တၢ်မၤလိ ၁
ကစၢ်ယွၤမ့ၢ်မတၤလဲၣ်
၁, ၂. ပှၤအါဂၤန့ၣ် သံကွၢ်ဝဲတၢ်သံကွၢ်မနုၤတဖၣ်လဲၣ်.
ဖိသၣ်တဖၣ် သံကွၢ်တၢ်သံကွၢ်အါမးလီၤ. နစံးဆၢက့ၤအဝဲသ့ၣ်မ့ၢ်ဝံၤဒီး ဘၣ်သ့ၣ်သ့ၣ်အဝဲသ့ၣ်ကဆဲးသံကွၢ်နၤလၢ ‘ဘၣ်မနုၤအဃိလဲၣ်’ န့ၣ်လီၤ. ဒီးနကဂုာ်ကျဲးစၢး ဟ့ၣ်အီၤတၢ်စံးဆၢဘၣ်ဆၣ် အဝဲသ့ၣ်ကသံကွၢ်ကဒီးနၤလၢ ‘ဘၣ်မနုၤအဃိလဲၣ်’ န့ၣ်လီၤ.
၂ ပမ့မ့ၢ် ပှၤသးစၢ်မ့ၢ်ဂ့ၤ ပှၤသးပှၢ်မ့ၢ်ဂ့ၤ ပအိၣ်ဒီးတၢ်သံကွၢ်တဖၣ်လီၤ. ဘၣ်သ့ၣ်သ့ၣ် ပကသံကွၢ်လီၤပသးလၢ မ့ၢ်ပကအီၣ်ဘၣ်အီဘၣ် ဒီးကူဘၣ်သိးဘၣ်ဒ်လဲၣ် မ့တမ့ၢ် ပကပှ့ၤတၢ်မနုၤလဲၣ်န့ၣ်လီၤ. တကးဒံးဘၣ်ပအိၣ်ဒီးတၢ်သံကွၢ်အရ့ဒိၣ်လၢ ဘၣ်ဃးဒီးပတၢ်အိၣ်မူခဲအံၤဒီးလၢ ခါဆူညါအဂီၢ်စ့ၢ်ကီးလီၤ. ဘၣ်ဆၣ်ပမ့ၢ်တဒိးန့ၢ်တၢ်စံးဆၢလၢ အလီၤသူၣ်မံသးမုာ်န့ၣ် ဘၣ်သ့ၣ်သ့ၣ်ပတအဲၣ်ဒိး ဃုတၢ်သံကွၢ်တဖၣ်အံၤ အတၢ်စံးဆၢလၢၤဘၣ်.
၃. ဘၣ်မနုၤအဃိ ပှၤအါဂၤန့ၣ်ဆိကမိၣ်ဝဲလၢ အဝဲသ့ၣ်ဃုဝဲ တၢ်သံကွၢ်လၢအရ့ဒိၣ်တဖၣ်အံၤ အတၢ်စံးဆၢ တဘၣ်ဘၣ်လဲၣ်.
၃ မ့ၢ်လံာ်စီဆှံအိၣ်ဒီး တၢ်သံကွၢ်လၢအရ့ဒိၣ်တဖၣ် အတၢ်စံးဆၢဧါ. ပှၤတနီၤနီၤ ဆိကမိၣ်ဝဲလၢ ဘၣ်သ့ၣ်သ့ၣ် ကအိၣ်ဝဲလီၤ. ဘၣ်ဆၣ်သနာ်က့ အဝဲသ့ၣ်တူၢ်ဘၣ်ဝဲလၢ လံာ်စီဆှံန့ၣ် ပနၢ်ပၢၢ်ဘၣ်အီၤကီဒိၣ်မးလီၤ. အဝဲသ့ၣ်ဆိကမိၣ်ဝဲလၢ ထဲဒၣ်တၢ်ဘူၣ်တၢ်ဘါခိၣ်နၢ်ဒီး သရၣ်တဖၣ်သ့ၣ်ညါဝဲ တၢ်သံကွၢ်တဖၣ်အံၤအတၢ်စံးဆၢန့ၣ်လီၤ. ဒီးပှၤအဂၤတနီၤနီၤန့ၣ် တအဲၣ်ဒိးတဲဖျါထီၣ်လၢ အဝဲသ့ၣ်တသ့ၣ်ညါဝဲ တၢ်စံးဆၢတဖၣ်ဘၣ်. မ့ၢ်လၢအဝဲသ့ၣ်ဘၣ်ယိၣ်ဝဲလၢ ကဒိးန့ၢ်ဘၣ်တၢ်မဲာ်ဆှးအဃိန့ၣ်လီၤ. မ့မ့ၢ်နၤန့ၣ်နဆိကမိၣ်ဒ်လဲၣ်.
၄, ၅. နအိၣ်ဒီးတၢ်သံကွၢ်လၢ အရ့ဒိၣ်မနုၤတဖၣ်လဲၣ်. ဒီးဘၣ်မနုၤအဃိ ကြၢးလၢနဃု တၢ်စံးဆၢလဲၣ်.
၄ ဘၣ်မနုၤအဃိ ယဟဲအိၣ်မူဘၣ်လၢ ဟီၣ်ခိၣ်ချၢလဲၣ်. ဖဲယသံအခါန့ၣ် တၢ်ကမၤအသးဒီးယၤဒ်လဲၣ်. ကစၢ်ယွၤ မ့ၢ်ပှၤဒ်လဲၣ်တဂၤလဲၣ်. နကအဲၣ်ဒိးသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢလီၤ. သရၣ်လၢအမံၤဟူသၣ်ဖျါတဂၤ လၢအမ့ၢ်ယ့ၣ်ၡူးန့ၣ် စံးဝဲဒ်အံၤလီၤ. “ဃ့တၢ်တက့ၢ်, ဒီးတၢ်ကဟ့ၣ်သုလီၤ. ဃုတၢ်တက့ၢ်, ဒီးသုကထံၣ်န့ၢ်တၢ်လီၤ. ဒိတကျိာ်တၢ်တက့ၢ်, ဒီးတၢ်ကအိးထီၣ်န့ၢ် သုဂီၢ်လီၤ.” (မးသဲ ၇:၇) လၢတၢ်န့ၣ်အဃိ တချုးနဒိးန့ၢ်ဘၣ်တၢ်စံးဆၢလၢ အလီၤသူၣ်မံသးမုာ်ဒံးဘၣ်န့ၣ် တဘၣ်ပာ်စၢ်လီၤနသးတဂ့ၤ.
၅ နမ့ၢ် “ဃု” တၢ်န့ၣ် နကထံၣ်န့ၢ် တၢ်စံးဆၢလၢ လံာ်စီဆှံအပူၤလီၤ. (ကတိၤဒိ ၂:၁-၅) တၢ်စံးဆၢတဖၣ်အံၤန့ၣ် ပနၢ်ပၢၢ်ဘၣ်အီၤတကီဘၣ်. အါန့ၢ်အန့ၣ် တၢ်လၢနမၤလိဘၣ်အီၤတဖၣ်န့ၣ် ကကဲထီၣ်တၢ်မၤစၢၤဒ်သိး နကအိၣ်ဒီးတၢ်သးခုလၢ ဆၢကတီၢ်ခဲအံၤလီၤ. တကးဒံးဘၣ် နကအိၣ်ဒီးတၢ်မုၢ်လၢ်လၢ ခါဆူညါအဂီၢ်န့ၣ်လီၤ. ခဲအံၤ ပကဆိကမိၣ်သကိး တၢ်သံကွၢ်တဖျၢၣ်လၢ အမၤတံာ်တာ် ပှၤအါဂၤအသးန့ၣ်လီၤ.
မ့ၢ်ကစၢ်ယွၤသးအိၣ်ပှၤ သပှၢ်ကတၢၢ်ဧါ မ့တမ့ၢ် မၤနးမၤဖှီၣ်ပှၤဧါ
၆. ဖဲပှၤဟီၣ်ခိၣ်ဖိတဖၣ် ထံၣ်ဘၣ်တၢ်ကီတၢ်ခဲအခါ ဘၣ်မနုၤအဃိ အဝဲသ့ၣ်တနီၤဆိကမိၣ်ဝဲလၢ ကစၢ်ယွၤတသးအိၣ် အဝဲသ့ၣ်လဲၣ်.
၆ ပှၤအါဂၤဆိကမိၣ်ဝဲလၢ ကစၢ်ယွၤတသးအိၣ်ပှၤဘၣ်. အဝဲသ့ၣ်တူၢ်ဘၣ်ဝဲလၢ ကစၢ်ယွၤမ့ၢ်သးအိၣ်ပှၤန့ၣ် ဟီၣ်ခိၣ်အတၢ်အိၣ်သးတဖၣ် ကလီၤဆီန့ၢ်ဒံးတၢ်အိၣ်သးလၢ ပထံၣ်ဘၣ်အီၤလၢ မုၢ်မဆါတနံၤအံၤလီၤ. ဟီၣ်ခိၣ်အံၤ ပှဲၤဒီးတၢ်ဒုးတၢ်ယၤ, တၢ်သူၣ်ဟ့သးဟ့ဒီး တၢ်လၢအလီၤသူၣ်အုးသးအုး အိၣ်ဝဲသကုၤဆးဒးလီၤ. ဒီးပှၤဟီၣ်ခိၣ်ဖိတဖၣ် တူၢ်ဘၣ်တၢ်ဆူးတၢ်ဆါ, တၢ်နးတၢ်ဖှီၣ်ဒီး ထံၣ်ဘၣ်ဝဲတၢ်သံတၢ်ပှၢ်လီၤ. ပှၤတနီၤသံကွၢ်ဝဲလၢ ‘ကစၢ်ယွၤမ့ၢ်သးအိၣ်ပှၤန့ၣ် ဒ်သိးတၢ်ကီတၢ်ခဲတဖၣ်အံၤသုတကဲထီၣ်တဂ့ၤအဂီၢ် ဘၣ်မနုၤအဃိအဝဲတတြီန့ၢ်ပှၤလဲၣ်.’
၇. (က) တၢ်ဘူၣ်တၢ်ဘါခိၣ်နၢ်တဖၣ် ဒုးနာ်န့ၢ်ပှၤလၢ ကစၢ်ယွၤမၤနးမၤဖှီၣ်ဝဲ ပှၤဟီၣ်ခိၣ်ဖိလၢ ကျဲဒ်လဲၣ်. (ခ) ဘၣ်မနုၤအဃိပနာ်သ့လၢ ကစၢ်ယွၤတဒုးအိၣ်ထီၣ် တၢ်အၢတၢ်သီလဲၣ်.
၇ တဘျီတခီၣ်န့ၣ် တၢ်ဘူၣ်တၢ်ဘါခိၣ်နၢ်တဖၣ် ဒုးနာ်န့ၢ်ပှၤလၢ ကစၢ်ယွၤန့ၣ် မၤနးမၤဖှီၣ်ဝဲပှၤဟီၣ်ခိၣ်ဖိလီၤ. ဖဲတၢ်လီၤသူၣ်အုးသးအုး ဟဲအိၣ်ထီၣ်ဝဲတမံၤမံၤအခါ အဝဲသ့ၣ်တဲဝဲလၢ ကစၢ်ယွၤမၤကဲထီၣ်ဝဲလီၤ. ဒီးတဲစ့ၢ်ကီးဝဲလၢ တၢ်အံၤမ့ၢ်တၢ်ဘၣ်ယွၤအသးန့ၣ်လီၤ. ဖဲအဝဲသ့ၣ်တဲဝဲဒ်အံၤအခါ မ့ၢ်အဝဲသ့ၣ်ပာ်တၢ်ကမၣ်လၢ ယွၤအလိၤန့ၣ်လီၤ. ဘၣ်ဆၣ်လံာ်စီဆှံပာ်ဖျါထီၣ်ဝဲလၢ ကစၢ်ယွၤ တဒုးအိၣ်ထီၣ်တၢ်အၢတၢ်သီနီတဘျီဘၣ်. ယၤကိာ် ၁:၁၃ စံးဝဲလၢ ကစၢ်ယွၤတမၤကွၢ်ပှၤလၢ တၢ်အၢတၢ်သီဘၣ်. လံာ်စီဆှံတဆၢအံၤ ပာ်ဖျါထီၣ်ဝဲလၢ “ပှၤဘၣ်တၢ်လ့ပစီန့ၣ်, မ်အသုတစံးလၢယဘၣ်တၢ်လ့ပစီလၢယွၤ, နီတဂၤတဂ့ၤ. အဂ့ၢ်ဒ်အံၤ, ယွၤတဘၣ်ဘၣ်တၢ်လ့ပစီလၢတၢ်အၢတၢ်သီဘၣ်, ဒီးအကစၢ်ဒၣ်ဝဲတလ့ပစီဘၣ်ပှၤနီတဂၤဘၣ်.” လံာ်စီဆှံတဆၢအံၤ ပာ်ဖျါထီၣ်ဝဲလၢ ကစၢ်ယွၤတတြီဆၢတၢ်အၢတၢ်သီလၢအဟဲကဲထီၣ်အသးသ့ၣ်တဖၣ်ဒံးဘၣ်. ဘၣ်ဆၣ် အဝဲတမၤကဲထီၣ်ဝဲ တၢ်သ့ၣ်တဖၣ်အံၤနီတဘျီဘၣ်. (ဖး ယိၤဘး ၃၄:၁၀-၁၂ တက့ၢ်.) ခဲအံၤပကကွၢ်သကိးတၢ်အဒိတခါလီၤ.
၈, ၉. ဖဲပကွၢ်ဆၢၣ်မဲာ်ဘၣ် တၢ်ကီတၢ်ခဲအခါန့ၣ် ဘၣ်မနုၤအဃိ ပတကြၢးပာ်တၢ်ကမၣ်လၢ ယွၤအလိၤလဲၣ်. ဟ့ၣ်တၢ်အဒိတက့ၢ်.
၈ ဆိကမိၣ်ကွၢ် ပိာ်ခွါသးစၢ်တဂၤ အိၣ်လၢအပၢ်အဟံၣ်ပူၤတက့ၢ်. အပၢ်အဲၣ်အီၤဒိၣ်မးအဃိ သိၣ်လိအီၤဒ်သိး အဝဲဆၢတဲာ်တၢ်လၢအဘၣ် ကသ့အဂီၢ်လီၤ. ဘၣ်ဆၣ် ပိာ်ခွါသးစၢ်တဂၤအံၤ ထီဒါအပၢ်ဒီးဟးထီၣ်ကွံာ်လၢ ဟံၣ်ပူၤလီၤ. အဝဲမၤတၢ်အၢတၢ်သီတဖၣ်ဒီး ထံၣ်ဘၣ်ဝဲတၢ်ကီတၢ်ခဲလီၤ. မ့ၢ်နကပာ်တၢ်ကမၣ်လၢအပၢ်အလိၤ ခီဖျိလၢအဝဲတတြီအဖိခွါ ဖဲအဟးထီၣ်လၢဟံၣ်ပူၤအဆၢကတီၢ်န့ၣ်ဧါ. နတပာ်ဘၣ်. (လူၤကၣ် ၁၅:၁၁-၁၃) ဒ်ပၢ်လၢအဂ့ၤတဂၤအသိး, ဖဲပှၤဟီၣ်ခိၣ်ဖိသ့ၣ်တဖၣ် ပာ်လီၤအသးလၢ ကထီဒါအီၤဒီးမၤတၢ်အၢတၢ်သီအခါ ကစၢ်ယွၤတတြီအဝဲသ့ၣ်ဘၣ်. လၢတၢ်န့ၣ်အဃိ ဖဲတၢ်အၢတၢ်သီတဖၣ်ဟဲအိၣ်ထီၣ်အခါ ပကြၢးသ့ၣ်နီၣ်ထီၣ်လၢ ကစၢ်ယွၤတမၤအိၣ်ထီၣ်ဝဲ တၢ်သ့ၣ်တဖၣ်အံၤဘၣ်. ဒီးတကြၢးလၢပပာ်တၢ်ကမၣ်လၢ ယွၤအလိၤစ့ၢ်ကီးဘၣ်.
၉ ဘၣ်မနုၤအဃိ ကစၢ်ယွၤတတြီဝဲ တၢ်အၢတၢ်သီလၢအဟဲကဲထီၣ်အသးတဖၣ်လဲၣ်န့ၣ် တၢ်ဂ့ၢ်လၢအဂ့ၤန့ၣ် ကဘၣ်အိၣ်ဝဲတမံၤမံၤလီၤ. ဘၣ်ဃးဒီးတၢ်ဂ့ၢ်သ့ၣ်တဖၣ်အံၤ လံာ်စီဆှံပာ်ဖျါထီၣ်ဝဲဒ်လဲၣ်န့ၣ် နကမၤလိဘၣ်လၢ တၢ်မၤလိ ၁၁ အပူၤလီၤ. ဘၣ်ဆၣ် ပနာ်သ့လၢကစၢ်ယွၤအဲၣ်ပှၤဒိၣ်မး ဒီးအဝဲတဒုးအိၣ်ထီၣ်ဝဲ တၢ်ကီတၢ်ခဲလၢ ပတူၢ်ဘၣ်သ့ၣ်တဖၣ်အံၤဘၣ်. နီၢ်နီၢ်န့ၣ် အဝဲမ့ၢ်ပှၤထဲတဂၤဧိၤလၢ အမၤလီၤမၢ်ကွံာ် ပတၢ်ကီတၢ်ခဲသ့ဝဲန့ၣ်လီၤ.—ယၡါယၤ ၃၃:၂.
၁၀. ကစၢ်ယွၤကမၤဂ့ၤထီၣ်က့ၤ တၢ်ဟးဂူာ်ဟးဂီၤလၢ ပှၤအၢပှၤသီဒုးအိၣ်ထီၣ်ဝဲတဖၣ်န့ၣ် ဘၣ်မနုၤအဃိလၢ ပနာ်န့ၢ်အီၤသ့လဲၣ်.
၁၀ အါန့ၢ်အန့ၣ် ကစၢ်ယွၤန့ၣ် စီဆှံဝဲလီၤ. (ယၡါယၤ ၆:၃) တၢ်အံၤအဲၣ်ဒိးစံးဝဲလၢ တၢ်လၢအဝဲမၤဝဲကိးမံၤဒဲးန့ၣ် တီဝဲလိၤဝဲ, ကဆှဲကဆှီဝဲ, ဒီးကစၢ်တမၤတၢ်အၢတၢ်သီနီတစဲးဘၣ်. လၢတၢ်န့ၣ်အဃိ ပနာ်န့ၢ်အီၤသ့လီၤ. ပှၤဟီၣ်ခိၣ်ဖိတဖၣ် တဒ်သိးဒီးယွၤဘၣ်. တဘျီတခီၣ်န့ၣ် အဝဲသ့ၣ်မၤဘၣ်တၢ်ကမၣ်လီၤ. ပဒိၣ်လၢအတီအလိၤတဂၤစ့ၢ်ကီး တအိၣ်ဒီးတၢ်စိတၢ်ကမီၤလၢလၢပှဲၤပှဲၤဒ်သိး ကမၤဂ့ၤထီၣ်က့ၤတၢ်လၢ ပှၤအၢပှၤသီမၤဟးဂီၤဝဲတဖၣ်ဘၣ်. ပှၤတအိၣ်ဒီးတၢ်စိတၢ်ကမီၤ ဒ်သိးဒီးယွၤနီတဂၤဘၣ်. တၢ်ဟးဂူာ်ဟးဂီၤလၢ ပှၤအၢပှၤသီဒုးအိၣ်ထီၣ်ဝဲတဖၣ်န့ၣ် ကစၢ်ယွၤမၤဂ့ၤထီၣ်က့ၤဝဲသ့ ဒီးအဝဲကမၤဝဲသပှၢ်ကတၢၢ်လီၤ. တကးဒံးဘၣ် အဝဲကမၤကတၢၢ်ကွံာ်ဝဲ တၢ်အၢတၢ်သီလီၤထူလီၤယိာ်လီၤ.—ဖး စံးထီၣ်ပတြၢၤ ၃၇:၉-၁၁ တက့ၢ်.
ဖဲပှၤဟီၣ်ခိၣ်ဖိတဖၣ် ဘၣ်နးဘၣ်ဖှီၣ်အခါ ကစၢ်ယွၤတူၢ်ဘၣ်ဝဲဒ်လဲၣ်
၁၁. ဘၣ်ဃးဒီးနတၢ်ကီတၢ်ခဲန့ၣ် ကစၢ်ယွၤတူၢ်ဘၣ်ဝဲဒ်လဲၣ်.
၁၁ ဘၣ်ဃးဒီး ဟီၣ်ခိၣ်အတၢ်အိၣ်သးဒီး တၢ်လၢနကွၢ်ဆၢၣ်မဲာ်ဘၣ်တဖၣ်န့ၣ် ကစၢ်ယွၤတူၢ်ဘၣ်ဝဲဒ်လဲၣ်. လံာ်စီဆှံပာ်ဖျါထီၣ်ဝဲလၢ ယွၤ “အဲၣ်တၢ်စံၣ်ညီၣ်တီ” န့ၣ်လီၤ. (စံးထီၣ်ပတြၢၤ ၃၇:၂၈) လၢတၢ်န့ၣ်အဃိ အဝဲပာ်သူၣ်ပာ်သးဝဲ တၢ်အဘၣ်ဒီးတၢ်လၢအကမၣ် လီၤတံၢ်လီၤဆဲးလီၤ. ဖဲပှၤဟီၣ်ခိၣ်ဖိ ထံၣ်ဘၣ်တၢ်ကီတၢ်ခဲအဆၢကတီၢ်န့ၣ် ကစၢ်ယွၤတဘၣ်အသးဘၣ်. လၢညါခီဖဲကစၢ်ယွၤထံၣ်ဘၣ်ဝဲလၢ ဟီၣ်ခိၣ်ပှဲၤဒီး တၢ်အၢတၢ်သီအခါန့ၣ် လံာ်စီဆှံပာ်ဖျါထီၣ်ဝဲလၢ “အသးအုးလၢအသးကံၢ်ပူၤ” လီၤ. (၁ မိၤၡ့ ၆:၅, ၆) ကစၢ်ယွၤတဆီတလဲဝဲ အတၢ်ပာ်သူၣ်ပာ်သးဘၣ်. (မၤလကံ ၃:၆) လံာ်စီဆှံပာ်ဖျါထီၣ်လၢ ကစၢ်ယွၤသးအိၣ်နၤလီၤ.—ဖး ၁ ပ့းတရူး ၅:၇ တက့ၢ်.
လံာ်စီဆှံသိၣ်လိပှၤလၢ ယဟိဝၤယွၤန့ၣ် မ့ၢ်တၢ်ဘၣ်တ့ကစၢ်လၢ အပှဲၤဒီးတၢ်အဲၣ်တၢ်ကွံလီၤ
၁၂, ၁၃. (က) ဘၣ်မနုၤအဃိ ပအဲၣ်တၢ်ဒီးသးအိၣ်ပှၤဂၤလဲၣ်, ဘၣ်ဃးဒီးတၢ်နးတၢ်ဖှီၣ်လၢဟီၣ်ခိၣ်ချၢအံၤန့ၣ် နတူၢ်ဘၣ်ဒ်လဲၣ်. (ခ) ကစၢ်ယွၤကမၤကတၢၢ်ကွံာ် တၢ်နးတၢ်ဖှီၣ်ဒီးတၢ်တတီတလိၤန့ၣ် ဘၣ်မနုၤအဃိ ပနာ်န့ၢ်သ့ဝဲလဲၣ်.
၁၂ လံာ်စီဆှံပာ်ဖျါထီၣ်စ့ၢ်ကီးဝဲလၢ ကစၢ်ယွၤတ့လီၤပှၤ ဒ်အက့ၢ်အဂီၤအသိးလီၤ. (၁ မိၤၡ့ ၁:၂၆) တၢ်အံၤအဲၣ်ဒိးစံးဝဲလၢ ကစၢ်ယွၤတ့လီၤပှၤဃုာ်ဒီး အတၢ်ဂ့ၤတၢ်ဝါတဖၣ်န့ၣ်လီၤ. လၢတၢ်န့ၣ်အဃိ ဖဲနထံၣ်ဘၣ်ပှၤလၢ အတၢ်ကမၣ်တအိၣ်တဖၣ် ဘၣ်တၢ်မၤအၢမၤသီအီၤအခါ နကတူၢ်ဘၣ်တၢ်သးအုးန့ၣ်လီၤ. ဒ်န့ၣ်အသိးကစၢ်ယွၤစ့ၢ်ကီး ဖဲအဝဲထံၣ်ဘၣ်ဝဲတၢ်မၤအသးသ့ၣ်တဖၣ်အံၤအခါ ကတူၢ်ဘၣ်ဝဲနးန့ၢ်နၤတက့ၢ်လီၤ. ပသ့ၣ်ညါဘၣ်သ့ဒ်လဲၣ်.
၁၃ လံာ်စီဆှံသိၣ်လိပှၤလၢ “ယွၤမ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) တၢ်လၢယွၤမၤဝဲကိးမံၤဒဲးန့ၣ် မၤဝဲလၢအတၢ်အဲၣ်တၢ်ကွံထိၣ်ဟူးထိၣ်ဂဲၤထီၣ်အီၤအဃိလီၤ. ခီဖျိလၢယွၤအဲၣ်တၢ်အဃိ ပအဲၣ်တၢ်လီၤ. ဆိကမိၣ်ကွၢ်– နမ့ၢ်အိၣ်ဒီးတၢ်စိတၢ်ကမီၤန့ၣ် နကမၤကတၢၢ်ကွံာ် တၢ်နးတၢ်ဖှီၣ်ဒီး တၢ်တတီတလိၤတမ့ၢ်ဘၣ်ဧါ. မ့ၢ်လၢနအဲၣ်ဘၣ်ပှၤဂၤအဃိ နကမၤကတၢၢ်ကွံာ်သပှၢ်ကတၢၢ်လီၤ. ကစၢ်ယွၤအိၣ်ဒီးတၢ်စိတၢ်ကမီၤဒီး အဲၣ်ပှၤအဃိ အဝဲကမၤကတၢၢ်ကွံာ်ဝဲ တၢ်နးတၢ်ဖှီၣ်ဒီးတၢ်တတီတလိၤသပှၢ်ကတၢၢ်လီၤ. နနာ်သ့သပှၢ်တၢၢ်လၢ ကစၢ်ယွၤအတၢ်စံးပာ်တဖၣ် လၢဘၣ်တၢ်ပာ်ဖျါထီၣ်အီၤဖဲ လံာ်အံၤအခီၣ်ထံးန့ၣ် ကဟဲလၢပှဲၤထီၣ်ဝဲကိးခါဒဲးလီၤ. ဘၣ်ဆၣ်နနာ်န့ၢ် တၢ်အၢၣ်လီၤအီလီၤတဖၣ်အံၤကသ့အဂီၢ် နကဘၣ်သ့ၣ်ညါအါထီၣ်ယွၤအဂ့ၢ်လီၤ.
ကစၢ်ယွၤအဲၣ်ဒိးလၢ နကသ့ၣ်ညါအီၤ
နမ့ၢ်အဲၣ်ဒိးကဲထီၣ် ပှၤတဂၤဂၤအတံၤသကိးန့ၣ် နကတဲဘၣ်အီၤလၢနမံၤလီၤ. ကစၢ်ယွၤပာ်ဖျါထီၣ်န့ၢ်ပှၤ အမံၤလၢလံာ်စီဆှံအပူၤလီၤ
၁၄. ကစၢ်ယွၤန့ၣ် အမံၤဒ်လဲၣ် ဒီးဘၣ်မနုၤအဃိ ပကြၢးသူအီၤလဲၣ်.
၁၄ နမ့ၢ်အဲၣ်ဒိးကဲထီၣ် ပှၤတဂၤဂၤအတံၤသကိးန့ၣ် အဆိကတၢၢ် နကတဲအီၤတၢ်မနုၤလဲၣ်. နကတဲဘၣ်အီၤနမံၤလီၤ. မ့ၢ်ကစၢ်ယွၤအိၣ်ဒီးအမံၤဧါ. တၢ်ဘူၣ်တၢ်ဘါခိၣ်နၢ်တဖၣ် စံးဝဲလၢကစၢ်ယွၤန့ၣ် အမံၤမ့ၢ်ဝဲ ကစၢ်ယွၤ မ့တမ့ၢ် ကစၢ်န့ၣ်လီၤ. တၢ်သ့ၣ်တဖၣ်အံၤ တမ့ၢ်ယွၤအမံၤဘၣ်. တၢ်အံၤမ့ၢ်ဒၣ် မံၤလၤသၣ်ကပီၤဒ်သိး “စီၤပၤ” မ့တမ့ၢ် “ကီၢ်ခိၣ်ကျၢၢ်” န့ၣ်လီၤ. ဒီးကစၢ်ယွၤစံးဘၣ်ပှၤလၢ အမံၤမ့ၢ် ယဟိဝၤလီၤ. စံးထီၣ်ပတြၢၤ ၈၃:၁၈ ပာ်ဖျါထီၣ်ဝဲလၢ– “ဒီးကသ့ၣ်ညါလၢ နဲဒၣ်တဂၤဃီ လၢနမံၤမ့ၢ်ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါ အဖီခိၣ်လီၤ.” ပှၤကွဲးလံာ်စီဆှံတဖၣ်န့ၣ် ကွဲးထၢနုာ်ဝဲယွၤအမံၤ အဘျီလၢအကထိန့ၣ်လီၤ. လၢတၢ်န့ၣ်အဃိ ကစၢ်ယွၤအဲၣ်ဒိးလၢ နကသ့ၣ်ညါအမံၤဒီးသူအီၤလီၤ. ကစၢ်ယွၤအဲၣ်ဒိးလၢ နကကဲထီၣ်အတံၤသကိးအဃိ အဝဲဒုးသ့ၣ်ညါနၤလၢအမံၤလီၤ.
၁၅ မံၤလၢအမ့ၢ် ယဟိဝၤန့ၣ်အခီပညီမ့ၢ်မနုၤလဲၣ်.
၁၅ ကစၢ်ယွၤအမံၤလၢအမ့ၢ် ယဟိဝၤန့ၣ် အိၣ်ဒီးအခီပညီ ဒိၣ်ဒိၣ်ယိာ်ယိာ်လီၤ. မံၤအံၤအခီပညီမ့ၢ်ဝဲ ကစၢ်ယွၤအတၢ်အၢၣ်လီၤအီလီၤ တခါဂ့ၤတခါဂ့ၤ ဒီးအတၢ်တိာ်ပာ်န့ၣ် အဝဲမၤလၢထီၣ်ပှဲၤထီၣ်ဝဲသ့လီၤ. ကစၢ်ယွၤကမၤဝဲဒ်အံၤအဂီၢ်န့ၣ် ပှၤတြီအီၤတသ့ နီတဂၤဘၣ်. ဒီးမံၤလၢအမ့ၢ် ယဟိဝၤန့ၣ် ကြၢးဒီးအီၤထဲတဂၤဧိၤလီၤ.a
၁၆, ၁၇. (က) “သ့တၢ်လၢာ်ကစၢ်” (ခ) “တၢ်အစိၤအဃၣ်အစီၤပၤ” (ဂ) “တၢ်ဘၣ်တ့ကစၢ်” န့ၣ် အခီပညီဒ်လဲၣ်.
၁၆ ဘၣ်ဃးဒီး ယဟိဝၤယွၤန့ၣ် စံးထီၣ်ပတြၢၤ ၈၃:၁၈ စံးဝဲလၢ– “နဲဒၣ်တဂၤဃီ . . . န့ၣ်မ့ၢ်တၢ်ထီကတၢၢ်တဂၤ” လီၤ. ဒီး လီၣ်ဖျါ ၁၅:၃ စံးစ့ၢ်ကီးဝဲလၢ “သ့တၢ်လၢာ်ကစၢ်ယွၤဧၢ, နတၢ်မၤန့ၣ် မ့ၢ်တၢ်အဒိၣ် ဒီးတၢ်ဒုးကမၢကမၣ်ပသးလီၤ. တၢ်အစိၤအဃၣ် အစီၤပၤဧၢ, နကျဲတဖၣ်န့ၣ်မ့ၢ်အတီအလိၤ, ဒီးအမ့ၢ်အတီလီၤ.” မံၤလၤသၣ်ကပီၤလၢအမ့ၢ် “သ့တၢ်လၢာ်ကစၢ်” န့ၣ်အခီပညီမ့ၢ်မနုၤလဲၣ်. တၢ်အံၤအခီပညီမ့ၢ်ဝဲ ယဟိဝၤယွၤန့ၣ်အစိအကမီၤဒိၣ်န့ၢ်ဒံး ပှၤကိးဂၤဒဲးန့ၣ်လီၤ. ဒီးမံၤလၤသၣ်ကပီၤလၢအမ့ၢ် “တၢ်အစိၤအဃၣ်အစီၤပၤ” န့ၣ် အခီပညီမ့ၢ်ဝဲဒၣ် အဝဲအိၣ်ပာ်စၢၤဝဲ အစိၤစိၤဃၣ်ဃၣ်လီၤ. စံးထီၣ်ပတြၢၤ ၉၀:၂ ပာ်ဖျါထီၣ်ဝဲလၢ ကစၢ်ယွၤန့ၣ်အိၣ်ပာ်စၢၤဝဲ လၢပျၢၤလၢကစၢၤ ဒီးကအိၣ်ဝဲလီၤထူလီၤယိာ်န့ၣ်လီၤ. လၢတၢ်န့ၣ်အဃိ တမ့ၢ်တၢ်လၢအလီၤကမၢကမၣ်ဘၣ်ဧါ.
၁၇ ထဲဒၣ်ယဟိဝၤယွၤတဂၤဧိၤန့ၣ် မ့ၢ်တၢ်ဘၣ်တ့ကစၢ်လီၤ. လီၣ်ဖျါ ၄:၁၁ စံးဝဲလၢ “ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်, ဒီးမ့ၢ်နသးအိၣ်ဒီး, ကဲထီၣ်ဝဲ, ဒီးဘၣ်တၢ်တ့လီၤအီၤလီၤ.” မူခိၣ်ကလူးတဖၣ်အိၣ်လၢမူခိၣ်, တုၤလီၤလၢ ဆၣ်တဖၣ်, သ့ၣ်သူဝၣ်သၣ်တဖၣ် အိၣ်လၢအထူၣ်လိၤဒီး ညၣ်တဖၣ်လၢပီၣ်လဲၣ်ပူၤန့ၣ် ယဟိဝၤယွၤ တ့လီၤဝဲခဲလၢာ်လီၤ.
မ့ၢ်နကဲထီၣ် ယဟိဝၤယွၤအတံၤသကိးသ့ဧါ
၁၈. ဘၣ်မနုၤအဃိပှၤတနီၤနီၤ ဆိကမိၣ်ဝဲလၢအဝဲသ့ၣ်ကဲထီၣ် ယွၤအတံၤသကိးတသ့ဘၣ်လဲၣ်. ဘၣ်ဆၣ်လံာ်စီဆှံစံးဝဲဒ်လဲၣ်.
၁၈ ပှၤတနီၤနီၤ ဖဲအဝဲသ့ၣ်ဖးဘၣ်ဝဲ ကစၢ်ယွၤအတၢ်ဂ့ၤတၢ်ဝါတဖၣ်အခါ ဘၣ်ယိၣ်တၢ်လီၤ. ဒီးအဝဲသ့ၣ်ဆိကမိၣ်ဝဲလၢ ‘ကစၢ်ယွၤအိၣ်ဒီး တၢ်စိတၢ်ကမီၤအါမး ဒီးအိၣ်ယံၤဒီးပှၤဟီၣ်ခိၣ်ဖိအဃိ မ့ၢ်အဝဲကသူၣ်အိၣ်သးအိၣ်ပှၤသပှၢ်ကတၢၢ်ဧါ.’ ဘၣ်ဆၣ် မ့ၢ်ကစၢ်ယွၤအဲၣ်ဒိးလၢ ပကတူၢ်ဘၣ်ဒ်န့ၣ်ဧါ. တမ့ၢ်ဘၣ်. ယဟိဝၤယွၤအဲၣ်ဒိးရ့ဒီးပှၤဘူးဘူးတံၢ်တံၢ်လီၤ. လၢတၢ်န့ၣ်အဃိ လံာ်စီဆှံစံးဝဲလၢ ကစၢ်ယွၤ “အိၣ်တယံၤဘၣ်ဒီးပှၤနီတဂၤဘၣ်.” (မၤတၢ် ၁၇:၂၇) ကစၢ်ယွၤအဲၣ်ဒိးလၢ နကသုးဘူးနသးဆူအအိၣ်လီၤ. ဒီးကစၢ်ယွၤ အၢၣ်လီၤစ့ၢ်ကီးဝဲလၢအဝဲ ‘ကသုးဘူးအသးဆူနအိၣ်လီၤ.’—ယၤကိာ် ၄:၈.
၁၉. (က) နကဲထီၣ်ကစၢ်ယွၤ အတံၤသကိးကသ့ဒ်လဲၣ်. (ခ) ယဟိဝၤယွၤ အတၢ်ဂ့ၤတၢ်ဝါတဖၣ်န့ၣ် နဘၣ်သူၣ်ဘၣ်သးအီၤအဒိၣ်ကတၢၢ် ဖဲလဲၣ်တခါလဲၣ်.
၁၉ နကဲထီၣ် ယွၤအတံၤသကိး ကသ့ဒ်လဲၣ်. ယ့ၣ်ၡူးစံးဝဲလၢ “တၢ်မူအထူအယိာ်န့ၣ် မ့ၢ်တၢ်သ့ၣ်ညါနၤ, ယွၤနီၢ်နီၢ်တဂၤဃီ, ဒီးယ့ၣ်ၡူးခရံာ်လၢ နမၢလီၤအီၤန့ၣ်လီၤ.” (ယိၤဟၣ် ၁၇:၃) နမ့ၢ်အဲၣ်ဒိးသ့ၣ်ညါအါထီၣ် ယဟိဝၤယွၤဒီးယ့ၣ်ၡူးအဂ့ၢ်န့ၣ် ဆဲးမၤလိဆူညါတက့ၢ်. နမ့ၢ်မၤဒ်န့ၣ်န့ၣ် နဒိးန့ၢ်ဘၣ်တၢ်မူအထူအယိာ်သ့ဝဲလီၤ. အဒိ ပမၤလိဘၣ်လၢ “ယွၤမ့ၢ်တၢ်အဲၣ်တၢ်ကွံ” လီၤ. (၁ ယိၤဟၣ် ၄:၁၆) ဘၣ်ဆၣ် အဝဲအိၣ်ဒီးတၢ်ဂ့ၤတၢ်ဝါလၢ အထုးန့ၢ်ပသးအါမံၤလီၤ. လံာ်စီဆှံပာ်ဖျါထီၣ်န့ၢ်ပှၤလၢ ယဟိဝၤယွၤမ့ၢ်ကစၢ်လၢ “အပှဲၤဒီးတၢ်သူၣ်အိၣ်သးအိၣ် ဒီးတၢ်သးကညီၤ, တသးဒိၣ်ထီၣ်တၢ်ညီကဒၣ်ဘၣ်, ဒီးဒုးနဲၣ်တၢ်အဲၣ်တၢ်ကွံဒီးသူၣ်တီသးတီလၢအဒိၣ်ဝဲန့ၣ်လီၤ.” (၂ မိၤၡ့ ၃၄:၆, ခ့ခါစှီၤကျိာ်) ယဟိဝၤယွၤ ‘မ့ၢ်တၢ်ဂ့ၤ, ဒီးပျၢ်ကွံာ်တၢ်ညီ’ လီၤ. (စံးထီၣ်ပတြၢၤ ၈၆:၅) ကစၢ်ယွၤန့ၣ် အိၣ်ဒီးတၢ်သူၣ်စူၤသးစူၤ ဒီးတၢ်သးတီန့ၣ်လီၤ. (၂ ပ့းတရူး ၃:၉; စံးထီၣ်ပတြၢၤ ၉၄:၁၄) ဖဲနဖးဘၣ်ကစၢ်ယွၤ အဂ့ၢ်လၢလံာ်စီဆှံအပူၤန့ၣ် နကသ့ၣ်ညါအါထီၣ် အတၢ်ဂ့ၤတၢ်ဝါတဖၣ် လၢအထုးန့ၢ်နသးန့ၣ်လီၤ.
၂၀-၂၂ (က) ပတထံၣ်ဘၣ် ကစၢ်ယွၤအဃိ ပသုးဘူးပသးဆူအအိၣ် ကသ့ဒ်လဲၣ်. (ခ) ဖဲပှၤဂၤတြီနၤ ဒ်သိးနသုတမၤလိလံာ်စီဆှံလၢၤတဂ့ၤအဂီၢ်န့ၣ် နကြၢးမၤတၢ်မနုၤလဲၣ်.
၂၀ နထံၣ်ဘၣ် ကစၢ်ယွၤတသ့သနာ်က့ နသုးဘူးနသးဆူအအိၣ် သ့ဝဲလီၤ. (ယိၤဟၣ် ၁:၁၈; ၄:၂၄; ၁ တံၤမသ့း ၁:၁၇) ဖဲနဖးဘၣ် ယဟိဝၤယွၤအဂ့ၢ်လၢ လံာ်စီဆှံအပူၤန့ၣ် နကသ့ၣ်ညါထီၣ်အီၤဒ် ပှၤအနီၢ်ကီၢ်တဂၤအသိးလီၤ. (စံးထီၣ်ပတြၢၤ ၂၇:၄; ရိမ့ၤ ၁:၂၀) ဒ်နမၤလိအါထီၣ် ယဟိဝၤယွၤအဂ့ၢ်အသိး နတၢ်အဲၣ်အီၤန့ၣ် ကအါထီၣ်ဝဲ ဒီးနကတူၢ်ဘၣ်လၢ နဘူးထီၣ်ဒီးအီၤန့ၣ်လီၤ.
ပၢ်တဂၤန့ၣ် အဲၣ်အဖိဒိၣ်မးလီၤ. ဘၣ်ဆၣ်ပပၢ်အိၣ်လၢမူခိၣ်န့ၣ် အဲၣ်ပှၤဒိၣ်န့ၢ်အန့ၣ်တက့ၢ်လီၤ
၂၁ နကနၢ်ပၢၢ်ထီၣ်လၢ ယဟိဝၤယွၤမ့ၢ်ပပၢ်န့ၣ်လီၤ. (မးသဲ ၆:၉) ကစၢ်ဟ့ၣ်ပှၤတၢ်မူဒီး ဒ်အဝဲမ့ၢ်ပၢ်လၢအအိၣ်ဒီး တၢ်အဲၣ်တၢ်ကွံတဂၤအသိး အဝဲအဲၣ်ဒိးဝဲလၢ အဖိတဖၣ် ကအိၣ်ဒီးတၢ်အိၣ်မူလၢ အဂ့ၤကတၢၢ်န့ၣ်လီၤ. (စံးထီၣ်ပတြၢၤ ၃၆:၉) ဒီးလံာ်စီဆှံသိၣ်လိဝဲလၢ နကဲထီၣ်ကစၢ်ယွၤ အတံၤသကိးသ့ဝဲလီၤ. (ယၤကိာ် ၂:၂၃) ဆိကမိၣ်ကွၢ် ပှၤလၢအတ့လီၤတၢ်ခဲလၢာ်တဂၤ လၢအမ့ၢ်ယဟိဝၤယွၤန့ၣ် ဘၣ်အသးလၢ နကကဲထီၣ်အတံၤသကိးန့ၣ်လီၤ.
၂၂ ပှၤတနီၤန့ၣ် တအဲၣ်ဒိးလၢနကမၤလိ လံာ်စီဆှံလၢၤဘၣ်. ဘၣ်သ့ၣ်သ့ၣ်အဝဲသ့ၣ် ဘၣ်ယိၣ်တၢ်လၢ နကဆီတလဲကွံာ် နတၢ်ဘူၣ်တၢ်ဘါအဃိလီၤ. ဘၣ်ဆၣ် လၢနကကဲထီၣ် ယွၤအတံၤသကိးအဂီၢ်န့ၣ် တဘၣ်ပျဲပှၤတြီနၤနီတဂၤတဂ့ၤ. ကစၢ်ယွၤကကဲထီၣ် တံၤသကိးအဂ့ၤကတၢၢ် လၢနဂီၢ်န့ၣ်လီၤ.
၂၃, ၂၄. (က) ဘၣ်မနုၤအဃိလၢ ပကဘၣ်သံကွၢ်အါထီၣ်တၢ်လဲၣ်. (ခ) တၢ်မၤလိလၢခံတခါန့ၣ် ပကဃုသ့ၣ်ညါတၢ်ဂ့ၢ်မနုၤလဲၣ်.
၂၃ ဖဲနမၤလိလံာ်စီဆှံ အဆၢကတီၢ် တၢ်လၢနတသ့ၣ်ညါဘၣ်တဖၣ် ကအိၣ်ဝဲလီၤ. တဘၣ်မဲာ်ဆှးလၢ နကသံကွၢ်တၢ်ဒီး ဃ့တၢ်မၤစၢၤအဂီၢ်တဂ့ၤ. ယ့ၣ်ၡူးစံးဝဲလၢ ပကဘၣ်အိၣ်ဒီးတၢ်ဆီၣ်လီၤသး ဒ်ဖိသၣ်အသိးန့ၣ်လီၤ. (မးသဲ ၁၈:၂-၄) ဖိသၣ်တဖၣ်န့ၣ် သံကွၢ်တၢ်သံကွၢ်အါမး ဒီးကစၢ်ယွၤအဲၣ်ဒိးလၢ နကဃုထံၣ်န့ၢ်တၢ်စံးဆၢလီၤ. ဒ်သိးနကသ့ၣ်ညါ တၢ်လၢနမၤလိဘၣ်အီၤတဖၣ် မ့ၢ်တၢ်မ့ၢ်တၢ်တီဧါ တမ့ၢ်တၢ်မ့ၢ်တၢ်တီဧါန့ၣ် ဃုသ့ၣ်ညါလံာ်စီဆှံ လီၤတံၢ်လီၤဆဲးတက့ၢ်.—ဖး မၤတၢ် ၁၇:၁၁ တက့ၢ်.
၂၄ ကျဲအဂ့ၤကတၢၢ်လၢ ပကသ့ၣ်ညါယဟိဝၤယွၤအဂ့ၢ်န့ၣ် မ့ၢ်ဒၣ်ပကဘၣ်မၤလိလံာ်စီဆှံလီၤ. တၢ်မၤလိလၢခံတခါန့ၣ် ပကဃုသ့ၣ်ညါတၢ်ဂ့ၢ်လၢ အဘၣ်ဃးဒီးလံာ်စီဆှံတဘ့ၣ်အံၤ မ့ၢ်အလီၤဆီလိာ်အသးဒီး လံာ်အဂၤတဖၣ် လၢကျဲဒ်လဲၣ်န့ၣ်လီၤ.
a လၢနလံာ်စီဆှံအပူၤ မံၤလၢအမ့ၢ်ယဟိဝၤမ့ၢ်တအိၣ်ဘၣ် မ့တမ့ၢ် နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်တၢ်ကျိၤဘၣ်ဃး ယွၤအမံၤအခီပညီဒီး တၢ်ဖးသီၣ်အီၤဒ်လဲၣ်န့ၣ် ကွၢ်တၢ်ဂ့ၢ် ၁ လၢလံာ်အကတၢၢ်တက့ၢ်.