အိၣ်မူဒ်ခရံာ်ဖိအသိး
တၢ်ပှ့ၤက့ၤအဃိ ပအိၣ်ဒီးတၢ်မုၢ်လၢ်လၢ—တၢ်ဂဲၤဆၢထၢၣ်သမူထီၣ်က့ၤ
တၢ်သ့ၣ်နီၣ်ထီၣ်က့ၤအမူးန့ၣ် မ့ၢ်တၢ်ခွဲးတၢ်ယာ်တခါလၢ ပကဆိကမိၣ်တၢ်ဆိၣ်ဂ့ၤလၢ ပကဒိးန့ၢ်ဘၣ်အီၤလၢ ခါဆူညါ ခီဖျိတၢ်ပှ့ၤက့ၤအဃိန့ၣ်လီၤ. အဒိ– ဒ်သိးဒီး တၢ်ဂဲၤဆၢထၢၣ်သမူထီၣ်က့ၤန့ၣ်လီၤ. ယဟိဝၤယွၤ တတ့လီၤ ပှၤဟီၣ်ခိၣ်ဖိလၢ ကသံအဂီၢ်ဘၣ်. လၢတၢ်န့ၣ်အဃိ ဖဲပှၤလၢပအဲၣ်ဘၣ်အီၤတဂၤ သံအခါ ပသူၣ်အုးသးအုးဒိၣ်မးလီၤ. (၁ ကရံၣ်. ၁၅:၂၆) ဖဲစီၤလါစရူးသံအဆၢကတီၢ် ယ့ၣ်ၡူးထံၣ်ဘၣ်ဝဲလၢ အပျဲၢ်အဘီၣ်တဖၣ်ဟီၣ်ဝဲအဃိ အဝဲစ့ၢ်ကီးအသးဘၣ်ဒိဝဲလီၤ. (ယိၤ. ၁၁:၃၃-၃၅) ယ့ၣ်ၡူးကွၢ်လိမၤဒိး အပၢ်လၢလၢပှဲၤပှဲၤအဃိ ပနာ်သ့သပှၢ်ကတၢၢ်လၢ ပမ့ၢ်သူၣ်အုးသးအုးဖဲ ပှၤလၢပအဲၣ်ဘၣ်အီၤတဂၤသံအဆၢကတီၢ်န့ၣ် ယဟိဝၤယွၤ ကသူၣ်အုးသးအုးဝဲစ့ၢ်ကီးလီၤ. (ယိၤ. ၁၄:၇) လၢတၢ်သူၣ်ဆူၣ်သးဆူၣ်အပူၤ ယဟိဝၤယွၤခိးကွၢ်လၢ်ဝဲ တၢ်ဆၢကတီၢ်လၢ အခ့အပှၤတဖၣ် ကဂဲၤဆၢထၢၣ်သမူထီၣ်က့ၤန့ၣ်လီၤ. ပဝဲစ့ၢ်ကီး ပကြၢးခိးကွၢ်လၢ် တၢ်ဆၢကတီၢ်အဝဲန့ၣ်လီၤ.—ယိၤဘး ၁၄:၁၄, ၁၅.
ယဟိဝၤယွၤမ့ၢ် ယွၤလၢအမၤတၢ်ဂ့ၤဂ့ၤဘၣ်ဘၣ် ဒီးလီၤတံၢ်လီၤဆဲးအဃိ ပနာ်သ့သပှၢ်ကတၢၢ်လၢ တၢ်ဂဲၤဆၢထၢၣ်သမူထီၣ်က့ၤစ့ၢ်ကီး ကစၢ်ယွၤကမၤဝဲ ဂ့ၤဂ့ၤဘၣ်ဘၣ် ဒီးလီၤတံၢ်လီၤဆဲးလီၤ. (၁ ကရံၣ်. ၁၄:၃၃, ၄၀) ဖဲန့ၣ်အဆၢကတီၢ် ကအိၣ်ဒၣ်ထဲ ပကတူၢ်လိာ်မုာ် ပှၤလၢအကဂဲၤဆၢထၢၣ်သမူထီၣ်က့ၤတဖၣ်န့ၣ်လီၤ. လီၤဆီဒၣ်တၢ် ဖဲနတူၢ်ဘၣ်တၢ်သူၣ်အုးသးအုးအခါ မ့ၢ်နဆိကမိၣ်ထံ တၢ်ဂဲၤဆၢထၢၣ်သမူထီၣ်က့ၤအဂ့ၢ်ဧါ. (၂ ကရံၣ်. ၄:၁၇, ၁၈) ယဟိဝၤယွၤ ကတဲာ်ကတီၤန့ၢ်ပှၤ တၢ်ပှ့ၤက့ၤ ဒီးပာ်ဖျါထီၣ်န့ၢ်ပှၤ တၢ်ဂဲၤဆၢထၢၣ်သမူထီၣ်က့ၤအဂ့ၢ်လၢ လံာ်စီဆှံပူၤအဃိ မ့ၢ်နစံးဘျုးအီၤဧါ.—ကလီး. ၃:၁၅.
နတံၤသကိး ဒီးနဘူးနတံၢ်တဖၣ်လၢ နအဲၣ်ဒိးထံၣ်အီၤအဒိၣ်ကတၢၢ်န့ၣ် မ့ၢ်မတၤလဲၣ်
လၢလံာ်စီဆှံအပူၤ ပှၤလၢနအဲၣ်ဒိးထံၣ်ဒီး ကတိၤတၢ်ဒီးအီၤ အဒိၣ်ကတၢၢ်န့ၣ် မ့ၢ်မတၤတဖၣ်လဲၣ်