အဆၢဒိၣ် ၁၃
စီၤပၤအဂ့ၤတဖၣ်ဒီး စီၤပၤအအၢတဖၣ်
ကီၢ်အံၣ်စရ့လးလီၤဖးလံ. ဒ်တၢ်ဆၢကတီၢ်လဲၤပူၤကွံာ်ဝဲအသိး စီၤပၤတဖၣ်ပၢတၢ်လၢ ကီၢ်အံၣ်စရ့လးအပူၤ တဂၤဝံၤတဂၤလီၤ. ဘၣ်ဆၣ် အဝဲသ့ၣ်အါတက့ၢ်န့ၣ် တတီလၢကစၢ်ယွၤအဖီခိၣ်ဘၣ်. ဝ့ၢ်ယရူၤၡလ့ၣ်န့ၣ် ဘၣ်တၢ်မၤဟးဂီၤကွံာ်အီၤလၢ ပှၤဘၤဘူၤလိၣ်ဖိတဖၣ်လီၤ
ဒ်ယဟိဝၤယွၤ စံးပာ်ဝဲအသိး စီၤၡလိၤမိၤပာ်တ့ၢ်ကွံာ် တၢ်ဘူၣ်တၢ်ဘါအမ့ၢ်အတီဝံၤအလီၢ်ခံ ကီၢ်အံၣ်စရ့လးလီၤဖးဝဲန့ၣ်လီၤ. အဖိခွါစီၤရဃၤဘၣ်လၢ အထီၣ်အလီၢ်န့ၣ်မ့ၢ် ပှၤတဂၤလၢအပၢတၢ်ဆူၣ်ဆူၣ်ကိၤကိၤလီၤ. လၢတၢ်န့ၣ်အဃိ အံၣ်စရ့လးအဒူၣ်တဆံပူထီၣ်တၢ်ဒီး သူၣ်ထီၣ်ဝဲ ကလံၤစိးအံၣ်စရ့လးဘီမုၢ်န့ၣ်လီၤ. ထဲဒၣ်ပှၤအံၣ်စရ့လးဖိ ခံဒူၣ်န့ၣ် တီဒီး စီၤပၤတဂၤလၢအအိၣ်လၢယရူၤၡလ့ၣ်အပူၤလၢအဟဲလီၤစၢၤလၢစီၤဒၤဝံးအစၢၤအသွဲၣ်အကျါန့ၣ်လီၤ. ပှၤအံၣ်စရ့လးဖိခံဒူၣ်အံၤ ကဲထီၣ်ဝဲကလံၤထံးယူဒၤဘီမုၢ်န့ၣ်လီၤ.
ဘီမုၢ်ခံဘ့ၣ်အံၤ အစီၤပၤတဖၣ်န့ၣ်တအိၣ်ဒီး တၢ်စူၢ်တၢ်နာ်ဒီးတၢ်ဒိကနၣ်အဃိ ကွၢ်ဆၢၣ်မဲာ်ဘၣ်ဝဲ တၢ်သဘံၣ်သဘုၣ်အါမးန့ၣ်လီၤ. အံၣ်စရ့လးအဘီမုၢ်န့ၣ် အတၢ်အိၣ်အသးတဖၣ်နးန့ၢ်ဒံးယူဒၤအဘီမုၢ်လီၤ. မ့ၢ်လၢ အဝဲသ့ၣ်အစီၤပၤတဖၣ်န့ၣ် ဆီၣ်ထွဲဝဲ တၢ်ဘူၣ်တၢ်ဘါအကမၣ်အဃိန့ၣ်လီၤ. ဝံအ့ၤလံယၤဒီး ဝံအလံၤၡါခံဂၤလၢာ်န့ၣ် မၤမူထီၣ်က့ၤပှၤသံ ဒီးမၤတၢ်လီၤလးအါမံၤသနာ်က့ ပှၤအံၣ်စရ့လးဖိတဖၣ် မၤက့ၤဝဲတၢ်အၢတၢ်သီဒ်အလီၢ်လီၢ်န့ၣ်လီၤ. လၢခံန့ၣ်ကစၢ်ယွၤဟ့ၣ်ဝဲအခွဲးလၢ ပှၤအၤၡူၢ်ဖိတဖၣ် ကမၤဟးဂီၤကွံာ်ဝဲ ကလံၤစိးအဘီမုၢ်န့ၣ်လီၤ.
ယူဒၤအဘီမုၢ်န့ၣ် အိၣ်လီၤတဲာ်ဝဲတုၤလၢ အံၣ်စရ့လးအဘီမုၢ် ဟးဂီၤကွံာ်အနံၣ်တကယၤဘျဲၣ် ဝံၤအလီၢ်ခံ ကစၢ်ယွၤစံၣ်ညီၣ်အီၤစ့ၢ်ကီးန့ၣ်လီၤ. ယူဒၤအစီၤပၤလၢ အဒိကနၣ်ကစၢ်ယွၤအဝံ အတၢ်ဟ့ၣ်ပလီၢ်တဖၣ်န့ၣ် အိၣ်ဒၣ်ထဲစှၤဂၤလီၤ. ဒီးအဝဲသ့ၣ်မၤစၢၤဝဲထံဖိကီၢ်ဖိတဖၣ် လၢကဃၣ်လိၤက့ၤအသးဆူ ယဟိဝၤယွၤအအိၣ်န့ၣ်လီၤ. အဒိ, စီၤပၤယိၤၡံယၤန့ၣ် စးထီၣ်မၤဟးဂီၤကွံာ်ဝဲ တၢ်ဘူၣ်တၢ်ဘါအကမၣ် လၢကီၢ်ယူဒၤအပူၤ ဒီးဘှီဂ့ၤထီၣ်က့ၤ ယဟိဝၤယွၤအတၢ်လုၢ်ဟံၣ်လီၤ. ဘၣ်ဆၣ်ဒီး ဖဲစီၤယိၤၡံယၤထံၣ်န့ၢ်က့ၤ တၢ်ကွဲးအသးအခီၣ်ထံး, ယွၤအတၢ်သိၣ်တၢ်သီ လၢစီၤမိၤၡ့ကွဲးဝဲန့ၣ် အဝဲဘၣ်သူၣ်ဘၣ်သးဝဲဒိၣ်မးအဃိ ဂုာ်ကျဲးစၢးဝဲ အါန့ၢ်အလီၢ်န့ၣ်လီၤ.
ဘၣ်ဆၣ် ပှၤလၢအထီၣ်စီၤယိၤၡံယၤအလီၢ်န့ၣ် တလူၤပိာ်ထွဲဝဲစီၤယိၤၡံယၤ အဒိအတဲာ်လၢအဂ့ၤအဃိမ့ၢ်တၢ်လၢအလီၤသးအုးဒိၣ်မးလီၤ. လၢတၢ်န့ၣ်အဃိယဟိဝၤယွၤဟ့ၣ်အခွဲးလၢ ပှၤဘၤဘူၤလိၣ်ဖိတဖၣ် ကမၤနၢၤကီၢ်ယူဒၤဒီး ကမၤဟးဂီၤကွံာ်ဝဲ ဝ့ၢ်ယရူၤၡလ့ၣ် ဒီးအတၢ်လုၢ်ဟံၣ်န့ၣ်လီၤ. ပှၤလၢအအိၣ်လီၤတဲာ်တဖၣ်န့ၣ် ဘၣ်တၢ်က့ၤဖီၣ်အီၤဆူ ကီၢ်ဘၤဘူၤလိၣ်န့ၣ်လီၤ. ကစၢ်ယွၤစံးပာ်ဝဲလၢ အဝဲသ့ၣ်ကဘၣ်အိၣ်ဝဲဖဲန့ၣ် ယံာ်အနံၣ် ၇၀ ဒီးဖဲန့ၣ်အတီၢ်ပူၤကီၢ်ယူဒၤ ကဘၣ်အိၣ်သယုၢ်ဝဲလီၤ. လၢခံန့ၣ် ဒ်ကစၢ်ယွၤအၢၣ်လီၤတ့ၢ်ဝဲအသိး ပှၤအံၣ်စရ့လးဖိတဖၣ် ကဘၣ်တၢ်ပျဲက့ၤအဝဲသ့ၣ်ဆူအထံအကီၢ်လီၤ.
ဘၣ်ဆၣ်, တၢ်အုၣ်က့ၤခီၣ်က့ၤကစၢ် မ့းၡံအၤအတၢ်ပၢတချုးတုၤဒံးဘၣ်န့ၣ် စီၤဒၤဝံးအစၢၤအသွဲၣ် တပၢတၢ်ဒ်စီၤပၤနီတဂၤလၢၤဘၣ်. စီၤပၤတဖၣ်လၢအဆ့ၣ်နီၤဝဲလၢ စီၤဒၤဝံးအလီၢ်ပစိာ်လၢဝ့ၢ်ယရူၤၡလ့ၣ်အပူၤ အါတက့ၢ်န့ၣ် ပာ်ဖျါထီၣ်ဝဲလၢပှၤဟီၣ်ခိၣ်ဖိလၢအတလၢတပှဲၤဘၣ်တဖၣ် တတုၤထီၣ်ထီၣ်ဘးလၢကပၢတၢ်ဘၣ်. ထဲဒၣ် မ့းၡံအၤတဂၤဧိၤန့ၣ် ကတုၤထီၣ်ထီၣ်ဘးလၢကပၢတၢ်န့ၣ်လီၤ. လၢတၢ်န့ၣ်အဃိ, ယဟိဝၤယွၤစံးဘၣ်စီၤပၤလၢစီၤဒၤဝံးအစၢၤအသွဲၣ်အကျါ အလီၢ်ခံကတၢၢ်တဂၤလၢ, “ထုးထီၣ်ကွံာ် ခိၣ်သလုးတက့ၢ်. . . ဒီးတအိၣ်လၢၤဘၣ်တုၤ ပှၤတဂၤဟဲလၢအမ့ၢ်အတၢ်နီၢ်နီၢ်, ဒီးယကဟ့ၣ်အီၤလီၤ.”—ယဃ့းစက့လး ၂၁:၂၆, ၂၇.
—ဘၣ်တၢ်ဒိးသန့ၤထီၣ်အီၤလၢ ၁ စီၤပၤ; ၂ စီၤပၤ; ၂ ကွဲးနီၣ်တၢ် အဆၢဒိၣ် ၁၀ တုၤလၢ ၃၆; ဝံယံးရမံယၤ ၂၅:၈-၁၁ န့ၣ်လီၤ.