ပာ်ဖျါထီၣ် တၢ်စံးဘျုးစံးဖှိၣ်လၢ တၢ်ကတိၤဒီးတၢ်မၤ

၁. ပှၤၡၤမရံဖိလၢ ယ့ၣ်ၡူးမၤဘျါက့ၤအီၤတဂၤန့ၣ်​ ပာ်ဖျါထီၣ်ဝဲ တၢ်စံးဘျုးစံးဖှိၣ်ဒ်လဲၣ်.

ပှၤပိာ်ခွါအဂၤတဆံန့ၣ်​ အိၣ်ဒီးတၢ်ဆူးတၢ်ဆါလၢ အနးတကလုာ်လီၤ. အဝဲသ့ၣ်​ အိၣ်ဒီးတၢ်ဆါအၢ ဒီးအတၢ်ဆါန့ၣ်​ အိၣ်ဒၣ်ကနးဒိၣ်ထီၣ်ဝဲလီၤ. ဘၣ်တနံၤန့ၣ်​ အဝဲသ့ၣ်ထံၣ်စိဝဲ ယ့ၣ်ၡူးလၢအမ့ၢ် သရၣ်ဖးဒိၣ်တဂၤ လၢအယံၤလီၤ. လၢညါန့ၣ်​ အဝဲသ့ၣ်နၢ်ဟူဘၣ်ဝဲလၢ ယ့ၣ်ၡူးန့ၣ်​ မၤဘျါက့ၤဝဲ တၢ်ဆူးတၢ်ဆါခဲလၢာ် ဒီးအဝဲသ့ၣ်စ့ၢ်ကီး နာ်ဝဲလၢ ယ့ၣ်ၡူးကမၤဘျါက့ၤ အဝဲသ့ၣ်လီၤ. အဃိ အဝဲသ့ၣ်​ ကိးပသူထီၣ်ဝဲလၢ “ယ့ၣ်ၡူးကစၢ်ဧၢ, သူၣ်ကညီၤသးကညီၤလၢ်ပှၤတက့ၢ်.” ဖဲန့ၣ်န့ၣ်​ ယ့ၣ်ၡူးမၤဘျါက့ၤ အဝဲသ့ၣ်လီၤ. ခီဖျိလၢ ယ့ၣ်ၡူးအိၣ်ဒီး တၢ်သးကညီၤအဃိ အဝဲသ့ၣ်​ ကစံးဘျုးစံးဖှိၣ်ဘၣ်ယ့ၣ်ၡူး သပှၢ်ကတၢၢ်လီၤ. အဝဲသ့ၣ်အကျါတဂၤ စံးဘျုးစံးဖှိၣ်ယ့ၣ်ၡူး ထဲလၢအသးပူ တမ့ၢ်ဘၣ်. အဝဲပဖျါထီၣ်​ အတၢ်စံးဘျုးစံးဖှိၣ်b ယ့ၣ်ၡူးလီၤ. ဒီးအဝဲ စံးထီၣ်ပတြၢၤယွၤလၢ “အကလုၢ်ဖးဒိၣ်လီၤ.”—လူၤကၣ်​ ၁၇:၁၂-၁၉.

၂-၃. (က) တဘျီတခီၣ်​ ဘၣ်မနုၤအဃိ ပသးပ့ၤနီၣ်​ ပာ်ဖျါထီၣ်​ တၢ်စံးဘျုးစံးဖှိၣ်န့ၣ်လဲၣ်. (ခ) လၢတၢ်မၤလိအံၤအပူၤ ပကမၤလိဘၣ်​ တၢ်ဂ့ၢ်မနုၤလဲၣ်.

^၂ ဒ်ပှၤၡၤမရံဖိအသိး ပအဲၣ်ဒိးပာ်ဖျါထီၣ်​ တၢ်စံးဘျုးစံးဖှိၣ်လၢ ပှၤလၢအအိၣ်ဒီး တၢ်သးကညီၤတဖၣ်အဖီခိၣ်လီၤ. ဘၣ်ဆၣ်​ တဘျီတခီၣ်​ ပကသးပ့ၤနီၣ်​ ပာ်ဖျါထီၣ်​ တၢ်စံးဘျုးစံးဖှိၣ်လၢ တၢ်ကတိၤဒီးတၢ်မၤလီၤ.

^၃ လၢတၢ်မၤလိအံၤအပူၤ ပကမၤလိဘၣ်လၢ ဘၣ်မနုၤအဃိ အရ့ဒိၣ်လၢ ပကဘၣ်ပာ်ဖျါထီၣ်​ တၢ်စံးဘျုးစံးဖှိၣ်လၢ တၢ်ကတိၤဒီး တၢ်မၤန့ၣ်လဲၣ်. ပကမၤလိဘၣ်​ ဘၣ်ဃးဒီး လၢလံာ်စီဆှံအပူၤ ပှၤလၢအပာ်ဖျါထီၣ်တၢ်စံးဘျုးစံးဖှိၣ်​ ဒီးပှၤလၢ အတပာ်ဖျါထီၣ်​ တၢ်စံးဘျုးစံးဖှိၣ်တဖၣ်​ အဒိအတဲာ်န့ၣ်လီၤ. ဒီးပကမၤလိဘၣ်စ့ၢ်ကီးလၢ ပပာ်ဖျါထီၣ်​ တၢ်စံးဘျုးစံးဖှိၣ်​ ကသ့ဒ်လဲၣ်န့ၣ်လီၤ.

ဘၣ်မနုၤအဃိ ပကြၢးပာ်ဖျါထီၣ်​ တၢ်စံးဘျုးစံးဖှိၣ်န့ၣ်လဲၣ်

၄-၅. ဘၣ်မနုၤအဃိ ပဘၣ်ပာ်ဖျါထီၣ်​ တၢ်စံးဘျုးစံးဖှိၣ်လဲၣ်.

^၄ ဘၣ်ဃးဒီး တၢ်ပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ ယဟိဝၤယွၤ ပာ်လီၤန့ၢ်ပှၤ တၢ်ဒိဂ့ၤတဲာ်ဘၣ်လီၤ. အဝဲပာ်ဖျါထီၣ်​ တၢ်စံးဘျုးစံးဖှိၣ်​ ခီဖျိဆိၣ်ဂ့ၤဝဲ ပှၤလၢအမၤ အတၢ်ဘၣ်သးတဖၣ်န့ၣ်လီၤ. (၂ ၡမူၤအ့လး ၂၂:၂၁; စံးထီၣ်ပတြၢၤ ၁၃:၆; မးသဲ ၁၀:၄၀, ၄၁) ဒီးလံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပက “ကဲထီၣ်ပှၤကွၢ်လိယွၤ ဒ်ဖိသးဘိအသိး” လီၤ. (အ့းဖ့းစူး ၅:၁) လၢတၢ်န့ၣ်အဃိ ပမ့ၢ်အဲၣ်ဒိးကွၢ်လိမၤဒိး ယဟိဝၤယွၤန့ၣ်​ ပကဘၣ်ပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ မ့ၢ်တၢ်လၢအရ့ဒိၣ်ဒိၣ်မးန့ၣ်လီၤ.

^၅ ဆိကမိၣ်ကွၢ် တၢ်ဂ့ၢ်အဂၤလၢ ပအဲၣ်ဒိးပာ်ဖျါထီၣ်​ တၢ်စံးဘျုးစံးဖှိၣ်န့ၣ်တက့ၢ်. တၢ်စံးဘျုးစံးဖှိၣ်န့ၣ်​ လီၤဂာ်ဒ် ကသူလၢအဝံၣ်အဘဲတခွးလီၤ. ပမ့ၢ်ဟ့ၣ်နီၤအီၣ်လိာ်သး ကသူအံၤန့ၣ်​ ပအီၣ်ကဝံၣ်ဒိၣ်ထီၣ်ဝဲလီၤ. ဖဲပတူၢ်ဘၣ်လၢပှၤဂၤ စံးဘျုးစံးဖှိၣ်ပှၤအခါ ပသးခုဒိၣ်မးန့ၣ်လီၤ. ဒီးပမ့ၢ် ပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ ပှၤဂၤစ့ၢ်ကီး ကသးခုဝဲလီၤ. ပမ့ၢ်စံးဘျုးစံးဖှိၣ်ပှၤဂၤန့ၣ်​ အဝဲသ့ၣ်ကတူၢ်ဘၣ်ဝဲလၢ အဝဲသ့ၣ်အတၢ်မၤစၢၤ မ့တမ့ၢ် အတၢ်ဟ့ၣ်န့ၣ်​ ကဲဘျုးလၢပဂီၢ်လီၤ. လၢတၢ်န့ၣ်အဃိ ပတၢ်ရ့လိာ်သးဒီးအဝဲသ့ၣ်န့ၣ်​ ကဂၢၢ်ကျၢၤထီၣ်ဝဲလီၤ.

၆. တၢ်စံးဘျုးစံးဖှိၣ်န့ၣ်​ လီၤဂာ်လိာ်အသးဒီး ဖီသၣ်လၢ ပှၤတ့အီၤလၢထူ ဒ်လဲၣ်.

^၆ ပတၢ်ပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ အလုၢ်ဒိၣ်ပှ့ၤဒိၣ်ဒိၣ်မးလီၤ. လံာ်စီဆှံပာ်ဖျါထီၣ်ဝဲလၢ “တၢ်ကတိၤလၢပှၤကတိၤလၢ အကတီၢ်ဒၣ်ဝဲန့ၣ်​ မၤသးဒ်သၣ်သွံထူ [“ဖီသၣ်ထူ,” NWT] အိၣ်ဝဲလၢ တၢ်ဂီၤစ့အပူၤအသိးန့ၣ်လီၤ.” (ကတိၤဒိ ၂၅:၁၁) ထံၣ်တမှံကွၢ်လၢ ဖီသၣ်တဖျၢၣ်​ ပှၤမ့ၢ်တ့အီၤလၢထူဒီး ပာ်အီၤလၢ လီခီစ့အပူၤန့ၣ်​ ကဃံလၤထဲလဲၣ်. ဒီးအလုၢ်အပှ့ၤ ကဒိၣ်ထဲလဲၣ်န့ၣ်တက့ၢ်. နမ့ၢ်ဒိးန့ၢ်ဘၣ်​ တၢ်ဟ့ၣ်ဒ်န့ၣ်န့ၣ်​ နကတူၢ်ဘၣ်ဒ်လဲၣ်. နတၢ်ပာ်ဖျါထီၣ်​ တၢ်စံးဘျုးစံးဖှိၣ်ပှၤဂၤန့ၣ်​ အလုၢ်အပှ့ၤဒိၣ်ဝဲ ဒ်န့ၣ်လီၤ. ဒီးအဂၤတမံၤန့ၣ်​ ဖီသၣ်လၢ ပှၤတ့အီၤဒီးထူန့ၣ်​ ကကျၢၤဝဲဖးယံာ်လီၤ. ဒ်န့ၣ်အသိး နမ့ၢ်ပာ်ဖျါထီၣ်​ တၢ်စံးဘျုးစံးဖှိၣ်လၢ ပှၤတဂၤဂၤအအိၣ်န့ၣ်​ ပှၤတဂၤအံၤကသ့ၣ်နီၣ်ထီၣ်ဒီး ကပာ်လုၢ်ပာ်ပှ့ၤ နတၢ်စံးဘျုးစံးဖှိၣ်လၢ အတၢ်အိၣ်မူ ဒီတစိၤလီၤ.

အဝဲသ့ၣ်​ ပာ်ဖျါထီၣ်​ တၢ်စံးဘျုးစံးဖှိၣ်

၇. ဒ် စံးထီၣ်ပတြၢၤ ၂၆:၆-၈ ပာ်ဖျါထီၣ်ဝဲအသိး စီၤဒၤဝံးပာ်ဖျါထီၣ်ဝဲ တၢ်စံးဘျုးစံးဖှိၣ်ဒ်လဲၣ်​ ဒီးပှၤအဂၤလၢ အကွဲးထါစံးထီၣ်ပတြၢၤန့ၣ်​ ပာ်ဖျါထီၣ်ဝဲ တၢ်စံးဘျုးစံးဖှိၣ်ဒ်လဲၣ်

^၇ လၢပျၢၤန့ၣ်​ ကစၢ်ယွၤအခ့အပှၤအါဂၤ ပာ်ဖျါထီၣ်ဝဲ တၢ်စံးဘျုးစံးဖှိၣ်လီၤ. လၢအဝဲသ့ၣ်အကျါတဂၤန့ၣ်​ မ့ၢ်ဝဲစီၤဒၤဝံးလီၤ. (ဖး စံးထီၣ်ပတြၢၤ ၂၆:၆-၈ တက့ၢ်.) အဝဲပာ်လုၢ်ပာ်ပှ့ၤဝဲ တၢ်ဘူၣ်တၢ်ဘါအစီအဆှံဒိၣ်မး ဒီးပာ်ဖျါထီၣ်ဝဲလၢ အတၢ်မၤလီၤ. အဝဲမၤဘူၣ်ဝဲ အတၢ်ထူးတၢ်တီၤအါမး လၢပှၤကသူၣ်ထီၣ်​ တၢ်လုၢ်ဟံၣ်အဂီၢ်လီၤ. စီၤအၤစာ် အစၢၤအသွဲၣ်တဖၣ်​ ပာ်ဖျါထီၣ်​ တၢ်စံးဘျုးစံးဖှိၣ်ခီဖျိ ကွဲးဝဲလံာ်စံးထီၣ်ပတြၢၤ မ့တမ့ၢ် ထါစံးထီၣ်ပတြၢၤလီၤ. လၢအဝဲသ့ၣ်​ အတၢ်သးဝံၣ်တယုၢ်အပူၤန့ၣ်​ ပာ်ဖျါထီၣ်ဝဲလၢ အဝဲသ့ၣ်စံးဘျုးစံးဖှိၣ်​ ယဟိဝၤယွၤ ခီဖျိလၢအ “တၢ်မၤလီၤလးတဖၣ်” အဃိလီၤ. (စံးထီၣ်ပတြၢၤ ၇၅:၁) စီၤဒၤဝံး ဒီးစီၤအၤစာ် အစၢၤအသွဲၣ်တဖၣ်န့ၣ်​ ပာ်ဖျါထီၣ်ဝဲလၢ အပာ်လုၢ်ပာ်ပှ့ၤ တၢ်လၢယဟိဝၤယွၤ ဟ့ၣ်အီၤတဖၣ်​ ဒိၣ်မးန့ၣ်လီၤ. ဆိကမိၣ်ကွၢ်လၢ မ့ၢ်နကွၢ်လိမၤဒိး ပှၤကွဲးထါစံးထီၣ်ပတြၢၤတဖၣ်အံၤ ကသ့ဒ်လဲၣ်န့ၣ်တက့ၢ်.

၈-၉. စီၤပီလူး ပာ်ဖျါထီၣ်ဝဲလၢ အစံးဘျုးစံးဖှိၣ်​ အဒီပုၢ်ဝဲၢ်မုၣ်ခွါတဖၣ်​ ဒ်လဲၣ်​ ဒီးအဝဲသ့ၣ်​ ကဒိးန့ၢ်ဘၣ်အဘျုး ဒ်လဲၣ်.

^၈ တၢ်မၢဖိပီလူး စံးဘျုးစံးဖှိၣ်ဝဲ အဒီပုၢ်ဝဲၢ်မုၣ်ခွါတဖၣ်​ ဒီးပာ်ဖျါထီၣ်ဝဲ ခီဖျိလၢ အဝဲတဲဝဲ ဘၣ်ဃးဒီး အဝဲသ့ၣ်အဂ့ၢ်လီၤ. လၢအတၢ်ထုကဖၣ်အပူၤ ထီဘိန့ၣ်​ အဝဲစံးဘျုးကစၢ်ယွၤ ခီဖျိလၢ အဒိးန့ၢ်ဘၣ်​ ဒီပုၢ်ဝဲၢ်တဖၣ်အံၤအဃိလီၤ. ဖဲအဝဲကွဲးလံာ်ဆူ အဒီပုၢ်ဝဲၢ်မုၣ်ခွါတဖၣ်အအိၣ်အခါ အဝဲပာ်ဖျါထီၣ်ဝဲလၢ အဝဲသ့ၣ်မ့ၢ် ပှၤလၢအရ့ဒိၣ်လၢအဂီၢ် ထဲလဲၣ်န့ၣ်လီၤ. လၢ ရိမ့ၤ အဆၢဒိၣ် ၁၆ အဆၢဖိ အဆိကတၢၢ် ၁၅ ဆၢအပူၤန့ၣ် စီၤပီလူးကွဲးဖျါထီၣ်ဝဲ ခရံာ်ဖိဒီပုၢ်ဝဲၢ် ၂၇ ဂၤအမံၤလီၤ. ဖဲန့ၣ်န့ၣ်​ အဝဲတဲဖျါထီၣ်က့ၤဝဲ လီၤတံၢ်လီၤဆဲးလၢ နီၢ်ပြံစကံးလၤ, ဒီးစီၤအကူလၤ “ပာ်လီၤအကိာ်ဒၣ်ဝဲ” လၢအဝဲအဂီၢ်လီၤ. ဒီးစီၤပီလူးပာ်ဖျါထီၣ်ဝဲလၢ နီၢ်ဖံဘ့ၤန့ၣ်​ “မၤစၢၤတ့ၢ်ပှၤအါဂၤ” ပၣ်ဃုာ်ဒီးအီၤလီၤ. အဝဲစံးပတြၢၤဝဲ ဒီပုၢ်ဝဲၢ်မုၣ်ခွါလၢ အမၤတၢ်ဆူၣ်ဆူၣ်တဖၣ်အံၤလီၤ.—ရိမ့ၤ ၁၆:၁-၁၅.

^၉ စီၤပီလူးသ့ၣ်ညါဝဲလၢ အဒီပုၢ်ဝဲၢ်မုၣ်ခွါတဖၣ်န့ၣ်​ တမ့ၢ်ပှၤလၢ အလၢအပှဲၤဘၣ်သနာ်က့ ဖဲအဝဲကွဲးကတၢၢ်ကွံာ်ဝဲ လံာ်ရိမ့ၤအခါ သးစၢၢ်ဆၢဝဲ ဒီပုၢ်ဝဲၢ်မုၣ်ခွါတဖၣ်​ အတၢ်ဂ့ၤတၢ်ဝါလီၤ. ထံၣ်တမှံကွၢ်လၢ ဖဲပှၤဖးဖျါထီၣ်​ စီၤပီလူးအလံာ်အံၤ လၢတၢ်အိၣ်ဖှိၣ်အပူၤ လၢပှၤကလုၢ်ဖးဒိၣ်အခါ ဒီပုၢ်ဝဲၢ်မုၣ်ခွါတဖၣ်​ ကသးခုဝဲထဲလဲၣ်န့ၣ်တက့ၢ်. အဃိ အဝဲသ့ၣ်​ အတၢ်ရ့လိာ်သးဒီး စီၤပီလူး ကဂၢၢ်ကျၢၤထီၣ်ဝဲ သပှၢ်တၢၢ်လီၤ. ဖဲနဒီပုၢ်ဝဲၢ်တဖၣ်​ တဲတၢ်ဒီးမၤတၢ်တမံၤမံၤ လၢအဂ့ၤအခါ မ့ၢ်နပာ်ဖျါထီၣ်လၢ နစံးဘျုးစံးဖှိၣ်အဝဲသ့ၣ်​ ထီဘိန့ၣ်ဧါ.

၁၀. ဘၣ်ဃးဒီး ယ့ၣ်ၡူးပာ်ဖျါထီၣ်​ တၢ်စံးဘျုးစံးဖှိၣ်လၢ ခရံာ်ဖိတဖၣ်အဖီခိၣ်န့ၣ်​ ပမၤလိန့ၢ်ဘၣ်​ တၢ်မနုၤလဲၣ်.

^၁၀ လၢတၢ်ကစီၣ်လၢ ယ့ၣ်ၡူးဟ့ၣ်လီၤဝဲလၢ အၤစံအတၢ်အိၣ်ဖှိၣ်တဖၣ်အပူၤန့ၣ်​ အဝဲပာ်ဖျါထီၣ်ဝဲလၢ အပာ်လုၢ်ပာ်ပှ့ၤ ခရံာ်ဖိတဖၣ်အတၢ်မၤလီၤ. အဒိ, လၢတၢ်ကစီၣ်လၢ အဆှၢဝဲဆူ သူၤအတံရၤ အတၢ်အိၣ်ဖှိၣ်န့ၣ်​ အဝဲစးထီၣ်တဲဝဲလၢ “ယသ့ၣ်ညါနတၢ်ဖံးတၢ်မၤ, ဒီးနတၢ်အဲၣ်တၢ်ကွံ, ဒီးနမၤတၢ်အခ့အပှၤအတၢ်မၤ, နတၢ်စူၢ်တၢ်နာ်, ဒီးနတၢ်ဝံသးစူၤ, ဒီးနတၢ်မၤလၢခံကတၢၢ်န့ၣ်​ အါန့ၢ်လၢသီတက့ၢ်လီၤ.” (လီၣ်ဖျါ ၂:၁၉) တမ့ၢ်ထဲ ယ့ၣ်ၡူးတဲဖျါထီၣ်​ အဝဲသ့ၣ်​ အတၢ်မၤလၢ အလဲၤထီၣ်လဲၤထီတဖၣ်ဘၣ်. အဝဲစံးပတြၢၤဝဲ ဒီပုၢ်ဝဲၢ်ဖဲန့ၣ်​ အတၢ်ဂ့ၤတၢ်ဝါတဖၣ်​ ဒီးအတၢ်မၤလၢအဂ့ၤလီၤ. ပှၤတနီၤလၢ အအိၣ်ဖဲ သူၤအတံရၤန့ၣ်​ ကလိၣ်ဘၣ်​ ယ့ၣ်ၡူးအတၢ်သိၣ်က့ၤသီက့ၤဒံး သနာ်က့ ဖဲယ့ၣ်ၡူးဆှၢလီၤတၢ်ကစီၣ်လၢ အဝဲသ့ၣ်အအိၣ်အခါ အဝဲစးထီၣ်ဒီးမၤကတၢၢ်ကွံာ်ဝဲ အတၢ်ကစီၣ်လၢ တၢ်ကတိၤဟ့ၣ်ဂံၢ်ဟ့ၣ်ဘါလီၤ. (လီၣ်ဖျါ ၂:၂၅-၂၈) ယ့ၣ်ၡူးအိၣ်ဒီး တၢ်စိတၢ်ကမီၤလၢ တၢ်အိၣ်ဖှိၣ်ခဲလၢာ်အဖီခိၣ်လီၤ. အဝဲတလိၣ်​ စံးဘျုးပှၤ ခီဖျိလၢပမၤအတၢ်မၤအဃိဘၣ်. ဘၣ်ဆၣ်​ အဝဲပာ်ဖျါထီၣ်ဝဲလၢ အစံးဘျုးစံးဖှိၣ်ပှၤလီၤ. အဝဲပာ်လီၤ တၢ်ဒိဂ့ၤတဲာ်ဘၣ်လၢ တၢ်အိၣ်ဖှိၣ်သးပှၢ်တဖၣ်အဂီၢ်လီၤ.

အဝဲသ့ၣ်​ တပာ်ဖျါထီၣ်​ တၢ်စံးဘျုးစံးဖှိၣ်ဘၣ်

၁၁. ဒ် ဧ့ၤဘြံၤ ၁၂:၁၆ ပာ်ဖျါထီၣ်ဝဲအသိး ဘၣ်ဃးဒီး တၢ်စီဆှံတဖၣ်န့ၣ်​ စီၤဧ့ၡီၤအိၣ်ဒီး တၢ်ပာ်သူၣ်ပာ်သးဒ်လဲၣ်.

^၁၁ လီၤသးအုးဒိၣ်မးလၢ ပှၤတနီၤနီၤလၢ လံာ်စီဆှံအပူၤန့ၣ်​ တပာ်ဖျါထီၣ်​ တၢ်စံးဘျုးစံးဖှိၣ်ဘၣ်. အဒိ စီၤဧ့ၡီၤန့ၣ်​ အမိၢ်အပၢ်မ့ၢ်ပှၤလၢ အအဲၣ်ယဟိဝၤယွၤဒီး ပာ်ကဲကစၢ်ယွၤ ဘၣ်ဆၣ်​ အဝဲတပာ်ဖျါထီၣ်​ တၢ်စံးဘျုးစံးဖှိၣ်လၢ တၢ်စီဆှံတဖၣ်အဂီၢ်န့ၣ်ဘၣ်. (ဖး ဧ့ၤဘြံၤ ၁၂:၁၆ တက့ၢ်.) အဝဲတပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ ပသ့ၣ်ညါဘၣ်ဒ်လဲၣ်. ပသ့ၣ်ညါဘၣ်အီၤ ခီဖျိအဝဲဆါလီၤကွံာ်ဝဲ ဖိဝဲၢ်ကိအတၢ်န့ၢ်သါလၢ အပုၢ်စီၤယၤကိာ်အအိၣ်​ လၢပဲကသူတခွးလီၤ. (၁ မိၤၡ့ ၂၅:၃၀-၃၄) မ့ၢ်လၢ စီၤဧ့ၡီၤမၤဝဲဒ်န့ၣ်အဃိ လၢခံန့ၣ်​ အဝဲအသးအုးဒိၣ်မးလီၤ. ခီဖျိလၢ အဝဲတပာ်ဖျါထီၣ်​ တၢ်စံးဘျုးစံးဖှိၣ်အဃိ ဖဲအဝဲတဒိးန့ၢ်ဘၣ်​ ဖိဝဲၢ်ကိအတၢ်န့ၢ်သါအခါ အဝဲတကြၢး ကဒူးကဒ့ၣ်တၢ်ဘၣ်.

၁၂-၁၃. ပှၤအံၣ်စရ့လးဖိတဖၣ်​ တပာ်ဖျါထီၣ်​ တၢ်စံးဘျုးစံးဖှိၣ်လၢ ကျဲဒ်လဲၣ်, အဃိ တၢ်ကဲထီၣ်အသးဒ်လဲၣ်.

^၁၂ ပှၤအံၣ်စရ့လးဖိတဖၣ်န့ၣ်​ အိၣ်ဒီးတၢ်ဂ့ၢ်အါမးလၢ ကပာ်ဖျါထီၣ်ဝဲ တၢ်စံးဘျုးစံးဖှိၣ်န့ၣ်လီၤ. ဖဲယဟိဝၤယွၤ ဒုးလီၤဝဲတၢ်နးတၢ်ဖှီၣ်​ အခါတဆံလၢ ကီၢ်အဲၤကူပတူးအပူၤ ဝံၤအလီၢ်ခံ အဝဲသ့ၣ်​ ပူၤဖျဲးထီၣ်ဝဲလၢ ကုၢ်အလီၢ်လီၤ. ဒီးဖဲကစၢ်ယွၤ မၤဟးဂီၤပှၤအဲၤကူပတူးဖိတဖၣ်​ လၢပီၣ်လဲၣ်ဂီၤပူၤအခါ ကစၢ်ယွၤမၤပူၤဖျဲး အဝဲသ့ၣ်လီၤ. ပှၤအံၣ်စရ့လးဖိတဖၣ်န့ၣ်​ စံးဘျုးယဟိဝၤယွၤဒိၣ်မးအဃိ အဝဲသ့ၣ်သးဝံၣ်ထီၣ်ဝဲ တၢ်မၤနၢၤအတၢ်သးဝံၣ်လီၤ. ဘၣ်ဆၣ်​ မ့ၢ်အဝဲသ့ၣ်​ စံးဘျုးယဟိဝၤယွၤ ထီဘိဧါ.

^၁၃ ဖဲပှၤအံၣ်စရ့လးဖိတဖၣ်​ ထံၣ်ဘၣ်ဒီးတၢ်ကီတၢ်ခဲလၢ အဂၤတဖၣ်အခါ အဝဲသ့ၣ်​ သးပ့ၤနီၣ်ကွံာ်ဝဲ တၢ်အဂ့ၤခဲလၢာ်လၢ ယဟိဝၤယွၤ မၤတ့ၢ်န့ၢ်အဝဲသ့ၣ်တဖၣ်လီၤ. ဒီးအဝဲသ့ၣ်​ တပာ်ဖျါထီၣ်ဝဲ တၢ်စံးဘျုးစံးဖှိၣ်လၢၤဘၣ်. (စံးထီၣ်ပတြၢၤ ၁၀၆:၇) အဝဲသ့ၣ်မၤဝဲဒ်လဲၣ်. “ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ် ကဒူးကဒ့ၣ်တၢ်လၢစီၤမိၤၡ့ဒီး စီၤအၤဟရိၣ်အလိၤ” ဘၣ်ဆၣ်​ နီၢ်ကီၢ်န့ၣ်​ မ့ၢ်ဒၣ်အဝဲသ့ၣ်ကဒူးကဒ့ၣ်​ ယဟိဝၤယွၤလီၤ. (၂ မိၤၡ့ ၁၆:၂, ၈) ခီဖျိလၢ အခ့အပှၤတဖၣ်​ တပာ်ဖျါထီၣ်​ တၢ်စံးဘျုးစံးဖှိၣ်အဃိ ကစၢ်ယွၤ အသူၣ်အုးသးအုးဝဲဒိၣ်မးလီၤ. ဒီးအဝဲတဲဆိပာ်စၢၤဝဲလၢ ပှၤအံၣ်စရ့လးဖိတဖၣ်​ ကဘၣ်တၢ်မၤဟးဂီၤကွံာ်အီၤလၢ ပှၢ်မုၢ်ကနၢအပူၤလီၤ. ဘၣ်ဆၣ်​ စီၤယိၤၡူဒီးစီၤကၤလ့း ပူၤဖျဲးဝဲလီၤ. (၄ မိၤၡ့ ၁၄:၂၂-၂၄; ၂၆:၆၅) ပကကွၢ်သကိးတၢ်ဂ့ၢ်လၢ ဘၣ်ဃးဒီး ပဟးဆှဲး ပှၤအဒိအတဲာ်လၢအတဂ့ၤတဖၣ်အံၤ ကသ့ဒ်လဲၣ်​ ဒီးပကွၢ်လိမၤဒိး ပှၤအဒိအတဲာ်လၢ အဂ့ၤတဖၣ်ကသ့ဒ်လဲၣ်န့ၣ်လီၤ.

ပာ်ဖျါထီၣ်​ တၢ်စံးဘျုးစံးဖှိၣ်​ လၢဆၢကတီၢ်ခဲအံၤ

၁၄-၁၅. (က) ပှၤနီၢ်ဒီမါဝၤတဖၣ်​ ပာ်ဖျါထီၣ်​ တၢ်စံးဘျုးစံးဖှိၣ်လၢ တဂၤဒီးတဂၤအဖီခိၣ်​ ကသ့ဒ်လဲၣ်. (ခ) မိၢ်ပၢ်တဖၣ်​ သိၣ်လိအဖိလၢ အကပာ်ဖျါထီၣ်​ တၢ်စံးဘျုးစံးဖှိၣ်​ ကသ့ဒ်လဲၣ်.

^၁၄ လၢဟံၣ်ဖိဃီဖိအပူၤ. ဟံၣ်ဖိဃီဖိ တဂၤစုာ်စုာ် မ့ၢ်ပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ ဟံၣ်ဖိဃီဖိ ကိးဂၤဒဲးကဒိးန့ၢ်ဘၣ်အဘျုးလီၤ. ဒီးပှၤနီၢ်ဒီမါဝၤတဖၣ်စ့ၢ်ကီး အဝဲသ့ၣ်​ မ့ၢ်ပာ်ဖျါထီၣ်​ တၢ်စံးဘျုးစံးဖှိၣ်​ လၢတဂၤဒီးတဂၤအဖီခိၣ်​ ဒံးယံာ်ဒံးအါထီၣ်န့ၣ်​ အဝဲသ့ၣ်အတၢ်ရ့လိာ်သး ဒံးယံာ်ဒံး ဘူးထီၣ်ဝဲလီၤ. ဒီးကညီထီၣ်လၢ အဝဲသ့ၣ်ကပျၢ်လိာ်သး တၢ်ကမၣ်လီၤ. ဝၤတဂၤလၢ အစံးဘျုးစံးဖှိၣ်အမါန့ၣ်​ ကပာ်သူၣ်ပာ်သးဝဲ အမါတၢ်ကတိၤဒီး အတၢ်မၤလၢ အဂ့ၤတဖၣ်​ တကးဒံးဘၣ်​ အဝဲက “စံးထီၣ်ပတြၢၤအီၤ” စ့ၢ်ကီးလီၤ. (ကတိၤဒိ ၃၁:၁၀, ၂၈) ဒီးမါစ့ၢ်ကီး ကဒုးသ့ၣ်ညါအဝၤလၢ အဝဲစံးဘျုးစံးဖှိၣ်​ အဝၤလၢ တၢ်ဂ့ၢ်မနုၤအဃိလဲၣ်န့ၣ်လီၤ.

^၁၅ နမ့မ့ၢ်မိၢ်ပၢ်န့ၣ်​ ဒ်သိးနဖိတဖၣ်​ ကပာ်ဖျါထီၣ်​ တၢ်စံးဘျုးစံးဖှိၣ်အဂီၢ် နသိၣ်လိအဝဲသ့ၣ်​ ကသ့ဒ်လဲၣ်. သ့ၣ်နီၣ်ထီၣ်လၢ နဖိတဖၣ်န့ၣ်​ ကကွၢ်လိမၤဒိးဝဲ တၢ်လၢနတဲဒီး နမၤတဖၣ်န့ၣ်လီၤ. လၢတၢ်န့ၣ်အဃိ သိၣ်လိနဖိလၢ အဝဲသ့ၣ်ကတဲတၢ်ဘျုး ဖဲပှၤဂၤမၤန့ၢ်အီၤ တၢ်တမံၤမံၤအခါန့ၣ်တက့ၢ်. မၤစၢၤနဖိတဖၣ်ဒ်သိး ကနၢ်ပၢၢ်ထီၣ်ဝဲလၢ တၢ်စံးဘျုးစံးဖှိၣ်လၢ အဟဲထီၣ်လၢအဝဲသ့ၣ်​ အသးပူၤဒီး အဝဲသ့ၣ်​ အတၢ်ကတိၤတဖၣ်န့ၣ်​ မ့ၢ်တၢ်လၢ အလုၢ်ဒိၣ်ပှ့ၤဒိၣ်ဒိၣ်မးန့ၣ်တက့ၢ်. အဒိ ချဲရံၤလၢ အမ့ၢ်ပိာ်မုၣ်သးစၢ်တဂၤန့ၣ်​ တဲဝဲလၢ “ဖဲယမိအသးအိၣ်​ ၃၂ နံၣ်အခါ အဝဲဘၣ်အိၣ်တ့ၢ်ဒီး အဖိသၢဂၤ ဒီးဘၣ်ကွၢ်လုၢ်ဒိၣ်ထီၣ်​ အဖိတဖၣ်အံၤ ထဲတဂၤဧိၤလီၤ. ဒီးဖဲယသးအိၣ်​ ၃၂ နံၣ်အခါ ယဆိကမိၣ်ထီၣ်လၢ ဖဲယမိအသးအိၣ်​ ၃၂ နံၣ်အခါ တၢ်ကကီလၢအဂီၢ်ထဲလဲၣ်န့ၣ်လီၤ. အဃိ ယတဲဘၣ်အီၤလၢ အဝဲတူၢ်ဆါအသး ဒီးကွၢ်လုၢ်ဒိၣ်ထီၣ်ယၤ ဒီးယဒီပုၢ်ဝဲၢ်ခွါခံဂၤအဃိ ယစံးဘျုးဘၣ်အီၤဒိၣ်မးန့ၣ်လီၤ. ပူၤကွံာ်တယံာ်ဘၣ်န့ၣ်​ အဝဲတဲဝဲလၢ အပာ်လုၢ်ပာ်ပှ့ၤ ယတၢ်ကတိၤတဖၣ်တုၤခဲအံၤ ဒီးအဝဲဆိကမိၣ်က့ၤ ယတၢ်ကတိၤတဖၣ်အံၤ တလီၢ်လီၢ်ဒီး မၤသးခုအီၤဒိၣ်မးလီၤ.”

၁၆. ဖဲပပာ်ဖျါထီၣ်​ တၢ်စံးဘျုးစံးဖှိၣ်အခါ ကဲထီၣ်တၢ်ဂံၢ်တၢ်ဘါလၢ ဒီပုၢ်ဝဲၢ်တဖၣ်အဂီၢ်ဒ်လဲၣ်န့ၣ်​ ဟ့ၣ်တၢ်အဒိတက့ၢ်.

^၁၆ လၢတၢ်အိၣ်ဖှိၣ်အပူၤ. ပမ့ၢ်ပာ်ဖျါထီၣ်လၢ ပစံးဘျုးစံးဖှိၣ်​ ပဒီပုၢ်ဝဲၢ်မုၣ်ခွါတဖၣ်န့ၣ်​ မ့ၢ်ဒၣ်ပဟ့ၣ်ဂံၢ်ဟ့ၣ်ဘါ အဝဲသ့ၣ်လီၤ. အဒိ, ကၠိကၠံ လၢအသးအိၣ်​ ၂၈ နံၣ်​ ဒီးအမ့ၢ်တၢ်အိၣ်ဖှိၣ်သးပှၢ်န့ၣ်​ အိၣ်တဆူၣ်နးမးလီၤ. ဒီးအဝဲထီၣ်တၢ်အိၣ်ဖှိၣ်တကဲဘၣ်​ ဒီတလါညါလီၤ. ဒီးလၢခံအဝဲထီၣ်က့ၤတၢ်အိၣ်ဖှိၣ်​ ကဲသနာ်က့ မၤဝဲမူဒါလၢတၢ်အိၣ်ဖှိၣ်အပူၤ တကဲနီတမံၤလၢၤဘၣ်. အဝဲတဲဝဲလၢ “ခီဖျိလၢ ယတၢ်ဂံၢ်စၢ်ဘါစၢ် ဒီးယမၤတၢ်အိၣ်ဖှိၣ်​ အတၢ်မၤတဖၣ်​ တကဲလၢၤဘၣ်အဃိ ယတူၢ်ဘၣ်လၢ ပှၤသူအီၣ်ယၤ တသ့လၢၤဘၣ်. ဘၣ်ဆၣ်​ ဘၣ်တဘျီဖဲတၢ်အိၣ်ဖှိၣ်ဝံၤအခါ ဒီပုၢ်ဝဲၢ်ခွါတဂၤ တဲဘၣ်ယၤလၢ ‘နပာ်လီၤဒိဂ့ၤတဲာ်ဘၣ်လၢ ယဟံၣ်ဖိဃီဖိတဖၣ်အဂီၢ်အဃိ ယအဲၣ်ဒိးစံးဘျုးနၤလီၤ. အနံၣ်လၢအပူၤကွံာ်တဖၣ်​ အတီၢ်ပူၤ ပကနၣ်​ နဟ့ၣ်တၢ်စံၣ်တဲၤတဲလီၤတၢ် မုာ်ဒိၣ်မး. ဒီးနတၢ်စံၣ်တဲၤတဲလီၤတဖၣ်န့ၣ်​ အမၤဆူၣ်ထီၣ်ပတၢ်နာ်ဒိၣ်မး.’ ဒီပုၢ်ဝဲၢ်တဂၤအံၤ အတၢ်ကတိၤတဖၣ်န့ၣ်​ ထိးဘၣ်ယသးဒီး ယမဲာ်ထံလီၤဝဲလီၤ. အတၢ်ကတိၤတဖၣ်န့ၣ်​ ကဲထီၣ်တၢ်ဂံၢ်တၢ်ဘါလၢယဂီၢ် ဒိၣ်မးလီၤ. အဝဲအတၢ်ကတိၤတဖၣ်န့ၣ်​ မ့ၢ်တၢ်လၢ ယလိၣ်ဘၣ်အီၤလီၤ.”

၁၇. ဒ် ကလီးစဲ ၃:၁၅ ပာ်ဖျါထီၣ်ဝဲအသိး ခီဖျိလၢယဟိဝၤယွၤ သးအိၣ်ဟ့ၣ်တၢ်အဃိ ပပာ်ဖျါထီၣ်​ တၢ်စံးဘျုးစံးဖှိၣ်အီၤ ကသ့ဒ်လဲၣ်.

^၁၇ လၢကစၢ်ယွၤလၢ အသးအိၣ်ဟ့ၣ်တၢ်. ယဟိဝၤယွၤ ဟ့ၣ်လီၤပှၤ နီၢ်သးအတၢ်အီၣ်တၢ်အီ အါမးလီၤ. အဒိ ပဒိးန့ၢ်ဘၣ်​ တၢ်ဟံးစုနဲၣ်ကျဲလၢ တၢ်အိၣ်ဖှိၣ်တဖၣ်, ပလံာ်လဲၢ်တဖၣ်​ ဒီးပပှာ်ယဲၤသန့တဖၣ်​ (websites) အပူၤလီၤ. ဖဲနနၢ်ဟူဘၣ်​ တၢ်စံၣ်တဲၤတဲလီၤတၢ်, ဖးလံာ် မ့တမ့ၢ် ကွၢ် JW တၢ်ဂီၤမူအခါ မ့ၢ်နဆိကမိၣ်ဘၣ်လၢ ‘အဝဲအံၤမ့ၢ်တၢ်လၢ ယလိၣ်ဘၣ်အီၤလီၤ’ တဘျီဘျီဧါ. မ့မ့ၢ်ဒ်န့ၣ်န့ၣ်​ နပာ်ဖျါထီၣ်​ တၢ်စံးဘျုးစံးဖှိၣ်​ ယဟိဝၤယွၤ ကသ့ဒ်လဲၣ်. (ဖး ကလီးစဲ ၃:၁၅ တက့ၢ်.) ကျဲတဘိလၢ ပမၤဒ်န့ၣ်သ့န့ၣ်​ မ့ၢ်ဝဲပစံးဘျုးအီၤလၢ တၢ်ထုကဖၣ်အပူၤ ခီဖျိတၢ်ဂ့ၤတဖၣ်​ လၢအဟ့ၣ်ပှၤအဃိလီၤ.—ယၤကိာ် ၁:၁၇.

၁၈. ခီဖျိလၢ ပဒိးန့ၢ်ဘၣ်ဘီမုၢ်ဘျီၣ်ဒိၣ်အဃိ ပပာ်ဖျါထီၣ်​ တၢ်စံးဘျုးစံးဖှိၣ်ကသ့ဒ်လဲၣ်.

^၁၈ ပပာ်ဖျါထီၣ်​ တၢ်စံးဘျုးစံးဖှိၣ်​ ယဟိဝၤယွၤသ့ခီဖျိ ပပာ်ပတၢ်ဘူၣ်ထီၣ်ဘါထီၣ်​ အလီၢ်ကဆှဲကဆှီ စ့ၢ်ကီးန့ၣ်လီၤ. လၢတၢ်န့ၣ်အဃိ ပကဘၣ်​ မၤကဆှီ ဒီးကွၢ်ထွဲဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်​ ဘၣ်ဆၢဘၣ်ကတီၢ်လီၤ. ဒီးပဒီပုၢ်ဝဲၢ်လၢ အဘၣ်ဖီၣ်တၢ်ကလုၢ် ဒီးတၢ်ဂီၤမူန့ၣ်​ ပလီၢ်အသးဒ်သိး တၢ်ကလုၢ်ဒီး တၢ်ဂီၤမူအတၢ်ပီးတၢ်လီတဖၣ်​ သုတဟးဂီၤတဂ့ၤအဂီၢ်လီၤ. ပမ့ၢ်ကွၢ်ထွဲ ဘှီဂ့ၤထီၣ်က့ၤ ပဘီမုၢ်ဘျီၣ်ဒိၣ်ဂ့ၤဂ့ၤန့ၣ်​ ဘီမုၢ်ဘျီၣ်ဒိၣ်​ ကကျၢၤဝဲဖးယံာ် ဒီးပကဘၣ်ဘှီဂ့ၤထီၣ်က့ၤအီၤ ကစှၤဝဲလီၤ. လၢတၢ်န့ၣ်အဃိ လၢဟီၣ်ခိၣ်ဒီဘ့ၣ်န့ၣ်​ ပှၤကတ့ထီၣ်​ ဘီမုၢ်ဘျီၣ်ဒိၣ်အသီ ဒီးပှၤကဘှီဘၣ်ထီၣ်က့ၤ ဘီမုၢ်ဘျီၣ်ဒိၣ်အဂၤအဂီၢ် စ့ကအိၣ်အါထီၣ်ဝဲလီၤ.

၁၉. ပမၤလိန့ၢ်ဘၣ်​ တၢ်မနုၤလၢ ကဝီၤအပှၤကွၢ်တၢ် ဒီမါဝၤခံဂၤအအိၣ်လဲၣ်.

^၁၉ လၢပှၤလၢ အဂုာ်ကျဲးစၢးမၤတၢ် လၢပဂီၢ်တဖၣ်. ဖဲပစံးဘျုးစံးဖှိၣ်တၢ်အခါ ပတၢ်ကတိၤတဖၣ်န့ၣ်​ ဆီတလဲဝဲ ပှၤတဂၤအတၢ်တူၢ်ဘၣ်လၢ အတၢ်ကီတၢ်ခဲအဖီခိၣ်သ့ဝဲလီၤ. ဆိကမိၣ်ကွၢ် ကဝီၤအပှၤကွၢ်တၢ်တဂၤဒီးအမါ အတၢ်လဲၤခီဖျိန့ၣ်တက့ၢ်. ဘၣ်တနံၤ ဖဲအဝဲသ့ၣ်​ ဟးစံၣ်တဲၤတဲလီၤတၢ် လၢတၢ်ဂိၢ်ခါအဆၢကတီၢ် ဒီးအဝဲသ့ၣ်ဟဲက့ၤဆူ အအိၣ်တၢ်လီၢ်အခါ တူၢ်ဘၣ်ဝဲလၢ အလီၤဘှံးလီၤတီၤဒိၣ်မးလီၤ. တၢ်ဂိၢ်ဒိၣ်မးအဃိ အမါန့ၣ်​ ကၤဃာ်ဝဲဆ့ကၤကလၢၤ (winter coat) ဒီးမံဝဲလီၤ. ဒီးဖဲမုၢ်ဝါထီၣ်အခါ အဝဲတဲဘၣ်အဝၤလၢ အတူၢ်ဘၣ်ဝဲလၢ အဟးပိာ်အဝၤအခံလၢ ကဝီၤအပှၤကွၢ်တၢ် တၢ်မၤအပူၤတကဲလၢၤဘၣ်. ဖဲတၢ်တဂီၤန့ၣ်​ အဝဲဒိးန့ၢ်ဘၣ်​ ဝဲၤတြၢ်အလံာ်ပရၢတဘ့ၣ်န့ၣ်လီၤ. ဖဲလံာ်အံၤအပူၤန့ၣ်​ ပှၤစံးဘျုးစံးဖှိၣ်အီၤ ခီဖျိလၢ အတၢ်စံၣ်တဲၤတဲလီၤတၢ်မၤ ဒီးအတၢ်တူၢ်န့ၢ်ခီၣ်ကဲအဃိလီၤ. ဒီးလံာ်အံၤပာ်ဖျါထီၣ်ဝဲလၢ အဝဲကဘၣ်သုးအလီၢ် တနွံတဘျီအဃိ တမ့ၢ်တၢ်ညီလၢအဂီၢ်ဘၣ်. အဝၤတဲဝဲလၢ “တၢ်ကတိၤတဖၣ်အံၤန့ၣ်​ မၤမုာ်ထီၣ်အဝဲအသးဒိၣ်မး ဒီးအဝဲတတဲဝဲလၢ ကပာ်တ့ၢ်ကွံာ်ဝဲ တၢ်မၤအံၤနီတဘျီလၢၤဘၣ်. ဒီးဖဲယဆိကမိၣ်လၢ ယကပာ်တ့ၢ်ကွံာ် တၢ်မၤအံၤအခါ အဝဲဟ့ၣ်ဂံၢ်ဟ့ၣ်ဘါယၤအါဘျီလီၤ.” ပှၤဒီမါဝၤခံဂၤအံၤ ဆဲးမၤဝဲ ကဝီၤအပှၤကွၢ်တၢ်အတၢ်မၤ ကန့ၢ်ဝဲအနံၣ်​ ၄၀ ဃၣ်ဃၣ်ညါလီၤ.

၂၀. ကိးနံၤဒဲးန့ၣ်​ ပကြၢးဂုာ်ကျဲးစၢးမၤ မနုၤလဲၣ်​ ဒီးဘၣ်မနုၤအဃိလဲၣ်.

^၂၀ မ်ပဂုာ်ကျဲးစၢး ပာ်ဖျါထီၣ်​ တၢ်စံးဘျုးစံးဖှိၣ်လၢ ပတၢ်ကတိၤဒီးပတၢ်မၤ ကိးနံၤဒဲးန့ၣ်တက့ၢ်. လၢဟီၣ်ခိၣ်အံၤအပူၤ ပှၤလၢအပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ အိၣ်ထဲစှၤဂၤလီၤ. လၢတၢ်န့ၣ်အဃိ ပမ့ၢ်စံးဘျုးပှၤဂၤလၢ ပသးဒီဖျၢၣ်န့ၣ်​ ကကဲထီၣ်တၢ်မၤစၢၤလၢ ပှၤဂၤတဖၣ်​ ကလဲၤခီဖျိ အတၢ်ကီတၢ်ခဲ လၢအထံၣ်ဘၣ်ဝဲ ကိးနံၤဒဲးအဂီၢ်လီၤ. တကးဒံးဘၣ်​ တၢ်ပာ်ဖျါထီၣ်​ တၢ်စံးဘျုးစံးဖှိၣ်န့ၣ်​ ကမၤစၢၤပှၤဒ်သိး ပတၢ်ရ့လိာ်သးဒီးပှၤဂၤ ကဂၢၢ်ကျၢၤထီဘိအဂီၢ်လီၤ. ဒီးတၢ်လၢအရ့ဒိၣ်ကတၢၢ်န့ၣ်​ ပမ့ၢ်မၤဒ်န့ၣ်န့ၣ်​ မ့ၢ်ဝဲပကွၢ်လိမၤဒိး ပပၢ်ယဟိဝၤယွၤလၢ အသးအိၣ်ဟ့ၣ်တၢ် ဒီးအပာ်ဖျါထီၣ်​ တၢ်စံးဘျုးစံးဖှိၣ်န့ၣ်လီၤ.