တၢ်မၤလိ ၁၄
ယွၤအတံၤသကိးတဖၣ်န့ၣ် ဟးဆှဲးဝဲသ့ၣ်တၢ်အၢ
မုၣ်ကီၤလံၢ်န့ၣ် ကလံာ်န့ၢ်လွဲန့ၢ်ပှၤလၢ ကမၤတၢ်အၢလီၤ. ပှၤလၢသးအိၣ်ကဲထီၣ် ယွၤအတံၤသကိးတဂၤန့ၣ် ကဘၣ်သးဟ့ တၢ်လၢယွၤသးဟ့တဖၣ်န့ၣ်လီၤ. (စံးထီၣ်ပတြၢၤ ၉၇:၁၀) လၢအဖီလာ်အံၤ မ့ၢ်တၢ်တနီၤလၢ ယွၤအတံၤသကိးတဖၣ်ဟးဆှဲးဝဲသ့ၣ်လီၤ.
တၢ်ဒဲးဘးဘၣ်ဃးတၢ်ကလုာ်ကလိၤ., “အဲၣ်ဘၢမါအဲၣ်ဘၢဝၤတဂ့ၤ.” (၂ မိၤၡ့ ၂၀:၁၄) မုၣ်ဒီးခွါအိၣ်ဃုာ်လိာ်အသး တချုးဖျီအသးစ့ၢ်ကီး ကမၣ်လီၤ.—၁ ကရံၣ်သူး ၆:၁၈.
တၢ်အီလုာ်ကိသံး. ‘ပှၤအီမူၤသံးန့ၣ် . . . တန့ၢ်ဘၣ် ယွၤအဘီအမုၢ်ဘၣ်.’—၁ ကရံၣ်သူး ၆:၁၀.
တၢ်မၤလီၤတဲာ်ဖိ, တၢ်မၤသံပှၤကညီ. “မၤသံပှၤကညီတဂ့ၤ.”—ယၤကိာ် ၂:၁၁.
တၢ်ဟုၣ်တၢ်ဘျၣ်. “ဟုၣ်တၢ်တဂ့ၤ.”—၂ မိၤၡ့ ၂၀:၁၅.
တၢ်လီတၢ်ဝ့ၤ. ယဟိဝၤန့ၣ် သးဟ့ “ပျ့ၤလၢအကတိၤတၢ်ကဘျံးကဘျၣ်” လီၤ.—ကတိၤဒိ ၆:၁၇.
တၢ်မၤဆူၣ်မၤစိး ဒီးတၢ်သးထီၣ်လၢပၢၤအီၤတန့ၢ်. ‘တၢ်မၤဆူၣ်မၤစိးတၢ်န့ၣ် [ယဟိဝၤ] သးဟ့လီၤ.’ (မၤလကံ ၂:၁၆) နီၣ်ခိအတၢ်မၤတဖၣ်အကျါန့ၣ် တၢ်သူၣ်ဒိၣ်သးထီၣ် ပၣ်ဃုာ်ဝဲလီၤ.—ကလၤတံ ၅:၁၉,၂၀.
တၢ်တၤတိၢ်တၤစ့. ‘သုတရ့လိာ်သုသးဒီး . . . ပှၤသးကွံစ့န့ၣ်တဂ့ၤ.’—၁ ကရံၣ်သူး ၅:၁၁.
တၢ်သးဟ့ပှၤအစၢၤအသွဲၣ်, ပှၤကလုာ်အဂုၤအဂၤ. “အဲၣ်သုဒုၣ်သုဒါတက့ၢ် . . . ပှၤလၢအမၤတရီတပါသု, ဒီးမၤအၢမၢနးသုန့ၣ် ဘါထုကဖၣ်န့ၣ်အဂီၢ်တက့ၢ်.”—မးသဲ ၅:၄၃, ၄၄.
တၢ်လၢယွၤစံးဘၣ်တဲဘၣ်ပှၤတဖၣ်န့ၣ် မ့ၢ်တၢ်ဂ့ၤလၢပဂီၢ်လီၤ. တၢ်ပဒ့ၣ်ဟးဆှဲး တၢ်တဂ့ၤတဘၣ်တဖၣ်န့ၣ် တညီကိးဘျီဒဲးဘၣ်. ခီဖျိလၢ ယဟိဝၤဒီးအပှၤအုၣ်အသးတဖၣ် အတၢ်မၤစၢၤန့ၣ် နဟးဆှဲး တၢ်လၢယွၤတဘၣ်အသးတဖၣ် သ့န့ၣ်လီၤ.—ယၡါယၤ ၄၈:၁၇; ဖံလံးပံၤ ၄:၁၃; ဧ့ၤဘြံၤ ၁၀:၂၄, ၂၅.