တၢ်ကွဲးကျိာ်ထံ ၂၀၂၀ “သးခု . . . တဘိယူၢ်ဃီတက့ၢ်” တၢ်အိၣ်ဖှိၣ်ဖးဒိၣ်​ အတၢ်စံၣ်တဲၤတဲလီၤတဖၣ်​

ဖဲ ၂၀၂၀, လါယူၤလံ ဒီးလါအီကူး အပူၤန့ၣ်​ ဒီပုၢ်ဝဲၢ်လၢ ဟီၣ်ခိၣ်ဒီဘ့ၣ်​ ကကွၢ်ဝဲ တၢ်အိၣ်ဖှိၣ်ဖးဒိၣ်​ အတၢ်စံၣ်တဲၤတဲလီၤတဖၣ်​ လၢဆၢကတီၢ်တကတီၢ်ဃီလီၤ. တၢ်ရဲၣ်တၢ်ကျဲၤ ဘၣ်တၢ်မၤအီၤဒ်အံၤန့ၣ် မ့ၢ်ဝဲအဆိကတၢၢ်တဘျီလီၤ. ဒ်သိးပှၤကကွၢ်ဘၣ်​ တကတီၢ်ဃီအဂီၢ် လိၣ်လၢပှၤကဘၣ်​ ကွဲးကျိာ်က့ၤ တၢ်စံၣ်တဲၤတဲလီၤတၢ်ဒီး သွီတၢ်ကလုၢ်တဖၣ်​ လၢကျိာ် ၅၀၀ ဘျဲၣ်ညါလီၤ. ညီနုၢ်န့ၣ်တၢ်ရဲၣ်ကျဲၤ တၢ်စံၣ်တဲၤတဲလီၤတၢ်, တၢ်သွီတၢ်ကလုၢ်, တၢ်ကွဲးကျိာ်ထံ တၢ်စံၣ်တဲၤတဲလီၤဒီး တၢ်ဂီၤမူတဖၣ်န့ၣ်​ ယံာ်ဝဲတနံၣ်​ ဒီးအါန့ၢ်အန့ၣ်လီၤ. ဘၣ်ဆၣ်​ မ့ၢ်လၢ ခိၣ်ရိၤနၢ် တၢ်ဆါရၤလီၤအသး ဒီးတၢ်အိၣ်သးဆီတလဲအဃိ ပှၤလၢအကွဲးကျိာ်ထံ ၂၀၂၀ “သးခု . . . တဘိယူၢ်ဃီတက့ၢ်” တၢ်အိၣ်ဖှိၣ်ဖးဒိၣ်​ အတၢ်စံၣ်တဲၤတဲလီၤတဖၣ်​ ကမၤဝံၤတၢ်မၤအံၤအဂီၢ် အတၢ်ဆၢကတီၢ် ကအိၣ်ဒၣ်​ ၄ လါလီၤ.

တၢ်ကွဲးကျိာ်ထံဝဲၤကျိၤ ဒီးတၢ်ပှ့ၤတၢ်ဝဲၤကျိၤလၢ အိၣ်လၢယဟိဝၤပှၤအုၣ်အသး အဝဲၤလီၢ်ခိၣ်သ့ၣ်န့ၣ်​ မၤစၢၤဝဲလၢ တၢ်မၤဖးဒိၣ်အံၤအဂီၢ်လီၤ. တၢ်ကွဲးကျိာ်ထံဝဲၤကျိၤ ပာ်သူၣ်ပာ်သးဝဲလၢ ပှၤကွဲးကျိာ်ထံတၢ်ကရူၢ်တဖၣ်​ ကမၤဝံၤဝဲ တၢ်မၤအံၤအဂီၢ် လိၣ်ဘၣ်အါထီၣ်ဝဲ တၢ်ပီးတၢ်လီတဖၣ်, လီၤဆီဒၣ်တၢ် ကလုၢ်ဒၢလၢအဂ့ၤတဖၣ်လီၤ. တၢ်ပှ့ၤတၢ်ဝဲၤကျိၤ ရဲၣ်ကျဲၤဝဲလၢ ကပှ့ၤဝဲ ကလုၢ်ဒၢအဖျၢၣ်​ ၁,၀၀၀ ဒီးဆှၢလီၤဝဲဆူ တၢ်လီၢ် ၂၀၀ ဃၣ်ဃၣ်လီၤ.

ဒ်သိးတၢ်လၢာ်ဘူၣ်လၢာ်စ့ၤ ကစှၤအဂီၢ် တၢ်ပှ့ၤတၢ်ဝဲၤကျိၤ ပှ့ၤဝဲ ကလုၢ်ဒၢအဖျၢၣ်အါမးလီၤ. ကလုၢ်ဒၢတဖၣ်န့ၣ်​ ဘၣ်တၢ်ဆှၢအီၤလၢကဘီ ဆူတၢ်လီၢ်တတီၤဝံၤ ဆှၢလီၤကဒီးဆူ ပှၤကွဲးကျိာ်ထံတၢ်လၢ အအိၣ်လၢဟီၣ်ခိၣ်ဒီဘ့ၣ်အအိၣ်လီၤ. မ့ၢ်လၢပပှ့ၤကလုၢ်ဒၢအဖျၢၣ်အါအဃိ ပၣ်ဃုာ်ဒီးပှၤဆှၢတၢ်အပှ့ၤမး တဖျၢၣ်န့ၣ်​ အပှ့ၤကလီၤလဲဒၣ်​ ဒီလၣ်​ ၁၇၀ လီၤ. ပမ့ၢ်ထိၣ်သတြီၤအပှ့ၤဒီး ပပှ့ၤတဖျၢၣ်စုာ်စုာ်န့ၣ်​ အပှ့ၤစှၤလီၤဖးဒိၣ်ညါလီၤ.

တၢ်ပှ့ၤတၢ်ဝဲၤကျိၤ ကဘၣ်ပှ့ၤတၢ်ဒီး ဆှၢတၢ်ဖဲ ၂၀၂၀, လါအ့ဖြ့ၣ် ဒီးလါမ့ၤအတီၢ်ပူၤ ဒီးဆၢကတီၢ်ဖဲန့ၣ်​ မ့ၢ်လၢခိၣ်ရိၤနၢ်တၢ်ဆါအဃိ တၢ်ဆါတၢ်ပှ့ၤ အတၢ်ဖံးတၢ်မၤတဖၣ်​ တလဲၤအသးဒ်ညီနုၢ်အသိးဘၣ်. သနာ်က့ ဖဲလါမ့ၤအလၢာ်န့ၣ်​ တၢ်ကွဲးကျိာ်ထံအရူတဖၣ်, ဝဲၤတြၢ်အရူတဖၣ်ဒီး တၢ်ကွဲးကျိာ်ထံတၢ် တၢ်လီၢ်အဂၤတဖၣ်​ ဒိးန့ၢ်ဘၣ်ဝဲ တၢ်ပီးတၢ်လီလၢ အလိၣ်ဘၣ်ဝဲတဖၣ်လံလီၤ.

တၢ်ပှ့ၤတၢ်ဝဲၤကျိၤ အပှၤကွၢ်တၢ် ကၠ့ စွ့နံၤ တဲဝဲလၢ “ဝဲၤကျိၤလၢ ဘ့ၤသ့လးတဖၣ်ဒီး ပှၢ်တၢ်ချၢလၢ အဆှၢတၢ်ပီးတၢ်လီတဖၣ်​ မၤသကိးတၢ် ဂ့ၤဂ့ၤဘၣ်ဘၣ်လီၤ. ဒ်သိးပဒီပုၢ်ဝဲၢ်တဖၣ်​ ကဒိးန့ၢ်ဘၣ်​ တၢ်မၤစၢၤ, ပမၤတၢ်လၢအချ့ကသ့ ဒီးတၢ်လၢာ်ဘူၣ်လၢာ်စ့ၤကစှၤအဂီၢ် ထဲဒၣ်​ ယဟိဝၤယွၤအသးစီဆှံ မၤစၢၤပှၤသ့န့ၣ်လီၤ.”

နံၣ်ခိလဲး အလဲဒ့း လၢအမၤတၢ်လၢ တၢ်ကွဲးကျိာ်ထံဝဲၤကျိၤန့ၣ်​ တဲဝဲလၢ– “ဖဲလီးဒီအဆၢကတီၢ် ပှၤကွဲးကျိာ်ထံတၢ်တဖၣ်ဒိးန့ၢ်ဘၣ်​ တၢ်ပီးတၢ်လီတဖၣ်အဃိ အသးခုဒိၣ်မး. အဝဲသ့ၣ်​ ဘၣ်အိၣ်ယံၤလိာ်သး ဒီးပှၤကွဲးကျိာ်ထံတၢ်အဂၤတဖၣ်​ သနာ်က့ အဝဲသ့ၣ်​ ကွဲးကျိာ်ထံ ဒီးသွီလီၤဝဲ တၢ်စံၣ်တဲၤတဲလီၤတဖၣ်လၢ တၢ်ကလုၢ်, တၢ်ဂီၤမူ ဒီးတၢ်သးဝံၣ်တဖၣ်လၢ ကျိာ် ၅၀၀ ဘျဲၣ်န့ၢ်ဝဲလီၤ.”

ဒီပုၢ်ဝဲၢ်လၢ ဟီၣ်ခိၣ်ဒီဘ့ၣ်အဂီၢ် ၂၀၂၀ “သးခု . . . တဘိယူၢ်ဃီတက့ၢ်” တၢ်အိၣ်ဖှိၣ်ဖးဒိၣ်​ အတၢ်စံၣ်တဲၤတဲလီၤတဖၣ်​ ကကဲထီၣ်လိၣ်ထီၣ်အဂီၢ် တၢ်မၤအံၤစ့ၢ်ကီးပၣ်ဃုာ်ဝဲလီၤ. မ့ၢ်လၢသုဝဲ ဒီပုၢ်ဝဲၢ်မုၣ်​ ဒီပုၢ်ဝဲၢ်ခွါတဖၣ်​ ဟ့ၣ်လီၤတၢ်မၤဘူၣ်​ လၢတၢ်သူၣ်အိၣ်သးအိၣ်အပူၤ ခီဖျိလၢ donate.jw.org အပူၤမ့ၢ်ဂ့ၤ လၢကျဲအဂၤတဖၣ်မ့ၢ်ဂ့ၤအဃိ ပပှ့ၤတၢ်လၢ ပလိၣ်ဘၣ်တဖၣ်န့ၢ်ဝဲလီၤ.