တၢ်မၤလိ ၁၈

တဲတၢ်ဂ့ၢ်လၢအကဲဘျုးလၢ နပှၤဒိကနၣ်တၢ်ဖိအဂီၢ်တက့ၢ်

၁ ကရံၣ်သူး ၉:၁၉-၂၃

ဘၣ်မၤဒ်လဲၣ်– မၤစၢၤနပှၤဒိကနၣ်တၢ်ဖိဒ်သိး အဝဲသ့ၣ်ကဆိကမိၣ်ထံတၢ်တက့ၢ်. နမ့ၢ်မၤဒ်န့ၣ်န့ၣ် အဝဲသ့ၣ်ကတူၢ်ဘၣ်ဝဲလၢ အသ့ၣ်ညါထီၣ် တၢ်ဂ့ၢ်အသီတမံၤမံၤလၢ အကဲဘျုးလၢအဝဲသ့ၣ်အဂီၢ်န့ၣ်လီၤ.

မၤဒ်အံၤတက့ၢ်–

ဆိကမိၣ်ထံတၢ်ဂ့ၢ်လၢ နပှၤဒိကနၣ်တၢ်ဖိ သ့ၣ်ညါပာ်စၢၤဝဲတက့ၢ်. လၢနကက့ၤတဲက့ၤ တၢ်ဂ့ၢ်လၢအဝဲသ့ၣ် သ့ၣ်ညါပာ်စၢၤဝဲအလီၢ်န့ၣ် သူကျဲအဂၤတဘိဘိ ဒ်သိးအဝဲသ့ၣ် ကသ့ၣ်ညါအါထီၣ်တၢ်ဂ့ၢ်အံၤတက့ၢ်.

တၢ်ဂ့ၢ်လၢအဝဲမ့ၢ်သ့ၣ်ညါပာ်စၢၤဝဲန့ၣ် နမၤလိအီၤချ့ချ့သ့. ဘၣ်ဆၣ် တၢ်ဂ့ၢ်လၢအမ့ၢ်တသ့ၣ်ညါဒံးဘၣ်န့ၣ် တဲနၢ်ပၢၢ်အီၤကယီကယီတက့ၢ်.
ဃုသ့ၣ်ညါတၢ်ဂ့ၢ်တၢ်ကျိၤ ဒီးဆိကမိၣ်ထံအီၤတက့ၢ်. မ့ၢ်သ့န့ၣ်ဖဲနၡဲပၠးအီၤ တၢ်ဂ့ၢ်လၢအရ့ဒိၣ်အခါ သူတၢ်အဒိလၢအဝဲသ့ၣ် တဆိကမိၣ်ဘၣ်ဝဲနီတဘျီဘၣ်တဖၣ် မ့တမ့ၢ် တၢ်လၢအဟဲကဲထီၣ်သးခဲအံၤတဖၣ်တက့ၢ်. ဆိကမိၣ်ထံဘၣ်ဃး တၢ်ဂ့ၢ်တၢ်ကျိၤလၢ နဖးတဖၣ်န့ၣ်ဘၣ်ထွဲလိာ်အသးဒီး တၢ်ဂ့ၢ်လၢနကတဲအီၤတဖၣ် ဒ်လဲၣ်န့ၣ်တက့ၢ်.

ဖဲနဃုသ့ၣ်ညါ တၢ်ဂ့ၢ်တမံၤမံၤအခါန့ၣ် သံကွၢ်လီၤနသးဒ်အံၤတက့ၢ်. ‘တၢ်ဂ့ၢ်အံၤဘၣ်ဃးဒီးမနုၤလဲၣ်, ဘၣ်မနုၤအဃိလဲၣ်, ကဲထီၣ်သးလၢအခါဖဲလဲၣ်, လၢတၢ်လီၢ်ဖဲလဲၣ်, မတဂၤလဲၣ် ဒီးကဲထီၣ်အသးဒ်လဲၣ်.’ ဖဲနသိၣ်လိတၢ်အခါန့ၣ် ဒ်သိးကထုးန့ၢ်ပှၤသးအဂီၢ် နသူတၢ်သံကွၢ်တဖၣ်အံၤသ့ဝဲလီၤ.
ပာ်ဖျါထီၣ်လၢ တၢ်လၢနတဲတဖၣ် ကဲဘျုးသ့ဝဲဒ်လဲၣ်. ၡဲပၠးနပှၤဒိကနၣ်တၢ်ဖိလၢ လံာ်စီဆှံအဆၢတဖၣ် ကဲဘျုးလၢအဝဲသ့ၣ်အဂီၢ်ဒ်လဲၣ်. အဒိ တဲပၠးအီၤတၢ်အိၣ်သးတမံၤမံၤ ဒီးပှၤတဂၤအတၢ်ပာ်သူၣ်ပာ်သး မ့တမ့ၢ် အတၢ်ဖံးတၢ်မၤတခါခါ လၢအကကဲဘျုးလၢ နပှၤဒိကနၣ်တၢ်ဖိအဂီၢ်တက့ၢ်.