တၢ်မၤလိ ၃
ကစၢ်ယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်အိၣ်ဒ်လဲၣ်
၁. ကစၢ်ယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် အိၣ်ဒ်လဲၣ်.
ကစၢ်ယွၤအိၣ်ဒီးအတၢ်တိာ်ပာ် ဖဲအဝဲတ့လီၤပှၤဟီၣ်ခိၣ်ဖိ အဆၢကတီၢ်န့ၣ်လီၤ. အဝဲတ့လီၤဝဲပိာ်မုၣ်ဒီး ပိာ်ခွါအဆိကတၢၢ်ခံဂၤ လၢအမ့ၢ်နီၢ်အံၣ်အုဒီးစီၤအၤဒၣ် ဒီးပာ်အဝဲသ့ၣ်လၢ ကရၢၢ်ဃံလၤအပူၤလီၤ. ကစၢ်ယွၤတိာ်ပာ်ဝဲလၢ အဝဲသ့ၣ်ကအိၣ်ဒီး အဖိတဖၣ်, ကမၤကဲထီၣ်ဟီၣ်ခိၣ်ဒီဘ့ၣ်လၢ ပၤရဒံစူးဒီး ကအံးထွဲကွၢ်ထွဲဝဲ ဆၣ်ဖိကီၢ်ဖိတဖၣ်န့ၣ်လီၤ.—၁ မိၤၡ့ ၁:၂၈; ၂:၈, ၉, ၁၅; ကွၢ်တၢ်ဂ့ၢ် ၆ လၢလံာ်အကတၢၢ်တက့ၢ်.
၂. (က) ကစၢ်ယွၤကမၤဝဲဒ် အတၢ်တိာ်ပာ်အိၣ်ဝဲအသိးန့ၣ် ပသ့ၣ်ညါဘၣ်ဒ်လဲၣ်. (ခ) ဘၣ်ဃးဒီး တၢ်အိၣ်မူလီၤထူလီၤယိာ်န့ၣ် လံာ်စီဆှံတဲဝဲဒ်လဲၣ်.
၂ မ့ၢ်နဆိကမိၣ်လၢ ပကအိၣ်ဘၣ်လၢပၤရဒံစူးအပူၤ တဘျီဘျီဧါ. ယဟိဝၤယွၤ တဲဘၣ်ပှၤလၢ– “ယတၢ်ကတိၤလၢ အဟဲထီၣ်လၢယထးခိၣ် ကမၤအသးဒ်န့ၣ်” လီၤ. (ယၡါယၤ ၄၆:၉-၁၁; ၅၅:၁၁) ဒ်အတၢ်တိာ်ပာ်အိၣ်ဝဲအသိးန့ၣ် အဝဲကမၤလၢပှဲၤဝဲလီၤ. ဒီးကစၢ်ယွၤအတၢ်တိာ်ပာ်န့ၣ် ပှၤတြီအီၤတသ့ နီတဂၤဘၣ်. ဖဲယဟိဝၤယွၤတ့လီၤဟီၣ်ခိၣ်အဆၢကတီၢ်န့ၣ် အတၢ်ပညိၣ်အိၣ်ဝဲလီၤ. ဒီး “တတ့လီၤဝဲလၢ ဟီၣ်ခိၣ်ကအိၣ်သယုၢ် အိၣ်ကလီအဂီၢ်ဘၣ်.” (ယၡါယၤ ၄၅:၁၈, ခ့ခါစှီၤကျိာ်) ကစၢ်ယွၤအဲၣ်ဒိးလၢ ပှၤဟီၣ်ခိၣ်ဖိတဖၣ်န့ၣ် ကအိၣ်သကုၤလၢဟီၣ်ခိၣ်ဒီဘ့ၣ်လီၤ. မ့ၢ်အဝဲအဲၣ်ဒိးလၢ ပှၤဟီၣ်ခိၣ်ဖိဒ်လဲၣ်တကလုာ် ကအိၣ်မူဘၣ်ဝဲလၢဟီၣ်ခိၣ်လဲၣ်, ဒီးကအိၣ်ဘၣ်ဝဲတၢ်ဆၢကတီၢ် ယံာ်ထဲလဲၣ်. လံာ်စီဆှံစံးဝဲလၢ “ပှၤတီပှၤလိၤ န့ၢ်ဘၣ်သါထံဧိၤကီၢ်ဧိၤ, ဒီးအိၣ်ဝဲဆိးဝဲလီၤစိၤလီၤထီလီၤ.”—စံးထီၣ်ပတြၢၤ ၃၇:၂၉; လီၣ်ဖျါ ၂၁:၃, ၄.
၃. မ့ၢ်လၢပှၤဟီၣ်ခိၣ်ဖိတဖၣ် တူၢ်ဘၣ်တၢ်ဆူးတၢ်ဆါ ဒီးဘၣ်သံဝဲအဃိ ဘၣ်သ့ၣ်သ့ၣ်နကအိၣ်ဒီးတၢ်သံကွၢ်မနုၤလဲၣ်.
၃ မုၢ်မဆါတနံၤအံၤ ပှၤဟီၣ်ခိၣ်ဖိတဖၣ် တူၢ်ဘၣ်တၢ်ဆူးတၢ်ဆါ ဒီးဘၣ်သံဝဲလီၤ. လၢတၢ်လီၢ်အါတီၤန့ၣ် ပှၤဟီၣ်ခိၣ်ဖိတဖၣ် ဒုးလိာ်ယၤလိာ်အသးဒီး မၤသံလိာ်အသးတဂၤဒီးတဂၤလီၤ. ပသ့ၣ်ညါဘၣ်လီၤတံၢ်လၢ တၢ်မၤအသးတဖၣ်အံၤန့ၣ် တမ့ၢ်ကစၢ်ယွၤအတၢ်တိာ်ပာ်ဘၣ်. မ့မ့ၢ်ဒ်န့ၣ်န့ၣ် တၢ်မနုၤဟဲကဲထီၣ်အသးလဲၣ်, ဒီးလၢတၢ်ဂ့ၢ်မနုၤအဃိလဲၣ်. ထဲလံာ်စီဆှံတဘ့ၣ်န့ၣ် ပာ်ဖျါထီၣ်တၢ်ဂ့ၢ်လၢ အဟဲကဲထီၣ်အသးတဖၣ်အံၤ သ့ဝဲလီၤ.
ကစၢ်ယွၤအဒုၣ်အဒါတဂၤ
၄, ၅. (က) လၢဧ့ၤဒ့ၣ်တၤသၣ်အလီၢ်န့ၣ် မတၤတဂၤကတိၤတၢ်ဒီး နီၢ်အံၣ်အုခီဖျိလၢ ဂုၢ်န့ၣ်လဲၣ်.(ခ) ပှၤတီပှၤလိၤတဂၤန့ၣ် ဟဲကဲထီၣ်တၢ်ဘျၣ်သ့လၢ ကျဲဒ်လဲၣ်.
၄ လံာ်စီဆှံပာ်ဖျါထီၣ်ဝဲလၢ ကစၢ်ယွၤအိၣ်ဒီးအဒုၣ်အဒါတဂၤ လၢဘၣ်တၢ်ကိးအီၤလၢ “မုၣ်ကီၤလံၢ်, ဒီးစၤတၣ်” လီၤ. မုၣ်ကီၤလံၢ်သူဝဲဂုၢ်တဘိ ဒ်သိးကကတိၤတၢ်ဒီးနီၢ်အံၣ်အု လၢဧ့ၤဒ့ၣ်တၤသၣ်အလီၢ်န့ၣ်လီၤ. (လီၣ်ဖျါ ၁၂:၉; ၁ မိၤၡ့ ၃:၁) ဒီးအဝဲသူဝဲအတၢ်စိတၢ်ကမီၤ ဒ်သိးကဒုးဆိကမိၣ် နီၢ်အံၣ်အုလၢဂုၢ်တဘိန့ၣ်တဲတၢ်လၢ အနီၢ်ကစၢ်လီၤ.—ကွၢ်တၢ်ဂ့ၢ် ၇ လၢလံာ်အကတၢၢ်တက့ၢ်.
၅ မ့ၢ်ကစၢ်ယွၤတ့လီၤဝဲ မုၣ်ကီၤလံၢ်ဧါ. တတ့လီၤဝဲဘၣ်. ဖဲကစၢ်ယွၤကတဲာ်ကတီၤဟီၣ်ခိၣ်လၢ နီၢ်အံၣ်အုဒီး စီၤအၤဒၣ်အဂီၢ်အခါ မူခိၣ်ကလူးလၢအအိၣ်လၢမူခိၣ်တဂၤ ဆီတလဲအသးဒီး ကဲထီၣ်ဝဲမုၣ်ကီၤလံၢ်န့ၣ်လီၤ. (ယိၤဘး ၃၈:၄, ၇) တၢ်န့ၣ်ကဲထီၣ်အသး သ့ဒ်လဲၣ်. အဒိ ပှၤတီပှၤလိတဂၤ ဟဲကဲထီၣ်တၢ်ဘျၣ်သ့လၢ ကျဲဒ်လဲၣ်. ဖဲအဝဲဟဲအိၣ်ဖျဲၣ်ထီၣ်ဝဲအခါ အဝဲတမ့ၢ်တၢ်ဘျၣ်ဘၣ်. အဝဲဟဲကဲထီၣ်တၢ်ဘျၣ် မ့ၢ်လၢအဝဲဆိကမိၣ်တၢ် ဒီးသးလီတၢ်လၢ အတမ့ၢ်ဘၣ်အတၢ်ဘၣ်န့ၣ်လီၤ. အဝဲဆိကမိၣ်ဝဲထီဘိ ဒီးအတၢ်ဆိကမိၣ်လၢ အကမၣ်န့ၣ်ဟဲဒိၣ်ထီၣ်အါထီၣ်ဝဲလီၤ. ဖဲအဝဲအိၣ်ဒီးတၢ်ခွဲးတၢ်ယာ်အခါ အဝဲဟုၣ်တၢ်လီၤ. လၢတၢ်န့ၣ်အဃိ အဝဲဟဲကဲထီၣ်တၢ်ဘျၣ်လၢ အနီၢ်ကစၢ်ဒၣ်ဝဲအဃိလီၤ.—ဖး ယၤကိာ် ၁:၁၃-၁၅ ကွၢ်တၢ်ဂ့ၢ် ၈ လၢလံာ်အကတၢၢ်တက့ၢ်.
၆. မူခိၣ်ကလူးတဂၤ ဟဲကဲထီၣ်ယွၤအဒုၣ်အဒါလၢ ကျဲဒ်လဲၣ်.
၆ မူခိၣ်ကလူးစ့ၢ်ကီး ဟဲကဲထီၣ်ဝဲမုၣ်ကီၤလံၢ်လၢ ကျဲဒ်အံၤလီၤ. ဖဲကစၢ်ယွၤတ့လီၤနီၢ်အံၣ်အုဒီး စီၤအၤဒၣ်ဝံၤအလီၢ်ခံ ကစၢ်တဲဘၣ်ပှၤဒီမါဝၤခံဂၤလၢ အဝဲသ့ၣ် ကဘၣ်အိၣ်ဖျဲၣ်ထီၣ်အဖိဒီး “မၤပှဲၤထီၣ်ဟီၣ်ခိၣ်” န့ၣ်လီၤ. (၁ မိၤၡ့ ၁:၂၇, ၂၈) ဘၣ်သ့ၣ်သ့ၣ် မူခိၣ်ကလူးတဂၤန့ၣ် ကဆိကမိၣ်ဝဲလၢ ‘ပှၤဟီၣ်ခိၣ်ဖိတဖၣ်ကဘူၣ်ထီၣ်ဘါထီၣ် ကစၢ်ယွၤအလီၢ် အဝဲသ့ၣ်မ့ၢ်ဘူၣ်ထီၣ်ဘါထီၣ်ယၤန့ၣ်ကဂ့ၤဝဲလီၤ.’ မ့ၢ်လၢအဝဲဆိကမိၣ်ဝဲတၢ်ဂ့ၢ်အံၤ အါထီၣ်အါထီၣ်အဃိ အတၢ်သူၣ်လီသးကွံလၢ ပှၤဟီၣ်ခိၣ်ဖိတဖၣ် ကဘူၣ်ထီၣ်ဘါထီၣ်အီၤအဂီၢ်န့ၣ် ဒိၣ်ထီၣ်ဝဲလီၤ. လၢတၢ်န့ၣ်အဃိ အဝဲကွဲန့ၢ်လွဲန့ၢ်ဝဲနီၢ်အံၣ်အုလီၤ. (ဖး ၁ မိၤၡ့ ၃:၁-၅ တက့ၢ်.) ခီဖျိလၢအဝဲမၤဝဲဒ်အံၤအဃိ အဝဲကဲထီၣ်ဝဲ စၤတၣ်မုၣ်ကီၤလံၢ်လၢအမ့ၢ် ကစၢ်ယွၤအဒုၣ်အဒါန့ၣ်လီၤ.
၇. (က) ဘၣ်မနုၤအဃိ နီၢ်အံၣ်အုဒီးစီၤအၤဒၣ်ဘၣ်သံဝဲလဲၣ်. (ခ) ဘၣ်မနုၤအဃိ ပသးပှၢ်ထီၣ်ဒီး ပဘၣ်သံလဲၣ်.
၇ နီၢ်အံၣ်အုဒီး စီၤအၤဒၣ် တဒိကနၣ်ကစၢ်ယွၤအကလုၢ် ဒီးအဝဲသ့ၣ် အီၣ်ဝဲသ့ၣ်သၣ်န့ၣ်လီၤ. (၁ မိၤၡ့ ၂:၁၇; ၃:၆) အဝဲသ့ၣ်မၤတၢ်ဒဲးဘး ဒီးလၢခံန့ၣ် ဒ်ယဟိဝၤယွၤတဲဝဲအသိး အဝဲသ့ၣ်ဘၣ်သံဝဲလီၤ. (၁ မိၤၡ့ ၃:၁၇-၁၉) လၢတၢ်န့ၣ်အဃိ နီၢ်အံၣ်အုဒီးစီၤအၤဒၣ်အဖိအလံၤတဖၣ်န့ၣ် မ့ၢ်ပှၤတၢ်ဒဲးဘးဖိဒီး သံဝဲလီၤ. (ဖး ရိမ့ၤ ၅:၁၂ တက့ၢ်.) နီၢ်အံၣ်အုဒီးစီၤအၤဒၣ်အဖိအလံၤတဖၣ်န့ၣ် ဟဲကဲထီၣ်ဝဲ ပှၤတၢ်ဒဲးဘးဖိလၢ ကျဲဒ်လဲၣ်န့ၣ် ပကဆိကမိၣ်ကွၢ်သကိးတၢ်အဒိတခါလီၤ. ဖဲပှၤဘၢကိၣ်လၢ သပၢၤလၢအိၣ်ဒီး အလီၤဆၢၣ်အခါ ကိၣ်န့ၣ်ကလီၤဆၢၣ်ဝဲခဲလၢာ်န့ၣ်လီၤ. ဒ်န့ၣ်အသိး ဖဲစီၤအၤဒၣ်တဒိကနၣ်ကစၢ်ယွၤအကလုၢ်အခါ အဝဲကဲထီၣ်ပှၤတၢ်ဒဲးဘးဖိလီၤ. ခီဖျိလၢပမ့ၢ်စီၤအၤဒၣ်အဖိအလံၤအဃိ ပဝဲစ့ၢ်ကီး ပဒိးန့ၢ်ဘၣ်တၢ်ဒဲးဘးလၢ အလီၤဂာ်ဒ် “တၢ်အလီၤဆၢၣ်” အသိးန့ၣ်လီၤ. ပဝဲသ့ၣ်တဖၣ်န့ၣ် ပမ့ၢ်ပှၤတၢ်ဒဲးဘးဖိအဃိ ပသးပှၢ်ထီၣ်ဒီး ပဘၣ်သံလီၤ.—ရိမ့ၤ ၃:၂၃; ကွၢ်တၢ်ဂ့ၢ် ၉ လၢလံာ်အကတၢၢ်တက့ၢ်.
၈, ၉. (က) မုၣ်ကီၤလံၢ်အဲၣ်ဒိးလၢ နီၢ်အံၣ်အုဒီးစီၤအၤဒၣ် ကနာ်တၢ်မနုၤလဲၣ်. (ခ) ဘၣ်မနုၤအဃိ ကစၢ်ယွၤတမၤသံပှၤပူထီၣ်တၢ်တဘျီဃီလဲၣ်.
၈ မုၣ်ကီၤလံၢ် အတၢ်ထီဒါယဟိဝၤယွၤန့ၣ် စးထီၣ်အသးဖဲ အဝဲလ့ပစီဝဲနီၢ်အံၣ်အုဒီး စီၤအၤဒၣ်ဒ်သိး အဝဲသ့ၣ်တဒိကနၣ်လၢၤ ကစၢ်ယွၤအကလုၢ် အဆၢကတီၢ်န့ၣ်လီၤ. မုၣ်ကီၤလံၢ် အဲၣ်ဒိးဒုးနာ်န့ၢ်အဝဲသ့ၣ်လၢ ယဟိဝၤယွၤမ့ၢ်ပှၤလၢအလီတၢ်, ပှၤပၢတၢ်တဂၤလၢအတဂ့ၤတဘၣ်ဒီး ကစၢ်တအဲၣ်ဒိးလၢအဝဲသ့ၣ် ဒိးန့ၢ်ဘၣ်တၢ်အိၣ်မူလၢ အဂ့ၤကတၢၢ်ဘၣ်. မုၣ်ကီၤလံၢ်တဲဘၣ်ပှၤဟီၣ်ခိၣ်ဖိလၢ အဝဲသ့ၣ်တလိၣ်ဘၣ် ကစၢ်ယွၤအတၢ်ဟံးစုနဲၣ်ကျဲဘၣ်. ဒီးတၢ်အဘၣ်ဒီးတၢ်အကမၣ်န့ၣ် နီၢ်အံၣ်အုဒီးစီၤအၤဒၣ် ပာ်ပနီၣ်ဝဲလၢအနီၢ်ကစၢ်သ့ဝဲလီၤ. လၢတၢ်န့ၣ်အဃိ ကစၢ်ယွၤကမၤဝဲဒ်လဲၣ်. အဝဲမ့ၢ်မၤသံပှၤလၢအပူထီၣ်တၢ်တဖၣ် တဘျီဃီန့ၣ်သ့ဝဲလီၤ. ဘၣ်ဆၣ် အဝဲမ့ၢ်မၤသံဝဲတဘျီဃီန့ၣ် အဝဲပာ်ဖျါထီၣ်လၢမုၣ်ကီၤလံၢ်မ့ၢ် ပှၤလီတၢ်ဖိကသ့ဧါ. တသ့ဘၣ်.
၉ ကစၢ်ယွၤတမၤသံဝဲ ပှၤပူထီၣ်တၢ်တဘျီဃီဘၣ်. လၢတၢ်န့ၣ်အလီၢ် အဝဲဟ့ၣ်အခွဲးလၢပှၤဟီၣ်ခိၣ်ဖိတဖၣ် ကပၢလီၤအသးဒၣ်ဝဲန့ၣ်လီၤ. အဝဲမၤဝဲဒ်အံၤအဃိ တၢ်စံးဆၢကဖျါထီၣ်လၢ မုၣ်ကီၤလံၢ်မ့ၢ်ပှၤလီတၢ် ဒီးကစၢ်ယွၤမ့ၢ်ပှၤလၢအသ့ၣ်ညါ တၢ်အဂ့ၤကတၢၢ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်လီၤ. ပကမၤလိအါထီၣ်တၢ်ဂ့ၢ်တခါအံၤ လၢတၢ်မၤလိ ၁၁ အပူၤလီၤ. ဘၣ်ဃးဒီးနီၢ်အံၣ်အုဒီး စီၤအၤဒၣ်အတၢ်ဆၢတဲာ်န့ၣ် နဆိကမိၣ်ဒ်လဲၣ်. မ့ၢ်အဝဲသ့ၣ်ကြၢးနာ်မုၣ်ကီၤလံၢ် ဒီးတကြၢးဒိကနၣ် ကစၢ်ယွၤအကလုၢ်ဘၣ်ဧါ. တၢ်လၢအိၣ်ဒီးနီၢ်အံၣ်အု ဒီးစီၤအၤဒၣ်ခဲလၢာ်န့ၣ် ယဟိဝၤယွၤဟ့ၣ်လီၤအဝဲသ့ၣ်လီၤ. ကစၢ်ဟ့ၣ်အဝဲသ့ၣ် တၢ်အိၣ်မူလၢအလၢအပှဲၤ, ကရၢၢ်ဃံလၤလၢ ကအိၣ်ဝဲလၢအပူၤ ဒီးတၢ်ဖံးတၢ်မၤလၢ အလီၤသူၣ်မံသးမုာ်လီၤ. ဘၣ်ဆၣ် မုၣ်ကီၤလံၢ်န့ၣ် တမၤတၢ်လၢအကဲဘျုးလၢအဝဲသ့ၣ်အဂီၢ် နီတဘျီဘၣ်. နမ့ၢ်အိၣ်ဘၣ်ဖဲန့ၣ်န့ၣ် နကမၤဒ်လဲၣ်.
၁၀. မ့ၢ်ပအိၣ်ဒီးတၢ်ဃုထၢလၢ အရ့ဒိၣ်ဒ်လဲၣ်တကလုာ်လဲၣ်.
၁၀ မုၢ်မဆါတနံၤအံၤ ပအိၣ်ဒီးတၢ်ဃုထၢ ဒ်သိးဒီးနီၢ်အံၣ်အု ဒီးစီၤအၤဒၣ်န့ၣ်လီၤ. ဒီးပတၢ်အိၣ်မူန့ၣ်ဒိးသန့ၤထီၣ်အသးလၢ ပတၢ်ဃုထၢအဖီခိၣ်န့ၣ်လီၤ. ပဃုထၢ ကစၢ်ယွၤဒ်ပတၢ်ပၢကစၢ်အသိး, ဒိကနၣ်အကလုၢ်, ဒီးပာ်ဖျါထီၣ်လၢ မုၣ်ကီၤလံၢ်မ့ၢ်ပှၤလၢအလံၣ်တၢ်လီတၢ်န့ၣ် သ့ဝဲလီၤ. ဘၣ်ဆၣ်ဒီး ပမ့ၢ်အဲၣ်ဒိးဃုထၢမုၣ်ကီၤလံၢ် ဒ်ပတၢ်ပၢကစၢ်အသိးန့ၣ် သ့ဝဲစ့ၢ်ကီးလီၤ. (စံးထီၣ်ပတြၢၤ ၇၃:၂၈; ဖး ကတိၤဒိ ၂၇:၁၁ တက့ၢ်.) ပှၤဟီၣ်ခိၣ်ဖိလၢ အဒိကနၣ်ကစၢ်ယွၤအကလုၢ်န့ၣ် အိၣ်ထဲစှၤဂၤလီၤ. အနီၢ်ကီၢ်န့ၣ် ကစၢ်ယွၤတမ့ၢ်ပှၤလၢ အပၢဟီၣ်ခိၣ်ဘၣ်. ဘၣ်ဆၣ် အဝဲမ့တမ့ၢ်ပှၤပၢဟီၣ်ခိၣ်န့ၣ် ကမ့ၢ်မတၤတဂၤပၢဝဲလဲၣ်.
မတၤတဂၤပၢ ဟီၣ်ခိၣ်လဲၣ်
ဟီၣ်ခိၣ်အဘီမုၢ်တဖၣ် မ့တမ့ၢ် မုၣ်ကီၤလံၢ်အတၢ်န့ၣ် အဝဲဟ့ၣ်လီၤယ့ၣ်ၡူးကသ့ဧါ
၁၁, ၁၂. (က) ပမ့ၢ်ဆိကမိၣ်ထံမုၣ်ကီၤလံၢ်အတၢ်ကွဲန့ၢ်လွဲန့ၢ် ယ့ၣ်ၡူးန့ၣ် ပကသ့ၣ်ညါဘၣ်တၢ်မနုၤလဲၣ်. (ခ) လံာ်စီဆှံအဆၢမနုၤတဖၣ် ပာ်ဖျါထီၣ်ဝဲလၢ မုၣ်ကီၤလံၢ်မ့ၢ်ပှၤလၢအပၢဟီၣ်ခိၣ်လဲၣ်.
၁၁ မတၤပၢဟီၣ်ခိၣ်လဲၣ်န့ၣ် ယ့ၣ်ၡူးသ့ၣ်ညါဝဲလီၤတံၢ်လီၤဆဲးလီၤ. ဘၣ်တဘျီန့ၣ် မုၣ်ကီၤလံၢ် “ဒုးနဲၣ်အီၤလၢ ကယဲၢ်ဘီဧိၤမုၢ်ဧိၤလၢဟီၣ်ခိၣ်ချၢ, ဒီးအလၤကပီၤ” န့ၣ်လီၤ. ဒီးမုၣ်ကီၤလံၢ်အၢၣ်လီၤအီလီၤယ့ၣ်ၡူးလၢ– “နမ့ၢ်တီၤလီၤကဒွံကျိာ်ဒီး ဘူၣ်ထီၣ်ဘါထီၣ်ယၤဒီး, ယကဟ့ၣ်လီၤနၤလၢ ကယဲၢ်တၢ်န့ၣ်တဖၣ် ခဲလၢာ်လီၤ.” (မးသဲ ၄:၈, ၉; လူၤကၣ် ၄:၅, ၆) သံကွၢ်လီၤက့ၤနသးလၢ ‘ဘီမုၢ်သ့ၣ်တဖၣ်အံၤ မ့တမ့ၢ်မုၣ်ကီၤလံၢ်အတၢ်န့ၣ် အဝဲတဲဝဲယ့ၣ်ၡူးဒ်အံၤကသ့ဧါ.’ တသ့ဘၣ်. ဟီၣ်ခိၣ်အတၢ်ပၢတၢ်ပြးခဲလၢာ်န့ၣ် အိၣ်လၢမုၣ်ကီၤလံၢ်အစုပူၤလီၤ.
၁၂ ဘၣ်သ့ၣ်သ့ၣ် နကဆိကမိၣ်ဘၣ်လၢ– ‘မုၣ်ကီၤလံၢ်ကဲထီၣ် ပှၤပၢဟီၣ်ခိၣ်အံၤ ကသ့ဒ်လဲၣ်. သ့တၢ်လၢာ်ကစၢ်ယဟိဝၤယွၤ မ့ၢ်ပှၤလၢအတ့လီၤတၢ်ခဲလၢာ် တမ့ၢ်ဘၣ်ဧါ.’ (လီၣ်ဖျါ ၄:၁၁) ဘၣ်ဆၣ် ယ့ၣ်ၡူးခရံာ်ကိးဝဲမုၣ်ကီၤလံၢ်လၢ “ဟီၣ်ခိၣ်အခိၣ်” န့ၣ်လီၤ. (ယိၤဟၣ် ၁၂:၃၁; ၁၄:၃၀; ၁၆:၁၁) တၢ်မၢဖိပီလူးစ့ၢ်ကီး ကိးဝဲမုၣ်ကီၤလံၢ်လၢ “ဟီၣ်ခိၣ်အကစၢ်” လီၤ. (၂ ကရံၣ်သူး ၄:၃, ၄) ဒီးတၢ်မၢဖိယိၤဟၣ် ကွဲးဝဲလၢ “ဟီၣ်ခိၣ်ခဲလၢာ်မံလီၤဝဲလၢ တၢ်အၢတၢ်သီတဂၤန့ၣ်အပူၤလီၤ.”—၁ ယိၤဟၣ် ၅:၁၉.
မုၣ်ကီၤလံၢ်အတၢ်ရဲၣ်တၢ်ကျဲၤ ကဘၣ်တၢ်မၤဟးဂီၤကွံာ်အီၤဒ်လဲၣ်
၁၃. ဘၣ်မနုၤအဃိ ပလိၣ်ဘၣ်တၢ်ရဲၣ်တၢ်ကျဲၤလၢအသီလဲၣ်.
၁၃ ဟီၣ်ခိၣ်အတၢ်အိၣ်သးတဖၣ်န့ၣ် ဒံးယံာ်ဒံးနးထီၣ်ဝဲလီၤ. ပထံၣ်ဘၣ်တၢ်ဒုးတၢ်ယၤ, တၢ်တတီတလိၤ, ပှၤပာ်မၤအသး ဒီးပှၤမၤဆူၣ်မၤစိးတၢ်တဖၣ်န့ၣ်လီၤ. ပှၤဟီၣ်ခိၣ်ဖိတဖၣ် ဂုာ်ကျဲးစၢးမၤလီၤမၢ်ကွံာ်ဝဲ တၢ်ကီတၢ်ခဲတဖၣ်အံၤဘၣ်ဆၣ် မၤဝဲတန့ၢ်ဘၣ်. ဒီးတယံာ်လၢၤဘၣ်န့ၣ် ကစၢ်ယွၤကမၤလီၤမၢ်ကွံာ်ဝဲ မုၣ်ကီၤလံၢ်အတၢ်ရဲၣ်တၢ်ကျဲၤလၢအအၢအသီအံၤဖဲ အၢ်မက့းဒိၣ်တၢ်ဒုး အဆၢကတီၢ်န့ၣ်လီၤ. ဒီးအဝဲကဒုးအိၣ်ထီၣ်ဝဲ တၢ်ရဲၣ်တၢ်ကျဲၤအသီ လၢအပှဲၤဒီးတၢ်တီတၢ်လိၤန့ၣ်လီၤ.—လီၣ်ဖျါ ၁၆:၁၄-၁၆; ကွၢ်တၢ်ဂ့ၢ် ၁၀ လၢလံာ်အကတၢၢ်တက့ၢ်.
၁၄. ကစၢ်ယွၤဃုထၢထီၣ်မတၤတဂၤလၢ ကကဲထီၣ်စီၤပၤလၢ အဘီအမုၢ်အပူၤလဲၣ်. ဘၣ်ဃးဒီးယ့ၣ်ၡူးအဂ့ၢ်န့ၣ် လံာ်စီဆှံတဲဆိပာ်ဝဲဒ်လဲၣ်.
၁၄ ယဟိဝၤယွၤအိၣ်ဒီး တၢ်ပၢတၢ်ပြးတခါလၢမူခိၣ်ဒီး ဘၣ်တၢ်ကိးအီၤလၢ ယွၤအဘီအမုၢ်လီၤ. အဝဲဃုထၢထီၣ်ယ့ၣ်ၡူးခရံာ် ဒ်စီၤပၤတဂၤအသိးလၢ အကပၢတၢ်လၢဘီမုၢ်အံၤအပူၤန့ၣ်လီၤ. ပူၤကွံာ်အနံၣ်လၢအကထိတဖၣ်န့ၣ် လံာ်စီဆှံတဲဆိပာ်ဝဲလၢ ယ့ၣ်ၡူးကပၢတၢ်ဒ် “တၢ်ဃူတၢ်ဖိး အပဒိၣ်ဖးဒိၣ်” အသိး ဒီးအတၢ်ပၢတၢ်ပြးန့ၣ် ကအိၣ်ဝဲ လီၤထူလီၤယိာ်လီၤ. (ယၡါယၤ ၉:၆, ၇) ယ့ၣ်ၡူး သိၣ်လိဝဲ အပျဲၢ်အဘီၣ်တဖၣ်လၢ အဝဲသ့ၣ်ကဃ့ဝဲဘၣ်ဃးဒီး တၢ်ပၢတၢ်ပြးအံၤ ဖဲအဝဲစံးဝဲလၢ “နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီးဖဲဒၣ်နသးတက့ၢ်.” (မးသဲ ၆:၉, ၁၀) လၢတၢ်မၤလိ ၈ အပူၤန့ၣ် ပကမၤလိဘၣ်လၢ ကစၢ်ယွၤအဘီအမုၢ် ကမၤဟါမၢ်ကွံာ်ဝဲ ဟီၣ်ခိၣ်အတၢ်ပၢတၢ်ပြးတဖၣ်အဂ့ၢ်လီၤ. (ဖး ဒၤနံးယ့လး ၂:၄၄ တက့ၢ်.) ဒီးဘီမုၢ်အံၤကပၢက့ၤဟီၣ်ခိၣ် ဒီးကမၤကဲထီၣ်က့ၤအီၤလၢပၤရဒံစူးန့ၣ်လီၤ.—ကွၢ်တၢ်ဂ့ၢ် ၁၁ လၢလံာ်အကတၢၢ်တက့ၢ်.
ကစၢ်ယွၤ အတၢ်ရဲၣ်တၢ်ကျဲၤလၢအသီအံၤ ဘူးထီၣ်လံ
၁၅. “ဟီၣ်ခိၣ်အသီ” န့ၣ်အဲၣ်ဒိးစံးဝဲတၢ်မနုၤလဲၣ်.
၁၅ လံာ်စီဆှံ ပာ်ဖျါထီၣ်ဝဲလၢ– “ပကွၢ်လၢ်မူခိၣ်အသီ, ဒီးဟီၣ်ခိၣ်အသီ,” ဒီး “ဖဲတၢ်တီတၢ်လိၤ အိၣ်ဝဲဆိးဝဲလၢအပူၤန့ၣ်လီၤ.” (၂ ပ့းတရူး ၃:၁၃; ယၡါယၤ ၆၅:၁၇) တဘျီတခီၣ် လံာ်စီဆှံပာ်ဖျါထီၣ်ဝဲ တၢ်ကတိၤလၢအမ့ၢ် “ဟီၣ်ခိၣ်” န့ၣ်အဲၣ်ဒိးစံးဝဲလၢ ပှၤဟီၣ်ခိၣ်ဖိတဖၣ်န့ၣ်လီၤ. (၁ မိၤၡ့ ၁၁:၁) လၢတၢ်န့ၣ်အဃိ “ဟီၣ်ခိၣ်အသီ” လၢအပှဲၤဒီး တၢ်တီတၢ်လိၤန့ၣ် အဲၣ်ဒိးစံးဝဲလၢ ပှၤဟီၣ်ခိၣ်ဖိလၢ အဒိကနၣ် ယွၤအကလုၢ် ကိးဂၤဒဲးလီၤ. ပှၤသ့ၣ်တဖၣ်အံၤ ဒိးန့ၢ်ဘၣ် တၢ်ဆိၣ်ဂ့ၤလၢ ယွၤအအိၣ်န့ၣ်လီၤ.
၁၆. ပှၤလၢအိၣ်မူဘၣ်လၢတၢ်ရဲၣ်တၢ်ကျဲၤအသီအဖီလာ်န့ၣ် ကစၢ်ယွၤကဟ့ၣ်အဝဲသ့ၣ်တၢ်ဟ့ၣ်လၢ အကမၤသးခုအီၤဒ်လဲၣ်တကလုာ်လဲၣ်, ဒီးဒ်သိးပကဒိးန့ၢ်ဘၣ်တၢ်ဟ့ၣ်တခါအံၤအဂီၢ် ပကဘၣ်မၤတၢ်မနုၤလဲၣ်.
၁၆ ယ့ၣ်ၡူးအၢၣ်လီၤဝဲလၢ ဖဲကစၢ်ယွၤအတၢ်ရဲၣ်တၢ်ကျဲၤ လၢအသီအဖီလာ်န့ၣ် ပှၤကဒိးန့ၢ်ဘၣ် “တၢ်မူအထူအယိာ်” န့ၣ်လီၤ. (မၢ်ကူး ၁၀:၃၀) ဒ်သိးပကဒိးန့ၢ်ဘၣ်တၢ်ဟ့ၣ်တခါအံၤအဂီၢ် ပကဘၣ်မၤတၢ်မနုၤလဲၣ်. ဖး ယိၤဟၣ် ၃:၁၆ ဒီး ၁၇:၃ လၢနကထံၣ်ဘၣ် တၢ်စံးဆၢအဂီၢ်တက့ၢ်. ဖဲပအိၣ်မူဘၣ်လၢ ပၤရဒံစူးအဆၢကတီၢ် ပတၢ်အိၣ်မူကမၤအသးဒ်လဲၣ်န့ၣ် လံာ်စီဆှံပာ်ဖျါထီၣ်န့ၢ်ပှၤလီၤ.
၁၇, ၁၈. တၢ်ဃူတၢ်ဖိးကအိၣ်လၢဟီၣ်ခိၣ်ဒီဘ့ၣ် ဒီးပကအိၣ်ဘၣ်ဘံၣ်ဘံၣ်ဘၢဘၢန့ၣ် ပသ့ၣ်ညါဘၣ်ဒ်လဲၣ်.
၁၇ တၢ်အၢတၢ်သီ, တၢ်ဒုးတၢ်ယၤ ဒီးတၢ်မၤဆူၣ်မၤစိး တအိၣ်လၢၤဘၣ်. ပှၤအၢပှၤသီတဖၣ် တအိၣ်တ့ၢ်လၢ ဟီၣ်ခိၣ်ချၢ နီတဂၤလၢၤဘၣ်. (စံးထီၣ်ပတြၢၤ ၃၇:၁၀, ၁၁) ကစၢ်ယွၤက “ဒုးအိၣ်ကတီၢ် တၢ်ဒုးတၢ်ယၤတဖၣ် တုၤလၢဟီၣ်ခိၣ်အကတၢၢ်လီၤ.” (စံးထီၣ်ပတြၢၤ ၄၆:၉; ယၡါယၤ ၂:၄) ဟီၣ်ခိၣ်ကပှဲၤဒီး ပှၤဟီၣ်ခိၣ်ဖိလၢ အအဲၣ်ကစၢ်ယွၤ ဒီးဒိကနၣ်အကလုၢ်န့ၣ်လီၤ. ဒီးတၢ်ဃူတၢ်ဖိးကအိၣ်ဝဲ လီၤထူလီၤယိာ်လီၤ.—စံးထီၣ်ပတြၢၤ ၇၂:၇.
၁၈ ယဟိဝၤယွၤ အပှၤဂီၢ်မုၢ်တဖၣ် ကအိၣ်ဘၣ်ဘံၣ်ဘံၣ်ဘၢဘၢန့ၣ်လီၤ. လၢပျၢၤန့ၣ် ဖဲပှၤအံၣ်စရ့လးဖိတဖၣ် ဒိကနၣ်ကစၢ်ယွၤ အကလုၢ်အဆၢကတီၢ် အဝဲသ့ၣ်အိၣ်ဘၣ်ဝဲ ဘံၣ်ဘံၣ်ဘၢဘၢခီဖျိလၢ ကစၢ်ယွၤဒီသဒၢအဝဲသ့ၣ်အဃိလီၤ. (၃ မိၤၡ့ ၂၅:၁၈, ၁၉) လၢပၤရဒံစူးအပူၤန့ၣ် ပတလိၣ်ပျံၤတၢ် နီတမံၤလၢၤဘၣ်. ပကအိၣ်ဒီး တၢ်ဘံၣ်တၢ်ဘၢထီဘိလီၤ.—ဖး ယၡါယၤ ၃၂:၁၈; မံကၤ ၄:၄ တက့ၢ်.
၁၉. ဘၣ်မနုၤအဃိပနာ်သ့လၢ တၢ်အီၣ်တၢ်အီတဖၣ် ကအိၣ်လၢလၢပှဲၤပှဲၤလၢဟီၣ်ခိၣ်ပၤရဒံစူးအပူၤလဲၣ်.
၁၉ တၢ်အီၣ်တၢ်အီတဖၣ် ကအိၣ်လၢလၢပှဲၤပှဲၤလီၤ. “ဘုတစှီၤ ကအိၣ်လၢဟီၣ်ခိၣ်အပူၤလၢကစၢၢ်ခိၣ်” လီၤ. (စံးထီၣ်ပတြၢၤ ၇၂:၁၆) ဖဲန့ၣ်အဆၢကတီၢ် ပတဲသ့လၢယဟိဝၤယွၤ “ပကစၢ် ဆိၣ်ဂ့ၤတ့ၢ်လံပှၤလံ” ဒီး “ဟီၣ်ခိၣ်ဟ့ၣ်ထီၣ်လံ အတၢ်အါထီၣ်” န့ၣ်လီၤ.—စံးထီၣ်ပတြၢၤ ၆၇:၆, ခ့ခါစှီၤကျိာ်.
၂၀. ဟီၣ်ခိၣ်ကကဲထီၣ်ပၤရဒံစူးန့ၣ် ပသ့ၣ်ညါဘၣ်ဒ်လဲၣ်.
၂၀ ဟီၣ်ခိၣ်ဒီဘ့ၣ် ကကဲထီၣ် ပၤရဒံစူးလီၤ. ပှၤဟီၣ်ခိၣ်ဖိတဖၣ် ကအိၣ်ဒီးအဟံၣ်အဃီ ဃုာ်ဒီးကရၢၢ်လၢ အဃံအလၤလီၤ. (ဖး ယၡါယၤ ၆၅:၂၁-၂၄; လီၣ်ဖျါ ၁၁:၁၈ တက့ၢ်.) ဟီၣ်ခိၣ်ဒီဘ့ၣ် ကကဲထီၣ်ကရၢၢ်လၢ အဃံအလၤ ဒ်ဧ့ၤဒ့ၣ်တၤသၣ်လီၢ်လၢညါ အသိးန့ၣ်လီၤ. ထီဘိန့ၣ် ယဟိဝၤယွၤကဟ့ၣ်ပှၤ တၢ်လၢပလိၣ်ဘၣ်တဖၣ်လီၤ. လံာ်စီဆှံစံးဝဲ ကစၢ်ယွၤ ‘သလၣ်ထီၣ်အစု, ဒီးကယဲၢ်တၢ်သးအဆၢတၢ်န့ၣ် ဟ့ၣ်ဝဲလီၤ.’—စံးထီၣ်ပတြၢၤ ၁၄၅:၁၆.
၂၁. တၢ်ဃူတၢ်ဖိးကအိၣ်လၢ ပှၤဟီၣ်ခိၣ်ဖိဒီးဆၣ်ဖိကီၢ်ဖိ အဘၢၣ်စၢၤန့ၣ်ပသ့ၣ်ညါဘၣ်ဒ်လဲၣ်.
၂၁ တၢ်ဃူတၢ်ဖိးကအိၣ်လၢ ပှၤဟီၣ်ခိၣ်ဖိဒီးဆၣ်ဖိကီၢ်ဖိအဘၢၣ်စၢၤလီၤ. ဆၣ်ဖိကီၢ်ဖိတဖၣ် တမၤဘၣ်ဒိ ပှၤဟီၣ်ခိၣ်ဖိလၢၤဘၣ်. ဆၣ်ဖိကီၢ်ဖိ အအၢအသီလၢ မုၢ်မဆါတနံၤအံၤန့ၣ် ပှၤဖိသၣ်တဖၣ် တလိၣ်ပျံၤအဝဲသ့ၣ်လၢၤဘၣ်.—ဖး ယၡါယၤ ၁၁:၆-၉; ၆၅:၂၅ တက့ၢ်.
၂၂. ယ့ၣ်ၡူးကမၤတၢ်မနုၤလၢ ပှၤဆူးပှၤဆါတဖၣ်အဂီၢ်လဲၣ်.
၂၂ ပှၤတဆူးတဆါ နီတဂၤလၢၤဘၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအဆၢကတီၢ် အဝဲမၤဘျါက့ၤ ပှၤဆူးပှၤဆါအါဂၤလီၤ. (မးသဲ ၉:၃၅; မၢ်ကူး ၁:၄၀-၄၂; ယိၤဟၣ် ၅:၅-၉) ဘၣ်ဆၣ် ဒ်အဝဲမ့ၢ်စီၤပၤလၢ ယွၤအဘီအမုၢ်အပူၤအသိး အဝဲကမၤဘျါက့ၤ ပှၤဆူးပှၤဆါကိးဂၤဒဲးလီၤ. ဖဲန့ၣ်အဆၢကတီၢ် ပှၤဟီၣ်ခိၣ်ဖိတဖၣ် တစံး “ယမၤတကဲဘၣ်န့ၣ်ဘၣ်.”—ယၡါယၤ ၃၃:၂၄; ၃၅:၅, ၆.
၂၃. ကစၢ်ယွၤကမၤတၢ်မနုၤလၢ ပှၤသံတ့ၢ်တဖၣ်အဂီၢ်လဲၣ်.
၂၃ ပှၤသံတဖၣ် ကသမူထီၣ်က့ၤလီၤ. ကစၢ်ယွၤအၢၣ်လီၤဝဲလၢ အဝဲကမၤသမူထီၣ်က့ၤ ပှၤသံတ့ၢ်လၢ အကကွဲၢ်တဖၣ်န့ၣ်လီၤ. လံာ်စီဆှံစံးဝဲလၢ “ပှၤသံအတီမ့ၢ်ဂ့ၤ, တတီဘၣ်မ့ၢ်ဂ့ၤ, ကဂဲၤဆၢထၢၣ်က့ၤလီၤ.”—ဖး ယိၤဟၣ် ၅:၂၈, ၂၉ တက့ၢ်; မၤတၢ် ၂၄:၁၅.
၂၄. ဘၣ်ဃးဒီးတၢ်အိၣ်မူလၢ ပၤရဒံစူးအပူၤန့ၣ် နတူၢ်ဘၣ်ဒ်လဲၣ်.
၂၄ ပဝဲကိးဂၤဒဲးန့ၣ် ပအိၣ်ဒီးတၢ်ဃုထၢလီၤ. ပဃုထၢလၢ ပကမၤလိအါထီၣ် ယဟိဝၤယွၤအဂ့ၢ် ဒီးမၤတၢ်ဘၣ်အသး သ့ဝဲလီၤ. မ့တမ့ၢ်ဘၣ်န့ၣ် ပဃုထၢလၢ ပကမၤထွဲပနီၢ်ကစၢ်အတၢ်ဘၣ်သး သ့စ့ၢ်ကီးလီၤ. ပမ့ၢ်ဃုထၢလၢ ပကမၤကစၢ်ယွၤအတၢ်ဘၣ်သးန့ၣ် ခါဆူညါပကအိၣ်ဒီးတၢ်အိၣ်မူလၢ အဂ့ၤကတၢၢ်န့ၣ်လီၤ. ဖဲပိာ်ခွါတဂၤတဲဘၣ်ယ့ၣ်ၡူးလၢ သ့ၣ်နီၣ်ထီၣ်က့ၤယၤဖဲယသံဝံၤအဆၢကတီၢ်န့ၣ် ယ့ၣ်ၡူးအၢၣ်လီၤအီၤလၢ– “နကအိၣ်ဒီးယၤလၢ ပၤရဒံစူးအပူၤလီၤ.” (လူၤကၣ် ၂၃:၄၃) တၢ်မၤလိလၢခံတခါန့ၣ် ပကမၤလိအါထီၣ် ယ့ၣ်ၡူးအဂ့ၢ်အကျိၤ ဒီးအဝဲကမၤလၢထီၣ်ပှဲၤထီၣ် ကစၢ်ယွၤအတၢ်တိာ်ပာ် ဒ်လဲၣ်အဂ့ၢ်န့ၣ်လီၤ.