လံာ်စီဆှံအဆၢ အခီပညီ
ကတိၤဒိ ၁၇:၁၇—“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး”
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤအိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.”—ကတိၤဒိ ၁၇:၁၇, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤအိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.”—ကတိၤဒိ ၁၇:၁၇, မ့ၤစံၣ်.
ကတိၤဒိ ၁၇:၁၇ အခီပညီ
တံၤသကိးတံၢ်နီၢ်န့ၣ် ပနာ်န့ၢ်အီၤသ့. အဝဲသ့ၣ် လီၤဂာ်ဒ်သိးဒီး ပဒီပုၢ်ဝဲၢ်တံၢ်နီၢ် လၢအသူၣ်အိၣ်သးအိၣ်ပှၤ ဒီးတီဒီးပှၤ လီၤဆီဒၣ်တၢ် ဖဲပထံၣ်ဘၣ်ဒီး တၢ်ကီတၢ်ခဲ အဆၢကတီၢ်.
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး.” တၢ်ကတိၤအံၤ အခီပညီအိၣ်စ့ၢ်ကီးလၢ “တံၤသကိးန့ၣ် ပာ်ဖျါထီၣ်တၢ်အဲၣ်ထီဘိ.” ဧ့ၤဘြံၤအတၢ်ကတိၤ လၢအမ့ၢ် “တၢ်အဲၣ်” န့ၣ်အတမ့ၢ်ထဲ တၢ်တူၢ်ဘၣ်တခါဘၣ်. အခီပညီအိၣ်စ့ၢ်ကီးလၢ ပမ့ၢ်အဲၣ်ပှၤတဂၤန့ၣ် ပကတူၢ်ဆါသး လၢအဂီၢ် ဒီးပာ်ဖျါထီၣ်လၢပအဲၣ်အီၤ. (၁ ကရံၣ်သူး ၁၃:၄-၇) တံၤသကိးလၢအအိၣ်ဒီး တၢ်အဲၣ်ဒ်န့ၣ်န့ၣ် ဖဲအဝဲသ့ၣ် နၢ်ပၢၢ်ကမၣ်လိာ်သး မ့တမ့ၢ် ထံၣ်ဘၣ်ဒီးတၢ်ကီတၢ်ခဲအခါ ကကဲထီၣ် တၢ်မၤကွၢ်လၢ အဝဲသ့ၣ် အဘၢၣ်စၢၤနာ်က့ အဝဲသ့ၣ် ဆဲးတီလိာ်သးဒံး. ဒီးအဝဲသ့ၣ် သးအိၣ်ပျၢ်လိာ်သးတၢ်ကမၣ်. (ကတိၤဒိ ၁၀:၁၂) ဒီးအဝဲတဂၤ မ့ၢ်ဒိးန့ၢ်ဘၣ် တၢ်လၢအဂ့ၤ တမံၤမံၤန့ၣ် အဝဲတဂၤ တသူၣ်က့ၣ်သးက့ၣ်အီၤဘၣ် ဒီးသးခုစၢၤအီၤ.—ရိမ့ၤ ၁၂:၁၅.
“တံၤသကိးတံၢ်နီၢ်န့ၣ် . . . ဖဲတၢ်ကိၢ်တၢ်ဂီၤ အိၣ်ဝဲအခါ အကဲထီၣ်ဝဲ နဒီပုၢ်ဝဲၢ်.” လံာ်ကတိၤဒိ အဲၣ်ဒိးတဲဝဲလၢ တံၤသကိးတံၢ်နီၢ်န့ၣ် အကဲထီၣ်ဒ် ပဒီပုၢ်ဝဲၢ်အသိးသ့. တၢ်လၢဒီပုၢ်ဝဲၢ်တံၢ်နီၢ်န့ၣ် မၤစၢၤလိာ်သး ဖဲတၢ်ကီတၢ်ခဲ အိၣ်ထီၣ်ဝဲအခါ. ဒ်န့ၣ်အသိး ဖဲပသကိးတဂၤ ထံၣ်ဘၣ်ဒီး တၢ်ကီတၢ်ခဲအခါ ပမ့ၢ်မၤစၢၤအီၤလၢ အဂ့ၤကတၢၢ်န့ၣ် ပကကဲထီၣ် အဒီပုၢ်ဝဲၢ်နီၢ်ကီၢ်. ဒီးတံၤသကိး တံၢ်နီၢ်လၢ အလီၤဂာ်ဒ်သိးဒီး ဒီပုၢ်ဝဲၢ်န့ၣ် ဖဲအဝဲသ့ၣ် ထံၣ်ဘၣ်ဒီး တၢ်ကီတၢ်ခဲအခါ အဝဲသ့ၣ် ပာ်ဖျါထီၣ် တၢ်အဲၣ် ဒီးတၢ်ပာ်ကဲလိာ်သးအဃိ အဝဲသ့ၣ် အတၢ်ရ့လိာ်သး တဟးဂီၤဘၣ်, လၢတၢ်န့ၣ်အလီၢ် အဝဲသ့ၣ် အတၢ်ရ့လိာ်သး ဂၢၢ်ကျၢၤထီၣ်ဝဲ.
ကတိၤဒိ ၁၇:၁၇ အတၢ်ဂ့ၢ်လၢ အမဲာ်ညါ ဒီးအလီၢ်ခံ
လၢလံာ်ကတိၤဒိအပူၤန့ၣ် တၢ်ဟ့ၣ်ကူၣ်လၢအဂ့ၤ အိၣ်ဝဲအါမး. တၢ်ဟ့ၣ်ကူၣ်တဖၣ်န့ၣ် ပှၤကွဲးအီၤဖုၣ်ဖုၣ်ဖိ ဒီးလီၤထုးန့ၢ်သူၣ်ထုးန့ၢ်သး. လံာ်ကတိၤဒိအပူၤ တၢ်ဂ့ၢ်အါတက့ၢ်န့ၣ် စီၤၡလိၤမိၤကွဲးဝဲ ဒီးအကွဲးဝဲ ဒ်သိးဒီး ပှၤကွဲးဧ့ၤဘြံၤအထါတဖၣ်. အဃိ ထါအါတက့ၢ်န့ၣ် တသီၣ်သဃဲၤလိာ်သးဘၣ်. ဒီးထါတနီၤန့ၣ် ပှၤသူဝဲ တၢ်ထိၣ်သတြီၤလၢ အလီၤဂာ်လိာ်သး ဒီးတနီၤန့ၣ်ပှၤသူဝဲ တၢ်ထိၣ်သတြီၤလၢ အလီၤဆီလိာ်သး. သနာ်က့ ထါခံကျိၤတကျိၤန့ၣ် ဒိးသန့ၤထီၣ်အသးလၢ တၢ်ဂ့ၢ်လၢတၢတကျိၤအပူၤ. အဒိ ကတိၤဒိ ၁၇:၁၇ န့ၣ်အသူဝဲ တၢ်ထိၣ်သတြီၤလၢ အလီၤဂာ်လိာ်သး. ဒီးတၢ်ဂ့ၢ်လၢ လံာ်ခံကျိၤတကျိၤန့ၣ် အဆီၣ်ထွဲဝဲ တၢ်ဂ့ၢ်လၢ လံာ်တၢတကျိၤ. မ့မ့ၢ် ကတိၤဒိ ၁၈:၂၄ န့ၣ်အသူဝဲ တၢ်ထိၣ်သတြီၤလၢ အလီၤဆီလိာ်သး. ဖဲန့ၣ်တဲဝဲလၢ “တံၤသကိးလၢ အမၤဆါလိာ်သး တဂၤဒီးတဂၤန့ၣ် အိၣ်ဝဲ, ဘၣ်ဆၣ် တံၤသကိးလၢ အတီဒီးနၤ ဒိၣ်န့ၢ်ဒံး နဒီပုၢ်ဝဲၢ်န့ၣ် အိၣ်ဝဲစ့ၢ်ကီးလီၤ.”
ဖဲစီၤၡလိၤမိၤကွဲးဝဲ ကတိၤဒိ ၁၇:၁၇ အခါ ဘၣ်သ့ၣ်သ့ၣ် အဝဲကဆိကမိၣ်ဘၣ်ဝဲ အပါစီၤဒၤဝံး ဒီးစီၤပၤစီလူးအဖိခွါ စီၤယိနၤသၣ် ဒီသကိးအဂ့ၢ်. (၁ ၡမူၤအ့လး ၁၃:၁၆; ၁၈:၁; ၁၉:၁-၃; ၂၀:၃၀-၃၄, ၄၁, ၄၂; ၂၃:၁၆-၁၈) စီၤဒၤဝံး ဒီးစီၤယိနၤသၣ်န့ၣ် တဒီဘူးဒီတံၢ်လိာ်သး သနာ်က့ အဝဲသ့ၣ် တီလိာ်သး တဂၤဒီးတဂၤ ဒိၣ်န့ၢ်ဒံး အဒီပုၢ်ဝဲၢ်ဒံး. စီၤယိနၤသၣ်န့ၣ် တၢ်လီၤဘၣ်ယိၣ်အိၣ်လၢ အသးသမူအဂီၢ် သနာ်က့ အဝဲဒီသဒၢ အသကိး စီၤဒၤဝံး.a
ကတိၤဒိ ၁၇:၁၇ လၢလံာ်စီဆှံ တၢ်ကွဲးကျိးထံအဂၤ
“တံၤသကိးတဖၣ်ဒုးနဲၣ်အတၢ်အဲၣ်တၢ်ကွံထီဘိလီၤ. မ့တမ့ၢ်လၢ တၢ်နီၤတူၢ်သကိး တၢ်ကီတၢ်ခဲဘၣ်ဒီး ဒီပုၢ်ဝဲၢ်တဖၣ် အိၣ်လၢမနုၤအဂီၢ်လဲၣ်.”—ခ့ခါစှီၤကျိာ်.
တၢ်ဂီၤမူအံၤ ပာ်ဖျါထီၣ်ဝဲ တၢ်ဂ့ၢ်လၢ ဘၣ်ဃးဒီး လံာ်ကတိၤဒိ.
a ကွၢ်တၢ်ဂ့ၢ်လၢအမ့ၢ် “ကဲထီၣ်တံၤသကိး ဘူးဘူးတံၢ်တံၢ်.”