ပဒိးန့ၢ်ဘၣ်တၢ်မၤလိလၢ လံာ် ၃ မိၤၡ့အပူၤသ့

၁-၂. ဘၣ်မနုၤအဃိ ခရံာ်ဖိလၢ ပစိၤခဲအံၤတဖၣ်​ ကြၢးသးစၢၢ်ဆၢ တၢ်ဂ့ၢ်လၢ လံာ်သၢမိၤၡ့ အပူၤလဲၣ်.

တၢ်မၢဖိပီလူး ဒုးသ့ၣ်နီၣ်ထီၣ်​ အတံၤသကိး စီၤတံၤမသ့းလၢ “ကယဲၢ်တၢ်ကွဲးအသးခဲလၢာ်န့ၣ်, ကွဲးအသးလၢ ယွၤအသးစီဆှံ, ဒီးဂ့ၤ” ဝဲလီၤ. (၂ တံၤမသ့း ၃:၁၆) လၢတၢ်ကွဲးအသးတဖၣ်အကျါန့ၣ်​ ပၣ်ဃုာ်ဒီး လံာ်သၢမိၤၡ့လီၤ. လံာ်တဘ့ၣ်အံၤန့ၣ်​ မ့ၢ်နထံၣ်အီၤဒ်လဲၣ်. ပှၤတနီၤ ကဆိကမိၣ်ဝဲလၢ တၢ်သိၣ်တၢ်သီလၢ အအိၣ်လၢ လံာ်အံၤအပူၤန့ၣ်​ တကဲဘျုးလၢပဂီၢ်လၢ မုၢ်မဆါတနံၤအံၤလၢၤဘၣ်. ဘၣ်ဆၣ်​ မ့မ့ၢ်ခရံာ်ဖိ လၢအမ့ၢ်အတီတဖၣ်န့ၣ်​ တဆိကမိၣ်ဝဲဒ်န့ၣ်ဘၣ်.

^၂ လံာ်သၢမိၤၡ့န့ၣ်​ ပှၤကွဲးအီၤလၢ အပူၤကွံာ် ကအိၣ်အနံၣ်​ ၃,၅၀၀ လံဘၣ်ဆၣ်​ ယဟိဝၤယွၤ ကတီၤဃာ်ဝဲလံာ်အံၤ တုၤလၢပစိၤခဲအံၤ ဒ်သိးက ‘သိၣ်သီ’ ပှၤအဂီၢ်လီၤ. (ရိမ့ၤ ၁၅:၄) လံာ်သၢမိၤၡ့ မၤစၢၤပှၤဒ်သိး ပကနၢ်ပၢၢ်ထီၣ်လၢ ယဟိဝၤယွၤ အတၢ်ဆိကမိၣ်​ ဒီးအတၢ်တူၢ်ဘၣ်​ အိၣ်ဒ်လဲၣ်န့ၣ်လီၤ. အဃိ ပကြၢးမၤလိန့ၢ်တၢ်လၢ လံာ်အံၤအပူၤလီၤ. ပမၤလိန့ၢ်တၢ်လၢ လံာ်သၢမိၤၡ့အပူၤ သ့ဝဲအါမးလီၤ. ဘၣ်ဆၣ်​ ခဲအံၤပကမၤလိသကိးအီၤ ထဲလွံၢ်ခါလီၤ.

ဒ်သိးပကဒိးန့ၢ်ဘၣ်​ ယဟိဝၤယွၤ အတၢ်ဘၣ်သးအဂီၢ် ပကဘၣ်မၤဒ်လဲၣ်

၃. ကိးနံၣ်ဒဲး ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤန့ၣ်​ ဘၣ်မနုၤအဃိ ပှၤလုၢ်ထီၣ်တၢ်လဲၣ်.

^၃ တၢ်မၤလိ အဆိကတၢၢ်တခါ– ဒ်သိးယဟိဝၤယွၤ ကတူၢ်လိာ် တၢ်လၢပဟ့ၣ်အီၤအဂီၢ် ပကဘၣ်မ့ၢ် ပှၤလၢကစၢ်ယွၤ ဘၣ်သူၣ်ဘၣ်သးအီၤလီၤ. ကိးနံၣ်ဒဲး ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤန့ၣ်​ ပှၤအံၣ်စရ့လးဖိတဖၣ်​ ဟဲပာ်ဖှိၣ်ထီၣ်အသး ဒီးပှၤလုၢ်တၢ်ခိၣ်အဒိၣ်ကတၢၢ် လုၢ်ထီၣ်ဝဲ ဆၣ်ဖိကီၢ်ဖိတဖၣ်လီၤ. တၢ်ဟ့ၣ်လုၢ်ထီၣ်တခါအံၤ ကဒုးသ့ၣ်နီၣ်ထီၣ်အဝဲသ့ၣ်လၢ အဝဲသ့ၣ်​ အိၣ်ဒီးတၢ်ဒဲးဘး ဒီးကဘၣ်သ့စီကွံာ် အတၢ်ဒဲးဘးန့ၣ်လီၤ. ဘၣ်ဆၣ်​ တချုးလၢ ပှၤလုၢ်တၢ်ခိၣ်အဒိၣ်ကတၢၢ် လဲၤစိာ်နုာ် ဆၣ်ဖိကီၢ်ဖိလၢ ပှၤလုၢ်ထီၣ်အီၤအသွံၣ်​ လၢဒၢးစီဆှံကတၢၢ်အပူၤဒံးဘၣ်န့ၣ်​ အဝဲကဘၣ်မၤတၢ် အိၣ်တခါလီၤ. တၢ်မၤအံၤန့ၣ်​ မ့ၢ်တၢ်လၢအရ့ဒိၣ်န့ၢ်ဒံး ပှၤဂီၢ်မုၢ်တဖၣ်​ အတၢ်ဒဲးဘး ကဘၣ်တၢ်ပျၢ်ကွံာ်အီၤအဂီၢ်ဒံးလီၤ.

၄. ဒ် ၃ မိၤၡ့ ၁၆:၁၂, ၁၃ ပာ်ဖျါထီၣ်ဝဲအသိး လၢတၢ်မၤဘၣ်လိာ်ဖိးဒ့က့ၤတၢ် အမုၢ်နံၤန့ၣ်​ ဖဲပှၤလုၢ်တၢ်ခိၣ်အဒိၣ်ကတၢၢ် လဲၤနုာ်လၢ ဒၢးစီဆှံကတၢၢ်အပူၤ အဆိကတၢၢ်တဘျီအခါ အဝဲမၤဝဲ တၢ်မနုၤလဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)

^၄ ဖး ၃ မိၤၡ့ ၁၆:၁၂, ၁၃ တက့ၢ်. ဆိကမိၣ်ကွၢ် တၢ်မၤအသး ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤန့ၣ်တက့ၢ်. ဖဲတၢ်တနံၤန့ၣ်​ ပှၤလုၢ်တၢ်ခိၣ်အဒိၣ်ကတၢၢ်တဂၤ ဘၣ်လဲၤနုာ်ဆူ ဒဲစီဆှံအပူၤ ဒီးအဝဲကဘၣ်လဲၤနုာ်လၢ ဒၢးလၢအစီဆှံကတၢၢ်အပူၤ သၢဘျီလီၤ. အဆိကတၢၢ်တဘျီန့ၣ်​ အဝဲလဲၤစိာ်ဝဲ သပၢၤထူလၢ အပှဲၤဒီးမ့ၣ်အူအ့ၣ်​ လၢအစုတခီ ဒီးအစုလၢအဂၤတခီန့ၣ်​ စိာ်ဝဲတၢ်နၢမူအကမူၣ်လီၤ. အဝဲအိၣ်ပတုာ်လၢ ယၣ်ဘျးသဒၢလၢ အဘျးလီၤအသးလၢ ပှၤလဲၤနုာ်လၢ ဒၢးစီဆှံကတၢၢ် အမဲာ်ညါဝံၤ လၢတၢ်ပာ်ကဲအပူၤ အဝဲလဲၤနုာ်လၢ ဒၢးစီဆှံကတၢၢ် ဒီးဆၢထၢၣ်လၢ တၢ်အၢၣ်လီၤအီလီၤ အတလါ အမဲာ်ညါလီၤ. ပမ့ၢ်တဲလၢ ကျဲအဂၤတဘိန့ၣ်​ လီၤဂာ်ဒ် အဝဲဆၢထၢၣ်လၢ ယဟိဝၤယွၤ အမဲာ်ညါလီၤ. အဝဲလူလီၤ တၢ်နၢမူလၢ မ့ၣ်အူအ့ၣ်တဖၣ်အလိၤဝံၤ တၢ်နၢမူတဖၣ်​ နၢမူထီၣ်လၢ ဒၢးဒီဖျၢၣ်အပူၤလီၤ.b လၢခံတဘျီန့ၣ်​ အဝဲကဟဲက့ၤစိာ်နုာ်လီၤဝဲ ဆၣ်ဖိကီၢ်ဖိလၢ ပှၤလုၢ်ထီၣ်အီၤအသွံၣ်​ လၢဒၢးအံၤအပူၤလီၤ. အဃိ ပာ်သူၣ်ပာ်သးလၢ တချုးလၢ ပှၤလုၢ်ထီၣ်​ တၢ်သွံၣ်လၢ တၢ်ပျၢ်တၢ်ဒဲးဘးအဂီၢ်ဒံးဘၣ်န့ၣ်​ ပှၤဒွဲၣ်ထီၣ်​ တၢ်ဆိၣ်ကဲၤနၢမူလီၤ.

၅. ဘၣ်ဃးဒီး ပှၤဆိၣ်ကဲၤထီၣ်​ တၢ်နၢမူလၢ တၢ်မၤဃူမၤဖိးတၢ် အမုၢ်နံၤန့ၣ်​ နမၤလိန့ၢ် တၢ်မနုၤလဲၣ်.

^၅ ဘၣ်ဃးဒီး တၢ်ဆိၣ်ကဲၤထီၣ်​ တၢ်နၢမူလၢ တၢ်မၤဘၣ်လိာ်ဖိးဒ့က့ၤတၢ်အမုၢ်နံၤ အဂီၢ်န့ၣ်​ နမၤလိန့ၢ်ဘၣ်​ တၢ်မနုၤလဲၣ်. လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ အခ့အပှၤလၢ အတီအလိၤတဖၣ်​ အတၢ်ဃ့ထုကဖၣ်န့ၣ်​ လီၤဂာ်ဒ် တၢ်နၢမူလၢအဂီၢ်လီၤ. (စံးထီၣ်ပတြၢၤ ၁၄၁:၂; လီၣ်ဖျါ ၅:၈) ဒ်ပှၤလုၢ်တၢ်ခိၣ်အဒိၣ်ကတၢၢ် လဲၤစိာ်ဝဲ တၢ်နၢမူဆူ ယဟိဝၤယွၤအမဲာ်ညါ လၢတၢ်ပာ်ကဲအပူၤအသိး ပဝဲသ့ၣ်တဖၣ်စ့ၢ်ကီး ပဃ့ဘါထုကဖၣ်ဆူ ယဟိဝၤယွၤအအိၣ်​ လၢတၢ်ပာ်ကဲ ဒိၣ်ဒိၣ်မုၢ်မုၢ်အပူၤလီၤ. ပှၤလၢအတ့လီၤတၢ်ခဲလၢာ်တဂၤ ဟ့ၣ်ပှၤတၢ်ခွဲးတၢ်ယာ်လၢ ပကသုးဘူးပသးဆူအအိၣ်​ ဒ်ဖိတဂၤသုးဘူးအသးဆူ အပၢ်အိၣ်အဃိ ပစံးဘျုးဘၣ်အီၤဒိၣ်မးလီၤ. (ယၤကိာ် ၄:၈) အဝဲတူၢ်လိာ်ပှၤ လၢပကကဲ အသကိးလီၤ. (စံးထီၣ်ပတြၢၤ ၂၅:၁၄) ပပာ်လုၢ်ပာ်ပှ့ၤ တၢ်ခွဲးတၢ်ယာ်အံၤဒိၣ်မးအဃိ ပတအဲၣ်ဒိးမၤသးအုး ကစၢ်ယွၤအသးဘၣ်.

၆. ဘၣ်ဃးဒီး ပှၤလုၢ်တၢ်ခိၣ်အဒိၣ်ကတၢၢ်တဂၤ ဆိၣ်ကဲၤထီၣ်​ တၢ်နၢမူ တချုး လၢအလုၢ်ထီၣ်တၢ်ဒံးဘၣ်န့ၣ်​ နသ့ၣ်ညါဘၣ်​ တၢ်မနုၤလဲၣ်.

^၆ တချုးလၢ ပှၤလုၢ်တၢ်ခိၣ်အဒိၣ်ကတၢၢ်တဂၤ လုၢ်ထီၣ်တၢ်လၢ တၢ်ပျၢ်တၢ်ဒဲးဘးအဂီၢ် ဒံးဘၣ်န့ၣ်​ အဝဲကဘၣ်လုၢ်ထီၣ်တၢ်နၢမူ ဒ်သိးကစၢ်ယွၤ ကဘၣ်သူၣ်ဘၣ်သးအီၤအဂီၢ်လီၤ. ဘၣ်ဃးဒီး တၢ်ဂ့ၢ်အံၤန့ၣ်​ ပသ့ၣ်ညါဘၣ်​ တၢ်မနုၤလဲၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢ ဒီးတချုးလၢ အဝဲဟ့ၣ်လုၢ်ထီၣ်​ အသးဒံးဘၣ်အခါ အဝဲဘၣ်မၤ တၢ်တမံၤလၢအရ့ဒိၣ်န့ၢ်ဒံး ပှၤဟီၣ်ခိၣ်ဖိတဖၣ်​ ကဒိးန့ၢ်ဘၣ်​ တၢ်အုၣ်က့ၤခီၣ်က့ၤအီၤအဂီၢ်ဒံးလီၤ. အဝဲဘၣ်မၤဝဲ တၢ်မနုၤလဲၣ်. ဒ်သိးယဟိဝၤယွၤ ကတူၢ်လိာ် အတၢ်ဟ့ၣ်လုၢ်ထီၣ်အသးသမူအဂီၢ် ဖဲအဝဲအိၣ်မူလၢ ဟီၣ်ခိၣ်ချၢအခါ အကဘၣ်ဒိကနၣ်​ ယဟိဝၤယွၤအကလုၢ် လၢတၢ်သးတီအပူၤ လၢအတၢ်အိၣ်မူ ဒီတစိၤလီၤ. ယ့ၣ်ၡူးမ့ၢ်မၤဝဲဒ်န့ၣ်န့ၣ်​ မ့ၢ်ဝဲအပာ်ဖျါထီၣ်ဝဲလၢ ယဟိဝၤယွၤအကျဲန့ၣ်​ မ့ၢ်တၢ်လၢအဂ့ၤကတၢၢ်လီၤ. ဒီးပာ်ဖျါထီၣ်စ့ၢ်ကီးဝဲလၢ ကစၢ်ယွၤအိၣ်ဒီးတၢ်ခွဲးတၢ်ယာ်လၢ ကပၢတၢ် ဒီးအတၢ်ပၢန့ၣ်​ မ့ၢ်တၢ်ပၢလၢ အတီအလိၤလီၤ.

၇. ဘၣ်မနုၤအဃိ ကစၢ်ယွၤ ဘၣ်သူၣ်ဘၣ်သးဝဲ ယ့ၣ်ၡူးအတၢ်အိၣ်မူ လၢဟီၣ်ခိၣ်ချၢ ဒီတစိၤန့ၣ်လဲၣ်.

^၇ ဖဲယ့ၣ်ၡူးအိၣ်လၢ ဟီၣ်ခိၣ်ချၢအဆၢကတီၢ် အဝဲဒိကနၣ်​ အပၢ်အကလုၢ် လၢလၢပှဲၤပှဲၤလီၤ. အဝဲထံၣ်ဘၣ်ဒီး တၢ်မၤကွၢ် ဒီးတၢ်ကီတၢ်ခဲ ဒီးအသ့ၣ်ညါဝဲလၢ ပှၤကမၤသံအီၤ နးနးကလဲာ်ဘၣ်ဆၣ်​ အဝဲပာ်လီၤအသးလၢ တသ့ဖဲအသ့ အကပာ်ဖျါထီၣ်ဝဲလၢ အပၢ်အတၢ်ပၢန့ၣ်​ မ့ၢ်တၢ်ပၢလၢအဂ့ၤကတၢၢ်လီၤ. (ဖံလံးပံၤ ၂:၈) ဖဲယ့ၣ်ၡူးထံၣ်ဘၣ်ဒီး တၢ်အိၣ်သးလၢ အကီအခဲအခါ အဝဲဃ့ဘါထုကဖၣ်တၢ် “အိၣ်ဒီးတၢ်ကိးပသူထီၣ်, ဒီးမဲာ်ထံမဲာ်နိ” လီၤ. (ဧ့ၤဘြံၤ ၅:၇) ယ့ၣ်ၡူးအတၢ်ထုကဖၣ်​ လၢအသးဒီဖျၢၣ်န့ၣ်​ ပာ်ဖျါထီၣ်ဝဲလၢ အတီဒီးယဟိဝၤယွၤ ဒီးအတၢ်ထုကဖၣ်အံၤ ဟ့ၣ်ဆူၣ်ထီၣ်အသး ဒ်သိးအကဒိကနၣ်​ ယဟိဝၤယွၤ အကလုၢ်န့ၣ်လီၤ. ယ့ၣ်ၡူးအတၢ်ထုကဖၣ်န့ၣ်​ လီၤဂာ်ဒ် တၢ်နၢမူ လၢယဟိဝၤယွၤအဂီၢ်လီၤ. ဒီးအတၢ်အိၣ်မူန့ၣ်​ မၤသးခုယဟိဝၤယွၤအသးဖးဒိၣ်​ တကးဒံးဘၣ်​ ပာ်ဖျါထီၣ်ဝဲလၢ ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ ကပၢတၢ်စ့ၢ်ကီးလီၤ.

၈. ပကွၢ်လိမၤဒိး ယ့ၣ်ၡူးအတၢ်အိၣ်မူ ကသ့ဒ်လဲၣ်.

^၈ ပကွၢ်လိမၤဒိး ယ့ၣ်ၡူးသ့ခီဖျိ တသ့ဖဲအသ့ ပဒိကနၣ်​ ယဟိဝၤယွၤအကလုၢ် ဒီးတီဒီးအီၤန့ၣ်လီၤ. ဒီးမ့ၢ်လၢ ပအဲၣ်ဒိးမၤ တၢ်ဘၣ်ယဟိဝၤယွၤ အသးအဃိ ဖဲပထံၣ်ဘၣ်​ တၢ်မၤကွၢ်တဖၣ်အခါ ပဃ့ထုကဖၣ်လၢအအိၣ်​ လၢပသးဒီဖျၢၣ်န့ၣ်လီၤ. ပမ့ၢ်မၤဒ်အံၤန့ၣ်​ မ့ၢ်ဒၣ်ပပာ်ဖျါထီၣ်လၢ ပဆီၣ်ထွဲ ယဟိဝၤယွၤ အတၢ်ပၢလီၤ. ဒီးပသ့ၣ်ညါလၢ ပမ့ၢ်မၤ တၢ်လၢယဟိဝၤယွၤ သးဟ့ဝဲတဖၣ်န့ၣ်​ အဝဲတဒိကနၣ်​ ပတၢ်ထုကဖၣ်ဘၣ်. ဘၣ်ဆၣ်​ ပမ့ၢ်မၤ တၢ်လၢယဟိဝၤယွၤ ဘၣ်သူၣ်ဘၣ်သးဝဲတဖၣ်န့ၣ်​ ပနာ်သ့လၢ ပတၢ်ထုကဖၣ်န့ၣ်​ ကလီၤဂာ်ဒ် တၢ်နၢမူလၢ ယဟိဝၤယွၤအဂီၢ် သပှၢ်ကတၢၢ်လီၤ. ဒီးပပၢ်အိၣ်လၢမူခိၣ်​ ကသးခုဝဲ ခီဖျိလၢ ပဒိကနၣ်​ အကလုၢ်လၢ တၢ်သးတီအပူၤအဃိလီၤ.—ကတိၤဒိ ၂၇:၁၁.

ပမၤယဟိဝၤယွၤအတၢ်မၤ ခီဖျိလၢ ပအဲၣ်ဒိးစံးဘျုးစံးဖှိၣ်အီၤ ဒီးအဲၣ်အီၤအဃိ

၉. ဘၣ်မနုၤအဃိ ပှၤအံၣ်စရ့လးဖိတဖၣ်လုၢ်ထီၣ်​ တၢ်လုၢ်မၤဃူမၤဖိးတၢ်လဲၣ်.

^၉ တၢ်မၤလိခံခါတခါ– ပမၤယဟိဝၤယွၤအတၢ်မၤ ခီဖျိလၢ ပအဲၣ်ဒိး စံးဘျုးစံးဖှိၣ်အီၤ အဃိလီၤ. ဒ်သိးပကနၢ်ပၢၢ် တၢ်ဂ့ၢ်အံၤအဂီၢ် ခဲအံၤပကဘၣ်မၤလိ တၢ်ဂ့ၢ်လၢဘၣ်ဃးဒီး ပှၤအံၣ်စရ့လးဖိတဖၣ်​ အတၢ်လုၢ်မၤဃူမၤဖိးတၢ်လီၤ.c လၢလံာ် ၃ မိၤၡ့အပူၤန့ၣ်​ ပမၤလိဘၣ်လၢ ပှၤအံၣ်စရ့လးဖိတဂၤ လုၢ်ထီၣ်တၢ်လုၢ်မၤဃူမၤဖိးတၢ် လၢအကပာ်ဖျါထီၣ်​ “တၢ်စံးဘျုးစံးဖှိၣ်” အဂီၢ်သ့လီၤ. (၃ မိၤၡ့ ၇:၁၁-၁၃, ၁၆-၁၈, ခ့ခါစှီၤကျိာ်) တၢ်သိၣ်တၢ်သီတအိၣ်လၢ အဝဲကဘၣ်မၤဝဲဒ်န့ၣ်ဘၣ်​ ဘၣ်ဆၣ်​ အဝဲမ့ၢ်အဲၣ်ဒိး ဟ့ၣ်လုၢ်ထီၣ်တၢ်လုၢ်အံၤန့ၣ်​ ဟ့ၣ်ဝဲသ့လီၤ. အဝဲအသးအိၣ်မၤဝဲဒ်အံၤ ခီဖျိလၢ အတၢ်အဲၣ်ယဟိဝၤယွၤအဃိလီၤ. ဖဲအဝဲလဲၤဟ့ၣ်လုၢ်ထီၣ်​ တၢ်ဟ့ၣ်အံၤအခါ အဝဲဒီးအဟံၣ်ဖိဃီဖိ ဒီးပှၤလုၢ်တၢ်အဒိၣ်တဖၣ်​ ကအီၣ်သကိး ဆၣ်ဖိကီၢ်ဖိလၢ အဘၣ်တၢ်ဟ့ၣ်လုၢ်ထီၣ်အီၤအညၣ်​ ဒ်သိးသိးလီၤ. ဘၣ်ဆၣ်​ ဆၣ်ဖိကီၢ်ဖိလၢ ပှၤဟ့ၣ်လုၢ်ထီၣ်အီၤအံၤ အကူာ်အခီတနီၤန့ၣ်​ ကဘၣ်မ့ၢ် ထဲလၢယဟိဝၤယွၤအဂီၢ်လီၤ. ဆၣ်ဖိကီၢ်ဖိ အကူာ်အခီ မနုၤတဖၣ်လဲၣ်.

၁၀. ဖဲ ၃ မိၤၡ့ ၃:၆, ၁၂, ၁၄-၁၆ အပူၤတၢ်ကွဲးနီၣ်လၢ ဘၣ်ဃးဒီး တၢ်လုၢ်မၤဃူမၤဖိးတၢ်န့ၣ်​ သိၣ်လိပှၤလၢ ယ့ၣ်ၡူးအိၣ်ဒီး တၢ်ပာ်သူၣ်ပာ်သးလၢ ယဟိဝၤယွၤ အတၢ်မၤအဖီခိၣ်​ ဒ်လဲၣ်.

^၁၀ တၢ်မၤလိသၢခါတခါ– မ့ၢ်လၢပအဲၣ်​ ယဟိဝၤယွၤ အဃိ ပမၤအတၢ်မၤ လၢအဂ့ၤကတၢၢ်လီၤ. ဆၣ်ဖိကီၢ်ဖိအသိန့ၣ်​ ယဟိဝၤယွၤထံၣ်ဝဲဒ် တၢ်လၢအဂ့ၤကတၢၢ်လီၤ. ဒီးအဝဲတဲဝဲလၢ ဆၣ်ဖိကီၢ်ဖိအကူာ်အခီတနီၤ ဃုာ်ဒီးအကလ့ၢ်န့ၣ်​ မ့ၢ်တၢ်လုၢ်ဒိၣ်ပှ့ၤဒိၣ်​ လၢအဂီၢ်ဒိၣ်မးလီၤ. (ဖး ၃ မိၤၡ့ ၃:၆, ၁၂, ၁၄-၁၆ တက့ၢ်.) လီၤဆီဒၣ်တၢ် ဖဲပှၤအံၣ်စရ့လးဖိတဖၣ်​ ဟ့ၣ်လုၢ်ထီၣ်ဝဲ ဆၣ်ဖိကီၢ်ဖိ အကူာ်အခီတဖၣ်အံၤ ဒီးအသိအခါ ယဟိဝၤယွၤ ဘၣ်သူၣ်ဘၣ်သးဝဲဒိၣ်မးလီၤ. ပှၤအံၣ်စရ့လးဖိလၢ အဟ့ၣ်လုၢ်ထီၣ်​ ယဟိဝၤယွၤ လၢတၢ်လုၢ်အံၤန့ၣ်​ ပာ်ဖျါထီၣ်ဝဲလၢ အဝဲသ့ၣ်​ အဲၣ်ဒိးဟ့ၣ်​ ယဟိဝၤယွၤလၢ တၢ်လၢအဂ့ၤကတၢၢ်လီၤ. ဒ်န့ၣ်အသိး ယ့ၣ်ၡူးစ့ၢ်ကီး အသးအိၣ်ဟ့ၣ်​ ယဟိဝၤယွၤ တၢ်လၢအဂ့ၤကတၢၢ် ခီဖျိအမၤ ကစၢ်ယွၤအတၢ်မၤ လၢအသးဒီဖျၢၣ်​ လၢတၢ်အဲၣ်တၢ်ကွံအပူၤအဃိလီၤ. (ယိၤဟၣ်​ ၁၄:၃၁) တၢ်မၤကစၢ်ယွၤအတၢ်မၤန့ၣ်​ မ့ၢ်တၢ်သးခုလၢ ယ့ၣ်ၡူးအဂီၢ်ဒိၣ်မး ဒီးအဝဲအဲၣ်ကစၢ်ယွၤ အတၢ်သိၣ်တၢ်သီ ဒိၣ်မးလီၤ. (စံးထီၣ်ပတြၢၤ ၄၀:၈) ဖဲယဟိဝၤယွၤ ထံၣ်ဝဲလၢ ယ့ၣ်ၡူးသးအိၣ်မၤ အတၢ်မၤအခါ အဝဲကသးခုဒိၣ်မးလီၤ.

၁၁. ပမၤကစၢ်ယွၤအတၢ်မၤန့ၣ်​ လီၤဂာ်လိာ်အသးဒီး တၢ်လုၢ်မၤဃူမၤဖိးတၢ်ဒ်လဲၣ်​ ဒီးအမၤမုာ်ထီၣ်ပသး သ့ဒ်လဲၣ်.

^၁၁ မ့ၢ်လၢပတၢ်မၤ ယဟိဝၤယွၤအတၢ်မၤန့ၣ်​ ပာ်ဖျါထီၣ်ဝဲလၢ ပအဲၣ်အီၤဒိၣ်မးအဃိ လီၤဂာ်ဒ်ပှၤလုၢ်ထီၣ်​ တၢ်လုၢ်မၤဃူမၤဖိးတၢ်အသိးလီၤ. ပဟ့ၣ်ယဟိဝၤယွၤ တၢ်လၢအဂ့ၤကတၢၢ် ဒီးပမၤဒ်န့ၣ်​ ခီဖျိလၢ ပအဲၣ်အီၤလၢ ပသးဒီဖျၢၣ်အဃိလီၤ. ယဟိဝၤယွၤထံၣ်​ ပှၤလၢအဘူၣ်ထီၣ်ဘါထီၣ်အီၤ လၢအကကွဲၢ်တဖၣ်​ မၤအတၢ်မၤခီဖျိလၢ အဝဲသ့ၣ်အဲၣ်အီၤ ဒီးအဲၣ်အတၢ်သိၣ်တၢ်သီအဃိ အဝဲကသးခုဒိၣ်မးလီၤ. ဒီးပသ့ၣ်ညါဘၣ်လၢ ယဟိဝၤယွၤ ထံၣ်ဒီးပာ်လုၢ်ပာ်ပှ့ၤဝဲ ပတၢ်မၤတဖၣ်​ တကးဒံးဘၣ်​ ပတၢ်အဲၣ်အီၤအဃိ ပသးမုာ်ထီၣ်လီၤ. အဒိ နသးမ့ၢ်ပှၢ် ဒီးနမၤကစၢ်ယွၤအတၢ်မၤ ထဲသိးဒီးနအဲၣ်ဒိးမၤအီၤ မ့ၢ်တသ့ဘၣ်န့ၣ်​ နနာ်သ့လၢ ယဟိဝၤယွၤ နၢ်ပၢၢ်နၤလီၤ. ဘၣ်သ့ၣ်သ့ၣ်​ နကတူၢ်ဘၣ်လၢ နမၤယဟိဝၤယွၤ အတၢ်မၤ တန့ၢ်အါအါဘၣ်​ သနာ်က့ နအဲၣ်ယဟိဝၤယွၤ ဒီးနမၤအတၢ်မၤ ဖဲတၢ်သ့အိၣ်ဒီးနၤန့ၣ်​ အဝဲသ့ၣ်ညါဝဲလီၤ. တသ့ဖဲအသ့ နမၤကစၢ်ယွၤအတၢ်မၤ လၢအဂ့ၤကတၢၢ်အဃိ အဝဲသးခုဒိၣ်မးလီၤ.

၁၂. ဖဲပှၤဟ့ၣ်လုၢ်ထီၣ်​ တၢ်လုၢ်မၤဃူမၤဖိးတၢ်အခါ ယဟိဝၤယွၤ တူၢ်ဘၣ်ဝဲဒ်လဲၣ်​ ဒီးကဲထီၣ်တၢ်ဂံၢ်တၢ်ဘါ လၢပဂီၢ်ဒ်လဲၣ်.

^၁၂ ဘၣ်ဃးဒီး တၢ်လုၢ်မၤဃူမၤဖိးတၢ်န့ၣ်​ ပမၤလိန့ၢ် တၢ်မနုၤလဲၣ်. ဖဲမ့ၣ်အူအီၣ်ကွံာ် ဆၣ်ဖိကီၢ်ဖိ အကူာ်အခီလၢ အဂ့ၤကတၢၢ်တဖၣ်အခါ မ့ၣ်အူအလုၢ်ခုၣ်ထီၣ်ဆူ တၢ်ဖးဖီ ဒီးယဟိဝၤယွၤ ဘၣ်သူၣ်ဘၣ်သးဝဲ ဒိၣ်မးလီၤ. အဃိ ပဝဲသ့ၣ်တဖၣ်စ့ၢ်ကီး ပနာ်သ့သပှၢ်ကတၢၢ်လၢ ပမ့ၢ်မၤယဟိဝၤယွၤ အတၢ်မၤ လၢအဂ့ၤကတၢၢ်န့ၣ်​ အဝဲကဘၣ်သူၣ်ဘၣ်သးဝဲလီၤ. (ကလီးစဲ ၃:၂၃) ဆိကမိၣ်ကွၢ်လၢ ကစၢ်ယွၤ ကသးခုလၢနဃိ ထဲလဲၣ်န့ၣ်တက့ၢ်. ခီဖျိလၢနအဲၣ်အီၤအဃိ နမၤအတၢ်မၤ မ့ၢ်န့ၢ်အါမ့ၢ်ဂ့ၤ စှၤမ့ၢ်ဂ့ၤ အဝဲကသ့ၣ်နီၣ်​ ဒီးပာ်လုၢ်ပာ်ပှ့ၤ နတၢ်မၤတဖၣ်​ လီၤထူလီၤယိာ်လီၤ.—မးသဲ ၆:၂၀; ဧ့ၤဘြံၤ ၆:၁၀.

ယဟိဝၤယွၤ ဆိၣ်ဂ့ၤအတၢ်ကရၢကရိ

၁၃. ဒ် ၃ မိၤၡ့ ၉:၂၃, ၂၄ တဲဝဲအသိး ယဟိဝၤယွၤ ဘၣ်သူၣ်ဘၣ်သးဝဲ ပှၤလုၢ်တၢ်အဒိၣ်တဖၣ်န့ၣ်​ အဝဲပာ်ဖျါထီၣ်ဝဲဒ်လဲၣ်.

^၁၃ တၢ်မၤလိ လွံၢ်ခါတခါ– ယဟိဝၤယွၤ ဆိၣ်ဂ့ၤ အတၢ်ကရၢကရိ လၢဟီၣ်ခိၣ်လီၤ. ဆိကမိၣ်ကွၢ် တၢ်မၤအသးဖဲ ချ.ခ.န ၁၅၁၂ ဖဲဒဲစီဆှံ ဘၣ်တၢ်ပာ်လီၤအီၤလၢ ကစၢၢ်စံၤနါ အခီၣ်ထံးန့ၣ်တက့ၢ်. (၂ မိၤၡ့ ၄၀:၁၇) စီၤမိၤၡ့မၤဝဲ မူးပွဲလၢ စီၤအၤဟရိၣ်​ ဒီးအဖိခွါတဖၣ်​ ဘၣ်တၢ်ဒိးဖှူအီၤ ဒ်ပှၤလုၢ်တၢ်အဒိၣ်​ အဂီၢ်လီၤ. ဖဲန့ၣ်အဆၢကတီၢ် ပှၤအံၣ်စရ့လးဖိတဖၣ်​ ဟဲပာ်ဖှိၣ်ထီၣ်အသး ဒ်သိးကကွၢ်ဝဲ ပှၤလုၢ်တၢ်အဒိၣ်တဖၣ်​ လုၢ်ထီၣ်ဝဲ ဆၣ်ဖိကီၢ်ဖိ လၢအဆိကတၢၢ်တဘျီလီၤ. (၃ မိၤၡ့ ၉:၁-၅) ယဟိဝၤယွၤ ပာ်ဖျါထီၣ်ဝဲလၢ အဘၣ်သူၣ်ဘၣ်သးဝဲ ပှၤလုၢ်တၢ်အဒိၣ်လၢ အဃုထၢထီၣ်ဝဲ သီသီတဖၣ်အံၤ ဒ်လဲၣ်. ဖဲစီၤအၤဟရိၣ်​ ဒီးစီၤမိၤၡ့ ဆိၣ်ဂ့ၤဝဲ ပှၤဂီၢ်မုၢ်တဖၣ်အခါ ယဟိဝၤယွၤ ဒုးလီၤမ့ၣ်အူ လၢမူခိၣ်​ ဒီးမ့ၣ်အူအီၣ်ကွံာ် တၢ်လုၢ်လၢ တၢ်လုၢ်လီၢ်အဖီခိၣ်​ ခဲလၢာ်လီၤ.—ဖး ၃ မိၤၡ့ ၉:၂၃, ၂၄ တက့ၢ်.

၁၄. ယဟိဝၤယွၤ ဘၣ်သူၣ်ဘၣ်သးဝဲ ပှၤလုၢ်တၢ်အဒိၣ်လၢ အဟဲလီၤစၢၤလၢ စီၤအၤဟရိၣ်န့ၣ်​ ဘၣ်မနုၤအဃိ မ့ၢ်တၢ်ဂ့ၢ်လၢ အရ့ဒိၣ်လၢပဂီၢ်လဲၣ်.

^၁၄ မ့ၣ်အူဟဲလီၤလၢ မူခိၣ်န့ၣ်​ ပာ်ဖျါထီၣ်ဝဲ တၢ်မနုၤလဲၣ်. ယဟိဝၤယွၤ ဒုးလီၤမ့ၣ်အူ လၢမူခိၣ်န့ၣ်​ ပာ်ဖျါထီၣ်ဝဲလၢ အဝဲတူၢ်လိာ် ဒီးဆီၣ်ထွဲမၤစၢၤ စီၤအၤဟရိၣ်​ ဒီးအဖိခွါတဖၣ်လၢ အဃုထၢထီၣ်ဝဲ ဒ်ပှၤလုၢ်တၢ်အဒိၣ်တဖၣ်​ လၢလၢပှဲၤပှဲၤလီၤ. ဖဲပှၤအံၣ်စရ့လးဖိတဖၣ်​ ထံၣ်ဘၣ်ဝဲ တၢ်အုၣ်အသး လၢလၢပှဲၤပှဲၤလၢ ယဟိဝၤယွၤ ဆီၣ်ထွဲမၤစၢၤဝဲ ပှၤလုၢ်တၢ်အဒိၣ်တဖၣ်အခါ အဝဲသ့ၣ်​ နၢ်ပၢၢ်ဝဲလၢ အကဘၣ်ဆီၣ်ထွဲမၤစၢၤ ပှၤလုၢ်တၢ်အဒိၣ်တဖၣ်​ စ့ၢ်ကီးလီၤ. ဘၣ်မနုၤအဃိ တၢ်ဂ့ၢ်တဖၣ်အံၤ မ့ၢ်တၢ်အရ့ဒိၣ်​ လၢပဂီၢ်လဲၣ်. မ့ၢ်လၢပှၤလုၢ်တၢ်အဒိၣ်တဖၣ်​ လၢကီၢ်အံၣ်စရ့လးအပူၤန့ၣ်​ ခၢၣ်စးဝဲ ပှၤလုၢ်တၢ်အဒိၣ်တဖၣ်​ လၢအဂ့ၤဒိၣ်​ ဒီးအရ့ဒိၣ်န့ၢ်အလီၢ်အဃိလီၤ. ခရံာ်လၢအမ့ၢ် ပှၤလုၢ်တၢ်ခိၣ်အဒိၣ်ကတၢၢ်န့ၣ်​ အိၣ်ဒီးပှၤလုၢ်တၢ်အဒိၣ်​ ၁၄၄,၀၀၀ လၢအကပၢဃုာ်တၢ်ဒီးအီၤ လၢမူခိၣ်လီၤ.—ဧ့ၤဘြံၤ ၄:၁၄; ၈:၃-၅; ၁၀:၁.

၁၅-၁၆. ယဟိဝၤယွၤ ဘၣ်သူၣ်ဘၣ်သးဝဲ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” န့ၣ်အဝဲပာ်ဖျါထီၣ်ဝဲ ဒ်လဲၣ်.

^၁၅ ဖဲ ၁၉၁၉ နံၣ်န့ၣ်​ ယ့ၣ်ၡူးပာ်ထီၣ်​ ဒီပုၢ်ဝဲၢ်ခွါလၢ အဘၣ်တၢ်ဒိးဖှူအီၤ အကရူၢ်ဆံးဆံးဖိတကရူၢ်ဒ် “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” အသိးလီၤ. တၢ်အကုၢ်အပှၤတဖၣ်အံၤ တီခိၣ်ရိၤမဲတၢ် လၢတၢ်စံၣ်တဲၤတဲလီၤတၢ်မၤ ဒီးအဝဲသ့ၣ်​ “ဒုးအီၣ်ဒုးအီ” ခရံာ်ဖိတဖၣ်လၢ “အဆၢအကတီၢ်ဘၣ်” န့ၣ်လီၤ. (မးသဲ ၂၄:၄၅) မ့ၢ်နထံၣ်ဘၣ်​ တၢ်အုၣ်အသး လီၤတံၢ်လီၤဆဲးလၢ ကစၢ်ယွၤ ဘၣ်သူၣ်ဘၣ်သးဝဲ ကုၢ်လၢအကလုၢ်တီ ဒီးအကူၣ်တၢ်သ့ဧါ.

^၁၆ မုၣ်ကီၤလံၢ်ဒီး ပှၤလၢအဆီၣ်ထွဲအီၤတဖၣ်​ ဂုာ်ကျဲးစၢး မၤပတုာ်ဝဲ ကုၢ်လၢအကလုၢ်တီတဖၣ်အံၤ အတၢ်မၤလီၤ. မ့တမ့ၢ်လၢ ယဟိဝၤယွၤ အတၢ်မၤစၢၤအဃိဘၣ်န့ၣ်​ ကုၢ်လၢအကလုၢ်တီတဖၣ်အံၤ မၤဝဲတၢ်မၤတသ့ဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်. လၢအပူၤကွံာ်န့ၣ်​ ဟီၣ်ခိၣ်တၢ်ဒုးဖးဒိၣ်ခံခါ ကဲထီၣ်အသးဒီး ပှၤလၢဟီၣ်ခိၣ်ဒီဘ့ၣ်န့ၣ်​ ထံၣ်ဘၣ်ဒီး ကျိၣ်စ့အတၢ်ကီတၢ်ခဲလီၤ. ဒီးကစၢ်ယွၤ အခ့အပှၤတဖၣ်စ့ၢ်ကီး ပှၤမၤအီၤတတီတလိၤ ဒီးပှၤမၤအၢမၤနး အဝဲသ့ၣ်လီၤ. တၢ်အိၣ်သး ကီခဲဒ်အံၤသနာ်က့ ကုၢ်လၢအကလုၢ်တီ ဒီးအကူၣ်တၢ်သ့ ဆဲးကတဲာ်ကတီၤဝဲ နီၢ်သးအတၢ်အီၣ်တၢ်အီ လၢခရံာ်ဖိလၢ ဟီၣ်ခိၣ်ဒီဘ့ၣ်အဂီၢ်လီၤ. ဒီးဆၢကတီၢ်ခဲအံၤစ့ၢ်ကီး ပဒိးန့ၢ်ဘၣ်​ လံာ်လဲၢ်တဖၣ်အါမးလီၤ. လံာ်လဲၢ်တဖၣ်အံၤ ပဒိးန့ၢ်ဘၣ်အီၤသ့လၢ ကျိာ် ၉၀၀ ဘျဲၣ်​ ဒီးပတလိၣ်ဟ့ၣ်အပှ့ၤဘၣ်. တၢ်သ့ၣ်တဖၣ်အံၤ မ့ၢ်ဝဲတၢ်အုၣ်အသးလၢ ကစၢ်ယွၤ ဆီၣ်ထွဲမၤစၢၤဝဲ ကုၢ်တဖၣ်အံၤလီၤ. တကးဒံးဘၣ်​ တၢ်စံၣ်တဲၤတဲလီၤ တၢ်မၤန့ၣ်မ့ၢ်ဝဲ တၢ်အုၣ်အသးအဂၤတခါ လၢယဟိဝၤယွၤ ဆိၣ်ဂ့ၤအဝဲသ့ၣ်န့ၣ်လီၤ. ပထံၣ်ဘၣ်လၢ တၢ်သးခုကစီၣ်​ ဘၣ်တၢ်စံၣ်တဲၤတဲလီၤအီၤလၢ “ဟီၣ်ခိၣ်ဒီဘ့ၣ်ညါ” သပှၢ်တၢၢ်လီၤ. (မးသဲ ၂၄:၁၄) အဃိ ပနာ်သ့သပှၢ်ကတၢၢ်လၢ ယဟိဝၤယွၤ ဟံးစုနဲၣ်ကျဲ ဒီးဆိၣ်ဂ့ၤဝဲ အတၢ်ကရၢကရိ လၢမုၢ်မဆါတနံၤအံၤ အါမးလီၤ.

၁၇. ပဆီၣ်ထွဲမၤစၢၤ တၢ်ကရၢကရိ လၢယဟိဝၤယွၤသူဝဲ ကသ့ဒ်လဲၣ်.

^၁၇ ပဝဲခဲလၢာ် ပကြၢးသံကွၢ်လီၤပသးလၢ ‘မ့ၢ်ယသးအိၣ်စံးဘျုး ယဟိဝၤယွၤ ခီဖျိယအိၣ်ဘၣ်လၢ အတၢ်ကရၢကရိပူၤအဃိဧါ.’ လၢစီၤမိၤၡ့အစိၤန့ၣ်​ ယဟိဝၤယွၤ ဒုးလီၤမ့ၣ်အူ လၢမူခိၣ်​ ဒ်သိးကပာ်ဖျါထီၣ်ဝဲလၢ အဘၣ်သူၣ်ဘၣ်သးဝဲ ပှၤလၢအဃုထၢဝဲတဖၣ်လီၤ. ဒ်န့ၣ်အသိး မုၢ်မဆါတနံၤအံၤစ့ၢ်ကီး ယဟိဝၤယွၤ ပာ်ဖျါထီၣ်ဝဲ တၢ်အုၣ်အသး လီၤတံၢ်လီၤဆဲးလၢ အသူဝဲ အတၢ်ကရၢကရိန့ၣ်လီၤ. တၢ်ဂ့ၢ်အိၣ်ဝဲအါမး လၢပကစံးဘျုး ကစၢ်ယွၤအဂီၢ်လီၤ. (၁ သ့းစၤလနံ ၅:၁၈, ၁၉) ပဆီၣ်ထွဲမၤစၢၤ တၢ်ကရၢကရိ လၢယဟိဝၤယွၤသူအီၤ ကသ့ဒ်လဲၣ်. ပမၤအီၤသ့ခီဖျိ ပမၤထွဲ လံာ်စီဆှံ အတၢ်ဟံးစုနဲၣ်ကျဲ လၢပဒိးန့ၢ်ဘၣ်အီၤ ခီဖျိလၢ ပလံာ်လဲၢ်တဖၣ်, တၢ်အိၣ်ဖှိၣ်တဖၣ်, ကဝီၤအတၢ်အိၣ်ဖှိၣ်တဖၣ်​ ဒီးတၢ်အိၣ်ဖှိၣ်ဖးဒိၣ်တဖၣ်န့ၣ်လီၤ. တကးဒံးဘၣ်​ ပပာ်ဖျါထီၣ်လၢ ပဆီၣ်ထွဲမၤစၢၤ ကစၢ်ယွၤ အတၢ်ကရၢကရိ သ့ခီဖျိ တသ့ဖဲအသ့ ပဟးစံၣ်တဲၤတဲလီၤတၢ် ဒီးသိၣ်လိနဲၣ်လိ ပှၤဂၤန့ၣ်လီၤ.—၁ ကရံၣ်သူး ၁၅:၅၈.

၁၈. နပာ်လီၤနသးလၢ နကမၤတၢ်မနုၤလဲၣ်.

^၁၈ မ်ပပာ်လီၤပသးလၢ ပကမၤထွဲ တၢ်လၢပမၤလိဘၣ်အီၤလၢ လံာ်သၢမိၤၡ့အပူၤတက့ၢ်. မ်ယဟိဝၤယွၤ ဘၣ်သူၣ်ဘၣ်သး ပတၢ်ဟ့ၣ်လုၢ်ထီၣ်တက့ၢ်. မ်ပမၤယဟိဝၤယွၤအတၢ်မၤ ခီဖျိလၢ ပအဲၣ်ဒိးစံးဘျုးစံးဖှိၣ်အီၤ အဃိန့ၣ်တက့ၢ်. ဒီးမ်ပဟ့ၣ်ယဟိဝၤယွၤ တၢ်လၢအဂ့ၤကတၢၢ် ခီဖျိလၢ ပအဲၣ်အီၤလၢ ပသးဒီဖျၢၣ်အဃိတက့ၢ်. တသ့ဖဲအသ့ မ်ပဆီၣ်ထွဲမၤစၢၤ ကစၢ်ယွၤ အတၢ်ကရၢကရိ လၢအသူဝဲလၢ မုၢ်မဆါတနံၤအံၤန့ၣ်တက့ၢ်. ပမ့ၢ်မၤဒ်န့ၣ်န့ၣ်​ မ့ၢ်ဒၣ်ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဲဘၣ်​ အပှၤအုၣ်အသးန့ၣ်လီၤ.