တၢ်ဟ့ၣ်ကူၣ်ဟ့ၣ်ဖးဘၣ်ဃးဒီး တၢ်စူၢ်တၢ်နာ်, သကဲာ်ပဝး, ဒီးတၢ်အဲၣ်တၢ်ကွံ

စီၤယၤကိာ် ဒီးစီၤယူဒၤန့ၣ်မ့ၢ် ယ့ၣ်ၡူးအဒီပုၢ်ဝဲၢ်ခွါတဖၣ်လီၤ. စီၤပ့းတရူးဒီးစီၤယိၤဟၣ်န့ၣ် ပၣ်ဃုာ်လၢ ယ့ၣ်ၡူးအတၢ်မၢဖိ ၁၂ ဂၤအကျါလီၤ. ပှၤလွံၢ်ဂၤအံၤကွဲးဝဲ လံာ်ပရၢနွံဘ့ၣ်လၢ ဘၣ်တၢ်ထံၣ်န့ၢ်အီၤလၢ လံာ်စီဆှံလၢ ကြံးကျိာ်တကတြူၢ်အပူၤလီၤ. လံာ်ပရၢတဖၣ်အံၤ တၢ်ယုၢ်ဝဲအမံၤလၢ ပှၤကွဲးလံာ်ဖိတဂၤစုာ်စုာ်အမံၤလီၤ. ဒီးဘၣ်တၢ်ကွဲးအီၤဒ်သိး ကမၤစၢၤဝဲပှၤခရံာ်ဖိတဖၣ်လၢ ကတီဒီးယဟိဝၤယွၤ ဒီးကစၢ်အဘီအမုၢ်အဂီၢ်န့ၣ်လီၤ.

ပာ်ဖျါထီၣ် တၢ်စူၢ်တၢ်နာ်တက့ၢ်. ပတဲလၢ ပတၢ်နာ်အိၣ်န့ၣ်တလၢပှဲၤဒံးဘၣ်. တၢ်နာ်နီၢ်နီၢ်န့ၣ် ဆီၣ်ထွဲပှၤဒ်သိးပကအိၣ်ဒီးတၢ်မၤလီၤ. စီၤယၤကိာ်ကွဲးဝဲလၢ “တၢ်နာ်တအိၣ်ဘၣ်ဒီးတၢ်မၤတဖၣ် မ့ၢ်တၢ်သံ” လီၤ. (ယၤကိာ် ၂:၂၆) ဖဲပကွၢ်ဆၢၣ်မဲာ်ဘၣ် တၢ်လ့ပစီအခါ တၢ်နာ်လၢအအိၣ်ဒီးတၢ်မၤန့ၣ် မၤစၢၤပှၤဒ်သိးပတူၢ်တၢ်ကကဲအါန့ၢ်အလီၢ်လီၤ. ခရံာ်ဖိတဂၤန့ၣ် ဒ်သိးလဲၤခီဖျိဝဲတၢ်လ့ပစီကကဲအဂီၢ် အဝဲကဘၣ်ဃ့တၢ်ဟ့ၣ်ကူၣ်ဟ့ၣ်ဖးလၢ ယွၤအအိၣ် ဒီးနာ်ဝဲသပှၢ်တၢၢ်လၢ ကစၢ်ကဟ့ၣ်အီၤန့ၣ်လီၤ. ပမ့ၢ်အိၣ်ဒီးတၢ်တူၢ်န့ၢ်ခီၣ်ကဲန့ၣ် ပကဒိးန့ၢ်ဘၣ် ယွၤအတၢ်ဘၣ်သးလီၤ. (ယၤကိာ် ၁:၂-၆, ၁၂) ပှၤလၢအဘူၣ်ထီၣ်ဘါထီၣ်ယဟိဝၤယွၤန့ၣ် မ့ၢ်ပၢၤဃာ်အတၢ်သးတီဒီးယွၤ ဖဲအဝဲသ့ၣ်ထံၣ်ဘၣ်တၢ်လ့ပစီအခါ ကစၢ်ကမၤစၢၤအဝဲသ့ၣ်လီၤ. စီၤယၤကိာ်စံးဝဲလၢ “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.”—ယၤကိာ် ၄:၈.

ခရံာ်ဖိတဂၤအတၢ်စူၢ်တၢ်နာ် ကဘၣ်ဂၢၢ်ကျၢၤဝဲတုၤလၢ တြီဆၢက့ၤဝဲတၢ်လ့ပစီ ဒီးတၢ်လၢအကမၤဟးဂီၤ အသကဲာ်ပဝးတဖၣ် ကန့ၢ်အဂီၢ်လီၤ. တၢ်သကဲာ်ပဝးလၢအတဂ့ၤတဖၣ် အိၣ်သကုၤဆးဒးအဃိ စီၤယူဒၤဆီၣ်ထွဲဝဲ ပှၤစူၢ်တၢ်နာ်တၢ်တဖၣ်လၢ “ကဂုာ်ကျဲးစၢးဒုးတၢ်လၢ တၢ်နာ်” အဂီၢ်န့ၣ်လီၤ.—ယူဒၤ ၃.

အိၣ်ဒီး တၢ်သကဲာ်ပဝးလၢ အကဆှီထီဘိတက့ၢ်. ယဟိဝၤယွၤမုၢ်လၢ်ဝဲလၢ ပှၤလၢအဘူၣ်ထီၣ်ဘါထီၣ်အီၤတဖၣ်န့ၣ် ကစီဆှံဝဲလၢ အတၢ်အိၣ်မူကိးသနၢၣ်ဒဲးအပူၤန့ၣ်လီၤ. စီၤပ့းတရူး ကွဲးဝဲလၢ– “ကဲထီၣ်သုဝဲစ့ၢ်ကီးလၢ အစီအဆှံလၢ သုမၤတၢ်ဖံးတၢ်ကိးအမံၤဒဲးအပူၤတက့ၢ်. အဂ့ၢ်ဒ်အံၤ, တၢ်ကွဲးအသး, ကဲထီၣ်ပှၤစီဆှံတက့ၢ်. အဂ့ၢ်ဒ်အံၤ, ယ [ယဟိဝၤယွၤ] မ့ၢ်ပှၤစီဆှံလီၤ.” (၁ ပ့းတရူး ၁:၁၅, ၁၆) ပှၤအိၣ်ဝဲတဂၤလၢ အအိၣ်ဒီးတၢ်ဒိဂ့ၤတဲာ်ဘၣ်လၢအဂ့ၤလၢ ပှၤခရံာ်ဖိတဖၣ်ကကွၢ်လိမၤဒိးအီၤအဂီၢ်လီၤ. စီၤပ့းတရူးစံးဝဲ “ခရံာ်ဒိးတၢ်လၢပဃိ, ဒီးပာ်လီၤတဲာ်အဒိအတဲာ်, ဒ်သိးပကယီၢ်အခီၣ်လီၢ်န့ၣ်လီၤ.” (၁ ပ့းတရူး ၂:၂၁) ပှၤခရံာ်ဖိတဖၣ်အိၣ်မူဝဲဒ် ယွၤအတၢ်သိၣ်တၢ်သီအဃိ တူၢ်ဘၣ်ဝဲ တၢ်နးတၢ်ဖှီၣ်သနာ်က့ ပၢၤဃာ်ဝဲအ “သးလၢအသ့ၣ်ညါဒၣ်တၢ်အဂ့ၤ” န့ၣ်လီၤ. (၁ ပ့းတရူး ၃:၁၆, ၁၇) စီၤပ့းတရူး ဟ့ၣ်သဆၣ်ထီၣ်ဝဲခရံာ်ဖိတဖၣ် ဖဲအဝဲသ့ၣ်အိၣ်ခိးဝဲ မုၢ်စံၣ်ညီၣ်အနံၤ ဒီးဟီၣ်ခိၣ်သီလၢ “တၢ်တီတၢ်လိၤ အိၣ်ဝဲဆိးဝဲလၢအပူၤ” အဆၢကတီၢ်န့ၣ် အဝဲသ့ၣ်ကဘၣ်အိၣ်ဒီးသကဲာ်ပဝးလၢအကဆှီ ဒီးတၢ်ယူးယီၣ်ယွၤန့ၣ်လီၤ.—၂ ပ့းတရူး ၃:၁၁-၁၃.

ပာ်ဖျါထီၣ် တၢ်အဲၣ်တၢ်ကွံတက့ၢ်. စီၤယိၤဟၣ်ကွဲးဝဲလၢ “ယွၤမ့ၢ်တၢ်အဲၣ်တၢ်ကွံလီၤ.” တၢ်မၢဖိအံၤစံးစ့ၢ်ကီး ဝဲလၢ ယွၤပာ်ဖျါထီၣ်တၢ်အဲၣ်အဒိၣ်အမုၢ် ခီဖျိမၢလီၤအဖိခွါယ့ၣ်ၡူးဒ်သိး က “မၤပူၤမၤဖျဲးပတၢ်ဒဲးဘးလီၤ.” ခရံာ်ဖိတဖၣ် ကြၢးမၤဆၢက့ၤဝဲဒ်လဲၣ်. စီၤယိၤဟၣ်တဲဖျါထီၣ်ဝဲလၢ “ပှၤလၢတၢ်အဲၣ်အီၤသ့ၣ်ဧၢ, ယွၤမ့ၢ်အဲၣ်ပှၤထဲထဲန့ၣ်ဒီး, ဂ့ၤလၢပအဲၣ်လိာ်ကွံလိာ်ပသး သကိးသကိးစ့ၢ်ကီးလီၤ.” (၁ ယိၤဟၣ် ၄:၈-၁၁) ပမ့ၢ်တူၢ်လိာ်မုာ် ပှၤစူၢ်က့ၤနာ်က့ၤတၢ်တဖၣ်လၢပဟံၣ်ပူၤန့ၣ် မ့ၢ်ကျဲတဘိလၢ ပပာ်ဖျါထီၣ်တၢ်အဲၣ်အံၤန့ၣ်လီၤ.—၃ ယိၤဟၣ် ၅-၈.

မ့မ့ၢ်ဒ်န့ၣ်ဒီး ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ပာ်ဖျါထီၣ်ဝဲ တၢ်အဲၣ်ကစၢ်ယွၤကသ့ဒ်လဲၣ်. စီၤယိၤဟၣ်စံးဆၢဝဲလၢ “တၢ်အဲၣ်ယွၤမ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ် တကီတခဲဘၣ်လီၤ.” (၁ ယိၤဟၣ် ၅:၃; ၂ ယိၤဟၣ် ၆) လၢတၢ်န့ၣ်အဃိ ပှၤလၢအဒိကနၣ်ယွၤအကလုၢ်န့ၣ် နာ်ဝဲလၢ အဝဲသ့ၣ်ကဆဲးဒိးန့ၢ်ဘၣ် ယွၤအတၢ်အဲၣ် တကးဒံးဘၣ် အဝဲသ့ၣ်အိၣ်ဒီးတၢ်မုၢ်လၢ်လၢကဒိးန့ၢ်ဘၣ်ဝဲ “တၢ်မူအထူအယိာ်” န့ၣ်လီၤ.—ယူဒၤ ၂၁.

​—ဘၣ်တၢ်ဒိးသန့ၤထီၣ်အီၤလၢ ယၤကိာ်; ၁ ပ့းတရူး; ၂ ပ့းတရူး; ၁ ယိၤဟၣ်; ၂ ယိၤဟၣ်; ၃ ယိၤဟၣ်; ယူဒၤ န့ၣ်လီၤ.