လံာ်စီဆှံ တၢ်သိၣ်တၢ်သီတဖၣ်န့ၣ် အဘျုးအိၣ်လၢပဂီၢ်ဒ်လဲၣ်

၁. ဘၣ်မနုၤအဃိပလိၣ်ဘၣ် တၢ်ဟံးစုနဲၣ်ကျဲလဲၣ်.

ပတၢ်ဘၣ်တ့ကစၢ်န့ၣ် အတၢ်ကူၣ်သ့ အိၣ်အါန့ၢ်ဒံးပှၤလီၤ. ဒ်ပၢ်လၢအိၣ်ဒီးတၢ်အဲၣ် တဂၤအသိး ကစၢ်အံးက့ၤကွၢ်က့ၤပှၤလီၤ. ယွၤတိာ်ပာ်ဝဲလၢ ပကသန့ၤပသးလၢအီၤလီၤ. (ယံးရမံယၤ ၁၀:၂၃) လၢတၢ်န့ၣ်အဃိ ဒ်ဖိသၣ်တဂၤလိၣ်ဘၣ် မိၢ်ပၢ်အတၢ်ဟံးစုနဲၣ်ကျဲအသိး ပဝဲခဲလၢာ်ပလိၣ်ဘၣ် ယွၤအတၢ်ဟံးစုနဲၣ်ကျဲန့ၣ်လီၤ. (ယၡါယၤ ၄၈:၁၇, ၁၈) လံာ်စီဆှံတၢ်သိၣ်တၢ်သီတဖၣ်လၢ အနဲၣ်လိပှၤန့ၣ် မ့ၢ်တၢ်ဟ့ၣ်လၢယွၤအအိၣ်လီၤ.—ဖး ၂ တံၤမသ့း ၃:၁၆ တက့ၢ်.

ယဟိဝၤယွၤ အတၢ်သိၣ်တၢ်သီတဖၣ်န့ၣ် သိၣ်လိပှၤဒ်သိးပကအိၣ်မူလၢ ကျဲအဂ့ၤကတၢၢ်လၢ မုၢ်မဆါတနံၤအံၤဒီး ပာ်ဖျါထီၣ်န့ၢ်ပှၤလၢ ပကဒိးန့ၢ်ဘၣ် တၢ်မူအထူအယိာ် အဂီၢ်ပကဘၣ်မၤဒ်လဲၣ်အဂ့ၢ်လီၤ. ကစၢ်ယွၤတ့လီၤပှၤအဃိ ပကြၢးသ့ၣ်ညါဆၢက့ၤအဘျုးခီဖျိ ပအိၣ်မူဒ် အတၢ်ဟံးစုနဲၣ်ကျဲ အသိးန့ၣ်လီၤ.—ဖး စံးထီၣ်ပတြၢၤ ၁၉:၇, ၁၁; လီၣ်ဖျါ ၄:၁၁ တက့ၢ်.

၂. ယွၤအကလုၢ်ကထါ နဲၣ်လိပှၤလၢကျဲဒ်လဲၣ်.

ဖဲပကွၢ်ဆၢၣ်မဲာ်ဒီး တၢ်အိၣ်သးအကလုာ်ကလုာ်အခါ ကစၢ်ယွၤအဲၣ်ဒိးလၢ ပကမၤတၢ်မနုၤလဲၣ်န့ၣ် လံာ်စီဆှံတၢ်မ့ၢ်တၢ်တီသ့ၣ်တဖၣ် ပာ်ဖျါထီၣ်န့ၢ်ပှၤလီၤ. တၢ်သိၣ်တၢ်သီအဂၤတဖၣ်န့ၣ် ဘၣ်ထွဲလိာ်အသးဒီးပှၤဟီၣ်ခိၣ်ဖိအတၢ်အိၣ်မူ လီၤတံၢ်လီၤဆဲးန့ၣ်လီၤ. (၅ မိၤၡ့ ၂၂:၈) ဒ်သိးပကနၢ်ပၢၢ်လၢ လံာ်စီဆှံတၢ်မ့ၢ်တၢ်တီသ့ၣ်တဖၣ်အံၤ နဲၣ်လိပကျဲဒ်လဲၣ်အဂ့ၢ်န့ၣ် ပကဘၣ်အိၣ်ဒီးတၢ်သူၣ်ဆးသးဆးန့ၣ်လီၤ. (ကတိၤဒိ ၂:၁၀-၁၂) အဒိ လံာ်စီဆှံသိၣ်လိဝဲလၢ သးသမူန့ၣ်မ့ၢ် တၢ်ဟ့ၣ်လၢယွၤအအိၣ်လီၤ. လံာ်စီဆှံတၢ်မ့ၢ်တၢ်တီအံၤနဲၣ်လိပှၤလၢ တၢ်မၤလီၢ်, ဟံၣ်ပူၤ, ဒီးဖဲပလဲၤတၢ်က့ၤတၢ်အဆၢကတီၢ်လီၤ. ဒီးကမၤစၢၤပှၤဒ်သိးပသု တပာ်ပသးသမူဒီး ပှၤဂၤအသးသမူလၢ တၢ်ဘၣ်ယိၣ်ဘၣ်ဘီအပူၤတဂ့ၤအဂီၢ်လီၤ.—ဖး မၤတၢ် ၁၇:၂၈ တက့ၢ်.

၃. တၢ်မၤလိာ်လၢအရ့ဒိၣ်ကတၢၢ် ခံဘီန့ၣ်မ့ၢ်မနုၤလဲၣ်.

ယ့ၣ်ၡူးစံးတ့ၢ်ဝဲဘၣ်ဃးဒီး တၢ်မၤလိာ်လၢအရ့ဒိၣ်ကတၢၢ် ခံဘီအဂ့ၢ်လီၤ. တၢ်မၤလိာ်တၢတဘီန့ၣ်ပာ်ဖျါထီၣ်ဝဲလၢ ပှၤကညီအတၢ်အိၣ်မူ အတၢ်ပညိၣ်န့ၣ်မ့ၢ်ဒ်သိး ကသ့ၣ်ညါယွၤ, ကအဲၣ်အီၤဒီး ကမၤအတၢ်မၤလၢ တၢ်သးတီအပူၤလီၤ. ဖဲပကဆၢတဲာ်လီၤပသးအဆၢကတီၢ် ပကြၢးဆိကမိၣ်တၢ်မၤလိာ်တၢတဘီအံၤ ကိးဘျီဒဲးလီၤ. (ကတိၤဒိ ၃:၆) ပှၤလၢအအိၣ်မူမၤထွဲ တၢ်မၤလိာ်အံၤ ကကဲထီၣ်ယွၤအတံၤသကိး, ကဒိးန့ၢ်ဘၣ်တၢ်သးခုနီၢ်နီၢ် ဒီးတၢ်မူအထူအယိာ်လီၤ.—ဖး မးသဲ ၂၂:၃၆-၃၈ တက့ၢ်.

တၢ်မၤလိာ် ခံဘီတဘီန့ၣ် နဲၣ်လိပှၤဒ်သိး ပတၢ်ရ့လိာ်သးဒီးပှၤဂၤကဂ့ၤထီၣ်အဂီၢ်လီၤ. (၁ ကရံၣ်သူး ၁၃:၄-၇) ပမ့ၢ်အဲၣ်ဒိးမၤထွဲတၢ်မၤလိာ် ခံဘီတဘီအံၤ ပကဘၣ်ကွၢ်လိမၤဒိးကျဲလၢ ကစၢ်ယွၤရ့ဒီးပှၤဟီၣ်ခိၣ်ဖိတဖၣ်န့ၣ်လီၤ.—ဖး မးသဲ ၇:၁၂; ၂၂:၃၉, ၄၀ တက့ၢ်.

၄. လံာ်စီဆှံတၢ်သိၣ်တၢ်သီတဖၣ်န့ၣ် အဘျုးအိၣ်လၢပဂီၢ်ဒ်လဲၣ်.

လံာ်စီဆှံတၢ်သိၣ်တၢ်သီန့ၣ် သိၣ်လိဟံၣ်ဖိဃီဖိတဖၣ်ဒ်သိး ကအိၣ်ဃူအိၣ်ဖိးလိာ်သးလၢ တၢ်အဲၣ်တၢ်ကွံအပူၤလီၤ. (ကလီးစဲ ၃:၁၂-၁၄) ယွၤအကလုၢ်ကထါသိၣ်လိဝဲ တၢ်မ့ၢ်တၢ်တီအဂၤတမံၤလၢ တၢ်ဆီဟံၣ်ဆီဃီန့ၣ် ကြၢးအိၣ်ဂၢၢ်အိၣ်ကျၢၤဝဲလီၤ. တၢ်အံၤဒီသဒၢ ဟံၣ်ဖိဃီဖိတဖၣ်လီၤ.—ဖး ၁ မိၤၡ့ ၂:၂၄ တက့ၢ်.

တၢ်မၤထွဲ လံာ်စီဆှံ အတၢ်သိၣ်လိတဖၣ်န့ၣ် မၤစၢၤပှၤဒ်သိးပကအိၣ်ဒီး တၢ်ဖံးတၢ်မၤထီဘိ ဒီးဟ့ၣ်ပှၤ တၢ်သူၣ်မံသးမုာ်စ့ၢ်ကီးလီၤ. အဒိ, တၢ်မၤကစၢ်ဘၣ်အသးလၢ ပှၤမၤတၢ်ဖိလၢ အိၣ်မူမၤထွဲလံာ်စီဆှံ တၢ်သိၣ် တၢ်သီလၢအဆီၣ်ထွဲပှၤဒ်သိး ပကဂုာ်ကျဲးစၢး ဒီးမၤ တၢ်တီတီလိၤလိၤအဂီၢ်လီၤ. (ကတိၤဒိ ၁၀:၄, ၂၆; ဧ့ၤဘြံၤ ၁၃:၁၈) ယွၤအကလုၢ်ကထါ သိၣ်လိစ့ၢ်ကီးပှၤလၢ ပကသူၣ်မံသးမံလၢ တၢ်လၢအအိၣ်ဒီးပှၤ ဒီးပကပာ်လုၢ်ပာ်ပှ့ၤ ပတၢ်ရ့လိာ်သး ဒီးယွၤအါန့ၢ်ဒံး ကျိၣ်စ့ဒီး တၢ်စုလီၢ်ခီၣ်ခိၣ်န့ၣ်လီၤ.—ဖး မးသဲ ၆:၂၄, ၂၅, ၃၃; ၁ တံၤမသ့း ၆:၈-၁၀ တက့ၢ်.

ပမ့ၢ်အိၣ်မူမၤထွဲယွၤ အတၢ်သိၣ်တၢ်သီန့ၣ် ဒီသဒၢပတၢ်အိၣ် ဆူၣ်အိၣ်ချ့သ့ဝဲလီၤ. (ကတိၤဒိ ၁၄:၃၀; ၂၂:၂၄, ၂၅) အဒိ, တၢ်ဒိကနၣ်ယွၤ အတၢ်သိၣ်တၢ်သီလၢ ပကဘၣ်ဟးဆှဲးတၢ်အီလုၣ်ကိသံးန့ၣ် ဒီသဒၢပှၤလၢ တၢ်ဆူးတၢ်ဆါလၢပှၤသံသ့ ဒီးတၢ်ကဲထီၣ်သးလၢ တၢ်တပာ်သူၣ်ပာ်သးအပူၤန့ၣ်လီၤ. (ကတိၤဒိ ၂၃:၂၀) ယဟိဝၤယွၤဟ့ၣ်အခွဲးလၢ ပကအီသံးဘၣ်ဆၣ်ပမ့ၢ်အီန့ၣ် ကဘၣ်အီဝဲဖဲအကြၢးအဘၣ်န့ၣ်လီၤ. (စံးထီၣ်ပတြၢၤ ၁၀၄:၁၅; ၁ ကရံၣ်သူး ၆:၁၀) ယွၤအတၢ်သိၣ်တၢ်သီတဖၣ်န့ၣ် အဘျုးအိၣ်လၢပဂီၢ်ခီဖျိ သိၣ်လိပှၤလၢပကပၢၤဃာ်ပလုၢ်လၢ်သကဲာ်ပဝး တကးဒံးဘၣ် ပတၢ်ဆိကမိၣ်စ့ၢ်ကီးလီၤ. (စံးထီၣ်ပတြၢၤ ၁၁၉:၉၇-၁၀၀) ဘၣ်ဆၣ်, ခရံာ်ဖိအမ့ၢ်အတီတဖၣ် အိၣ်မူမၤထွဲဝဲ ယွၤအတၢ်သိၣ်တၢ်သီတဖၣ်န့ၣ် တမ့ၢ်ထဲလၢအဝဲသ့ၣ်အဘျုးအဂီၢ်ဘၣ်. အဝဲသ့ၣ်မၤထွဲဝဲတၢ်သိၣ်တၢ်သီတဖၣ်အံၤလၢ ကမၤလၤကပီၤဝဲ ယဟိဝၤယွၤအဂီၢ်လီၤ.—ဖး မးသဲ ၅:၁၄-၁၆ တက့ၢ်.