ပၤရဒံစူး လီၤမၢ်ကွံာ်

ကစၢ်ယွၤ တချုးတ့လီၤ ပှၤဟီၣ်ခိၣ်ဖိအခါ တ့လီၤဆိဝဲ ပှၤနီၢ်သးတဖၣ်လၢ ပထံၣ်အီၤလၢ ပမဲာ်တသ့လၢအမ့ၢ် မူခိၣ်ကလူးတဖၣ်န့ၣ်လီၤ. လၢဧ့ၤဒ့ၣ်တၤသၣ်အလီၢ်န့ၣ် မူခိၣ်ကလူးလၢ အပူထီၣ်တၢ်အိၣ်ဝဲတဂၤလီၤ. ဒီးလၢခံန့ၣ် ဘၣ်တၢ်သ့ၣ်ညါ ထီၣ်အမံၤလၢ စၤတၣ်မုၣ်ကီၤလံၢ်န့ၣ်လီၤ. အဝဲကွဲန့ၢ်လွဲန့ၢ်ဝဲနီၢ်အံၣ်အု ဒ်သိးကအီၣ်ဝဲ သ့ၣ်သၣ်လၢ ယွၤမၤလိာ်အီၤလၢ အီၣ်အီၤတဂ့ၤန့ၣ်လီၤ.

မုၣ်ကီၤလံၢ် ကတိၤလီၤသဒၢတၢ် ခီဖျိဂုၢ်တဘိ ဒီးအဲၣ်ဒိးစံးဝဲ တၢ်အဂ့ၤလၢ ကစၢ်ယွၤတအဲၣ်ဒိးဟ့ၣ်လီၤ နီၢ်အံၣ်အုဒီးအဝၤန့ၣ် အိၣ်ဝဲလီၤ. အဝဲစံးဘၣ်နီၢ်အံၣ်အုလၢ အဝဲသ့ၣ်မ့ၢ်အီၣ်တၤသၣ်လၢ ယွၤတဟ့ၣ်အခွဲးသနာ်က့ တသံဝဲဘၣ်. မၤဝဲဒ်န့ၣ်အဃိ ဖျါလၢမုၣ်ကီၤလံၢ် အဲၣ်ဒိးစံးဝဲလၢ ကစၢ်ယွၤန့ၣ် လီန့ၢ်ဝဲပှၤဟီၣ်ခိၣ်ဖိန့ၣ်လီၤ. တကးဘၣ် မုၣ်ကီၤလံၢ် ပာ်ဖျါထီၣ်ဝဲ တၢ်တဒိကနၣ်ကစၢ်ယွၤန့ၣ် မ့ၢ်ကျဲလၢ အလီၤဘၣ်သူၣ်ဘၣ်သးတခါလၢ ကဆှၢပှၤဟီၣ်ခိၣ်ဖိဆူတၢ်သဘျ့ဒီး တၢ်ကူၣ်သ့လီၤဆီန့ၣ်လီၤ. နီၢ်နီၢ်န့ၣ် တၢ်အံၤမ့ၢ် တၢ်ကတိၤ ကဘျံးကဘျၣ်ဖးဒိၣ်တခါ တကးဘၣ်, မ့ၢ်တၢ်ကတိၤကဘျံးကဘျၣ် အဆိကတၢၢ်လၢ ဟီၣ်ခိၣ်ချၢန့ၣ်လီၤ. တၢ်ကတိၤ ကဘျံးကဘျၣ်အံၤ အတၢ်ပညိၣ်နီၢ်နီၢ်မ့ၢ် ဒ်သိးကဒုးအိၣ်ထီၣ်ဝဲ တၢ်သံကွၢ်ဘၣ်ဃးဒီး ယွၤအတၢ်ခွဲးတၢ်ယာ်လၢကပၢတၢ်လီၤ. တၢ်သံကွၢ်အိၣ်ထီၣ်ဝဲလၢ မ့ၢ်ကစၢ်ယွၤ ပၢတၢ်ကြၢးဧါတကြၢးဧါ. ဒီးကစၢ်ယွၤန့ၣ်မ့ၢ်အသူ အတၢ်ခွဲးတၢ်ယာ်လၢကပၢတၢ် လၢတၢ်တီတၢ်လိၤဒီး ကျဲလၢအဂ့ၤကတၢၢ်လၢ ပှၤဒိးပၢအသးလၢအဖီလာ်တဖၣ်အဂီၢ်န့ၣ်ဧါ.

နီၢ်အံၣ်အုနာ်ဝဲ မုၣ်ကီၤလံၢ်အတၢ်ကတိၤ ကဘျံးကဘျၣ်လီၤ. အဝဲအဲၣ်ဒိးအီၣ်ဝဲ သ့ၣ်သၣ်အဝဲန့ၣ်ဒီး ဟံးန့ၢ်အီၣ်ဝဲလီၤ. ဒီးလၢခံန့ၣ် ဟ့ၣ်ဒုးအီၣ်ဝဲအဝၤ ဒီးအဝၤအီၣ်ဝဲစ့ၢ်ကီးလီၤ. လၢတၢ်န့ၣ်အဃိ အဝဲသ့ၣ်ကဲထီၣ် ပှၤတၢ်ဒဲးဘးဖိလီၤ. နီၢ်အံၣ်အုဒီးစီၤအၤဒၣ် အီၣ်သ့ၣ်သၣ်န့ၣ် ပှၤတနီၤကဆိကမိၣ်လၢ တမ့ၢ်တၢ်လၢအရ့ဒိၣ်ဘၣ်. ဘၣ်ဆၣ်သနာ်က့ တၢ်အံၤမ့ၢ်ဒၣ်တၢ်ပူထီၣ်နီၢ်နီၢ်လီၤ. ကစၢ်ယွၤ မ့ၢ်တၢ်ဘၣ်တ့ကစၢ်လၢ အဟ့ၣ်လီၤအဝဲသ့ၣ်တၢ်ခဲလၢာ် ဃုာ်ဒီးသးသမူအလၢအပှဲၤလီၤ. ဘၣ်ဆၣ် နီၢ်အံၣ်အုဒီး စီၤအၤဒၣ်ဃုထၢဝဲဖဲအသးလၢ တဒိကနၣ်ယွၤအတၢ်မၤလိာ်အဃိ အဝဲသ့ၣ်ဂ့ၢ်လိာ်ဝဲ ယွၤအတၢ်ပၢန့ၣ်လီၤ.

ကစၢ်ယွၤစံၣ်ညီၣ်ဝဲ ပှၤပူထီၣ်တၢ်တဖၣ်အံၤလီၤ. ဒီးအဝဲတဲဆိပာ်ဝဲဘၣ်ဃးဒီး တၢ်စံးပာ်အချံအသၣ် မ့တမ့ၢ် တၢ်အုၣ်က့ၤခီၣ်က့ၤကစၢ်လၢ ကမၤဟးဂီၤကွံာ် ဂုၢ်လၢအဲၣ်ဒိးစံးဝဲမုၣ်ကီၤလံၢ်န့ၣ်လီၤ. ကစၢ်ယွၤစံၣ်ညီၣ်ဝဲနီၢ်အံၣ်အုဒီး စီၤအၤဒၣ်လၢ တၢ်သံလီၤ. ဘၣ်ဆၣ် ကစၢ်ပာ်ဖျါထီၣ်ဝဲ တၢ်သးကညီၤလၢ အဝဲသ့ၣ်အဖိအလံၤလၢ အတဟဲအိၣ်ဖျဲၣ်ထီၣ်ဒံးဘၣ်အဖီခိၣ်အဃိ တမၤသံနီၢ်အံၣ်အုဒီး စီၤအၤဒၣ်တဘျီဃီဘၣ်. ပှၤလၢကစၢ်ယွၤ ကဆှၢလီၤတဂၤန့ၣ်ကမၤဟါမၢ်ကွံာ်ဝဲ တၢ်ပူထီၣ်လၢဧ့ၤဒ့ၣ်တၤသၣ်အလီၢ် အတၢ်ပိာ်ထွဲလၢအအၢတဖၣ်အဃိ တၢ်မုၢ်လၢ်အိၣ်ထီၣ်ဝဲလၢ အဝဲသ့ၣ်အဖိအလံၤသ့ၣ်တဖၣ်အံၤအဂီၢ်လီၤ. ကစၢ်ယွၤကဆှၢလီၤ မတၤတဂၤလဲၣ်အဂ့ၢ်ဒီး ယွၤအတၢ်တိာ်ပာ်ဘၣ်ဃးဒီး တၢ်အုၣ်က့ၤခီၣ်က့ၤကစၢ်အံၤ ကဟဲလၢပှဲၤထီၣ် ဒ်လဲၣ်အဂ့ၢ်န့ၣ် အိၣ်ဖျါထီၣ်ဝဲကယီကယီ ဖဲလံာ်စီဆှံ ဘၣ်တၢ်ကွဲးအီၤ တဆီဘၣ်တဆီအခါန့ၣ်လီၤ.

ကစၢ်ယွၤ ဟီထီၣ်ကွံာ် နီၢ်အံၣ်အုဒီးစီၤအၤဒၣ်ဆူ ပၤရဒံစူးအချၢန့ၣ်လီၤ. လၢဧ့ၤဒ့ၣ် တၤသၣ်လီၢ်အချၢန့ၣ် အဝဲသ့ၣ်ဘၣ်သူၣ်အီၣ်ဖျးအီၣ် နးနးကလဲာ်လၢကလုၢ်အီၣ် အသးသမူအဂီၢ်လီၤ. လၢခံန့ၣ် နီၢ်အံၣ်အုအဟုးအသးအိၣ်ထီၣ်ဒီး အိၣ်ဖျဲၣ်ထီၣ်ဝဲ စီၤကၤယံၣ်, လၢအမ့ၢ် နီၢ်အံၣ်အုဒီးစီၤအၤဒၣ် အဖိဝဲၢ်ကိန့ၣ်လီၤ. ပှၤနီၢ်ဒီမိဝၤခံဂၤအံၤ မၤန့ၢ်ကဒီး အဖိခွါဒီးဖိမုၣ်အဂၤတဖၣ်လီၤ. လၢအဖိသ့ၣ်တဖၣ်အံၤအကျါန့ၣ် ပၣ်ဃုာ်ဒီးစီၤဟ့းဘ့းလး ဒီးစီၤၡ့သး လၢအမ့ၢ်စီၤနိအၤ အဖုဖးဒိၣ်န့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ ၁ မိၤၡ့ အဆၢဒိၣ် ၃ တုၤလၢ ၅; လီၣ်ဖျါ ၁၂:၉ န့ၣ်လီၤ.