ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါစဲးပတ့ဘၢၣ် ၄–၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယဃ့းစက့လး ၄၂-၄၅
“တၢ်ဘူၣ်ထီၣ်ဘါထီၣ်စီဆှံ ဘၣ်တၢ်သူၣ်ထီၣ်က့ၤအီၤ”
(ယဃ့းစက့လး ၄၃:၁၀-၁၂) နဲဒၣ်အံၤပှၤကညီဖိခွါဧၢ, ဒုးနဲၣ်ပှၤအံၣ်စရ့လး အပှၤဟံၣ်ဖိလၢဟံၣ်တဖျၢၣ်အံၤ, ဒ်သိးအမဲာ်ကဆှးလၢ အတၢ်ဒဲးဘးအဃိ, ဒီးမ်အထိၣ်တၢ်အဒိအတဲာ်န့ၣ်တက့ၢ်. ၁၁ ဒီးအမဲာ်မ့ၢ်ဆှးလၢ ကယဲၢ်တၢ်လၢအမၤဝဲအဃိဒီး, ဘိးဘၣ်သ့ၣ်ညါအီၤလၢ အဒိအတဲာ်ဒီးအက့ၢ်အဂီၤ, ဒီးကျဲဟဲနုာ်ဒီးလဲၤထီၣ်တဖၣ်, ဒီးအဂီၤတဖၣ်ခဲလၢာ်, ဒီးတၢ်မၤလိာ်ခဲလၢာ်, ဒီးအဒိအတဲာ်ခဲလၢာ်, ဒီးအတၢ်သိၣ်တၢ်သီတဖၣ်ခဲလၢာ်န့ၣ်, ဒီးကွဲးတၢ်န့ၣ်လၢအမဲာ်ညါ ဒ်သိးအကတိၢ်န့ၢ် တၢ်အဒိအတဲာ်ဒီဖျၢၣ်ညါ, ဒီးအတၢ်မၤလိာ်ခဲလၢာ်, ဒီးမၤအီၤန့ၣ်တက့ၢ်. ၁၂ အအံၤမ့ၢ်ဟံၣ်အတၢ်သိၣ်တၢ်သီ, လၢကစၢၢ်ဒီခိၣ်န့ၣ် တၢ်အိၣ်ဝဲလၢအဃၢၤဝးတရံးဝဲဒီဖျၢၣ်ညါ ကမ့ၢ်တၢ်စီဆှံကတၢၢ်လီၤ. ကွၢ်ကွၢ်, အဝဲန့ၣ်မ့ၢ်ဟံၣ်အတၢ်သိၣ်တၢ်သီလီၤ.
တၢး၉၉ ၃/၁ ကဘျံးပၤ ၈ အဆၢ ၃
“ကွၢ်ဆိကမိၣ်” ကစၢ်ယွၤ အတၢ်လုၢ်ဟံၣ်လၢနသး
၃ လံာ်ယဃ့းစက့လး အဆၢဒိၣ် ၉ ဆၢန့ၣ် အိၣ်ပှဲၤဒီး တၢ်ထံၣ်လၢညါခီ ဒီးပၣ်ဃုာ်ဒီး တၢ်စံးပာ်တဖၣ်လၢ အမၤဂၢၢ်ကျၢၤထီၣ် ပှၤယူဒၤဖိလၢ အဘၣ်တၢ်က့ၤဖီၣ်အီၤတဖၣ်အတၢ်နာ်န့ၣ်လီၤ. တၢ်ဘူၣ်ထီၣ်ဘါထီၣ်စီဆှံ ကဘၣ်တၢ်သူၣ်ထီၣ်က့ၤအီၤလီၤ. စးထီၣ်ဖဲယဃ့းစက့လးအစိၤ တုၤလီၤလၢပစိၤခဲအံၤန့ၣ် တၢ်ထံၣ်လၢညါခီအံၤ ကဲထီၣ်တၢ်ဟ့ၣ်ဂံၢ်ဟ့ၣ်ဘါလၢ ပှၤလၢအအဲၣ်ယဟိဝၤယွၤတဖၣ်အဂီၢ်န့ၣ်လီၤ. လၢကျဲဒ်လဲၣ်. ပကသမံသမိးကွၢ်သကိး ယဃ့းစက့လး အတၢ်ထံၣ်လၢညါခီအံၤ အခီပညီအိၣ်လၢ ပှၤအံၣ်စရ့လးဖိလၢ အဘၣ်တၢ်က့ၤဖီၣ်အီၤတဖၣ်အဂီၢ် ဒ်လဲၣ်န့ၣ်တက့ၢ်. ပကတဲသကိးတၢ်ဂ့ၢ်လွံၢ်မံၤ– တၢ်လုၢ်ဟံၣ်, ပှၤလုၢ်တၢ်အဒိၣ်, ပဒိၣ်ဖးဒိၣ်, ဒီးထံကီၢ်အဂ့ၢ်န့ၣ်လီၤ.
it-2 ကဘျံးပၤ ၁၀၈၂ အဆၢ ၂
တၢ်လုၢ်ဟံၣ်
တၢ်ထံၣ်လၢညါခီ ဘၣ်ဃးဒီးတၢ်လုၢ်ဟံၣ်. ဖဲ ချ.ခ.န ၅၉၃, ဝ့ၢ်ယရူၤၡလ့ၣ် ဒီးစီၤၡလိၤမိၤ အတၢ်လုၢ်ဟံၣ် ဟးဂီၤဝံၤအလီၢ်ခံ ၁၄ နံၣ်တနံၣ်န့ၣ် ဝံယဃ့းစက့လး ဘၣ်တၢ်လဲၤကိးအီၤဆူ ကစၢၢ်ဖးထီတဖျၢၣ်အဒီခိၣ်ဒီး ဘၣ်တၢ်ဒုးနဲၣ်အီၤ ယဟိဝၤယွၤ အတၢ်လုၢ်ဟံၣ်န့ၣ်လီၤ. (ဃ့း. ၄၀:၁, ၂) ဒ်သိးပှၤယူဒၤဖိလၢ အဘၣ်တၢ်က့ၤဖီၣ်အီၤတဖၣ် ကမဲာ်ဆှးဒီး ပီၢ်ယၢ်လီၤက့ၤအသးအဂီၢ်ဒီး ပှၤလၢအသးတီတဖၣ် ကဒိးန့ၢ်ဘၣ် တၢ်သူၣ်မံသးမုာ်အဂီၢ် ကစၢ်ယွၤမၢလီၤယဃ့းစက့လးလၢ ကတဲဘၣ် “အံၣ်စရ့လးအပှၤဟံၣ်ဖိ” တဖၣ်လၢတၢ်လၢအထံၣ်ဘၣ်ဝဲတဖၣ်န့ၣ်လီၤ. (ဃ့း. ၄၀:၄; ၄၃:၁၀, ၁၁) တၢ်ထံၣ်လၢညါခီအံၤပာ်ဖျါထီၣ်ဝဲ နီၣ်ထိၣ်အဂ့ၢ် လီၤတံၢ်လီၤဆဲးလီၤ. အနီၣ်ထိၣ်န့ၣ်မ့ၢ်ဝဲ “နီၣ်ထိၣ်တပိၢ်” (နီၣ်ထိၣ်တပိၢ်အထီ ၃.၁၁ မံထၢၣ်; အပ့ၣ် ၁၀.၂) ဒီးအ “ပျၢ်” (ပျၢ်အထီ, ၅၁.၈ စဲးထံၣ်မံထၢၣ်; စုမုၢ် ၂၀.၄). (ဃ့း. ၄၀:၅) ခီဖျိလၢတၢ်ထိၣ်တဖၣ်အံၤအဃိ ပှၤတနီၤနာ်ဝဲလၢ တၢ်လုၢ်ဟံၣ်လၢ တၢ်ထံၣ်တၢ်လၢညါခီအံၤအပူၤန့ၣ် မ့ၢ်တၢ်အဒိလၢ တၢ်လုၢ်ဟံၣ်လၢ ဘၣ်တၢ်သူၣ်ထီၣ်အီၤ ဖဲစရူဘၤဘ့လးအစိၤ ဖဲပှၤယူဒၤဖိတဖၣ် ဟးထီၣ်လၢကုၢ်အလီၢ် ဝံၤအလီၢ်ခံန့ၣ်လီၤ. ဘၣ်ဆၣ် ပှၤတဲလီၤတံၢ်ဒ်န့ၣ်တသ့ဘၣ်.
(ယဃ့းစက့လး ၄၄:၂၃) ဒီးကသိၣ်လိယပှၤဂီၢ်မုၢ်လၢတၢ်စီဆှံ ဒီးတၢ်တဘၣ်ပာ်စီဆှံအီၤအဆၢ, ဒီးဒုးနီၤဖးအီၤလၢတၢ်ကဆှီ ဒီးတၢ်တကဆှီဘၣ်အဆၢလီၤ.
(ယဃ့းစက့လး ၄၅:၁၆) ပှၤကီၢ်ဖိခဲလၢာ်ဘၣ်မၤဘူၣ် တၢ်ဝံၢ်ထီၣ်အံၤလၢအံၣ်စရ့လး အပဒိၣ်ဖးဒိၣ်အဂီၢ်လီၤ.
တၢး၉၉ ၃/၁ ကဘျံးပၤ ၁၀ အဆၢ ၁၀
“ကွၢ်ဆိကမိၣ်” ကစၢ်ယွၤ အတၢ်လုၢ်ဟံၣ်လၢနသး
၁၀တၢ်သ့ၣ်တဖၣ်အံၤ ကဟ့ၣ်ဂံၢ်ဟ့ၣ်ဘါဝဲ ပှၤလၢဘၣ်တၢ်က့ၤဖီၣ်အီၤတဖၣ်လီၤ. အဝဲသ့ၣ် အဟံၣ်ဖိဃီဖိတဒူၣ်စုာ်စုာ် ကန့ၢ်သါဘၣ်တၢ်လၢ အကီၢ်ပူၤလီၤ. (ထိၣ်သတြီၤဒီး မံကၤ ၄:၄ တက့ၢ်.) တၢ်ဘူၣ်ထီၣ်ဘါထီၣ်စီဆှံ ကက့ၤအိၣ်ထီၣ်ကဒီးလီၤ. ဒီးပာ်သူၣ်ပာ်သးလၢ ယဃ့းစက့လး အတၢ်ထံၣ်လၢညါခီအပူၤန့ၣ် ဒ်ပှၤလုၢ်တၢ်အဒိၣ်တဖၣ်အသိး ပဒိၣ်ဖးဒိၣ်တဖၣ်စ့ၢ်ကီး ကအိၣ်ဘၣ်ဖဲတၢ်လီၢ်လၢ ပှၤမၤဘူၣ်အီၤန့ၣ်လီၤ. (ယဃ့းစက့လး ၄၅:၁၆) အဃိ လၢထံကီၢ်လၢ ဘၣ်တၢ်သူၣ်ထီၣ်အီၤအံၤအပူၤန့ၣ် ပှၤဂီၢ်မုၢ်တဖၣ် ကဘၣ်မၤစၢၤဝဲ ပှၤလၢတီခိၣ်ရိၤမဲတၢ်တဖၣ်လၢ ယဟိဝၤယွၤ ပာ်လီၤအီၤဒီး ဆီၣ်ထွဲမၤစၢၤ အဝဲသ့ၣ်ခီဖျိ မၤထွဲအတၢ်ဟံးစုနဲၣ်ကျဲန့ၣ်လီၤ. ထံကီၢ်အံၤပာ်ဖျါထီၣ်ဝဲ တၢ်ကရၢကရိ, တၢ်မၤသကိးတၢ်, ဒီးတၢ်ဘံၣ်တၢ်ဘၢလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယဃ့းစက့လး ၄၃:၈, ၉) မ့ၢ်အသူၣ်အကျဲစၢၤကျိၤထံးလၢ ယကျဲစၢၤကျိၤထံးအဃၢၤ, ဒီးအထူၣ်လၢယထူၣ်အဃၢၤ, ဒီးအိၣ်ထဲအဒူၣ်တဒူၣ်လၢယၤ ဒီးအဝဲသ့ၣ်အဘၢၣ်စၢၤန့ၣ်ဒီး, မၤဘၣ်အၢယမံၤစီဆှံလၢ အတၢ်သးဘၣ်အၢလၢအမၤဝဲလီၤ. ဒီးယမၤလၢာ်ကွံာ်အီၤလၢ ယသးထီၣ်န့ၣ်လီၤ. ၉ ခဲကနံၣ်အံၤ မ်အပာ်အတၢ်မၤကမၣ်မုၣ်ကမၣ်ခွါယံၤဒီးယၤ, ဒီးအစီၤပၤအစိၣ်တဖၣ် ယံၤဒီးယၤတက့ၢ်, ဒီးယကအိၣ်လၢအကျါ လီၤထူလီၤယိာ်လီၤ.
it-2 ကဘျံးပၤ ၄၆၇ အဆၢ ၄
မံၤ
ပှၤအံၣ်စရ့လးဖိတဖၣ် မ့ၢ်ပှၤကလုာ်လၢ အဟံးန့ၢ်ကစၢ်ယွၤအမံၤ ဘၣ်ဆၣ် အဝဲသ့ၣ်တအိၣ်မူ ဒ်ကစၢ်ယွၤ အတၢ်မၤလိာ်အသိးဘၣ်အဃိ မၤဘၣ်ဒိဝဲ ကစၢ်ယွၤအမံၤလီၤ. (ဃ့း. ၄၃:၈; ဧၤ. ၂:၇) လၢတၢ်န့ၣ်အဃိ ကစၢ်ယွၤ စံၣ်ညီၣ်ဝဲ ပှၤအံၣ်စရ့လးဖိလၢ တအိၣ်ဒီးတၢ်သးတီတဖၣ်အံၤ, ဒီးတကးဒံးဘၣ် တၢ်ခွဲးတၢ်ယာ်အိၣ်ထီၣ်လၢ ပှၤကလုာ်အဂၤတဖၣ်န့ၣ် ဒုၣ်ဒွဲၣ်စံးအၢဝဲ ကစၢ်ယွၤအမံၤစ့ၢ်ကီးလီၤ. (ထိၣ်သတြီၤဒီး စံး. ၇၄:၁၀, ၁၈; ၡါ. ၅၂:၅ တက့ၢ်.) ပှၤကလုာ်အဂၤတဖၣ် ဆိကမိၣ်ဝဲလၢ ယဟိဝၤယွၤ ဒီသဒၢအပှၤဂီၢ်မုၢ်တန့ၢ်လၢၤဘၣ်. လၢတၢ်န့ၣ်အဃိ ကစၢ်ယွၤမၤဝဲ ဒ်သိးအမံၤ ကကဆှီထီၣ်က့ၤအဂီၢ် ဒီးဆှၢက့ၤဝဲ ပှၤအံၣ်စရ့လးဖိလၢ အအိၣ်တ့ၢ်တဖၣ် ဆူအထံအကီၢ်န့ၣ်လီၤ.—ဃ့း. ၃၆:၂၂-၂၄.
(ယဃ့းစက့လး ၄၅:၉, ၁၀) ကစၢ်ယွၤစံးဒ်အံၤ, မ်တၢ်န့ၣ်အါလၢ သုဂီၢ်တက့ၢ်, အံၣ်စရ့လးအပဒိၣ်သ့ၣ်ဧၢ, ပာ်ကွံာ်တၢ်မၤန့ၢ်ဆူၣ်, ဒီးတၢ်ဂုာ်ဆူၣ်ပျီဆူၣ်လၢသုအိၣ်တက့ၢ်, ဒီးမၤတၢ်စံၣ်ညီၣ်, ဒီးတၢ်တီတၢ်လိၤတက့ၢ်, ဒီးဆိတ့ၢ်သုဟီထီၣ်ကွံာ်ယပှၤဂီၢ်မုၢ်တက့ၢ်, ကစၢ်ယွၤစံးဝဲဒၣ်. ၁၀ အိၣ်ဒီးစီၤပီၢ်တီ, ဒီးအ့ဖးတီ, ဒီးဘၤသးတီတက့ၢ်.
it-2 ကဘျံးပၤ ၁၄၀
တၢ်စံၣ်ညီၣ်တီ
ဒ်သိးပှၤကဒိးန့ၢ်ဘၣ် ကစၢ်ယွၤအတၢ်ဘၣ်သးအဂီၢ် ပှၤကဘၣ်သ့ၣ်ညါဝဲ ယွၤအတၢ်တီတၢ်လိၤဒီး မၤထွဲဝဲန့ၣ်လီၤ. (ၡါ. ၁:၁၇, ၁၈; ၁၀:၁, ၂; ယံး. ၇:၅-၇; ၂၁:၁၂; ၂၂:၃, ၄; ဃ့း. ၄၅:၉, ၁၀; ဧၤ. ၅:၁၅; မံ. ၃:၉-၁၂; ၆:၈; ကၤ. ၇:၉-၁၂)
တၢ်ဖးလံာ်စီဆှံ
(ယဃ့းစက့လး ၄၄:၁-၉) ဒီးစိာ်ထီၣ်ကဒါက့ၤယၤလၢကျဲဆူ တၢ်အလီၢ်စီဆှံအပဲတရီ လၢခိတဖျိလၢအဖျိဝဲဆူမုၢ်ထီၣ်တခီ, ဒီးကးတံာ်ဃာ်အသးလီၤ. ၂ ဒီးယွၤစံးဘၣ်ယၤ, ပဲတရီတဖျိအံၤ ဘၣ်ကးတံာ်ဃာ်အသးလီၤ. တၢ်တဘၣ်အိးထီၣ်အီၤဘၣ်. ဒီးပှၤတဘၣ်လဲၤနုာ်ဘၣ်လၢအပူၤ နီတဂၤဘၣ်. အဂ့ၢ်ဒ်အံၤ, ယွၤအံၣ်စရ့လးအကစၢ် လဲၤနုာ်တ့ၢ်လၢအီၤလီၤ. မၤသးဒ်န့ၣ်ဒီး ကဘၣ်ကးတံာ်ဃာ်အသးလီၤ. ၃ ပဒိၣ်ဖးဒိၣ်, ပဒိၣ်ဖးဒိၣ်အဝဲဒၣ် ကဆ့ၣ်နီၤဝဲလၢအပူၤ ဒ်သိးအကအီၣ်တၢ်အီၣ်လၢယွၤအမဲာ်ညါ, ကလဲၤနုာ်ဝဲလၢပဲတရီ အတၢ်ခိၣ်ဒုးထီၣ်အသး, ဒီးကဟးထီၣ်ဝဲလၢအကျဲတဘိဃီန့ၣ်လီၤ. ၄ ဒီးစိာ်ထီၣ်ယၤဆူပဲတရီလၢ ကလံၤစိးတခီလၢဟံၣ်အမဲာ်ညါ, ဒီးယကွၢ်, ဒီးကွၢ်ကွၢ်, ယွၤအလၤကပီၤမၤပှဲၤယွၤအဟံၣ်, ဒီးယထိၣ်လီၤဃံၤအီထီလာ်ယသးလီၤ. ၅ ဒီးယွၤစံးဘၣ်ယၤ, ပှၤကညီဖိခွါဧၢ, တိၢ်လၢနသးဒီးကွၢ်လၢနမဲာ်, ဒိးနနၢ်လၢကယဲၢ်တၢ်လၢ ယစံးဘၣ်နၤလၢယွၤအဟံၣ် အတၢ်မၤလိာ်အဂ့ၢ်ဒီး အတၢ်သိၣ်တၢ်သီ, ဒီးတိၢ်လၢနသးလၢတၢ်လဲၤနုာ်ဟံၣ်ပူၤ, ဒီးကယဲၢ်တၢ်ဟးထီၣ်လၢ တၢ်အလီၢ်စီဆှံအကျဲတဘိလၢ်လၢ်န့ၣ်တက့ၢ်. ၆ ဒီးစံးဘၣ်ပှၤအံၣ်စရ့လးအပှၤဟံၣ်ဖိ, လၢအပူထီၣ်ဒၣ်တၢ်, ကစၢ်ယွၤစံးဒ်အံၤ, ပှၤအံၣ်စရ့လးအပှၤဟံၣ်ဖိသ့ၣ်ဧၢ, ၇ လၢကယဲၢ်သုတၢ်မၤဘၣ်အၢတဖၣ် အဖီခိၣ်န့ၣ် မ့ၢ်သုဒုးဟဲနုာ်ပှၤတခီဘီတခီမုၢ်ဖိ, ပှၤတဒိးဘၣ်တၢ်ကူးတရံးလၢသး, ဒီးတဒိးတၢ်ကူးတရံးလၢညၣ်, လၢယလီၢ်စီဆှံအပူၤသတးဒီး, သုမၤဘၣ်အၢယဟံၣ် ဖဲအကတီၢ်လၢသုမၤဘူၣ်တၢ်အီၣ်, တၢ်သိ, ဒီးတၢ်သွံၣ်, ဒီးမၤဟးဂီၤယတၢ်အၢၣ်လီၤအီလီၤလၢ သုတၢ်သးဘၣ်အၢအဃိသတးဒီး, မ်သုမံသူၣ်မံသးလၢ သုတၢ်သးဘၣ်အၢအဂ့ၢ်တက့ၢ်. ၈ ဒီးသုတကွၢ်ဘၣ်တၢ်ပၢၤယလီၢ်စီဆှံဘၣ်, မ့မ့ၢ်သုပာ်ပှၤကွၢ်တၢ်ပၢၤ ယလီၢ်စီဆှံလၢသုဂီၢ်ဒၣ်သုဝဲလီၤ. ၉ ကစၢ်ယွၤစံးဒ်အံၤ, ပှၤတခီဘီမုၢ်ဖိတဒိးဘၣ် တၢ်ကူးတရံးလၢသး, ဒီးတဒိးဘၣ်တၢ်ကူးတရံးလၢညၣ်လၢ ပှၤတခီဘီမုၢ်ဖိအိၣ်လၢ ပှၤအံၣ်စရ့လးဖိအကျါန့ၣ် တဘၣ်လဲၤနုာ်ဘၣ်ဆူ ယလီၢ်စီဆှံအပူၤနီတဂၤဘၣ်.
လါစဲးပတ့ဘၢၣ် ၁၁–၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယဃ့းစက့လး ၄၆-၄၈
“တၢ်ဆိၣ်ဂ့ၤ လၢ ပှၤအံၣ်စရ့လးဖိတဖၣ် ကဒိးန့ၢ်ဘၣ်က့ၤဝဲ”
(ယဃ့းစက့လး ၄၇:၁) ဒီးစိာ်ထီၣ်ယၤဆူဟံၣ်အကျဲစၢၤ, ဒီးကွၢ်ကွၢ်, ထံထီၣ်လၢဟံၣ်အကျဲစၢၤကျိၤထံး အဖီလာ်ဆူမုၢ်ထီၣ်တခီလီၤ. အဂ့ၢ်ဒ်အံၤ, ဟံၣ်အမဲာ်ညါဒိးဝဲဆူမုၢ်ထီၣ်တခီ, ဒီးထံယွၤလီၤလၢဟံၣ်အဃၢၤလၢ တၢ်လုၢ်လီၢ်အကလံၤထံးတခီလီၤ.
(ယဃ့းစက့လး ၄၇:၇-၁၂) ဒီးတုၤယက့ၤက့ၤဒီး, ကွၢ်ကွၢ်, သ့ၣ်အါထံးအိၣ်ဝဲလၢ ထံနံၤခံခီလၢာ်လီၤ. ၈ ဒီးစံးဘၣ်ယၤ, ထံတဖၣ်အံၤယွၤလီၤဝဲဆူ ကီၢ်လၢမုၢ်ထီၣ်တခီ, ဒီးယွၤလီၤဝဲဆူပှၢ်မုၢ်ကနၢ, ဒီးယွၤလီၤဆူပီၣ်လဲၣ်ပူၤလီၤ. ယွၤလီၤဝဲဆူပီၣ်လဲၣ်ပူၤ, ဒီးထံတဖၣ်ကဘျါက့ၤဝဲလီၤ. ၉ ဒီးတၢ်ကမၤအသးလၢ ကယဲၢ်တၢ်သးလၢအဂဲၤဝဲဖဲ ထံမိၢ်ပှၢ်ကဟဲဝဲတမံၤလၢ်လၢ်န့ၣ် ကမူဝဲလီၤ. ဒီးဒ့ၣ်ဧိၤညၣ်ဧိၤအါအါကလဲာ် ကအိၣ်ဖဲန့ၣ်လီၤ. အဂ့ၢ်ဒ်အံၤ, ကဘျါက့ၤဝဲလီၤ. ဒီးဖဲထံမိၢ်ပှၢ်ဟဲဝဲတပူၤလၢ်လၢ်န့ၣ် တၢ်ကမူဝဲတမံၤလၢ်လၢ်လီၤ. ၁၀ ဒီးတၢ်ကမၤအသးလၢ ပှၤမၤညၣ်ဖိကဆၢထၢၣ်လၢအနံၤလီၤ. လၢဧ့ၣ်က့ၤဒံပၢၢ်လၢဧ့ၣ်ဧ့ကလဲၣ်န့ၣ် တၢ်အလီၢ်လၢပှၤကဟုးပှာ်ဧိၤစၤဧိၤကအိၣ်လီၤ. ဒီးဒ့ၣ်ဧိၤညၣ်ဧိၤကအိၣ် ဒ်အကလုာ်ဒၣ်ဝဲအသိးန့ၣ်လီၤ. ဒ်ပီၣ်လဲၣ်ဖးဒိၣ်အညၣ်အသိးန့ၣ် အါအါကလဲာ်လီၤ. ၁၁ မ့မ့ၢ်တၢ်ကပံာ်အလီၢ်, ဒီးကပျၢၤတဖၣ်န့ၣ်တဘျါဘၣ်ဝဲဘၣ်. တၢ်ကပာ်အီၤလၢအံသၣ်အဂီၢ်လီၤ. ၁၂ ဒီးလၢထံနံၤလၢအဝဲတခီ, ဒီးလၢအဝဲတခီန့ၣ် သ့ၣ်ကိးကလုာ်ဒဲးကမဲထီၣ်လၢ တၢ်အီၣ်အဂီၢ်, ဒီးအလၣ်တလီၤဘဲဘၣ်, ဒီးအတၤသၣ်တလၢာ်ကွံာ်ဘၣ်. ကသၣ်ထီၣ်တၤသၣ်သီကိးလါဒဲးလီၤ. အဂ့ၢ်ဒ်အံၤ, အထံတဖၣ်ယွၤလီၤဝဲလၢ တၢ်အလီၢ်စီဆှံအပူၤန့ၣ်လီၤ. ဒီးအတၤသၣ်ကမ့ၢ်လၢ တၢ်အီၣ်အဂီၢ်, ဒီးအလၣ်လၢကသံၣ်အဂီၢ်လီၤ.
တၢး၉၉ ၃/၁ ကဘျံးပၤ ၁၀ အဆၢ ၁၁-၁၂
“ကွၢ်ဆိကမိၣ်” ကစၢ်ယွၤ အတၢ်လုၢ်ဟံၣ်လၢနသး
၁၁ မ့ၢ်ကစၢ်ယွၤကဆိၣ်ဂ့ၤ အဝဲသ့ၣ်အထံအကီၢ်ဧါ. ဝံအတၢ်စံးပာ် စံးဆၢဝဲ တၢ်သံကွၢ်တဖျၢၣ်အံၤခီဖျိ တဲဝဲလၢ ထံဟဲယွၤလီၤလၢတၢ်လုၢ်ဟံၣ်န့ၣ်လီၤ. ဒီးထံဟဲယွၤလီၤဖးအါဒီး ဟဲဝဲဆူၣ်ဆူၣ် တုၤလီၤလၢ ပီၣ်လဲၣ်အံသၣ်လီၤ. ဖဲန့ၣ်တၢ်မုၢ်တၢ်ဘိတဖၣ်မဲထီၣ်, ဒီးပှၤမၤညၣ်ဖိတဖၣ် ကဆၢထၢၣ်လၢထံကၢၢ်နံၤလီၤ. သ့ၣ်သူဝၢ်သၣ် ကဟ့ၣ်ထီၣ်အတၤသၣ်ဒီး အလၣ်သ့ၣ်တဖၣ်တလီၤဘဲဘၣ်.—ယဃ့းစက့လး ၄၇:၁-၁၂.
၁၂ တၢ်စံးပာ်အံၤ မၤဂၢၢ်ကျၢၤအါထီၣ် ဝံအတၢ်စံးပာ်တဖၣ်လၢ ဘၣ်တၢ်တဲဆိပာ်အီၤလီၤ. ခီဖျိဝံအတၢ်စံးပာ် ဘၣ်ဃးဒီးတၢ်သူၣ်ထီၣ်က့ၤအဂ့ၢ်အဃိ ပှၤယူဒၤဖိတဖၣ် အသးခုဝဲဒိၣ်မးလီၤ. ယဟိဝၤယွၤ သဆၣ်ထီၣ်ဝဲဝံ လၢကတဲဖျါဝဲအါဘျီလၢ ဟီၣ်ခိၣ်လၢအအိၣ်သယုၢ်န့ၣ် ကကဲထီၣ်ဒ်ဧ့ၤဒ့ၣ်တၤသၣ်လီၢ် လၢအံၣ်စရ့လးအပူၤဒီး ဟီၣ်ခိၣ်လၢအအိၣ်သယုၢ်န့ၣ် ကပှဲၤကဒါက့ၤဒီးပှၤကညီလီၤ. (ယၡါယၤ ၃၅:၁, ၆, ၇; ၅၁:၃; ယဃ့းစက့လး ၃၆:၃၅; ၃၇:၁-၁၄) အဃိပှၤကညီတဖၣ်အိၣ်ခိးကွၢ်လၢ် ကစၢ်ယွၤတၢ်ဆိၣ်ဂ့ၤဒ် ထံယွၤလီၤလၢတၢ်လုၢ်ဟံၣ်အသိးလီၤ. ထံကီၢ်လၢအတၢ်ရ့လိာ်သးဒီးယွၤ ဟးဂီၤကွံာ်ဝဲတဘ့ၣ်န့ၣ် ကဘၣ်တၢ်မၤဂ့ၤထီၣ်က့ၤအီၤလီၤ. ပှၤလၢအက့ၤအိၣ်ဖဲန့ၣ်တဖၣ် ကဘၣ်တၢ်ဆိၣ်ဂ့ၤ ခီဖျိလၢ ပှၤတီခိၣ်ရိၤမဲတၢ်အတီအလိၤသ့ၣ်တဖၣ် ကလီၤဂာ်ဒ်သိးဒီးသ့ၣ်ထူၣ်တဖၣ်လၢ အိၣ်လၢထံကၢၢ်နံၤ, ဒီးပှၤတီခိၣ်ရိၤမဲသ့ၣ်တဖၣ် မ့ၢ်စ့ၢ်ကီးပှၤလၢ အတီခိၣ်ရိၤမဲတၢ်လၢ ကသူၣ်ထီၣ်ဘှီထီၣ် ကီၢ်လၢအဟးဂီၤတဘ့ၣ်န့ၣ်လီၤ. ဝံယၡါယၤစ့ၢ်ကီးကွဲးဝဲလၢ ‘တၢ်တီတၢ်လိၤအသ့ၣ်ထိးဖၣ်တဖၣ်’ န့ၣ်မ့ၢ်ပှၤလၢ “ကမၤထီၣ်က့ၤတၢ်အိၣ်သယုၢ်လၢပျၢၤ” န့ၣ်လီၤ.—ယၡါယၤ ၆၁:၃, ၄.
(ယဃ့းစက့လး ၄၇:၁၃, ၁၄) ကစၢ်ယွၤစံးဒ်အံၤ, အအံၤမ့ၢ်တၢ်အဃၢၤလၢ သုဘၣ်နီၤဖးထံဧိၤကီၢ်ဧိၤ ဒ်အံၣ်စရ့လးအဒူၣ် တဆံခံဒူၣ်အသိးလီၤ. စီၤယိၤသးကအိၣ်ဒီးအဂီၢ်ခံဂီၢ်လီၤ. ၁၄ ဒီးသုကန့ၢ်သါတၢ်တဒူၣ် ဒ်တဒူၣ်အသိးစုာ်စုာ်လီၤ. ကယူာ်ထီၣ်ယစုလၢ ယကဟ့ၣ်လီၤအီၤလၢသုပၢ်တဖၣ်, ဒီးကီၢ်တဘ့ၣ်အံၤကလီၤဘၣ်လၢ သုန့ၢ်သါတၢ်အဂီၢ်လီၤ.
တၢး၉၉ ၃/၁ ကဘျံးပၤ ၁၀ အဆၢ ၁၀
“ကွၢ်ဆိကမိၣ်” ကစၢ်ယွၤ အတၢ်လုၢ်ဟံၣ်လၢနသး
၁၀ ပှၤလၢအဘၣ် တၢ်က့ၤစိာ်အီၤတဖၣ်အံၤ ကတူၢ်ဘၣ်ဝဲဒၣ်ဒ်လဲၣ်. အဝဲသ့ၣ် အဟံၣ်ဖိဃီဖိတဒူၣ်စုာ်စုာ် ကန့ၢ်သါဘၣ်တၢ်လၢ အကီၢ်ပူၤလီၤ. (ထိၣ်သတြီၤဒီး မံကၤ ၄:၄ တက့ၢ်.) တၢ်ဘူၣ်ထီၣ်ဘါထီၣ်စီဆှံ ကဘၣ်တၢ်ပာ်ထီၣ်ထီအီၤဒီး ကအိၣ်လၢတၢ်ခၢၣ်သးန့ၣ်လီၤ. ဒီးပာ်သူၣ်ပာ်သးလၢ ယဃ့းစက့လး အတၢ်ထံၣ်လၢညါခီအပူၤန့ၣ် ဒ်ပှၤလုၢ်တၢ်အဒိၣ်တဖၣ်အသိး ပဒိၣ်ဖးဒိၣ်တဖၣ်စ့ၢ်ကီး ကအိၣ်ဘၣ်ဖဲတၢ်လီၢ်လၢ ပှၤမၤဘူၣ်အီၤန့ၣ်လီၤ. (ယဃ့းစက့လး ၄၅:၁၆) အဃိ လၢထံကီၢ်လၢ ဘၣ်တၢ်သူၣ်ထီၣ်အီၤအံၤအပူၤန့ၣ် ပှၤဂီၢ်မုၢ်တဖၣ် ကဘၣ်မၤစၢၤဝဲ ပှၤလၢတီခိၣ်ရိၤမဲတၢ်တဖၣ်လၢ ယဟိဝၤယွၤ ပာ်လီၤအီၤဒီး မၤစၢၤဆီၣ်ထွဲ အဝဲသ့ၣ်ခီဖျိ မၤထွဲအတၢ်ဟံးစုနဲၣ်ကျဲန့ၣ်လီၤ. ထံကီၢ်အံၤပာ်ဖျါထီၣ်ဝဲ တၢ်ကရၢကရိ, တၢ်မၤသကိးတၢ်, ဒီးတၢ်ဘံၣ်တၢ်ဘၢလီၤ.
(ယဃ့းစက့လး ၄၈:၉, ၁၀) တၢ်ဝံၢ်ထီၣ်လၢ သုဘၣ်မၤဘူၣ်ယွၤန့ၣ် အထီကမ့ၢ်နီၣ်ထိၣ်တပိၢ် အစိၤခံကလးယဲၢ်ကထိ, ဒီးအဒီၣ်ဃီၤန့ၣ် အစိၤတကလးလီၤ. ၁၀ ဒီးတၢ်ဝံၢ်ထီၣ်စီဆှံန့ၣ် ကအိၣ်ဝဲလၢအဝဲသ့ၣ်အဂီၢ်, ကအိၣ်ဝဲလၢပှၤလုၢ်တၢ်အဒိၣ်အဂီၢ်န့ၣ် လၢကလံၤစိးတခီအထီ အစိၤခံကလးယဲၢ်ကထိ, ဒီးဆူမုၢ်နုာ်တခီအဒီၣ်ဃီၤ အစိၤတကလး, ဒီးဆူမုၢ်ထီၣ်အဒီၣ်ဃီၤ အစိၤတကလး, ဒီးဆူကလံၤထံးတခီ အထီအစိၤခံကလးယဲၢ်ကထိန့ၣ်လီၤ. ဒီးယွၤအလီၢ်စီဆှံကအိၣ်ဝဲလၢ အသးကံၢ်ပူၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယဃ့းစက့လး ၄၇:၁) ဒီးစိာ်ထီၣ်ယၤဆူဟံၣ်အကျဲစၢၤ, ဒီးကွၢ်ကွၢ်, ထံထီၣ်လၢဟံၣ်အကျဲစၢၤကျိၤထံး အဖီလာ်ဆူမုၢ်ထီၣ်တခီလီၤ. အဂ့ၢ်ဒ်အံၤ, ဟံၣ်အမဲာ်ညါဒိးဝဲဆူမုၢ်ထီၣ်တခီ, ဒီးထံယွၤလီၤလၢဟံၣ်အဃၢၤလၢ တၢ်လုၢ်လီၢ်အကလံၤထံးတခီလီၤ.
(ယဃ့းစက့လး ၄၇:၈) ဒီးစံးဘၣ်ယၤ, ထံတဖၣ်အံၤယွၤလီၤဝဲဆူ ကီၢ်လၢမုၢ်ထီၣ်တခီ, ဒီးယွၤလီၤဝဲဆူပှၢ်မုၢ်ကနၢ, ဒီးယွၤလီၤဆူပီၣ်လဲၣ်ပူၤလီၤ. ယွၤလီၤဝဲဆူပီၣ်လဲၣ်ပူၤ, ဒီးထံတဖၣ်ကဘျါက့ၤဝဲလီၤ.
(ယဃ့းစက့လး ၄၈:၃၀) ဒီးအအံၤမ့ၢ် ဝ့ၢ်အပဲတရီတဖၣ်, လၢကလံၤစိးတခီန့ၣ် ကမ့ၢ်အနီၣ်ထိၣ်တပိၢ်အစိၤ လွံၢ်ကထိယဲၢ်ကယၤလီၤ.
(ယဃ့းစက့လး ၄၈:၃၂-၃၄) ဒီးလၢမုၢ်ထီၣ်တခီန့ၣ် ကမ့ၢ်အနီၣ်ထိၣ်တပိၢ်အစိၤ လွံၢ်ကထိယဲၢ်ကယၤ, ဒီးပဲတရီသၢဖျိအိၣ်, ယိၤသးအပဲတရီတဖျိ, ဘံၣ်ယၤမံၣ်အပဲတရီတဖျိ, ဒၣ်အပဲတရီတဖျိလီၤ. ၃၃ ဒီးလၢကလံၤထံးတခီန့ၣ် ကမ့ၢ်အနီၣ်ထိၣ်တပိၢ်အစိၤ လွံၢ်ကထိယဲၢ်ကယၤ, ဒီးပဲတရီသၢဖျိအိၣ်, စူၤမ့းအိၣ်အပဲတရီတဖျိ, ယံးစၣ်ကၢ်အပဲတရီတဖျိ, စဘူလိၣ်အပဲတရီတဖျိလီၤ. ၃၄ လၢမုၢ်နုၢ်တခီန့ၣ် ကမ့ၢ်အနီၣ်ထိၣ်တပိၢ်အစိၤ လွံၢ်ကထိယဲၢ်ကယၤ, ဒီးအပဲတရီသၢဖျိအိၣ်, ကးအပဲတရီတဖျိ, အၤၡ့ၢ်အပဲတရီတဖျိ, နးသၤလံအပဲတရီတဖျိလီၤ.
တၢး၉၉ ၃/၁ ကဘျံးပၤ ၁၁ အဆၢ ၁၄
“ကွၢ်ဆိကမိၣ်” ကစၢ်ယွၤ အတၢ်လုၢ်ဟံၣ်လၢနသး
၁၄ ယဃ့းစက့လး အတၢ်ထံၣ်လၢညါခီအံၤ ဟဲလၢပှဲၤထီၣ်ဝဲထဲလၢ ပှၤအံၣ်စရ့လးဖိတဖၣ်အဂီၢ်ဧါ. တမ့ၢ်ဘၣ်. တၢ်ထံၣ်လၢညါခီအံၤ ကဟဲလၢပှဲၤထီၣ်ဒိၣ်န့ၢ် အအံၤလီၤ. ဆိကမိၣ်ကွၢ်တက့ၢ်. တၢ်လုၢ်ဟံၣ်လၢ ယဃ့းစက့လးထံၣ်ဝဲန့ၣ် ပှၤတ့ထီၣ်အီၤဒ် အတဲဝဲအသိးတသ့ဘၣ်. ဘၣ်ဆၣ်, ဘၣ်ဃးဒီး တၢ်လုၢ်ဟံၣ်လၢ တၢ်ထံၣ်လၢညါခီအံၤန့ၣ် ပှၤယူဒၤဖိသ့ၣ်တဖၣ် ပာ်ဝဲလၢတၢ်အရ့ဒိၣ် ဒီးတၢ်ဂ့ၢ်တနီၤန့ၣ် ဟံးန့ၢ်ဝဲအခီပညီလိၤလိၤလီၤ. တၢ်လုၢ်ဟံၣ်လၢ တၢ်ထံၣ်လၢညါခီအပူၤန့ၣ် ဒိၣ်ကဲၣ်ဆိးအဃိ ပှၤသူၣ်ထီၣ်အီၤလၢ ကစၢၢ်မိၤရံယၤအလိၤ ဖဲတၢ်လုၢ်ဟံၣ်လၢ အပူၤကွံာ်တဖျၢၣ်န့ၣ်အိၣ်အလီၢ်တသ့ဘၣ်. လၢတၢ်န့ၣ်အမဲာ်ညါ ယဃ့းစက့လး အတၢ်လုၢ်ဟံၣ်န့ၣ်တအိၣ်လၢ ဝ့ၢ်ပူၤဘၣ်, အိၣ်လၢတၢ်လီၢ်အဂၤလၢ အစီၤစုၤဝဲဖးယံၤညါန့ၣ်လီၤ. မ့မ့ၢ်တၢ်လုၢ်ဟံၣ်လၢ ပှၤသူၣ်ထီၣ်က့ၤအီၤတဖျၢၣ်န့ၣ် အိၣ်လၢဝ့ၢ်ယရူၤၡလ့ၣ်အပူၤလီၤ. (ဧ့စြၤ ၁:၁, ၂) တကးဒံးဘၣ် တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤန့ၣ် ထံကျိဟဲယွၤလီၤလၢအပူၤ တအိၣ်နီတဘိဘၣ်. လၢတၢ်န့ၣ်အဃိ ပှၤအံၣ်စရ့လးဖိတဖၣ် ထံၣ်ဘၣ်ဝဲ ဝံအတၢ်စံးပာ် ဟဲလၢပှဲၤထီၣ်ဝဲ ထဲတစဲးဖိလီၤ. ဝံအတၢ်စံးပာ်အံၤ ကဟဲလၢပှဲၤထီၣ်ဝဲလၢ နီၢ်သးတခီ လၢအသီတဘျီဒံး.
(ယဃ့းစက့လး ၄၇:၆) ဒီးစံးဘၣ်ယၤ, ပှၤကညီ ဖိခွါဧၢ, အအံၤနထံၣ်လံစ့ၢ်ကီးဧါ. ဒီးစိာ်ထီၣ်ယၤ, ဒီးဒုးက့ၤက့ၤယၤဆူထံမိၢ်ပှၢ်အနံၤလီၤ.
it-2 ကဘျံးပၤ ၁၀၀၁
ပှၤကညီ ဖိခွါဧၢ
လံာ်ယဃ့းစက့လးပၣ်ဃုာ်လၢ လံာ်တၢ်အၢၣ်လီၤအီလီၤ အလီၢ်လံၤအကျါတဘ့ၣ်လီၤ. ဒီးလံာ်ယဃ့းစက့လးအပူၤန့ၣ် ကစၢ်ယွၤကီးဝဲဝံလၢ “ပှၤကညီ ဖိခွါ” န့ၣ် အိၣ်ဝဲအဘျီ ၉၀ ဘျဲၣ်န့ၣ်လီၤ. (ဃ့း. ၂:၁, ၃, ၆, ၈) တၢ်ကတိၤအံၤ အဲၣ်ဒိးပာ်ဖျါန့ၢ်ပှၤလၢ ဝံတဖၣ်န့ၣ် မ့ၢ်ဝဲပှၤဟီၣ်ခိၣ်ဖိန့ၣ်လီၤ. ဒီးအဲၣ်ဒိးပာ်ဖျါစ့ၢ်ကီးဝဲလၢ အဝဲသ့ၣ်အတၢ်ကစီၣ်န့ၣ် ဟဲလၢတၢ်ထီကတၢၢ်ကစၢ်ယွၤအအိၣ်လီၤ. ဝံဒၤနံးယ့လးစ့ၢ်ကီး ဘၣ်တၢ်ကိးအီၤလၢ “ပှၤကညီ ဖိခွါ”န့ၣ် ဘၣ်တၢ်သူအီၤ ဖဲဒၤနံးယ့လး ၈:၁၇ လီၤ.
တၢ်ဖးလံာ်စီဆှံ
(ယဃ့းစက့လး ၄၈:၁၃-၂၂) ဒီးအိၣ်သဃီၤဒီး ပှၤလုၢ်တၢ်အဒိၣ်အဃၢၤန့ၣ် ပှၤလ့ၤဝံဖိကအိၣ်ဒီးတၢ်လၢအထီ အစိၤခံကလးယဲၢ်ကထိ, ဒီးအဒီၣ်ဃီၤ အစိၤတကလးလီၤ. အထီဒီဘိညါမ့ၢ်အစိၤ ခံကလးယဲၢ်ကထိ, ၁၄ ဒီးတဘၣ်ဆါကွံာ်ဘၣ်အီၤနီတစဲးဘၣ်, ဒီးတဘၣ်လဲလိာ်ဘၣ်အီၤ, ဒီးတဘၣ်ဟ့ၣ်လီၤကွံာ်ဘၣ် အတၤသၣ်ဆိဘၣ်. အဂ့ၢ်ဒ်အံၤ, မ့ၢ်တၢ်စီဆှံလၢယွၤအဂီၢ်လီၤ. ၁၅ ဒီးတၢ်အစိၤယဲၢ်ကထိလၢ အအိၣ်လီၤတဲာ်လၢ တၢ်ဒီၣ်ဃီၤအဖီခိၣ် အိၣ်သဃီၤဒီးတၢ်အစိၤ ခံကလးယဲၢ်ကထိန့ၣ် ကကဲလၢအလီၢ်တကဆှီဘၣ်လၢဝ့ၢ်အဂီၢ်, လၢပှၤအိၣ်ဝဲဆိးဝဲအလီၢ်အဂီၢ်, ဒီးလၢအလီၢ်အိၣ်လၢဝ့ၢ်လၢခိအဂီၢ်လီၤ. ဒီးဝ့ၢ်န့ၣ်ကအိၣ်ဝဲလၢအသးကံၢ်ပူၤလီၤ. ၁၆ ဒီးအအံၤမ့ၢ်အထိၣ်ဝဲန့ၣ် အထီလၢကလံၤစိးတခီ, မ့ၢ်အစိၤလွံၢ်ကထိယဲၢ်ကယၤ, ဒီးလၢကလံၤထံးတခီ အစိၤလွံၢ်ကထိယဲၢ်ကယၤ, ဒီးလၢမုၢ်ထီၣ်တခီအစိၤ လွံၢ်ကထိယဲၢ်ကယၤ, ဒီးလၢမုၢ်နုာ်တခီအစိၤ လွံၢ်ကထိယဲၢ်ကယၤလီၤ. ၁၇ ဒီးတၢ်အလီၢ်အိၣ်ဝဲလၢ ဝ့ၢ်လၢခိန့ၣ်အစိၤ ခံကယၤယဲၢ်ဆံကအိၣ်လၢကလံၤစိးတခီ, ဒီးအစိၤခံကယၤယဲၢ်ဆံ ကအိၣ်လၢကလံၤထံးတခီ, ဒီးအစိၤခံကယၤယဲၢ်ဆံ ကအိၣ်လၢမုၢ်ထီၣ်တခီ, ဒီးအစိၤခံကယၤယဲၢ်ဆံ ကအိၣ်လၢမုၢ်နုာ်တခီလီၤ. ၁၈ ဒီးတၢ်အိၣ်လီၤတဲာ်လၢအထီန့ၣ်, အိၣ်သဃီၤဒီးတၢ်ဝံၢ်ထီၣ်အသးစီဆှံန့ၣ် အစိၤတကလးဆူမုၢ်ထီၣ်တခီ, ဒီးအစိၤတကလးဆူမုၢ်နုာ်တခီ, အိၣ်သဃီၤဒီးတၢ်ဝံၢ်ထီၣ်အသးစီဆှံန့ၣ် အတၢ်အါထီၣ်န့ၣ် ကကဲလၢတၢ်အီၣ်လၢ ပှၤလၢအမၤဝ့ၢ်အတၢ်အဂီၢ်လီၤ. ၁၉ ဒီးပှၤလၢအမၤဝ့ၢ်အတၢ်န့ၣ် ကမၤဝဲလၢအံၣ်စရ့လးအဒူၣ်ခဲလၢာ်အကျါလီၤ. ၂၀ တၢ်ဝံၢ်ထီၣ်အသးဒီဘ့ၣ်ညါန့ၣ် အထီကမ့ၢ်အစိၤခံကလးယဲၢ်ကထိ, ဒီးအဒီၣ်ဃီၤ အစိၤခံကလးယဲၢ်ကထိလီၤ. သုဘၣ်မၤဘူၣ်တၢ်ဝံၢ်ထီၣ် စီဆှံလၢ တၢ်လွံၢ်နၢၣ်အိၣ်ဒီးဝ့ၢ်အတၢ်ဟံးဃာ်လီၤ. ၂၁ ဒီးတၢ်အိၣ်လီၤတဲာ်လၢ အတၢ်ဝံၢ်ထီၣ်အသးစီဆှံ ခံခီလိာ်ဒီးလၢဝ့ၢ်အတၢ်ဟံးဃာ်န့ၣ် အိၣ်သဃီၤဒီးတၢ်အစိၤ ခံကလးယဲၢ်ကထိ ဆူတၢ်အဃၢၤလၢမုၢ်ထီၣ်တခီ, ဒီးသဃီၤဒီးတၢ်အစိၤ ခံကလးယဲၢ်ကထိဆူ တၢ်တၢ်အဃၢၤလၢမုၢ်နုာ်တခီ, လၢပှၤအဒူၣ်အဂီၢ်တဖၣ်အဃၢၤန့ၣ် ကအိၣ်ဝဲလၢ ပဒိၣ်ဖးဒိၣ်အဂီၢ်လီၤ. ဒီးတၢ်ဝံၢ်ထီၣ်အသးစီဆှံ, ဒီးဟံၣ်အလီၢ်စီဆှံ ကအိၣ်ဝဲလၢအသးကံၢ်ပူၤလီၤ. ၂၂ တၢ်အိၣ်လီၤတဲာ်လၢ ပှၤလ့ၤဝံဖိအတၢ်ဒီးလၢဝ့ၢ်န့ၣ် အတၢ်လၢအအိၣ်ဝဲလၢ ပဒိၣ်ဖးဒိၣ်အတၢ်အဘၢၣ်စၢၤ, လၢအအိၣ်ဝဲလၢယူဒၤအဃၢၤ ဒီးဘံၣ်ယၤမံၣ်အဃၢၤအဘၢၣ်စၢၤန့ၣ် ကကဲလၢပဒိၣ်ဖးဒိၣ်အတၢ်လီၤ.
လါစဲးပတ့ဘၢၣ် ၁၈–၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဒၤနံးယ့လး ၁-၃
“တၢ်သးတီဒီး ယဟိဝၤယွၤ ဒုးအိၣ်ထီၣ်တၢ်ဆိၣ်ဂ့ၤ”
(ဒၤနံးယ့လး ၃:၁၆-၂၀) စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤစံးဆၢ စီၤပၤနဘူၤကးန့စၢ် ဒီးစံးဝဲဒၣ်, ပစံးဆၢတၢ်လၢတၢ်တမံၤအံၤအဂ့ၢ်န့ၣ် အလီၢ်တအိၣ်ဘၣ်. ၁၇ ကွၢ်ကွၢ်, ပကစၢ်လၢပမၤအတၢ်တဂၤန့ၣ် မၤပူၤမၤဖျဲးပှၤဒီး မ့ၣ်အူကဲၤအဖၣ်ကပူၤသ့, ဒီးကမၤပူၤမၤဖျဲးပှၤလၢနစုပူၤလီၤ, စီၤပၤဧၢ. ၁၈ မ့တမ့ၢ်ဘၣ်ဒ်န့ၣ်ဒီးသ့ၣ်ညါ, စီၤပၤဧၢ, လၢပတမၤဘၣ်နကစၢ်အတၢ်ဘၣ်, ဒီးပတဘါဘၣ် နတၢ်ဂီၤထူလၢ နပာ်ထီၣ်အီၤန့ၣ်တက့ၢ်. ၁၉ တုၤနုၤတစု နဘူၤကးန့စၢ် သးထီၣ်ပှဲၤဆၢၣ်ကလာ်, အမဲာ်အက့ၢ်အဂီၤလီၤဆီထီၣ်ထီဒါ စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤလီၤ. ဒီးမၤလိာ်ဝဲလၢ ပှၤကမၤကိၢ်ဖၣ်ကပူၤန့ၣ် ကိၢ်န့ၢ်အလီၢ်န့ၣ်နွံစးလီၤ. ၂၀ ဒီးမၤလိာ်ပှၤအဂံၢ်ဆူၣ်အဘါဆူၣ်လၢ အသုးမုၢ်အကျါတဖၣ် ဒ်သိးအကစၢဃာ် စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤ, ဒီးတ့ၢ်လီၤကွံာ်အီၤလၢ မ့ၣ်အူကဲၤအဖၣ်ကပူၤလီၤ.
တၢး၁၅ ၇/၁၅ ကဘျံးပၤ ၂၅-၂၆ အဆၢ ၁၅-၁၆
မၤဂၢၢ်ကျၢၤ နတၢ်သးတီဒီး ယွၤအဘီမုၢ်တက့ၢ်
၁၅ ပအဲၣ်ဒိးမၤ ယဟိဝၤယွၤအတၢ်မၤ ပှဲၤဒီးသးလၢအသ့ၣ်ညါဒၣ်တၢ် လၢအကဆှီအဃိ ပကဘၣ်လီၤဆီလၢ ပှၤမၤသကိး တၢ်ဒီးပဝဲမ့ၢ်ဂ့ၤ, ပသကိးလၢကၠိမ့ၢ်ဂ့ၤ, ပှၤလၢပဃၢၤမ့ၢ်ဂ့ၤ, ပဘူးပတံၢ်တဖၣ်အကျါမ့ၢ်ဂ့ၤန့ၣ်လီၤ. (၁ ပ့း. ၂:၁၉) ယ့ၣ်ၡူးဟ့ၣ်ပလီၢ်ပှၤလၢ ပှၤကသးဟ့ပဝဲ ခီဖျိလၢပလီၤဆီဒီး အဝဲသ့ၣ်န့ၣ်လီၤ. ပကဘၣ်သ့ၣ်နီၣ်ထီၣ်လၢ ပှၤလၢအထီဒါပှၤတဖၣ် အါဒၣ်တက့ၢ်န့ၣ် တသ့ၣ်ညါ ယွၤအဘီအမုၢ်အဂ့ၢ်ဘၣ်. ဘၣ်မနုၤအဃိ အရ့ဒိၣ်လၢ ပကဘၣ်တီဒီးယွၤအဘီအမုၢ် ဒိၣ်န့ၢ်ဒံးပှၤဟီၣ်ခိၣ်ဖိ အပဒိၣ်တဖၣ်လဲၣ်န့ၣ် အဝဲသ့ၣ် တနၢ်ပၢၢ်ဝဲဘၣ်.
၁၆ ပှၤအါဂၤမ့ၢ်မၤပှၤ တမံၤဂ့ၤတမံၤဂ့ၤ, မ့ၢ်စံးပှၤဒ်လဲၣ်ဂ့ၤ ဒ်လဲၣ်ဂ့ၤ ပကတီဒီးယဟိဝၤယွၤ ခီဖျိလၢပဒိကနၣ်အကလုၢ်န့ၣ်လီၤ. (ဒၤ. ၃:၁၆-၁၈) လီၤဆီဒၣ်တၢ် ပှၤသးစၢ်တဖၣ် ကအိၣ်လီၤဆီဒီး ပှၤဂၤအဂီၢ်န့ၣ် ကကီဝဲလီၤ. လၢတၢ်န့ၣ်အဃိ မိၢ်ပၢ်သ့ၣ်တဖၣ် ကဘၣ်မၤစၢၤအဖိ ဒ်သိးကအိၣ်ဒီး တၢ်သးဒူ ဖဲအိၣ်လၢကၠိအခါန့ၣ်လီၤ. ဖဲနဖိတဖၣ် ကဘၣ်ဂ့ၢ်လိာ် တၢ်ယူးယီၣ်နီၣ်တယၢ် မ့တမ့ၢ် တၢ်ပၣ်ဃုာ်လၢ ထံကီၢ်အမူးပွဲတဖၣ်အခါန့ၣ် ဘၣ်သ့ၣ်သ့ၣ် အဝဲသ့ၣ်ကပျံၤတၢ်လီၤ. လၢတၢ်န့ၣ်အဃိ ဖဲဟံၣ်ဖိဃီဖိ တၢ်မၤလိလံာ်စီဆှံအဆၢကတီၢ်န့ၣ် သိၣ်လိနဖိတဖၣ် လၢယဟိဝၤယွၤ အတၢ်ထံၣ် ဘၣ်ဃးတၢ်သ့ၣ်တဖၣ်အံၤန့ၣ်တက့ၢ်. ဖဲအဝဲသ့ၣ်ဘၣ်သဂၢၢ်ဒီး တၢ်သ့ၣ်တဖၣ်အံၤအခါ ဒ်သိးအဝဲသ့ၣ် ကတဲနၢ်ပၢၢ်ပှၤဂၤလၢ တၢ်ပာ်ကဲအပူၤကသ့ဂ့ၤဂ့ၤအဂီၢ်န့ၣ် သိၣ်လိစ့ၢ်ကီးအဝဲသ့ၣ်တက့ၢ်. (ရိ. ၁:၁၆) မ့ၢ်သ့န့ၣ် မၤစၢၤနဖိတဖၣ်ခီဖျိ နလဲၤတဲတၢ်ဒီး အသရၣ်တဖၣ်ဘၣ်ဃး ပတၢ်နာ်အဂ့ၢ်န့ၣ်တက့ၢ်.
(ဒၤနံးယ့လး ၃:၂၆-၂၉) တုၤနုၤတစု နဘူၤကးန့စၢ် သုးဘူးအသးဒီး မ့ၣ်အူအဖၣ်ကပူၤအကျဲစၢၤလီၤ. ကတိၤတၢ်ဒီးစံးဝဲဒၣ်, ကစၢ်အထီကတၢၢ်အခ့အပှၤ, စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤသ့ၣ်ဧၢ, ဟဲက့ၤထီၣ်ဒီးဟဲတက့ၢ်. တုၤနုၤတစုစီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤ ဟဲက့ၤထီၣ်လၢမ့ၣ်အူကျါလီၤ. ၂၇ ဒီးပဒိၣ်ဖးဒိၣ်, ပဒိၣ်ပပှၢ်, ပှၤပၢၤတၢ်ဖိ, ဒီးစီၤပၤအပှၤကူၣ်လိာ်အသး အိၣ်ဖှိၣ်ရိဖှိၣ်ဝဲ, ဒီးကွၢ်ပှၤကညီတဖၣ်အံၤလၢ မ့ၣ်အူအစိအကမီၤ တအိၣ်ဘၣ်လၢ အနီၢ်ခိအဖီခိၣ်, ဒီးအခိၣ်သူ တကိၢ်ဃိာ်ဘၣ်နီတဘိဘၣ်, ဒီးအတၢ်ဖျီၣ်ခံအိၣ်ဒၣ်အတၢ်, ဒီးမ့ၣ်အူအနၢ တဘၣ်ဘၣ်အီၤဘၣ်. ၂၈ နဘူၤကးန့စၢ်ကတိၤတၢ်ဒီးစံးဝဲဒၣ်, စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤတဖၣ် အကစၢ်လၢ အမၢလီၤအကလူးတဂၤ, ဒီးမၤပူၤမၤဖျဲးအခ့အပှၤလၢ အသန့ၤအသးလၢအီၤ, ဒီးလဲလိာ်စီၤပၤအတၢ်မၤလိာ်, ဒီးဟ့ၣ်လီၤကွံာ်အနီၢ်ခိ ဒ်သိးအသုတမၤကစၢ်အဂၤအတၢ်, လၢအတမ့ၢ်ဘၣ်အကစၢ်, ဒီးအသုတဘါအီၤတဂ့ၤန့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်. ၂၉ မၤသးဒ်န့ၣ်ဒီး ယကလုၢ်လီၤလၢ ကယဲၢ်ပှၤဂီၢ်မုၢ်, ပှၤကလုာ်တဖၣ်, ဒီးပှၤကတိၤတၢ်အကျိာ် အကလုာ်ကလုာ်လၢ အကတိၤကမၣ်ဘၣ် စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤ အကစၢ်တဂၤလၢ်လၢ်န့ၣ် တၢ်ကဒီၣ်တဲာ်ကွံာ်အီၤတကူာ်တကူာ်, ဒီးအဟံၣ်ကကဲထီၣ်တၢ်အ့ၣ်အလီၢ်လီၤ. အဂ့ၢ်ဒ်အံၤ, ကစၢ်အဂၤလၢ အမၤပူၤမၤဖျဲးတၢ်ဒ်အံၤသိးတအိၣ်ဘၣ်.
တၢး၁၃ ၁/၁၅ ကဘျံးပၤ ၁၀ အဆၢ ၁၃
အိၣ်ဒီးတၢ်သးဒူ—ယဟိဝၤယွၤအိၣ်ဒီးနၤ
၁၃ ဖဲ ချ.ခ.န နွံယၤဖှိၣ်, ယွၤအခ့အပှၤလၢအမ့ၢ် ပှၤဧ့ၤဘြံၤဖိသၢဂၤ ပာ်ဖျါထီၣ် အတၢ်နာ်ဒီးတၢ်သူၣ်ဒူသးဒူအဃိ ယဟိဝၤယွၤဆိၣ်ဂ့ၤအဝဲသ့ၣ်လီၤ. စီၤပၤနဘူၤကးန့စၢ် ဟ့ၣ်လီၤတၢ်ကလုၢ်လၢ ပှၤကပာ်ဖှိၣ်ထီၣ်ပှၤလၢ အရ့ဒိၣ်တဖၣ် ဒီးအဝဲသ့ၣ်ခဲလၢာ် ကဘၣ်ဘူၣ်ထီၣ်ဘါထီၣ်ဝဲ တၢ်ဂီၤထူလၢအတ့ထီၣ်ဝဲလီၤ. ပှၤတဂၤဂၤမ့ၢ်တဘါလီၤဘၣ်န့ၣ် ကဘၣ်တၢ်တ့ၢ်လီၤအီၤလၢမ့ၢ်အူပူၤလီၤ. ဘၣ်ဆၣ် လၢတၢ်ယူးယီၣ်ပာ်ကဲအပူၤ ပှၤဧ့ၤဘြံၤသၢဂၤအံၤ တဲဘၣ်စီၤပၤနဘူၤကးန့စၢ်လၢ “ပကစၢ်လၢပမၤအတၢ်တဂၤန့ၣ် မၤပူၤမၤဖျဲးပှၤဒီး မ့ၣ်အူကဲၤအဖၣ်ကပူၤသ့, ဒီးကမၤပူၤမၤဖျဲးပှၤလၢနစုပူၤလီၤ, စီၤပၤဧၢ. မ့တမ့ၢ်ဘၣ်ဒ်န့ၣ်ဒီးသ့ၣ်ညါ, စီၤပၤဧၢ, လၢပတမၤဘၣ်နကစၢ်အတၢ်ဘၣ်, ဒီးပတဘါဘၣ် နတၢ်ဂီၤထူလၢ နပာ်ထီၣ်အီၤန့ၣ်တက့ၢ်.” (ဒၤ. ၃:၁၆-၁၈) ဒၤနံးယ့လး ၃:၁၉-၃၀ ပာ်ဖျါန့ၢ်ပှၤလၢ ကစၢ်ယွၤမၤပူၤဖျဲး ပှၤဧ့ၤဘြံၤဖိသၢဂၤအံၤန့ၣ်လီၤ. မုၢ်မဆါတနံၤအံၤ ပှၤတမၤပျံၤမၤဖုးပှၤလၢ ကမၤသံပှၤလၢ မ့ၣ်အူဘၣ်သနာ်က့ ပဝဲခဲလၢာ် ဘၣ်သ့ၣ်သ့ၣ် ပကထံၣ်ဘၣ် တၢ်မၤကွၢ်ပတၢ်သးတီနးနးကလဲာ်သ့ဝဲလီၤ. ပနာ်သ့သပှၢ်တၢၢ်လၢ ပမ့ၢ်အိၣ်ဒီးတၢ်နာ် ဒီးတၢ်သးဒူန့ၣ် ယဟိဝၤယွၤ ကဆိၣ်ဂ့ၤပှၤစ့ၢ်ကီးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဒၤနံးယ့လး ၁:၅) ဒီးစီၤပၤမၤလိာ်န့ၢ်အီၤလၢ စီၤပၤအတၢ်အီၣ်ဝံၣ် တနံၤအဂီၢ်တနံၤအဂီၢ်, ဒီးလၢအစပံးထံလၢအကအီဝဲ, ဒီးဒ်သိးပှၤကလုၢ်အီၣ်အီၤသၢနံၣ်, ဒီးလၢအလီၢ်ခံန့ၣ် ကဆၢထၢၣ်လၢစီၤပၤအမဲာ်ညါလီၤ.
(ဒၤနံးယ့လး ၁:၈) ဒီးစီၤဒၤနံးယ့လးပာ်တၢ်လၢအသးကံၢ်ပူၤလၢ အတမၤတကဆှီဘၣ်အသးလၢ စီၤပၤအတၢ်အီၣ်ဝံၣ်, ဒီးစပံးထံလၢအအီဝဲန့ၣ်ဘၣ်. ဒီးဃ့ဝဲလၢ ပှၤဒ့ဒံၣ်ဖိအခိၣ် ဒ်သိးအသုတမၤ တကဆှီဘၣ်အသးလၢအီၤတဂ့ၤလီၤ.
it-2 ကဘျံးပၤ ၃၈၂
မံၡအ့လး
ဘၣ်သ့ၣ်သ့ၣ် တၢ်ဂ့ၢ်ကအိၣ်ဝဲ သၢခါလၢအဝဲသ့ၣ် တအီၣ်ဝဲတၢ်အီၣ်လၢစီၤပၤမၢအအီၣ်န့ၣ်ဘၣ်. (၁) ဆၣ်ဖိကီၢ်ဖိလၢ ပှၤဘၤဘူၤလိၣ်ဖိတဖၣ် အီၣ်ဝဲန့ၣ် ဒ်စီၤမိၤၡ့ အတၢ်သိၣ်တၢ်သီအိၣ်ဝဲအသိး မ့ၢ်တၢ်လၢအတကဆှီဘၣ် (၂) ဆၣ်ဖိကီၢ်ဖိတဖၣ် ပှၤမၤသံအီၤဒ်လဲၣ်န့ၣ် အဝဲသ့ၣ်တထံၣ်ဝဲဘၣ်, ဘၣ်သ့ၣ်သ့ၣ်ပှၤကစံၣ်သံအီၤ (၃) ဒီးဆၣ်ဖိကီၢ်ဖိသ့ၣ်တဖၣ်အံၤန့ၣ် ပှၤဘၤဘူၤလိၣ်ဖိတဖၣ် ကဟ့ၣ်လုၢ်ထီၣ်ဆိ လၢအဝဲသ့ၣ်အကစၢ်ယွၤလီၤ. ခီဖျိလၢတၢ်ဂ့ၢ်အံၤအဃိ အဝဲသ့ၣ်ဆိကမိၣ်ဝဲလၢ မ့ၢ်အီၣ်တၢ်ညၣ်တဖၣ်အံၤန့ၣ် ကလီၤဂာ်ဒ်အဝဲသ့ၣ် ဘူၣ်ထီၣ်ဘါထီၣ်ဝဲ ဘၤဘူၤလိၣ်ကစၢ်ယွၤလီၤ.—ဒၤ. ၁:၈; ထိၣ်သတြီၤဒီး ၁ ကရံၣ်. ၁၀:၁၈-၂၀, ၂၈ တက့ၢ်.
(ဒၤနံးယ့လး ၂:၄၄) ဒီးတၢ်လၢစီၤပၤတဖၣ်န့ၣ် အမုၢ်နံၤအတီၢ်ပူၤ, မူခိၣ်အကစၢ် ကပာ်လီၤဘီမုၢ်တဘီမုၢ် လၢအတဟးဂီၤဘၣ် လီၤထူလီၤယိာ်ဘၣ်. ဒီးဘီမုၢ်န့ၣ် တအိၣ်လီၤတဲာ်ဘၣ်လၢ ပှၤအဂၤတကလုာ်အဂီၢ်ဘၣ်. ကမၤလီၤကလဲ, ဒီးကမၤလၢာ်ကွံာ်ဘီမုၢ်ခဲလၢာ်လီၤ. မ့မ့ၢ်အဝဲန့ၣ် ကအိၣ်လီၤထူလီၤယိာ်လီၤ.
တၢး၁၂ ၆/၁၅ ကဘျံးပၤ ၁၇, တၢ်လွံၢ်နၢၣ်
“ဘီမုၢ်ခဲလၢာ်” န့ၣ်မ့ၢ်မတၤလဲၣ်
ဝံအတၢ်စံးပာ်လၢ ဒၤနံးယ့လး ၂:၄၄ တဲဝဲလၢကစၢ်ယွၤအဘီအမုၢ် “ကမၤလီၤကလဲ, ဒီးကမၤလၢာ်ကွံာ်ဘီမုၢ်ခဲလၢာ်လီၤ.” တၢ်စံးပာ်အဝဲအံၤ အဲၣ်ဒိးတဲဝဲထဲလၢ ဘီမုၢ်တဖၣ်လၢဘၣ်တၢ်ဒိလီၤအီၤ လၢတၢ်ဂီၤတဒုန့ၣ်လီၤ.
မ့မ့ၢ်ဟီၣ်ခိၣ်အဘီအမုၢ်အဂၤခဲလၢာ်န့ၣ် တၢ်ကမၤအသးဒီးအဝဲသ့ၣ်ဒ်လဲၣ်. ဝံအတၢ်စံးပာ်လၢ လီၣ်ဖျါအပူၤန့ၣ် ပာ်ဖျါထီၣ်ဝဲတၢ်ဂ့ၢ်လၢ ဘၣ်ဃးဒီးတၢ်ဂ့ၢ်အံၤလီၤ. ပာ်ဖျါထီၣ်ဝဲဒၣ်လၢ “စီၤပၤလၢ ဟီၣ်ခိၣ်ချၢခဲလၢာ်” ကဘၣ်တၢ်ပာ်ဖှိၣ်ထီၣ်အီၤ ဒ်သိးကလဲၤထီဒါ ယဟိဝၤဖဲ “ယွၤလၢ အသ့တၢ်လၢာ်အနံၤဖးဒိၣ်လီၤ.” (လီၣ်. ၁၆:၁၄; ၁၉:၁၉-၂၁) အဃိ ဘီမုၢ်တဖၣ်လၢ ဘၣ်တၢ်ဒိလီၤအီၤ လၢတၢ်ဂီၤတဒုန့ၣ် ကဘၣ်တၢ်မၤဟးဂီၤအီၤတကးဒံးဘၣ် တၢ်ပၢတၢ်ပြးအဂၤခဲလၢာ်စ့ၢ်ကီး ကဟးဂီၤလီၤ.
တၢး၀၁ ၁၀/၁၅ ကဘျံးပၤ ၆ အဆၢ ၄
တၢ်အရ့ဒိၣ်လၢ ဟီၣ်ခိၣ်အတၢ်မုာ်တၢ်ခုၣ်အဂီၢ်
ဖဲ ဒၤနံးယ့လး ၂:၄၄ န့ၣ်ပာ်ဖျါထီၣ်ဝဲ တၢ်စံးဆၢလီၤ. “ဒီးတၢ်လၢစီၤပၤတဖၣ်န့ၣ် အမုၢ်နံၤအတီၢ်ပူၤ, မူခိၣ်အကစၢ် ကပာ်လီၤဘီမုၢ်တဘီမုၢ် လၢအတဟးဂီၤဘၣ် လီၤထူလီၤယိာ်ဘၣ်. ဒီးဘီမုၢ်န့ၣ် တအိၣ်လီၤတဲာ်ဘၣ်လၢ ပှၤအဂၤတကလုာ်အဂီၢ်ဘၣ်. ကမၤလီၤကလဲ, ဒီးကမၤလၢာ်ကွံာ်ဘီမုၢ်ခဲလၢာ်လီၤ. မ့မ့ၢ်အဝဲန့ၣ် ကအိၣ်လီၤထူလီၤယိာ်လီၤ.” ဘၣ်မနုၤအဃိ ယွၤအဘီအမုၢ် “ကမၤလီၤကလဲ” ဟီၣ်ခိၣ်အတၢ်ပၢတၢ်ပြးလဲၣ်. ခီဖျိလၢ တၢ်ပၢတၢ်ပြးတဖၣ်အံၤအဲၣ်ဒိးဝဲလၢ မုၢ်ကီၤလံၢ်အတၢ်ပၢကအိၣ်ဝဲလီၤစိၤအဃိလီၤ. မုၣ်ကီၤလံၢ်အတၢ်ပၢန့ၣ် ဆီၣ်ထွဲ ပှၤဟီၣ်ခိၣ်ဖိလၢကထီဒါယွၤ, ပှၤလၢအတီခိၣ်ရိၤမဲတၢ်တဖၣ် အဲၣ်လီၤထဲအသးဒီး တဃုပှၤဂၤအဘျုးဘၣ်, ဒီးအဲၣ်ဒိးဝဲတၢ်ပာ်သူၣ်ပာ်သးဒ်အံၤအဃိ မ့ၢ်ဒၣ်ထီဒါ တၢ်ဘၣ်တ့ကစၢ်လီၤ. (စံးထီၣ်ပတြၢၤ ၂:၆-၁၂;လီၣ်ဖျါ ၁၆:၁၄, ၁၆) အဃိ ပကဘၣ်သံကွၢ်လီၤပသးလၢ ‘မ့ၢ်ယကဆီၣ်ထွဲမၤစၢၤမုၣ်ကီၤလံၢ်အတၢ်ပၢဧါ မ့တမ့ၢ် ကစၢ်ယွၤအတၢ်ပၢဧါ.’
တၢ်ဖးလံာ်စီဆှံ
(ဒၤနံးယ့လး ၂:၃၁-၄၃) နဲဒၣ်စီၤပၤဧၢ, နကွၢ်တၢ်, ဒီးကွၢ်ကွၢ်, တၢ်ဂီၤတၢ်ဖီၣ်ဖးဒိၣ်လီၤ. မ့ၢ်အဒိၣ်အထီ, ဒီးကယဲၢ်ကယူာ်ဒိၣ်မးလီၤ. ဒီးဆၢထၢၣ်လၢ နမဲာ်ညါဒီးအက့ၢ်အဂီၤ အိၣ်ဝဲဒီးအကဟုတုာ်အကညီၢ်ဒိၣ်လီၤ. ၃၂ တၢ်အဂီၤန့ၣ်မ့ၢ်အအံၤ, အခိၣ်န့ၣ်မ့ၢ်ထူစီ, အသးနါပှၢ်ဒီးအစုမ့ၢ်စ့, အဟၢဖၢဒီးအကံၣ်ဒုၣ်မ့ၢ်တိၢ်, ၃၃ အခီၣ်ဒုၣ်မ့ၢ်ထး, အခီၣ်လၣ်မ့ၢ်ထးတနီၤဒီးကပံာ်တနီၤလီၤ. ၃၄ နကွၢ်ဒံးတၢ် တုၤအစုတအိၣ်ဘၣ်ဒီး, တၢ်ကူးတဲာ်ကွံာ် လၢၢ်တဖျၢၣ်လၢအဘၣ်တိဘၣ်ထံးဒီး တၢ်ဂီၤအခီၣ်လၢအမ့ၢ်ထးဒီးကပံာ်, ဒီးမၤလီၤကလဲအီၤလီၤ. ၃၅ တုၤနုၤတစုထး, ကပံာ်, တိၢ်, စ့, ဒီးထူတဖၣ်န့ၣ်လီၤကလဲဃီၤ, ဒီးကဲထီၣ်တၢ်ဒ်ဖ့လၢ တၢ်ကိၢ်အကတီၢ် ယီၢ်ဘုအလီၢ်အဖီခိၣ်အသိးန့ၣ်, ဒီးကလံၤအူဒံကွံာ်အီၤ, ဒီးအလီၢ်တအိၣ်ဘၣ်လၢအဂီၢ်ဘၣ်. ဒီးလၢၢ်လၢအဘၣ်တိဘၣ်ထံးဒီးတၢ်ဂီၤန့ၣ် ကဲထီၣ်ကစၢၢ်ဖးဒိၣ်တဖျၢၣ်, ဒီးမၤပှဲၤဟီၣ်ခိၣ်ဒီဘ့ၣ်ညါလီၤ. ၃၆ အန့ၣ်မ့ၢ်တၢ်မံမီၢ်, ဒီးပကဖးလၢ အဒိၣ်အယိာ်လၢစီၤပၤအမဲာ်ညါလီၤ. ၃၇ နဲဒၣ်စီၤပၤဧၢ, နမ့ၢ်စီၤပၤတဖၣ်အစီၤပၤ, ပှၤလၢမူခိၣ်အကစၢ်ဟ့ၣ်လီၤ တၢ်အဘီအမုၢ်, ဒီးတၢ်အစိအကမီၤ, ဒီးတၢ်အဂံၢ်အဘါ, ဒီးတၢ်လၤကပီၤလီၤ. ၃၈ ဒီးဖဲဒၣ်ပှၤကညီဖိ အိၣ်ဝဲဆိးဝဲတပူၤလၢ်လၢ်န့ၣ် ဟ့ၣ်လီၤဆၣ်ဖိကီၢ်ဖိလၢပှၢ်လၢ်ကျါ, ဒီးထိၣ်ဖိလံၣ်ဖိလၢ မူကပိာ်လိၤတဖၣ်လၢနစုပူၤ, ဒီးပာ်နၤလၢ တၢ်ခဲလၢာ်န့ၣ်အခိၣ်လီၤ. နဲဒၣ်အံၤနမ့ၢ်တၢ်အခိၣ်ထူအံၤလီၤ. ၃၉ လၢနလီၢ်ခံန့ၣ် ဘီမုၢ်အဂၤဆံးန့ၢ်နၤ တဘီမုၢ်ကအိၣ်ထီၣ်, ဒီးဘီမုၢ်တိၢ်အဂၤသၢဘီမုၢ်တဘီမုၢ်လၢ အကစံၣ်ညီၣ် ဟီၣ်ခိၣ်ဒီဘ့ၣ်ညါကအိၣ်ထီၣ်လီၤ. ၄၀ ဘီမုၢ်လွံၢ်ဘီမုၢ်တဘီမုၢ်န့ၣ် ကဆူၣ်ဝဲဒ် ထးအသိးလီၤ. ဒ်ထးမၤကၢ်ကွံာ် ဒီးမၤလီၤကလဲကွံာ် ကယဲၢ်တၢ်တမံၤလၢ်လၢ်အသိး, ဒီးဒ်ထးမၤလီၤကလဲတၢ်တဖၣ်အသိးန့ၣ် ကမၤလီၤကလဲဒီး မၤသဘှံးတၢ်ခဲလၢာ်န့ၣ်လီၤ. ၄၁ ဒီးမ့ၢ်နထံၣ်အခီၣ်လၣ်, ဒီးအခီၣ်မုၢ်ဒိၣ်လၢအမ့ၢ် ကပံာ်တနီၤဒီးထးတနီၤဒီး, ဘီမုၢ်န့ၣ်ကလီၤဖးဘၣ်ဆၣ်ဒီး, ထးအဂံၢ်အဘါ ကအိၣ်ဝဲလၢအပူၤလီၤ. အဂ့ၢ်ဒ်အံၤ, နထံၣ်ထးဃါဃုာ်ဒီးကပံာ်လီၤ. ၄၂ ဒီးမ့ၢ်ခီၣ်မုၢ်ဒိၣ်မ့ၢ်ထးတနီၤ, ဒီးကပံာ်တနီၤဒီး, ဘီမုၢ်ကဆူၣ်တနီၤ, ဒီးကကၢ်ညီတနီၤလီၤ. ၄၃ မ့ၢ်နထံၣ်ထးဃါဃုာ် ဒီးကပံာ်သတးဒီး, ကမၤဃါဃုာ်အသးဒီး ပှၤကညီအချံအသၣ်ဘၣ်ဆၣ်ဒီး, တစဲဘူးလိာ်အသးဘၣ်, ကွၢ်ကွၢ်, ဒ်ထးတယီဃုာ်ဘၣ်ဒီး ကပံာ်အသိးန့ၣ်လီၤ.
လါစဲးပတ့ဘၢၣ် ၂၅–လါအီးကထိဘၢၣ် ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဒၤနံးယ့လး ၄-၆
“မ့ၢ်နမၤ ယဟိဝၤယွၤအတၢ်မၤ ထီဘိဧါ”
(ဒၤနံးယ့လး ၆:၇-၁၀) ကယဲၢ်ဘီမုၢ်အခိၣ်, ဒီးပဒိၣ်ဖးဒိၣ်, ပဒိၣ်ပပှၢ်, စီၤပၤအပှၤကူၣ်လိာ်အသး, ဒီးပှၤပၢတၢ်ဖိခဲလၢာ်န့ၣ် ကူၣ်လိာ်အသး ဒ်သိးတၢ်ကလုၢ်ကလီၤလၢစီၤပၤ, ဒီးတၢ်သိၣ်တၢ်သီခၢၣ်သနၢၢ် ကအိၣ်ဒ်အံၤ, လၢမ့တမ့ၢ်ဘၣ်လၢနၤဘၣ်ဒီး, ဖဲဒၣ်ပှၤလၢအဃ့တၢ်လၢ အကစၢ်မ့ၢ်ဂ့ၤ, လၢပှၤကညီမ့ၢ်ဂ့ၤ, လၢအနံၤသၢဆံအတီၢ်ပူၤတဂၤဂၤန့ၣ် ကဘၣ်တၢ်တ့ၢ်လီၤကွံာ်အီၤဆူ ခ့ယုၢ်အပူၤလီၤ. ၈ ခဲကနံၣ်အံၤစီၤပၤဧၢ, ဒုးအိၣ်ထီၣ်နတၢ်မၤလိာ်, ဒီးဒုးကွဲးလံာ်, လၢတၢ်မၤကဒံကဒါအီၤတသ့ဘၣ်, ဒ်ပှၤမၤဒဲဖိဒီး ပှၤပၤရၣ်ဖိအတၢ်သိၣ်တၢ်သီအသိး, လၢအကဒံကဒါတသ့ဘၣ်န့ၣ်တက့ၢ်. ၉ မၤသးဒ်န့ၣ်ဒီး စီၤပၤဒၤရယါဝ့ၣ်ဒုးကွဲးလံာ်န့ၣ်, ဒီးဒုးအိၣ်ထီၣ်တၢ်မၤလိာ်န့ၣ်လီၤ. ၁၀ တုၤစီၤဒၤနံးယ့လးသ့ၣ်ညါဝဲလၢ တၢ်ကွဲးအသးဝံၤဒီး, လဲၤနုာ်လၢအဟံၣ်ပူၤ, ဒီးအတၢ်ထူၣ်ဖျိ အိၣ်အိးထီၣ်အသးလၢ အဒၢးထီၣ်ထီတတီၤ ဖျိထီၣ်ဝဲဆူယရူၤၡလ့ၣ်တခီ, ဒီးချံးလီၤအခီၣ်တနံၤသၢဘျီစုာ်စုာ်, ဒီးဃ့ဘါထုကဖၣ်တၢ်, ဒီးစံးထီၣ်ပတြၢၤ တၢ်အဘျုးအဖှိၣ်လၢ အကစၢ်အမဲာ်ညါ, ဒ်အမၤဝဲလၢအခီၣ်ထံးအသိးန့ၣ်လီၤ.
တၢး၁၀ ၁၁/၁၅ ကဘျံးပၤ ၆ အဆၢ ၁၆
သးစၢ်သ့ၣ်ဧၢ—ပျဲယွၤအကလုၢ်ကထါ ဟံးစုနဲၣ်ကျဲနၤ
၁၆ ဖဲနအိၣ်တဂၤအဆၢကတီၢ်ဒၣ်လဲာ် ဘၣ်မနုၤအဃိ နဘၣ်ဒိကနၣ် ယဟိဝၤယွၤအကလုၢ်လဲၣ်. သ့ၣ်နီၣ်ထီၣ်လၢ နမၤဘၣ်ဒိယဟိဝၤယွၤအသးသ့ ဒီးနမၤသးခုအသးသ့တက့ၢ်. (၁ မိၤ. ၆:၅, ၆; ကတိၤ. ၂၇:၁၁) ခီဖျိလၢ ယဟိဝၤယွၤ “အသးအိၣ်” နၤအဃိနတၢ်မၤတဖၣ်န့ၣ် မၤဘၣ်ဒိအီၤ မ့တမ့ၢ် မၤသးအုးအီၤသ့လီၤ. (၁ ပ့း. ၅:၇) အဝဲအဲၣ်ဒိးလၢ နကဒိကနၣ်အကလုၢ် ဒ်သိးကကဲဘျုးလၢနဂီၢ်လီၤ. (ၡါ. ၄၈:၁၇, ၁၈) ခီဖျိလၢပှၤအံၣ်စရ့လးဖိ လၢပျၢၤတဖၣ် တဒိကနၣ်ကစၢ်ယွၤအတၢ်ဟ့ၣ်ကူၣ်အဃိ မၤဘၣ်ဒိကစၢ်အသးလီၤ. (စံး. ၇၈:၄၀, ၄၁) မ့မ့ၢ်စီၤဒၤနံးယ့လးန့ၣ် ယဟိဝၤယွၤအဲၣ်အီၤဒိၣ်မးအဃိ ခီဖျိလၢမူခိၣ်ကလူးန့ၣ် ယဟိဝၤယွၤကိးအီၤလၢ “ပှၤလၢအဘၣ်တၢ်အဲၣ်အီၤတဂၤ” လီၤ. (ဒၤ. ၁၀:၁၁) ဘၣ်မနုၤအဃိလဲၣ်. မ့ၢ်လၢ လၢပှၤမဲာ်ညါမ့ၢ်ဂ့ၤ ပှၤလီၢ်ခံမ့ၢ်ဂ့ၤ အဝဲအိၣ်ဒီးတၢ်သးတီဒီးယွၤထီဘိအဃိလီၤ.—ဖး ဒၤနံးယ့လး ၆:၁၀ တက့ၢ်.
တၢး၀၆ ၁၁/၁ ကဘျံးပၤ ၂၄ အဆၢ ၁၂
တၢ်လၢယဟိဝၤယွၤထံၣ်ဝဲလၢ အကဆှီန့ၣ် မ့ၢ်နထံၣ်အီၤဒ်န့ၣ်အသိးစ့ၢ်ကီးဧါ
၁၂ လၢတၢ်အိၣ်ဖှိၣ်အပူၤ တၢ်လၢအဘၣ်ထွဲဒီး ပှၤလၢအဘၣ်တၢ်ဒိးဖှူအီၤတဖၣ် ဒီးအဝဲသ့ၣ်အတံၤသကိးတဖၣ်န့ၣ် ကဆှီဝဲလီၤ. ပတၢ်ရ့လိာ်သးဒီး ယဟိဝၤယွၤန့ၣ် မ့ၢ်တၢ်လၢအကဆှီတခါလီၤ. (၁ ကွဲးနီၣ်တၢ် ၂၈:၉; စံးထီၣ်ပတြၢၤ ၃၆:၇) ဒီးမ့ၢ်တၢ်လၢ အလုၢ်ဒိၣ်ပှ့ၤဒိၣ်အဃိ ပတအဲၣ်ဒိးလၢ ပှၤတဂၤဂၤ မ့တမ့ၢ် တၢ်တမံၤမံၤ ကမၤဟးဂီၤပတၢ်ရ့လိာ်သးဒီးယွၤဘၣ်. (၂ ကွဲးနီၣ်တၢ် ၁၅:၂; ယၤကိာ် ၄:၇, ၈) ဒ်သိးပတၢ်ရ့လိာ်သးဒီး ယဟိဝၤယွၤကဂ့ၤအဂီၢ် တၢ်ထုကဖၣ် မ့ၢ်တၢ်လၢအရ့ဒိၣ်လီၤ. စီၤဒၤနံးယ့လး ထံၣ်ဝဲတၢ်ထုကဖၣ်မ့ၢ်တၢ်လၢ အရ့ဒိၣ်အဃိ ဖဲတၢ်ဘၣ်ယိၣ်အလီၢ်အိၣ်လၢ အသးသမူအဂီၢ်အခါဒၣ်လဲာ် အဝဲဆဲးဃ့ထုကဖၣ်လၢ တၢ်သးတီအပူၤလီၤ. (ဒၤနံးယ့လး ၆:၇-၁၁) “ပှၤစီဆှံ” တဖၣ် မ့တမ့ၢ် ပှၤလၢအဘၣ်တၢ်ဒိးဖှူအီၤတဖၣ် အတၢ်ထုကဖၣ်န့ၣ် ဘၣ်တၢ်ဒိလီၤအီၤဒ်သိး တၢ်ဆိၣ်ကဲၤနၢမူလၢ ပှၤသူအီၤလၢ တၢ်ဘူၣ်ထီၣ်ဘါထီၣ်ယွၤအခါလီၤ. (လီၣ်ဖျါ ၅:၈; ၈:၃, ၄; ၃ မိၤၡ့ ၁၆:၁၂, ၁၃) တၢ်အဒိအံၤ ပာ်ဖျါထီၣ်ဝဲလၢ တၢ်ထုကဖၣ်မ့ၢ်တၢ်လၢ အလုၢ်ဒိၣ်ပှ့ၤဒိၣ်လီၤ. ခီဖျိလၢ ပဆဲးကျိးဘၣ်ဒီး မူဟီၣ်ကယၢ တၢ်ပၢကစၢ်အဃိ မ့ၢ်တၢ်ခွဲးတၢ်ယာ်လီၤဆီဖးဒိၣ်လီၤ. ဒီးလၢပတၢ်အိၣ်မူအပူၤ တၢ်ထုကဖၣ်န့ၣ် ပကြၢးပာ်အီၤလၢ တၢ်လၢအလုၢ်ဒိၣ်ပှ့ၤဒိၣ်လီၤ.
(ဒၤနံးယ့လး ၆:၁၆) ဒီးစီၤပၤမၤလိာ်, ဒီးပှၤဟဲစိာ်စီၤဒၤနံးယ့လး, ဒီးတ့ၢ်လီၤကွံာ်အီၤလၢခ့ယုၢ်အပူၤလီၤ. စီၤပၤကတိၤတၢ်ဒီးစံးဘၣ်စီၤဒၤနံးယ့လး, နကစၢ်လၢနမၤအတၢ်တထံၣ်ဃီတဂၤန့ၣ် အဝဲဒၣ်ကမၤပူၤမၤဖျဲးနၤလီၤ.
(ဒၤနံးယ့လး ၆:၂၀) ဒီးတုၤအအိၣ်ဘူးဒီးတၢ်ပူၤဒီး, ကိးထီၣ်လၢအကလုၢ်ဖးဒိၣ် ဆူစီၤဒၤနံးယ့လးအအိၣ်လီၤ. စီၤပၤကတိၤတၢ်ဒီးစံးလၢ စီၤဒၤနံးယ့လး, ကစၢ်လၢအမူဝဲတဂၤအခ့အပှၤ စီၤဒၤနံးယ့လးဧၢ, နကစၢ်လၢနမၤအတၢ်တထံၣ်ဃီန့ၣ် မၤပူၤမၤဖျဲးနၤလၢ ခ့ယုၢ်တဖၣ်သ့စ့ၢ်ကီးဧါ.
တၢး၀၃ ၉/၁၅ ကဘျံးပၤ ၁၅ အဆၢ ၂
ဘၣ်မနုၤအဃိ ပကြၢးဃ့ဘါထုကဖၣ် ထီဘိလဲၣ်
၂ ယဟိဝၤယွၤထံၣ်ဝဲ စီၤဒၤနံးယ့လးဒ်လဲၣ်. ဖဲမူခိၣ်ကလူး ကၤဘြံၤအ့လး ဟဲစံးဆၢဝဲ စီၤဒၤနံးယ့လး အတၢ်ထုကဖၣ်အခါ အဝဲကိးအီၤလၢ “ပှၤလၢအဘၣ် တၢ်အဲၣ်အီၤတဂၤ” လီၤ. (ဒၤနံးယ့လး ၉:၂၀-၂၃) ဝံအတၢ်စံးပာ် လၢလံာ်ယဃ့းစက့လးအပူၤန့ၣ် ယဟိဝၤယွၤတဲဝဲလၢ စီၤဒၤနံးယ့လး မ့ၢ်ပှၤလၢ အတီအလိၤလီၤ. (ယဃ့းစက့လး ၁၄:၁၄, ၂၀) စီၤဒၤနံးယ့လးအတၢ်ထုကဖၣ်တဖၣ်န့ၣ် မၤစၢၤအီၤဒ်သိး ကအိၣ်ဒီးတၢ်ရ့လိာ်သးဒီး ကစၢ်ယွၤဘူးဘူးတံၢ်တံၢ်အဂီၢ်လီၤ. ဒီးစီၤပၤဒၤရယါဝ့ၣ်စ့ၢ်ကီး သ့ၣ်ညါဝဲလၢ စီၤဒၤနံးယ့လး ပာ်ဒိၣ်အတၢ်ထုကဖၣ်လီၤ.—ဒၤနံးယ့လး ၆:၁၆.
(ဒၤနံးယ့လး ၆:၂၂, ၂၃) ယကစၢ်မၢလီၤ အကလူးတဂၤ ဒီးမၤကျၢၢ်တံာ်ခ့ယုၢ်အထးခိၣ်, ဒီးအဝဲသ့ၣ် တမၤအၢဘၣ်ယၤနီတမံၤဘၣ်. အဂ့ၢ်ဒ်အံၤ, တၢ်ဒဲးဘး တအိၣ်ဘၣ်လၢယလိၤလၢအမဲာ်ညါ, ဒီးစီၤပၤဧၢ, ယတမၤစ့ၢ်ကီးဘၣ်တၢ်အၢလၢနမဲာ်ညါနီတမံၤဘၣ်. ၂၃ တုၤနုၤတစု စီၤပၤသးခုလၢအသးကံၢ်ပူၤ, ဒီးမၤလိာ်ဝဲလၢ ပှၤကစဲၤထီၣ်က့ၤစီၤဒၤနံးယ့လးလၢတၢ်ပူၤလီၤ. ဒီးတၢ်စဲၤထီၣ်က့ၤစီၤဒၤနံးယ့လးလၢတၢ်ပူၤ, ဒီးတၢ်မၤအၢအီၤတအိၣ်ဘၣ်လၢ အလိၤနီတမံၤဘၣ်. အဂ့ၢ်ဒ်အံၤ, သန့ၤအသးလၢအကစၢ်လီၤ.
တၢး၁၀ ၂/၁၅ ကဘျံးပၤ ၁၈ အဆၢ ၁၅
“သးန့ၣ်, ဒီးတလးမူးပိာ်မုၣ်စံးဝဲဒၣ်, ဟဲတက့ၢ်”
၁၅ စီၤဒၤနံးယ့လးအိၣ်လၢ ခ့ယုၢ်ကပိၤအပူၤ တနၤဝံၤအလီၢ်ခံ စီၤပၤဟဲလၢအအိၣ်ဒီးကိးပသူထီၣ်ဝဲလၢ “စီၤဒၤနံးယ့လး, ကစၢ်လၢအမူဝဲတဂၤ အခ့အပှၤစီၤဒၤနံးယ့လးဧၢ, နကစၢ်လၢနမၤအတၢ်တထံၣ်ဃီန့ၣ် မၤပူၤမၤဖျဲးနၤလၢ ခ့ယုၢ်တဖၣ်သ့စ့ၢ်ကီးဧါ.” ဒီးစီၤဒၤနံးယ့လး စံးဆၢက့ၤအီၤလၢ “စီၤပၤဧၢ, မ်နမူလီၤထူလီၤယိာ်တက့ၢ်. ယကစၢ်မၢလီၤအကလူးတဂၤဒီး မၤကျၢၢ်တံာ်ခ့ယုၢ်အထးခိၣ်, ဒီးအဝဲသ့ၣ် တမၤအၢဘၣ်ယၤနီတမံၤဘၣ်. အဂ့ၢ်ဒ်အံၤ, တၢ်ဒဲးဘးတအိၣ်ဘၣ်လၢ ယလိၤလၢအမဲာ်ညါ, ဒီးစီၤပၤဧၢ, ယတမၤစ့ၢ်ကီးဘၣ်တၢ်အၢ လၢနမဲာ်ညါ နီတမံၤဘၣ်.”—ဒၤ. ၆:၁၉-၂၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဒၤနံးယ့လး ၄:၁၀, ၁၁) တၢ်လၢယမဲာ်ထံၣ်တၢ်လၢညါခီ လၢယလီၢ်မံအပူၤမ့ၢ်အအံၤ, ယကွၢ်တၢ်ဒီးကွၢ်ကွၢ်, သ့ၣ်တထံးအိၣ်ဝဲလၢ ဟီၣ်ခိၣ်အသးကံၢ်ပူၤ, ဒီးထီဝဲထီထီကလဲာ်လီၤ. ၁၁ ဒီးသ့ၣ်န့ၣ်ဒိၣ်ထီၣ်ဝဲ, ဒီးဆူၣ်ထီၣ်ဝဲ, ဒီးအထီထီၣ်ဘးလၢမူခိၣ်, ဒီးအိၣ်ဖျါဝဲတုၤလၢ ဟီၣ်ခိၣ်ဒီဘ့ၣ်ညါအကတၢၢ်လီၤ.
(ဒၤနံးယ့လး ၄:၂၀-၂၂) သ့ၣ်လၢနထံၣ်ဝဲတထံးလၢ အဒိၣ်ထီၣ်, ဒီးဆူၣ်ထီၣ်ဒီးအထီထီၣ်ဘးလၢမူခိၣ်, ဒီးအိၣ်ဖျါဝဲလၢ ဟီၣ်ခိၣ်ဒီဘ့ၣ်ညါ, ၂၁ ဒီးအဒိးအလၣ်န့ၣ် အိၣ်ဒီးအဃံအလၤ, ဒီးအတၤသၣ်အိၣ်ဝဲ အါအါကလဲာ်, ဒီးတၢ်အီၣ်လၢ တၢ်ခဲလၢာ်အဂီၢ်အိၣ်ဝဲလၢအလိၤ, ဒီးဆၣ်ဖိကီၢ်ဖိလၢ ပှၢ်လၢ်ကျါအိၣ်ဝဲဆိးဝဲလၢအဖီလာ်, ဒီးထိၣ်ဧိၤလံၣ်ဧိၤလၢမူကပိာ်လိၤ အိၣ်ဒီးအအိၣ်အဆိးအလီၢ်လၢအဒ့ကျါန့ၣ်, ၂၂ မ့ၢ်နၤစီၤပၤဧၢ, နဒိၣ်ထီၣ်, ဒီးနဆူၣ်ထီၣ်, ဒီးနဒိၣ်ထီၣ်န့ၣ်အါထီၣ်, ဒီးထီၣ်ဘးလၢမူခိၣ်, ဒီးနဘီနမုၢ်န့ၣ် ပၢၢ်လၢဟီၣ်ခိၣ်အကတၢၢ်လီၤ.
တၢး၀၇ ၉/၁ ကဘျံးပၤ ၁၈ အဆၢ ၅
လံာ်စီဆှံ အတၢ်ပာ်ဖျါလၢ လံာ်ဒၤနံးယ့လး
၄:၁၀, ၁၁, ၂၀-၂၂—သ့ၣ်ထူၣ်ဖးဒိၣ်လၢ စီၤပၤနဘူၤကးန့စၢ် အတၢ်မံမီၣ်ပူၤန့ၣ် ဒိလီၤဝဲတၢ်မနုၤလဲၣ်. အဆိကတၢၢ်န့ၣ် ဒ်ပှၤပၢတၢ်လၢ ဘီမုၢ်လၢအဒိၣ်စိလၢ ဟီၣ်ခိၣ်ဒီဘ့ၣ်တဂၤအသိး စီၤပၤနဘူၤကးန့စၢ်န့ၣ် ဘၣ်တၢ်ဒိလီၤအီၤလၢ သ့ၣ်တထူၣ်အံၤလီၤ. ဘၣ်ဆၣ် တၢ်ပၢတၢ်ပြးတခါအံၤန့ၣ် “အိၣ်ဖျါဝဲလၢ ဟီၣ်ခိၣ်ဒီဘ့ၣ်ညါ” အဃိ ကဘၣ်ဒိလီၤဝဲ ဘီမုၢ်လၢအဒိၣ်န့ၢ်ဒံး စီၤပၤနဘူၤကးန့စၢ်အဘီအမုၢ်စ့ၢ်ကီးလီၤ. ဒၤနံးယ့လး ၄:၁၇ ပာ်ဖျါထီၣ်ဝဲလၢ တၢ်မံမီၣ်အံၤန့ၣ် ဘၣ်ထွဲလိာ်အသးဒီး “တၢ်ထီကတၢၢ်တဂၤ” အတၢ်ပၢတၢ်ပြးလီၤ. တကးဒံးဘၣ်, လီၤဆီဒၣ်တၢ် သ့ၣ်ထူၣ်န့ၣ် ဒိလီၤဝဲယဟိဝၤယွၤအိၣ်ဒီး တၢ်ခွဲးတၢ်ယာ်လၢပၢဝဲ မူဟီၣ်ကယၢဒီဘ့ၣ်ဃုာ်ဒီး ဟီၣ်ခိၣ်န့ၣ်လီၤ. လၢတၢ်န့ၣ်အဃိ တၢ်မံမီၣ်အံၤ ဟဲလၢပှဲၤထီၣ်ဝဲလၢ စီၤပၤနဘူၤကးန့စၢ်အတၢ်ပၢ ဒီးမူဟီၣ်ကယၢ တၢ်ပၢကစၢ် ယဟိဝၤယွၤအတၢ်ပၢလီၤ.
(ဒၤနံးယ့လး ၅:၁၇) တုၤနုၤတစုစီၤဒၤနံးယ့လးစံးဆၢတၢ်, ဒီးစံးလၢစီၤပၤအမဲာ်ညါ, မ်နတၢ်ဟ့ၣ်တဖၣ်အိၣ်ဝဲဒီး နကစၢ်ဒၣ်နဲတက့ၢ်. ဒီးမ်နဟ့ၣ်လီၤနဘူးနလဲတဖၣ် လၢပှၤဂၤတက့ၢ်. ဘၣ်ဆၣ်ဒီးယကဖးန့ၢ်စီၤပၤလၢတၢ်ကွဲးအသး, ဒီးယကဘိးဘၣ်သ့ၣ်ညါအီၤလၢအဒိၣ်အယိာ်လီၤ.
(ဒၤနံးယ့လး ၅:၂၉) တုၤနုၤတစုစီၤဘ့ၤလၡါစၢ်မၤလိာ်တၢ်, ဒီးပှၤဒုးကူဒုးသိးစီၤဒၤနံးယ့လးလၢအတၢ်လုးတကုာ်, ဒီးဒုးလံာ်သွဲထူလၢအကိာ်, ဒီးပှၤကိးထီၣ်ဝဲလၢ အဂ့ၢ်လၢအကကဲထီၣ် ပှၤပၢတၢ်လၢဘီဧိၤမုၢ်ဧိၤအပူၤသၢဂၤတဂၤလီၤ.
တၢး၈၈ ၁၀/၁ ကဘျံးပၤ ၃၀ အဆၢ ၃-၅
ပှၤဖးလံာ်ဖိတဖၣ် အတၢ်သံကွၢ်
လၢခံကတၢၢ် ပှၤဧ့ၤဘြံၤဖိလၢအမံၤမ့ၢ် စီၤဒၤနံးယ့လးန့ၣ် ပှၤဟဲကိးအီၤဆူ စီၤပၤအအိၣ်ဒီး စီၤပၤအဲၣ်ဒိးဒုးကၤထီၣ်အီၤ တၢ်လုးတကုာ်, ဒုးလံာ်ထီၣ်အီၤသွဲထူဒီး ဒုးကဲထီၣ်အီၤလၢ စီၤပၤသၢဂၤတဂၤ လၢဘီမုၢ်အပူၤလီၤ. လၢတၢ်ပာ်ကဲအပူၤ စီၤဒၤနံးယ့လးစံးဆၢက့ၤအီၤလၢ “မ်နတၢ်ဟ့ၣ်တဖၣ်အိၣ်ဝဲဒီး နကစၢ်ဒၣ်နဲတက့ၢ်. ဒီးမ်နဟ့ၣ်လီၤနဘူးနလဲတဖၣ် လၢပှၤဂၤတက့ၢ်. ဘၣ်ဆၣ်ဒီး ယကဖးန့ၢ်စီၤပၤလၢ တၢ်ကွဲးအသး, ဒီးယကဘိးဘၣ်သ့ၣ်ညါအီၤလၢအဒိၣ်အယိာ်လီၤ.”—ဒၤနံးယ့လး ၅:၁၇.
ဒ်သိးစီၤဒၤနံးယ့လး ကဖးတၢ်မံမီၣ်အဂီၢ် အဝဲတလိၣ်ဘၣ်တၢ်ဟ့ၣ် မ့တမ့ၢ် ကျိၣ်စ့ဘၣ်. စီၤပၤကဘၣ်ပာ်က့ၤအတၢ်ဟ့ၣ် မ့တမ့ၢ် ကဘၣ်ဟ့ၣ်ဝဲပှၤအဂၤတဂၤလီၤ. ခီဖျိလၢစီၤဒၤနံးယ့လး အဲၣ်ဒိးဒိးန့ၢ်ဘၣ် တၢ်ဟ့ၣ်အဃိ တဲပၠးပှၤတၢ်မံမီၣ်အခီပညီတမ့ၢ်ဘၣ်. အဝဲဒိးန့ၢ်ဘၣ် တၢ်စိတၢ်ကမီၤလၢ ယဟိဝၤယွၤ, ယွၤလၢအမ့ၢ်အတီဒီး အစံၣ်ညီၣ်တၢ်လၢ ဘၤဘူၤလိၣ်အဖီခိၣ်န့ၣ်လီၤ.
ပမ့ၢ်ဖးကွၢ်ဖဲ ဒၤနံးယ့လး ၅:၂၉ န့ၣ်ဖဲစီၤဒၤနံးယ့လး တဲဖျါထီၣ်ဝဲတၢ်မံမီၣ်ဝံၤအလီၢ်ခံ စီၤပၤဟ့ၣ်လီၤတၢ်ကလုၢ်လၢ ပှၤကဟ့ၣ်လီၤ စီၤဒၤနံးယ့လးလၢ တၢ်ဟ့ၣ်တဖၣ်န့ၣ်လီၤ. စီၤဒၤနံးယ့လး တကူထီၣ်သိးထီၣ်ဝဲ ဆ့က့ၤဒီးသွဲထူ လၢအနီၢ်ကစၢ်ဘၣ်. ခီဖျိလၢ စီၤပၤနဘူၤကးန့စၢ် ဟ့ၣ်လီၤတၢ်ကလုၢ်အဃိ ပှၤဘၣ်ဒုးကူဒုးသိးထီၣ်အီၤလီၤ. အဃိ တၢ်ဂ့ၢ်တဖၣ်အံၤန့ၣ် တထီဒါလိာ်အသးဒီး ဒၤနံးယ့လး ၅:၁၇ လၢအပာ်ဖျါထီၣ်ဝဲလၢ ဝံတဂၤအံၤ တဃုလီၤထဲအနီၢ်ကစၢ်အဘျုးဘၣ်.
dp ကဘျံးပၤ ၁၀၉ အဆၢ ၂၂
တၢ်ကတိၤလွံၢ်ဖျၢၣ်လၢ အဆီတလဲကွံာ်ဟီၣ်ခိၣ်
၂၂ လံာ်မဲာ်ဖျၢၣ်တဖၣ်အံၤ အခီပညီဟဲဖျါထီၣ်လံ. ဘၤဘူၤလိၣ် အစိဒိၣ်အကမီၤထီသနာ်က့ ကလီၤဝဲလၢ မံဒံယါ-ဖၢၡၢၣ် အစုပူၤလီၤ. ခီဖျိလၢတၢ်ဂ့ၢ်အံၤအဃိ စီၤပၤဘ့ၤလၡါစၢ် အသးကဘၣ်ဒိဘၣ်ဆၣ် အဝဲမၤဝဲဒ် အအၢၣ်လီၤပာ်စၢၤဝဲအသိးလီၤ. အဝဲမၢပှၤဒုးကၤထီၣ် စီၤဒၤနံးယ့လးလၢ တၢ်လုးတကုာ်, ဒုးလံာ်ထီၣ်အီၤထူ ဒီးပာ်ထီၣ်အီၤလၢ စီၤပၤသၢဂၤတဂၤအလီၢ်လီၤ. (ဒၤနံးယ့လး ၅:၂၉) စီၤဒၤနံးယ့လး ဆိကမိၣ်ဝဲလၢ တၢ်မၤလၤကပီၤသ့ၣ်တဖၣ်အံၤ ကပာ်ဖျါထီၣ်ဝဲ ယဟိဝၤယွၤအလၤကပီၤအဃိ အဝဲတညိကွံာ်ဝဲဘၣ်. မ့မ့ၢ်စီၤပၤဘ့ၤလၡါစၢ် န့ၣ်ကဆိကမိၣ်ဘၣ်ဝဲလၢ မ့ၢ်မၤလၤကပီၤကစၢ်ယွၤအဝံအံၤန့ၣ် ဘၣ်သ့ၣ်သ့ၣ် ကစၢ်ယွၤကမၤစှၤလီၤ အတၢ်စံၣ်ညီၣ်လၢအဖီခိၣ်လီၤ. တၢ်မ့ၢ်မၤအသးဒ်န့ၣ် ဘၣ်ဆၣ် စဲၤခံဝဲလံ.
တၢ်ဖးလံာ်စီဆှံ
(ဒၤနံးယ့လး ၄:၂၉-၃၇) တဆံခံလါအကတၢၢ်န့ၣ် စီၤပၤဟးယဲၤယီၤဝဲလၢ ဘၤဘူၤလိၣ်အဘီမုၢ် အနူၢ်အစီၤအခိၣ်လီၤ. ၃၀ စီၤပၤကတိၤတၢ်ဒီးစံးဝဲဒၣ်, အဝဲအံၤမ့ၢ်ဘၤဘူၤလိၣ်ဖးဒိၣ်လၢ ယတ့ယဲလၢ ယစိဒိၣ်ယကမီၤထီ, ဒီးလၢယကဟုကညီၢ် အလၤကပီၤအဂီၢ်လၢ ဘီဧိၤမုၢ်ဧိၤအဟံၣ်အဂီၢ် တမ့ၢ်ဘၣ်ဧါ. ၃၁ တၢ်ကတိၤန့ၣ်အိၣ်ဒံးလၢ စီၤပၤအထးခိၣ်အဖၢမုၢ်ဒီး, တၢ်အကလုၢ်သီၣ်လီၤလၢမူခိၣ်, စံးဝဲဒၣ်, စီၤပၤနဘူၤကးန့စၢ်ဧၢ, တၢ်စံးဘၣ်နၤ, ဘီဧိၤမုၢ်ဧိၤန့ၣ်ဟးထီၣ်ကွံာ်လၢနၤလီၤ. ၃၂ ဒီးတၢ်ကဟီထီၣ်ကွံာ်နၤလၢ ပှၤကညီအကျါ, ဒီးနအိၣ်နဆိးအလီၢ်န့ၣ် ကအိၣ်ဝဲဒီး ဆၣ်ဖိကီၢ်ဖိလၢပှၢ်လၢ်ကျါလီၤ. တၢ်ကဒုးအီၣ်နၤလၢ နီၣ်ဧိၤမံၤဧိၤဒ်ဂီၤဖံးအသိး, ဒီးတၢ်ကဆၢအလီၢ်နွံဘျီလၢနဖီခိၣ် တုၤနသ့ၣ်ညါလၢ တၢ်ထီကတၢၢ် ပၢတၢ်လၢပှၤကညီအဘီအမုၢ်အဖီခိၣ်, ဒီးဟ့ၣ်လီၤအီၤဖဲဒၣ်ပှၤလၢ အဘၣ်အသးတဂၤဂၤလီၤ. ၃၃ တၢ်ကတိၤဘၣ်ဃးဒီး စီၤနဘူၤကးန့စၢ်န့ၣ် လၢထီၣ်ပှဲၤထီၣ်တကီၢ်ခါ, ဒီးတၢ်ဟီထီၣ်ကွံာ်အီၤလၢ ပှၤကညီအကျါ, ဒီးအီၣ်နီၣ်ဧိၤမံၤဧိၤဒ်ဂီၤဖံးအသိး, ဒီးဘၣ်စီၣ်လၢမူခိၣ်အပစီၤထံ တုၤအဆူၣ်ထီၣ်ဝဲ ဒ်လံာ်ဧိၤတြၤဧိၤအသိး, ဒီးအစုမ့ၣ်ထီၣ်ဝဲ ဒ်ထိၣ်ဧိၤလံၣ်ဧိၤ အခီၣ်မ့ၣ်အသိးန့ၣ်လီၤ. ၃၄ တၢ်လၢမုၢ်နံၤတဖၣ်အကတၢၢ်န့ၣ် ယဲဒၣ်စီၤနဘူၤကးန့စၢ်, ယကျ့ထီၣ်ယမဲာ်ဆူမူခိၣ်, ဒီးယသးဟဲက့ၤကဒါက့ၤလၢယပူၤ, ဒီးယဆိၣ်ဂ့ၤတၢ်ထီကတၢၢ်တဂၤ, ဒီးယစံးထီၣ်ပတြၢၤ, ဒီးယမၤလၤကပီၤ ပှၤလၢအမူဝဲလီၤထူလီၤယိာ်တဂၤလီၤ. အဂ့ၢ်ဒ်အံၤ, အပၢဝဲအလီၢ်န့ၣ် အိၣ်ဝဲလီၤထူလီၤယိာ်, ဒီးအဘီအမုၢ်အိၣ်ဝဲ အစိၤစိၤအဃၣ်ဃၣ်လီၤ. ၃၅ ဒီးပာ်ကယဲၢ်ပှၤဟီၣ်ခိၣ်ဖိခဲလၢာ်န့ၣ်လၢ တၢ်နီတမံၤဘၣ်, ဒီးမၤဝဲဖဲဒၣ်အသးလၢ မူခိၣ်အသုးမုၢ်ဂီၢ်မုၢ်အကျါ, ဒီးလၢပှၤဟီၣ်ခိၣ်ဖိအကျါ, ဒီးပှၤတြီအစုမ့ၢ်ဂ့ၤ, ဒီးစံးဘၣ်အီၤ, နမၤဒ်လဲၣ်န့ၣ်မ့ၢ်ဂ့ၤ, တသ့ဘၣ်နီတဂၤဘၣ်လီၤ. ၃၆ ယသးန့ၣ် ဟဲက့ၤကဒါက့ၤလၢယပူၤတကီၢ်ခါ, ဒီးယဘီမုၢ်အလၤကပီၤ, ဒီးယကဟုကညီၢ်, ဒီးယဃံယလၤဟဲက့ၤကဒါက့ၤဆူယအိၣ်, ဒီးယပှၤကူၣ်လိာ်အသး, ဒီးယပဒိၣ်ဖးဒိၣ်တဖၣ်န့ၣ် ဃုက့ၤယၤ, ဒီးတၢ်ဒုးအိၣ်ထီၣ်ယၤလၢ ယဘီယမုၢ်အဖီခိၣ်, ဒီးတၢ်ပာ်အါထီၣ်ယကဟုကညီၢ်လီၤ. ၃၇ ခဲကနံၣ်အံၤ ယဲဒၣ်နဘူၤကးန့စၢ်အံၤ, ယစံးထီၣ်ပတြၢၤ, ဒီးပာ်ဒိၣ်ပာ်ထီ, ဒီးမၤလၤကပီၤမူခိၣ်အစီၤပၤလီၤ. အမၤတၢ်ခဲလၢာ်န့ၣ် မ့ၢ်တၢ်မ့ၢ်တၢ်တီ, ဒီးအကျဲတဖၣ်န့ၣ် မ့ၢ်တၢ်စံၣ်ညီၣ်တီ, ဒီးပှၤလၢအပာ်အသးထီၣ်ထီတဖၣ်န့ၣ် ဆီၣ်လီၤအီၤသ့လီၤ.