တၢ်မၤလိ ၁၁

ဘၣ်မနုၤအဃိ ပလဲၤထီၣ်တၢ်အိၣ်ဖှိၣ်ဖးဒိၣ်လဲၣ်

ယဟိဝၤပှၤအုၣ်အသးတဖၣ် အကီၢ်ရ့ၣ်တၢ်အိၣ်ဖှိၣ်လၢ ကီၢ်မဲးကစံၣ်ကိၣ် — ကီၢ်မဲးကစံၣ်ကိၣ်

တၢ်ထုးထီၣ်ရၤလီၤ လံာ်တဘ့ၣ်လၢ ကီၢ်ရ့ၣ်တၢ်အိၣ်ဖှိၣ်အပူၤ ဖဲကီၢ်ကၠၢမနံၣ် — ကီၢ်ကၠၢမနံၣ်

ယဟိဝၤပှၤအုၣ်အသးတဖၣ်လၢ ကီၢ်ရ့ၣ်တၢ်အိၣ်ဖှိၣ် ဖဲကီၢ်ဘိးစဝါနၣ် — ကီၢ်ဘိးစဝါနၣ်

ပိာ်ခွါဖိတဂၤ ဒိးဘျၢအသးလၢထံ ဖဲကီၢ်နံၣ်ကရးကွၢ် — ကီၢ်နံၣ်ကရးကွၢ်

တၢ်ဂဲၤဒိပူလၢ ဘၣ်တၢ်မၤအီၤဒီး တၢ်ကူတၢ်ကၤလၢပှၤကူကၤအီၤဖဲ လံာ်စီဆှံအစိၤ ဖဲကီၢ်ရ့ၣ်တၢ်အိၣ်ဖှိၣ်တခါလၢ ကီၢ်အံးထလံၣ် — ကီၢ်အံးထလံၣ်

ဘၣ်မနုၤအဃိ ပှၤတဖၣ်အံၤအမဲာ်ပှဲၤဒီး တၢ်နံၤကမှံလဲၣ်. မ့ၢ်လၢအဝဲသ့ၣ်ဟဲထီၣ်ဝဲ ပတၢ်အိၣ်ဖှိၣ်တဖၣ်အံၤအဃိလီၤ. လၢပျၢၤယွၤအခ့အပှၤတဖၣ် ဘၣ်တၢ်မၤလိာ်အီၤလၢ ကအိၣ်ဖှိၣ်ဝဲတနံၣ်သၢဘျီလီၤ. ဒ်န့ၣ်အသိး ပဝဲသ့ၣ်စ့ၢ်ကီးပကွၢ်လၢ် တၢ်အိၣ်ဖှိၣ်ဖးဒိၣ်လၢ ပကအိၣ်ဖှိၣ်ရိဖှိၣ်ဘၣ်ဒီး ပဒီပုၢ်ဝဲၢ်တဖၣ်လီၤ. (၅ မိၤၡ့ ၁၆:၁၆) ကိးနံၣ်ဒဲးန့ၣ် ပမၤတၢ်အိၣ်ဖှိၣ်ဖးဒိၣ် သၢဘျီလီၤ. ကဝီၤတၢ်အိၣ်ဖှိၣ် န့ၣ်အိၣ်ဝဲခံဘျီ ဒီးတဘျီန့ၣ်ဘၣ်တၢ်မၤအီၤတသီလီၤ. မ့မ့ၢ် ကီၢ်ရ့ၣ်တၢ်အိၣ်ဖှိၣ် န့ၣ်အိၣ်ဝဲတနံၣ်တဘျီဒီး ဘၣ်တၢ်မၤအီၤသၢသီလီၤ. ပဒိးန့ၢ်ဘၣ်တၢ်အဘျုးလၢ တၢ်အိၣ်ဖှိၣ်ဖးဒိၣ်တဖၣ်အံၤဒ်လဲၣ်.

တၢ်အိၣ်ဖှိၣ်ဖးဒိၣ်တဖၣ်အံၤ မၤဂၢၢ်ကျၢၤထီၣ် ခရံာ်ဖိဒီပုၢ်ဝဲၢ်တၢ်ကရၢကရိလီၤ. ဒ်ပှၤအံၣ်စရ့လးဖိတဖၣ် သးခုလၢစံးထီၣ်ပတြၢၤဘၣ် ယဟိဝၤယွၤလၢ “တၢ်အိၣ်ဖှိၣ်အပူၤ” အသိး, ပဝဲသ့ၣ်စ့ၢ်ကီးပသးခုဒိၣ်မးလၢ ပဘူၣ်ထီၣ်ဘါထီၣ်ဘၣ် ကစၢ်ဒ်သိးသိးဖဲ တၢ်အိၣ်ဖှိၣ်ဖးဒိၣ်အံၤ အဆၢကတီၢ်န့ၣ်လီၤ. (စံးထီၣ်ပတြၢၤ ၂၆:၁၂; ၁၁၁:၁) တၢ်အိၣ်ဖှိၣ်ဖးဒိၣ်တဖၣ်အံၤ ဒုးအိၣ်ထီၣ်တၢ်ခွဲးတၢ်ယာ်လီၤဆီလၢ ပကထံၣ်လိာ်ရ့လိာ်ဘၣ်ပသး ဒီးပှၤအုၣ်အသးလၢ အိၣ်လၢတၢ်အိၣ်ဖှိၣ်အဂၤ မ့တမ့ၢ် လၢအဟဲလၢ ထံဂၤကီၢ်ဂၤတဖၣ်စ့ၢ်ကီးန့ၣ်လီၤ. မုၢ်ထူၣ်အဆၢကတီၢ်န့ၣ် ပအီၣ်သကိးတၢ်အီၣ်ဒ်သိးသိးဖဲ တၢ်အိၣ်ဖှိၣ်အလီၢ်ဒီး ပဒိးန့ၢ်ဘၣ်စ့ၢ်ကီး တၢ်ခွဲးတၢ်ယာ်လၢ ပကရ့လိာ်မုာ်လိာ်သကိးပသးန့ၣ်လီၤ. (မၤတၢ် ၂:၄၂) ဖဲတၢ်အိၣ်ဖှိၣ်ဖးဒိၣ်အဆၢကတီၢ်န့ၣ် ပထံၣ်ဘၣ်တၢ်အဲၣ်လၢ ဒုးအိၣ်ဃူအိၣ်ဖိးပ “ဒီပုၢ်ဝဲၢ်ခဲလၢာ်” လၢဟီၣ်ခိၣ်ချၢန့ၣ်လီၤ.—၁ ပ့းတရူး ၂:၁၇.

တၢ်အိၣ်ဖှိၣ်ဖးဒိၣ်တဖၣ်အံၤ မၤစၢၤပှၤလၢ ပတၢ်သ့ၣ်ညါနၢ်ပၢၢ် တၢ်မ့ၢ်တၢ်တီ ကအါထီၣ်အဂီၢ်လီၤ. ပှၤအံၣ်စရ့လးဖိတဖၣ်န့ၣ် ဘၣ်တၢ်တဲနၢ်ပၢၢ်အီၤ လံာ်စီဆှံအဆၢအခီပညီအဃိ အဝဲသ့ၣ် “နၢ်ပၢၢ်” ဘၣ်ဝဲလံာ်စီဆှံ အတၢ်ကတိၤတဖၣ်ဒီး ဒိးန့ၢ်ဘၣ်ဝဲအဘျုးလီၤ. (နဃ့မယၤ ၈:၈, ၁၂) ပဝဲစ့ၢ်ကီးပပာ်လုၢ်ပာ်ပှ့ၤ လံာ်စီဆှံအတၢ်နဲၣ်လိလၢ ပဒိးန့ၢ်ဘၣ်ဖဲ ပတၢ်အိၣ်ဖှိၣ်ဖးဒိၣ်အပူၤန့ၣ်လီၤ. တၢ်ရဲၣ်တၢ်ကျဲၤတခါစုာ်စုာ်န့ၣ် သန့ၤထီၣ်အသးလၢ လံာ်စီဆှံတၢ်ဂ့ၢ်မိၢ်ပှၢ်တမံၤအဖီခိၣ်လီၤ. ခီဖျိတၢ်စံၣ်တဲၤတဲလီၤလၢ အထုးန့ၢ်ပသး, တၢ်ကစီၣ်ပိာ်ထွဲလိာ်အခံ, ဒီးတၢ်ဒုးနဲၣ်တၢ်အဒိတဖၣ်အဃိ ပဒိးန့ၢ်ဘၣ်တၢ်မၤလိလၢ ကကဲထီၣ်တၢ်မၤစၢၤလၢ ပမၤယွၤအတၢ်ဘၣ်အသး ကသ့အဂီၢ်လီၤ. လၢတၢ်အိၣ်ဖှိၣ်ဖးဒိၣ်န့ၣ်, ပနၢ်ဟူဘၣ် ပဒီပုၢ်ဝဲၢ်တဖၣ် တဲဖျါထီၣ်ဝဲအတၢ်လဲၤခီဖျိလီၤ. ဖဲအဝဲသ့ၣ်ကွၢ်ဆၢၣ်မဲာ်ဒီး တၢ်ကီတၢ်ခဲအခါ တီဒီးကစၢ်ယွၤအဃိ ကဲထီၣ်တၢ်ဂံၢ်တၢ်ဘၣ်လၢပဂီၢ်လီၤ. ဖဲပလဲၤထီၣ်ကီၢ်ရ့ၣ်တၢ်အိၣ်ဖှိၣ်အခါ, ပထံၣ်ဘၣ်တၢ်ဂဲၤဒိပူလၢ ဘၣ်တၢ်မၤအီၤဒီး တၢ်ကူတၢ်ကၤ ဒ်ပှၤကူကၤအီၤဖဲ လံာ်စီဆှံအစိၤအသိးလီၤ. လၢတၢ်န့ၣ်အဃိ ဒုးကဲထီၣ်ဝဲလံာ်စီဆှံတၢ်ဂ့ၢ်တဖၣ် ဒ်တၢ်အနီၢ်ကီၢ်အသိးဒီးဟ့ၣ်ပှၤ တၢ်မၤလိလၢအဘျုးအိၣ်လီၤ. ဖဲတၢ်အိၣ်ဖှိၣ်တဖၣ်န့ၣ် တၢ်ဒိးဘျၢထံ အတၢ်ရဲၣ်တၢ်ကျဲၤအိၣ်ဝဲကိးဘျီဒဲး လၢပှၤလၢကဒိးဘျၢထံတဖၣ်အဂီၢ်လီၤ.

ဘၣ်မနုၤအဃိ တၢ်အိၣ်ဖှိၣ်ဖးဒိၣ်တဖၣ်န့ၣ် မ့ၢ်တၢ်ဆၢကတီၢ်လၢ အပှဲၤဒီးတၢ်သူၣ်ခုသးခုလဲၣ်.
နမ့ၢ်လဲၤထီၣ် တၢ်အိၣ်ဖှိၣ်ဖးဒိၣ်န့ၣ် နကဒိးန့ၢ်ဘၣ်တၢ်အဘျုးမနုၤလဲၣ်.

ဃုသ့ၣ်ညါအါထီၣ်တက့ၢ်

နမ့ၢ်အဲၣ်ဒိးသ့ၣ်ညါအါထီၣ် ပဒီပုၢ်ဝဲၢ်တၢ်ကရၢကရိအဂ့ၢ်န့ၣ်, ဝံသးစူၤဟဲထီၣ်ပတၢ်အိၣ်ဖှိၣ်ဖးဒိၣ်လၢခံတဘျီတက့ၢ်. ပှၤလၢအမၤလိနၤလံာ်စီဆှံတဂၤန့ၣ် ဒုးနဲၣ်နၤတၢ်အိၣ်ဖှိၣ်ဖးဒိၣ် အတၢ်ရဲၣ်တၢ်ကျဲၤအလံာ်သ့အဃိ နကသ့ၣ်ညါဘၣ်တၢ်ဂ့ၢ်လၢ တၢ်ကတိၤသကိးအီၤတဖၣ်န့ၣ်လီၤ. လၢနလံာ်နံၣ်လံာ်လါအပူၤ မၤနီၣ်ဃာ်တၢ်ဆၢကတီၢ်ဒီး တၢ်လီၢ်လၢပှၤကမၤတၢ်အိၣ်ဖှိၣ်ဖးဒိၣ် လၢခံတဘျီန့ၣ်တက့ၢ်. နမ့ၢ်အဲၣ်ဒိးဟဲထီၣ်န့ၣ် နဟဲထီၣ်သ့လီၤ.