ညါ ပာ်စၢၤနၤလံ. ဒီးတချုးလၢ နအိၣ်ဖျဲၣ်ထီၣ်ဒံးဘၣ်န့ၣ် ယပာ်စီဆှံ ပာ်စၢၤနၤလံ. ဒီးယဒုးကဲထီၣ်နၤလၢ ပှၤကလုာ်တဖၣ် အဝံလီၤ.”—ယံးရမံယၤ ၁:၅.

• ကသံၣ်သရၣ် စီၤလူၤကၣ် လၢအကွဲးလံာ်စီဆှံန့ၣ် ဖဲအဝဲတဲဖျါထီၣ် ဖိသၣ်လၢ အတအိၣ်ဖျဲၣ်ထီၣ်ဒံးဘၣ် ဒီးဖိသၣ်လၢ အအိၣ်ဖျဲၣ်ထီၣ်ဝံၤအခါ အဝဲသူကြံးအတၢ်ကတိၤ တဖျၢၣ်ဃီလီၤ.—လူၤကၣ် ၁:၄၁; ၂:၁၂, ၁၆.

ပှၤလၢအမၤလီၤတဲာ်အဖိန့ၣ် မ့ၢ်ကစၢ်ယွၤကပျၢ်ကွံာ် အတၢ်ကမၣ်ဒံးဧါ.

ပှၤလၢမၤလီၤတဲာ်ဘၣ်အဖိ လၢညါတဖၣ်န့ၣ် ခဲအံၤအဝဲသ့ၣ် မ့ၢ်တူၢ်လိာ်ဝဲ ကစၢ်ယွၤအတၢ်ထံၣ် ဘၣ်ဃးဒီးသးသမူန့ၣ် ကစၢ်ယွၤပျၢ်ကွံာ် အဝဲသ့ၣ်တၢ်ကမၣ်လံ. အဃိအဝဲသ့ၣ် တလိၣ်ဆိမိၣ်ဝဲလၢ အအိၣ်ဒီး တၢ်ကမၣ်ဒံးလၢၤဘၣ်. မ့ၢ်လၢ “ယဟိဝၤယွၤန့ၣ် အသးကညီၤတၢ်, အသးဂ့ၤ . . . ကစၢ်ယွၤ ပာ်ယံၤကွံာ် ပတၢ်ကမၣ်ဒီးပှၤဒ်မုၢ်ထီၣ် ယံၤဝဲဒီး မုၢ်နုာ်အသိးလီၤ.”b (စံးထီၣ်ပတြၢၤ ၁၀၃:၈-၁၂) ပှၤလၢအမၤဘၣ်တၢ်ကမၣ် လၢအပူၤကွံာ် ဃုာ်ဒီးပှၤလၢ အမၤလီၤတဲာ်ဘၣ်အဖိန့ၣ် အဝဲသ့ၣ် မ့ၢ်ပီၢ်ယၢ်လီၤသး နီၢ်ကီၢ်န့ၣ် ယဟိဝၤယွၤ ကပျၢ်ကွံာ် အဝဲသ့ၣ်တၢ်ကမၣ်.—စံးထီၣ်ပတြၢၤ ၈၆:၅.

တၢ်လီၤဘၣ်ယိၣ် မ့ၢ်အိၣ်ထီၣ်လၢ ဖိသၣ် မ့တမ့ၢ် အမိၢ် သးသမူအဂီၢ်န့ၣ် မိၢ်တဂၤမၤလီၤတဲာ်အဖိန့ၢ်ဧါ.

လံာ်စီဆှံတဲဝဲလၢ ဖိသၣ်လၢ တအိၣ်ဖျဲၣ်ထီၣ်ဒံးဘၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ကစၢ်ယွၤအဂီၢ်. အဃိ တၢ်လီၤဘၣ်ယိၣ် မ့ၢ်အိၣ်ထီၣ် လၢဖိသၣ် မ့တမ့ၢ် အမိၢ် အသးသမူအဂီၢ် သနာ်က့ ပှၤတကြၢး မၤလီၤတဲာ်ပှၤဖိဘၣ်.

ဖဲပှၤကအိၣ်ဖျဲၣ်ထီၣ်ဖိအခါ တၢ်ဘၣ်ယိၣ် မ့ၢ်အိၣ်ထီၣ်လၢ မိၢ်ဒီးဖိအဂီၢ် ခံဂၤလၢာ်န့ၣ် ပှၤဒီမိၢ်ဝၤခံဂၤ ကမၤဝဲတၢ်ဆၢတဲာ်ဒ်လဲၣ်. တၢ်အိၣ်သးမ့ၢ်အိၣ်ထီၣ်ဒ်အံၤန့ၣ် ပှၤကဃုထၢ မိၢ်အသးသမူဧါ ဖိအသးသမူဧါန့ၣ် ပှၤတဂၤစုာ်စုာ် ကဘၣ်ဆၢတဲာ်ဝဲ လၢအနီၢ်ကစၢ်လီၤ.