တၢ်မၤလိ ၁၃

ပာ်ဖျါထီၣ်တၢ်ဂ့ၢ်တၢ်ကျိၤၡဲၡဲဒ်သိး ပှၤကသ့ၣ်ညါတၢ်လၢကဘၣ်မၤထွဲဝဲန့ၣ်တက့ၢ်

ယၡါယၤ ၄၈:၁၇

ဘၣ်မၤဒ်လဲၣ်– မၤစၢၤနပှၤဒိကနၣ်တၢ်ဖိတဖၣ် ဒ်သိးအဝဲသ့ၣ် ကနၢ်ပၢၢ်ထီၣ်ဝဲလၢ တၢ်လၢ နသိၣ်လိအီၤတဖၣ်ကကဲဘျုးလၢ အတၢ်အိၣ်မူအပူၤဒ်လဲၣ်န့ၣ်တက့ၢ်. တကးဒံးဘၣ် မၤစၢၤအီၤဒ်သိး ကသ့ၣ်ညါဝဲလၢ တၢ်လၢအမၤလိဘၣ်ဝဲတဖၣ်န့ၣ် ကဘၣ်မၤထွဲဝဲဒ်လဲၣ်န့ၣ်တက့ၢ်.

မၤဒ်အံၤတက့ၢ်–

ဆိကမိၣ်ထံ နပှၤဒိကနၣ်တၢ်ဖိ အတၢ်အိၣ်သးတက့ၢ်. ဆိကမိၣ်ထံဘၣ်ဃး ဘၣ်မနုၤအဃိ နပှၤဒိကနၣ်တၢ်ဖိတဖၣ် ကြၢးနၢ်ဟူဘၣ်ဝဲတၢ်ဂ့ၢ်အံၤလဲၣ်. ဒီးဆိကမိၣ်ထံစ့ၢ်ကီးလၢ တၢ်ဂ့ၢ်ဒ်လဲၣ်တဖၣ်န့ၣ် ကကဲဘျူးလၢ အဝဲသ့ၣ်အဂီၢ်လဲၣ်.
ဖဲနတၢ်စံၣ်တဲၤတဲလီၤတၢ်အခါ ပာ်ဖျါထီၣ်လၢ နပှၤဒိကနၣ်တၢ်ဖိတဖၣ် ကဘၣ်မၤဝဲဒ်လဲၣ်န့ၣ်တက့ၢ်. ဖဲနစးထီၣ်စံၣ်တဲၤတဲလီၤတၢ်အခါန့ၣ် နပှၤဒိကနၣ်တၢ်ဖိတဖၣ် ကြၢးသ့ၣ်ညါဝဲလၢ ‘တၢ်ဂ့ၢ်လၢ နတဲတဖၣ်န့ၣ် မ့ၢ်လၢအဝဲသ့ၣ်အဂီၢ်လီၤ.’ ဖဲနတဲနၢ်ပၢၢ်တၢ်ဂ့ၢ်မိၢ်ပှၢ်တခါစုာ်စုာ်န့ၣ် ပာ်ဖျါထီၣ်န့ၢ်အဝဲသ့ၣ်လၢ ကဘၣ်မၤထွဲဝဲဒ်လဲၣ်န့ၣ်တက့ၢ်. ၡဲပၠးအီၤလီၤတံၢ်လီၤဆဲးလၢ ကဘၣ်မၤဝဲဒ်လဲၣ်န့ၣ်တက့ၢ်.

ဒ်သိးအဝဲသ့ၣ်ကသ့ၣ်ညါဝဲလၢ ကဘၣ်မၤထွဲဝဲ လံာ်စီဆှံအတၢ်ဟံးစုနဲၣ်ကျဲဒ်လဲၣ်အဂီၢ်န့ၣ် တဲတၢ်ဒီးအဝဲသ့ၣ်လၢ တၢ်အဲၣ်တၢ်ကွံအပူၤ ဒီးပာ်ဖျါထီၣ်တၢ်ဒိသူၣ်ဒိသးတက့ၢ်. တဘၣ်မၤဒ်သိးအဝဲသ့ၣ် ကတူၢ်ဘၣ်ဝဲလၢ အအိၣ်ဒီးတၢ်ကမၣ်န့ၣ်တဂ့ၤ. မၤစၢၤအဝဲသ့ၣ်ဒ်သိး အတၢ်အဲၣ်, အတၢ်နာ် ကဒိၣ်ထီၣ်ဝဲတက့ၢ်. တကးဒံးဘၣ် နာ်လၢအဝဲသ့ၣ် ကအဲၣ်ဒိးမၤတၢ်လၢအဘၣ်တက့ၢ်.

လၢတၢ်စံၣ်တဲၤတဲလီၤတၢ်မၤအပူၤ

ဖဲနကတဲာ်ကတီၤတၢ်ဂ့ၢ်လၢ တၢ်စံၣ်တဲၤတဲလီၤတၢ်မၤအဂီၢ်အခါ ဆိကမိၣ်ထံဘၣ်ဃး တၢ်ကစီၣ်ဒီးတၢ်ဂ့ၢ်လၢ ပှၤလၢနလီၢ်ကဝီၤပူၤတဖၣ် သးအိၣ်ဝဲန့ၣ်တက့ၢ်. အိၣ်ကတဲာ်ကတီၤနသးဂ့ၤဂ့ၤလၢ နကစံးဆၢအဝဲသ့ၣ်န့ၣ်တက့ၢ်. လၢတၢ်ကူၣ်သ့အပူၤ သံကွၢ်တၢ်သံကွၢ်ဒ်သိး နကသ့ၣ်ညါထီၣ်တၢ်လၢ အဝဲသ့ၣ်အဲၣ်ဒိးသ့ၣ်ညါဝဲ ဒီးတၢ်လၢအမၤကိၢ်မၤဂီၤ အဝဲသ့ၣ်အသးတဖၣ်န့ၣ်တက့ၢ်. ဒိကနၣ်တၢ်လၢ အဝဲသ့ၣ်တဲဝဲတဖၣ် လီၤတံၢ်လီၤဆဲး ဒီးမ့ၢ်လိၣ်န့ၣ် ဆီတလဲတၢ်ဂ့ၢ်တၢ်ကျိၤလၢ နကတဲတဖၣ်ဒ်သိး တၢ်လၢနတဲတဖၣ် ကကဲထီၣ်တၢ်မၤစၢၤလၢအဂီၢ်တက့ၢ်.