တၢ်မၤလိ ၁

တၢ်ကတိၤအိးထီၣ်လၢ အထုးန့ၢ်ပှၤသး

မၤတၢ် ၁၇:၂၂

ဘၣ်မၤဒ်လဲၣ်– နတၢ်ကတိၤအိးထီၣ်န့ၣ် ကဘၣ်ထုးန့ၢ်ပှၤသး, ကဘၣ်ပာ်ဖျါထီၣ်တၢ်ဂ့ၢ်မိၢ်ပှၢ် ဒီးကဘၣ်ပာ်ဖျါထီၣ်လၢ ဘၣ်မနုၤအဃိ နပှၤဒိကနၣ်တၢ်ဖိတဖၣ် ကြၢးသးအိၣ်ဝဲတၢ်ဂ့ၢ်အံၤလဲၣ်.

မၤဒ်အံၤတက့ၢ်–

ပာ်ဖျါထီၣ်တၢ်ဂ့ၢ်လီၤတံၢ်လီၤဆဲး ဒ်သိးကထုးန့ၢ်ပှၤသး. ဃုထၢပာ်တၢ်သံကွၢ်တဖျၢၣ်, တၢ်ဂ့ၢ်တၢ်ကျိၤတမံၤမံၤ, ပှၤဂၤအတၢ်လဲၤခီဖျိတခါခါ မ့တမ့ၢ် တၢ်ကစီၣ်တခါခါ ဒ်သိးကထုးန့ၢ် နပှၤဒိကနၣ်တၢ်ဖိတဖၣ်အသးန့ၣ်တက့ၢ်.

ဒ်သိးနတၢ်ကတိၤအိးထီၣ် ကထုးန့ၢ် ပှၤဒိကနၣ်တၢ်ဖိတဖၣ်အသးအဂီၢ် ဆိကမိၣ်ဆိပာ်စၢၤအဝဲသ့ၣ်အတၢ်အိၣ်သး ဒီးတၢ်လၢအဝဲအဲၣ်ဒိးသ့ၣ်ညါဝဲတဖၣ်န့ၣ်တက့ၢ်.
ပာ်ဖျါထီၣ် နတၢ်ဂ့ၢ်ခိၣ်တီ. ဖဲနစးထီၣ်တၢ်ကတိၤအိးထီၣ်အခါ မၤစၢၤနပှၤဒိကနၣ်တၢ်ဖိတဖၣ် ဒ်သိးအဝဲသ့ၣ်ကသ့ၣ်ညါ တၢ်ဂ့ၢ်မိၢ်ပှၢ်လၢနတဲ ဒီးကနၢ်ပၢၢ်ဝဲလီၤတံၢ်လီၤဆဲးန့ၣ်တက့ၢ်.
ပာ်ဖျါထီၣ်လၢ ဘၣ်မနုၤအဃိ တၢ်ဂ့ၢ်မိၢ်ပှၢ်အံၤ အရ့ဒိၣ်လဲၣ်. တၢ်ဂ့ၢ်လၢနတဲတဖၣ်န့ၣ် ကဘၣ်မ့ၢ်တၢ်ဂ့ၢ်လၢ အကဲဘျုးလၢ နပှၤဒိကနၣ်တၢ်ဖိတဖၣ်အဂီၢ်လီၤ. အဝဲသ့ၣ်မ့ၢ်နၢ်ပၢၢ်ဝဲ တၢ်ဂ့ၢ်မိၢ်ပှၢ်လၢ နတဲတဖၣ်မး ကကဲဘျုးလၢအဝဲသ့ၣ်အဂီၢ်လီၤ.

ဖဲနကတဲာ်ကတီၤတၢ်ဂ့ၢ်လၢ နကဟ့ၣ်တၢ်စံၣ်တဲၤတဲလီၤတၢ်အဂီၢ်အခါ သံကွၢ်လီၤနသးလၢ ‘ယဒီပုၢ်ဝဲၢ်မုၣ်ခွါတဖၣ်လၢ တၢ်အိၣ်ဖှိၣ်ပူၤန့ၣ် ထံၣ်ဘၣ်တၢ်ကီတၢ်ခဲမနုၤလဲၣ်.’ ဝံၤဒီးစးထီၣ်တၢ်ကတိၤအိးထီၣ်လၢ အဘၣ်ထွဲလိာ်သးဒီး အဝဲသ့ၣ်အတၢ်လိၣ်ဘၣ်န့ၣ်တက့ၢ်.