ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါဒံၣ်စ့ဘၢၣ် ၇-၁၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၁၀-၁၁
“အဲၣ်ယဟိဝၤယွၤ အါန့ၢ်နအဲၣ်နဟံၣ်ဖိဃီဖိ”
(၃ မိၤၡ့ ၁၀:၁, ၂) ဒီးစီၤအၤဟရိၣ်အဖိခွါစီၤနၤဒး, ဒီးစီၤအဘံဟူၤဟံးန့ၢ်သပၢၤမ့ၣ်အူ, တဂၤတဖျၢၣ်တဂၤဖျၢၣ်, ဒီးပာ်မ့ၣ်အူလၢအပူၤ, ဒီးပာ်တၢ်နၢမူဆိၣ်ကဲၤလၢအဖီခိၣ်, ဒီးမၤဘူၣ်ယွၤလၢမ့ၣ်အူလီၤဆီဒၣ်တၢ်လၢ အတမၤလိာ်အီၤဘၣ်, ၂ ဒီးမ့ၣ်အူဟဲထီၣ်လၢယွၤအအိၣ်, ဒီးအီၣ်ကွံာ်အီၤ, ဒီးသံဝဲလၢယွၤအမဲာ်ညါလီၤ.
it-1 ၁၁၇၄
တမၤလိာ်
မ့ၣ်အူဒီး တၢ်နၢမူလၢ တဘၣ်တၢ်မၤလိာ်. ၃ မိၤၡ့ ၁၀:၁ အပူၤ ဧ့ၤဘြံၤ အတၢ်ကတိၤလၢ “မ့ၣ်အူလီၤဆီဒၣ်တၢ်လၢအတမၤလိာ်အီၤဘၣ်” အဂီၢ် ဘၣ်တၢ်သူဝဲ စၤ zar (feminine, za·rahꞋ; အခီပညီလိၤလိၤ, လီၤဆီ) န့ၣ်လီၤ. စီၤအၤဟရိၣ်အဖိခွါစီၤနၤဒး ဒီးစီၤအဘံဟူၤန့ၣ် လုၢ်ထီၣ်ဝဲ မ့ၣ်အူအဝဲန့ၣ် ဆူယဟိဝၤယွၤအအိၣ်အဃိ ဘၣ်တၢ်မၤသံအဝဲသ့ၣ်လၢမ့ၣ်အူလီၤ. (၃ မိၤ. ၁၀:၂; ၄ မိၤ. ၃:၄; ၂၆:၆၁) တၢ်န့ၣ်အလီၢ်ခံ ယဟိဝၤယွၤ တဲဘၣ် စီၤအၤဟရိၣ်လၢ “ဒ်သိးသုသုတသံတဂ့ၤဒီး, တုၤသုလဲၤနုာ်လၢတၢ်အိၣ်ဖှိၣ်အဒဲပူၤဒီး, စပံးထံမ့ၢ်ဂ့ၤ, သံးမ့ၢ်ဂ့ၤ, နဲဒၣ်ဒီးနဖိခွါတဖၣ်န့ၣ်အီတဂ့ၤ, မ့ၢ်တၢ်အလုၢ်အလၢ်အထူအယိာ်လီၤလၢ သုစၢၤသုသွဲၣ်အစိၤစိၤအဃၣ်ဃၣ်လီၤ. ဒီးဒ်သိးသုကနီၤဖးတၢ်စီဆှံ, ဒီးတၢ်တစီဆှံဘၣ်အဆၢ, ဒီးတၢ်ကဆှီ, ဒီးတၢ်တကဆှီဘၣ်အဆၢ, ဒီးဒ်သိးသုကသိၣ်လိပှၤအံၣ်စရ့လးဖိလၢ ကယဲၢ်တၢ်မၤလိာ်လၢ ယွၤစံးဘၣ်အီၤလၢစီၤမိၤၡ့အစုပူၤန့ၣ်လီၤ.” (၃ မိၤ. ၁၀:၈-၁၁) ဖျါလၢ စီၤနၤဒး ဒီး စီၤအဘံဟူၤ မူၤသံးအဃိ လုၢ်ထီၣ်ဘၣ်ဝဲမ့ၢ်အူလၢ ယွၤတမၤလိာ်ဘၣ်န့ၣ်လီၤ. ဘၣ်သ့ၣ်သ့ၣ် ကမ့ၢ်လၢတၢ်ဆၢကတီၢ် မ့တမ့ၢ် တၢ်လီၢ် တကြၢးဝဲဘၣ်ဝဲလၢ ပှၤကလုၢ်ထီၣ်မ့ၣ်အူအဝဲန့ၣ်အဂီၢ်ဘၣ် ဒီးကမ့ၢ်လၢလုၢ်ထီၣ်တၢ် အကျိၤအကျဲကမၣ်ဝဲအဃိ မ့တမ့ၢ် တၢ်နၢမူန့ၣ် တဘၣ်တၢ်ကတဲာ်ကတီၤအီၤဒ် ၂ မိၤၡ့ ၃၀:၃၄, ၃၅ ပာ်ဖျါဝဲအသိးအဃိန့ၣ်လီၤ. ခီဖျိလၢ အဝဲသ့ၣ်မူၤသံးအဃိ ပှၤကတဲလၢ အတၢ်ကမၣ်တအိၣ်ဘၣ်န့ၣ် တသ့ဘၣ်.
(၃ မိၤၡ့ ၁၀:၄, ၅) ဒီးစီၤမိၤၡ့ကိးန့ၢ် စီၤအၤဟရိၣ်အဖါတံၢ် စီၤဧူးစံၤအ့လးအဖိခွါစီၤမံၡအ့လး, ဒီးစီၤအ့လံစၤဖၣ်, ဒီးစံးဘၣ်အီၤ, ဟဲဃီၤ, ဒီးစိာ်ကွံာ်သုဒီပုၢ်ဝဲၢ်လၢတၢ်အလီၢ်စီဆှံ အမဲာ်ညါဆူပှၤသူၣ်ဒဲအလီၢ်လၢခိန့ၣ်တက့ၢ်. ၅ ဒီးအဝဲသ့ၣ်သုးဘူးအသး, ဒီးစိာ်ထီၣ်ကွံာ်အီၤအိၣ်ဒီး အဆ့ဆူပှၤသူၣ်ဒဲအလီၢ်လၢခိ, ဒ်စီၤမိၤၡ့စံးဝဲအသိးန့ၣ်လီၤ.
(၃ မိၤၡ့ ၁၀:၆, ၇) ဒီးစီၤမိၤၡ့စံးဘၣ်စီၤအၤဟရိၣ်, ဒီးအဖိခွါစီၤအလၤဧစၢ်, ဒီးစီၤအံသမၢ်, မၤအိၣ်ဘ့ၣ်ခိၣ်သုခိၣ်တဂ့ၤ, ဖှီသုကူသုသိးတဂ့ၤ, ဒ်သိးသုသုတသံတဂ့ၤ, ဒီးဒ်သိးပှၤဂီၢ်မုၢ်အသုတဘၣ် တၢ်သးထီၣ်အီၤတဂ့ၤဒီး, မ်သုဒီပုၢ်ဝဲၢ်, ပှၤအံၣ်စရ့လးဖိဒီဟံၣ်ညါ ဟီၣ်တၢ်ယၢၤတၢ်လၢမ့ၣ်အူလၢယွၤဆိၣ်ကဲၤဝဲအဃိန့ၣ်တက့ၢ်. ၇ ဒီးဒ်သိးသုသုတသံတဂ့ၤဒီး, ဟးထီၣ်လၢတၢ်အိၣ်ဖှိၣ်အဒဲအကျဲစၢၤတဂ့ၤ. အဂ့ၢ်ဒ်အံၤ, ယွၤအသိဖှူတၢ်အိၣ်ဝဲလၢသုလိၤလီၤ. ဒီးမၤဝဲဒ်စီၤမိၤၡ့အတၢ်ကတိၤအသိးန့ၣ်လီၤ.
တၢး၁၁ ၇/၁၅ ၃၁ ¶၁၆
မ့ၢ်နလဲၤနုာ်လီၤလၢ ကစၢ်ယွၤ အတၢ်အိၣ်ဘှံးအပူၤလံဧါ
၁၆ စီၤမိၤၡ့ အဝဲၢ်ခွါ စီၤအၤဟရိၣ် ထံၣ်ဘၣ်ဒီး တၢ်အိၣ်သးလၢအကီခဲ ခီဖျိလၢ အဖိခွါခံဂၤအဃိလီၤ. အဖိခွါ စီၤနၤဒး ဒီးစီၤအဘံဟူၤန့ၣ် လုၢ်ထီၣ်ဝဲ မ့ၣ်အူလၢ ယဟိဝၤယွၤတမၤလိာ်ဘၣ်အဃိ ယွၤစံၣ်ညီၣ်သံအဝဲသ့ၣ်လီၤ. စီၤအၤဟရိၣ် တဲတၢ်ဒီး အဖိခွါလၢ အသံကွံာ်တဖၣ် တသ့လၢာ်ဘၣ်. တကးဒံးဘၣ် ယဟိဝၤယွၤ တဲဘၣ် စီၤအၤဟရိၣ် ဒီးအဖိခွါအဂၤလၢ အိၣ်ဒီးတၢ်သးတီတဖၣ်လၢ “မၤအိၣ်ဘ့ၣ်ခိၣ်သုခိၣ်တဂ့ၤ, ဖှီသုကူသုသိး [ဟီၣ်ယၢၤ]တဂ့ၤ, ဒ်သိးသုသုတသံတဂ့ၤ, ဒီးဒ်သိးပှၤဂီၢ်မုၢ်အသုတဘၣ် တၢ်သးထီၣ်အီၤတဂ့ၤ” လီၤ. (၃ မိၤ. ၁၀:၁-၆) ပမၤလိန့ၢ်ဘၣ်လၢ ပကဘၣ်အဲၣ် ယဟိဝၤယွၤ အါန့ၢ်ဒံး ပအဲၣ်ပဟံၣ်ဖိဃီဖိလၢ တအိၣ်ဒီးတၢ်သးတီတဖၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၃ မိၤၡ့ ၁၀:၈-၁၁) ဒီးယွၤကတိၤတၢ်ဒီးစီၤအၤဟရိၣ်, ဒီးစံးဝဲဒၣ်, ၉ ဒ်သိးသုသုတသံတဂ့ၤဒီး, တုၤသုလဲၤနုာ်လၢတၢ်အိၣ်ဖှိၣ်အဒဲပူၤဒီး, စပံးထံမ့ၢ်ဂ့ၤ, သံးမ့ၢ်ဂ့ၤ, နဲဒၣ်ဒီးနဖိခွါတဖၣ်န့ၣ်အီတဂ့ၤ, မ့ၢ်တၢ်အလုၢ်အလၢ်အထူအယိာ်လီၤလၢ သုစၢၤသုသွဲၣ်အစိၤစိၤအဃၣ်ဃၣ်လီၤ. ၁၀ ဒီးဒ်သိးသုကနီၤဖးတၢ်စီဆှံ, ဒီးတၢ်တစီဆှံဘၣ်အဆၢ, ဒီးတၢ်ကဆှီ, ဒီးတၢ်တကဆှီဘၣ်အဆၢ, ၁၁ ဒီးဒ်သိးသုကသိၣ်လိ ပှၤအံၣ်စရ့လးဖိလၢ ကယဲၢ်တၢ်မၤလိာ်လၢ ယွၤစံးဘၣ်အီၤလၢစီၤမိၤၡ့အစုပူၤန့ၣ်လီၤ.
တၢး၁၄ ၁၁/၁၅ ၁၇ ¶၁၈
ပကဘၣ်စီဆှံလၢ ပတၢ်ဖံးတၢ်မၤခဲလၢာ်အပူၤ
၁၈ ပကစီဆှံအဂီၢ် ပကဘၣ်ဖး ကစၢ်ယွၤအကလုၢ်ကထါ လီၤတံၢ်လီၤဆဲးဒီး မၤဒ်ကစၢ်ယွၤတဲပှၤအသိးလီၤ. ဆိကမိၣ်ကွၢ် စီၤနၤဒး ဒီးစီၤအဘံဟူၤန့ၣ် ဘၣ်သ့ၣ်သ့ၣ်ကမ့ၢ်လၢ မူၤသံးအဃိ လုၢ်ထီၣ်ဝဲ ‘မ့ၣ်အူလီၤဆီဒၣ်တၢ်လၢယွၤတမၤလိာ်အီၤဘၣ်’ လီၤ. အဃိ အဝဲသ့ၣ်ဘၣ်တၢ်စံၣ်ညီၣ်သံလီၤ. (၃ မိၤ. ၁၀: ၁, ၂) ပာ်သူၣ်ပာ်သး ကစၢ်ယွၤတဲ စီၤအၤဟရိၣ် တၢ်မနုၤလဲၣ်. (ဖး ၃ မိၤၡ့ ၁၀:၈-၁၁ တက့ၢ်.) လံာ်စီဆှံအဆၢတဖၣ်အံၤ အဲၣ်ဒိးတဲဝဲလၢ တချုးလၢ ပလဲၤထီၣ်တၢ်အိၣ်ဖှိၣ်ဒံးဘၣ်န့ၣ် ပတကြၢးအီ သံးတမံၤမံၤဘၣ်န့ၣ်ဧါ. ဆိကမိၣ်ကွၢ် တၢ်ဂ့ၢ်အံၤတက့ၢ်– ပဝဲသ့ၣ်န့ၣ် ပတအိၣ်လၢ စီၤမိၤၡ့ အတၢ်သိၣ်တၢ်သီအဖီလာ်လၢၤဘၣ်. (ရိ. ၁၀:၄) လၢထံကီၢ်တနီၤန့ၣ် ဒီပုၢ်ဝဲၢ်တနီၤ တချုးလဲၤထီၣ်တၢ်အိၣ်ဖှိၣ်ဒံးဘၣ် ဖဲအအီၣ်တၢ်အီၣ်အခါ အီဝဲသံးတမံၤမံၤ ဖဲအကြၢးန့ၣ်လီၤ. ပှၤယူဒၤဖိတဖၣ် အိၣ်ဒီးလုၢ်လၢ်လၢ ဖဲအမၤဝဲ ဘူၣ်လဲၤကပာ်အခါ ပၣ်ဃုာ်ဒီး စပံးထံ လွံၢ်ခွးလီၤ. ဖဲယ့ၣ်ၡူး မၤကစၢ်အတၢ်အီၣ်လၢဟါအီၣ်အခါ ဒုးအီဝဲ တၢ်မၢဖိတဖၣ်လၢ စပံးထံလၢ အဒိလီၤဝဲအသွံၣ်န့ၣ်လီၤ. (မး. ၂၆:၂၇) လံာ်စီဆှံ တြီဝဲ တၢ်အီမူၤသံး ဒီးတၢ်အီသံးအါတလၢန့ၣ်လီၤ. (၁ ကရံၣ်. ၆:၁၀; ၁ တံၤ. ၃:၈) ခရံာ်ဖိအါတက့ၢ်န့ၣ် အသးလၢအသ့ၣ်ညါဒၣ်တၢ် တဟ့ၣ်အီၤအခွဲးလၢ ကအီသံးတချုးလၢ အမၤဝဲတၢ်ဘူၣ်ထီၣ်ဘါထီၣ် အတၢ်မၤတမံၤမံၤအခါန့ၣ်ဘၣ်. ဘၣ်ဆၣ် ထံကီၢ်တဘ့ၣ်ဒီးတဘ့ၣ် အတၢ်အိၣ်သး ကလီၤဆီလိာ်အသးလီၤ. တၢ်လၢအရ့ဒိၣ်န့ၣ် ခရံာ်ဖိတဖၣ် ကဘၣ်နီၤဖးဝဲ “တၢ်စီဆှံ, ဒီးတၢ်တစီဆှံဘၣ်အဆၢ” န့ၣ်လီၤ. အဝဲသ့ၣ် မ့ၢ်မၤဝဲဒ်န့ၣ်န့ၣ် ကဒိးန့ၢ်ဘၣ် ကစၢ်ယွၤ အတၢ်ဘၣ်သးလီၤ.
(၃ မိၤၡ့ ၁၁:၇, ၈) အဝဲန့ၣ်တကဆှီဘၣ်လၢသုဂီၢ်ဘၣ်. အညၣ်န့ၣ်သုတအီၣ်တဂ့ၤ,
ဒီးအစိၣ်န့ၣ်သုတထိးတဂ့ၤ.
it-1 ၁၁၁ ¶၅
ဆၣ်ဖိကီၢ်ဖိတဖၣ်
တၢ်သိၣ်တၢ်သီ ဘၣ်ဃးဒီးတၢ်အီၣ်တၢ်အီန့ၣ် ဘၣ်ထွဲဒၣ်ထဲ ပှၤလၢအိၣ်လၢ စီၤမိၤၡ့ အတၢ်သိၣ်တၢ်သီအဖီလာ်တဖၣ်န့ၣ်လီၤ. တၢ်ကတိၤလၢ ၃ မိၤၡ့ ၁၁:၇ လၢအမ့ၢ် “တကဆှီဘၣ်လၢသုဂီၢ်ဘၣ်” န့ၣ်မ့ၢ်ဒၣ်ပှၤအံၣ်စရ့လးဖိတဖၣ်အဂီၢ်လီၤ. ခီဖျိလၢ ယ့ၣ်ၡူး အတၢ်ဟ့ၣ်လုၢ်ထီၣ်အဃိ တလိၣ်လၢပကဘၣ်မၤထွဲ စီၤမိၤၡ့ အတၢ်သိၣ်တၢ်သီလၢၤဘၣ်. တၢ်သိၣ်တၢ်သီတဖၣ်န့ၣ် ဘၣ်တၢ်ထုးကွံာ်အီၤလံအဃိ ပတဲသ့လၢ ပှၤခဲလၢာ်န့ၣ် တုၤလၢတၢ်သိၣ်တၢ်သီလၢ စီၤနိအၤဒိးန့ၢ်ဘၣ်ဝဲ ဖဲထံလုၢ်ဘၢတၢ်ဝံၤအလီၢ်ခံ အဖီလာ်န့ၣ်လီၤ.—ကလီၤ. ၂:၁၃-၁၇; ၁ မိၤ. ၉:၃, ၄.
တၢ်ဖးလံာ်စီဆှံ
တၢး၁၁ ၂/၁၅ ၁၂
စီၤမိၤၡ့ အတၢ်သးဒိၣ်ထီၣ် စီၤအလၤဧစၢ် ဒီးစီၤအံသမၢ် န့ၣ်ခုၣ်လီၤက့ၤဒ်လဲၣ်.
ပှၤလုၢ်တၢ်အဒိၣ် အတၢ်ရဲၣ်တၢ်ကျဲၤ ဘၣ်တၢ်ဒုးအိၣ်ထီၣ်အီၤဝံၤ တယံာ်ဘၣ်န့ၣ် စီၤအၤဟရိၣ် အဖိခွါ စီၤနၤဒး ဒီးစီၤအဘံဟူၤ ဟ့ၣ်လုၢ်ထီၣ်မ့ၣ်အူလၢ ယဟိဝၤယွၤတမၤလိာ်ဘၣ်အဃိ ယွၤစံၣ်ညီၣ်သံအဝဲသ့ၣ်လီၤ. (၃ မိၤ. ၁၀:၁, ၂) စီၤမိၤၡ့ ဟ့ၣ်လီၤအကလုၢ်လၢ စီၤအၤဟရိၣ်ဒီး အဖိခွါလၢ အအိၣ်တ့ၢ်တဖၣ်လၢ အသုတဟီၣ်လၢ အဝဲၢ်လၢအသံတဖၣ်အဃိတဂ့ၤန့ၣ်လီၤ. တယံာ်ဘၣ်ဒီး စီၤအလၤဧစၢ်ဒီး စီၤအံသမၢ်န့ၣ် တအီၣ်ဝဲ မဲာ်တဲးလဲးလၢ တၢ်လုၢ်တၢ်ဒဲးဘးအဂီၢ်အညၣ်ဘၣ်အဃိ စီၤမိၤၡ့ သးဒိၣ်ထီၣ်အဝဲသ့ၣ်လီၤ. (၃ မိၤ. ၉:၃) ဘၣ်မနုၤအဃိ စီၤမိၤၡ့ အသးဒိၣ်ထီၣ်တၢ်လဲၣ်.
ယဟိဝၤယွၤ အတၢ်မၤလိာ်လၢ အဟ့ၣ်လီၤဝဲ စီၤမိၤၡ့အပူၤ ပာ်ဖျါထီၣ်ဝဲ လီၤတံၢ်လီၤဆဲးလၢ ပှၤလုၢ်တၢ်အဒိၣ်လၢ အဟ့ၣ်လုၢ်ထီၣ်တၢ်လုၢ်တၢ်ဒဲးဘးန့ၣ် ကဘၣ်အီၣ်ဝဲ တၢ်ညၣ်အဝဲန့ၣ်တစဲး လၢတၢ်အိၣ်ဖှိၣ်အဒဲအဂၢၤအပူၤလီၤ. အဝဲသ့ၣ် မ့ၢ်မၤဝဲဒ်န့ၣ်န့ၣ် အခီပညီမ့ၢ် ယဟိဝၤယွၤ ပျၢ်ကွံာ်ဝဲ ပှၤလၢအဟ့ၣ်လုၢ်ထီၣ် တၢ်လုၢ်တၢ်ဒဲးဘးတဖၣ် အတၢ်ကမၣ်န့ၣ်လီၤ. ဘၣ်ဆၣ် ပှၤမ့ၢ်လဲၤစိာ် ဆၣ်ဖိကီၢ်ဖိလၢတၢ်လုၢ်ထီၣ်အီၤအံၤ အသွံၣ်တနီၤ ဆူဒဲစီဆှံ အဆိကတၢၢ်တဒၢးလၢ အမ့ၢ် တၢ်အလီၢ်စီဆှံအပူၤနၣ် ပှၤတဘၣ်အီၣ်အညၣ်ဘၣ် ပှၤကဘၣ်ဒွဲၣ်အူကွံာ်အီၤလီၤ.—၃ မိၤၡ့ ၆:၂၄-၂၆, ၃၀.
တၢ်မၤအသးလၢ အလီၤသးအုး ကဲထီၣ်ဖဲမုၢ်နံၤအဝဲန့ၣ် ဝံၤအလီၢ်ခံ ဖျါလၢစီၤမိၤၡ့ မၤလီၤတံၢ်က့ၤဝဲ တၢ်ခဲလၢာ် ဒ်ယဟိဝၤယွၤ မၤလိာ်တ့ၢ်အီၤအသိးလီၤ. မဲာ်တဲးလဲး ဒီဒူန့ၣ် ဘၣ်တၢ်ဒွဲၣ်အူကွံာ်အီၤဝံၤလံ ဒီးအသွံၣ်စ့ၢ်ကီး ပှၤတလဲၤစိာ်နုာ်အီၤဆူ တၢ်အလီၢ်စီဆှံအပူၤဘၣ်, ဘၣ်ဆၣ် စီၤအလၤဧစၢ်ဒီး စီၤအံသမၢ်န့ၣ် တအီၣ်ဝဲတၢ်အညၣ် ဒ်တၢ်မၤလိာ်အသိးဘၣ်အဃိ စီၤမိၤၡ့ သးဒိၣ်ထီၣ် အဝဲသ့ၣ် ဒီးသံကွၢ်အဝဲသ့ၣ်လၢ ဘၣ်မနုၤအဃိ သုတအီၣ်ဝဲ မဲာ်တဲးလဲးအညၣ်ဘၣ်လဲၣ်.—၃ မိၤ. ၁၀:၁၇, ၁၈.
စီၤအၤဟရိၣ် စံးဆၢက့ၤဝဲ စီၤမိၤၡ့ အတၢ်သံကွၢ်န့ၣ်လီၤ. မ့ၢ်လၢ ပှၤလုၢ်တၢ်အဒိၣ်လၢ အအိၣ်တ့ၢ်တဖၣ်န့ၣ် ဖျါလၢ မၤဝဲ ဒ်စီၤအၤဟရိၣ်တဲအီၤအသိးန့ၣ်လီၤ. တၢ်န့ၣ်အနံၤန့ၣ် စီၤအၤဟရိၣ် အဖိခွါခံဂၤ ဘၣ်တၢ်စံၣ်ညီၣ်သံကွံာ် အဝဲသ့ၣ်အဃိ ဘၣ်သ့ၣ်သ့ၣ် အဝဲကဆိကမိၣ်ထီၣ်ဘၣ်ဝဲလၢ ပှၤလုၢ်တၢ်အဒိၣ်လၢ အကအီၣ်ဝဲ ဆၣ်ဖိကီၢ်ဖိလၢ ပှၤဟ့ၣ်လုၢ်ထီၣ်အီၤအညၣ်အံၤ လၢသးလၢအသ့ၣ်ညါဒၣ်တၢ်လၢ အကဆှီအပူၤန့ၣ် တအိၣ်ဘၣ်. အဝဲသ့ၣ် အမူဒါတအိၣ်လၢစီၤနၤဒး ဒီးစီၤအဘံဟူၤ မၤကမၣ်တၢ်အဃိ သနာ်က့ ဘၣ်သ့ၣ်သ့ၣ် ကဆိကမိၣ်ဘၣ်ဝဲလၢ အဝဲသ့ၣ်မ့ၢ်အီၣ် ဆၣ်ဖိကီၢ်ဖိလၢ ပှၤဟ့ၣ်လုၢ်ထီၣ်အညၣ်န့ၣ် တမ့ၢ်လၢယဟိဝၤယွၤ ကဘၣ်သူၣ်ဘၣ်သးဘၣ်.—၃ မိၤ. ၁၀:၁၉.
စီၤအၤဟရိၣ် ကဆိကမိၣ်ဘၣ်ဝဲလၢ လီၤဆီဒၣ်တၢ် ဖဲအဝဲအဟံၣ်ဖိဃီဖိ မၤဝဲပှၤလုၢ်တၢ်အဒိၣ်မူဒါ အဆိကတၢၢ်တနံၤန့ၣ် ဒ်သိးအဝဲသ့ၣ် ကဒိးန့ၢ်ဘၣ် ကစၢ်ယွၤ အတၢ်ဘၣ်သးအဂီၢ် ကြၢးမၤဝဲ လီၤတံၢ်လီၤဆဲးန့ၣ်လီၤ. ဘၣ်ဆၣ် မ့ၢ်လၢ စီၤနၤဒး ဒီးစီၤအဘံဟူၤအဃိ ယဟိဝၤယွၤအမံၤ ဘၣ်ဒိဝဲဒီး ကစၢ်ယွၤအတၢ်သးထီၣ်လီၤဘၣ်လၢ အဝဲသ့ၣ်အဖီခိၣ်လီၤ. အဃိ စီၤအၤဟရိၣ် ကဆိကမိၣ်ဘၣ်ဝဲလၢ ပှၤလုၢ်တၢ်အဒိၣ်လၢ အမၤကမၣ်တၢ်တဖၣ် အဟံၣ်ဖိဃီဖိန့ၣ် တကြၢးအီၣ်ဝဲ တၢ်လုၢ်စီဆှံအညၣ်ဘၣ်န့ၣ်လီၤ.
မ့ၢ်လၢအဆၢဖိ ပာ်ဖျါဝဲလၢ “စီၤမိၤၡ့ ကနၣ်ဝဲ ဒီးဂ့ၤဝဲလၢအမဲာ်ညါလီၤ.” အဃိဖျါလၢ စီၤမိၤၡ့ တူၢ်လိာ်ဝဲ အဝဲၢ်အတၢ်စံးဆၢန့ၣ်လီၤ. (၃ မိၤ. ၁၀:၂၀) ဖျါလၢ ယဟိဝၤယွၤစ့ၢ်ကီး ဘၣ်သူၣ်ဘၣ်သးဝဲ စီၤအၤဟရိၣ် အတၢ်စံးဆၢန့ၣ်လီၤ.
လါဒံၣ်စ့ဘၢၣ် ၁၄-၂၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၁၂-၁၃
“ဟံးန့ၢ်တၢ်မၤလိလၢ တၢ်မၤလိာ်လၢ အဘၣ်ဃးဒီး ပှၤလၢအဘၣ်တၢ်ဆါအၢတဖၣ်”
(၃ မိၤၡ့ ၁၃:၄, ၅) ဒီးအလီၢ်လၢအဖံးဝါထီၣ် မ့ၢ်ဝါလၢအညၣ်အဖံးလိၤ, ဒီးမ့ၢ်တယိာ်ဘၣ်ဆူ အဖံးလာ်, ဒီးအဆူၣ်တဝါထီၣ်ဘၣ်ဒီး, ပှၤလုၢ်တၢ်အဒိၣ် ဘၣ်ကးတံာ်ဃာ် တၢ်တီၢ်န့ၣ်နွံနံၤလီၤ. ၅ ဒီးနွံနံၤတနံၤန့ၣ် ပှၤလုၢ်တၢ်အဒိၣ်ဘၣ်ကွၢ်ကဒီးအီၤ, ဒီးကွၢ်ကွၢ်, တၢ်တီၢ်လၢအလိၤ မ့ၢ်အိၣ်ဒၣ်အတၢ်, ဒီးတၢ်တီၢ်အလီၢ် မ့ၢ်တလဲၢ်ထီၣ်ဘၣ်လၢအဖံးလိၤဒီး, ပှၤလုၢ်တၢ်အဒိၣ် ဘၣ်ကးတံာ်ဃာ်အီၤနွံနံၤဒံးလီၤ.
တၢ်ဂ့ၢ်လၢလံာ်စီဆှံအပူၤန့ၣ် မ့ၢ်အချုးစိၤခဲအံၤဧါ
• ပာ်လီၤဆီပှၤလၢ အိၣ်ဒီးတၢ်ဆါတဖၣ်.
လၢစီၤမိၤၡ့အတၢ်သိၣ်တၢ်သီအပူၤန့ၣ် ပှၤလၢအိၣ်ဒီးတၢ်ဆါအၢတဖၣ် ကဘၣ်အိၣ်လီၤဆီဒီးပှၤဂၤလီၤ. ဘၣ်ဆၣ်တၢ်ဂ့ၢ်တခါအံၤ ကသံၣ်သရၣ်တဖၣ် နၢ်ပၢၢ်ထီၣ်ဝဲဖဲတၢ်ဆူးတၢ်ဆါ ရၤလီၤအသးအါအါလၢ အပူၤကွံာ်အနံၣ် ၇၀၀ ဃၣ်ဃၣ်န့ၣ်လီၤ.—၃ မိၤၡ့ အဆၢဒိၣ် ၁၃ ဒီး ၁၄.
(၃ မိၤၡ့ ၁၃:၄၅, ၄၆) ဒီးပှၤဘၣ်တၢ်ဆါအၢလၢအအိၣ်ဒီး တၢ်တီၢ်န့ၣ် ဘၣ်ဖှီအကူအသိး, ဒီးအိၣ်ဘ့ၣ်ခိၣ်, ဒီးကျၢၢ်ဘၢအခၣ်, ဒီးဘၣ်ကိးထီၣ်, တကဆှီဘၣ်, တကဆှီဘၣ်န့ၣ်လီၤ. ၄၆ လၢတၢ်တီၢ်အိၣ်လၢအလိၤ အမုၢ်နံၤခဲလၢာ်န့ၣ် ဘၣ်မ့ၢ်တၢ်တကဆှီဘၣ်လီၤ. မ့ၢ်ဝဲတၢ်တကဆှီဘၣ်လီၤ. ဘၣ်အိၣ်ဝဲဆိးဝဲတဂၤဃီလီၤ. အအိၣ်အလီၢ်န့ၣ် ကအိၣ်လၢပှၤသူၣ်ဒဲလၢခိလီၤ.
wp၁၆.၄ ၉ ¶၁
မ့ၢ်နသ့ၣ်ညါဧါ
ပှၤယူဒၤဖိလၢပျၢၤတဖၣ်န့ၣ် ပျံၤဝဲတၢ်ဆါအၢန့ၣ်လီၤ. တၢ်ဆါလၢအလီၤပျံၤလီၤဖုးအံၤ မၤဟးဂီၤဝဲ ထူၣ်ပျၢ်နၢၣ်တဖၣ်သ့လီၤ. လၢခံ ပှၤက့ၢ်ပှၤဂီၤ ဟးဂီၤကွံာ်ဝဲသ့လီၤ. ကသံၣ်တအိၣ်လၢ တၢ်ကူစါယါဘျါအဂီၢ်ဘၣ်. ပှၤဘၣ်တၢ်ဆါအၢတဖၣ်န့ၣ် ဘၣ်အိၣ်လီၤဆီဝဲ ဒီးဒ်သိးပှၤကသ့ၣ်ညါလၢ အဝဲသ့ၣ်အိၣ်ဒီးတၢ်ဆါအၢအဂီၢ် ဘၣ်ဟ့ၣ်ပလီၢ်ဝဲပှၤဂၤလီၤ.—၃ မိၤၡ့ ၁၃:၄၅, ၄၆.
(၃ မိၤၡ့ ၁၃:၅၂) ဒီးပှၤလုၢ်တၢ်အခိၣ်ကဆိၣ်ကဲၤထီၣ်ကွံာ်အီၤလၢမ့ၣ်အူမ့ၢ်လၢတၢ် ဆါအၢလဲၢ်ထီၣ်ဝဲ, အဃိဒီးကဘၣ်တၢ်မၤဟးဂီၤကွံာ်အီၤလၢမ့ၣ်အူန့ၣ်လီၤ.
(၃ မိၤၡ့ ၁၃:၅၇) အန့ၣ်ဝံၤဒီး, တၢ်ဆါအၢန့ၣ်မ့ၢ်ဖျါထီၣ်က့ၤကဒီးတစုန့ၣ်, တၢ်ဆါအၢအံၤလဲၢ်ထီၣ်ကဒီးဝဲ, ဒီးနကဘၣ်ဆိၣ်ကဲၤထီၣ်ကွံာ်အီၤလၢမ့ၣ်အူန့ၣ်လီၤ.
it-2 ၂၃၈ ¶၃
တၢ်ဆါအၢ
လၢတၢ်ကူတၢ်သိး ဒီးဟံၣ်တဖၣ်. တၢ်ဆါအၢန့ၣ် ကဲထီၣ်အသးလၢ တၢ်လၢဘၣ်တၢ်မၤအီၤလၢသိဆူၣ်မ့ၢ်ဂ့ၤ, တၢ်ကံးညာ်မ့ၢ်ဂ့ၤ, တၢ်လၢဘၣ်တၢ်မၤအီၤ လၢတၢ်ဖံးမ့ၢ်ဂ့ၤန့ၣ် အဖီခိၣ်လီၤ. ဖဲပှၤဆှုၣ်ကွံာ်အီၤအခါ တၢ်ဆါဃၢ်တဖၣ်သံကွံာ်ဝဲလီၤ. ဒီးတၢ်ရဲၣ်တၢ်ကျဲၤလၢ ပှၤဘၣ်ပာ်လီၤဆီ တၢ်ပီးတၢ်လီတဖၣ်န့ၣ် အိၣ်ဝဲစ့ၢ်ကီးလီၤ. ဘၣ်ဆၣ် တၢ်အလွဲၢ်လၢ အဘီလါ မ့တမ့ၢ် အလွဲၢ်ဂီၤသ့ၣ်တဖၣ် မ့ၢ်တလီၤမၢ်ကွံာ်ဘၣ်န့ၣ် မ့ၢ်ဝဲတၢ်ဆါဘၣ်ကူဘၣ်ဂာ်အဃိ ပှၤကဘၣ်ဒွဲၣ်အူကွံာ် တၢ်ပီးတၢ်လီသ့ၣ်တဖၣ်န့ၣ်လီၤ. (၃ မိၤ. ၁၃:၄၇-၅၉) တၢ်အလွဲၢ်ဘီလါ မ့တမ့ၢ် တၢ်အလွဲၢ်ဂီၤတဖၣ် မ့ၢ်ဖျါထီၣ်လၢ ဟံၣ်အဂီၤပၤတဖၣ်အလိၤန့ၣ် ပှၤလုၢ်တၢ်အဒိၣ် စံၣ်ညီၣ်ဝဲလၢ ပှၤကကးတံာ်ဃာ် ဟံၣ်အဝဲန့ၣ်လီၤ. ပှၤအိးကွံာ် လၢၢ်လၢအတကဆှီတဖၣ်, ပှၤကွးကွံာ် ဟံၣ်ကိညါပူၤ ဂီၤပၤလၢအတကဆှီတဖၣ် လီၤတံၢ်လီၤဆဲး ဒီးပှၤလဲၤတၢၤကွံာ်အီၤဆူ ဝ့ၢ်အချၢလၢတၢ်တကဆှီဘၣ်အလီၢ်န့ၣ်လီၤ. တၢ်န့ၣ်အလီၢ်ခံ တၢ်လၢအတကဆှီ မ့ၢ်ဟဲက့ၤဖျါထီၣ်ကဒီးလၢ ဟံၣ်အဝဲန့ၣ်န့ၣ် ပှၤဘိးဘၣ်သ့ၣ်ညါလၢ ဟံၣ်အဝဲန့ၣ် တကဆှီဘၣ်ဒီး ပှၤဘၣ်မၤလီၤပှီၢ်ကွံာ်အီၤလီၤ. လၢၢ်, သ့ၣ် ဒီးတၢ်ခဲလၢာ်န့ၣ် ဘၣ်တၢ်လဲၤတၢၤကွံာ်အီၤဆူ တၢ်လီၢ်လၢအတကဆှီဘၣ်န့ၣ်လီၤ. ဘၣ်ဆၣ် ဟံၣ်မ့ၢ်ဘၣ် တၢ်ပာ်ဂၢၢ်ပာ်ကျၢၤအီၤလၢ အကဆှီန့ၣ် ပှၤဘၣ်မၤ ဒ်တၢ်ကဆှၢကဆှီ အတၢ်ရဲၣ်တၢ်ကျဲၤအိၣ်အသိးလီၤ. (၃ မိၤ. ၁၄:၃၃-၅၇) တၢ်ဆါအၢလၢ အကဲထီၣ်လၢ တၢ်ကူတၢ်သိး ဒီးဟံၣ်တဖၣ်န့ၣ် ပှၤတဲလၢကမ့ၢ် ဒ့ၣ်ဒံၣ် မ့တမ့ၢ် ကုၤတမံၤမံၤ သနာ်က့ ပတသ့ၣ်ညါလီၤတံၢ်ဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၃ မိၤၡ့ ၁၂:၂) ကတိၤတၢ်ဒီးပှၤအံၣ်စရ့လးဖိဒီးစံး, ပိာ်မုၣ်တဂၤမ့ၢ်ဒၢထီၣ် ဒီးဆံးစၢ်န့ၢ်ဖိပိာ်ခွါဒီး, ကကဲထီၣ်တၢ်တကဆှီဘၣ်နွံနံၤလီၤ. ဒ်မုၢ်နံၤလၢအအိၣ်လီၤဖးဝဲလၢ အတၢ်ဆါအဃိတဖၣ်အသိးန့ၣ် ဘၣ်ကဲထီၣ်တၢ်တကဆှီဘၣ်လီၤ.
(၃ မိၤၡ့ ၁၂:၅) ဘၣ်ဆၣ်ဒီး ပိာ်မုၣ်အံၤမ့ၢ်ဆံးစၢ် အဖိမုၣ်ဝံၤအလီၢ်ခံ တဆံလွံၢ်သီအတီၢ်ပူၤန့ၣ်အဝဲ ကဲထီၣ်တၢ်တကဆှီ ဒ်အအိၣ်လၢပိာ်မုၣ် အလုၢ်အလၢ်အသိးန့ၣ်လီၤ. အန့ၣ်ဝံၤ, ပိာ်မုၣ်အံၤ ကဘၣ်အိၣ်ဒံးဆူ ညါဃုဆံဃုသီ တုၤလၢအဘၣ်တၢ်မၤကဆှီအီၤ လၢအသွံၣ်အဃိန့ၣ်လီၤ.
တၢး၀၄ ၅/၁၅ ၂၃ ¶၂
လံာ်စီဆှံ အတၢ်ပာ်ဖျါလၢ လံာ် ၃ မိၤၡ့
၁၂:၂, ၅— ဘၣ်မနုၤအဃိ တၢ်အိၣ်ဖျဲၣ်ထီၣ်ဖိန့ၣ် ဒုးကဲထီၣ် ပိာ်မုၣ်တဂၤလၢ “တၢ်တကဆှီ” လဲၣ်. တၢ်အိၣ်ဖိအိၣ်လံၤက့ၢ်ဂီၤတဖၣ်န့ၣ် မ့ၢ်ဒ်သိး ပှၤအလၢအပှဲၤတဖၣ် ကဟဲအိၣ်ဖျဲၣ်ထီၣ်အဂီၢ်လီၤ. ဘၣ်ဆၣ် မ့ၢ်လၢပှၤဟီၣ်ခိၣ်ဖိတဖၣ် န့ၢ်သါဘၣ် တၢ်တလၢတပှဲၤအဃိ အစၢၤအသွဲၣ်တဖၣ် ဒိးန့ၢ်ဘၣ် တၢ်တလၢတပှဲၤဒီး တၢ်ဒဲးဘးန့ၣ်လီၤ. “တၢ်တကဆှီဘၣ်” တစိၢ်တလီၢ် ဒ်အမ့ၢ် တၢ်အိၣ်ဖျဲၣ်ထီၣ်ဖိ ဃုာ်ဒီး ပိာ်မုၣ်အလုၢ်အလၢ်ဟဲ, ဆှိးထံ (ပိာ်ခွါအချံအသၣ်) ထွးထီၣ်တဖၣ်န့ၣ် ဒုးသ့ၣ်နီၣ်ထီၣ်က့ၤပှၤလၢ တၢ်အိၣ်သးလၢ ပန့ၢ်သါဘၣ်တၢ်ဒဲးဘးန့ၣ်လီၤ. (၃ မိၤၡ့ ၁၅:၁၆-၂၄; စံးထီၣ်ပတြၢၤ ၅၁:၅; ရိမ့ၤ ၅:၁၂) တၢ်သိၣ်တၢ်သီလၢ ဘၣ်ဃးပှၤကကဆှီထီၣ်က့ၤအဂီၢ်တဖၣ်အံၤ ဒုးသ့ၣ်ညါ ပှၤအံၣ်စရ့လးဖိတဖၣ်လၢ အဝဲသ့ၣ် အတၢ်ဒဲးဘး ကဘၣ်တၢ်ပျၢ်ကွံာ်အီၤအဂီၢ် ဒီးကလၢပှဲၤထီၣ်က့ၤအဂီၢ် လိၣ်ဘၣ်ဝဲ တၢ်ပှ့ၤက့ၤန့ၣ်လီၤ. လၢတၢ်န့ၣ်အဃိ တၢ်သိၣ်တၢ်သီန့ၣ် ကဲထီၣ် ‘ပှၤပၢၤတၢ်တဂၤလၢ အဆှၢပှၤဆူခရံာ်’ န့ၣ်လီၤ.—ကလၤတံ ၃:၂၄.
(၃ မိၤၡ့ ၁၂:၃) ဒီးဃိးနံၤတနံၤန့ၣ် ဖိသၣ်ကဒိးတၢ်ကူးတရံးအတၢ်အဖံးလီၤ.
တၢ်ဂ့ၢ်လၢလံာ်စီဆှံအပူၤန့ၣ် မ့ၢ်အချုးစိၤခဲအံၤဧါ
• တၢ်ဆၢကတီၢ်လၢ ကဘၣ်တၢ်ကူးတရံး.
ကစၢ်ယွၤပာ်လီၤဝဲတၢ်သိၣ်တၢ်သီလၢ ဖိသၣ်ပိာ်ခွါအိၣ်ဖျဲၣ်မ့ၢ်န့ၢ်ဃိးသီမး ကဘၣ်ကူးတရံးအီၤလီၤ. (၃ မိၤၡ့ ၁၂:၃) ဖဲဖိသၣ်အိၣ်ဖျဲၣ်ထီၣ်သီသီ အဆိကတၢၢ်တနွံအခါ ပှၤမ့ၢ်ကူးတရံးအီၤန့ၣ် အသွံၣ်ကပတုာ်အဂီၢ် တညီဘၣ်. ဘၣ်ဆၣ် ပှၤမ့ၢ်အိၣ်ခိးတုၤလၢ ဖိသၣ်အိၣ်တနွံဘျဲၣ်န့ၣ် အသွံၣ်ပတုာ်ညီဝဲလီၤ. အဃိ လံာ်စီဆှံအတၢ်သိၣ်တၢ်သီ လၢအဘၣ်ဃးဒီး တၢ်ကူးတရံးန့ၣ် ပှဲၤဒီးတၢ်ကူၣ်သ့ ဒီးကဲထီၣ်တၢ်ဒီသဒၢလၢ ဖိသၣ်သးသမူအဂီၢ်လီၤ.
တၢ်ဖးလံာ်စီဆှံ
လါဒံၣ်စ့ဘၢၣ် ၂၁-၂၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၁၄-၁၅
“ပကဘၣ် အိၣ်ကဆှဲကဆှီလၢ တၢ်ဘူၣ်ထီၣ်ဘါထီၣ်စီဆှံအဂီၢ်”
(၃ မိၤၡ့ ၁၅:၁၃-၁၅) ဒီးတုၤပှၤအိၣ်ဒီးတၢ်ယွၤလီၤန့ၣ် ကဆှီထီၣ်ဝဲလၢတၢ်ယွၤလီၤဒီး, ဘၣ်ဂံၢ်ဝဲနွံနံၤလၢအဂီၢ်ဒၣ်ဝဲ, လၢအကဆှီထီၣ်အဂ့ၢ်, ဒီးဆှုၣ်အကူအသိး, ဒီးသ့စီအညၣ်လၢထံမူလီၤ. ဒီးကကဆှီထီၣ်ဝဲလီၤ. ၁၄ ဒီးဃိးနံၤတနံၤန့ၣ် ထိၣ်လွံၢ်ဘုၣ်ခံဘ့ၣ်မ့ၢ်ဂ့ၤ, ကးက့ၣ်ဖိခံဘ့ၣ်မ့ၢ်ဂ့ၤ, ဘၣ်ဟံးန့ၢ်လၢအဂီၢ်, ဒီးလဲၤဆူယွၤအမဲာ်ညါ, ဆူတၢ်အိၣ်ဖှိၣ် အဒဲအကျဲစၢၤ, ဒီးဟ့ၣ်အီၤလၢပှၤလုၢ်တၢ်အဒိၣ်လီၤ. ၁၅ ဒီးပှၤလုၢ်တၢ်အဒိၣ် ဘၣ်လုၢ်အီၤ, တဘ့ၣ်လၢတၢ်လုၢ်တၢ်ဒဲးဘးအဂီၢ်, ဒီးတဘ့ၣ်လၢ တၢ်လုၢ်မ့ၣ်အူအဂီၢ်လီၤ. ဒီးပှၤလုၢ်တၢ်အဒိၣ် ဘၣ်မၤတၢ်ပူၤဖျဲးလၢအဂီၢ်လၢယွၤအမဲာ်ညါ လၢအတၢ်ယွၤလီၤအဃိလီၤ.
it-1 ၂၆၃
တၢ်လုၢ်ထံ
ပှၤအံၣ်စရ့လးဖိတဖၣ်န့ၣ် လၢတၢ်ဂ့ၢ်အါမံၤအဃိ အဝဲသ့ၣ်အိၣ်ဒီး လုၢ်လၢ်လၢကဘၣ်လုၢ်ထံန့ၣ်လီၤ. ပှၤလၢအကဆှီထီၣ်က့ၤလၢ တၢ်ဆါအၢ, ပှၤလၢအထိးဘၣ် ပှၤလၢအိၣ်ဒီး “တၢ်ယွၤလီၤ” တဂၤအတၢ်ဖိတၢ်လံၤ, ပိာ်ခွါလၢအဆှိးထံဟးထီၣ်, ပိာ်မုၣ်အလုၢ်အလၢ်ဟဲဝံၤအလီၢ်ခံ မ့တမ့ၢ် ပိာ်မုၣ်လၢအသွံၣ်ဟဲ တမ့ၢ်ဒ်လုၢ်လၢ်အသိးတဖၣ် ဒီးပှၤနီၢ်ဒီမါဝၤတဖၣ် မံဃုာ်လိာ်အသးဝံၤအလီၢ်ခံန့ၣ် အဝဲသ့ၣ်တကဆှီဘၣ်အဃိ ကဘၣ်လုၢ်ထံလီၤ. (၃ မိၤ. ၁၄:၈, ၉; ၁၅:၄-၂၇) ပှၤလၢအအိၣ်ဒီး ပှၤသံစိၣ်လၢ ဒဲတဖျၢၣ်ဃီအပူၤ, ပှၤလၢအထိးဘၣ် ပှၤသံစိၣ်န့ၣ် “တကဆှီဘၣ်” အဃိကဘၣ် မၤကဆှီထီၣ်အသးလၢ ထံလၢအကဆှီန့ၣ်လီၤ. ပှၤလၢအတဒိကနၣ် တၢ်သိၣ်တၢ်သီအံၤန့ၣ် “ကဘၣ်တၢ်ဒီၣ်တဲာ်ကွံာ်အီၤလၢတၢ်အိၣ်ဖှိၣ်လီၤ. အဂ့ၢ်ဒ်အံၤ, မၤဘၣ်အၢယွၤအလီၢ်စီဆှံလီၤ.” (၄ မိၤ. ၁၉:၂၀) အဃိ ဒ်သိးပကအိၣ်ကဆှီလၢ ယဟိဝၤယွၤ အမဲာ်ညါအဂီၢ် ပကဘၣ်သ့ကဆှီထီၣ်ပသးန့ၣ် မ့ၢ်တၢ်ကတိၤဒိလီၤ လၢကြၢးဝဲဘၣ်ဝဲလီၤ. (စံး. ၂၆:၆; ၇၃:၁၃; ၡါ. ၁:၁၆; ဃ့း. ၁၆:၉) ယဟိဝၤယွၤ အကလုၢ်ကထါလၢ ဘၣ်တၢ်ဒိလီၤအီၤဒ်ထံအသိးန့ၣ် အိၣ်ဒီးတၢ်စိတၢ်ကမီၤလၢ ကမၤကဆှီထီၣ်တၢ်အဂီၢ်လီၤ.—အ့း. ၅:၂၆.
(၃ မိၤၡ့ ၁၅:၂၈-၃၀) ဒီးမ့ၢ်ကဆှီထီၣ်လၢအတၢ်ယွၤလီၤန့ၣ်ဒီး, ဘၣ်ဂံၢ်နွံနံၤလၢအဂီၢ်ဒၣ်ဝဲဒီး, လၢခံက့ၤန့ၣ်ကကဆှီထီၣ်လီၤ. ၂၉ ဒီးဃိးနံၤတနံၤန့ၣ်ထိၣ်လွံၢ်ခံဘ့ၣ်မ့ၢ်ဂ့ၤ, ကးက့ၣ်ဖိခံဘ့ၣ်မ့ၢ်ဂ့ၤ, ဘၣ်ဟံးန့ၢ်လၢအဂီၢ်ဒီး, ဟဲစိာ်အီၤဆူပှၤလုၢ်တၢ်အဒိၣ်အအိၣ်, ဖဲတၢ်အိၣ်ဖှိၣ်အဒဲအကျဲစၢၤန့ၣ်လီၤ. ၃၀ ဒီးပှၤလုၢ်တၢ်အဒိၣ် ဘၣ်လုၢ်တဘ့ၣ်လၢတၢ်လုၢ် တၢ်ဒဲးဘးအဂီၢ်, ဒီးတဘ့ၣ်လၢတၢ်လုၢ်မ့ၣ်အူအဂီၢ်, ဒီးပှၤလုၢ်တၢ်အဒိၣ် ဘၣ်မၤတၢ်ပူၤဖျဲးလၢအဂီၢ်လၢယွၤအမဲာ်ညါ, လၢအတၢ်ယွၤလီၤ အတၢ်တကဆှီဘၣ်အဃိလီၤ.
it-2 ၃၇၂ ¶၂
ပိာ်မုၣ်လုၢ်လၢ်ဟဲ
ပိာ်မုၣ်တဂၤလၢ “အသွံၣ်မ့ၢ်လီၤ အါနံၤအါသီလၢအတမ့ၢ်ဘၣ် အဆၢအကတီၢ်” န့ၣ်ဘၣ်တၢ်ပာ်အီၤ ဒ်ပှၤတကဆှီဘၣ်အသိးလီၤ. ဖဲန့ၣ်အတီၢ်ပူၤ အဝဲအလီၢ်မံ ဒီးဆ့ၣ်နီၤဝဲအလီၢ်တဖၣ်န့ၣ် တကဆှီဘၣ်အဃိ ပှၤလၢအလဲၤထိးဘၣ် တၢ်သ့ၣ်တဖၣ်အံၤစ့ၢ်ကီး တကဆှီဘၣ်. အဝဲအသွံၣ်မ့ၢ်ပတုာ်န့ၣ် ကဘၣ်ခိးဝဲနွံသီလီၤ. တၢ်န့ၣ်အလီၢ်ခံ အဝဲကကဆှီထီၣ်ဝဲလီၤ. ဃိးသီတသီန့ၣ် အဝဲကဘၣ်လဲၤဟ့ၣ်ဝဲ ပှၤလုၢ်တၢ်အဒိၣ်လၢ ထိၣ်လွံၢ်ခံဘ့ၣ် မ့တမ့ၢ် ကးက့ၣ်ဖိခံဘ့ၣ်လီၤ. ပှၤလုၢ်တၢ်အဒိၣ် ဘၣ်ဟ့ၣ်လုၢ်ထီၣ်ဝဲ တဘ့ၣ်လၢတၢ်လုၢ်တၢ်ဒဲးဘးအဂီၢ် ဒီးအဂၤတဘ့ၣ်လၢ တၢ်လုၢ်မ့ၣ်အူအဂီၢ်လီၤ.—၃ မိၤ. ၁၅:၁၉-၃၀; ကွၢ် CLEAN, CLEANNESS.
(၃ မိၤၡ့ ၁၅:၃၁) ဒီးယွၤစံးဘၣ်စီၤမိၤၡ့လၢ ကဒုးပလီၢ်အံၣ်စရ့လး အပှၤဂီၢ်မုၢ်ဘၣ်ဃးဒီး အတၢ်တကဆှီဘၣ်အဂ့ၢ်ဒ်သိး, အသုတမၤဘၣ်အၢ ဘၣ်တၢ်ဘူၣ်ထီၣ်ဘါထီၣ်ယွၤအဒဲလၢ အအိၣ်လၢအဝဲသ့ၣ်အသူၣ်ဒဲအလီၢ် အခၢၣ်သးတဂ့ၤန့ၣ်လီၤ. မ့ၢ်မၤဘၣ်ဝဲဒီး ကဘၣ်တၢ်မၤသံအီၤန့ၣ်လီၤ.
it-1 ၁၁၃၃
တၢ်အလီၢ်စီဆှံ
၂. တၢ်အိၣ်ဖှိၣ်အဒဲ ဒီးလၢခံ တၢ်လုၢ်ဟံၣ်. ဒဲအဂၢၤ, တၢ်လုၢ်ဟံၣ်အဂၢၤ ဃုာ်ဒီးတၢ်သူၣ်ထီၣ်ဒီတဖျၢၣ်န့ၣ် မ့ၢ်ဝဲ တၢ်အလီၢ်စီဆှံလီၤ. (၂ မိၤ. ၃၈:၂၄; ၂ ကွဲး. ၂၉:၅; မၤတၢ်. ၂၁:၂၈) တၢ်ပီးတၢ်လီ အရ့ဒိၣ်လၢ ဂၢၤအပူၤတဖၣ်န့ၣ် မ့ၢ်ဝဲသရာ်တိၢ် ဒီးတၢ်လုၢ်လီၢ်န့ၣ်လီၤ. တၢ်သ့ၣ်တဖၣ်န့ၣ် မ့ၢ်စ့ၢ်ကီးတၢ်ပီးတၢ်လီလၢ အစီဆှံတဖၣ်လီၤ. ထဲဒၣ်ပှၤလၢ အမၤကဆှီပာ်အသးဒ်လုၢ်လၢ်အသိးတဖၣ် နုာ်လီၤဟးထီၣ်လၢ ဒဲအပူၤသ့ ကိးဆၢကတီၢ်ဒဲးလီၤ. ပှၤလၢအတကဆှီဘၣ်တဖၣ်န့ၣ် နုာ်လီၤလၢ တၢ်လုၢ်ဟံၣ်အပူၤတသ့ဘၣ်. အဒိ ပိာ်မုၣ်လၢ အတကဆှီဘၣ်တဂၤန့ၣ် တဘၣ်ဖီၣ်ဝဲ တၢ်လၢအစီဆှံတဖၣ်ဘၣ်. တဘၣ်လဲၤဝဲဆူ တၢ်အလီၢ်စီဆှံဘၣ်. (၃ မိၤ. ၁၂:၂-၄) ပှၤအံၣ်စရ့လးဖိတဖၣ် မ့ၢ်တမၤကဆှီထီၣ်အသးန့ၣ် ဘၣ်တၢ်ပာ်အီၤ ဒ်ပှၤလၢအမၤဘၣ်အၢ တၢ်လုၢ်ဟံၣ်န့ၣ်လီၤ. (၃ မိၤ. ၁၅:၃၁) ပှၤလုၢ်တၢ်အဒိၣ် လၢအပာ်ကဆှီအီၤတဂၤ ဒီးပှၤလၢအကဆှီထီၣ်တဂၤန့ၣ် ဟဲဝဲသ့တုၤဒၣ်ဖဲ တၢ်အိၣ်ဖှိၣ်အဒဲအကျဲစၢၤန့ၣ်လီၤ. (၃ မိၤ. ၁၄:၁၁) ပှၤလၢအတကဆှီဘၣ်တဂၤ မ့ၢ်အီၣ် တၢ်လုၢ်မၤဃူမၤဖိးအတၢ်ညၣ်လၢ ဒဲစီဆှံမ့ၢ်ဂ့ၤ လၢတၢ်လုၢ်ဟံၣ်မ့ၢ်ဂ့ၤ ကဘၣ်တၢ်မၤသံအီၤလီၤ.—၃ မိၤ. ၇:၂၀, ၂၁.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၃ မိၤၡ့ ၁၄:၁၄) ဒီးပှၤလုၢ်တၢ်အဒိၣ်ဘၣ်ဟံးန့ၢ် တၢ်လုၢ်တၢ်ကမၣ်အသွံၣ်, ဒီးပှၤလုၢ်တၢ်အဒိၣ်ဘၣ်ပာ်ဝဲလၢ ပှၤလၢအကဆှီထီၣ်အနၢ်ကုခိၣ်အထွဲအဖီခိၣ်, ဒီးလၢအစုမုၢ်ဒိၣ်အထွဲအဖီခိၣ်, ဒီးလၢအခီၣ်မုၢ်ဒိၣ်အထွဲအဖီခိၣ်လီၤ.
(၃ မိၤၡ့ ၁၄:၁၇) ဒီးသိလၢအအိၣ်လီၤတဲာ်လၢအစုပူၤန့ၣ် ပှၤလုၢ်တၢ်အဒိၣ် ဘၣ်ပာ်လၢပှၤလၢအကဆှီထီၣ်တဂၤအနၢ်ကုခိၣ်အထွဲအဖီခိၣ်, ဒီးလၢအစုမုၢ်ဒိၣ်အထွဲအဖီခိၣ်, ဒီးလၢအခီၣ်မုၢ်ဒိၣ်အထွဲအဖီခိၣ်, လၢတၢ်လုၢ်တၢ်ကမၣ်အသွံၣ်အဖီခိၣ်လီၤ.
(၃ မိၤၡ့ ၁၄:၂၅) ကမၤသံဝဲသိတဒုန့ၣ် ဒီးဟံးန့ၢ်အသွံၣ်တနီၤဒီးပာ် ထီၣ်အီၤလၢပှၤတဂၤန့ၣ် အနၢ်ထွဲတခီအလီၤစဲၤထိးနါ, လၢအစုမုၢ်ကျၢၢ်လၢ အစုထွဲတခီအလိၤဒီးလၢ အခီၣ်မုၢ်ကျၢၢ်လၢအခီၣ်ထွဲတခီအလိၤန့ၣ်လီၤ.
(၃ မိၤၡ့ ၁၄:၂၈) ဒီးပှၤလုၢ်တၢ်အဒိၣ် ဘၣ်ပာ်သိအိၣ်လၢအစုပူၤ လၢပှၤလၢအကကဆှီထီၣ်တဂၤ အနၢ်ကုခိၣ်အထွဲအဖီခိၣ်, ဒီးလၢအစုမုၢ်ဒိၣ်အထွဲအဖီခိၣ်, ဒီးလၢအခီၣ်မုၢ်ဒိၣ်အထွဲအဖီခိၣ်လၢ တၢ်လုၢ်တၢ်ကမၣ်အသွံၣ်လီၢ်အဖီခိၣ်န့ၣ်လီၤ.
it-1 ၆၆၅ ¶၅
နၢ်
ဖဲစီၤမိၤၡ့ ပာ်ထီၣ် ပှၤလုၢ်တၢ်အဒိၣ်လၢ ပှၤအံၣ်စရ့လးဖိတဖၣ်အဂီၢ်အခါ အဝဲ ဘၣ်ဟံးန့ၢ်ဝဲ သိဖါလၢဘၣ်ဃးဒီးတၢ်ပာ်ထီၣ် ပှၤလုၢ်တၢ်အဒိၣ်န့ၣ် အသွံၣ်ဒီး ဖှူဝဲလၢ စီၤအၤဟရိၣ် ဒီးအဖိခွါတဖၣ် အနၢ်ကုခိၣ်အထွဲအဖီခိၣ်, အစုမုၢ်ဒိၣ်အထွဲအဖီခိၣ် ဒီးလၢအခီၣ်မုၢ်ဒိၣ်အထွဲအဖီခိၣ်န့ၣ်လီၤ. တၢ်န့ၣ်ပာ်ဖျါထီၣ်ဝဲလၢ ပှၤလုၢ်တၢ်အဒိၣ်တဖၣ် အတၢ်ဒိကနၣ်, တၢ်လၢအမၤဝဲတဖၣ် ဒီးအတၢ်အိၣ်မူအကျဲန့ၣ် ကဘၣ်လီၤပလိာ်လိာ်အသးဒီး မူဒါလၢအဒိးန့ၢ်ဘၣ်ဝဲန့ၣ်လီၤ. (၃ မိၤ. ၈:၂၂-၂၄) ဒ်န့ၣ်အသိး ဖဲပှၤလုၢ်တၢ်အဒိၣ် မၤကဆှီထီၣ် ပှၤဘၣ်တၢ်ဆါအၢအခါ အဝဲဘၣ်ဟံးန့ၢ်ဝဲ သိဖါလၢ ဘၣ်တၢ်လုၢ်ထီၣ် ဒ်တၢ်လုၢ်တၢ်ကမၣ်န့ၣ် အသွံၣ်တစဲးဒီး ဘၣ်ဖှူဝဲလၢ ပှၤဘၣ်တၢ်ဆါအၢအံၤ အနၢ်ကုခိၣ်အထွဲအဖီခိၣ်လီၤ. ဒီးဘၣ်ဖှူအါထီၣ်ဝဲလၢ သိတစဲးန့ၣ်လီၤ. (၃ မိၤ. ၁၄:၁၄, ၁၇, ၂၅, ၂၈) ဘၣ်ဃးဒီး ကုၢ်လၢအဲၣ်ဒိးအိၣ်ဒီး အကစၢ် တစိၤသးတဂၤအဂီၢ်စ့ၢ်ကီး ပှၤဘၣ်မၤအီၤဒ်န့ၣ်လီၤ. အကစၢ်န့ၣ် ဘၣ်လဲၤကိးဝဲအကုၢ် လၢကျဲစၢၤအထူၣ်ဒီး ဘၣ်ပျံာ်ဖျိအနၢ်လၢ ထးပျံာ်န့ၣ်လီၤ. တၢ်ပနီၣ်အံၤ အိၣ်လၢအနီၢ်ခိက့ၢ်ဂီၤလၢ အနၢ်ဟူတၢ်သ့အလိၤအဃိ ပာ်ဖျါထီၣ်ဝဲလၢ အဝဲအဲၣ်ဒိးဆဲး ဒိကနၣ်အကစၢ် အတၢ်ကတိၤလၢ တၢ်သူၣ်အိၣ်သးအိၣ်အပူၤန့ၣ်လီၤ.—၂ မိၤ. ၂၁:၅, ၆.
(၃ မိၤၡ့ ၁၄:၄၃-၄၅) ဒီးဟံးထီၣ်ကွံာ်လၢၢ်ဒီး ကွးကွံာ်ဟံၣ်ဒီးဖှူအီၤ ဒီးအီကတ့ၣ်အလီၢ်ခံန့ၣ် တၢ်တီၢ်မ့ၢ်ဟဲထီၣ်ကဒီး, ဒီးအိၣ်ထီၣ်လၢ ဟံၣ်တဖျၢၣ်န့ၣ်အပူၤဒီး, ၄၄ ပှၤလုၢ်တၢ်အဒိၣ်ဘၣ်ဟဲ, ဒီးကွၢ်, ဒီးကွၢ်ကွၢ်, တၢ်တီၢ်မ့ၢ်လဲၢ်ထီၣ်လၢဟံၣ်န့ၣ်ဒီး, မ့ၢ်မးတၢ်ဆါအၢဆိးကဲးလၢဟံၣ်ပူၤန့ၣ်လီၤ. မ့ၢ်တကဆှီဘၣ်လီၤ. ၄၅ ဒီးဘၣ်မၤလီၤပှီၢ်ကွံာ်ဟံၣ်န့ၣ်, အလၢၢ်တဖၣ်, ဒီးအသ့ၣ်တဖၣ်, ဒီးဟံၣ်အအီကတ့ၣ်ခဲလၢာ်ဒီး ဘၣ်စိာ်ထီၣ်ကွံာ်အီၤဆူဝ့ၢ်လၢခိ, ဆူအလီၢ်တကဆှီဘၣ်လီၤ.
g ၁/၀၆ ၁၄, တၢ်လွံၢ်နၢၣ်
ကုၤ—တံၤသကိး မ့ၢ်တမ့ၢ် ဒုၣ်ဒါဧါ
ကုၤလၢ လံာ်စီဆှံအစိၤ
လံာ်စီဆှံပူၤ ပာ်ဖျါဝဲ “ဟံၣ်လၢယွၤပာ်ဃးတၢ်ဆါအၢအဃၢ်” အဂ့ၢ်လီၤ. (၃ မိၤၡ့ ၁၄:၃၄-၄၈, ခ့ခါစှီၤကျိာ်) ပာ်ဖျါဝဲလၢ “တၢ်ဆါအၢအဃၢ်” အဃိ ဘၣ်သ့ၣ်သ့ၣ် ကမ့ၢ်ကုၤထီၣ် သနာ်က့ ပတဲလီၤတံၢ်တသ့ဘၣ်. မ့ၢ်ကဲထီၣ် ဒ်လဲၣ်ဂ့ၤ ဒ်လဲၣ်ဂ့ၤ လၢၢ်လၢအတကဆှီတဖၣ်န့ၣ် ပှၤဘၣ်ထုးပဲကွံာ်အီၤလီၤ. ပှၤဘၣ်ကွးကွံာ် ဂီၤပၤလၢအကိပူၤတပၤဝးဝး ဒီးလဲၤတၢၤကွံာ် တၢ်အကမူၣ်န့ၣ်လၢ ဝ့ၢ်အချၢလၢ “အလီၢ်တကဆှီဘၣ်” လီၤ. တၢ်ဆါဃၢ် မ့ၢ်ဟဲဖျါထီၣ်ကဒီးန့ၣ် ပှၤဘၣ်ပာ်ပနီၣ်လၢ ဟံၣ်ဒီတဖျၢၣ်တကဆှီဘၣ် ဒီးပှၤဘၣ်မၤလီၤပှီၢ်ကွံာ် ဒီးမၤဟးဂီၤအီၤလီၤ. ယဟိဝၤယွၤ အတၢ်ဟံးစုနဲၣ်ကျဲလၢ အလီၤတံၢ်လီၤဆဲးတဖၣ်အံၤ ပာ်ဖျါထီၣ်ဝဲလၢ အအဲၣ်ဝဲအပှၤဂီၢ်မုၢ် ဒီးဘၣ်ယိၣ်တၢ်လၢ အဝဲသ့ၣ်အတၢ်အိၣ်ဆူၣ်အိၣ်ချ့အဂီၢ်လီၤ.
တၢ်ဖးလံာ်စီဆှံ
လါဒံၣ်စ့ဘၢၣ် ၂၈–လါယနူၤအါရံၤ ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၃ မိၤၡ့ ၁၆-၁၇
“တၢ်မၤလိလၢ တၢ်ပျၢ်တၢ်ဒဲးဘး အမုၢ်နံၤ”
(၃ မိၤၡ့ ၁၆:၁၂) ဒီးကဘၣ်ဟံးန့ၢ်ဝဲသပၢၤမ့ၣ်အူလၢအ ပှဲၤဒီးမ့ၣ်အူကဖးလၢ တၢ်လုၢ်လီၢ်ဒီး တၢ်နၢမူကမူၣ်ခံစှီၤ ဒီးဟဲစိာ်အီၤ ဆူတၢ်လီၢ်စီဆှံကတၢၢ်န့ၣ်လီၤ.
ပဒိးန့ၢ်ဘၣ်တၢ်မၤလိလၢ လံာ် ၃ မိၤၡ့အပူၤသ့
၄ ဖး ၃ မိၤၡ့ ၁၆:၁၂, ၁၃ တက့ၢ်. ဆိကမိၣ်ကွၢ် တၢ်မၤအသး ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤန့ၣ်တက့ၢ်. ဖဲတၢ်တနံၤန့ၣ် ပှၤလုၢ်တၢ်ခိၣ်အဒိၣ်ကတၢၢ်တဂၤ ဘၣ်လဲၤနုာ်ဆူ ဒဲစီဆှံအပူၤ ဒီးအဝဲကဘၣ်လဲၤနုာ်လၢ ဒၢးလၢအစီဆှံကတၢၢ်အပူၤ သၢဘျီလီၤ. အဆိကတၢၢ်တဘျီန့ၣ် အဝဲလဲၤစိာ်ဝဲ သပၢၤထူလၢ အပှဲၤဒီးမ့ၣ်အူအ့ၣ် လၢအစုတခီ ဒီးအစုလၢအဂၤတခီန့ၣ် စိာ်ဝဲတၢ်နၢမူအကမူၣ်လီၤ. အဝဲအိၣ်ပတုာ်လၢ ယၣ်ဘျးသဒၢလၢ အဘျးလီၤအသးလၢ ပှၤလဲၤနုာ်လၢ ဒၢးစီဆှံကတၢၢ် အမဲာ်ညါဝံၤ လၢတၢ်ပာ်ကဲအပူၤ အဝဲလဲၤနုာ်လၢ ဒၢးစီဆှံကတၢၢ် ဒီးဆၢထၢၣ်လၢ တၢ်အၢၣ်လီၤအီလီၤ အတလါ အမဲာ်ညါလီၤ. ပမ့ၢ်တဲလၢ ကျဲအဂၤတဘိန့ၣ် လီၤဂာ်ဒ် အဝဲဆၢထၢၣ်လၢ ယဟိဝၤယွၤ အမဲာ်ညါလီၤ. အဝဲလူလီၤ တၢ်နၢမူလၢ မ့ၣ်အူအ့ၣ်တဖၣ်အလိၤဝံၤ တၢ်နၢမူတဖၣ် နၢမူထီၣ်လၢ ဒၢးဒီဖျၢၣ်အပူၤလီၤ. လၢခံတဘျီန့ၣ် အဝဲကဟဲက့ၤစိာ်နုာ်လီၤဝဲ ဆၣ်ဖိကီၢ်ဖိလၢ ပှၤလုၢ်ထီၣ်အီၤအသွံၣ် လၢဒၢးအံၤအပူၤလီၤ. အဃိ ပာ်သူၣ်ပာ်သးလၢ တချုးလၢ ပှၤလုၢ်ထီၣ် တၢ်သွံၣ်လၢ တၢ်ပျၢ်တၢ်ဒဲးဘးအဂီၢ်ဒံးဘၣ်န့ၣ် ပှၤဒွဲၣ်ထီၣ် တၢ်ဆိၣ်ကဲၤနၢမူလီၤ.
(၃ မိၤၡ့ ၁၆:၁၃) ဒီးဘၣ်ပာ်တၢ်နၢမူလၢမ့ၣ်အူဖီခိၣ်လၢယွၤအမဲာ်ညါ, ဒ်သိးတၢ်နၢမူအမ့ၣ်အူလုၣ်ကကျၢၢ်ဘၢတၢ်အၢၣ်လီၤအီလီၤတလါ အဖီခိၣ်ဒ်သိးအသုတထံၣ်အီၤဒီးသံတဂ့ၤန့ၣ်လီၤ.
ပဒိးန့ၢ်ဘၣ်တၢ်မၤလိလၢ လံာ် ၃ မိၤၡ့အပူၤသ့
၅ ဘၣ်ဃးဒီး တၢ်ဆိၣ်ကဲၤထီၣ် တၢ်နၢမူလၢ တၢ်မၤဘၣ်လိာ်ဖိးဒ့က့ၤတၢ်အမုၢ်နံၤ အဂီၢ်န့ၣ် နမၤလိန့ၢ်ဘၣ် တၢ်မနုၤလဲၣ်. လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ အခ့အပှၤလၢ အတီအလိၤတဖၣ် အတၢ်ဃ့ထုကဖၣ်န့ၣ် လီၤဂာ်ဒ် တၢ်နၢမူလၢအဂီၢ်လီၤ. (စံးထီၣ်ပတြၢၤ ၁၄၁:၂; လီၣ်ဖျါ ၅:၈) ဒ်ပှၤလုၢ်တၢ်ခိၣ်အဒိၣ်ကတၢၢ် လဲၤစိာ်ဝဲ တၢ်နၢမူဆူ ယဟိဝၤယွၤအမဲာ်ညါ လၢတၢ်ပာ်ကဲအပူၤအသိး ပဝဲသ့ၣ်တဖၣ်စ့ၢ်ကီး ပဃ့ဘါထုကဖၣ်ဆူ ယဟိဝၤယွၤအအိၣ် လၢတၢ်ပာ်ကဲ ဒိၣ်ဒိၣ်မုၢ်မုၢ်အပူၤလီၤ. ပှၤလၢအတ့လီၤတၢ်ခဲလၢာ်တဂၤ ဟ့ၣ်ပှၤတၢ်ခွဲးတၢ်ယာ်လၢ ပကသုးဘူးပသးဆူအအိၣ် ဒ်ဖိတဂၤသုးဘူးအသးဆူ အပၢ်အိၣ်အဃိ ပစံးဘျုးဘၣ်အီၤဒိၣ်မးလီၤ. (ယၤကိာ် ၄:၈) အဝဲတူၢ်လိာ်ပှၤ လၢပကကဲ အသကိးလီၤ. (စံးထီၣ်ပတြၢၤ ၂၅:၁၄) ပပာ်လုၢ်ပာ်ပှ့ၤ တၢ်ခွဲးတၢ်ယာ်အံၤဒိၣ်မးအဃိ ပတအဲၣ်ဒိးမၤသးအုး ကစၢ်ယွၤအသးဘၣ်.
(၃ မိၤၡ့ ၁၆:၁၄, ၁၅) ဒီးဘၣ်ဟံးန့ၢ်ဂီၤဖံးအသွံၣ်တနီၤ, ဒီးဖှံလၢအစုမုၢ်တဘိလၢ တၢ်မၤပူၤဖျဲးအလီၢ်အဖီခိၣ်လၢမုၢ်ထီၣ်တခီ, ဒီးလၢတၢ်မၤပူၤဖျဲးအလီၢ်အမဲာ်ညါန့ၣ် ဘၣ်ဖှံတၢ်သွံၣ်လၢအစုမုၢ်တဘိနွံဘျီလီၤ. ၁၅ ဒီးဘၣ်မၤသံမဲာ်တဲးလဲးလၢ တၢ်လုၢ်တၢ်ဒဲးဘးအဂီၢ် လၢအမ့ၢ်လၢပှၤဂီၢ်မုၢ်အဂီၢ်, ဒီးစိာ်နုာ်အသွံၣ်လၢယၣ်ဘျးထီၣ်အသးလၢညါခီ, ဒီးမၤအသွံၣ်ဒ်အမၤဂီၤဖံးအသွံၣ်အသိးန့ၣ်, ဒီးဖှံအီၤလၢတၢ်မၤပူၤဖျဲးအလီၢ်အဖီခိၣ်, ဒီးလၢတၢ်မၤပူၤဖျဲးအလီၢ်အမဲာ်ညါလီၤ.
ပဒိးန့ၢ်ဘၣ်တၢ်မၤလိလၢ လံာ် ၃ မိၤၡ့အပူၤသ့
၆ တချုးလၢ ပှၤလုၢ်တၢ်ခိၣ်အဒိၣ်ကတၢၢ်တဂၤ လုၢ်ထီၣ်တၢ်လၢ တၢ်ပျၢ်တၢ်ဒဲးဘးအဂီၢ် ဒံးဘၣ်န့ၣ် အဝဲကဘၣ်လုၢ်ထီၣ်တၢ်နၢမူ ဒ်သိးကစၢ်ယွၤ ကဘၣ်သူၣ်ဘၣ်သးအီၤအဂီၢ်လီၤ. ဘၣ်ဃးဒီး တၢ်ဂ့ၢ်အံၤန့ၣ် ပသ့ၣ်ညါဘၣ် တၢ်မနုၤလဲၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢ ဒီးတချုးလၢ အဝဲဟ့ၣ်လုၢ်ထီၣ် အသးဒံးဘၣ်အခါ အဝဲဘၣ်မၤ တၢ်တမံၤလၢအရ့ဒိၣ်န့ၢ်ဒံး ပှၤဟီၣ်ခိၣ်ဖိတဖၣ် ကဒိးန့ၢ်ဘၣ် တၢ်အုၣ်က့ၤခီၣ်က့ၤအီၤအဂီၢ်ဒံးလီၤ. အဝဲဘၣ်မၤဝဲ တၢ်မနုၤလဲၣ်. ဒ်သိးယဟိဝၤယွၤ ကတူၢ်လိာ် အတၢ်ဟ့ၣ်လုၢ်ထီၣ်အသးသမူအဂီၢ် ဖဲအဝဲအိၣ်မူလၢ ဟီၣ်ခိၣ်ချၢအခါ အကဘၣ်ဒိကနၣ် ယဟိဝၤယွၤအကလုၢ် လၢတၢ်သးတီအပူၤ လၢအတၢ်အိၣ်မူ ဒီတစိၤလီၤ. ယ့ၣ်ၡူးမ့ၢ်မၤဝဲဒ်န့ၣ်န့ၣ် မ့ၢ်ဝဲအပာ်ဖျါထီၣ်ဝဲလၢ ယဟိဝၤယွၤအကျဲန့ၣ် မ့ၢ်တၢ်လၢအဂ့ၤကတၢၢ်လီၤ. ဒီးပာ်ဖျါထီၣ်စ့ၢ်ကီးဝဲလၢ ကစၢ်ယွၤအိၣ်ဒီးတၢ်ခွဲးတၢ်ယာ်လၢ ကပၢတၢ် ဒီးအတၢ်ပၢန့ၣ် မ့ၢ်တၢ်ပၢလၢ အတီအလိၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၃ မိၤၡ့ ၁၆:၁၀) မ့မ့ၢ်မဲာ်တဲးလဲးလၢအလီၤဘၣ်လၢ ဧ့စ့ၤစ့လးအဂီၢ်တဒုန့ၣ် ကဘၣ်တၢ်ပာ်အီၤအိၣ်မူလၢ ယွၤအမဲာ်ညါ ဒ်သိးကမၤတၢ်ပူၤဖျဲးဒီးအီၤ, ဒီးပျၢ်အီၤဆူပှၢ်မုၢ်ကနၢလၢ ဧ့စ့ၤစ့လးအဂီၢ်လီၤ.
it-1 ၂၂၆ ¶၃
ဧ့စ့ၤစ့လး
ဒ်တၢ်မၢဖိပီလူး ၡဲပၠးဝဲအသိး ယ့ၣ်ၡူးန့ၣ် ဟ့ၣ်လုၢ်ထီၣ်ဝဲ အသးသမူလၢ အလၢအပှဲၤလၢ ပှၤဟီၣ်ခိၣ်ဖိအဂီၢ်အဃိ အဝဲဟ့ၣ်လုၢ်ထီၣ်တၢ်လၢ အဂ့ၤဒိၣ်န့ၢ်ဒံး “ကျီၢ်ဖါ ဒီးမဲာ်တဲးလဲးတဖၣ် အသွံၣ်” န့ၣ်လီၤ. (ဧ့ၤ. ၁၀:၄, ၁၁, ၁၂) ယ့ၣ်ၡူးန့ၣ် ဒ်အမ့ၢ်ဧ့စ့ၤစ့လးအသိး ‘စိာ်ပတၢ်ဆူးတၢ်ဆါ’ ဒီး “ဘၣ်တၢ်ဆဲးဖျိအီၤလၢ ပတၢ်ကမၣ်အဃိ” လီၤ. (ၡါ. ၅၃:၄, ၅; မး. ၈:၁၇; ၁ ပ့း. ၂:၂၄) အဝဲစိာ်ကွံာ်ဝဲ ပှၤလၢအနာ် အတၢ်ဟ့ၣ်လုၢ်ထီၣ်တဖၣ် အတၢ်ဒဲးဘးလီၤ. အဝဲပာ်ဖျါထီၣ်ဝဲ ကစၢ်ယွၤအတၢ်ကတဲာ်ကတီၤလၢ အပျၢ်ကွံာ်တၢ်ဒဲးဘး လၢာ်လၢာ်ဆ့ဆ့န့ၣ်လီၤ. လၢတၢ်ဂ့ၢ်အံၤအဃိ မဲာ်တဲးလဲးလၢ ဘၣ်တၢ်ပျၢ်လီၤအီၤ ဒ်ဧ့စ့ၤစ့လး အသိးန့ၣ် ဒိလီၤဝဲ ယ့ၣ်ၡူးခရံာ် အတၢ်ဟ့ၣ်လုၢ်ထီၣ်န့ၣ်လီၤ.
(၃ မိၤၡ့ ၁၇:၁၀, ၁၁) ဒီးပှၤလၢပှၤအံၣ်စရ့လး အဟံၣ်ဖိအကျါမ့ၢ်ဂ့ၤ, ပှၤလၢတခီဘီမုၢ်ဖိလၢ အအိၣ်လၢသုကျါမ့ၢ်ဂ့ၤ, ဖဲဒၣ်ပှၤလၢအီၣ်တၢ်သွံၣ်တမံၤမံၤန့ၣ် ယကပာ်ယမဲာ်ထီဒါ ပှၤလၢအအီၣ်တၢ်သွံၣ်န့ၣ်, ဒီးယကဒီၣ်တဲာ်ကွံာ်အီၤလၢ ပှၤတကလုာ်ဒၣ်ဝဲန့ၣ်လီၤ. ၁၁ အဂ့ၢ်ဒ်အံၤ, တၢ်ညၣ်အသးသမူအိၣ်လၢအသွံၣ်, ဒီးယဟ့ၣ်အီၤလၢသုလၢ တၢ်လုၢ်လီၢ်အဖီခိၣ်, ဒ်သိးအကမၤတၢ်ပူၤဖျဲး လၢသုသးအဂီၢ်လီၤ. အဂ့ၢ်ဒ်အံၤ, တၢ်သွံၣ်န့ၣ်မၤတၢ်မၤပူၤဖျဲးလၢ ပှၤအသးအဂီၢ်လီၤ.
တၢး၁၄ ၁၁/၁၅ ၁၀ ¶၁၀
ဘၣ်မနုၤအဃိ ပဘၣ်စီဆှံ
၁၀ ဖး ၃ မိၤၡ့ ၁၇:၁၀ တက့ၢ်. ယဟိဝၤယွၤ မၤလိာ်ပှၤအံၣ်စရ့လးဖိတဖၣ်လၢ ကဘၣ်ဟးဆှဲး “တၢ်သွံၣ်” တမံၤဂ့ၤ တမံၤဂ့ၤလီၤ. ခရံာ်ဖိတဖၣ်စ့ၢ်ကီး ကဘၣ်ဟးဆှဲးဝဲ ပှၤကညီအသွံၣ်မ့ၢ်ဂ့ၤ, ဆၣ်ဖိကီၢ်ဖိအသွံၣ်မ့ၢ်ဂ့ၤလီၤ. (မၤတၢ်. ၁၅:၂၈, ၂၉) ထဲပဆိကမိၣ်ထီၣ်လၢ ပမၤဘၣ်တၢ်ကမၣ်တမံၤမံၤအဃိ ပှၤထုးထီၣ်ကွံာ်ပှၤလၢ တၢ်အိၣ်ဖှိၣ်အပူၤ ဒီးကစၢ်ယွၤ လဲၤသဒၣ်ကွံာ်ပှၤန့ၣ် ပသးဘၣ်ဒိ ဒိၣ်မးလီၤ. ပအဲၣ်ယဟိဝၤယွၤ ဒီးပအဲၣ်ဒိးဒိကနၣ်အကလုၢ်လီၤ. တၢ်ဘၣ်ယိၣ်မ့ၢ်အိၣ်လၢ ပသးသမူအဂီၢ်ဒၣ်လဲာ် ပတလူၤဘၣ် ပှၤလၢတသ့ၣ်ညါ ယဟိဝၤယွၤ ဒီးတဒိကနၣ်အကလုၢ်တဖၣ်အသးဘၣ်. ဒ်သိးပသုတဒိကနၣ် ယဟိဝၤယွၤ အကလုၢ်တဂ့ၤအဂီၢ် အဝဲသ့ၣ် ကဆီၣ်သနံးပှၤလီၤ. ပတသွီတၢ်သွံၣ်အဃိ အဝဲသ့ၣ် ကမၤမဲာ်ဆှးပှၤလီၤ. ဘၣ်ဆၣ် ပဃုထၢလၢ ပကဒိကနၣ် ကစၢ်ယွၤအကလုၢ်လီၤ. (ယူဒၤ ၁၇, ၁၈) ဒ်သိးပ ‘သးကဆူၣ်’ လၢပကဟးဆှဲး တၢ်သွီတၢ်သွံၣ် ဒီးပသုတအီၣ် တၢ်သွံၣ်တဂ့ၤအဂီၢ် တၢ်မနုၤကမၤစၢၤပှၤလဲၣ်.—၅ မိၤ. ၁၂:၂၃.
တၢ်ဖးလံာ်စီဆှံ