တၢ်မၤလိ ၁၃
တၢ်ဟိၣ်တၢ်ယိဒီး တၢ်ဝံတၢ်နါအတၢ်မၤတဖၣ်န့ၣ် တဂ့ၤဘၣ်
မုၣ်ကီၤလံၢ်န့ၣ် အဲၣ်ဒိးလၢနကလူၤ တၢ်ဝံတၢ်နါအတၢ်သ့တၢ်ဘၣ်လီၤ. ပှၤအါဒ်အါဂၤန့ၣ် ဒ်သိးကဒီသဒၢအသးလၢ တၢ်ကီတၢ်ခဲလၢအကဟဲဘၣ်အီၤန့ၣ်အဂီၢ်, လုၢ်ထီၣ်ပာ်ထီၣ်ဝဲ ဖံဖုတဖၣ်, မ့တမ့ၢ် တၢ်နါတဖၣ်န့ၣ်လီၤ. မ့ၢ်လၢအဝဲသ့ၣ်ပျံၤ တၢ်စိတၢ်ကမီၤလၢပှၤနီၣ်သးဖိတဖၣ်အိၣ်အလီၢ်အဃိ မၤဝဲသ့ၣ်ဒ်န့ၣ်လီၤ. သိးထီၣ်ဝဲသ့ၣ် ပသံးတဖၣ် မ့တမ့ၢ် ထံဖှံၣ်တဖၣ် လၢအအိၣ်ဒီးတၢ်နါအစိကမီၤန့ၣ်လီၤ. ဖှူဒံးဒူးဝဲလၢအလိၤဒီး အီဝဲသ့ၣ် “ကသံၣ်တဖၣ်” လၢအဆိကမိၣ်ဝဲသ့ၣ်အိၣ်ဒီး အတဟီၣ်အစိကမီၤ လီၤလိၣ်လီၤလးန့ၣ်လီၤ. ပှၤတနီၤနီၤ ပာ်တၢ်ဖိတၢ်လံၤတဖၣ် လၢအဝဲသ့ၣ်နာ်လၢ အအိၣ်ဒီးအစိကမီၤအတဟီၣ် လၢအဟံၣ်ပူၤ မ့တမ့ၢ် ခူၣ်လီၤဘၢဃာ်လၢဟီၣ်ခိၣ်လာ်န့ၣ်လီၤ. မ့မ့ၢ်ပှၤအဂၤတဖၣ်တခီ သူဝဲသ့ၣ်ကသံၣ်လၢ အအိၣ်ဒီးတၢ်နါအစိကမီၤလီၤ. နာ်ဝဲသ့ၣ်လၢကသံၣ်အံၤ ကမၤကဲထီၣ်လိၣ်ထီၣ်န့ၢ်အီၤ လၢအတၢ်ဖံးတၢ်မၤ, ကၠိအတၢ်ဒိးစဲး, မ့တမ့ၢ် တၢ်တရံးန့ၢ်မုၣ်ကနီၤန့ၣ်လီၤ.
ကျဲအဂ့ၤကတၢၢ်တဘိလၢ နကတြီဆၢမုၣ်ကီၤလံၢ် မ့ၢ်တၢ်ပာ်ယဟိဝၤယွၤ ဒ်နတံၤသကိးအသိးန့ၣ်လီၤ. ယဟိဝၤဒီးအမူခိၣ်ကလူးတဖၣ်န့ၣ် အစိကမီၤဒိၣ်န့ၢ် မုၣ်ကီၤလံၢ်ဒီးအကလူးတၢ်နါတဖၣ် နးနးကလဲာ်န့ၣ်လီၤ. (ယၤကိာ် ၂:၁၉; လီၣ်ဖျါ ၁၂:၉) ယဟိဝၤန့ၣ်အသးဆူၣ်ဒိၣ်မးလၢ အကပာ်ဖျါအတၢ်စိဒိၣ်ကမီၤဒိၣ်လၢ အတံၤသကိးတဖၣ် လၢအမ့ၢ်ပှၤလၢ အသူၣ်တီသးလိၤဒီးအီၤလၢသးဒီဖျၢၣ် အဂီၢ်န့ၣ်လီၤ.—၂ ကွဲးနီၣ်တၢ် ၁၆:၉.
ယွၤအကလုၢ်ကထါတြီပှၤလၢ ပတဘၣ်သံကွၢ် ပှၤမဲာ်ထံၣ်ဝံတဖၣ်န့ၣ်ဘၣ်လီၤ. ယဟိဝၤစံးအၢ တၢ်ဟိၣ်တၢ်ယိ ဒီးတၢ်ဝံတၢ်နါအတၢ်မၤတဖၣ်န့ၣ်လီၤ. အဂ့ၢ်ဒ်အံၤ, တၢ်မၤဒ်န့ၣ်သိးတဖၣ်န့ၣ် ဒုးလီၤဘၣ်ပှၤဆူ မုၣ်ကီၤလံၢ် အစိကမီၤဖီလာ်လိၤလိၤန့ၣ်လီၤ.—၃ မိၤၡ့ ၁၉:၂၆.