မံးၡ့ၣ်နရ့ၣ်လၢ အလဲၤ “ပၢၢ်တုၤလၢ ဟီၣ်ခိၣ်အကတၢၢ်”

ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “သုကကဲထီၣ်​ ယပှၤအုၣ်အသးတဖၣ်​ . . . ပၢၢ်တုၤလၢ ဟီၣ်ခိၣ်​ အကတၢၢ်လီၤ.” (မၤတၢ် ၁:၈) မုၢ်မဆါတနံၤအံၤ ယဟိဝၤပှၤအုၣ်အသးတဖၣ်​ မၤဝဲတၢ်မၤအံၤလၢ တၢ်သူၣ်ဆူၣ်သးဆူၣ်အပူၤလီၤ. ဘၣ်ဆၣ်​ တၢ်လီၢ်လၢအလဲၢ် ဒီးပှၤအိၣ်အါတနီၤန့ၣ်​ ပှၤလဲၤစံၣ်တဲၤတဲလီၤတၢ်တတုၤဝးဝးဒံးဘၣ်. ထံကီၢ်တနီၤန့ၣ်​ ပှၤစံၣ်တဲၤတဲလီၤတၢ်ဖိ အိၣ်ထဲတစဲးလီၤ. (မးသဲ ၉:၃၇, ၃၈) ဒ်သိးပကစံၣ်တဲၤတဲလီၤဘၣ်​ ပှၤအါအါဂီၢ်ဂီၢ်အဂီၢ် ပမၤဒ်လဲၣ်.

ယဟိဝၤပှၤအုၣ်အသး အပှၤပၢဆှၢတၢ်ကမံးတာ် အဘီမုၢ်တၢ်မၤကမံးတံာ်န့ၣ်​ ဒိကနၣ်ဝဲ ယ့ၣ်ၡူးအတၢ်မၤလိာ်အံၤ ဒီးဆှၢလီၤဝဲ မံးၡ့ၣ်နရ့ၣ်တဖၣ်လၢ တၢ်လီၢ်လၢအလိၣ်ဘၣ်တၢ်မၤစၢၤ လၢဟီၣ်ခိၣ်ဒီဘ့ၣ်. ဆၢကတီၢ်ခဲအံၤ လၢဟီၣ်ခိၣ်ဒီဘ့ၣ်န့ၣ်​ မံးၡ့ၣ်နရ့ၣ်​ အိၣ်ဝဲအဂၤ ၃,၀၉၀.a အဝဲသ့ၣ်အါတက့ၢ်န့ၣ်​ ဒိးန့ၢ်ဘၣ်တၢ်သိၣ်လိလၢ လံာ်စီဆှံကၠိဒ်သိးဒီး ပှၤစိာ်ဘီမုၢ်တၢ်သးခုကစီၣ်ဖိအကၠိလီၤ. မံးၡ့ၣ်နရ့ၣ်တဖၣ်န့ၣ်​ သးအိၣ်ပာ်တ့ၢ် အဟံၣ်အဃီ ဒီးလဲၤသုးအသးလၢ ထံဂၤကီၢ်ဂၤလီၤ. မ့ၢ်လၢအဝဲသ့ၣ်တဖၣ်န့ၣ်​ ဒိးန့ၢ်ဘၣ်​ တၢ်သိၣ်လိဂ့ၤဂ့ၤ, ဒိၣ်တုာ်ခိၣ်ပှဲၤလၢ နီၢ်သးတခီ ဒီးအိၣ်ဒီးတၢ်လဲၤခီဖျိအဃိ ကဲထီၣ်တၢ်မၤစၢၤလၢ တၢ်သးခုကစီၣ်​ ကရၤလီၤအသးအဂီၢ် ဒီးကဲထီၣ်တၢ်ဒိဂ့ၤတဲာ်ဘၣ်လၢ ပှၤစံၣ်တဲၤတဲလီၤတၢ်ဖိအသီတဖၣ်အဂီၢ်လီၤ.

မံးၡ့ၣ်နရ့ၣ်တဖၣ်​ မၤစၢၤပှၤဂၤ

လၢဝဲၤတြၢ်တဖၣ်အပူၤ ဘီမုၢ်အခ့အပှၤတၢ်မၤစၢၤအသနၢၣ်လၢ ဘီမုၢ်အတၢ်မၤဝဲၤကျိၤ အတၢ်ကွၢ်ထွဲဖီလာ်န့ၣ်​ ကွၢ်ထွဲဝဲ မံးၡ့ၣ်နရ့ၣ်တဖၣ်​ အတၢ်လိၣ်ဘၣ်ဒ်သိးဒီး ကဃုန့ၢ်ဝဲဟံၣ်, ကကွၢ်ထွဲဝဲ အတၢ်အိၣ်ဆူၣ်အိၣ်ချ့ ဒီးကျိၣ်စ့တၢ်မၤစၢၤတနီၤလၢ တၢ်လၢာ်ဘူၣ်လၢာ်စ့ၤအဂီၢ်လီၤ. ဖဲ ၂၀၂၀ တၢ်မၤနံၣ်န့ၣ်​ ယဟိဝၤပှၤအုၣ်အသးတဖၣ်​ သူဝဲစ့ (U.S.) ဒီလၣ်​ ၂၇ ကကွဲၢ် လၢကကွၢ်ထွဲ မံးၡ့ၣ်နရ့ၣ်တဖၣ်အဂီၢ်လီၤ. ခီဖျိလၢတၢ်မၤစၢၤဒ်အံၤအဃိ အဝဲသ့ၣ်​ သးစၢၢ်ဆၢ တၢ်စံၣ်တဲၤတဲလီၤတၢ်မၤ န့ၢ်ဝဲလၢလၢပှဲၤပှဲၤ တကးဒံးဘၣ်​ ကဲထီၣ်တၢ်ဂံၢ်တၢ်ဘါလၢ လီၢ်ကဝီၤတၢ်အိၣ်ဖှိၣ်အဂီၢ်စ့ၢ်ကီးလီၤ.

မံးၡ့ၣ်နရ့ၣ်တဖၣ်​ အဘျုးအိၣ်လၢ တၢ်စံၣ်တဲၤတဲလီၤတၢ်မၤအဂီၢ်ဒ်လဲၣ်. ဖရ့ၣ်​ မဲစဲ လၢအမ့ၢ် မလၣ်ဝံၣ်​ ဝဲၤတြၢ် ကမံးတံာ်န့ၣ်​ တဲဝဲလၢ “မံးၡ့ၣ်နရ့ၣ်တဖၣ်​ အတၢ်သ့တၢ်ဘၣ်ဒီး အတၢ်သူၣ်ဒူသးဒူန့ၣ်​ ကဲထီၣ်တၢ်မၤစၢၤလၢ တၢ်အိၣ်ဖှိၣ်တဖၣ်​ ကမၤဝံၤဝဲ တၢ်စံၣ်တဲၤတဲလီၤ ဟီၣ်ကဝီၤလၢ ပှၤလဲၤတန့ၢ်ညီညီတဖၣ်​ ဒ်သိးဒီး တၢ်လီၢ်လၢ အိၣ်ဒီးပှၤခိးတၢ်ဖိတဖၣ်​ ဒီးတၢ်လီၢ်လၢ ပှၤထံဂၤကီၢ်ဂၤဖိ အိၣ်ဝဲတဖၣ်. ဒီးအဝဲသ့ၣ်​ အတၢ်ဂုာ်ကျဲးစၢးမၤလိ လီၢ်ကဝီၤအကျိာ် ဒီးတၢ်ဆဲးတၢ်လၤန့ၣ်​ ကဲထီၣ်တၢ်ဂံၢ်တၢ်ဘါလၢပှၤဂၤအဂီၢ် ဒီး ဟ့ၣ်ဂံၢ်ဟ့ၣ်ဘါစ့ၢ်ကီး ပှၤသးစၢ်တဖၣ်လၢ ကသးအိၣ်မၤ ဆၢကတီၢ်လၢပှဲၤတၢ်မၤအဂီၢ်. ပစံးဘျုးဘၣ်​ ယဟိဝၤယွၤဒိၣ်မးလၢ မံးၡ့ၣ်နရ့ၣ်တဖၣ်အံၤအဃိလီၤ.”

ဝဲၤတြၢ်ကမံးတံာ်တဂၤလၢ အအိၣ်လၢထံကီၢ်အဂၤတဘ့ၣ်စ့ၢ်ကီး တဲဝဲလၢ “မံးၡ့ၣ်နရ့ၣ်တဖၣ်န့ၣ်​ မ့ၢ်တၢ်အုၣ်အသးလၢ ယဟိဝၤယွၤ အပှၤဂီၢ်မုၢ်တဖၣ်န့ၣ်​ အိၣ်ဒီးတၢ်ဃူတၢ်ဖိးလၢ ဟီၣ်ခိၣ်ဒီဘ့ၣ်. ပှၤလၢတမ့ၢ် ယဟိဝၤပှၤအုၣ်အသးတဖၣ်ဒၣ်လဲာ် ထံၣ်သ့ၣ်ညါဝဲလၢ ပတၢ်ဆဲးတၢ်လၤ မ့ၢ်တဒ်သိးလိာ်သး သနာ်က့ ပအိၣ်ဒီး တၢ်ဃူတၢ်ဖိး. လံာ်စီဆှံ အတၢ်သိၣ်လိတဖၣ်​ မၤစၢၤပှၤလၢ ပကကဲထီၣ်​ တၢ်ကရၢကရိလၢ အိၣ်ဒီးတၢ်ဃူတၢ်ဖိးလီၤ.”

မံးၡ့ၣ်နရ့ၣ်တဖၣ်​ မၤစၢၤဝဲ လီၢ်ကဝီၤ ပှၤစံၣ်တဲၤတဲလီၤတၢ်ဖိတဖၣ်ဒ်လဲၣ်. ဖီလိၤ လၢအိၣ်လၢ ထံမိၣ် လဲးတံၣ်​ န့ၣ်စံးဘျုးဝဲ မံးၡ့ၣ်နရ့ၣ်​ ဒီမါဝၤခံဂၤ လၢအလီၤဘၣ်မူဒါလၢ အတၢ်အိၣ်ဖှိၣ်န့ၣ်လီၤ. အဝဲတဲဝဲလၢ “ပလီၢ်ကဝီၤန့ၣ်​ တၢ်ကိၢ်ဒိၣ်မး. မံးၡ့ၣ်နရ့ၣ်တဖၣ်​ အိၣ်ဟဲလၢတၢ်ခုၣ်အလီၢ် သနာ်က့ အဝဲသ့ၣ်တပျဲဝဲလၢ တၢ်ကိၢ်တၢ်ခုၣ်​ ကမၤပတုာ် အဝဲသ့ၣ်​ အတၢ်စံၣ်တဲၤတဲလီၤတၢ်မၤဘၣ်. ထီဘိန့ၣ်​ ပထံၣ်ဘၣ်အဝဲသ့ၣ်လၢ ဂီၤခီ တၢ်အိၣ်ဖှိၣ်ရိဖှိၣ်လၢ တၢ်စံၣ်တဲၤတဲလီၤတၢ်အဂီၢ်လီၤ. ညီနုၢ် ယထံၣ်ဘၣ်​ အဝဲသ့ၣ်​ မၤဝဲ တၢ်က့ၤအိၣ်သကိး ဟံၣ်ကစၢ်လၢ မုၢ်ဆါခီ တၢ်ကိၢ်ပှံၢ်ဒီး လၢဟါခီအဆၢကတီၢ်စ့ၢ်ကီး. အဝဲသ့ၣ်​ မၤစၢၤယၤဃုာ်ဒီး ပှၤဂၤတဖၣ်​ ဒ်သိးကသ့ၣ်ညါထီၣ်​ တၢ်မ့ၢ်တၢ်တီအဂီၢ်. ဒီးအဝဲသ့ၣ်​ မၤယဟိဝၤယွၤ အတၢ်မၤလၢ အတၢ်အိၣ်မူ ဒီတစိၤ လၢတၢ်သူၣ်ဆူၣ်သးဆူၣ်အပူၤလီၤ. အဝဲသ့ၣ်​ အဒိအတဲာ်န့ၣ်​ ထိၣ်ဟူးထိၣ်ဂဲၤထီၣ်​ တၢ်အိၣ်ဖှိၣ်ဒီတဖုလၢ ကမၤအါထီၣ်ယဟိဝၤယွၤ အတၢ်မၤအဂီၢ်လီၤ.”

ခ့ၤထံၤ လၢအမ့ၢ် ပှၤလဲၤလၢညါတဂၤလၢ မလၣ်ဝံၣ်​ န့ၣ်တဲဝဲ ဘၣ်ဃးဒီး မံးၡ့ၣ်နရ့ၣ်​ ဒီမါဝၤခံဂၤ မၤစၢၤအဝဲအဟံၣ်ဖိဃီဖိဒ်လဲၣ်​ အဂ့ၢ်လီၤ. တဲဝဲလၢ “ဖဲ မံးၡ့ၣ်နရ့ၣ်​ ဒီမါဝၤခံဂၤ လီၤဘၣ်မူဒါလၢ ပတၢ်အိၣ်ဖှိၣ်အခါ လၢယဟံၣ်ဖိဃီဖိအကျါန့ၣ်​ ယကဲထီၣ်ယဟိဝၤပှၤအုၣ်အသး ထဲယၤတဂၤဒံးလီၤ. ဘၣ်ဆၣ်​ အဝဲသ့ၣ်​ ဒီမါဝၤခံဂၤန့ၣ်​ ဆီၣ်ထွဲမၤစၢၤယၤ ဒီးရ့ဒီးပဟံၣ်ဖိဃီဖိ ဘူးဘူးတံၢ်တံၢ်. ယဖိမုၣ်သ့ၣ်တဖၣ်န့ၣ် ကွၢ်အဝဲသ့ၣ်အဒိအတဲာ် ဒီးသ့ၣ်ညါဘၣ်ဝဲလၢ တၢ်မၤယဟိဝၤယွၤ အတၢ်မၤန့ၣ်​ ဟ့ၣ်ပှၤတၢ်သးခု ဒီးတၢ်သူၣ်မံသးမုာ်. မ့ၢ်လၢ မံးၡ့ၣ်နရ့ၣ်တဖၣ်​ အဒိဂ့ၤတဲာ်ဘၣ်အဃိ ယဖိမုၣ်​ သၢဂၤန့ၣ်​ မၤဝဲပှၤလဲၤလၢညါဒီး ယဝၤန့ၣ်စးထီၣ်ထီၣ်ဝဲ တၢ်အိၣ်ဖှိၣ်လီၤ.”

ပမၤစၢၤ မံးၡ့ၣ်နရ့ၣ်တဖၣ်​ အတၢ်လိၣ်ဘၣ်သ့ဝဲဒ်လဲၣ်. မ့ၢ်လၢပှၤဟ့ၣ်လီၤတၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်မၤအဂီၤလၢ donate.jw.org အပူၤအဃိလီၤ. တၢ်မၤဘူၣ်လၢ ပှၤဟ့ၣ်လီၤအီၤလၢ တၢ်သူၣ်အိၣ်သးအိၣ်အပူၤအံၤန့ၣ်​ ပပာ်လုၢ်ပာ်ပှ့ၤအီၤဒိၣ်မးလီၤ.