ပှၤလၢအပူၤဖျဲးကွံာ်လၢ ထံလုၢ်ဘၢတၢ်

ဒ်ပှၤဟီၣ်ခိၣ်ဖိ အါထီၣ်ဂီၢ်ထီၣ်အသိး တၢ်ဒဲးဘးဒီး တၢ်အၢတၢ်သီတဖၣ် ရၤလီၤအသးချ့သဒံးလီၤ. ယွၤအဝံတဂၤ လၢအမံၤမ့ၢ်စီၤဃနိာ် ဟ့ၣ်ပလီၢ်တ့ၢ်ဝဲလၢ မုၢ်ကအိၣ်ဝဲတနံၤလၢ ယွၤကမၤ ဟးဂီၤကွံာ် ပှၤအၢပှၤသီတဖၣ်န့ၣ်လီၤ. ဘၣ်ဆၣ် တၢ်အၢတၢ်သီ အါထီၣ်တနံၤဘၣ်တနံၤ ဒီးတၢ်မၤအသး နးန့ၢ်အလီၢ်တက့ၢ်လီၤ. မူခိၣ်ကလူး တနီၤန့ၣ် ပူထီၣ်ယဟိဝၤယွၤ ခီဖျိလၢ အဝဲသ့ၣ်ပာ်တ့ၢ်ကွံာ် အတၢ်အိၣ်တၢ်ဆိးအလီၢ် လၢမူခိၣ်လီၤ. အဝဲသ့ၣ် ဟဲလီၤဆူဟီၣ်ခိၣ်ချၢ ဒီးဟံးန့ၢ် ပှၤဟီၣ်ခိၣ်ဖိအက့ၢ်အဂီၤဝံၤ, ဟံးန့ၢ်အမါလၢပှၤပိာ်မုၣ်တဖၣ် လၢအသးကွံဝဲန့ၣ်လီၤ. အဝဲသ့ၣ်အိၣ်ဃုာ်ဒီး ပိာ်မုၣ်တဖၣ်လၢ ဟီၣ်ခိၣ်ချၢအဃိ အဖိတဖၣ်န့ၣ် ကဲထီၣ်ပှၤလၢ အဂံၢ်ဆူၣ်ဘါဆူၣ်လီၤဆီ, ဒိးတကါဖးဒိၣ်တဖၣ်လၢအဟးမၤနၢၤပှၤဂၤဒီး ဘၣ်တၢ်ကိးအီၤလၢ ပှၤနီၢ်ဒိၣ်ဖိတဖၣ်န့ၣ်လီၤ. အဝဲသ့ၣ် မၤအါထီၣ်ဝဲ တၢ်မၤဆူၣ်မၤစိးဒီး တၢ်ဂၢ်သွံၣ်ဂၢ်စီၤလၢ ဟီၣ်ခိၣ်ချၢန့ၣ်လီၤ. ကစၢ်ယွၤထံၣ်ဘၣ်ဝဲ ပှၤဟီၣ်ခိၣ်ဖိတဖၣ် အၢသီနးနးကလဲာ်အဃိ အသးဘၣ်ဒိဒိၣ်မးလီၤ.

ဖဲစီၤဃနိာ်သံဝံၤအလီၢ်ခံ ပှၤအၢပှၤသီအိၣ်ဝဲအါဂၤသနာ်က့ ပှၤလီၤဆီ ဟဲပၢၢ်ထီၣ်ဝဲတဂၤလီၤ. အဝဲအမံၤမ့ၢ် စီၤနိအၤလီၤ. အဝဲဒီးအဟံၣ်ဖိဃီဖိန့ၣ် ဂုာ်ကျဲးစၢး မၤတၢ်ဂ့ၤလၢယွၤအမဲာ်ညါလီၤ. လၢတၢ်န့ၣ်အဃိ, ဖဲယွၤပာ်လီၤအသးလၢ ကမၤဟးဂီၤကွံာ် ပှၤအၢပှၤသီတဖၣ်အခါ အဲၣ်ဒိးမၤပူၤဖျဲးဝဲစီၤနိအၤဒီး ဆၣ်ဖိကီၢ်ဖိတဖၣ်လၢ ဟီၣ်ခိၣ်ချၢန့ၣ်လီၤ. ကစၢ်ယွၤစံးဘၣ်အီၤလၢ ကသူၣ်ထီၣ်ကဘီဖးဒိၣ်တဘ့ၣ် ဒ်သိးစီၤနိအၤ, အဟံၣ်ဖိဃီဖိ ဒီးဆၣ်ဖိကီၢ်ဖိအကလုာ်ကလုာ် အသးသမူကပူၤဖျဲးအဂီၢ်န့ၣ်လီၤ. စီၤနိအၤဒိကနၣ် ကစၢ်ယွၤအကလုၢ်လီၤ. အဝဲသူၣ်ထီၣ်ကဘီန့ၣ် ဘၣ်သ့ၣ်သ့ၣ်ကယံာ်ဝဲအနံၣ်ယဲၢ်ဆံဘျဲၣ် ဒီးတကတီၢ်ဃီန့ၣ် အဝဲမ့ၢ်ပှၤလၢ “အစံၣ်တဲၤတဲလီၤ တၢ်တီတၢ်လိၤအကလုၢ်” တဂၤလီၤ. (၂ ပ့းတရူး ၂:၅) အဝဲဟ့ၣ်ပလီၢ်ဝဲပှၤဟီၣ်ခိၣ်ဖိတဖၣ်လၢ တယံာ်လၢၤဘၣ်ထံကလုၢ်ဘၢဟီၣ်ခိၣ်သနာ်က့ ပှၤတဒိကနၣ်ဝဲဘၣ်. လၢခံန့ၣ် တၢ်ဆၢကတီၢ်တုၤဃီၤလၢ စီၤနိအၤ, အဟံၣ်ဖိဃီဖိ ဒီးဆၣ်ဖိကီၢ်ဖိတဖၣ် ကဘၣ်နုာ်လီၤဝဲဆူ ကဘီပူၤန့ၣ်လီၤ. အဝဲသ့ၣ် နုာ်လီၤဆူကဘီပူၤ ဝံၤအလီၢ်ခံ ကစၢ်ယွၤကးတံာ်ဃာ်ဝဲ ပဲတြီလီၤ. ဒီးဖဲန့ၣ်အခါ မူခိၣ်စူၤလီၤဝဲလီၤ.

မူခိၣ်စူၤဆူၣ်ဆူၣ် အနံၤ ၄၀ အနၤ ၄၀ တုၤဒၣ်လဲာ် ထံလုၢ်ဘၢကွံာ် ဟီၣ်ခိၣ်ဒီဘ့ၣ်န့ၣ်လီၤ. ပှၤအၢပှၤသီတဖၣ် သံကွံာ်ဝဲလီၤ. ယံာ်တဘျုးလါဝံၤအလီၢ်ခံ ထံလီၤသံးဝဲ ကယီကယီဒီး ကဘီအိၣ်ကတီၢ်ဝဲ လၢကစၢၢ်အလိၤန့ၣ်လီၤ. စီၤနိအၤ, အဟံၣ်ဖိဃီဖိဒီး ဆၣ်ဖိကီၢ်ဖိတဖၣ်န့ၣ် အိၣ်လၢကဘီပူၤ ယံာ်တ့ၢ်ဝဲတနံၣ် ဒီးဟးထီၣ်ကွံာ်လၢကဘီပူၤ ပူၤပူၤဖျဲးဖျဲးန့ၣ်လီၤ. လၢတၢ်စံးဘျုးစံးဖှိၣ်အဂီၢ် စီၤနိအၤလုၢ်ထီၣ်တၢ်လၢ ယဟိဝၤယွၤအအိၣ်န့ၣ်လီၤ. ကစၢ်ယွၤအၢၣ်လီၤဝဲ စီၤနိအၤဒီး အဟံၣ်ဖိဃီဖိလၢ အဝဲတမၤဟးဂီၤကွံာ် ကယဲၢ်သးသမူလၢဟီၣ်ခိၣ်ချၢ လၢထံလုၢ်ဘၢတၢ် နီတဘျီလၢၤဘၣ်. ဒ်သိးပှၤကသ့ၣ်နီၣ်ထီၣ် တၢ်အၢၣ်လီၤအီလီၤလၢ အမၤမုာ်ပှၤသးအံၤအဂီၢ် ယဟိဝၤယွၤပာ်ဖျါထီၣ်ဝဲတၢၢ်ကွဲၤ ဒ်အမ့ၢ်တၢ်အုၣ်အသး လၢပှၤထံၣ်အီၤသ့န့ၣ်လီၤ.

ထံလုၢ်ဘၢတၢ်ဝံၤအလီၢ်ခံ ကစၢ်ယွၤဟ့ၣ် ပှၤဟီၣ်ခိၣ်ဖိတဖၣ်လၢ တၢ်မၤလိာ်အသီတနီၤန့ၣ်လီၤ. ယွၤဟ့ၣ်အခွဲးလၢ အဝဲသ့ၣ်ကအီၣ် တၢ်ဖံးတၢ်ညၣ်လီၤ. ဘၣ်ဆၣ်သနာ်က့, ယွၤတြီအီၤလၢအသုတအီၣ် တၢ်သွံၣ်တဂ့ၤလီၤ. ဒီးမၤလိာ် စီၤနိအၤ အစၢၤအသွဲၣ်တဖၣ်လၢ ကဘၣ်အိၣ်ရၤလီၤအသး လၢဟီၣ်ခိၣ်ချၢဘၣ်ဆၣ်, ပှၤတနီၤနီၤန့ၣ် တဒိကနၣ်ဝဲဘၣ်. လၢစီၤနံးမရိး အတၢ်ကဲခိၣ်ကဲနၢ်အဖီလာ် ပှၤဟီၣ်ခိၣ်ဖိတဖၣ်န့ၣ် ပာ်ဖှိၣ်ထီၣ်အသးဒီး စးထီၣ်သူၣ်ထီၣ်ဝဲ တၢးထီဖးဒိၣ်တဖျၢၣ်လၢ ဝ့ၢ်ဘၤဘ့းလးအပူၤလီၤ. လၢခံန့ၣ် ဝ့ၢ်အံၤဘၣ်တၢ်ကိးအီၤလၢ ဘၤဘူၤလိၣ်န့ၣ်လီၤ. အဝဲသ့ၣ်အတၢ်ပညိၣ်မ့ၢ်ဝဲဒၣ်လၢ ကထီဒါယွၤအတၢ်မၤလိာ်လၢ ပှၤဟီၣ်ခိၣ်ဖိကဘၣ်အိၣ် ရၤလီၤအသး လၢဟီၣ်ခိၣ်ချၢန့ၣ်လီၤ. ဘၣ်ဆၣ်ယွၤတြီဝဲ ပှၤထီဒါတၢ်ဖိတဖၣ်အံၤခီဖျိလၢ ကစၢ်မၤသဘံၣ်ဘုၣ် အဝဲသ့ၣ်အကျိာ်ဒီး ဒုးအိၣ်ထီၣ်ဝဲ ကျိာ်အကလုာ်ကလုာ်န့ၣ်လီၤ. မ့ၢ်လၢအဝဲသ့ၣ်တဂၤဒီးတဂၤ တနၢ်ပၢၢ်လိာ်အကျိာ်အဃိ, အဝဲသ့ၣ်ပာ်တ့ၢ်ကွံာ် အတၢ်ကူၣ်ထီၣ်ဖးလီၤလၢကသူၣ်ထီၣ်တၢးထီဖးဒိၣ်ဒီး လီၤပြံလီၤပြါလၢ ဟီၣ်ခိၣ်ချၢန့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ ၁ မိၤၡ့ အဆၢဒိၣ် ၆ တုၤလၢ ၁၁; ယူဒၤ ၁၄, ၁၅ န့ၣ်လီၤ.